KING YUEN's Profile

查實呢間嘢已經食過兩次(連埋今次)，上次已想寫食評但唔記得記低資料......好好彩兩次去食都唔駛等位(可能我早去啦，入座時間大約是晚上20:00)!同老婆睇左一陣就Order嘢食，我哋叫左北菇滑雞飯、梅菜肉餅飯、蟲草花山珍菇菌燉湯和蟲草花靈芝燉湯(好大食呀)。北菇滑雞飯、梅菜肉餅飯:良，佢哋啲煲仔飯唔係用炭爐煲嘅，不過我哋兩公婆都唔食飯焦所以無咩所謂囉。而且佢哋仲用個竹籃嚟盛住個煲仔飯，故雖熱度十足仍不怕會燙親隻手，夠細心!北菇滑雞飯內的雞我估有可能是雞柳肉，但其一舊雞骨都無的做法我十分欣賞，我唔鍾意骨頭，且市面大多北菇滑雞飯啲雞都係骨多過肉，再加上佢雞肉裡面有少少黑椒(我估)調味，所以我覺得幾好食!梅菜肉餅飯都OK，但我比較Like上次個土魷肉餅飯多啲。蟲草花山珍菇菌燉湯和蟲草花靈芝燉湯:良，一碗足可分三小碗湯，而且用料十足，也無落味精，啲烏雞肉直頭燉到一夾就骨肉分離!真不愧是老火燉湯，鴻福堂和健康工房嗰啲無得比啦，個人還是比較鍾意飲呢類住家靚湯，起碼真材實料，我碗湯直頭飲到見底添。店內員工也有禮貌，雖則後來多人來用餐，她依然先問我哋介唔介意同人哋塔枱才帶人就座，值得一讚!唯一介懷兩點，其一是舖頭面積不大，店內外加埋最多只能坐24人左右，不適合大夥人來用餐。其二是店內無乜冷氣，怕熱的人只能在冬天來補暖身子了。不過我哋兩公婆會耐唔耐嚟開飯的。…Read More

晚上同老婆睇完戲後嚟到觀塘APM Foot Court，係到諗緊食乜之際，見到呢間嘢都OK多人排隊，我又想試下佢同日本嗰邊會唔會差好遠，於是我哋行埋去Order嘢食然後揸揸臨揾位等開飯~~~等左20-25mins左右就有得食啦。(其實見到堆人都預左要等...So Far唔算耐囉)我們Order了2份珍寶黑椒牛肉飯和附送餐湯(我-南瓜湯、老婆-麵豉湯)，我仲加多啲黑椒同加左少少蒜蓉扒汁落去，9秒9拎返埋位後就和老婆一起快速將飯和牛肉又撈又炒，為個人健康著想我倆無整飯焦，攪掂後開餐!!!珍寶黑椒牛肉飯:良，其實呢間餐廳啲鐵板都OK keep到熱度，好唔好食就真係幾睇你功力啦！(手腳慢啲都可能會令味道有偏差...)最好就坐近少少間鋪，唔係你行得返去啲牛肉分分鐘已煎到老哂甚至燶左！(呢點日本嗰間就做得好啲啦)我哋炒到2份牛肉到5~6成熟到，連飯+黑椒+蒜蓉扒汁熱辣辣食都OK惹味!餐湯:可，飲左一啖老婆個麵豉湯，覺得無咩特別。我個南瓜湯就加左啲通粉係裡面，但都唔覺有起到甚麼作用......But都好過普通西餐廳啲紅or白湯嘅......不過餐湯並唔係主打，咁嘅價錢都無咩所謂囉！得閒經過都可能會再食，事關自己玩下鐵板燒都幾好玩丫！…Read More

上星期六又是家庭聚會的好日子，老豆、媽、哥、我和老婆走去元朗棠記辣蟹食飯。去到見到樓下Full哂，以為要等，點知侍應話樓上有位，梗係渣渣臨上去。一睇，張枱係Toilet 隔黎......富堂真係有啲唔想坐低......(個人認為坐門口都好過坐近Toilet食飯......)但丫媽話Never mind 唔介意費事等位，唯有坐最近Toilet個位等佢哋兩老唔駛聞住嗰陣味食飯。由於2樓睇唔到是日精選菜式推介，故落番1樓後才點餸。是日享用菜式:1)豉椒炒檉子:可，普通、沒甚特別。2)剁椒蒸魚頭:良，此評分出自媽和老婆(因我們三父子無食)，她們說味道酸酸甜甜，又不會太辣，食落頗開胃。3)辣酒煮東風螺:優，成晚我覺得最好食就係呢味餸，送飯之選！4)豉椒炒蜆:可，普通、沒甚特別。5)土魷蒸肉餅:可，普通、沒甚特別。6)涼瓜炒牛肉:良，此評分出自哥哥，因他最愛吃涼瓜，所以成碟俾佢攞黎送飯!7)金銀蛋浸莧菜:可，普通、沒甚特別。8)青紅蘿白煲豬:可，預左例湯都係大圍煲湯，湯料內的青紅蘿白尚算足夠，又唔係飲緊味精水，收貨啦。服務方面尚算OK。總括而言，如果係家庭聚會或大圍朋友食飯都會考慮再嚟，如果淨係兩公婆食飯就多數唔會囉。P.S:其招牌菜辣蟹今次無試到(兩老唔食)，下次有機會再嚟要試下先。…Read More