HappyPolly的個人專頁

一號風球，一家三口出灣仔辦D事，完事後，倦倦地想搵個地方休息下，見仲未掛三號，又經過見到合和中心17樓竟然有間 Coffee Shop，近近地就歇一歇先返歸啦。本來擔心食物會好貴，因為我地只係想食少少嘢坐一陣就走，但睇佢好似分開咗兩邊，一邊食正餐，一邊食輕食，咁見輕食價錢都合理，就入去坐喇。一坐低就叫咗2杯咖啡，一杯 Mocha同一杯凍齋啡。食物就應該係餐牌無嘅，應該係行埋去有咩就食咩咁(我估)，咁我地就叫咗2個包，一個煙三文魚Panini同一個雞肉Panini。凍齋啡…無咩特別，普通嘢; 我杯Mocha呢，都好普通。普通咖啡，無咩特別香味，個朱古力味感覺似用朱古力粉開…奶泡又唔香…個煙三文魚Panini呢，如果D菜真係沙律菜嘅話，咁佢熱得over咗少少，條菜有D老… 因為我唔喜歡香草味，而個醬又帶比較濃嘅香草咪，所以我唔多啱食，不過飲凍齋啡嘅丈夫話都ok好食，可能我杯飲品同個包唔夾味。個雞肉Panini其實都ok嘅，尼個無咁重香草咪，但個醬都係漏咗少少，食唔晒，滯滯地。下次重嚟唔嚟呢﹖雖然我覺得麻麻地，但其實佢算對得起個價錢嘅，而且帶住個女尼度有BB櫈，阿女又坐得舒服，所以下次如果要搵地方抖抖，都可以再嚟試下其他嘢。俾多次機會佢。…查看更多

我娘好喜歡吃紙包蛋糕，所以每次見到紙包蛋糕都會諗起娘親。是日同9月上N班嘅女女去太子買校服，行過一間麵包鋪，幾得意喎，有朱古力味同紫薯味紙包蛋糕！再睇下貴寶號先… 超群麵包西餅… 超群麵包西餅﹖wait a  minute！超群！﹖唔係執晒喇咩﹖定係同名嘅鋪頭﹖是旦啦，掉低丈夫同個女喺街就自己衝入去買個紙包蛋糕嚟試下先！入到去見到D包都焗得幾企理，令人食慾大增！咦﹖有曲奇皮蛋撻！買嚟試下先！見到有個酸瓜熱狗包，啱丈夫食，買埋佢啦！出到去，人山人海，行埋一邊先食。問丈夫個酸瓜熱狗包點，佢無咩評語，不過有時買包比佢佢見唔啱心水就寧願餓死都唔食，尼個食晒，應該都唔差得去邊。個蛋撻呢，夠脆，不過略嫌香味唔夠，蛋香爭少少。而個紙包蛋糕呢，先講紫薯，其實初食唔係好覺有紫薯味，但愈食個味就愈出，所以要試多兩啖，同埋個 texture 係同平時紙包蛋糕唔同，係軟身少少又杰少少，好似真係有少少食緊紫薯咁嘅感覺。因為食咗紫薯味紙包蛋糕，相對個朱古力味又無咁特別，不過佢係一個好食嘅紙包蛋糕。個皮好好食，可以成塊起出嚟，個蛋糕嘅質感比平時買到嘅實少少，但係又軟綿綿，下次有機會行過再試埋其他麵包先！…查看更多

跟老闆去食飯，老闆指定要去 The American Club。膚淺兼見識少嘅我心諗︰車，美國嘢，咪又係嗰D，咩扒咩扒同咩扒囉…上網睇下食咩嘅先…咦﹖有4間餐廳﹖咁我地去邊間﹖下﹖原來要會員先入得﹖唔比講手提電話﹖電話要無聲﹖有咩咁巴閉﹖但諗諗下，其實佢嘅要求係好合理。食飯本來就唔應該講電話。食嘢食得唔專注，分咗心嘅話，食緊咩，食咗咩同D嘢食係咩味都會唔記得，食咗等如無食，不如唔好食，或求其食D嘢就算啦，洗咩去高級餐廳食高級嘢﹖晒錢又晒時間。 好喇，帶住濃烈嘅好奇心，終於等到上去食飯嗰日喇。入到去，先發現，我一直以為嘅4間餐廳，原來係同一個地方分咗4個部分而已。我地就係去盡頭嘅餐廳，McKay’s。點餐前，梗係叫D飲品嚟潤下喉先啦。男士多數叫生啤，女士多數叫果汁，我就叫咗唯一一杯可以杯上嘅 Rose。睇完menu之後，我地8個人決定 share 食，因為佢餐牌有D菜都幾大份，一人一份又試唔晒D嘢 (唔知有無下次架嘛！)，所以都係 share 穩陣！坐好之後，侍應生遞上香氣撲鼻麵包一碟。聽到好似係parmesan cheese bread，溫熱，皮脆，內裡鬆軟幼滑，口感細緻，非常好食！加埋旁邊個醬味道層次豐富，好出色嘅一個麵包！跟住唔好同我(老闆)慳，一人一個龍蝦湯先！上菜方式係喺你面前擺好個湯料先，再即席由湯壺倒一條龍蝦燈色杰身嘅湯落個湯碗度。令人充滿期待嘅一個過程。目測係足料嘅，龍蝦味道濃，加上我叫個杯 Rose 一齊飲，鮮味喺口腔俳佪，一層又一層…正！然後上前菜，龍蝦生蠔拚盤。龍蝦大隻，但莫講話鮮，係直頭無味，肉質好實，雖然未至於係趙塑膠…但都應該係趙緊橡膠…生蠔有兩款，好細隻蠔殼嘅細隻生蠔同好大隻蠔殼嘅細隻生蠔。你無睇錯我無寫錯，好大隻蠔殼入面隻蠔係好細隻！先食細隻蠔殼嘅細隻生蠔…少少蠔味，偏淡味 (我習慣唔落任何醬汁咁食)。另一隻好大隻蠔殼嘅細隻生蠔好咸！除咗咸味之外都係咸味，無咩特別。前菜係失望嘅。然後係燒三文魚，嗯…咪就係燒三文魚囉。伴咗D無咩特別嘅燒青椒同車厘茄咁。之後係燒吞拿魚，唔…我好少食燒吞拿魚，我覺得係好食嘅，但唔知點解梗係有D貓罐 feel…跟手係牛。佢地話脆嘅地方好食，唔騷，應該我都食到，但我無試。肉質夠香，但多吃會漏，所以佢地幾個人都食唔晒一碟 (不過又真係好大碟嘅)。而我就食咗少少配菜 - 原個燒蒜頭，都係一般貨色。好喇，我嘅主角出場喇！五成熟黑毛豬！落單嘅時候已經好好奇！點解我地叫黑毛豬嗰時個侍應生會問我地要幾成熟嘅呢﹖難道尼度有傳說中可以半生熟咁食嘅豬肉！！！(我一直都以為香港無得食！)俗語有云︰高音準，中音甜，低音勁。咪就係要嚟形容尼D好似漆黑中嘅螢火蟲咁，咁好食咁多層次咁出色嘅豬肉架囉！個皮又脆又香，熟嘅部份係好甜嘅肉香，生嘅部份係好有咬口嘅豬肉，係煙韌，係香口，係繞樑三日，唔係D龍蝦咁趙塑膠吖…是日領悟︰煙韌同趙塑膠係有好大分別呀呀呀呀呀！！！結果我飽到不得了都仲要食多幾舊。(Well，都係嗰句…唔知有無下次架嘛…)食到差不多，大家問係咪要甜品…又要提一提，唔知有無下次架嘛，梗係食啦…不過你比我出去行返轉先…出到去露台，只見一片漆黑，幾張枱，同埋閃令令嘅夜景。夜景其實我覺得無咩特別…因為尼個角度有一半係真係全黑嘅，一半係有燈光嘅。而燈光下方位置有好貴坐一次又點睇都唔靚嘅摩天輪。好喇，行完就返華山大戰最後的甜品。甜品都算多款，但味道好似都係偏酸。我記得有日式柚子芝士蛋糕，雜莓雪芭，蘋果批咁… 我覺得要食唔甜嘅甜品不如唔好食，所以見佢有朱古力蛋糕就叫朱古力蛋糕啦。另一款朱古力甜品係熱食嘅，朱古力放喺煎pan上，面再臨D棉花糖咁，因為同枱怕漏，所以就無叫到。(而家好後悔無試埋佢吖…)好大個朱古力蛋糕嚟到，面上有D一粒粒嘅…應該係麥提莎…一層層嘅朱古力，睇落幾靚，食落口好實，不過Okay啦，又未好食到要特別稱讚嘅程度…試埋同事D蘋果批… 酸，無香味又唔係好脆，無咩特別。叫埋個 Earl Grey 一齊食都襯唔到咩味出嚟。甜品都有個 side dish，一塊塊嘅黑朱古力，牛奶朱古力，同白朱古力。一入口一陣雪味… 一係唔新鮮，一係就罐頭嘢，總之就唔好食。最後發現仲有個 main course 嘅 side dish 喺度，黑松露芝士薯條！ 芝士係亁身嘅，只係鋪面，黑松露灑晒上D薯條度，每一啖都有脆薯條同黑松露嘅香味… 好好食，又忍唔住飽到滯滯咁都要食多兩啖先！(結果都係我隊晒…)不過尼餐好難評分，因為頭盤真係好差，但主菜又超晒班，天堂與地獄突然這麼近那麼遠咁… 但除此之外其他嘢其實都好普通，我只可以話得個主菜出色D，水吧同甜品都係好一般。但論矜貴度嘅話，超晒班嘅五成熟豬肉絕對有機會係可一不可再(因為佢只招待會員)，所以都比佢 Good 啦。如果你有幸去 The American Club之前見到我尼篇食評，我就喧你主攻主菜，試多幾樣肉類會值得D。…查看更多

上次約咗朋友蕭恩恩黃埔6:30食飯，但唔知點解我有預感佢會甩底，所以無即刻卜位。到差唔多4點半，諗住實食無癡牙啦，點知佢到5點幾就話有張首映戲飛多出嚟要去睇彭于晏。好，後生未婚單身女仕我原諒你。我一家三口返歸食。然後今日突然話有時間呀不如一齊食飯啦，咁，好，今次佢應該唔敢甩我底，就上 Open Rice 睇下有咩好食。咦！﹖有主菜買一送一！好啦，卜，卜突…咦，咩唔係有指定時段半價咩﹖Cap咗圖到時去問先…約咗蕭恩恩係地鐡站等，一齊坐車去黃埔，然後路痴嘅我，咁細個站都唔肯定邊個出口啱，又費時返轉頭搵，算啦過條天橋就係，行啦。去到，喺reception 個姐姐講緊電話。雖然佢無咩表情，但感覺係有耐心同(盡量keep住)有禮貌嘅。我估佢電話個客同我有同一個疑問︰究竟而家係「主菜買一送一」定「指定時段半價」呢﹖因為我聽到佢話︰「只可以用一樣，唔可以兩個一齊用。」(大意係咁啦。)然後問下我兩位成年飯友(蕭恩恩同我丈夫)，丈夫話，梗係要半價啦…Reception姐姐講完電話，我即刻show張cap圖佢睇，佢就話要8點前結帳及離坐先可以使用 Early Bird 優惠，然後就安排我地坐門口最左手邊近門口個位。如果唔介意太近門口的話，尼個位其實OK(我地3大人1兩歲嬰兒)，唯獨是頭頂有個大喇叭，一直不停播歌，聲浪唔算太大，但有嬰兒安排尼個位就唔係幾好，尤其如果太細嗰D，有機會需要瞓覺就麻煩D。回正題，我要求要一張 Baby Chair，但佢地原來只係有附加上普通坐椅上面嗰種舊式Baby Chair，無自己獨立一張嗰D，有少少扣分，因為舊式嗰款唔好用又危險，而且佢仲要無安全帶…好喇，坐定定就睇Menu先…去德國餐廳食飯無理由唔食鹹豬手嘅，所以一定會叫德國鹹豬手，跟手叫多個主菜，女女已經兩歲，可以食少少淡口D嘅嘢，但又怕佢唔鍾意，就叫定個麵包籃，就算女女唔食，大家都可以食，好！就決定叫以下尼4個菜喇︰秘製德國鹹豬手配香滑薯蓉及酸椰菜 (Roasted Pork Knuckle with Mashed Potatoes and Sauerkraut $218)德國檸檬燒雞配香草燒薯及長青豆 (Roasted Half Chicken with Braised Herb Potatoes, Sweet Pepper and Green Beans $175)招牌德式鮮果沙律配合桃，香濃藍芝士，無花果及香蒜奶油醬 (Beerliner House Salad Fruit and Walnut Salad with Cambozola Cheese, Fresh Figs and Buttermilk Dressing $98)德式麵包籃 (Bread Basket $62)鹹豬手嚟到，好香！切開聽到「索索」聲，連耳仔都feel到脆吖！之不過食落口呢，我覺得個皮硬咗D，但D肉係夠香甜嘅，好食！而且出街食飯嚟計，尼個菜唔算太濃味，佢D肉我係放心比女女食嘅。跟住就係燒雞喇。佢肉質無一般燒雞咁鞋口，加埋個汁好好食，女女食咗好多(淨係食雞肉)。配菜都唔馬虎，燒薯好食，仲有舊細細舊黃椒意外地鮮甜！可惜只得一舊仔。不過D長青豆就差咗D，有草青味，唔知係唔夠熟定點，所以無食。一定要提個沙律！好好食！沙律菜同鮮果都好新鮮！我唔食芝士，更加唔食藍芝士，所以我都係食無藍芝士嘅地方，但佢雖然有藍芝士，不過唔會整到成盤菜一陣味，而且另外兩位食客食過尼個藍芝士都讚好食。最後個麵包籃嚟到，D包唔係好啱女女食，但我就食到津津有味，個Pretzel好好食！啱啱上枱嘅時候好夠熱，係熱到手揸唔到嘅程度，但入口就啱啱好，外脆內軟，又香又熱，好正！其他包就一般喇，所以我諗下次我會淨係叫 2 Pcs Pretzel就算。另外佢仲有2個好杰嘅醬…我地都唔係鍾意混醬嘅人，所以都無掂過。尼餐都算滿足嘅，而且有 Early Bird 半價，好適合我地尼D要9點前帶個女返屋企瞓覺嘅小家庭。但同朋友食嘅話，可以8點後去附近另一間食蛋糕坐下都OK嘅。再唔係行出少少都有D幾好嘅糖水鋪。…查看更多

日本媽劇亭阿頭飄洋過海嚟香港巡鋪，又係我識少少（日文）扮代表去做超業餘即時傳譯（傳唔到就）完嘅時候。（？！）行咗灣仔一帶主要店鋪之後，日本媽劇亭阿頭堅持要請我哋兩位（不太）年輕（但仍然）貌美嘅女人去「坐底飲杯嘢」。但佢話佢無Cash喺身囉。之後要唱錢又揾唔到地方唱錢咁唔好煩喇我俾啦不如，呀可以開公數吖咁，傾掂數，去Starbucks啦！但最近嗰間都行好遠。然後我諗起，喂後面間書局頂樓有間 Coffee Shop 吖！未試過不如試下吖！著高跟鞋同迷你裙嘅女同事話：「好吖，行啦！」再跟手同日本媽劇亭阿頭確認一下，三階，大丈夫？大丈夫！好，一切在計劃之中。呵呵，終於我成日行過覺得無咩機會去坐下嘅地方，突如其來有餐屎俾我去呼吸一下本來只屬於文青嘅空氣！行上三樓，少運動嘅港女（s），of coz 有D喘氣，我尼D生咗一件嘅梗係要即刻揾位坐底。喺37度嘅香港巡鋪，真係唔係講少。我成日都諗喺地盤做嘢嗰D點捱呢？回正題。因為我地D汗已經岀到好似啱啱游完水上岸咁，上到去D冷氣都只算係啱啱好，夠舒服。尼間 Coffee Shop 鋪仔細細，灣灣地，好似長條形嘅小河咁，我地就坐喺小河嘅盡頭。因為筆直有限，說時遲那時快，高跟鞋迷你裙女同事已經拎咗 drink menu 俾高層過目，高層一手推開，black coffee please。好，我地兩個港女就一人一杯咖啡，我就試穩穩陣陣嘅 Caramel Mocha ，高跟鞋迷你裙女同事就試 Rose Latte。終於都講到評語喇！Okay la。我上嚟呼吸文青風之嘛。完。…查看更多

每間公司都有個甜心或者開心果，我地今日就係同公司嘅開心果補吃生日飯。上到去唔洗等位，即刻就有得坐。入到去見到地方四正，有兩邊都係大窗，本來間格都算開揚舒服，但係有幾條大柱阻咗少少景觀，不過因為裝修帶點古堡感覺，少少幽暗倒成為特色，與裝修風格相襯，互相揮映。再細心睇下裝修，每一盞燈都有花心思，不是隨隨便便覺得靚就掛上去。未上菜嘅時候可以好好欣賞一番。我地坐咗喺一張8人枱，張枱都頗大，每一個坐位都係一張單人皮梳化，相當闊落，成個氣氛都夠古典。好喇，我地6個女人，每個都係叫 setlunch，2個牛，3個羊，1個三文魚(我)，大家都好滿意。評語︰牛︰夠腍，唔騷，軟硬適中，有驚喜;羊︰唔騷，口感軟硬適中;魚︰魚上面鋪咗D脆脆，但唔係好食到咩味; 反而個西蘭花蓉有D驚喜，因為未食過，有新鮮感，但成個菜算係口味偏淡。後來有同事要咗D mustard ，我加咗少少落個汁度，先至成個菜有返D鮮味。最驚喜算係上菜速度。lunch time 時間有限，要喺有限時間上到菜而D菜又要見得人其實都唔容易，仲要我地今次食完仲有時間 Hea 下吹下水先返office都游刃有餘，尼點已經值得再次幫襯 最後講埋甜品同咖啡，甜品係 Chocolate Brownie ，one of my favourite，我好食得甜嘅，尼度個 ChocolateBrownie應該都係罐頭嘢，無咩特別，唔難食，亦唔特別好食: 我飲開 Black Coffee，個咖啡都不過不失，少少淡，無咩香味，不過唔算難飲嘅。用女仔嚟形容嘅話，唔醜樣，不過都唔靚囉。但overall 嚟計，都有75分。最重要係，講英文嘅外籍waitress 都笑容可掬，禮貌週到。…查看更多

 名牌，代表質量，也代表貴，什至有時只係貴嘅代名詞，質量並不一定與價錢成正比。所以當決定食Godiva軟雪糕嘅時候，係抱住踢館嘅心態，睇下可以點樣去證明︰「車~軟雪糕可以有幾好食﹖就算有幾好食咪又係軟雪糕之嘛。」我真心係咁諗嘅。走入去，問喺咪淨係得一隻味﹖(因為我諗住有分咩牛奶，濃味，特濃之類嘅嘢。)女侍應回答︰「係，得一隻。」咁好啦，俾一杯我。整好之後，女侍應將個軟雪糕放喺個軟雪糕模型隔離---係同個模型一模一樣架！先睇外型，雪糕質地好實在，旁邊嗰塊牌係堅嘅朱古力---唔係平時就咁插張紙就算。雪糕筒邊有D朱古力碎，唔知咩味呢﹖觀察完外型之後，結論係佢個樣係幾靚仔嘅，不過味道先係最緊要丫！好，嚟喇… 食啦！一啖咬落去…好香嘅朱古力味呀呀呀呀呀)))而且係質地好實在嘅軟雪糕，唔係雪到好凍會令D牙軟晒，但又唔會一入口就溶到水咁，有少少咬口得嚟又唔係杰身嘅，仲好柔軟同溫柔。跟住食埋嗰塊應該係黑朱古力，香軟朱古力軟雪糕加上再濃味少少嘅黑朱古力，味道層次變得豐富！再食下去到雪糕筒邊，有脆脆地嘅朱古力同果仁碎，口感層次再次提升！之後就係軟雪糕同雪糕筒嘅配搭，又軟又脆，直到永遠，阿門。諗住踢館，熱烈地彈熱烈地唱，點知結果佢竟然係---無得彈。真係要講嘅話，就係個雪糕筒唔算好香同脆，但，咁又如何呢﹖主角係Godiva嘅朱古力，佢每一個味道同層次都係為左突出朱古力嘅味道，所以根本就唔算係失分嘅地方。$45蚊一杯嘅軟雪糕，幾咁奢侈，但我竟然覺得值… …查看更多

我哋都算蘇三常客，但多數都係食晚餐，午餐就比較少。今次我哋不約而同點左要等廿分鐘嘅食物，就係檸檬魚柳天使麵同埋蜜糖咖啡焗豬排飯。檸檬魚柳天使麵丈夫讚好味，檸檬味好搶，魚柳因為用鹽醃過，唔係一般魚柳味，係比較似咖央味或者咸魚味咁。個天使麵煮得好靚，真係一條條好幼細咁，我淨係睇都覺得靚，再加上唔知咩高人幫佢改個咁靚嘅名，天使麵，Angel hair，成件事都好優雅。我個蜜糖豬排呢，因為電話壞壞地，本來有影到相，但返屋企睇就無左…講番個味道。佢係好踩界嘅味道，一不小心就會煮得好難食，而佢尼個不過不失啦。咖啡煮出嚟有D苦，蜜糖味唔係好夠，不過有好多菜，而且豬排好新鮮，新鮮到呢，我尼個唔太食到肉味嘅人就唔多喜歡。都係啱丈夫口味多D，佢都讚個豬排好食。睇嚟蘇三都係適合老饕嘅地方。美中不足嘅係，咖啡差過之前少少，同埋，蘇三喺好講究食物料理方法嘅同時，佢嘅水吧好似求其左少少… 因為奶茶都只係用 Lipton 丫……查看更多

喺紅磡都碌左一段日子，想唔食大路嘢嘅話，其實真係無咩好食。(講緊嘅係西餐。)自從 Cafe Abito 出現左之後都有少少期待，因為我哋兩夫妻好鍾意食三文治之類嘅輕食，佢開張嘅時候喺度試過一次，有三文魚黑炭包食，雖然係幾特別，不過味道其實一般。但唔緊要，第一次食可能始終都係新開張，經驗未夠，因為我最喜歡支持小店，如果餐牌有改進，有新口味我哋都會比機會再試。(當然第一次都要唔好太差，睇到有進步空間先會比機會。)今次見佢加左 All day breakfast，我最喜歡食 All day breakfast，所以一有時間就嚟試吓。雖然，All day breakfast 都係嗰D嘢，即係蛋丫，腸丫，豆丫，麫包丫，煙肉丫咁，但煮得好唔好同用咩材料出嚟個效果可以差天共地。佢尼個 All day breakfast 呢，只可以話 match 番紅磡區水準，不過不失啦。個蛋唔係特別滑，麫包都係普通嘢，煙肉其實應該要煎到脆先啱。(但可能香港人唔鍾意脆煙肉﹖因為最近食好多都係軟林林嘅。)火腿都係嗰D嘢，煎過咁解，蕃茄都係煎過囉，焗豆都係嗰D焗豆，一條豬肉腸，一條係芝士腸。其實真係無咩特別，最特別嘅係喺紅磡有得食似樣少少嘅 All day breakfast 而已。另外無影到相嘅係丈夫叫嘅吞拿魚天使麵，都係無咩特別，唔難食，都係咁。唯一可以讚吓嘅係我叫嘅餐茶，佢個紅茶唔係 Lipton 丫！！！(其實 Lipton 真係好鞋，而且我自己都沖到，係餐廳唔該認真少少比D唔同嘅嘢我得唔得呢﹖) 而係一隻少見嘅英國牌子荼包，係唯一一樣唔係「都係嗰D嘢」嘅嘢。幾好飲，見番少少誠意。要講少少嘅係，丈夫食左兩次意粉，食完都有少少滯，可能同用嘅材料有關。再加上其他食物嘅材料，如果每一樣，或者至少一半食材都提升番少少，成個餐會加分好多。希望佢繼續努力。…查看更多

是晚丈夫好有興致想要去「食餐好少少嘅」，就提議不如去九龍城行吓睇吓有咩好食。嫁狗隨狗嘅我當然無意見啦。行左幾間之後鎖定目標，就 Chicken n Egg啦！一來價錢看來尚算合理，二來選擇食材有要求(澳洲入口無激素走地雞，啱晒大肚婆。)，三來裝修環境不俗，倆口子喺度渡過最後一個二人世界嘅 Boxing Day，應該會相當美滿。入到去侍應安排我哋坐最入面嘅二人枱，可能因為天氣凍，我又怕凍，坐落個位之後，枱下面一直有D涼風吹過，所以我一直都覺得凍。(已經著長褲架喇。)唔夠貼心嘅地方係，佢供應嘅水都係凍嘅。(當然，尼D因人而異，丈夫係唔介意飲凍水嘅。)我知自己怕凍，所以有帶私家熱水。不過，我相信我提出要求嘅話，佢哋係會有熱水供應嘅。跟住就睇吓 Menu，諗吓叫咩食喇。其實佢個餐單都已經 set 好晒，有前菜(自家製麫包/沙律)，主菜(雞/意粉)，飲品(果汁)同埋甜品。就只係睇下叫咩口味。最後我哋叫左個燒南瓜沙律，孜然煙肉燒雞，蘑菇長通粉同埋一枝紅酒。最先嚟到嘅係自家製麫包。外脆內軟，溫溫熱熱，淡淡嘅麫包香，加上溶得啱啱好嘅牛油，合格。如果有湯一齊食就仲好，不過湯要另外叫，但我哋都唔太喜歡喺餐廳飲湯，所以無叫到。跟住就係燒南瓜沙律。有我最喜歡嘅火箭菜！好開心！南瓜無渣，好香。沙律油同醋味夾得幾好，係一個好味嘅南瓜沙律，唯一缺點就係凍左少少。之後就係蘑菇長通粉。因為我唔喜歡 Cream Source，所以尼個長通粉我食左好少，太滯胃了。我唔食 Cream Source，牛，又唔食得咖哩，蝦，蟹(住)，其實佢個意粉 Menu 對我嚟講真係無咩好揀… 不過，尼個長通粉丈夫相當滿意，Cream Source夠香，D通粉煮得夠硬身，蘑菇味香得嚟唔會好重口味，只係食嘅時候覺得太淡口了，我食嘢好淡口都覺得佢唔夠咸，加左鹽同胡椒粉就好味了。到主菜上場了。因為叫嘅時候侍應只係話有咖哩同 Bacon 味可以揀，但無講原來係孜然煙肉味，嚟到聞到味先知係孜然煙肉。因為丈夫唔喜歡孜然味，所以有少少失望。唔計係孜然味的話(我個人無咩所謂，唔特別喜歡又唔特別討厭孜然。)，其實個燒雞都相當唔錯，肉質的確同平時食開嘅唔同，硬身少少，咬口多少少，有肉香。個皮燒得煙煙韌韌。但論滑度的話，同平時食嘅蒸雞比，尼隻燒雞算鞋口，不過唔同做法，無得咁比較，只係想講個口感嘅分別。如果對比平時食嘅吊燒雞的話，佢會比吊燒雞再鞋口D，可能因為係走地雞﹖所以其實係肉嘅質感唔同而已。紅酒我無飲到，不過丈夫睇嚟飲得幾高興，應該都唔會太差。而且 Match 番D食物，紅酒都係澳洲嘢。而澳洲紅酒入面，Shiraz都係丈夫喜歡嘅口味。Overall嚟講尼一餐相當唔錯，唔計枝紅酒的話盛惠港元三百零蚊，都算抵食。而酒嘅價錢呢…幾乎係尼餐嘅一半丫…不過喜歡飲酒嘅人，食美味嘅食物嘅時候點可以無美酒相伴呢﹖對喜歡杯中物嘅人嚟講，有美食無美酒都係無左一半。當然，如果酒配得好嘅話，貴少少都值嘅。但配酒配得好嘅餐廳真係唔多。尼次我唔飲得酒，所以無得評論佢配得好唔好，但丈夫係配酒尼方面都無特別讚賞，應該都係一般。不過點都好，尼餐我哋係相當滿意嘅。最後應該食個甜品做總結，但係因為諗住去買半熟蛋糕返屋企嘆，所以就無喺度食甜品了。不過最後都係食左另一樣嘢，想知我哋食左咩，就要睇我其他post喇。…查看更多

懷孕了，最近口味有點改變，好想念香港嘅懷舊味道。和丈夫喺九龍城晚飯後，本來想去買個半熟蛋糕返屋企慢慢嘆，可惜半熟蛋糕已經打烊了，唯有四周行吓睇下有咩好食。九龍城甜品店好多，出名嘅多，好味嘅都多，但來來去去都不外乎紅豆沙，芝麻糊…新潮D嘅斑戟加雪糕，心太軟，再唔係就芒果榴槤等等…講真真係食到有D厭。(而且點解一年四季都有芒果同榴槤﹖)正想放棄之際，丈夫見到對面街有間合成甜品，抱著都行左咁多間，都唔爭在望埋佢賣咩啦嘅心態走過去睇吓。尼個決定非常之正確 - 正正就係我好想揾嘅懷舊風味！而且仲有我好like嘅馬蹄露！留心望吓個Menu，幾乎都係未試過嘅味道！好開心！因為懷孕加上體質問題，其實都好多嘢唔食得。例如紅豆沙，會滯胃;腐竹又會太涼等等。最後就揀左蓮子百合紅豆馬蹄沙。每樣都食少少過吓口癮咁啦…入去坐低，等左一陣個糖水就到到左喇。食左一啖，即刻甜上心頭丫！夠熱，而且熱得嚟入口唔會好燙，又唔會好杰，個甜味係淡左少少，不過我喜歡，始終夜晚唔好食太甜，同埋唔係死甜，應該係用靚糖;啖啖都有馬蹄碎，有D嘢咬吓，又唔會好大粒; 紅豆夠林，一食就即溶咁，有D沙，口感非常好。飲晒D糖水之後發現個底好多料，不過因為我唔食得太多紅豆，所以就唯有食埋D百合，幾粒蓮子就埋單走人了。盛惠港元三十蚊。老實講係有D貴，不過好食，無咩所謂啦！食完行出街，成身暖晒，好滿足咁返屋企了。…查看更多

喺免費報紙見到 Cath Kidson 同 Feast 合作推出碎花英式下午茶已經好有興趣，但究竟係點樣合作呢﹖報紙倒冇咩詳細介紹。經過一番調查之後，打聽到原來係用 Cath Kidson 嘅餐具喺Feast酒店入面嘆茶，聽到都覺得吸引丫！而且除左 Cath Kidson 之外，仲有甜品設計師 Penney Pang 設計甜品丫。(我仲特登問職員，甜品設計師係齋設計定會造埋甜品﹖答案係甜品設計師真係齋做設計，甜品都係酒店餅房負責嘅。真係孤陋寡聞。) 跟住同姊妹們confirm左日期之後就即刻 book 位，超級期待。點解我咁留意邊個造餅呢﹖因為去過Feast幾次，晚餐嘅甜品都相當有水準，所以希望可以食得番咁上下水準嘅甜品。又，正所謂「好睇唔好食」，好怕D甜品只顧賣相犧牲咗個味道，所以食尼個tea之前都對甜品嘅水準有DD保留。結果呢，係有少少失望嘅 – 因為喺同一個地方食過好味嘅甜品，所以有D先入為主。但其實 overall 都係好味嘅。好喇，講番當日個下午茶。因為我係最遲一個到酒店，所以我一去到就已經有一個好靚好靚嘅 Tea set等緊我 - 三層高嘅靚茶點，齋睇都覺得好開心。坐低之後就即時有侍應姐姐走埋嚟問要咩茶，我哋三位女士分別要咗2杯檸蜜同1杯茉莉花茶。由上面開始。第一層係法式玫瑰忌廉Macaron，做得好靚好精緻，粉紅色加白色同埋玫瑰花pattern，個color theme都中晒女士們嘅口味。食落個皮好脆，質感實淨而且啖啖都有好香嘅玫瑰花味，一開始就覺得好幸福了！中層係伯爵茶小蛋糕同橙蜜朱古力。伯爵茶小蛋糕上面個玫瑰花同D 藍色Cream 應該都係糖霜，只可以話係唔難食嘅糖霜… 塊綠色嘅葉就係酸嘅… 個伯爵茶小蛋糕有淡淡地嘅茶味，少少甜，佢個甜度其實調得幾好，再加上我飲緊茉莉花茶，少少茶嘅苦味同花香味，兩個香味加埋好夾。所以食甜品，一杯香味濃郁嘅熱茶係唔少得。因為我個人唔多欣賞帶橙味嘅甜品，個橙蜜朱古力就唔多岩我心水，而且太甜了。不過橙味朱古力通常都係比較甜嘅，可能因為佢應該係配濃茶食嘅﹖定係應該配烈酒呢﹖而且食得出佢個朱古力應該唔係用靚朱古力造，又或者儲存得唔夠好，個朱古力唔夠香。而且豹紋設計唔算好特別。去到最下層，就有好香口，唔會太甜，食完唔會「惹痰」曲奇餅; 又滑又軟棉棉嘅泡芙; 同埋有好香吉士餡嘅鮮果撻。三樣都好精彩。我哋嗰3杯茶都係用Cath Kidson茶杯裝，好靚。朋友叫嗰兩杯檸蜜仲係原樽英國蜜糖一齊上，果然係好細心。我嗰杯茉莉花茶好香，送甜品一流。而且我哋仲有一人一個熱水壺，可以自己添飲。不過可能唔夠茶壺，就無得用 Cath Kidson 嘅茶壺了。食完主題食物其實都飽左一半，始終係甜品，都係有少少膩嘅，所以我哋之後就食D好新鮮嘅沙律，清清膩。不過見佢有甜品，我哋坐咗一陣，都係去咗攞甜品食。尼個長長地嘅物體係夾餅，好好食，又脆又香，咩醬都冇已經好食。食咁多凍嘅甜品之後食個熱熱哋脆餅真係好開心，而且佢有半隻手臂咁長，有好多位畀你加唔同嘅配料上去，一次過試幾個味都得，我哋3位女士食咗4條！另外仲有D三文治同麵包，不過一來太普通，二來我哋都真係好飽，所以都冇食到。旁邊仲有四款口味嘅 Danish，我試咗一個素嘅 Danish…只可以話太西式了，唔太岩口味。而且我真係講唔出究竟食緊D咩。最後就係雪糕了！好好味嘅士多啤梨雪糕！酸酸甜甜，竟然可以清飽滯！而且個甜筒唔係一般原味甜筒，係綠茶味架！個味夾得好perfect池！最後都係食完又食，食咗兩個。埋單用埋最紅嘅匯豐信用咭找數，仲有9折添！所以尼餐好睇好食又好玩，以後可以多D尼D類型嘅afternoon tea就好喇！不過我哋就冇小禮物，因為已經送晒LU。…查看更多

紅磡漆咸道昇御門開左個新商場Chatham Gate，我哋預期佢點都會有間餐廳，最近就發現佢真係喺頂樓開左間新餐廳 - 薩莉亞意式餐廳。行過佢門口，見佢裝潢用色都係紅白綠，強調代表意大利嘅顏色，但唔知點解都係覺得好似好鄉下Feel，所以起初都覺得係咪真係意大利餐廳﹖到佢正式營業，坐底睇真D個餐牌，原來係日本嚟嘅日式意大利餐廳，所以有咁嘅感覺唔出奇。日本嘅意式餐廳都係帶d鄉村Feel，當街景換左喺香港，感覺就同鄉村風味好似有點格格不入，但行到入去就感覺到，的確係日式嘅意大利。當晚餐廳都有八成滿，我哋唔洗等位就即刻可以坐底了。睇睇餐牌…先唔理D嘢岩唔岩食，但係…點解咁平嘅﹖周打海鮮湯九蚊﹖﹖我有冇睇錯﹖再睇下其他食物… 我突然覺得我好似坐左叮噹個時光機返左去十幾廿年前 – 那個美好的舊時代…好感動。好喇，冷靜落嚟之後諗下…其實會唔會D嘢食好細碟呢…﹖所以我哋就打算叫少少嘢食下先，唔夠先再叫啦。食意大利嘢 (定係應該叫日式嘢呢﹖)，當然要試下個Pizza同意粉，所以叫左 煙肉菠蘿比薩($29) 同 吞拿魚蕃茄辣汁意粉($29)，另外再加個 蒜蓉焗田螺($24)，食住先。叫侍應落單嘅方式都跟足日本，係枱面有個小鐘仔，按一下，等一陣就會有侍應走過嚟，唔洗向住空氣大叫︰「唔該 ) ) ) ) ) )」落左單等一陣就嚟左個Pizza。老實講，喺今時今日百物騰貴嘅年代，就算畀我搵到間好平嘅餐廳，都唔敢對佢有咩期待。而且佢個價錢能唔能夠圍到皮呢﹖就算圍到皮，佢其實又用D咩料呢﹖都係我所擔心嘅事。好嘅材料喺任何年代都唔會平得去邊。(或者要花好多功夫先至得到，時間成本一樣係番度。) 除非個老闆好有營商之道啦！講番個Pizza，可能就係因為冇期待，亦都冇失望，佢係一個好正路嘅8” 煙肉菠蘿Pizza。賣相唔錯，煙肉同菠蘿都鋪滿晒個面，下面有D芝士，個底都焗到脆脆地，無咩可以插。始終煙肉菠蘿Pizza尼樣嘢，應該都好難整得難食，佢只係欠缺D香味同個性。不過 $29，想點﹖跟住就係吞拿魚蕃茄辣汁意粉。食得出應該係罐頭吞拿魚，現成蕃茄汁，普通嘅意粉，少少辣，就咁。唔難食嘅，都唔會覺得好重味精。(因為尼D都食慣左﹖)最後係蒜蓉焗田螺，佢完全係得蒜蓉墊底，一D薯蓉都冇。(完全冇違反商品說明條例。) 我喜歡蒜蓉味，所以對我嚟講ok嘅，但唔喜歡濃郁蒜蓉味嘅朋友請三思。至於個田螺呢，冇鮮味，亦都冇咩味，而且太油，唔推介。以上都只係 $82，冇加一。ごちそうさまでした。…查看更多

是日要搵個好少少嘅地方，兩對夫婦一齊要認真地傾D嘢，不過因為係好臨時嘅決定，我都係上OpenRice撞下彩，睇下有咩好選擇。之前試過失手去左D同預期差好遠嘅地方，所以今次打醒12分精神去揀，因為唔係隨便食餐飯，而係要認真傾D嘢，所以不容有失！好彩今次有驚喜，亦令我哋對將會實行嘅計劃多D期待。餐廳地點係駱克道嘅駱克駅… 駱克駅﹖我聽都未聽過，雖然餐廳係我搵，位都係我訂嘅，但如果唔係丈夫話我知「即係SOGO後面囉！」身為一個路痴我一定要搵好耐先搵到。平時成日行過都唔覺尼度有棟咁嘅大廈，真係孤陋寡聞。搭 車立 上去嘅時候發現原來成棟駱克駅大廈都係餐廳，而且每一間都係兩層，好有特色！此時已決定下次要再嚟試下其他嘅餐廳。(集中就有這種好處，誰說同行一定如敵國呢﹖)一出 車立 就已經係OTTO了，我係最遲一個到，丈夫同朋友夫婦以及其小朋友都到齊晒了。當我未上到去嗰時丈夫打畀我話「嘩，尼間嘢好靜丫…」，「好靜嘅意思並不是「拍烏蠅」嘅意思，而係真係好安靜，我當時覺得可能因為時間尚早者(但其實已經係夜晚8:00了) 當我真係上到去，發覺原來OTTO都算係一個幾有情調嘅地方，兩口子HEA下食下嘢都幾唔錯。侍應只有兩位叔叔，當我坐埋位之後其中一位侍應就拎左餐牌畀我。睇睇餐牌，餐牌內容有多道主菜，豬牛羊雞同海鮮嘅選擇都有，梗有一款岩心水， 除非… 閣下係素食者啦，素食者嘅選擇可以話係冇嘅。另外睇得出菜單嘅設計係有落心思嘅，佢個套餐包括一款前菜同一款餐湯，兩樣都係二揀一。當日前菜嘅選擇係鮮帶子同前菜小拼盤(Platter)-包括Parma Ham，蟹肉沙律同埋勺草三文魚。Platter上枱嘅方式很精緻，一個長碟上面放有三個向住同一方向的湯匙，每一個湯匙都有一款小吃，齌睇已經覺得好得意；另一款前菜係薄切鮮帶子，帶子下面有少少帶酸味嘅醬汁，伴碟就係半個對半切開嘅車厘茄。帶子新鮮爽甜，酸味醬汁提鮮，令帶子味道突出，食落開胃又醒神！最後先食車厘茄，清新口腔為下一道菜作好準備。之後就係餐湯，二揀一嘅選擇有南瓜湯同招牌蘑菇湯。南瓜湯我無試到，不過顏色同質感睇落應該唔會唔好味，只係會有幾好味咁解者。招牌蘑菇湯無令人失望，好香濃嘅蘑菇味，而且有少少咬口。佢唔係打到好杰，好湯羹嘅質感，反而係有少少稀，但稀得嚟唔係溝稀左嘅生粉水，佢係有少少蓉，可以咬到好細好細粒嘅濃味蘑菇蓉。然後就係主菜時間。首先係安格斯肉眼扒，因為我唔食牛，無緣一試了，但食牛嗰位食緊嘅時候都安靜下來慢慢咀嚼，好唔好食應該都知道了。跟住就係丈夫叫嘅T-bone羊扒，我都唔食小綿羊嘅，所以都係無緣一試了。而丈夫嘅評價就係煮得熟左DD。雖然係咁，但丈夫都食得津津有味，一邊咀嚼一邊微微點頭。我就對個伴碟燒蒜頭好有興趣，佢整到成朵花咁，仲插住枝唔知咩嘢，好靚好得意。跟住試食左一粒，蒜香唔在講，有少少酸少少甜咁幾清新。之後就係我嘅Snapper Fillet了，肉質都算嫩滑，而且好香，個皮煎到少少香同脆，外脆內軟，溫香軟肉。個薯蓉冇咩特別嘅味道，但個質感做得唔錯，好幼滑，唔係咁熱同實的話，我以為食緊熱嘅雪糕。其實幾個口感加埋都幾得意，香脆魚肉下係嫩滑嘅魚香最後由幼滑嘅薯蓉結束，好有層次。不過佢個餐都算大份，食完好飽。侍應叔叔跟住就問我哋飲D咩，所以我以為無甜品，點知係上餐飲之前就嚟左甜品先，就係Panna Cotta。我唔多好奶製品，只係食左一半，但佢真係唔係好甜，不過對於鍾意食甜嘅我嚟講就唔係幾夠味了。但都無咩所謂，因為有得揀我都唔會食呢個甜品，佢好唔好食對我嚟講唔重要，但轉頭見丈夫竟然自己食晒一個，平時尼D甜品佢係連掂都唔會掂架。最後杯茶冇咩特別，都係嗰D茶同水囉，不過佢D水唔會有陣怪味。好多餐廳，即使係高級餐廳，好多時都係D水度失分，凍水唔過濾或者冇過濾煲熱之後攤番凍以為冇人飲得出咩，有時連熱水都有陣怪味先驚嚇…究竟係D水無過濾定個水壺有問題定個杯污糟定係條水侯有問題呢﹖好彩尼次都無尼個問題。…查看更多

每日朝早坐巴士返工，都會經過嚐越，有次見到佢鋪頭出面有個好大個嘅早餐餐牌，心諗如果有時早返工，時間鬆動D嘅話，就抽時間去試一次嚐越嘅早餐。而尼一次就係今日發生了。門面細細，入面原來好大，行入入面仲有好多枱，不過坐底之後發覺，佢係枱與枱之間嘅空間闊落，但我坐緊嘅位其實又唔係特別大，可能佢地上菜會有好多人走來走去﹖定係D菜式會好大碟呢﹖睇睇個餐牌，感覺怪怪的，我本來嘅預期係會有D越式嘅粉麵食下，好似扎肉米粉，雞冀檬粉咁，但…原來全部都係港式早餐。而且設計餐單嘅人，應該都幾大食下… ABCDF餐都算係大路嘅選擇，H可以算係港式嘅歐陸早餐，而E同G個配搭係有D怪，尤其係G嘅魚柳+多士，兩樣都係偏乾嘅食物，點樣配搭得到呢﹖雖然個米粉係濕嘅，但你總唔會攞D米粉夾魚柳多士一齊食架嘛﹖不過為左證明我嘅諗法，我就叫左個充滿違和感嘅G餐($32)同一杯熱鴛鴦少奶。首先嚟到嘅係「熱鴛鴦少奶」，一睇個色就知無咩點少到奶，飲一啖就係心入面打左個交叉，佢係有奶香嘅，不過嗰D所謂奶香感覺有D人工…見佢有咖啡糖，落左兩包，都救唔番，都係返公司補番杯 breakfast tea 算了。跟住嚟嘅係「XO醬手切炸菜肉絲米粉」(其實有咩唔係手切嘅呢﹖)，但當時喺我面前嘅係一碗好大碗嘅米粉，米粉面有條菜同幾條炸菜肉絲。XO醬唔多覺有落…而且成碗嘢食唔到有咩味，只係一陣油味，條菜又老，又得嗰少少餸，點送到咁大碗米粉呢﹖D米粉仲要漲得嚟帶D硬…應該都幾「銀」胃。我唔算重口味嘅人，但佢尼碗嘢，落埋胡椒粉，都係食唔到有D咩味。係連胡椒粉味都冇。我碗米粉食到一半，都未見碟魚柳上枱，要返工嘅朝早，早餐時間分秒必爭，當時唔算多人，枱係坐唔滿嘅，而且全部都係SET餐，其實真係無咩原因會耐囉。叫侍應跟一跟之後有另一位侍應禮貌地回應番我個魚柳會好快到，同時，附近另一枱客人投訴佢地落錯單。等左一陣，魚柳嚟到了，多士真係好厚，魚柳都大件，但無咩驚喜，叫做唔難食，不過都唔出色，個吉列仲有d鞋口，雖然佢唔鯹，但都係嗰d正常雪藏味啦，無咩好講。多士都無咩特別，有烘底，厚，其他都無咩好講。…查看更多