cyronica2018's Profile

一行8人去食，之前去尖沙咀殿大喜屋覺得好好，所以諗住價錢同殿差不多同好耐之前都落過應該都無問題，點知中晒伏。食物飲品種類極少，同普通最低級大喜屋既質素差不多，完全唔係殿果個級數，而且不停漏單俾少，唔問佢都唔俾番你，特別係魚生類黎得等別慢特別少，無謂野就快同足。座位迫人多路窄出入唔方便，食2個鐘半個鐘前黎講截單同收錢就快，第一次去食放題會食唔飽，以後唔會黎呢間，俾得呢個價錢銅鑼灣仲有大把選擇，建議大家唔好博。…Read More

終於有時間補番個食評喇，遲到總好過無到啦😆每年既大年初一我同家人都會食一餐齋，每次都係食比較傳統既齋菜，今年想試下新野，所以黎左呢間，真係一試難忘☺️4個大人一隻狗，可以坐餐廳出面。因為食物要預早準備，所以訂枱後店家會經Whatsapp同你確認預訂既食物，而我地叫左以下食物：香煎鵝肝配黑醋無花果馬介休球法式紙包魚普羅旺斯燉菜葡式焗鴨飯威靈頓牛柳火焰雪山 (因有火焰效果所以只拍左片🤣）詳細既食評就唔多講喇，始終各人口味同感受唔同。簡單黎講，呢餐西式素食真係令我有全新既體驗，不單食物既外型似，連食落去既口感都似肉。另外，男女老闆好有禮貌，雖然當日放晒員工假而要自己煮同招呼，但兩位都仲好樂意講解同回答我地對食物既問題，傾談間仲知道佢地曾經不斷嘗試唔同材料同改善味道以達致完美，真係好有heart，亦令我地大開眼界。總括黎講，呢間餐廳絕對推薦俾大家，你地千祈唔好俾門面裝修嚇親，以為係一間fine dining既餐廳，其實老闆只不過對美學同食物有要求，亦想令顧客感受到同推廣素食，係咪素食者或者係咪節日慶祝都可以去試下。講多無謂，你地親身試過就會明白，未去過絕對係錯過好野。另外，老闆當時提到會係南豐紗廠另一個鋪開間素食漢堡餐廳，應該都差唔多開張，下次一定會去試埋😆…Read More

見呢間餐廳自助餐既網評都唔錯，食物種類都好似可以，加埋狗狗可以去，所以除夕就同家人及狗狗去食brunch，點知就出事。食物種類超少，無食評入面講既冷龍蝦、麵包蟹、熱龍蝦、北京填鴨等食物；凍海鮮得生蠔蟹腳蝦同螺，刺身得三文油甘八爪魚紅蝦，沙律cold cut等就算把啦，燒牛肉有兩款，熱食款色勁少，甜品就正常。總括黎講以除夕價差唔多$700黎講，呢餐應該係我食過最唔抵同最差既brunch，仲有某幾位係食物枱既男廚師既態度超差。呢間野我見平日週末特價好似$400左右，如果你對食無乜要求純粹想同狗狗入西貢行下都可以一試，否則真係無需要特登去，大時大節貴價更加唔駛考慮，已經好耐無食自助餐既我就咁就中伏，唯有安慰自己差既唔去好既就唔會黎，最差既已經試過黎緊既應該會好🤣…Read More

呢次係我第二次黎，因為有狗狗，再加上難得平安夜呢d日子無開天殺價(當然價錢都有貴左幾十蚊，有少部份正常餐牌既食物暫無供應，但大路正常既食物都有)無限交枱時間仲有8折，所以無理由唔再黎支持下。食物一如以往好同大件夾抵食，我地坐室外環境當然唔駛講正，侍應服務亦好，總括黎講呢間食墨西哥野既餐廳絕對推介。最後有一小插曲：因openrice訂位有8折，但或者兼職員工無為意(根據經理講)而我又無check單，所以無俾到折頭。之後同佢地講番佢地爽快俾番我之餘，仲送左支紅酒俾我當賠罪😀…Read More

尋日去朋友屋企食晚飯，諗住加料上去。呢間野既叉燒之前都買過好多次，味道算唔錯，所以再去買一次。因為之前都買過好多次，不過多數買一條免切，今次買一斤唔記得講免切，就咁出事。同佢講要半肥瘦叉燒，當打開時簡直晴天霹靂，正常叉燒得一半，其餘全部肥膏，根本食唔到😡。之後我打去間野搵投訴，佢大聲夾惡話呢d叫腩叉，完全唔覺有問題。我就話乜野腩叉呀，全部都係肥膏，況且我係叫半肥瘦，之前買一條免切都唔會俾d咁既野啦。你咁樣講，不如話係我要半肥瘦，所以咪俾一半肥一半瘦你囉🙄。希望滿東邨或街外人，去呢間野買燒味時，切同免切都一定要睇住佢，最好即時開黎睇，如果唔係好易俾佢呃。做街坊生意都咁唔老實，希望間野早日得到教訓。…Read More

今日中午同老婆食火鍋放題，諗住簡簡單單食個最普通既餐，應該有牛豬羊雞肉及其他一般火鍋放題有既食物，點知呢鋪真係中伏。牛豬羊雞肉正常質素，但會跟人數俾，2人每盒最多3片肉(有時得2片)，但肉既大小都算可以，所以要不斷叫。中伏位黎喇，因為除左自助吧食物外，其餘食物都要用app落。我地食最平既$158餐，除左上面既肉外，個app可以叫“免費”同收費食物。所謂“免費”大概只有5、6種，有2種售罄，其餘食物當我點時顯示要俾錢，咁我就問侍應係咪有錯，佢就同我講因為我係叫最平既餐，所以呢d“免費”食物係要收錢。大佬呀，既然要收錢，點解唔係放係收費食物入面呀，如果其他人無留意落左單，埋單時咪大X鑊？我個人覺得你都收得$158，連埋加一都要$170，係咪要咁小家？我去牛大人或牛驛，人地都係差唔多價錢，都可以叫好多非肉類食物如鴨血、燕餃等等，所以我地成餐只係叫肉同食自助吧既少量食物如丸、菜、小食及甜品等大概10零款食物。總括黎講，中午放題性價比好低，食物及飲品種類少，唯一可幸係可以1315前離座有7折，埋單每人大概$125，叫做心理好過d啦。經過今次後，我唔會再幫襯呢間野，以後都係去番牛大人或牛驛算喇。…Read More

之前晚市到6點時去過食火鍋放題，覺得性價比唔錯，見今期$197(已包加一)有火鍋+日式放題，所以即刻去試下。首先佢既食物種類一定唔會夠剩係食火鍋或日式放題既餐廳多，但勝在應有同大路既食物/飲品都有，而且食物質素算中上。肉類、魚生解冷好好同新鮮，唔會有雪或一pat pat；壽司、炸物同其他火鍋食物等都好正常。另外，我覺得佢既甜品好好食，特別推介綿綿冰及抹茶巴菲。最後，我特別想讚下呢度既員工，佢地全部都好有禮貌同勤快，好少漏單，就算有都好積極同你跟進，確保唔會重覆俾食物你，值得一讚。個人覺得呢個價錢有火鍋同日式放題絕對超值，無諗過可以食得咁高興，再加埋服務好好，我絕對會再去…Read More

今日同屋企人元旦入左元朗行街食野，路過呢間鋪頭聞到d燒鵝幾香，所以就入去用$155買左1/4下莊，點知就出事喇我都費事多講喇，大家自己睇相評下理啦。係，大家無睇錯，間垃圾鋪頭竟然俾左滷水鵝翼當係燒鵝。呢樣野已經超出我既想像，原來而家做生意可以唔老實到咁，只怪我地無即場摷下佢；但如果買野要咁樣，鋪頭同買野既人都好無癮啫。總結：幾好食都假，咁唔老實既做生意手法我地永遠都唔會幫襯，唔怪得我地係附近鋪頭買野時，老細聽到我地去呢間垃圾鋪頭幫襯就冷笑左一聲…Read More