小黑斯斯's Profile

機會係留俾有準備既人😎。小妹提前預約好左煲仔飯同埋特色小菜。希望一試老板既廚藝。1. 是日燉湯 - 蘋果雪梨瑤柱螺肉湯 2. 咸魚蒸肉餅 （媽媽既味道，肉餅要入口鬆軟有彈性，豬肉一定要自己剁🔪 ，配埋霉香鹹魚🐟 簡簡單單配碗白飯都已經好好味）3. 豉油王炒大蝦（大排檔風味，蝦殼沾滿豉油香，蝦肉爽彈惹味啖啖肉😋）4. 花甲粉絲煲（粉絲吸哂花甲湯味，味道鮮甜🤤）5. 西蘭花炒魷魚（西蘭花爽脆翠綠，魷魚清淡鮮甜口感好）6. 青炒豆苗（炒得青脆嫩綠，重點係冇草青味😀）7. 清蒸東昇班 （老板娘話係一道小朋友唔食得既魚魚😹蒸煮時間啱啱好，嫩滑零腥味。）8. 白鱔臘味煲仔飯（相當霸氣既煲仔飯💪🏻 材料包括上層滿滿一層既白鱔，下層又係滿滿一層既臘腸，膶腸，臘肉，臘鴨。 全場嘩然！一打開蓋，香味撲鼻。米飯粒粒分明，沾滿臘味油香。個個都讚不絕口。飯焦係主角，香脆唔會有苦味，頂瓜瓜！）…Read More

食嘢更係揀食材最好狀態啦，跟住小妹食"旬"野，當造時令既食物不時不食。每年9月到11月盛夏至初秋依段時間，為準備迎接冬季來臨，秋刀魚需要儲存大量養分係體內，就係魚肉質最肥美嘅當造期，魚身變得油脂豐厚，肉質軟滑，唔腥仲要帶鮮甜味。秋天正正係秋刀魚最肥美既季節。  秋刀魚亦係日本料理中最具代表性既秋季食材之一。師傅準備秋刀魚既同時.... 小妹同周杰倫一齊合唱千里香🎵🎶🎵🎶秋刀魚的滋味， 貓跟你都想了解。月見雞肉軟骨棒- 雞肉軟骨棒內含雞肉軟骨，雞肉同埋洋蔥，口感相當有層次。享用前再沾d蛋黃，肉質更嫩滑。秋刀魚梅子天婦羅- 小妹第一次食，非常驚喜。証如我所講咁，秋刀魚係時令既魚，比較肥美。外層有薄薄既炸粉，一口咬入去就有紫蘇葉既香味同埋秋刀魚既魚油味。什錦天婦羅- 炸漿夠薄，唔會食到成口炸粉。炸蝦肉質爽彈結實。香煎鵝肝多士- 鵝肝細緻柔軟，油香滿口而且甘香豐腴，入口即溶加上脆身的外皮，溫度岩岩好。鱔魚串燒- 鱔肉飽滿，肉色亮麗鮮明、切口平整，看得出冇過度燒烤，表面略帶金黃，師傅鱔的鮮活口味信心十足，控制火候來突出鮮惹鱔香。咬一啖，肉質結實有彈性，魚皮隱隱有鱔味，非常好食。鹽燒油甘魚鮫 - 油甘魚油脂夠多肉質幼滑，魚鮫是位於魚腩上方近下巴的位置。因為魚鰭活動周邊肌肉而令肉質較結實。油甘魚鮫是常見的日本料理之一，魚鮫黏著不少魚肉，燒來吃，一樣肥美，魚油甘香。用來鹽燒或汁煮可吃出油和膠質，煎炸入口甘香。左口魚邊壽司- 本身嘅油脂唔多，但裙邊部分就集中晒油分，加上運動得多肉質會帶爽口。經過炙燒得令油脂充分表現出黎尤其輕輕炙燒過，溶化了的魚油更澎湃，配上飯，口感豐膄猜軟棉，而且有飽肚感，作為結尾的，相當合適。三文魚子壽司-師傅再特別醃製過，少左平時既腥味名咸味，調到較為平衡的鮮甜味，配上鮮脆紫菜，粒粒爆出鮮味。灸燒油甘魚腩壽司配炸大蔥- 油甘魚魚油香之中帶點炙燒香氣，入口柔軟。配埋新鮮炸出黎既大蔥甜甜地，超加分。…Read More

牛脆骨爽腩米-  牛脆骨牛味濃郁，係呢度嘅招牌之一，外面淋，入面軟骨爽脆。每次放lunch， 行慢d都買唔到。 爽腩炆得好入味，肥瘦適中，肉質爽甜好好味。湯底係牛骨熬製，充滿鮮甜牛骨味。雙併是常識吧。 順帶一提，牛丸都好好味，買唔到牛脆骨可以考慮下配牛丸都係唔錯既選擇。…Read More

32度既星期六, 散步去到coffee shop, 諗住晚餐前飲杯咖啡. 本身想叫dirty. 但係老板娘話冇哂dirty, 推薦試下dirty deluxe. 口感會俾dirty甜少少.  我二話不說就話好啦.  見到側邊有水可以self serve 飲住水等咖啡. 飲完咖啡之後, 發現老板娘收起左枝水. 天氣咁熱飲水都好正常啦. 6點鐘收工, 5點15分就開始趕客. 飲水未至於影響你既開支啫. 倘若問題咁大，咁就唔好放啲水出黎俾人自助嘛. 如果人流多, 我地飲完都會好識做, 一定會讓位俾其他客人.  但係成間鋪空空如也, 本身想好好影下相, 打卡宣傳一下. 但係服務態度真係欠奉. 品評返兩杯咖啡. iced espresso-  咖啡豆味唔太突出. 可以話係一般. 冇咩特別. 讚好既地方係酸味唔高同埋選用大粒既波波冰.dirty deluxe- 冇加水溝淡. 用meiji 凍奶做個base. 上面加左espresso. 入第2啖就開始有滑溜既感覺. 整體而言, 咖啡一般. 服務態度有待改善. 建議老板娘日後如需要趕客. 直接5點後只做外賣, 以及收走bar枱清水唔俾人self served. 會更顯大體. …Read More

日本登山滑雪勝地「白馬鎮」為設計主題嘅酒吧。餐廳走日式大自然木系風，忙裡偷閒的話呢度都係唔錯既選擇。由於疫情，所以客人唔太多可以隨便揀位坐。人流較少。環境靜左好多。餐廳吸引好多女性客人黎打卡。今日咁岩又係大晴天，小木屋既設計配落地玻璃既採光，所以今日影既所有相影極都係有個黑影. 小妹同朋友2個人叫左Beef Sando，煎雪魚， 黑松露薯條同埋柚子蜜糖雞翼。咖啡既拉花相當用心，打卡一流。食物等候時間稍長。小妹認為beef sando有少少失望，可能見到網評人人讚好所以期望好高，咁岩小妹食果件有條筋咬極都咬唔開。其他食物就中規中矩。冇得去日本，可以去住具有日本風味既餐廳頂住癮先啦~  …Read More

一入到餐廳好快就坐低左喇。 落完單好快就有個醬料架黎到，拎完醬料， 卜卜蜆肉和蟹肉鍋就上菜喇。侍應叔叔加上燒酒快炒，仲溫馨提醒小妹可以錄影同埋唔好靠太近個火鍋！加入魚湯後，卜卜蜆同蟹肉既香甜味道就飄出黎喇，即刻一人一碗鮮甜好味既湯。湯頭黎講飲落都幾清甜！小妹都會推介俾大家！話明魚蝦蟹，就咁一個魚湯邊夠霸氣架！ 當然唔少得鱔魚片啦~ 聖子同埋鮑魚有promotion ，一於黎個海鮮大餐啦。整體黎講係一間唔錯既餐廳，價錢加埋火焰炒海鮮show都要做合理既。不過小妹就貪心d，如果隻蟹可以大隻D就會更好喇！最難忘既除左成晚不停咁拆肉拆到手軟之外，應該就係鱔魚片同埋手工餃子喇！希望下次再黎隻蟹會大d啦  …Read More

小妹久違的日本美食，一如既往要求坐壽司吧。今日既師傅都好趣怪，坐壽司吧可以同師傅們交流下心得。師傅介紹左食以下呢幾樣。池魚王- 口感爽嫩有彈性，食落肥美魚油重。日本蠔- 蠔肉潔白有光澤，肉地滑溜，咬下仿如爆漿，鮮甜的海水一湧而出，回甘味濃。日本帶子-  形狀與帆船的帆十分相似，如帆船乘風啟航一樣，故有一帆風順之意。肉身厚，好鮮甜。象拔蚌- 口感層次豐富，脆、軟、滑、嫩，肉質鮮甜爽脆，爽滑中帶鮮，海水味濃。粒貝- 肉質爽脆彈牙，鮮甜美味。內臟拎左黎煮湯，好鮮甜。三文魚腩- 魚油超多超正，入口即溶。油甘魚腩- 油甘魚又名為「出世魚」，寓意在社會上步步晉升，有成功與好運之意。吞拿魚腩- 肉質柔軟、油份重，魚油脂香，咬落口兩邊油脂溢出，食到滿口油香。三文魚子- 用酒及甜醬油醃製，粒粒飽滿晶瑩，一咬爆汁，鮮甜味澎湃，紫菜超脆。左口魚邊- 油脂豐腴，火炙過後香氣撲鼻，肉質綿綿如膏，入口即溶。…Read More

爸爸牛一，必須要同佢老人家大事慶祝一下啦！話說佢老人家提到要食牛肉，小妹鍾情日本菜，立刻諗到要去食日式燒肉。嘩！一入到去果浸燒肉味，心諗今次啲外套大鑊喇！件件都一定會有浸燒牛味😩😩😩 一睇餐牌叫左最最最霸氣既特選盛合，當然唔少得燒肉必備既whisky highball! 只有梳打水既味道，好失望呀！牛肉整體表現唔錯，唔可以同日本牛繁做比較，不過都中規中矩。表現最好就係牛五花，油脂最多，燒出黎肉質鮮嫩，小妹同爸爸都讚好👍🏻 牛舌切得太厚身了，太過腍身冇哂嚼口，如果可以切薄身啲咁就perfect喇！…Read More

清甜既牛肉湯湯底，少少既胡椒味，再加埋洋蔥，絕呀！👍🏻洋蔥令到成碗湯加左好多分，帶出浸浸鮮甜味。坐低果陣發現大多數既人都會點綜合粉，雖然我都點左綜合粉，不過我走左生牛肉。原因好簡單，冰鮮既生牛肉，雪味走唔甩之餘，始終都係欠缺左牛肉既一份鮮甜味，所以小妹最後就由綜合粉演變左一碗熟牛肉牛丸粉。熟牛肉用左牛坑腩，牛味道濃，口感正。牛丸牛肉味香，肉汁豐富，有咬口，彈牙！ 😋😋😋 河粉幼身嫩滑，超掛湯。整體感覺唔錯。讚👍🏻…Read More

屋企附近開左渝味曉宇重慶火鍋 重口味既小妹同細細妹當然要去一試究竟啦 話哂都係舌尖上的中國重慶火鍋代表作又係連鎖店 應該唔會太差 細細妹自從同我食過大辣雞魚煲之後 從此對辣椒差生莫名既好感 愛上左辣椒 大熱天時打邊爐 [高溫燒滾了我🎵🎶🎵🎶] 小妹認為麻辣湯底香味濃但唔夠麻 各類小菜都好新鮮 洗得非常乾淨 蔬菜冇沙冇泥 見到都覺得相當安心 小妹推薦大家牛肉片、鴨紅、萵筍條同埋蓮藕 不過正所謂一份錢一份貨 走貴價路線 會建議大家返大陸食 第一地方大啲坐得舒服啲 第二服務好啲俾貴啲條氣都gur啲 第三雖則俾人仔但係價錢都平啲 總結係以地區性作比較 個人覺得性價比較低 …Read More

話說朋友知道小妹最愛食日本餐 介紹左我一齊黎呢度撐台腳 第一次係去上環店 咁岩今次知道佢地銅鑼灣開左分店 一定要帶埋朋友仔一齊黎分甘同味啦 一來可以睇下參觀新店既設計 二來可以睇下分店既水準 相比上環店 銅鑼灣比較寬鬆 小妹叫左清酒雞肉竹笙烏冬 一開始怕清酒會同雞肉烏冬唔夾 但係食起上黎出乎意料之外 一黎到飲左啖湯 清甜😋 煮熱左冇左清酒既味道 但係聞得出有少少酒香味 軟淋淋既雞肉配埋滑溜溜既稻庭烏冬 算係唔錯 不過小妹都係比較鍾意去上環店 上環店地方細細但和式氣氛相對濃厚 老板比較熱情 …Read More

今日小妹初試朋友介紹既灣仔隱世小店。《淳》寓意著簡單同埋樸實。入門環境既佈置係簡約既和風設計。一坐低就睇見師傅表演既舞台，乾乾淨淨既壽司吧令小妹好安心，期待住師傅既每一件藝術品。餐巾同埋筷子上面都有餐廳既名，除左對食物既品質有要求，其他既配件都相當講究。呢度既刺身都會分類放入木盒，木盒可以保持住魚既新鮮度、濕度同埋溫度。漬物有芝麻牛蒡，山藥，榨菜，子薑，紅酒蕎頭。前菜係三小碟- 茄汁魚，日本甜蕃薯，百頁豆腐。仲有冰菜日本蕃茄沙律，日本蕃茄清甜多汁，加左少少檸檬汁配上清脆既冰菜。味道由淡至濃既排序係常識，所以次序相當重要。今晚由清簡既三小碟前菜同埋冰菜蕃茄黎激發大家既視覺神經同埋味覺，揭開今晚晚餐既序幕。登登登登～日本生蠔- 生蠔肉質肥厚清爽，蠔味濃郁澎湃，有少少既海水味加上蠔身既鮮甜味，鍾意食蠔既朋友仔應該會上引。緊緊接著係螢光魷魚配味噌醬，螢光魷魚有淡淡既海水味，小妹反而幾鍾意甜甜地既味噌醬。白蝦刺身配玫瑰花花瓣同埋明太子，明太子帶有微微既辛辣味，撈埋入白蝦刺身入面，白雪雪既白蝦配上點點既明太子，除左好似幫白蝦著左件晚禮服之外，仲突顯白蝦既鮮甜味。日本帆立貝肉厚清甜，師傅加左少少柚子皮係上面，比一般帆立貝多左一份果香味。再落黎就係鱈魚白子刺身，小妹既初試。小妹好怕食內臟因爲好怕有腥臭味，所以全程眼金金咁望到實一實。師傅拎出一細個鐵板，將白子放上鐵板，手執一粒粉紅色既喜馬拉雅山岩鹽，磨左一磨撒上白子刺身上面，再拎左粒柚子磨左少少柚子皮備用。師傅用火槍輕輕燒左一燒粒白子刺身，新鮮既白子刺身，微微咁收縮左小小，由奶白色燒成淡啡色，燒好之後放左上一隻細細既碟上面再撒上蔥粒同埋備用既柚子皮，白子刺身完成。試食第一啖先，白子質感軟綿綿，入口即溶，有少少奶油既味道，經師傅燒一燒，仲會帶有少少焦香味，比想像中容易入口同埋接受。咀刁小妹第一次白子挑戰-成功！✌🏻食完之後，師傅就話其實白子係魚既精巢😳，有豐富既蛋白質，係日本既女士們既最愛。再黎係薄切鯛魚配紫蘇花同埋酸汁，紫蘇花既花香味幫鯛魚加左好多分。象拔蚌脆卜卜，有少少海水既味道，好味呀！隆重介紹黎自北海道既縞蝦，肉質爽口鮮甜彈牙，蝦子脆卜卜好好味，蝦頭做完裝飾就拎左去炸，物盡其用係日本人既特色。粒貝依然係脆卜卜，爽口帶有濃濃既海水味。赤身刺身，以前既咀刁小妹一定唔會想食，心諗你咪塞住我個胃，我只想食油脂豐富肥淋淋既大拖羅。但係而家小妹開始識得欣賞赤身刺身，雖然油脂少，口味清爽，但係每咬一啖都有赤身既味道，愈咬愈濃味，重點係唔會食到雪藏味同埋血腥味。鹽燒竹簽魚，油脂豐厚，燒完之後魚肉帶甜味同埋焦香味。下一道係鰤魚，鰤魚肉質軟綿有韌度，油脂分佈平均，入口滑溜，油潤得黎有咬口，比起平時食既油甘魚，鰤魚既味道更濃更有質感。燒拖羅，師傅切左一細細片魚去燒香，香噴噴既魚油同火槍既火花，師傅再慢慢滴啲魚油落去鐵板上面既拖羅度，再立刻將鐵板上面既拖羅燒香鎖住魚油加添焦香味後，再立即用紫菜捲起送上我手。燒魚鮫，魚皮燒到脆卜卜，魚肉軟淋淋，好味！最後刺身部份係鮟鱇魚肝。一月同埋二月天氣雖然好凍，但正正就係鮟鱇魚肝最肥美既時候。師傅簡單咁將鮟鱇魚肝加上紫蘇花，蘿蔔蓉，柚子皮同埋少少檸檬汁就上菜喇。鮟鱇魚肝慢慢咁係口入面融化，質感係軟綿綿既，少少腥臭味都冇，果然係當造時令既肥肝。😋握壽司部份，壽司飯應該用左少少白醋同埋赤醋，酸甜既壽司飯帶有江戶前既味道。深海池魚壽司，魚既肉質爽口帶甜。赤鯥壽司，油脂含量高，經過火槍輕燒逼油之後，散發左無比既魚香味，再灑少少鹽提高鮮味。再黎係鰈魚壽司，魚油多就唔洗一再強調，鮮甜爽滑，油脂同魚層次分明。最後係鹽水海膽壽司杯，師傅用左無防腐劑無添加，最接近海膽既原始鮮味既鹽水海膽。粒粒分明表示新鮮度高，海膽味清淡鮮甜。😌 吸物係蟹肉味噌湯，唔係好飲到蟹肉既味道，不過簡簡單單暖暖胃的確唔錯。最最最後係甜甜既玉子同埋蜜瓜做結尾。掌聲鼓勵一下師傅，戰鬥左咁耐，終於可以鬆返一口氣喇👏🏻 …Read More

壽司- 可以話係師傅手藝既表演。無論係魚生既溫度、師父既刀功、壽司飯既握度、什至乎每粒壽司飯醋味既濃淡，都會影響到壽司既味度。小妹一如既往坐壽司吧台，睇師傅表演佢既手藝。小妹叫左壽司omakase, 壽司飯既味道同平時食到既好唔一樣，師傅話係用左赤醋，係江戶前既做法，會令到粒飯更加香甜。小妹長知識了！😌是日最愛同埋驚喜，應該係毛蟹壽司，師傅將蟹拆做蟹肉之後再撈左啲蟹膏增強味道，上面仲放埋海膽。好貴氣既毛蟹壽司呀！😍 相當之有層次既一粒壽司，呢度既壽司赤醋飯好特別。…Read More

每次去日本都會食一次omakase。係香港反而唔係太敢食，主要怕啲食材唔夠新鮮。睇見好多review都話呢間餐廳性價比高，就同朋友一齊去試下。訂左壽司吧枱，枱面既setting唔錯。因為小妹怕腥，所以同師傅講左唔食內臟。師傅整左安康魚肝叫我試下，小妹都叫做勉強可以接受，雖然唔係生既，但係都係掩蓋唔到內臟嘅味道。凍蕃茄好甜，擺盤唔錯，好有日本格調。每件壽司都係用日本醋米飯，比起香港一般既醋飯特別，可惜就係可能水份多左啲，飯粒同飯粒中間空隙太大，壽司夾起既時候有啲鬆散。🙄本身以為係我個人問題，但眼見朋友都有呢個問題，大概就可以斷定係當晚既壽司飯出既問題。壽司吧師傅冇主動講解壽司既配料，每次都係朋友問、師傅答。比起日本試過既omakase, 咀刁既小妹認為仲有啲距離，有進步既空間。另一方面基於網絡評價相當高，導致充滿期望、滿心歡喜既小妹對小店反而有啲失望。…Read More

話說有一日小妹突然好想食烏冬，上網search左好耐都冇咩心水。🤨同事知道我想食烏冬就介紹左呢間隱世日本餐廳俾小妹。睇左網上面既review, 即刻打電話訂枱。去到隔離兩邊枱都係日本客人，即刻覺得呢間餐廳唔簡單。😏小妹叫左一個天婦羅熱烏冬，朋友叫左鯖魚冷烏冬，烏冬真係好好味，同小妹係東京時食到既味道幾乎一樣。係香港都可以食到日本既味道，真係唔可以再挑剔。個人認為冷烏冬做得比熱烏冬出色，份量相當充實。😆有機會一定會再黎試下佢個沾烏冬，感覺都唔錯。…Read More