iceatrice's Profile

呢間野開係荃新天地，平時經過仲以為好貴，點知係大眾拉麵嘅價錢。2個人叫左一個黑蒜拉麵同豚骨拉麵再加一份軟殼蟹。先講衰野，軟殼蟹炸完出黎，見到差D薄過張紙，食落去仲要係好冧，一D都唔脆，冇講錯，係一D都唔脆，大家可以唔使試。講完衰野，講好野。拉麵雖然賣相同menu差好遠，但食落唔差。你睇相見到個湯起哂泡泡，個湯飲落更滑，仲要好濃郁，唔油膩，成碗飲哂都唔出奇。而麵身偏幼滑身，機製，食落唔會太差，一般貨色。但最估唔到係件叉燒，佢唔係平時食嘅味道，甜甜地，反而同個湯相輔相成，得幾塊細細塊真係唔夠食。食完仲有coupon送，下次有小食送，可以encore用餐日期:23/4/2019味道:9/10環境:9/10性價比:8/10…Read More

呢個算係荃灣新開嘅拉麵店之一，但係我去食嘅時候一個人都冇，坐左5分鐘左右，唔知係咪D人見到我食，佢地先敢過黎食。(笑)睇完餐牌，再食埋，只會覺得lunch先好黎食。叫左一個白豚骨，一個黑豚骨拉麵。湯底唔算濃郁，偏清，湯嘅份量比一般拉麵少，如果你好鍾意飲湯，你會唔開心。唔知係咪冇人排隊/食，煮得比較求其。個麵明顯食得出機製，食落口一條條麵粉嘅感覺。整體唔算難食，但唔應該呢個價錢，個質素係一般food court D拉麵咁，如果佢平D就好好多啦個感覺。不過我唔會再食嘅，繼續努力啦！btw 佢有lunch set四五十蚊，真係抵，反而可以一試！用餐日期:11/4/2019味道:6.5/10環境:7/10性價比:5/10…Read More

兩個人食晚餐，第二次食，叫左個芝士撈麵配多士、肉醬焗薯泥、芝士焗生炸雞脾保齡球同波波冰鎮紅豆珍珠奶茶。咁樣叫法，可以食多一款野，又唔使咁貴。撈麵同多士同一般茶餐廳差唔多，唔講咁多，重點係芝士，唔係俾塊卡夫芝士hea你，而係用幾種芝士煮出黎嘅芝士汁，即係個芝士汁嘅味道受份量已經值回票價，芝士濃郁但又唔會重味，唔會令喉嚨唔舒服。芝士份量多，夠你食哂個麵，正！抵食！肉醬薯泥嘅薯泥唔係開水，應該係自製嘅，因為食到有一絲絲薯仔，算好有誠意，肉醬又唔差，算係良心作。波波冰鎮紅豆珍珠奶茶嘅波波係指佢嘅冰係一粒奶茶波，唔會令你愈飲愈淡，抵讚。其餘味道就同普通奶茶一樣，其實冇咩分別。最正嘅係炸雞脾，外脆內滑，味道入味均勻，一D都唔"鞋"，正！(好過三多。)再沾D芝士汁，真係一試難忘。保齡球係烘麵包，上面個塊似多士，沾芝士好好食，下面個塊就因為要載炒飯，所以冧左，冇咁好食。保齡球入面嘅炒飯比較乾身同淡口，可能係為左配個芝士一齊食，咁就好正啦。如果你係芝士愛好者，佢俾嘅一大碗芝士一定唔夠你食，信我！用餐日期:3/3/2019是餐費用:$144味道:9/10環境:7/10性價比:9/10…Read More

訂左位食呢個限定嘅99蚊任食五花腩餐。首先環境非常好，韓燒最緊要唔好周圍都係油，呢度算好乾淨。配菜如相都十分之足夠，唔夠可以再添，但就係冇筆者最想要嘅蒜片。呢個餐得一樣野食，五花腩。就黎燒完就好再order，唔好浪費時間。一碟有3至4片厚片，燒至熟透大約要15-20分鐘。雖然冇咩點調味，但豬肉本身嘅味道再加上唔同嘅配菜，真係冇得輸。如果佢轉做任食，真係除時都可以encore。正！用餐日期:5/3/2019是餐費用:$217.8味道:9/10環境:9/10性價比:9/10…Read More

黎到深水埗，一定要試下呢檔小丸子，可以話俾大家聽，呢檔野會顛覆你對街頭小丸子嘅睇法。首先佢製作一D都唔會求其，筆者食過好多次，沙律醬每次都係唧花，唔會求其同你唧，同如果你想即製，可以試下同佢講。呢度嘅小丸子唔會好厚粉，唔會只係得D粉味，粉漿個味係薄薄一陣，然後會食到入面章魚同佢D配料嘅味，唔會好似一般街邊檔咁，得粉味，好似食緊麵包咁。個燒汁同沙律醬份量剛剛好，唔會搶哂小丸子嘅味。總之，街頭小食呢D野，你唔試過係唔會知有幾掂！用餐日期:3/3/2019是餐費用:$18味道:9.5/10環境:8/10性價比:9/10…Read More

是晚求其揀，黎左呢度食晚餐，呢度平時下午好爆學生架。兩個人叫左一份五色手卷、鰻魚反卷同炸軟殼蟹。先講炸軟殼蟹，大家可以唔使試，厚厚的粉漿，雖然係熱辣辣，但係冧嘅，完。五色手卷如相有鰻魚、黃金魷魚、蟹子、帶子同三文魚。刺身算係中等質素，唔太鮮甜，但份量十分足夠，好大個，如果一個人食，一定好飽。抵食嘅。反而係個鰻魚反卷，竟然係最好食，大量嘅蟹子好好味，仲要每啖都有燒鰻魚味，唔會好似一般反卷咁飯還飯，魚還魚，散開哂。好味！總結，呢個價錢，雖然唔係頂級好味，但算係好抵食。用餐日期:26/2/2019是餐費用:$168味道:7.5/10環境:8/10性價比:9/10…Read More

筆者成日都會黎定食8食晚餐，貪佢夠平同味道較好。今晚叫左玫瑰鹽牛扒定食同鍋燒牛肉烏冬。其實烏冬食過幾次，每次都覺得真係麻麻，烏冬係比較硬同彈牙個隻，烏冬味唔濃，算中品，d料全部都只係普通貨，冇咩特別，牛肉就用下價貨，牛味唔強，脂肪較少個種。但最好味係個湯底，清甜嘅堅魚味將呢碗烏冬挽救番，飲哂成碗湯都唔過份。而牛扒定食幾乎係必食，白飯普通貨色唔提啦。牛扒預製好哂個味道，只要廚房跟足程序整，每件牛扒都係滑口，一定都唔會"鞋"同靭，仲要牛味好重，$43我相信冇其他店可以做到呢個質素，一定要食！！！另外一提，店內有個免費自助吧，可以任裝湯同茶飲，仲有飯，大食嘅人添多少少飯就岩哂。總結，定食8性價比一流，味道又唔差，正！用餐日期:28/2/2019是餐費用:$106味道:8.5/10環境:9/10性價比:9/10…Read More

午餐求其去間茶餐廳，黎左呢間有多年歷史嘅金翠食。叫左個鴛鴦扒全日扒餐$39，有杯熱飲。鴛鴦扒係雞扒同豬扒。雞扒薄切，醃得入味，煎得剛剛好，皮脆肉滑，一d都唔"鞋"，塊皮好似薯片咁。而豬扒就煎得冇過熟，唔韌唔"鞋"，算比其他茶餐廳做得好。炒蛋就唔係滑蛋，全熟嘅，正常水準，冇咩特別。厚多士就勝在夠厚，但可能整定，唔太脆，但都係味道正常。總結，$39食個雙扒餐，應該冇咩邊度咁抵食，偶爾食下都算唔錯！用餐日期:25/2/2019是餐費用:$39味道:8/10環境:6/10性價比:9/10…Read More

呢間漢堡飽店新開時排哂出龍，而家少左d人，所以決定入黎試下。點左一個all the way cheese burger，一份regular薯條，花生免費任食自取。好似好少野咁，但兩個人食都絕對會飽肚。薯條係粗薯，如圖，份量非常多，唔會唔夠食。但好似冇咩調過味咁，淡淡幾薯仔味，但熱辣辣脆卜卜，所以好好食。但要快D食，唔係好快會冧哂。cheese burger嘅芝士係熔哂係餡料到，令每一啖都食到非常濃郁嘅芝士味，正！蕃茄新鮮，但唔會好多水，令個burger淡左。關鍵嘅漢堡扒內外煎得通透，個心唔會係凍嘅，咬完又唔會散哂，跌到周圍都係，鬆得黎又唔會「鞋」，算處理得好。仲要好juicy，D汁水係咁流。正！最驚喜係D花生，已經係任食，仲要好高質。明明冇調過味，但花生味同咸度都好夠，食到停唔到手，正！雖然好好食，但有D貴，間中食下就好啦！用餐日期:24/2/2019是餐費用:$130味道:8.5/10環境:6/10性價比:6.5/10…Read More

出開灣仔，諗住求其食d野，上網揾到呢間拉麵。點左炙熱味增拉麵同炙熱醬油拉麵。兩個麵配料一樣，係湯底唔同，配料如叉燒，筍，豬肉粒都冇咩話特別出色，中規中矩，比較大路。但最正嘅係個湯，十分出色，第到食唔到。醬油味係食得出煮出黎，唔係豉油水，濃郁得黎唔會太咸，同其他拉麵店嘅醬油湯唔同，其他地方多數都比較清比較淡，甚至食完都唔覺係醬油味。醬油味之中會有陣smoke味，真係有野炙燒過先會嘅美味。味增湯同樣出色，又係係第度唔會食到呢個味，湯底將味增味煮到好濃好純但又不油膩，齒頰留香。佢濃得黎又唔會好咸，簡單講就係味增純度好高，鍾意味增嘅人唔試過一定後悔。而拉麵麵味唔重，比較淡，而且係曲身，唔會搶左湯底嘅味，咬落彈牙，最衰係份量好似差d咁，可能係太好食啦xd。筆者有機會都會再黎試其他野，值得推介！用餐日期:23/2/2019是餐費用:$176味道:9/10環境:8.5/10性價比:8/10…Read More

好多度都有介紹呢間日式洋食店，筆者第二次黎食，第一次食左肉醬漢堡同燒魚定食，都非一般咁好食。今次點左咖哩牛肉定食同燒雞肉pizza，有湯/沙律同汽水/綠茶。咖哩一如日式咖哩一樣，甜甜地，好有咖哩味，唔會油膩，但重點係牛肉。平時出街多數都係俾滑牛個類牛肉，呢度係俾肥牛，仲要係好食過吉野家個d肥牛嘅質素，份量又算多，非常好味，好有牛味，正！抵食！而燒雞肉pizza係用平時急凍串燒雞起肉做嘅，所以雞肉冇咩特別出色。但pizza餅底係自己做，薄批，焗完脆卜卜又唔硬。仲要成個pizza都係好味嘅芝士，你睇筆者食到拉哂絲就知好足料，再加左d紫菜係面，個陣串燒味同紫菜味，諗番起都想即刻再食。而麵豉湯係自家煲，唔係即沖，飲得出個種小店嘅心機。總結，呢度筆者暫時都諗唔到有d咩係唔好食嘅，值得再黎！餐日期:19/2/2019是餐費用:$166味道:9/10環境:8.5/10性價比:8.5/10…Read More

路過德福，睇openrice話呢間野好好食就黎左食。一生懸命係日文解拼命咁努力，就睇下碗麵係咪真係下左咁多努力啦。叫左個白湯豚骨拉麵，配料有紫菜，蛋，木耳，叉燒同筍。湯頭白色起泡，證明長時間造好，飲落味道複雜，各種味東奔西跳，雖然混亂，但好好味，而且飲完唔會成嘴油，不油不膩。叉燒好好食，製作得唔會入口即散，有咬口，真係有燒過，食得出好香口，而且肉心部分都好有味，唔會淨係得外層有味，值得一讚。但拉麵個麵本身可能口味問題，唔太鍾意，但係好食嘅。拉麵麵味唔多，要靠索個湯黎食就好好食，麵質較冧，連湯食就一流。食到咁上下，可以加醋食去油膩嘅感覺，別有一番風味，但係呢度嘅醋比較酸，加少少好啦。整體黎講真係算好食之選，係呢頭真係冇得輸。用餐日期:17/2/2019是餐費用:$68味道:9/10環境:7/10性價比:7.5/10…Read More

黎旺角睇戲，晚餐係food court之中呢間8番拉麵，呢間野係日本都係連鎖，所以品質有d保證，筆者都唔止食過一次，都算係好食之列。筆者叫左個豬扒餃子拉麵，吉列豬扒即叫即炸，係真係吉列，唔係炸豬扒。麵包上得唔薄唔厚適中，食落香脆，礙於價錢問題，雖一缺點係豬扒本身唔夠靚，但吉列豬扒黎講係好食之列。喜歡吉列豬扒嘅朋友可以試下沾豉油食，別有一番風味。餃子就真係麻麻，係整定嘅，唔係即煎。因為只係暖而不是熱。但餃子皮薄料多，即整就正啦！而拉麵麵味好夠，但又唔會麵粉味過多，份量足夠。每啖麵都會覺得味道好豐滿，但又唔會膩。湯底濃郁但又唔油膩，而且配麵食又好上麵身，一流。呢個價錢，食到咁多野，又好味，算非常之好啦！用餐日期:16/2/2019是餐費用:唔記得,六十幾蚊味道:8.5/10環境:6.5/10性價比:7.5/10…Read More

荃灣吉之島開左間新嘅台食店，路過本來想食薩莉亞，但冇開，所以一試。兩個人一人叫左一個便當set，有飯有野飲。一個百芳豬扒便當配阿薩姆凍紅茶，一個百芳鹵雞翼便當配凍茉香綠茶。未食以為好似太多數街邊台食咁，一pat飯配d肉燥，好食極有限。但我錯了！先講野飲，個餐五十幾蚊配一杯正常街邊買到嘅size嘅野飲，本身已經超抵，兩個茶仲要係即沖，飲落唔似好多餐廳d配飲咁，溝左好d水，淡而無味，水味多過茶味，呢度反而係濃郁嘅茶香，想原茶品嚐嘅請叫少甜或走甜。簡單講，兩杯台式飲品唔會比一般街外嘅台式飲品差。飯配多種配菜，粉絲辣辣地，撈飯食一流，就咁食又好滋味。酸菜比較地道，好酸，一定要送飯，酸菜愛好者一定好鍾意，筆者個人就麻麻。椰菜上碟夠熱有味，水份唔多，有篩過水，所以比一般爽口好味。粟米應該略略有炒過，因為都係水分唔多，唔會食落爆哂d水出黎，影響白飯同本身嘅味道。個飯整體黎講，一般台式食店都做唔到佢呢個水準。鹵雞翼最緊要煮得夠入味，呢個煮得夠哂味，入口冧但又唔會散哂，入味得黎又唔會太咸。鹽酥豬扒即叫即炸，炸得香脆但又不乾身，鹽酥味真係有陣酥味，唔似一般呃人俾d椒鹽你就算，豬扒好味得只會覺得唔夠食。整體黎講，性價比，味道都係上品，正！用餐日期:11/2/2019是餐費用:$113味道:8.5/10環境:7.5/10性價比:9/10…Read More

上網睇左d介紹，去年宵前黎左呢度食午飯。叫左三個著名嘅上海菜，亦係呢度有名嘅菜式。排骨菜飯，燻魚菜飯同蠔餅。蠔餅唔同普通潮州蠔餅，呢款比較鬆軟同蛋比較多。炸出黎邊位香脆，內裏juicy。同普通蠔餅唔同，有d會得有蠔嘅位有蠔味，但呢個係每一啖都好平均好好味，有蠔嘅味道，再點埋個魚露，更加鮮甜。正！菜飯令我有d失望，但都算好食。因為佢菜飯d菜切得唔夠細粒，好似菜還菜飯還飯咁，如果細粒d就好啦。但味道係撈得足夠剛好好味而且唔會油膩。燻魚係上海菜中好有地位，呢度嘅燻魚雖然份量唔多但絕對會令你下次都黎食，燻魚外脆內軟，味道咸甜剛好，食落仲要有d 真係smoke過嘅感覺，我估唔知係咪上菜前做過火炙處理，淨係夠魚骨，筆者都啜左成5分鐘都好有味。鎮店嘅排骨，網上話炸個時加左蜜糖，所以食落會黐黐地牙。結果一食，係真係少少黐牙，但唔知係咪特登咁做，令味道更加留係口中，等你回味無窮，雖然會覺得豬排好甜，但又會覺得剛剛好。而且豬排又鬆軟，唔會乾哂鞋哂，總之食極都唔夠。筆者一定會再黎食，因為真係回味無窮。用餐日期:3/2/2019是餐費用:$170.5味道:9.5/10環境:7/10性價比:7.5/10…Read More