kamooooo的個人專頁

行開旺角諗住去整電話卡，行過見呢間店，之前未試過，就諗住熱熱地買住杯野飲排隊等都好，於是就入去買返杯。因為第一次去，所以揀左杯佢地既推薦黑鑽茶皇同埋港茶波波(兩杯都係少冰同30%微糖)價錢方面，比起其他店既珍殊奶茶算平啲啲啦，係依家都算少有咁既價，點餐都唔需要點樣排隊，等左5分鐘到就輪到我買，買完之後好快就叫單號。門市有位置可以比人坐低飲同埋打卡，不過就好多人飲完個杯就咁放係到，要等店員走出來收走啲垃圾，希望大家飲完打左卡都自己清潔返個環境就最好啦~~不過唔知係咪因為我買兩杯，佢地用膠袋裝住，我見其他人買一杯係有個紙手抽打卡係幾靚的(因為我用膠袋裝就無影到相T_T)大家可以參考下其他食評既相，真係幾靚的。去到大家關心既味道啦，個人就覺得佢地都足料既，珍珠啊仙草果啲佔差不多三分之一，茶底有港式茶餐廳既茶味，感覺有種港式珍珠奶茶既味，我個人覺得幾特別，因為始終飲過太多台式茶底。而佢地既微糖真係無糖咁上下，想有返啲甜味建議可以50%半糖，個味道係值得一試的，無諗過港式茶底都可以配落台式飲品入面。至於珍珠果啲就無咩特別都係果啲啦，細細粒幾好咬口，至特別都係茶底。(下次會想試下佢個30分鐘奶蓋無限任添)店舖環境就整整齊齊，放左啲公仔同埋籃球，觀感都不錯的。店員禮貌好好，落單去到拎到飲品全程我諗10分鐘內就完成。經過旺角而又鍾意飲珍珠奶茶既你，可以試試呢間，可能你會搵到新一間鍾意既珍珠奶茶店~~(我之前好鍾意飲茶_會...點知佢有日就執左T_T)總結:呢間店值得一試，價錢相對親民，就算用外賣APP叫同係店到叫都一樣價錢可以用APP叫定先再去門市拎，咁樣會再慳多啲時間(我都係聽女朋友講的XD)…查看更多

先俾懶人包:泰力食事処係一間性價比高的日式餐廳，堂食就要睇睇自己有冇時間等，我自己會揀外賣返去食。  今次我食左鰻丼同吉列炸蠔，呢兩款我覺得幾好味的。鰻丼既味道同一啲高價少少既餐廳差唔多，但價格更加親民，可以講係物超所值。鰻魚肉質細膩，醬汁濃郁，會再想食多一次。吉列炸蠔估計係即叫即炸，外皮酥脆，裡面蠔肉多汁，無好重既海鮮的腥味，搭配上檸檬汁和蛋黃醬後更加好食。雖然店內好忙，坐滿人，但服務員態度依然友好，盡力招呼每一位客人，落單時間非常快速。由於係食飯時間，堂食需排隊等候，所以我揀左外賣自取，取餐時間約10分鐘左右，速度尚可。價格方面，餐點價格大約係50至100元之間，下次有機會想試下個雞肉同埋牛肉飯，呢個價位同食物質素黎講，真係非常抵食。總結:不論係味道、價格定係服務，泰力食事処都無令人失望，是一間值得推薦既平民日式餐廳。…查看更多

當日係食飯時間去食的，店內人數唔算太多，入座時間好快，都無感覺要等就已經安排好入座。店員哥哥安排得好好，有簡單介紹，禮貌不錯！價錢同食物質素成正比，又唔洗貴到成千蚊，唯一覺得唔太好既地方就係個爐預熱時間比較耐，同埋舊牛脂肪比較難出油(因為個爐唔夠熱)，要等一段時間個爐真係熱先可以開始燒，所以啲肉來左一段時間先開始熱，不過唔太影響食物味道的。建議可以先試淨燒，之後再配醬汁食，係有唔同既享受，是值得一試的餐廳！…查看更多

聽同事講尖沙咀開左一間有鐵板燒既放題餐廳，心郁郁就約左幾個朋友黎試。壽司刺身比想像中好食，推薦食油甘魚同埋三文魚腩！鐵板燒方面都有出面千幾蚊既質素，師傅手勢有板有眼，好似睇左一場表演咁，我又口多多問師傅有冇得放個火黎睇，師傅竟然話有真係好正鐵板一口牛、魚扒真係好好味，食完一輪再叫多左一輪，超級好食。餐廳裡面有啲公仔機比人玩，我同朋友都唔太識玩，果到店員有教左小小技巧，雖然最尾無夾到，不過真係好有愛！！環境乾淨整齊，店員都好有禮貌總結黎講，鉄人大盛依間鐵板燒放題好值得大家黎食，性價比極高，黎緊我都準備同屋企人再黎食，好耐無同屋企人聚一聚啦～…查看更多

同朋友講起拉麵，佢就帶左我黎尖沙咀一盛極牛，一入到去見到好多日本電影海報，環境望落相當舒服，店員很有禮貌帶我同朋友去到座位。一坐低當然就黎到主題：食！拉！麵！我自己就揀左濃湯牛肉刺身拉麵，朋友就揀左火炙牛肉拉麵。到左拉麵黎到面前，未食就已經聞到好大陣牛湯味，非常之吸引，我自己就真係好中意牛肉果陣味，一聞到已經好開胃，然後試左一啖湯，嘩！超濃郁既牛味，湯底絕對唔係講笑，好味！麵條咬下咬下非常有口感，如果大家食得到真係推薦加底，絕對唔會後悔！最後清左成碗湯，真係好想再叫多碗，可惜我唔係食得多既人，唯有留返下次再黎食真係好多謝我朋友帶左我黎，一盛極牛真係好好食！！…查看更多