愛食's Profile

噚（13-12-2025 Sat)晚老公又約咗人出旺角攞嘢，於是又出嚟食晚飯，天氣開始轉冷，我哋嚟到呢頭，睇睇呢間，見係食麻辣拉麵，但我食唔到辣喎，老公睇到原來可以揀唔辣，於是入嚟試。我哋坐低後掃code睇menu落單，要咗：2. $45.00嘅煎餃6隻呢個最快到，但都等咗10分鐘，睇見唔大隻，食落係熱騰騰嘅，唔鹹，蘸佢啲辣油食都唔太辣。3分3. $95.00嘅辣麻味噌拉麵，無辣小麻見到有火炙粟米心，豚肉同芽菜，食落，拉麵口感適中，唔會太腍；豚肉一咬落去就係肥油，好難受，肉就好乾柴；火炙粟米心一陣臭味；個湯勁肥，好膩，亦冇麻嘅感覺。1分1. $115.00嘅芫荽麻辣味噌拉麵，小辣中麻見到勁多芫荽舖滿個碗，老公先試，我問佢辣唔辣？佢答如果我食應該會覺得辣，我試啲，都唔係好辣，而且重解到膩，但都係食唔到麻嘅感覺，而芫荽加辣味感覺又幾得意。2分環境：好闊落，枱都夠大張。服務：好好，見人客（包括我老公）拎得多嘢，就自動俾個籃客人擺低。之後我哋影環境相，店員話可以行去影。然後因為我哋坐嗰個位，會因大門又開又閂而又凍又熱，我見隔離枱人客食完走人，就問可唔可以移入去坐，佢答可以。…Read More

老公約咗人今日（13-12-2025 Sat）晏晝喺太子攞嘢，我哋早少少出去，一邊search吓附近有咩食，就見到呢間有特色嘢食，由於我哋出到嚟，重有大把時間，於是搵咗呢間睇有冇位先，嚟到，原來係成日都見到嘅呢間，呢個時候係有好多位，咁應該夠時間食，亦唔會遲到，於是睇咗menu，mark咗要食咩，就坐低後再買飛。買完飛就等，要咗：4. 叫套餐包嘅熱奶茶茶味有但唔算好濃，口感滑。2.8分2. 叫套餐加$2.00嘅凍菜蜜呢個正常冇問題。3分1. $55.00嘅流心芝士豬扒包配薯條等咗一段時間至到，影完相即刻切開，見到流心芝士流出嚟，我唔客氣拎上手食喇，熱騰騰豬扒口感爽彈，芝士唔太鹹，成個唔錯。5分薯條正常冇問題。3分3. $50.00嘅沙爹牛肉西多士呢個都係等好耐至有，牛油同蜜糖都已經加咗喺面，我哋只切開同加鍊奶就可以，睇到有好多沙爹牛肉，食落熱騰騰，牛肉嫩滑，但略嫌味道唔夠，連沙爹味都冇乜，我食唔到鹹甜多士嘅驚喜，可能因為我又係用手拎起食，用刀叉嚟享受嘅老公就食到嗰份驚喜。不過佢嘅炸麵包有油膉味。3.5分服務：由於我哋每人有兩袋嘢，老闆娘好好咁俾咗兩張凳我哋擺嘢。喺我哋買嘢食時，佢都介紹單叫嘅$37.00嘅流心芝士豬扒包，可加$13.00有薯條。我答好。然後佢又話或者$55.00嘅套餐有埋嘢飲。我答好。到叫$45.00嘅沙爹牛肉西多士，佢都話有$50.00包一杯$18.00嘅飲品，就都要呢個餐。好老實。…Read More

大前日（9-12-2025 Tue）同老公放假，就同亞姨一齊拜祭爸媽，拜祭完後啱啱午飯時間，就去附近食晏，又撞正附近學校同公司嘅lunch hour，非常多人，我哋嚟舊年年頭爸爸上位時嘅呢間（食評係2024年1月31日提交嘅呢篇：https://www.openrice.com/zh/hongkong/review/%E4%B8%8A%E4%BD%8D%E5%89%8D%E5%98%85%E6%97%A9%E9%A4%90-e5271435），坐低後睇menu後，就要：3-5.兩杯跟餐飲品～加$2.00嘅凍檸水，熱檸水，另叫$16.00嘅熱檸水正常冇問題。3分2. $55.00嘅西檸雞午餐好耐冇見西檸雞，所以見到就即叫，呢個都等好耐，等嘅時候隔離兩張枱飄嚟佢嘅香味，終於等到喇，食落係熱騰騰，雞肉juicy，西檸汁味道較到啱啱好，好好味。5分白飯正常冇問題。3分6. 後加$28.00嘅蒜蓉炒西蘭花我問姐姐有咩菜？佢答生菜，菜心同西蘭花，我答要西蘭花。佢問我炒定點？炒$28.00。我問烚係咪貴啲？佢記唔起價錢，我答$38.00。咁我揀炒，佢問我蒜蓉炒？我答好。嚟到，跟咗一碗白飯，原來又係一個餐，我哋食唔晒喇，只可清西蘭花，呢個味道同口感都啱啱好，最重要係莖部薄切，所以好嫩。5分1. 老公要$58.00嘅永昇小炒～乾炒牛河佢見到就話要嗌，落單時姐姐話要等，你哋趕唔趕時間返工？我答唔趕，驚阻你哋做生意啫。都真係等咗好耐到嚟，睇見河粉係幼身，食落，唔夠乾身，亦唔夠鑊氣，牛肉唔嚡但都係冇乜味，失望。1分題外話：上嚟搵永昇至知原來舊年食嗰間執咗。…Read More

前日(8-12-2025 Mon) 同老公放假，就同亞姨一齊行薄扶林水塘，再落華富邨，然後拎隻錶去黃竹坑俾女友人EL整，之後去鴨脷洲大街搵食，原本想食越南嘢，但經過見到艇仔粉，就諗，一場嚟到，冇理由唔試香港仔特色，於是入嚟呢間。坐低後睇menu，就要咗：1. $50.00嘅招牌艇仔粉要河粉材料有魚皮，燒鴨，叉燒，魚片，魚蛋，紅腸魚皮好脆；瘦叉燒竟然鬆軟唔柴，有驚喜；燒鴨同魚蛋正常冇問題 ；魚片彈牙；紅腸內裡都竟然有啲脆粒粒；河粉滑；大地魚湯味道唔算好濃。3.875分4. 叫秘製蝦米辣醬法包拼沙律，加$15.00嘅熱柚子檸檬蜜老公飲，我冇飲到。5. 原來招牌艇仔粉包嘢飲，要咗熱菜蜜呢個開頭飲都算正常，但飲到最後就好甜。2分3. $45.00嘅秘製蝦米辣醬法包拼沙律法包有2件，而我一睇蝦米就覺得好辣，所以我只試少少，有蝦米香，亦有辣味，但唔算好辣。沙律係雜果沙律，冇乜問題。4分2. $42.00嘅魚片頭粉亞姨要米粉，佢讚個湯唔錯，我夾咗佢一件魚片頭食，外皮竟然係韌，魚肉都唔算彈牙。1分6. $42.00嘅魚湯浸勝瓜勝瓜切到大大舊，個湯好熱，味道亦濃啲，勝瓜普通冇問題。3.5分其他：𠲖o家睇返menu，原來除咗魚湯浸勝瓜外，我哋叫嗰3樣嘢食都包一杯熱飲，即係欠咗我哋一杯嘢飲。抵食係2.6分…Read More

前日（7-12-2025 Sun）朝，同老公瞓晏咗至起身去食早餐同買嘢，又去茶餐廳，去邊間？新記，但經過兆和街見到呢間新嘢，於是入嚟試，我哋坐低睇menu，見到特價套餐係11點：30am至開始，咁老公就揀早餐，我就諗等到11：30am，因為佢冇乜客，我唔會阻人做生意。老公話早餐平啲，於是我都轉呔揀早餐，我哋要咗：2. 跟餐熱鴛鴦唔落糖飲啖先，咖啡嘅甘苦味出啲，落少少咖啡糖就好啲。3分1. $45.00嘅A102大滿足麵餐老公揀豬扒，漢堡扒，炒蛋意粉，番茄湯，已配牛油多士，意粉揀咗腍。見到豬扒大大件，漢堡扒其實係豬柳漢堡扒，炒蛋好嫩，食落，豬扒同豬柳漢堡扒都正常冇問題，我冇食老公嘅炒蛋，意粉唔係淡黃色，唔係咁夠腍，揀咗腍都唔夠腍，咁正常嘅話咪只係拖水？番茄湯偏酸，可能落多咗茄膏。2.25分3.$42.00嘅A103自選麵餐我揀咗沙爹牛肉豬骨湯通粉，雞肉腸，炒蛋，已配牛油多士睇見我嘅炒蛋係全熟蛋，喺上面淋蛋汁，食落，就係全熟炒蛋，雞肉腸正常冇問題，牛油多士牛油夠，又夠脆。沙爹牛肉味道夠，牛肉唔算好滑，豬骨湯正常，通粉夠腍。3.5分4. 跟餐嘅熱奶茶開頭飲係有茶味，但都微微唔夠，加少少糖，飲到最後係澀。2.5分價錢：埋單應該係$87.00，但收$78.00，因為新張期內早餐有9折。環境係4.5分…Read More

今日（6-12-2025 Sat）晏晝同老公落荃灣食晏，由於我唔太肚餓，所以搵茶餐廳，呢喥附近嘅茶餐廳，我諗起欣榮，我哋嚟到有人等位，我哋放棄，去荃豐地下，有兩開茶餐廳，一間係嵐楠，一間係六和，我聽到有人叫有下午茶大，但其實嗰時只係1點，已經話有下午茶，又話有卡位，呢兩間競爭真係好大。之後我哋入呢間，因我記得嵐楠麻麻地好食（食評係2025年5月3日提交嘅呢篇：https://www.openrice.com/zh/hongkong/review/%E9%9B%A3%E9%A3%9F-e6026920）啱啱有張卡位，坐低睇menu，我要$27.00嘅雙拼三文治，番茄吞拿魚，要$25.00嘅紅豆冰。老公要午市套餐，$63.00嘅招牌酸菜魚飯，飲熱菜蜜。落完單，老公嘅熱菜蜜同湯到嚟，飲啖湯，似係青蘿蔔豬骨湯，冇落紅蘿蔔，ok嘅。2.5分之後我嘅嘢到齊，飲吓杯紅豆冰，好甜，紅豆夠腍嘅。1.5分而番茄吞拿魚三文治呢？好凍，係番茄凍，麵包都唔算好鬆軟。2.8分老公嘅招牌酸菜魚飯呢？其實佢上次食過（上次食評係2025年1月2日提交嘅呢篇：https://www.openrice.com/zh/hongkong/review/%E5%A4%9A%E9%81%B8%E6%93%87-e5850078），今次等好耐至到，今次我都食啲，薄魚片好滑，個湯有啲麻辣，菜一樣有萵筍同白蘿蔔，都算正常嘅，而飯就乾咗啲。4分抵食係2.6分…Read More

早前約老公姑媽前日（30-11-2025 Sun）行荃灣，我哋先喺呢喥飲個茶，老公去接姑媽，我就先等位，等咗9分鐘就有位，嚟到睇，枱上有電水壺嘅水，開茶就俾包茶葉，自己倒入壺中沖，睇完menu，我哋要咗：1. 中點芋蓉綠茶餅賣相同青葉嘅一樣（食評係2023年1月7日提交嘅呢篇：https://www.openrice.com/zh/hongkong/review/%E4%BB%8A%E6%AC%A1%E5%B7%AE-e4673279），食落，熱騰騰，外脆內軟，但兩樣嘢嘅味道欠奉，最出嘅係芝麻味。2分2. 小點眉豆鹹茶粿一客四個，軟綿綿，眉豆味道唔太濃亦唔太鹹。2.5分3. 中點時菜鯪魚球同樣一客四個，冇問要唔要胡椒粉，但已落，食到有陳皮味，口感彈牙。娃娃菜味道卻有啲怪。3.5分4. 大點開胃山楂糕呢個係凍食，但佢哋都有放暖至俾客人食，口感都算唔太腍，唔多食得出山楂嘅味道，亦唔酸唔甜，唔多解膩。1分5. 特點魚肚鹹雞粥上嚟時有問要唔要胡椒粉，呢個好熱，撩吓睇，見到都有幾件“魚肚”，食落，“魚肚”好熱，口感係粉，其實唔係魚肚，係淮山，成碗我同老公食，就只有我食到一件唔夠腍，仍有啲海味㗎嘅魚肚，極有被呃嘅感覺。鹹雞唔鹹，而且全部係骨位，冇乜肉。粥係夠綿。1.5分6. 優點嘅韭黃鮮蝦腸每條腸粉內都有兩隻鮮蝦，而爽口嘅鮮蝦大大隻，腸粉厚身。4分7. 大點醬汁蒸鳳爪呢個口感味道都正常，但花生夠腍。3分環境：一定新淨，亦給予比較現代同年輕嘅感覺。抵食：星期日茶芥每位$12.00，而連加一$283.50。2.4分其他：撳飛時可以揀搭唔搭格，我揀唔搭枱。除咗環境外，所有員工都要戴帽，給予年輕同活力感，而呢喥員工嘅年齡都唔係大。…Read More

今日（29-11-2025 Sat）晏晝，同老公去回收物資食晏， 見都接近呢頭，於是又去老公想去嘅food court食第二啲嘢 ，我哋嚟到，我先睇睇有間食點心嘅，但諗住翌日我哋會同老公姑媽飲茶，所以唔食點心，米線呢？我見係酸辣湯，我驚辣所以唔敢買， 而呢一間食西餐嘅，就睇睇，價錢唔平，我唔太肚餓，就要$58.00嘅熱狗配沙律或薯角，因唔想食熱氣嘢，所以我揀咗沙律，飲熱奶茶。等咗7分鐘，所有嘢都齊，熱狗就係簡簡單單嘅茄汁番茄青瓜，腸應該係司華力腸？食落就係正常嘢，個包冇烘過。沙律係雜果沙律，一食都幾凍吓，普通正常冇問題。3分熱奶茶一飲就重奶味，茶味好淡。1分之後食埋老公嗰份餐，就決定買埋佢嘅甜品，$36.00嘅芒果千層。唔算細件，有好多芒果肉，食落， 芒果肉juicy但唔甜，亦冇乜芒果味 ；忌廉唔算滑但味道有啲奇怪；蛋皮都冇乜問題。1分服務：會問要唔要砂糖，買芒果千層時問要幾多支叉，我要杯水都樂意俾，亦會問要熱定室溫。抵食係2.5分…Read More

22-11-2025（Sat）朝，同老公喺坤記竹昇麵(https://www.openrice.com/zh/hongkong/r-%E5%9D%A4%E8%A8%98%E7%AB%B9%E6%98%87%E9%BA%B5-%E9%95%B7%E6%B2%99%E7%81%A3-%E6%B8%AF%E5%BC%8F-%E7%B2%89%E9%BA%B5-%E7%B1%B3%E7%B7%9A-r49547)食完早餐後，行去D2 Place，諗起又可以嚟買啲包返屋企當晏晝食，於是行嚟，嚟到睇，都係有好多選擇，大大個泡芙，但唔買住喇，行咗一圈，要咗：1. $11.00嘅榛子朱古力流心包切開睇，唔係流心而係軟心，餡料同包嘅比較唔錯，朱古力味道燶郁。3分2. $23.00嘅咖啡腰果乳酪包呢個咖啡味啖，腰果唔算太少，正常腍晒，包身鬆軟，乳酪正常。3分3. $24.00有四安士嘅花生朱古力到翌日中午買完餸食吓，花生仍脆，但好味唔太甜嘅黑朱古力太少，我都係鍾意多啲朱古力。4分其他：收銀機前有一包包，一口size圓錐體嘅小雪山，我問收銀係咩嚟？佢答用椰絲同蛋白焗成。而佢哋嘅雞仔餅都做成一啖一粒咁；生朱古力，花生朱古力都已磅好晒預先入好袋同盒。上次食評係2025年6月18日提交嘅呢篇:https://www.openrice.com/zh/hongkong/review/y-%E5%A4%9A%E9%96%8B%E5%BF%83%E6%9E%9C%E5%91%B3%E7%94%A2%E5%93%81-e6089675…Read More

老公嘅男友人RK請老公食生日飯，都叫埋我去，咁我就諗食乜啦，無意中見到呢間食黎巴嫩菜，中東菜我就食過土耳其同以色列，未食過黎巴嫩，呢啲地方我應該唔會去，就趁呢啲特別嘅機會食啦。咁啱呢喥網上訂枱做優惠，訂星期一至四，日可揀全單九折或慶生送蛋糕，星期五，六就只有慶生送蛋糕。我哋約前（22-11-2025　Sat）晚食，所以只係慶生送蛋糕，不過佢哋條款又冇話邊段日期生日，要否出示出生日期證明，於是我打電話嚟問，答案係唔使出示。我哋嚟到後睇Menu，要咗：1. $108.00嘅Barry Mint Jungle莓果薄荷叢林成份有紅桑子，藍莓，蔓越莓汁，橙汁，櫻桃糖漿賣相好靚，飲落，酸甜嘅果汁令薄荷味冇咁寡咁哽，幾好味，可惜冰粒太多，好快淡同飲晒。4.5分2. $98.00嘅Passion Fizzle Cooler熱情氣泡冷卻器成份有薄荷，百香果糖漿，橙汁RK飲嘅，佢冇咩comment。3. $78.00嘅阿拉伯薄荷茶端上嚟時，侍應問要唔要砂糖？老公答唔使。而呢個係熱同成壺上，壺同杯都好靚，但原來得半壺，呢個味道就係正常濃薄荷茶，食完所有嘢後飲就解到膩。3分4. $128.00嘅薄脆紅石榴醬沙律正常酸酸甜甜，蔬菜新鮮冇問題，味道balance。3分5. $208.00嘅黎巴嫩雞肉卷我哋拮嚟食時，發現佢哋已經好貼心地切成3件，呢個有雜錦堅果同黎巴嫩飯，一食，味道溫和，飯粒濕潤，原來個卷係雞肉，幾特別。3分6. $428.00嘅海鮮燒烤雜錦拼盤有青口，虎蝦，盲鰽魚柳，三文魚同魷魚由於唔係將食物排好，所以唔知咩打咩，拮到咩就食咩，我唔鍾意食青口，所以得兩個嘅青口，由佢哋兩個食就啱。魷魚，虎蝦都係有兩件，口感正常；三文魚一拮就散，亦冇問三文魚味；盲鰽魚柳都冇乜問題。不過如果話係燒烤，又唔多覺有燒烤風味，或者因為佢哋嘅番茄醬掩蓋咗啩。2.8分7. $588.00嘅招牌混合燒烤有羊肉餅，羊架，牛肉串同雞肉串，每樣都有3件，羊肉餅原來係係成腸狀，同樣好貼心地已經切成3件。我先食牛肉，口感較嚡，牛肉味係咀嚼到最後至滲出嚟；羊肉餅口感都有啲嚡，味道普通；羊架就口感唔錯，亦冇羶味；雞肉都普通正常。2.8分8. 米布甸呢個係最後叫上，送贈嘅生日優惠蛋糕，冇諗過會唔係蛋糕而係米布甸，佢哋會插上生日牌同洋燭，不過我唔記得喺老公share前影相。第一啖食落有椰汁味唔太甜，口感有啲煙韌，但都有啲脆餅增加口感，但一路食落，味道就淡到近乎冇味，而且中間仍好凍。2.7分總括嚟講，黎巴嫩菜味道溫和，極易接受。服務：好好，上每碟食物都必定跟一套刀叉，會自動斟水。我哋自拍時，店員行過都主動問使唔使幫我哋影。環境：好靚，距離感夠，不過我個位冷氣唔算好夠。價錢：收$1,802.00，但我計埋加一都係$1,799.60，唔知點計。最後，店方送咗一張年尾到期嘅100元coupon。…Read More

今（22-11-2025 Sat）朝空肚嚟呢頭做檢查，做完檢查呢喥啱啱開門，我哋喺門口見到有嘅豉油皇雞髀流心蛋竹昇麵，湯麵$29.00，撈麵$39.00，但有冇限時段？入去坐低，老闆招呼我哋，我就問呢個𠲖o家有冇？佢答枱上menu有嘅都有。啊，咁我哋決定要呢個，然後再諗，研究menu都花多眼亂，啲餸有帆立貝，最後老公決定要$78.00嘅G 鎮店大碗湯麵，有牛腩，豬手，雲吞同水餃，呢個包飲品或油菜，我哋揀後者，朝早只有菜心同生菜，我揀菜心，有牛腩汁，豬手汁同蠔油揀，老公揀蠔油。等咗一陣，油菜先到，睇見份量適中，顏色唔錯;之後鎮店大碗湯麵，嘅豉油皇雞髀流心蛋竹昇麵都到嚟。由於麵係一樣，所以我哋分好餸就食得，我先食豉油皇雞髀，呢個只係室溫，都幾入味，有啲位就乾啲；流心蛋有滷過，都OK；麵就正常爽口，個湯都幾好味；我嗰件牛腩唔算好腍，味道都唔太濃；豬手夠腍冇問題；油菜，雲吞同水餃都係正常冇問題。埋單後，老闆娘送咗兩張$5.00現金劵俾我哋。環境：天氣舒服，唔知有冇開冷氣，只知開咗風扇都幾涼。其他：呢喥嘅咖啡竟然即磨，重有酸梅湯飲。題外話：呢喥仍自家製全蛋麵。有枱客人同老闆娘傾偈，話佢哋喺多倫多有間，老闆娘話係佢個女開。…Read More

前日（16-11-2025 Sun）朝，同老公落荃灣買嘢前食嘢，都已經晏，係食lunch喇，老公話嚟新開嘅呢間，啊。我哋嚟到只有一個客，坐低後睇menu，就決定要：3. $8.00嘅樽庄茶來貨唔評。2. $58.00號B05豬軟骨溏心蛋丼飯等咗一陣就到，我嗅到香味，亦見有水蒸氣，係熱騰騰，而溏心蛋蛋黃好深色。到我食時，豬軟骨好入味同夠腍，溏心蛋同飯都正常冇問題。1. $60.00嘅A05鹽燒鯖魚定食等多一陣至到，唔通條魚係即叫即煎？飯同味噌湯都同樣好熱。味噌湯唔太鹹；半條鯖魚燒得唔錯；小前菜同沙律菜都正常冇問題。服務：落完單，原來會斟杯綠茶，但只有一杯，之後有一pair客坐低後，又識即刻斟兩杯俾佢哋，點解老店員要睇人？早知道我哋係唔會叫嘢飲，因為冷氣開得大，而且只係凍飲，亦係佢主動問要唔要嘢飲，同埋就算落完單，都斟兩杯補返吖。環境：新裝修一定好整潔，但冷氣真係開得好大。4.5分抵食係2.7分…Read More

因為前（15-11-2025 Sat）晚嚟荔枝角睇黃家駒‘’真的相識過‘’紀錄片，場地不准飲食，所以我哋早啲食晚飯，由於唔太餓，於是嚟呢頭輕食，原本去30-8-2025到話嘅花班茶社https://www.openrice.com/zh/hongkong/r-%E8%8A%B1%E6%96%91%E8%8C%B6%E7%A4%BE-%E8%8D%94%E6%9E%9D%E8%A7%92-%E5%8F%B0%E7%81%A3%E8%8F%9C-%E5%8F%B0%E5%BC%8F%E9%A3%B2%E5%93%81-r878716同小餅台吃https://www.openrice.com/zh/hongkong/r-%E5%B0%8F%E9%A4%85%E5%8F%B0%E5%90%83-%E8%8D%94%E6%9E%9D%E8%A7%92-%E5%8F%B0%E7%81%A3%E8%8F%9C-r878688食，但推門入去，店員即問食嘢定飲嘢？我答食嘢，佢答唔好意思已經冇嘢食。噢！咁下次至再嚟，今次先嚟享樂啦。我哋嚟到坐低，店員拎飲品餐牌嚟，然後我就出去揀嘢食先，見到佢嘅撻好吸引，於是買咗1. $18.00嘅原味千層酥皮撻切開時，千層酥皮已經好脆，食落，佢暖暖地嘅，蛋滑同味道好濃，酥皮脆就一定，好味。5分5. 老公買$36.00嘅鐵觀音咖啡撻食落，係好濃嘅鐵觀音甘味，我飲茶唔飲鐵觀音，係因為太甘苦，呢個令我重溫佢嘅味道，而𠲖o家至知原來佢有咖啡，但sorry，我食唔到。1分2. $26.00嘅黃桃酥呢個比較普通，個酥係麵包嚟。3分4. $46.00嘅抹茶椰子水（凍）少冰由於冷氣開得比較大，而且我哋揀咗一杯熱飲，唔想重覆，於是要呢個少冰，呢個抹茶味濃，微微清甜嘅椰子水，同晏晝喺屯門翠湖嘉爵園林酒樓食嘅椰皇燉鮮奶一樣，又係飲到最後至飲到，我應該攪勻咗至飲。4分3. $45.00嘅熱姑媽伯爵茶呢個有茶隔隔茶葉，打開飲，好熱，味道好濃但唔好飲，而且有啲啲嚡口，可能伯爵茶唔可以太濃味吧。1分6. 老公買$18.00嘅松露菌雞肉腸包一食，松露味有但唔太濃，啱啱好，亦食到有啲芥辣提味，雞肉腸口感味道都正常，呢個看似平平無奇，但有驚喜。5分服務：我去買兩個撻時講堂食，店員有啲錯愕話廚房收工，冇得翻熱，我話唔緊要。然後佢都將兩個撻送到我哋個位。我返埋位，到老公出去揀嘢食，店員走嚟同我講廚房收6：00pm，要快叫嘢飲喇，咁我就買咗一杯先，再即問等俾錢嘅老公飲咩就買埋。我心諗，唔係收7：00pm咩？廚房咁早收嘅？後來我去完廁所返嚟，老公同我講呢喥收6：30pm，唔怪得知，因為我之前上openrice睇話收7：00pm，所以諗住夠時間，施施然嚟，但好彩都早咗嚟。上次食評係2025年10月4日提交嘅呢篇：https://www.openrice.com/zh/hongkong/review/y-%E9%A0%86%E4%BE%BF%E5%9A%9F%E8%A9%A6-e6206334…Read More

9月約咗男同事PH搵日出街食飯，就揀17-10-2025 （Fri）食，去邊喥食？就嚟呢間啦（上次食評係2024年9月15日提交嘅呢篇:https://www.openrice.com/zh/hongkong/review/yeah-%E5%94%94%E8%82%AF%E5%AE%9A%E4%BF%82%E5%92%AA%E5%B7%AE%E5%92%97-%E4%BD%86%E6%84%9F%E8%A6%BA%E9%BA%BB%E9%BA%BB-e5679188）。我哋嚟到都重有位，亦咁啱冇晒二人枱，俾張四人枱，心諗一陣人多要搭枱。呢喥一早冇紙本menu，要掃QR code睇同落單 ，睇完我就揀咗$88.00嘅板燒無骨豬扒配薯菜要燒汁，飲熱柚子蜜，PH要$128.00嘅紐西蘭肉眼牛扒（黑椒汁）配薯菜，五成熟 要凍檸茶走甜。等咗一陣，我嗰份食物到嚟，睇見個湯係紫色，咩湯嚟？飲吓先，佢內裡有粒粒嘅，應該係椰菜花，鹹淡係適中嘅。3分而板燒豬扒有兩塊，食落，夠厚唔乾柴，仍有彈性，好正。5分薯條正常冇問題；沙律係胡麻沙律，汁料夠。4分最後到芝士蛋糕，口感正常，不過鹹咗少少。2.8分飲熱柚子蜜稍為甜咗啲。2.8分而PH嗰份，見塊扒都正常五成熟，但佢話有筋同唔夠腍。而佢嘅甜品唔係芝士蛋糕，係馬卡龍，甜係正常。呢篇食評嘅味道同抵食唔計PH嗰份。服務：坐低後係會自動俾兩杯水，不過PH杯走甜凍檸茶漏咗，要追至有。而我俾錢時唔記得俾職員證佢哋睇，只話XX公司職員，佢即刻改返單，waive我加一服務費。整體感覺好咗。環境：呢喥好坐，冇得輸。抵食係4.5分其他：除咗套食外，佢哋嘅散叫都好吸引 ，有沙律同小食等。…Read More

噚日（1-11-2025 Sat）晏晝， 同老公食完齊柏林熱狗後，就搵呢間食雪糕，佢唔係喺food court，係扶手電梯嗰邊，我哋睇有咩味雪糕，有紫薯，榴槤，開心果，店員主動同我哋講新出奇異果味雪糕，用50%以上嘅奇異果汁製造，冇化學材料。哦？！奇異果味真係未食過，而我哋研究要一個定兩個雪糕筒，即使我哋對開心果味開始厭，但我都係想試，但如果要兩個雪糕筒好似多咗，喺呢個時候，我見到menu有分別$49 .00同$58.00嘅任選三種同四色雪糕，就問揀咩味？佢指住menu左上角嘅北海道8.0牛乳，特濃黑朱古力，濃厚開心果同奇異果。我想食兩隻味，又喺呢個時候，我見到$39.00嘅雙層開心果+奇異果，就決定要呢個。店員問要脆筒定杯，老公揀杯。而我又諗，食完雪糕會口渴，又見到佢哋有鳳梨阿薩姆紅茶，但由於我哋真係逗留咗好耐，所以都唔買嘢飲，要咗杯雪糕先。我先搵到位等，老公就嚟喇，見到軟雪糕影完相要快食喇，佢份量唔多，面嗰啲係奇異果味，佢味道好清，感覺輕盈；下面開心果味厚啲濃啲，好味，令原本開始對開心果有啲驚都180度扭轉返。奇異果味：2.5分開心果味：5分食完後再研究買唔買嘢飲？研究完一輪，都係要試埋$58.00嘅意大利開心果8.0雪糕奶昔，買咗後等大約5分鐘至有。返埋位先，啜啖奶昔，開心果味係有但冇咁濃，北海道8.0牛乳味雪糕味道濃郁，但杯嘢嘅口感唔似奶昔，佢唔夠杰，甚至似沙冰，呢個好失望。北海道8.0牛乳味：5分開心果味奶昔：1分…Read More