big feast's Profile

有超過十年無去巴伊餐廳，以前拍拖食過一兩次晚巿，今日趁假期黎食翻一轉。餐廳外觀同以前無乜分別，簕杜鵑裝飾嘅前門，帶來幾分異域風情。一入門口已經見到有好多個米芝蓮牌恭迎各位，仲有"蔡san推介"。室內嘅裝修同當年有好大分別，無左當年嘅粗獷感，座位整齊左，亦依然寬敞。午餐不算多人，沒有坐滿，最特別係有好多"外國人"，我估係回教國家人士，堂食或外賣的都有。午餐唔駛食到咁勁，我地叫左3個粉麵飯。第一個上嘅係新彊手抓飯，餐牌寫住係炒飯，飯有兩個飯碗咁多，但材料認真少，只有數件羊肉和細細粒嘅紅蘿蔔，可以話係無乜味，要係咁落枱面嘅粉(估計係用黎倒落串燒嘅調味粉)，先至有翻少許孜然味。第二個係新疆拌麵，查實點餐時我地係有問侍應有咩材料，佢話係餐廳推介之一，咁就即管試下。碗麵好大兜，微辣但好油，有好多青紅椒，只有幾片好薄嘅羊肉，最多嘅就係麵，感覺似自家製麵。第三碗係紅燒羊肉麵，係咁多碗之中最抵食，羊肉有7至8舊，炆得好林，湯亦好味無太咸，麵嘅份量也十分之多，但一條菜都沒有。以前在巴伊餐廳食完嘢，會有個酸奶甜品，記憶中有啲提子和黑芝麻鋪面。而家見好似得翻呢個杏仁羊奶凍，細細杯都好食，但性價比略低。可能係因為午餐吧，無左以前食嘅驚艷感。同埋竟然有茶芥費，但沒有加一，真的令人嘖嘖稱奇。…Read More

朋友仔由英國返黎想食韓國菜，就揀左呢間在openrice 排名高企嘅韓國餐廳。由於早左成個月訂左位，我地一行四人去到直入，毋須等位。去到時大家身水身汗，但冷氣好唔給力，叫左侍應調高都無用。我地點左雙併炸雞、烤牛肉水冷麵、泡菜煎餅、炭豚紫菜飯捲、兩杯柚子梳打和兩杯Fresh Strawberry。第一碟上嘅係水冷麵，酸酸地又夠凍，飲埋啲湯，用黎降温仲有效過個冷氣。之後嘅煎餅同紫菜飯捲都好味，但唔算好驚喜。炸雞揀左Honey Garlic and Sweet Spicy，兩種都好味，Sweet Spicy辣度適中，但我更愛Honey Garlic嘅惹味。成碟嘢份量超多，又有薯格和薯條，我地最後都係食唔晒。Fresh Strawberry清甜唔漏，非常好飲。同場好多後生仔女，比較熱鬧，傾計都唔係聽得好清楚。因為堂食限時90分鐘，食完唯有轉場再繼續吹水。…Read More

老友吹雞出黎食嘢，大家都無idea。諗起Airside開幕後一直未去過，即管去嗰邊逛下，事先上openrice揀左呢間餐廳。在餐廳外望唔覺有咩特別，行入去就覺得好寬敞，透過落地玻璃望住出面天陰陰落雨，在室內感覺好悠閒舒服。個月球加埋啲剪紙裝飾，簡約中有藝術感。望住啲餐具都覺得好靚，食都食得開心啲。我地叫左4個lunch。首先上枱嘅忌廉磨菇湯，入口啖啖足料磨菇粒，濃郁creamy。  沙律超乎想像大碟，蟹籽蟹肉咸香，配上胡麻醬汁，整體口感清爽。漢堡肉汁滿滿，加埋芝士和洋葱，非常惹味。值得一讚係蕃薯條唔駛點松露醬都非常可口。朋友仔話呢個黑毛豬似叉燒，可能係梅頭扒嘅關係，但仍然相當好食嘅。牛扒熟度剛好，肉味香濃，肉質軟熟，不用點任何醬汁都好味到震。外脆內軟嘅薯條，雖然都好食，但大家都要留翻個胃食甜品。4個甜品互相輝映。檸檬批微酸醒胃; 麻糬嘅玫瑰味芳香四溢; 千層酥鬆脆，吉士香滑; 芝士蛋糕甜度適中，配上柚子醬一啲都唔膩。加埋四杯飲品，一坐就坐左4個鐘，假日最寫意嘅享受，莫過於此。…Read More

先講重點：餐牌上面寫著，39蚊有M標準份量既温泉蛋牛肉飯。點樣可以平4蚊食到? 答案就係叫29蚊既M標準份量既當家牛丼，跟住再加小食：6蚊温泉蛋！牛肉份量唔少。比其他日本品牌牛肉飯，牛肉無咁多肥肉和筋，而且牛味濃郁。加埋隻温泉蛋一齊食。想再濃味啲，可以*無料*添加牛肉汁。滑捋捋嘅蛋漿加上牛肉汁，撈埋啲飯一齊食，好快將啲飯一掃而光。…Read More

「鳳凰」：神鳥。《說文解字．鳥部》：「鳳，神傳說中百鳥之王，雄為「鳳」。 此店以鳳為名，必然係對自家之雞麵飯料理充滿自信。由疫情開始黎呢度食，已經食過好多次，今次終於啲起心肝寫食評。今次叫左醉香雞湯麵，跟餐加凍熱飲品$8。一上枱，花雕酒既陣陣香味撲鼻而來。雞湯配上米粉，簡單而美味既組合。數一數，有六件雞，雲耳，紅棗。佢個菜牌講明，湯麵唔可以揀雞既部件。不過，佢最均真既係，六件雞入面，佢次次都有兩件係屬於最滑既雞脾部位。以雞既嫩滑程度同埋鮮味，完全食得出佢採用了新鮮雞。我最鍾意先飲啖充滿酒味既湯，食件雞脾，再食米粉。食到咁上下，先至將肉身較粗既其他部份，點一點辣椒鼓油一齊吃。最高享受呀！…Read More

每隔一排就會返黎食佢個招牌砂鍋雞湯趐，今日又忍唔住黎食嘞。重點係呢期既優惠，加一蚊有多一隻鮑魚，升級成為砂鍋雞湯鮑趐！個砂鍋一路滾左咁拎上枱。濃郁既雞湯，除左用重料淆成，仲飲得出有金華火腿既香味。米粉，趐都畀佢帶起左，相信就係呢個湯吸引左唔少回頭客。雞就唔係好多，大約有6件。趐就有3小件。整體唔算好飽，啱晒我呢啲中年人。係時候又諗下幾時再黎食嘞…Read More

今次係近兩個月以黎第三次食呢間涼皮，今次仲特登拉埋另一半黎食，等佢試下。我地一個就加左青瓜木耳口水雞、一個加左椒麻雞小食。上次食小辣涼皮，辣到流晒鼻水，今次就試下BB辣。但我發現小辣好食過BB辣。涼皮汁酸酸地勁開胃，同青瓜絲、芫茜、炸豆、花生碎撈勻，放入口雪一聲。嘩！滑到呢！口水雞同椒麻雞就表現正常，唔係超級好食但都有返咁上下水準。不過涼皮同小食都唔算好大份，加埋食都只係啱啱好。…Read More

今晚係深水埗食平民湯飯。$43自選三個餸，再送時蔬。我揀左豬骨湯底、鯇魚、雞柳、加3蚊試下佢個豬腰，蔬菜就揀左娃娃菜。等左只係一陣，熱辣辣的湯飯上枱。先試一啖豬骨湯，不算好咸但夠味，但都幾重胡椒粉同薑味。豬腰切得十分薄，無任何怪味；雞柳亦嫩滑。鯇魚雖然只有兩塊，但魚身那一塊煮得啱啱好，不會過熟，點一點新鮮辣椒鼓油，簡直有食緊火鍋既感覺。食完再望一望餐牌，除左湯飯，仲有原盅燉湯同籠仔蒸飯，留返下次再試。總體黎講，$43真係抵過兩餸飯。…Read More

出開九龍，為左食加多娜嘅面包，天氣好熱都特意由佐敦行過去油麻地，可見啲包對我有好大吸引力。基本上呢間面包店長期都好多人，每次去都要排隊，係差在在店入面打蛇餅定排出街，今次亦無例外，成間舖塞滿左忠粉，仲有海量遊客。如果有人維持秩序就好，因為我俾錢時真係俾人打咗尖，都唔想出聲嘈了。究竟係咩吸引左我去排長龍，並唔係佢個出晒名嘅面包布甸，亦唔係3Q餅，而係佢個焙茶Bagel。以前第一次食，驚為天人，今轉第N次食亦無例外，保持一貫水準。個包軟得黎有啲chewy，比一般嘅bagel 易𡁻。加上超濃郁嘅焙茶香味，中和左啲cream cheese/乳酪嘅油膩感，細細個唔太滯，做下午茶一流。今次順道試埋佢個開心果泡芙，入面嘅開心果餡料好滑好creamy，皮亦很薄，但整體甜左啲，開心果味亦不算太突出，對我黎講份量頗大，食完有啲"漏"嘅感覺。期待下次可以買到開心果燒餅，睇下會否比泡芙好食。…Read More

去完石硤尾主教山，度過去深水埗文記食車仔麵，一次過滿足晒小朋友兩個願望。文記嘅車仔麵係人都知好食，長期保持到水準真係值得一讚。縱觀週圍都有車仔麵店，但唔係啲餸唔掂，就係個湯唔掂，或者份量太少食唔飽。唯獨文記係質量兼備，性價比高，值得一食再食，難怪成日排長龍。小朋友話豬大腸同牛腩都好正，啲牛腩又林又多，佢留到最尾好珍惜咁慢慢歎，最尾仲飲晒啲湯。識食車仔麵一定叫油麵，加埋我最鍾意嘅豬紅，同招牌之一嘅大大粒韮菜餃，過足口癮。…Read More

去開葵興整嘢，上openrice睇下附近商場有咩食，小朋友話想食西餐，佢自己揀左Little Prince。入到去有張六人大枱，一邊剛好仲有兩個位，就快趣坐低。無侍應落單，自行到收銀處order完，就可以拎有號數嘅牌放自己座位，好快就有侍應端上食物。無華麗裝修，但有文青風嘅簡約。呢個銀杏葉裝飾，為餐廳帶來幾分日式風情。叻沙意粉個汁比出面好多自稱叻沙嘅湯底好好多，啲蝦係新鮮兼彈牙，配搭埋吸左叻沙汁嘅車厘茄和豆腐卜，加上口感al dente嘅意粉，令人驚艷。此意粉絕對值得encore。呢個黑松露雜菌忌廉汁意粉有好足料嘅雜菌，都係水準之作，但因為常見，相比之下上面嘅叻沙意粉更得我歡心。…Read More

小朋友放暑假，特登請假同佢呢隻為食貓週圍食，其中一站就係本家，因為小朋友睇電視見到白種元，上晒腦。去到餐廳啱啱開門，被帶左入去2人卡位坐低。幾位侍應完全無招呼嘅打算，揮手幾次先有個嬸嬸過黎，仲要只俾一個 a la carte嘅menu我地，問佢唔係有lunch menu嗎?  佢話未咁快有。咁奇，你午巿未準備好做乜開門，當我係遊客嗎。心有不甘，過左一兩分鐘揮手叫另一位嬸嬸，就俾左個lunch menu我地。點完餐都好快上菜：泡菜只有一碟偏辣，其餘我個仔都食到。款式比普通韓國餐廳多。個飯味道正常，係白蘿蔔偏硬，鍋底有飯焦，頗香口。牛肉份量好多，無肥膏無筋，非常好食。牛肉湯好重胡椒味。…Read More