搵食妹子的個人專頁

休閒中午想食brunch,路過見到韓國人氣連鎖咖啡店：Tom n Toms coffee，見裡面人少少，便入去看看⋯睇過Menu，決定叫蜂蜜奶油吐司同海鹽蝴蝶餅套餐，飲美式咖啡。點知大失所望！！蝴蝶餅面目全非，真的是圖片只供參考！即使朋友已向職員反映並重做亦只是變成油亮亮而已，強差人意！ 參考實物👇🏻👇🏻👇🏻👇🏻👇🏻 買返黎既實物👇🏻👇🏻👇🏻👇🏻重做既結果👇🏻👇🏻👇🏻👇🏻 至於吐司亦很一般，係hea版吐司,topping係半溶的忌廉，食不到半點蜂蜜味，反之肉桂味勁重，這是蜂蜜奶油吐司嗎？賣相麻麻，性價比超低，以這個價錢我情願去卡夫卡食 環境衛生也有待改善，我朋友無意發現地上有小強屍體😰😰整體來說不會有下次了！…查看更多

妹子我是今月壽星女，姊妹們為了同我慶生又知我嗜食，所以大家決定食自助餐，Palette的自助餐妹子之前食過，質素不錯，加上有7折優惠，既可以錫住姊妹荷包，又可食得滿足，真是超抵食哦！ 是夜自助晚餐，食物水準依舊不俗，而且口味選擇多，由海鮮冷盤、各款熱盤，到精緻甜品，都應有盡有！食自助餐步驟當然是先食海鮮>再食熱葷>最後甜品喇~ 海鮮區有蟹腳、龍蝦、海螺，同我的至愛生蠔，還有例牌刺身，三文魚、甜蝦、八爪魚和呑拿魚，全都十分新鮮，賣相吸引。在海鮮區必定先吃我最喜愛的生蠔；分別有澳洲科芬灣蠔及美國石蠔；對於生蠔迷而言，這裡的生蠔勝在有廚師於現場即開，長開長有的供應，可以要幾多夾幾多，單食生蠔足以回本，不過都要量力而為，不要浪費食物喔！生蠔夠新鮮，擠點檸檬汁鮮味已昇華；而波士頓龍蝦亦是另一亮點，肉質鮮甜彈牙，非常有口感！其他海鮮有日本松葉蟹腳、加拿大翡翠螺及各款刺身，味道中規中矩。西班牙的48個月黑毛豬腿, 是餐廳的另一主打，只要食10片以上，就可以回本了，掛住食忘了同隻豬腿影相。。。 酒店的自家製意粉當中，以墨魚汁麵做得最好，意粉食起來硬度適中，帶點煙韌。至於熱盤主打「蘿蔔牛腩煲」炆得夠稔夠入味，柱侯醬汁味道不過不失 甜品區款色與上次不同了，新加了燕窩白桃慕絲蛋糕及咖啡朱古力tart；妹子較為喜歡後者，因為個tart一食入口就有濃濃的咖啡味與朱古力醬融合，味道香醇濃郁。 其他食物因為妹子之前已食過，相亦影過，不想重複了。不用400蚊的價錢，可以食到有酒店餐廳質素的生蠔自助晚餐，真是沒有不給讚的理由。 …查看更多

收工同班同事一齊去食飯，由於男同事佔多，所以由佢地發板，其中一個同事名符其實係人肉openrice，立即動議去66食雞煲，作為港島人既我未食過雞煲，所以no say。。。我地一行6人去到舖頭門口見到有位立即鬆口氣。。。大家坐低之後，攞張點菜紙一睇，真係要諗清楚先好點，因為係散叫，所以整體上價錢偏貴 ，最終我地決定叫個雞煲要少辣，外加豬軟骨，同幾款火鍋配料。雞煲煮了一陣，再攪拌左雞煲數下就開始食，裡面既材料除了有雞塊之外，也落左大量既芫茜、芹菜、大蔥、洋蔥、紅椒，入口唔係好濃味，可能係因為少辣，對於好食辣既妹子我，完全食唔到有麻辣既味道，就算放湯後變成火鍋，仍然係淡而無味，不過好在豬軟骨同雞肉都尚算嫩滑，以雞煲黎講就唔算得上好好食。 喺等待火鍋既同時，我地就食著炸魷魚鬚同辣子舌頭先，因為妹子我唔鍾意食鴨舌，所以比唔到評語 ；而炸魷魚鬚都係中規中矩，不過男同事佢地就幾鍾意食，仲encore左添！講到食火鍋，緊係唔少得肥牛，雖然冇咩牛味不過唔嚡口。 我地仲點左炸響鈴、蜂巢豆腐、手打墨魚丸、咸牛肉芝士釀油條、蔬菜藍，因為人肉openrice話呢到既響鈴是新鮮炸，我地食過都覺得脆身唔油膩，值得一試。 至於手打墨魚丸賣相唔錯，黑白色墨魚丸以梅花間竹呈上，食落白色丸既墨魚味重過黑色既。咸牛肉芝士釀油條，濃郁既咸牛肉混埋軟芝士，釀喺脆油條上面，店員教我地將釀有餡料既一面浸湯滾30秒，淥熟咸牛肉之餘，油條可保持酥脆，口感唔錯！蔬菜藍就都係嗰啲大路野。。。大家睇相喇~ 整體上冇部分食評所講既咁"神"，若果係為左食雞煲既話，可以有更好既選擇。。。…查看更多

今日同朋友去咗銅鑼灣食飯，食完飯之後我哋覺得意猶未盡，朋友就提議去附近嘅松記食埋糖水先再返屋企。雖然之前未食過松記，不過朋友試過覺得OK，所以就提議去嗰度食糖水。去到松記之後室內環境同一般茶餐廳差唔多，我哋一齊睇咗Menu之後分別叫咗幻彩珍珠同佢最出名嘅綿綿冰試吓，綿綿冰揀咗芒果味而配料就揀咗爆豬同可可米；至於幻彩珍珠其實就係雜果配西米露加涼粉等左冇幾耐就黎到啦！個綿綿冰真係好大份，我哋睇到都覺得興奮！而幻彩珍珠同想象中差唔多冇咩特別。。。綿綿冰既芒果味香濃而且一層層嘅冰塊入口即溶，有做到軟綿綿嘅感覺係幾好味！不過對比其他糖水店來講其實又冇咩話特別好食嘅感覺，不過至少做到合格嘅標準咁囉！…查看更多

星期日放假帶埋媽咪一齊出銅鑼灣行街shopping行到咁上下見有啲肚餓就同媽咪去我金朝陽二期既大戶屋食飯可能我哋下午茶時段去食所以唔係太多人入咗大約三成不過亦因為咁所以侍應添茶執枱都好快手！之前佢仲喺一期嘅時候我哋都周不時去嗰度食飯，因為勝在足料兼白飯任添，而且喺銅鑼灣來講，價錢尚算合理⋯雖然係日本料理，但係主菜都係以魚、豬、雞等熟食為主，所以同媽咪去食唔怕唔啱食或者唔夠飽。二期嘅大戶屋室內裝潢比之前舊舖更講究，樓底又夠高，環境寬敞舒適。我哋一坐低就落單叫花魚定食同鯖魚定食。等左冇幾耐兩個定食同以往一樣，都有跟前菜、味噌湯、燒魚配菜同茶碗蒸，當然唔少得主角燒花魚喇！雖然而家由白飯任裝改為每人限添一碗，不過還可以要求大飯，比普通份量多近一倍架！講番條燒花魚，唔單止夠大件，而且又香又多汁，唔會好似出面啲燒魚又乾又嚡口，成熟度適中，連埋配菜食就更加突顯魚嘅鮮味！呢度嘅白飯係用珍珠米，食落口感煙靭軟熟，所以我好快添飯，加埋份量都有四碗飯，真係食咗夜晚唔使食飯，每次黎呢度都有大滿足的感覺真好！…查看更多

今日喺希慎food court吃完下午茶，有啲口乾，就順便到天仁買杯野飲解吓渴。每次到誠品呢到的天仁總會出現人龍，而且有堆人圍喺附近等野飲，意料之中同平時一樣要排隊，不過唔係好長，所以照排隊。我點了一杯少甜既凍茉香奶綠($18)，等左15分鐘，奶綠終於到手，飲左一啖，口腔中散發出淡淡茉莉茶香且口感奶滑 ，不過對比台北既分店就略為遜色，茶香不及台店。…查看更多

忙左成日約埋朋友一齊去中環Happy Hour兼食飯，食完飯意猶未盡，行行下經過斜路旁既玉葉甜品，不過舖頭旁既位置都已經坐滿，所以我地去放喺斜路上既摺枱摺櫈到坐低左，睇住手寫既餐牌，綠色的鐵皮檔，真係別有一番風味！ 我地叫左海帶綠豆沙＋紅豆沙＋糖不甩。 呢到既糖不甩帶有微微既姜味，而且丸子正處於暖暖軟糯的狀態，撈埋花生碎、砂糖同椰絲，煙靭中夾雜香脆，有口感又好味，值得推介！ 另外，我食既紅豆沙味道吾錯，略嫌稀左啲，勝左價錢相宜；至於朋友食既海帶綠豆沙佢遺覺得冇咩特別。。。背著斜路坐櫈，係會有啲搖搖欲墜既感覺，不過同時亦覺得好得意，因為坐喺斜路所望既景致又有別於平時行過斜路所望到既，所以大家不妨試下坐斜路嗰邊既櫈食野㗎~ …查看更多

因為一早訂左位，所以去到可以直接入坐吾洗等 Bistecca既lunch semi－buffet，絕對係大胃王恩物~Buffet既選擇有不少，數埋都有廿幾款菜色，可能係以前菜為主，所以當中多數係蔬菜類。。。當然對於肉食動物既我黎講蔬菜又點會滿足到我呢？至熱之選：Parma Ham配蜜瓜其他既例如：Mozarrella Cheese&Tomato、Mushroom、焗甜薯、泰式柚子沙律。。。都係吾錯既選擇。至於水果盤選擇雖然比較普通，都係西瓜、蜜瓜、奇異果、橙等生果，不過勝在夠新鮮，可以清下腸胃。最後當然吾可以少得甜品啦！cheesecake、chocolate brownie、apple crumble等等。若果吾係食到太多既話，真係吾需要再額外叫個Main。因為餐廳會不斷refill食物，而且有部分會fill新菜色出黎，剩係每樣都試啲都就已經夠滿足lol以$138價錢可以任食Semi-Buffet黎講，呢個價錢係幾抵，尤其喺中環區，仲要食物質素都OK既就更加少，所以就算係閒日都會有好多附近返工既朋友，訂位成班一齊食晏!打算過黎食lunch既朋友記得訂位哦~…查看更多

對於吾係第一次食school food既我地黎講，預左要等一段時間先會有位，所以選擇未肚餓都早啲拎左張籌邊行街邊等位！等左大約40分鐘終於有位，我地一坐低就即落單：1-紳士先生  做法係用蛋包芝士包紫菜包飯包午餐肉，表面既雞蛋煎得薄薄地，淡淡蛋香撲鼻，加上半溶既芝士，配合午餐肉，口感一流，味道很豐富，有食吾停口既感覺。 2-一次過可以試到3款吾同壽司口味既新款拼盤：星花宮卷   中間黑色既係烏卒卒，墨魚汁飯包著少量泡菜和墨魚粒，口感QQ，而且佢仲係鋪頭其中一樣受歡迎既菜色之一。至於左邊既係紅葉花卷, 紅色係紅菜頭, 中間有紫蘇同蟹肉, 雖然配搭幾特別, 但係味道上並吾突出；而右邊係卡里雞卷 - 咖哩飯包雞肉，口感一般，咖哩味普通，完全係食雞冇雞味既感覺，所以交俾朋友清左佢。 3-必點之選，半溶芝士辣年糕   絕對係嗜食辣既朋友吾可以錯過既年糕！ 吾單只年糕本身口感煙靭，配合半溶芝士，黏黏地軟熟度亦適中，辣醬汁方面更加係無可挑剔，嗰種甜中帶辣既層次感好強，味蕾所感受到既刺激，係非常深刻既體會，難怪每次我點呢個佢地既侍應都會再三強調有幾辣，又問我係咪真係食得到咁辣。。。。 呢間新派韓式料理的確係不錯，難怪排出龍都咁受歡迎咁多人光顧，當然我都係其中之一喇～ …查看更多

昨晚有朋友做東請食飯，而且是自助晚餐！我一行入酒店大堂便有服務員接待，懇切地送我入lift，到餐廳門口又有服務員上前詢問有否訂位，再交由餐廳經理帶我入坐，絕對做到了賓至如歸的感覺哦！餐廳內以白色為主調配上七彩繽紛的燈，感覺簡潔時尚。不過可能是閒日，剛來的時候，沒有太多人，入座率大約有七成，因此周遭環境不會太嘈雜，對於喜歡靜靜地同朋友傾計的我，這是加分位。至於食物質素整體亦不錯，形形色色的菜餚，可以滿足大眾不同的口味，由海鮮刺身、中西熱盤，到特色甜品，全都一應俱全！海產方面有美國石蠔、波士頓龍蝦、日本松葉蟹腳、加拿大翡翠螺。。。熱盤都有廿幾款，新西蘭羊架、即切牛排、、蘿蔔牛腩煲、泰式青紅咖喱、泰式蝦餅、而且仲有自家製意粉可以配蕃茄味、菠菜味或者墨魚汁味等醬汁。自助餐都有有機菜，沙律都可以上回本菜單lol其實有機這東西本妹子我識條鐵咩，不過為了來食下一回，所以食無添加的沙律菜最好，而且醬汁都有好幾款，例牌黑醋汁、柚子汁、紅酒醋汁、蜜糖芥末汁等，仲要不是低脂便是脫脂，要keep fit的女孩子都可以無顧慮試自己喜愛的味道啦！甜品區款款各有特色，形神俱備，做到了水準，當中妹子最欣賞的是木糠布甸，食入口有種熟悉的味道停留在口腔中，但是一時間又想不到是什麼食物有同樣的味道，只可以肯定不是木糠布甸，請有同感而又知道是什麼的食家留言給我。(謝謝！)另外，值得一讚的還有白松露朱古力噴泉及72%朱古力冧酒蛋糕，這兩款甜品都頗有意思~朱古力噴泉本身是自助餐指定動作，不過這裡加入了白松露，令到朱古力有回香的效果，同時又不會蓋過朱古力的味道；至於朱古力冧酒蛋糕，一食入口便知是真材實料，因為一入口接觸到舌頭，便有濃烈的冧酒味散發出來，再加上濃郁而軟滑的黑朱慕思，口感的確不俗！總括而言，無論是環境、食物及服務均達到作為酒店餐廳應有的質素要求，會再同屋企人黎食或者試下這裡的Tea set。…查看更多

週日同埋閨密一齊喺星街搵食，行行吓見到有老蘭食開嗰間wagyu，相信食物味道應該差不多，所以決定入去食brunch。Cafe裝修行悠閒路線，簡約寧靜，最啱同朋友嘆茶傾偈⋯見到menu上有我至愛既All Day Breakfast，立即落單，大家叫既配搭都唔同，實行開心Share。我個朋友點左Eggs Marianne 跟peppermint tea。點餐後一陣子就上菜，快靚正 我點既配料有水煮蛋丶香腸丶煙肉、薯仔片丶蘑菇粒丶蕃茄丶茄汁豆及多士，雖然煙肉略為乾身及偏咸，不過食番d鮮蘑菇粒又平衡了味道，而水煮蛋亦做到應有既流心 ，至於薯仔片丶茄汁豆作為配角填肚則不過不失！至於朋友點既係典型egg benedict，水煮蛋置頂，加三文魚片及嫩波菜葉做餡放在吐司上，仲有薯仔片同蕃茄伴碟，醬汁味道不太濃，令淡淡既三文魚香更為突出。整體而言，雖然味道上唔係特別深刻，不過勝在份量十足，而且環境舒服，不失為一個放假mode填肚既落腳點！  …查看更多

由於分店唔多，難得同bb去赤柱玩，就梗係要食番件pizza啦！本人係芝士控，所以點左4 Cheese Slice,只有芝作主要材料既佢，配合蕃茄醬，更加能夠突出到芝士既味道，真係好好味！😋再加上我地坐喺海旁望著天海一色既景致，真係愜意非常！…查看更多