CathyFong1983's Profile

去西貢行完, 夜晚食飯去咗呢間食越式粉。我只係食咗個蝦卷, 因為唔係太肚餓, 天氣太熱。佢啲蝦好大隻好新鮮, 裏面有扎肉包住, 嗰塊皮都好好食, 點埋D魚露, 幾開胃。D瓜菜同埋海鮮都啱啱好, 唔會剩係得啲青瓜蘿蔔絲菜。佢係冇餐嘅嘢飲要散嗌, 呢間開咗好耐, 食過兩次, 如果喺出邊曬完, 夏天嘅話, 食返啲越南嘢, 冇咁飽滯, 感覺不錯!…Read More

呢間平時都好多人排隊,係韓國舖頭,見佢有個好大嘅螢幕播住BLACKPINK,裝修非常之新,影相打卡一流。佢個Pizza非常之好食，唔同傳統大品牌嗰兩間Pizza shop, 最緊要係要叫芝心批, 因為佢個芝士有成兩吋濶係超多芝士唔係喺嗰邊嘅裏面係喺嗰邊嘅表面, 芝士部份亦有少許香草, 個邊好好食，所以加咗$45都係值得。啲餡都夠多, 調味適中, 佢嘅香料味係幾特別, 好味！意大利飯都OK, 但係如果價錢嚟講, 午餐意粉同埋10吋pizza都係$120起, 選擇Pizza比較好, 一定唔會失望。…Read More

琴日平日12點去咗食酸菜魚。係返工時間，但係都有五六枱人客, 算係有人流。叫咗個唔辣嘅酸菜魚, 另外再叫咗個招牌炒飯。上菜速度正常,酸菜魚裏面已經有粉,個粉係粗身已經入晒味, 同埋好煙靭, 係會想再添嗰種😋。啲魚佢有分普通同埋桂花魚揀, 今次叫咗普通, 佢味道十分濃郁，老人家就會覺得鹹咗啲。同埋個魚會連埋啲魚皮感覺好新鮮, 二人份量$268喺朗豪坊嚟講唔算貴。桂花魚就328下次會試吓。佢嘢飲做緊第二杯半價, 本來想試水果茶, 但可惜唔飲得凍嘢。會有茶芥, 佢嘅茶杯係好似功夫師傅用嘅會有個蓋要慢慢飲先至可以格到啲茶渣, 因為佢啲茶葉全部放晒落個茶杯度，所以有少許麻煩，但可能係特色。埋單$468二人用, 呢個價錢喺商場裏邊都叫可以接受。呢度氣氛好好, 靜靜地光線又調暗, 係舒適嘅地方。…Read More

呢間之前喺沙田都食過, 分店算多! 行過有時都會見到。今日見未夠六點就食佢個下午茶, 叫咗扎肉雞絲檬粉加杯凍飲$55, 如果特飲就要再加多$5, 雖然價錢唔係超級平，但係以荃灣西區算是不錯。如果晚餐套餐會包多一個小食, 價錢貴啲，但係都OK。其實略嫌佢湯底太清淡，配料都做足傳統有青紅椒青檸香葉少許芽菜同埋一啲蔥𢇁。佢啲粉太容易散， 個粉質地太淋, 感覺上係佢嘅粉問題而唔係煮得耐嘅問題。扎肉OK因為有黑胡椒，都夠味!但係個雞絲就有啲粗嚡。整體上都係OK, 唔係難食, 可以接受, 如果星期六日想食下午茶都會再試。…Read More

今日去咗食米線，排咗10分鐘入到去。見餐牌有好多小食, 都幾特別! 有蝦多士，尖椒魚皮, 炸豆腐。米線有主打魚腐可惜去到已經售罄，所以叫咗豬頸肉米線另一碗自選咗墨魚春卷。蝦多士侍應話只剩數碟, 只係6:30, 所以如果想食就唔可以太晏去.。豬頸肉比其他餐廳食嘅爽口，平時出面食開會係好瘦, 今次呢個肥瘦適中。炸豆腐好多人嗌即叫即炸一口豆腐, 非常不錯! 米線有豆腐卜同芽菜配料, 叫咗BB辣, 米線同湯底好夾, 感覺融合, 米線軟硬度亦啱啱好。呢間價錢唔貴, 小食特別, 不妨一試!…Read More

嗰日去開北角, 特登搜尋有咩美食。見呢間係米芝蓮推介, 行10分鐘都要過去試吓。 鋪仔啲裝修好似啲粉麵舖, 其實冇乜裝修更加好，因為唔會將啲開支轉介去食客, 嗰日去到12點左右, 未到食晏時間已經多人。佢有好多套餐都係包咗煎鍋貼, 我嗰日叫咗鍋貼同生煎包套餐包咗個酸辣湯, $60, 如果好食價錢一啲都唔貴。 平時我係唔食酸辣湯嘅，因為太辣同太酸， 一試佢個酸辣湯即刻覺得好好飲, 唔太酸唔太辣,啲料又足, 又開胃夏天真係好適合。 佢主打嘅鍋貼同生煎包都好出色， 無論係個餡定個外皮, 都做得好好！生煎包個餡啲油,汁同個餡比例啱啱好。鍋貼都好味。佢個餡啲肉做得好好，唔會明顯有豬肉味, 食過一定會返轉頭。 果然名副其實米芝蓮👍🏻…Read More

尋日晚餐落去叫外賣, 見門口好多人排隊, 無論係等外賣定係堂食, 其實呢間已經去過10幾次, 次次都好多人。今次叫咗豬紅蘿蔔米線酸辣同埋魚肉春卷豬腩米線小辣, 米線嘅特定配料有好多肉碎, 湯底都好濃味, 個米線份量唔係太多，所以每次都唔會食淨, 如果可以加底就更好, 蘿蔔非常之甜同好淋, 仲要有三大嚿, 都算不錯。魚肉春卷係每次必嗌嘅, 唔係度度都有。佢人手都算多等咗10分鐘已經出餐, 凍飲都係加$10, 正正常常, 因為住附近所以都好常幫襯, 有啲人仲特登揸車去買, 呢間真係可以做經常飯堂。👍🏻…Read More

呢間不嬲食開, 都算多分店, 外賣又出得快, 所以經常幫襯. 最出色係佢D滑蛋, 偏甜, 但配埋個有汁飯係好好食, 基本上就咁蛋撈飯已經可以食半碗. 當日叫滑蛋豬扒丼, 豬扒不過不失, 炸粉量適中, 份量又唔算少, 女仕食細(梅)size已經足夠～…Read More

嗰日食晏見冇乜啱食就去買咗包炒米粉, 見佢平平哋. 最搞笑嗰個阿姐收完我錢跟住攞米粉俾我之後話我冇俾錢, 聽見都好嬲，第一次俾人話我冇俾錢, 我話頭先俾咗$5$1佢，佢好似失咗憶咁完全唔記得，跟住另外嗰兩個阿姐唔出聲, 完全扮睇唔到. 咁我都算啦，見佢10幾蚊我再俾過佢，跟住阿姐仲少少口咁都唔知係咪特登. 之後食包炒米粉，見裏面完全冇料又乾爭爭，仲要唔似炒過， 完全冇味. 跟住醒起而家好多CCTV問返阿姐叫佢check返記錄, 我唔想俾人屈. 佢又笑笑口咁同我講淨係老闆先睇到, 跟住我都費事理佢走咗. 咁嘅質素仲要俾兩次錢30幾蚊完全唔值, 唔會再有下一次…Read More

當天去到7:30， 好在book左枱先有位, 見外面已經要等位, 店員好快已經安排入座. 因為唔太肚餓, 所以以只叫左酸菜魚+寬粉, 大概15分鐘來到, 酸菜魚雖然叫左走辣, 但D魚都好夠味, 酸度好夠, 同埋D魚完全冇骨碎. 試過去深圳某間店食, 因為太多碎骨好難入口, 呢一間真係唔錯, 值得再幫襯！ openrice訂枱仲有75折, 折完只係$240， 好抵食～…Read More