Local 遊客's Profile

臨近聖誕，冇得堂食晚餐，午餐都要食好西。立師傅分身有術，在尖沙嘴開了新店。一齊支持吓。新店就在中間道停車塲舊址，現在已經係好新潮嘅商廈。搭地鐵好易搵到呢個 H Zentre。上一層扶手電梯就見到。環境唔錯，吧檯為主。都係主打Omakase。我點了 14 貫壽司，$458 價位唔貴，值得期待。日光日白，兄弟居然發起「梅酒tasting」😱。4杯梅酒逐一品嚐。跟住要繼續work from home，我都係淺嚐。好開心師傅不斷供應我非常喜歡嘅漬物。沙律同蒸蛋都好味。蒸蛋個盅好靚！開始入正題。第一件「伊左目」。師傅話即係本地稱為「雞魚」。已經有醬油、唔使點任何嘢食👍深海池魚 - 任何季節都食到、Omakase 必然有佢 👍蜜柑鯛 - 用柑皮飼養的鯛魚，產量不高。據說特色是肉有柑橘味。我唔係好食得出。Anyway 長知識啦。赤貝 - 非常爽口鮮味👍牡丹蝦蝦膏 - 亦係Omakase 常見的角色。蝦肉、蝦膏味道都超級濃郁👍北寄貝 - 賣相好靚，但我食果件一般。鰤魚 - 加了「柚子胡椒」，幾清新得嚟有啲特色。幻星鰹- 開始進入重口味系列。呢隻幻星鰹本身油份非常高，稍微火灼一下非常香口，同時魚味超濃。跟住係「梭子魚」- 朋友好欣賞，不斷search 條魚點樣嘅。師傅話本地叫「竹籤魚」。唔記得係乜😅鯖魚 - 加入了柚子蘿蔔，酸酸地。本身小小類似箱押壽司咁嘅做法，再夾紫菜食，鯖魚嘅濃郁魚味發揮得幾好而唔會腥。帆立貝 - 都係夾紫菜食，另一位朋友話「好似食咗個大海咁澎拜」😂。咁我本身唔係帆立貝嘅粉絲，唔係好感受到個大海，都係鮮味嘅～海膽軍艦 - 高水準拖羅 - 繼續高水準。拖羅筋！係，係拖羅嘅筋，第一次食。燒香咗，口感係出乎意料，唔韌，係入口即溶但唔油膩。好嘢！嚟到呢度已經15件，唔知係咪加咗料😂。再有一個驚喜係個麵。細細碗，湯好清好熱，好暖胃。上面加咗小小櫻花蝦天婦羅，又有小小脆脆口感之餘唔會好膩。最後雪芭總結。所以話 lunch 好多時性價比更高。以呢個價錢有咁嘅水準同服務，值得支持～…Read More

近來家中經歷了不少事情，又經過了生日一段怒食，一直將食評荒廢了。但遲好過冇，終於都的起心肝，寫這篇遲來的食評 - 只因爲我覺得值得推介。當時光顧，只是隨意網上搜尋九龍區 Omakase。到埗後也有點意想不到是這種家庭式小店。坐在吧檯，首先處理酒。自帶了Sake，本店免開瓶費。一流！店員提供「鍚杯」來飲 Sake，雖然口感不覺得有特別提升，但算係有特色 （共有12個十二生肖「鍚杯」，不會搞亂）開始上菜。一開始先來前菜三小碟。最意想不到係右面的炸薯條！同Omakase 唔係好襯 😂 加上我健身，唔食喇。開始刺身，首先是真鯛，加了蛋黃醬，幾夾。第二道是岩手縣生蠔。日試酸汁食法。正！爽口富海水味。我加錢要多了一隻。第三道帆立貝。師傅話已經加入了現磨wasabi，可以不沾醬食。有2種食法，不錯。緊接秋刀魚。加入芝麻，用紫菜包住食。依家係 season，唔腥、肥美。牡丹蝦刺身，配蝦膏。可惜蝦頭不能炸嚟食。最後係 Chu Toro（中腹），都係簡單紫菜夾住食。無O-Toro 咁膩，較有魚味。我個人好喜歡。間場有碟冰頭漬，另外要求了蘿蔔，師傅都樂意奉上。三件壽司- 碟魚、濱鯛、剝皮魚：都係好味。不過已經有啲飽😂酒煮蜆 - 似茶壺湯，有熱湯暖肚好舒服。熱食有河豚一夜乾，本晚最出色👍。河豚肉經過風乾，鮮味更集中濃郁。份量不大剛剛好。汁煮鮑魚。鯛魚湯烏冬。我要減低澱粉質所以走烏冬。都唔錯。小店比較有人情味。我飲晒自己支酒，意猶未盡。師傅居然已成本價賣一支酒比我。感動。Omakase 一向都係 mark up 好高。小店有做其他客人，唔係全程照顧我地一檯客、地點又係住宅區，所以價錢比較合理。$1000 一位，值得 encore。亦令我想起「小隱隱於野、大隱隱於市」，希望這種「民間高手」式小店可以做下去，讓食客們在名牌大店外，多一點選擇。…Read More

幫襯「大煲皇」已經有8、9年。直至搬到新鋪，繼續支持，自有其獨特之處。新鋪在原店隔兩個鋪位，好易搵。新鋪整體比較寬闊、有「卡位」適合2-4人聚會。洗手間亦比以前整潔。當年鍾意左呢度係因為「天仙配」：一條細活魚刺身加火鍋湯底嘅組合300幾蚊。我亦喺呢度愛上左活魚刺身，分出左游水同冰鮮嘅分別。時移勢易雖然呢個組合已經無左，不過靈魂生猛海鮮刺身依然在。可能疫情關係，入貨較少。今晚點了一份油甘魚、一份象拔蚌、6 隻海蝦刺身。上菜時蝦頭仲郁郁下，證明好生猛。生猛劏出來係唔同滋味。象拔蚌好大份，肉質爽口「shok shok 聲」；油甘魚厚切夠口感。Size does matter。另一個主打，一份「頂級本地手切肥牛」。慣性點了大份，目測大概24、5 片。油脂分佈平均、肉味夠濃。原本細份唔夠食，依家我健身，肥牛只食一件。但係細份只係平幾十蚊，所以點大份打包都好。我自己就轉戰「手切滑牛肉」。健身減肥打邊爐，唔食得咁肥，但係又好想食牛肉，點算？健身頻道大神們教落，點餐牌最平的牛肉就得喇！通常最平即係最瘦。不過瘦唔代表唔好食。餐廳嘅滑牛唔知點正，肉如其名好滑。由於油脂少，肉質的口感更突出，咬落有勁啖啖肉。我一個人隊晒一整碟！湯底係打邊爐嘅靈魂。今日比較簡單麻辣拼香茜皮蛋。正常、唔會死鹹。清湯用來碌菜最啱。因為菜好吸油，健康打邊爐，應該先煮好一堆菜，以免湯底油淋淋時啲菜吸油。先食菜打個底可避免食過量肉；食一啖肉，就食一啖菜，咁就比較快有飽腹感。我地一般如果開一條魚，都會叫老闆加錢炸埋魚骨，因為呢度啲炸嘢係神奇地好出色。今日係叫一份魚，老闆都話包一份炸嘢俾我地，蝦頭亦可以一齊炸埋。上菜包括幾塊炸油甘魚。有啲似tempura 薄漿炸法。好奇妙地油甘魚係非常爽口，口感好似門鱔咁爽！我都破晒戒食到停唔到口。強力推介。下次一定要再試。幫襯左咁耐，老闆唔收開瓶費，又提供冰桶。唔該晒。不過呢度酒杯就係一般厚身茶樓玻璃杯。都係自己帶酒杯啱飲啲。刺身火鍋配 Sake，正～今晚真係食左好多野好滿足，價錢又合理。有生猛刺身，有好味火鍋，會繼續幫襯。…Read More

終於 book 到「六公館」。原本對這些新派中餐並唔係太感興趣（好難計卡路里），不過環境真係太靚。點都要一試。位於海港城最最最盡頭，可以想像海景一定無敵。親身來到，3面環海的景觀，非常震撼。裝修、擺設好精緻。座位非常舒適。好貼心地將座位面向中環景色。這裏水一支 $98。不喜歡的話開一位茶 $28。非常合理。沒有叫套餐，散叫比較啱心水。點完菜，面對如此景色，化身遊客四處影相😂。店員非常友善，主動幫忙影相。值得一提，室內非常黑，店員會配備大型的 LED 燈幫忙打燈影相，影出來特別靚。八味金磚豆腐 - 即係椒鹽豆腐。唔油膩、唔太鹹、皮脆心嫩。讚。日本金柚脆皮手撕雞 - 皮真係脆。好似去飲宴嘅炸子雞。肉質就無乜雞味。 不過配合青瓜、柚子，算幾清新。酸辣湯 - 實話實說，好離譜。有一層幾毫米嘅油。味道係⋯⋯ ok 嘅，但係口感油膩到不得了。我飲左一啖投降。鮮柚子雪場蟹腳 - 不過不失，配搭得唔錯，份量有一整條蟹腳拆肉，可惜蟹味唔濃，係咪唔係season？濃雞湯浸菜苗 - 非常出色。雞湯真的好濃郁，陪襯清清地嘅菠菜苗，食落非常舒服。黑豚叉燒松露撈粗生麵 - 松露醬味道濃烈，叉燒份量不多，撈麵彈牙有咬口。食第一兩啖好興奮，不過之後都係覺得重口味啲。我要用茶沖一沖先食。 無帶酒來，只點了一杯house wine 意思意思。整體來講非常滿意。埋單兩位 $1600。有海港城 coupon 減$500。以食物質素及環境來講合理～ 等疫情好轉後可以再多啲人來 encore。…Read More

公司附近比較 decent 嘅食肆已經試得七七八八，尤其西餐，唔係好多選擇。偶爾 check openrice，見到呢間工廈樓上舖，賣法國菜，咁要試下啦。小店格局，簡約整潔。不過Open kitchen，難免成身油煙味。坐低睇吓menu，都ok 多選擇。選好出去落order 同比錢先。所有餐都跟沙律。唔錯啦。加$10 有餐湯。是日餐湯係蘑菇湯，可惜唔係好夠熱。幾貼心地，可以自取免費的凍水果茶。不貼心地，好鬼甜！希望店長可憐下我地呢啲減肥人士，考慮吓提供無糖版本，再放支糖漿喺旁邊，咪可以自由落幾甜都得囉～ （好在都有普通水提供）牛扒係封門柳（hanger steak），係比較瘦嘅部位，但肉味非常濃郁，一隻牛只有兩細條。另外。同店員講希望改薯條做薯蓉，都ok。食完覺得真係好ok，其實呢間店本身係賣食材嘅，所以我都訂左兩條封門柳返屋企再食。佢地亦會幫客人先慢煮。幾好服務～…Read More

小朋友搵學校的事情告一段落，打完「最後大佬」，只等結果掲曉。當晚終於有心情食翻餐正嘢！話說之前去過西貢米芝蓮餐館「勝記」，驚為天人，不過價錢又真係唔平。最近聯絡返，原來勝記的部份班底，在市區自組了新海鮮酒家，又咁啱屋企附近，一定要試下啦。廢話不多說，直接吃下去。招牌之一：椒鹽鮑魚。同「勝記」相比，型神區在。椒鹽惹味但唔會蓋住鮑魚鮮味。另一招牌：本地龍蝦（煎米粉底）。一般係芝士龍蝦，今次上了豉汁，都係好味嘅。本地龍蝦爽口，淡淡肉，同波士頓龍蝦完全唔同食法。米粉底吸收了精華，好容易食到唔停口。前菜藍莓鮮淮山、冰燒三層肉、椒鹽魷魚鬚。高水準，特別係鮮淮山，可以清下味蕾。豉汁蟶子。今晚亮點之一。好入味、彈牙、完全無沙！蒜蓉粉絲蒸扇貝。正常。菠蘿咕咾肉。有驚喜，肥瘦適中、皮脆肉嫩。另外加了個上湯菜心。出奇地清甜。經理李先生好好招呼。免開瓶費。值得一提本店提供的酒杯非常不錯！作為屋村商場內的海鮮酒家，裝修、格調始終比較普通。但價錢亦相對親民。有別於西貢各大海鮮酒家的做法，這裡的海鮮就一個價錢，不會分開收海鮮、油料費，更容易預算。4大2細，埋單2000蚊，以新鮮海鮮來講好合理。加上夠就腳，可以行上山返屋企，下次再 encore～ …Read More

香港的 Omakase 已經開到成行城市，要突破唔係容易。我地就好鍾意不斷嘗試，睇下會唔會搵到驚喜。今次就來到新開試業嘅「鮨三川」。新開業有第二位半價的優惠，試下佢啦。地點易搵，樓下有咁嘅廣告。又好似通俗直接左小小。😂整幢大廈都係食店，競爭激烈。門口整潔。店員都幾細心，有密實袋俾客人裝口罩。Omakase 有兩個價位。今日小小慶祝，唔使諗一定係 $1200。自帶了「銀河鐵道」。特色是要在零下18度儲存，倒出來帶冰花。開瓶費 $150，有合格白酒杯。前菜南瓜豆腐 + 蟹肉果凍。蟹肉配上酸酸的味道，好開胃。刺身陸續送上：最特別係八爪魚。新鮮到肌肉仲識收縮。我係八爪魚迷，好興奮。肉身鮮甜、吸盤位非常爽脆。$1200 價位多了生蠔，配日式酸汁，正！油甘魚有兩種食法。火炙的食法更香口。牡丹蝦好多蝦子，好正。蝦頭另有妙用。Yeah！超脆嘅炸蝦頭，成個頭都食得。送酒佳品、減肥剋星，不過唔理咁多喇。熱食係比較突兀。和牛煎得唔夠香、有啲膩；鵝肝冇乜醬去平衡、更膩；配半熟元貝⋯⋯ 整體就係好油膩。壽司 7 件，全部合格以上。海膽手卷，用了「米鹽」。只有淡淡的鹹味，帶小小米香。不錯的配搭。蒸蛋水準不俗。最後來左個高潮。魚湯烏冬居然比想像中出色。好濃的魚味。好耐無飲過咁正。埋單好均真。並沒有用原價來加一。以呢個水準同服務，我決定encore。…Read More

塵埃落定。我公佈了我離開公司的事情。今日亦開左一個領導層大會，部門改組的事情亦明朗化，我地 3個管理層，又一次揸車去又一城搵食。今次目標係上次搵唔到嘅「穴藏」。停車場可以直接搭𨋢上到UG。其實原來好易搵。對比起上次去錯的「千両」，裝修各有特色，都算係大氣舒適。穴藏比較光猛啲。穴藏menu 選擇明顯較多，價位亦浮動好大。我最後都係健康地選了特上壽司。有沙律小食。味增湯。以呢個格局的日本餐廳來講好普通。大概一般包裝沖水嘅水準。日式蒸蛋就幾出色。比較濃厚，蛋味與鮮味都足夠。主菜壽司。有 8 件壽司、1件玉子、3 件小卷。夠晒飽（同事點了更高級$298的「極上壽司霜燒御膳」則只有10件壽司）。穴子（鰻魚）係招牌菜，係有一整條鰻魚，好滿足，鰻魚汁唔算多，可以食番鰻魚原味亦較健康。讚。其他壽司都高質。老闆點了$188的「美國產照燒牛扒御膳」都好靚。呢餐我請啦。埋單 $763。好滿足～ 返去就要收拾心情準備做好餘下3個月嘅工作喇。…Read More

終於決定了離開公司，向新挑戰出發。我覺得有責任親自通知幾個親信。第一時間要通知我親手請返來的同事。其實共事一段時間，大家已經係好朋友，當然要搵個舒適開陽嘅地方傾心事啦。中午12點揸車到達，室內已經full booking。好在今日唔算好熱，坐露天位都ok。可以𥄫住架車之餘，仲有海景餸飯。跟餐有沙律。唔記得走醬，膩左啲啲但係都新鮮好味。亦有跟麵包，唔係好夠熱，不過不失。點了香煎鱸魚。自己整真係無辦法整到咁香脆。好味。沙律底落左唔少橄欖油，好滑。今餐夠晒蔬菜又低碳水。健康。凍咖啡正常。同事去年生日收到offer，由我親手招聘入來。今年就來生日，我就先行離去。傾傾吓都有啲離愁別緒。不過正面啲諗，有緣嘅，一定可以江湖再見。老套啲講句，友誼永固啊。埋單$340 兩位，價格合理。…Read More

在九龍灣附近，要坐得好小小，傾下計，都唔係太多選擇。繼續搵公司內的老戰友傾計，小小離愁別緒，所以都係搵個舒服嘅地方啦。另外貪佢 Openrice 可以訂位。好方便。之前看過介紹，點了半打生蠔。法國蠔，但真係好細隻，過下口癮ok 嘅。有蒜蓉包。睇到好多牛油⋯⋯ 唔理得咁多，照食！好香同脆。我點了煙三文魚沙律。煙三文魚質素及份量都不錯。整體感覺不錯。跟這位好朋友同事一傾就傾左個半鐘，都無趕客。離開時看到露天座位都滿座，生意興隆。…Read More

公司的大地震塵埃落定，我地3個倖存嘅管理層，去打番個邊爐先。呢度係公司附近，我嘅御用team gathering 地方。一路以來都好支持。依家飲食好難做，佢又推出任食邊爐，仲可以任飲，啱晒我地慢慢傾心事。4人有一隻雞、一條魚；2-3 人都只有半隻、半條，有啲可惜。湯底我地選了鴛鴦。其他湯底不能雙拼，另外鴛鴦湯底同廣告不同，其實係沙爹拼清湯。而且無得加湯只能加滾水，呢點有小小失色。沙巴龍躉夠魚味又唔鞋。走地雞多肉，不過無乜味。合格啦。海鮮拼盤份量幾夠。望落幾靚。蟶子、蝦都好新鮮。其他就一般。任點的係普通美國肥牛，好多肥膏。但係對我來講好正，因為肥瘦分明，我好輕易咁煎走肥膏食瘦肉。其他餃、丸、菜都係任點，質素一般但係一定夠飽。無限任飲啤酒汽水，都多選擇（可惜冇無糖飲料），啤酒係生力（唔係藍冰獅威）都ok 啦。最主要係任飲。自帶了「銀河鐵道」清酒。產量非常有限，所以都難得飲到。特色係要-18度冷凍，倒出來有冰花。好正。由於本身係任飲，自帶酒水都免開瓶費啦。3個麻甩佬，飲飽食醉，7點傾到10點幾。全場只有3數檯，真係難做。埋單再送 coupon。打算下星期再來過！…Read More

難得去中環，一定係搵老友飲返杯。雖然正值炎夏，因為落雨，戶外都唔算熱。兩條友，開支酒比一杯杯點更划算。Domain Servin Chablis。我自己買過同莊的premier cru。睇網購應該大概$200 價位。呢度賣$680， mark up 尚算市價。送的nuts 好好味。食青豆停唔到口。係會免費添食的。另外點了一份小食。$220 有啲小貴，食落即係蟹子沙律，加了黑胡椒。好好味。兩個人，傾下工作大計，好快日落，滿足地返屋企。…Read More

本店其實係一個fitness center 的一角。另外仲有商店區，販賣健康包裝食物。餐牌選擇不算很多，我點了「蒸焗照燒雞扒飯」。份量比我想像中大很多！一大碗。有份量豐富的雞肉，做得好嫩滑，夠入味。有溫泉蛋進一步提高蛋白質。另外有足夠的新鮮蔬菜。最驚喜係，飯量比我想像中的多很多。加上紫薯泥，非常飽（好耐無試過10成飽，今次真係好滿足）加$20 有凍咖啡。美中不足不提供普通水，好似一定要叫嘢飲咁。本店提供食物的營養資料，方便大家更精準計算食左幾多。整體而言非常滿意。健康餐只有 500 多大卡，但有豐富蛋白質，最重要係飽肚！一定變飯堂。…Read More

疫情期間多左喺屋企食飯，日日都係果幾味，偶爾都想加吓餸。睇過介紹，今日試下「泰屋」。位處於食肆林立的彌敦道726號。7點左右人流不算多。出𨋢已經見到不少泰式擺設，都幾有心思。店面不大，環境走簡潔光猛路線。點了3樣餸，店員都細心提醒蒸魚製作需時，要耐心等待。今日唔忙，都無咩所謂。我話想落去等，店員都有提出搞掂打比我。20分鐘後完成，兩袋食物準備就緒。第一味泰式生蝦。有用冰鎮。返到屋企食都仲新鮮爽口。附送的醬汁不算太辣。第二味泰式海南雞半隻。雞味唔算好突出，同埋只係跟港式薑蓉。不過份量好足，幾大隻幾好肉。冬蔭公盲曹。分兩個盒先裝得晒，另有一碗冬蔭公湯。放番落隻碟都幾靚仔。我點了小辣，魚味比較突出。盲曹特點骨肉分明，啖啖肉。呢個煮法唔會腥，成條食晒。湯份量好多，我地分開飲都得。個湯好夠味，好刺激！400幾蚊，好過自己煮。唔錯～…Read More

繼續管理層「去遠啲傾秘密」系列。由九龍灣千里迢迢揸車去到又一城，行吓行吓去左千両。其他主管點了三色便當、壽喜燒定食。店員特別提我地，壽喜燒係即制，要等20分鐘。而我就點了「萬両」壽司定食。共10件壽司、一份沙律、一碗味增湯。等了又等，壽喜燒定食結果先上！三色便當也到了，我啲壽司結果最後先到：壽司保持高水準。較出色的係蒲燒鰻魚、炸蝦卷、火灸三文魚。$108，物有所值。不知道是否因為疫情，檯與檯之間隔得蠻開，坐得好舒服。…Read More