kych's Profile

以前韓宮喺正黃埔站A出口，我周不時都會帶朋友過嚟食，個個都食得好開心。之後佢個舖位變咗韓國食品超市，餐廳變咗側邊嘅小食店，我都有幫襯咗幾次。雖然都好食，但係賣嘅都係飯卷、年糕、炸雞嗰d，食唔到大廚手勢，都幾可惜。今日心血來潮想食韓國嘢，偶然喺OpenRice見到韓宮喺隔離街開返，即刻去試下。新舖位置喺原舖斜對面，都係好近港鐵站同埋各個巴士站。舖位比以前細d，但係環境好舒服，有種去咗朋友屋企嘅感覺：店員亦都好親切，有講韓文、講英文，亦都有講廣東話嘅，大家唔使擔心語言問題。晚市餐牌大部分都係預你share，唔想食咁多嘅話，都可以叫冷麵、伴飯嗰d。雖然我得一個人，不過既然特登嚟到，都想試多d，最後叫咗牛骨湯 ($128) 同埋紫蘇炸雞 (S) ($158)。店員送上前菜4小碟 (菜、薯仔、泡菜、辣魚乾)，不另收費：牛骨湯上檯嗰陣仲係滾，一路卜卜卜咁：入面有三大舊牛骨，而且有好多肉，肉好軟冧，個湯清得嚟入味，好食。本來想叫碗白飯，不過湯入面有粉絲、蘿蔔，一個人食其實都好夠。紫蘇炸雞，我叫嘅係S細份，嚟到有十幾舊，比想像中多：附上嘅除咗黃芥辣醬、韓式辣醬、醃蘿蔔，仲有支旗仔寫住 “We Love U”，添多一份温馨。呢碟炸雞係外面炸得好脆口嗰隻，唔係蜜糖牛油炸雞、甜辣炸雞嗰類，不過都好食，入面啖啖肉得嚟好嫩滑。我6點幾到，7點幾已經坐滿。有幾檯有訂位，同埋有幾檯係韓國人，氣氛都好好。見佢咁多客都開心，我都乖乖埋單，打包咗半碟炸雞同一舊牛骨，讓返個位出嚟。下次會帶多d人嚟試下佢個豬手！我都好耐冇寫食評，不過見佢新開未有食評，而且佢係好食、好坐，我就寫返個嚟介紹俾大家，希望佢客似雲來、長做長有。新張期內免加一，只收現金(QR code落單，總數會計埋加一，不過店員會幫你扣返)(只供參考，唔知新張期去到幾時㗎)…Read More

曾經喺佢間Chez Patrick Deli食過，好有驚喜，所以一直都好想試呢間，今次就趁Restaurant Week同個朋友去食午餐！聞說法國人如果邀請你去佢屋企食飯，最好遲返個15-20分鐘等佢夠時間準備 (準時係唔禮貌嘅表現！)，不過餐廳應該例外嘅 ~ 同埋我哋驚盪失路，所以都預早咗去。我哋喺鏞記嗰邊行上去，行到去荷里活道都搵唔到 ... 後尾發現原來結志街係一條斜斜地嘅細街，街口有間7-11，喺中環街市直行上山就見到！7-11隔離就係大廈入口 (喺正蘭芳園對面)，搭個𨋢就到。因為係Restaurant Week，會有個指定menu，頭盤、主菜、甜品/芝士各3選1。我同個朋友全部都係share，而佢全部都係一碟2份 or 4份，啱啱好。首先上嘅係麵包，個包仲冒緊煙！(幅相都睇到有少少！) 不過麵包香就爭少少，未到好好食。大廚Patrick全日鎮守廚房，趁我哋未開餐就出嚟同我哋打聲招呼，同埋呢度地方唔大，我諗只可以坐到20-30人，好有私房菜嘅感覺！頭盤 Poached and marinated eggplant with soya sauce, romaine lettuce chiffonade，簡單嚟講就係醃矮瓜，睇落個樣有d似魚香茄子！味道就梗係唔似啦，比較似日式嘅漬物，係冷盤嚟嘅。呢個清清地，做沙律唔錯。第二個頭盤 Crab meat chunks on chilled green pea soup，呢個好好味！！凡係有蟹肉做頭盤嘅都好味㗎喇，不過佢下面個凍青豆湯，完全冇青豆嘅草青味，而且同個蟹好夾，令到個蟹肉好鮮甜！食到停唔到，差d食埋我朋友嗰份！食呢個午餐，一路食就一路諗「點解可以做到」，不過就算俾我知道，都唔會做到咁好食。大廚出品，確係唔同！主菜 Munster cheese and cumin tartine - with potato gratin and baby vegetables，一見到有gratin就叫咗呢個，冇留意其他係咩嚟，所以一上碟覺得有d攪笑，係有4塊上面有芝士嘅麵包 。呢個其實似頭盤 / 小食多d，如果自己食哂成碟可能有d「漏」。Munster cheese雖然係用牛奶做，但係個味都幾強，食落似羊奶芝士。個包就係淋淋地嘅，我自己麻麻地。Potato gratin可以理解為忌廉芝士焗薯，呢個真係好正，比例啱啱好，食落唔會覺得膩，呢一細舊實在唔夠喉！(唔好意思切咗啖先記得影相)另一個主菜 Grilled tuna fillet on fennel branches - with anchovy and caper butter，嘩，呢個真係一試難忘，食咗一啖頓時語塞，朋友問我意見我都講唔出口，只可以話係「完美」！平時食吞拿魚，一係就刺身淋pat pat，一係就煙燻到靭靭地，而佢係出面有d似煙燻，入面就好軟熟，但係唔鬆散；溫度、份量、調味、口感，所有嘢都控制到啱啱好；叉出嚟一睇，仲有住如完美牛扒嘅顏色！當然，睇我講係冇用，自己去試下最實際！不過我朋友食完，都覺得「完美」呢個字係冇講錯！吞拿魚下面係couscous小麥米，都好食，同加咗d飽肚感。甜品 Hazelnut iced nougat, rasberry coulis，個樣好得意，好似一大舊鳥結糖咁。鳥結糖嘅味，但有如雪糕嘅口感，而且入口即溶！係一個好有趣又好清新嘅甜品。仲有個甜品 Banana flambée with rum，flambée係法文，意同flamed，即係落d酒再燒一燒。呢個都好味，重酒味，唔會超級甜 (呢隻甜品本身都幾甜，有d人會整到好甜)，不過冇頭先嗰個nougat咁特別。另外可以加$108要杯酒，我哋就冇加喇，飲水就好，不另收費。上餐速度都幾快，一個鐘之內就食哂。一個3-course lunch set只係$198加一，Chef Patrick都唔會交行貨，碟碟用心製作，我完全覺得佢係蝕俾我哋。當然Restaurant Week係一個promotion (...而好多餐廳都會將貨就價)，平日幾錢我就唔知喇，但係真係貴一貴都值得！臨走Patrick煮緊嘢都笑住同我哋講bye bye，梗係即時俾個thumbs up佢啦！一定會再嚟！…Read More

一排冇嚟APM，啱啱先知開咗茶木，見就嚟2pm又唔使等好耐位，就去食下。座位都幾闊落，亦都好似冇限時 (坐咗個幾鐘)，好啱傾計，有返d café feel，唔似某d分店咁又嘈又迫。午餐有前菜、主菜、麵食同嘢飲，$66抵喎。先嚟嘢飲，友人杯黑糖珍珠奶茶雖然要加$9，不過都大過我杯台式酸梅冰好多下，所以唔算貴。酸梅冰好飲，睇落雖然細杯d，其實都夠飲。我叫咗魚湯浸時蔬 + 鮮芒果鱸魚柳 + 紅燒牛肉麵，碗牛肉麵的的式式咁幾得意。友人就叫咗魚湯浸時蔬 + 古早地瓜三杯雞 + 古早肉燥手作麵。個時蔬唔錯，魚湯夠味，係個色暗咗d，唔係幾養眼。同埋我覺得個湯有d腥，友人就覺得ok。鱸魚柳，冇諗過係炸嘅，不過幾好食，兩大舊有好多肉。個芒果醬都正，甜甜地好開胃。牛肉麵都好味，雖然得一舊牛肉，但佢勝在夠厚，而且加埋個主菜，個餐都夠肉㗎喇。係個湯油咗少少。友人碟雞都係炸過嚟，夾咗舊試，味道正常，不過全部都係雞翼斬半。呢個環境 + 份量 + 食物質素，APM嚟講算抵食，幾有驚喜，會再嚟！…Read More

友人生日想請佢食餐飯，朋友介紹咗呢度，就嚟試下。搭扶手電梯上2樓嗰陣已經隱約見到間餐廳名，但係上到去又見唔到，一擰轉頭心入面就嘩咗聲，因為呢個商場都係開揚café類 / 連鎖店多，唯獨佢呢間，睇門面已經feel到有霸氣！個裝修係幾靚，我特別欣賞佢店入面用瓷片 (打碎嘅碗？) 砌嘅服裝掛畫，乍看好似幅幅一樣，但細看就發覺每幅都有d唔同，幾有心思。食晏時間都幾多人，同隔離檯都幾近。一坐低先食個前菜，栗子同花生一齊醃，食栗子會食到少少花生味，反之亦然，而且醃得幾淋，唔使點咬，好啱做前菜。個茶都好飲，茶壺有格調。(我遲咗到，所以唔知係咩茶)先上「李白醉雞」($78)，我自己跟過師傅斬雞，知道一d都唔容易，所以好欣賞佢可以擺得咁靚！好香酒味，雞又滑，唔錯唔錯。好快就上埋「皇朝擔擔拉麵」($58)，餐牌上佢係有隻辣椒icon，而佢都真係幾辣，唔食辣嘅朋友可能要叫其他嘢喇 ~ 不過呢個好味！麵幾彈牙，而且湯入面仲有d醬料，令個味更豐富。「皇朝話梅骨」($88)，上碟嗰陣見d肉堆埋哂喺隻碟嘅角落 (係靚嘅)，以為份量唔係好多，點知食到我哋兩個飽哂都仲未食完 ...介紹我哋嚟嘅朋友話呢個好正，但d骨多，我呢次食就覺得還好，算正常。但係真係好食，肥瘦適中，d肉入味得嚟唔會受哂話梅嘅酸。不過其實睇佢個汁咁樣啱啱掛住d肉，晶瑩剔透、不多不少，就知師傅好功架，所以唔好食先出奇！小籠包 (原味6件 $58)，個樣比其他餐廳嘅塌咗少少，食落皮夠薄、湯味鮮，但係好似友人話齋，d肉好似少咗d，雖然咁樣係易入口咗，咬完個皮就唔使再點費勁食個肉，成個小籠包嘅整體感強d；不過就冇乜特別印象。酒釀丸子 ($32)，喺香港嚟講呢個算酒味比較出，不過係第一下好，再下一瞬間就冇咗，就好似潮來潮去咁，留唔住d味 ... 始終都唔夠上海嘅好食 (喺上海老吉士食過，已成終身美好回憶)呢幅相係友人親自操刀，係咪即刻靚咗好多呢 ~ 就算唔用filter都好靚！張單加小食 ($15) 、茶芥 (每位$7) 同加一，埋單$377，食lunch嚟講當然唔平，不過食得好滿足！就好似我同友人 (同埋介紹嘅朋友自己) 都話，「冇介紹錯」！…Read More

本身食開隔離間Bel Cibo，今日心血來潮想去，不過撞正佢裝修，就過嚟試下 ~叫咗今日廚師推介 - 羊肩 (lunch set $88)。先上呢個菠菜薯仔湯同餐包，個湯雖然賣相麻麻，但飲落幾好味！個包本身有番茄味，熱熱地，口感都唔錯，唔會太靭或者太鬆，大小都適中。附上嘅應該係溝咗乾番茄嘅牛油，呢個就麻麻地，冇乜味。到主菜，羊肩通常都整到好淋好入味，但係呢個都幾靭，同埋個醬鹹咗d。其實真係有d失望，開頭印象幾好，本身想俾個笑笑佢！但係食咗幾舊都係咁，就真係俾唔到喇 ... 加上佢把刀咁樣隊住我咁擺，刀柄又"high"咗d醬，感覺真係差咗d。知道生日嚟呢度會有驚喜，等上菜嘅時候環顧四周，見好幾個地方都寫住「生日大Q哂」，如果生日嚟都應該真係幾開心。價錢喺呢區嚟講唔算平，不過都可以嘅 (有d平d嘅set)，服務唔錯但唔使加一 ~…Read More

喺呢頭做嘢，附近d餐廳都試得七七八八，呢間上次食豆花米線覺得唔錯，今次就帶埋朋友再戰。 呢度d餐牌好簡潔，得個餸名，好多都唔知係咩嚟，好在店員都好親切同耐心咁解釋。我就喺佢推介之下叫左個「昆明小窩米線」($38)，有肥腸、肥豬肉、炸醬、酸菜同鹵蛋，成個窩仔上。店員話呢個係直接喺個窩度煮，所以會比其他米線入味d。少少辣，如果想唔辣可以走炸醬同酸菜，不過咁樣可能就咁叫碗米線再揀餸會好d ~ 味道ok，都幾多料兩位友人都叫咗「德勝豆花米線」($29) + 水餃兩隻 ($8)。呢個其實係撈米線而唔係湯米線，上面有d豆腐花，同d醬撈勻哂好惹味，友人話有埋花生就更正喇！$29係幾抵食，係食到底會有d油膩。水餃係鋪頭自己包，不過友人就話個餡麻麻地好食。涼拌雲耳 ($26)，辣味唔出，但係酸酸地幾開胃。雲南乳餅 ($58/6件)，係用羊奶做，但係食落似水牛芝士，我嫌唔夠羊味，但友人食咗一啖就頂唔順 ... 對比呢個，我就鍾意觀塘「雲南風味」羊乳扇多d喇，嗰個羊味就好夠，同埋薄脆香口。(P.S. 嗰間都有羊乳餅，我都食過，都係覺得麻麻地，呢間可能仲好食d)友人話有d貴，但我覺得特色小食嚟講算係咁啦，功夫都喺返到！嘢飲就好抵，+$2熱飲 / +$4凍飲，都幾大杯。 整體嚟講我覺得都唔錯，係一間幾有風味同特色嘅小店 …Read More

生滾湯呢家嘢其實都唔錯，佢夠熱、有湯飲、多選擇，而且主要食食物本身嘅鮮味，唔使點落醬。第二次幫襯呢間湯飯皇，貪佢個湯夠大碗，個飯又成坐山咁高，湯底佢話係用「仙骨」製 ... 咁，佢隔離有幅魚嘅相，我估即係魚湯啦，都清甜，不過最後出嚟個湯係咩味，當然就好睇你叫咩餸喇。兩個餸加個菜、跟飯/粥/粉麵 $44，選擇都唔少，如果晚飯嚟食係幾抵。生滾湯嚟講，我最怕就係要等，不過呢間既然叫湯飯皇，果然早有準備，一入門口就見佢有幾個爐幾個兜同幾個快手呀姐，自然都唔使點等，可能仲快過平時叫碟頭飯。友人叫咗碗豬腰豬膶蕃茄，我就叫咗碗肉片豆腐油麥菜，兩個都唔錯。友人話佢嗰碗嘢份量比較少，可能豬腰豬膶本身貴；我就d豆腐食極都食唔完，同碗飯一樣，大食人士啱哂！另外仲有每日推介，今日有豆腐芫茜紅杉魚($70)、咸菜粉絲九肚魚 ($75) 等，都幾吸引，不過價錢會貴d。今次食完先見到，下次見啱食就試下。P.S. 呢一帶好似有幾間三洋，呢一間係喺砵蘭街、油麻地站A1出口直行轉左嗰間 ~ 其他嗰d冇試過，唔知餐牌係咪一樣…Read More

小姓趙，有時行過老趙，朋友都會講笑問係咪你開，不過佢哋個個都話又貴又難食，拉住我唔俾去。但係可能同姓三分親，成日都心郁郁想試，今日就趁一支公去試下。入面人頭湧湧，不過細心d睇，見有好幾個人，眼神因肚餓而帶空洞，又因趕時間而顯焦慮；坐低，我對面嗰個等到吽咗，隔離檯嗰個等到躁咗 ... 咁嘅情況，唯有叫碗睇落最簡單嘅生牛肉河粉，好在都唔使點等。食落其實ok，牛肉份量唔少，有4、5大片，湯都夠味，唔會太淡。而最得我心嘅係嗰大舊蘿蔔，索哂d湯汁，好淋好入味。綜合嚟講，都係一碗合格嘅生牛肉河。見隔離檯有問店員攞配料 (一碟仔青檸、辣椒等)，不過我見佢哋忙到就嚟趴喺到，同埋都食咗大半，就冇問喇。價錢嚟講就真係唔平，呢碗粉係午餐，$52+$3凍檸茶，呢個價錢喺呢頭可以食得好豐富㗎喇，不過食物 (淨係就呢碗牛河而論) 都ok嘅，有機會可能會再嚟試下第二d嘢！…Read More

我好鍾意食crêpe，呢間已經嚟過3、4次，每次都好滿足。近幾日同朋友想揾d café類嘅嘢食，我就推薦咗呢間。今次嚟成個menu都唔同咗，多咗starter、pasta等等，galette / crêpe嘅摺法都唔同咗，但食物同味道依然保持高水準，友人亦大讚樣樣都好好味！價錢好似比以前貴咗d，但以份量同環境嚟講都可以接受，而且唔使加一，算係咁。Brittany apple juice "Kerne" ($40 / cup)，之前飲過，印象中幾好味，不過今次飲覺得個味有少少複雜，唔似平時飲開嘅純蘋果汁，整體嚟講都ok。呢度嘅cup其實係冇耳仔嘅碗，諗起Le Pain Quotidien都係用碗飲咖啡，唔知係咪歐洲傳統呢 ~Coconut water & pineapple drink ($40)，飲咗一啖試味，個配搭都幾特別。Lobster pasta (sorry唔記得咗幾錢)，呢個唔錯，食落唔會油膩，龍𧎚肉都唔少，又大舊，夠滋味。La Marin - galette ($152)，有帶子、煙肉、菇同白酒汁，我個人覺得鹹咗少少，不過朋友覺得好啱胃口。而個帶子真係整得啱啱好，又大舊，一份有三大粒，我哋有三個人啱哂。La Moussaillon - galette ($152)，有蟹肉、虎蝦、芒果同蘆筍，每樣都有3件，每人可以捲埋一份俾自己 ~呢個我好鍾意，蟹肉有鮮味得嚟唔會太搶，同galette一齊食啱啱好！順帶一提，galette同crêpe唔同，係用蕎麥做，食落都幾飽肚，如果第一次食可能有d唔慣，不過食食下就覺得唔錯，同唔甜嘅熱食都幾配。同埋喺香港應該唔多地方有得食，都係一個特色食品！Galette同crêpe依家都變咗三角形，睇落去size好似細過以前，不過其實佢只係摺埋咗，我自己會攤返開嚟食，薄薄地咁好似容易入口d。嚟到梗係要食返個crêpe，見隔離檯個crêpe有火焰效果又想叫返個，就叫咗個la jamaicaine ($108)，有提子乾、海鹽牛油焦糖醬、朱古力醬、焦糖香蕉同咖啡雪糕，當然仲有火焰冧酒。淨係個crêpe都已經齒頰留香，其他配料都好ok，不過應該因爲d酒，個crêpe面會有d苦，但可接受。呢度都有唔少外國人嚟，氣氛都唔錯，大家都係嚟enjoy the night，輕輕鬆鬆，食好嘢、傾下計咁。不過店員好似成日𥄫住有冇碟收，好似我哋碟pasta未食完 (忙住食其他嘢)，同一個人就喺幾分鐘內問咗我兩次收唔收 ... 本來驚佢出面有人等緊，但其實有吉檯，所以呢樣嘢掃咗少少興。除此之外所有嘢都好ok！…Read More

喺圓方食完餃子，就喺呢度買咗紅豆糕、芝麻糕同雞蛋糕返屋企。$10舊，少少貴啦。紅豆糕味道有d似喳咋，雞蛋糕就好飽肚 ~之前都有食過砵仔糕，感覺都係一樣 － 味道正常，但又好似未至於特別好食。不過呢類店真係買少見少，所以下次經過嘅話應該都會幫襯支持下！…Read More

第一次嚟完全係誤打誤撞，純粹想搵個地方醫下肚。但係一食到個上海雲吞，即刻想好似肥姐咁大嗌「好好味呀~！」呀媽都話，好多年冇食過咁好食嘅水餃！今次已經係第三次嚟，兩個人叫咗三人份，諗住試多d。淨上海雲吞 + 淨西洋菜餃 (各$26)最鍾意佢個皮，滑得嚟又厚薄適中，一擺落口就忍唔住滑咗落肚！吞咗幾隻先諗起，應該慢慢試真佢個味，食食下竟然發現自己嘴角上揚 ... 係幸福嘅味道！(我都覺得自己有d誇張，不過係真心！)我本身唔特別好餃呢樣嘢，喺第二度從來唔會叫淨餃，不過今晚一人八粒都冇難度！兩隻餃都好食，不過我覺得上海雲吞略勝一籌。鮮滑牛肉粥 ($35) - 諗住試埋呢度嘅粥，都唔錯，不過冇特別感覺。蒸蘿蔔糕 ($15) - 之前食過煎嘅，呢個蒸嘅都好食，好滑！蝦米腸 ($12) - 次次嚟都有叫，好食，亦都係好滑。d醬擺哂喺檯，可以自己加。加咗兩碟菜 (跟水餃各$7)，都ok。餐廳入面大部分都係大圓檯，幾有住家feel。 如果人多，店員都會好好禮貌咁請d食客坐過少少；可能因為咁，所以每次嚟都唔使等位！(雖然我唔係 peak hours 嚟)一定會再嚟！…Read More

自從之前上網睇過「旺角咖喱」老闆嘅訪問，知道佢好努力，就一直都想過嚟試下佢成果，不過身邊朋友麻麻地印度嘢，一個人又食唔到幾多，今日終於揾到人一齊嚟試下！佢有套餐，不過我哋想叫下其他嘢，就散嗌咗五樣：先上呢碟 印度薯仔沙律 Aloo Chat，味道ok，不過咁細碟真係貴咗d ...個脆薄餅 Papad ($11) 就唔錯。薄荷菜烤餅 Pudina Paratha ($27) 呢個我真係接受唔到，點解咁燶都可以上碟！？淨係食到燶味食唔到任何味 ... 就係佢令我即刻寫咗呢篇食評！見到已經覺得唔對路：一反開 ...雜果黃飯 Kashmiri Pullao Rice ($61)，有椰絲、椰果、菠蘿等等，味道可以，不過未去到好食。白汁燴雞 Chicken Korma ($92)，我本身好鍾意食呢個Korma，但係佢同我嘅想像有一段距離，唔係食開嗰隻少少甜、好creamy嗰種，味道同口感似普通咖喱雞。不過雞都幾多。微辣。呢度形式似茶餐廳，冇特別serve你，不過你遞手都會應你，同埋店員可用廣東話溝通，服務可以。感覺今日老闆唔喺到，唔知係咪因為咁，所以食物質素咁樣 ... 不過對我嚟講係一個謎，因為應該都唔會再嚟！…Read More