Chishinglau's Profile

同vendor食weekday business lunch, 叫咗Omakase set (加埋一 近$600)，total有12件壽司加最後會有一件手卷，前11件壽司非常唔錯，用料新鮮，值得一讚但係，去到第12件，急轉直下，海膽一食落去，超級苦！！苦到好似落咗黃蓮粉咁，係從來未食過咁苦嘅海膽......唔知係咪師父處理不當，但前面一直咁好，反差太大真係頗為失望......問過同枱其他人，大家果件都冇問題，可能係我唔好彩啦但真係禍不單行，去到最後嘅手卷食食下竟然有塊小骨，所以成餐飯算係虎頭蛇尾......呢個價位weekday食lunch應該有唔少其他選擇, 如果令顧客失望就絕對不會回頭了…Read More

今日老婆生日，網上好多人話呢間pasta質素極高，所以抱住都幾高期望來一試究竟，畢竟定價喺屯門嚟講真係頗高。主菜點咗signature嘅handmade Carbonara同Red prawn taglionili, 下面係個人評語：Carbonara: 睇到食材用料應該算上乘嘅，但問題係個汁味道太鹹太搶，所以好大程度咁掩蓋咗麵條原本應該有嘅鮮蛋味道。亦因為麵條嘅蛋味冇咗，即使手工麵條火喉控制得唔錯，但令人食唔出成個手工意粉貴喺邊。如果用一句總結，就係將一手靚牌打壞咗，非常可惜。Red prawn taglionili: 紅蝦本身貨源不錯，所以食落感覺好好。餐廳原本建議將紅蝦蝦膏撈埋落意粉醬汁度令個汁嘅整體昇華，但如果大家學我咁曳一開始淨係齋試一啖醬汁，食出來嘅感覺會似只係將above average嘅罐頭龍蝦湯(e.g. Baxters)開濃啲，所以後來我終於明點解侍應建議要將紅蝦蝦膏一齊撈...另外之後睇番舊文對比先知原來近年紅蝦數量減少(好似由4隻變2隻)，而價錢就跳咗唔少...用2個字總括2個pasta: 唔值。第一，如果餐廳地點係中環，呢個價錢acceptable, 但喺屯門就不敢恭維。第二，咁進取嘅定價，份量真係太少，我諗一位正常男士至少要食2個pasta先夠。如果價錢係打個7折，咁先叫僅僅可以接受。第三，亦係死症，就係雖然可能心機時間同材料花費唔少，但成個意粉嘅presentation冇synergy, 甚至有某啲食材會破壞廚師想傳遞嘅味道。2道意粉，只有紅蝦本身係令人有驚喜。最後，我地仲有試到Tiramisu，口味就岩我唔岩老婆，不過就可以肯定佢唔係我喺意大利食過嘅正宗tiramisu(男人老狗唔中意打卡所以冇相，多多包涵)…Read More

如題，人均成2百幾蚊，結果食到幾舊菜類天婦羅有一舊舊2白色炸粉，完全係天婦羅餐廳嘅大忌，咁嘅質素，其實大把其他選擇，唔明點解食評讚到咁，想失望就去啦ps: 蝦係好食嘅，不過都幾油…Read More

用咗e字頭嘅app，有半價優惠，要坐吧台。服務冇問題，侍應會幫手收空碟同加茶，但食物真係非常普通，簡單講:- 串燒: 唔夠熱，調味普通，口感唔值原價，尤其雞心雞腎都好鞋好乾，完全唔juicy; 但持平地講免治雞肉棒係好食嘅，可以一試- A4和牛壽喜燒(二人前): 出到來變咗shabushabu，佢的確係用壽喜燒汁，但就係一路滾住個唔係壽喜燒嘅中高身鍋...有4片和牛，牛味好淡，口感亦相當普通。原價$699來講，令人好失望，不過即使半價我地都覺得唔抵...唯一好食嘅係豆腐同加咗$50嘅烏冬...雖然係用半價優惠，但完全食唔到廚師/餐廳嘅温度同心機，作為高級餐廳都令人幾失望。Btw, 我自己臨離開餐廳前開始肚痛，而女朋友都喺番緊屋企途中feel到肚痛2個人埋單折實total都要~$700幾，折咗都覺得唔值，唔知點解咁多人都讚好食...…Read More

從來冇寫過食評，今次不吐不快。同女友坐樓上，點咗b仔涼粉、魚蛋、腸粉、雞翼尖。長話短說，好事有1點，壞事有4點:好事: 雞翼尖好食，cp值唔錯，8/10壞事1: 魚蛋＆腸粉，非常普通，而且魚蛋細到得手指公隻指甲，3/10壞事2: 涼粉份量大，但重量不重質，生果一啲都唔新鮮，$7X一個算好貴，2/10壞事3: 服務態度極差(尤其係戴眼鏡冇咁老嘅肥胖女侍應)，眼見每位客人都好禮貌咁向佢落單，但佢嘅說話/回覆極度冇家教，問一句都好似割咗佢忽肉咁。壞事4: 個冷氣開到大一大。想做多啲生意turnover高啲我諗每人都可以理解，但個冷氣係完全會吹到頭痛果種，隔離枱2個女仔好禮貌咁問個侍應可唔可以調位，佢就理都唔想理咁講: 「唔得」...真係冇見過一個人係可以咁冇同理心。總括而言，除咗雞翼尖冇咩值得幫襯，因為好幾位侍應都擺出一副唔想做你生意嘅態度，完全唔覺得係用個心同以客為本去經營，最重要係其他野食真係好一般甚至係差，名過其實。*題外話，雞翼尖雖然唔錯食得過，但都有好多激素，建議間唔中過下口癮就算…Read More