野生的小修's Profile

介紹翻，呢間係我日日食食嘅餐廳。只要係觀塘返工，65蚊就送貨上門，而中環或者灣仔就有自取點。而且選擇又多又健康，最適合我呢D減肥人士~ 題外話，學黃子華話齋，D嘢用左英文名真係高級左。點睇Quesadilla都高級過夾餅🤣🤣.番茄芝士夾餅 配 4個菜 Tomato & Cheese Quesadilla $65夾餅有驚喜。番茄味十分濃郁，芝士仲要拉絲。而今次我點嘅Romesco, 用番茄同香草熬煮製成，番茄味濃郁之餘仲有香草味。夾餅加上Romesco，番茄味Double Up！.香草雞扒 配 四個菜 Chicken Thigh with Herbs $65香草雞扒經過烤製，整體都比較香口，不過雞皮比較韌。雞扒唔乾柴，帶有香草味，調味適中，值得嘗試(最緊要係無骨)。.特別點名讚賞下今次點嘅醃南瓜，酸甜爽脆。口感同一般南瓜唔同，開胃得黎又有營養，十分推薦。.外賣黎，應該唔會話叫我比分掛 XD 不過如果係比個海景的話應該有一百萬分。服務方面，客服姐姐好用心咁解答，同幫我處理送餐遲到嘅問題，比滿分。但係如果多餐要送嘅時候，我都要落樓下去拎外賣呢一點有少少唔開心。不過65蚊就有送貨呢一點，給過！.💯評分時間(滿分5分)食物：⭐️⭐️⭐️⭐️服務：⭐️⭐️⭐️⭐️⭐️總分：9/10…Read More

之前睇過一篇關於一位係海山樓居住嘅日本人嘅訪問，佢話佢日日都過黎食飯，今次就慕名過黎啦🤭不過題外話，到底濕炒河同菜遠牛河有咩分別？🤔.燒牛肉沙律 $68個賣相紅紅綠綠咁已經好開胃，再加上魚露青檸等調味料真係令人食慾大增！蔬菜都超級清脆爽口，不過稍嫌牛肉比較韌，但整體而言十分推薦！.雞肉濕炒河 $58其實呢次係我第一次食濕炒河，河粉有先炒再落汁，所以食起來比較香口。炒河粉被醬汁同炸蒜包裹，令整碟河粉都充滿醬香同蒜香，十分惹味。不過佢碟河粉真係"料多粉少"，好想要多D粉食埋佢個汁啊！.雞豬串燒 $62/6串燒有預先醃製，本身已經有濃郁香料味道。表面燒得焦香焦香，但毫不乾柴，裏面仲有肉汁！配合店家充滿花生香嘅沙爹醬，十級邪惡！.環境同一般小店差唔多，但有卡位，都算好坐。服務幾好，店主同我地都有說有笑😌…Read More

連續唔記得帶SD卡兩次...最後排左三次隊先出到呢個Po....貝丸 $108期間限定口味，上面有5隻大花甲，味道極鮮。拉麵用嘅係幼麵，爽口彈牙。叉燒用低溫慢煮，嫩滑無渣。配合海鮮主題嘅拉麵，我選擇左鹽味湯配合檸檬，令拉麵更為清爽，一洗豚骨拉麵嘅油膩感。.白丸 $88都係鹽味豚骨湯底加檸檬，比起貝丸少左一份海鮮嘅鮮甜，但更能體現豬骨嘅濃厚。整體表現同貝丸相近。.環境其實幾好，木製嘅吧檯為店鋪增加一分日本味。不過地方比較淺窄，行入舖頭比較辛苦。同埋門口排隊嘅人有D多，你都唔好意思食完坐係度啦🤣🤣🤣店員姐姐十分貼心，見到我拎住相機同大袋，主動比多張凳我放嘢。另外餐廳有準備到冰水，超級好評。…Read More

事原講述，本人每逢星期六都會系統一條街度參加教會聚會，聚會完基本上都會一齊食晚餐。本身大家都例牌去龍X冰室食既，但係由於X門冰室D野食越食越垃圾，所以最後位大家個胃著想，開始穩其他晚飯選擇了。咁Arm 最近就開左間新刀削麵鋪，我就身先士卒去試一試呢間刀削麵啦。題外話，因為紅磡臨近Poly U，同一時間又有好多內地生會過來覓食，所以我地其實都唔難系呢區穩到又平又令既中國各地菜式。姑勿論呢間刀削麵正唔正宗，但係一行入門口你就會見到廚房位有部機系度削緊麵，咁樣唔打得都睇得啦😂😂😂至少唔系用壽X牌都可以加分啦。穩位坐低，就見到有一罐醃蘿蔔系檯面度。小弟孤陋寡聞，印象中其中一間有醃蘿蔔食既就系深水埗劉森記，想不到到紅磡都會有得食，蘿蔔都幾爽脆，入味，過癮。再看菜單，本人由於比較中意食乾撈既麵，就點左個牛腩筋麻辣拌刀削麵。下單後，店員就操作機器開始削麵，保證條條麵都新鮮，唔會稔到變糊仔。唔洗五分鐘，刀削麵就上台了。香菜同花生就基本啦，最驚喜就個麻辣醬。平日街外食到既味通常都系老乾媽再加辣椒油再加下醋同豉油，但係呢個麻辣醬竟然系用番茄醬炒成，為成碗麵帶來一D新鮮感。我無標明要咩辣度，應該就Preset小辣辣。雖然無論系麻定辣，呢碗麵都唔多夠，但係新鮮既番茄味為成碗幹拌面帶來左一種甜味以及清新感。雖然各位辣鬼可能唔會太中意呢種麻辣醬，但係如果當系番茄醬拌麵都不失為一個好選擇。而且呢種溫和既辣味，都好適合各位食開TamSon三小辣既朋友仔試下。講到牛腩筋，呢個就好迷了。我第一舊食既牛筋，軟，化，鬆軟順滑而入味。正當我想品嚐多一件既時候，咦，硬左甘多既？再咬，確實口感與第一塊差距甚遠。我唔知到底系我好彩定唔好彩啦，但係如果想吃好吃的牛筋的話，可能都好睇彩數。反倒牛腩水準真的不錯，入味是當然的，而且十分大件，唔系車仔麵碎腩Size，調味剛好，鬆化而無渣，實屬佳品。縱觀全碗麵，最唔驚艷既就係個麵底，就係普通既麵，有D似隔離街牛肉拉麵個質感再彈牙+粗少少，口感比較實在，但真的談不上是十分的優秀，不過不失吧。綜合而言，呢個麵其實系真係唔差既，以四十幾蚊既價錢來講都抵食過大奸樂或者車仔麵既。如果大家甘Arm經過的話，是值得大家試一下的，可以給大家一個 不一樣的刀削麵。…Read More

前排去完翔龍灣果邊做完野之後 就開始周圍行下 結果由翔龍灣行到過去維他奶果邊。我本身想去對面維他奶間小食亭(呢 好出名雞蛋仔果間呢)食底雞蛋仔先返屋企一個人過。但係果日系年三十，所以好多舖頭都已經提早柵門。就當我陷入無助同絕望既一刻，燈火闌珊既街道上竟然仲有一間著左燈既舖頭系度，望落 咦 新開嫁wor 反正肚餓 姑且去試一下啦。入到去 地方唔算大 放到幾張檯仔咁，可能係年三十，大家去左食團年飯 所以無咩人。入到門口揀左張緊門口既檯仔坐低。望完張Menu 見到，有韭菜豬肉窩貼就點左5只，另外再叫多一碗涼粉。涼粉系街市買到果種質素，都唔算好差，都算彈牙，不過重點唔係呢度。之後個韭菜豬肉窩貼先系重點，我一如以往咁樣倒少少醋落窩貼上面，再將豆瓣醬勺落個碟後，拿起窩貼，沾上豆瓣醬，一淡吞入口。咬落去的一瞬間，！！！個心馬上來一來，爆汁既喂。我有無點錯小籠包？皮薄餡靚，脆脆的窩貼皮裡面包著豐富的內餡，而且入面仲有汁。然後望一望隔離檯包緊餃子既姐姐，用佢純熟既技巧將滿滿的餡料快速甘包入去餃子皮入面，即刻有一種真正既小店情懷，覺得自己食緊既野系真材實料。真心誠意推介，只餃子真係好好食，可以去食下。PS1:唔知點解叫做分店，好似得呢一間系度PS2:作為一個土瓜灣人，呢個舖位既舖頭都好似做得唔長，希望今次可以做得耐啦!!如果唔係又要穩新飯堂了 QAQ…Read More