crabmar170's Profile

上一次嚟食過覺得好好，特登今日去試咗個象拔蚌餐。WhatsApp訂位嘅職員同以往一樣好有禮貌。今次用餐時間係星期日，嚟到嘅時候已經1:30，餐廳都滿晒，雖然訂咗枱，但只係剩返吧枱位….咁啱有人埋單，職員就幫我哋轉左過去旁邊嘅四人枱象拔蚌刺身套餐包括沙律，茶碗蒸，四種刺身，六種壽司，櫻花蝦拖羅卷，仲有湯同甜品。同以往一樣，刺身非常新鮮，連平時唔係好敢食蠔嘅我，都覺得好好味。壽司普普通通，蝦子餅食到有一片魚鱗今日係生日嘅緣故，所以點多一個海膽拖羅刺身生日蛋糕…..但呢個真係絕對失望，上面嘅魚生非常之薄，感覺有少少頭頭尾尾，而且最大問題係食到魚骨希望下次師傅處理嘅時候小心啲。…Read More

網上面買咗個四人嘅Omakase套餐，book咗今日同朋友過去，之前未嚟過呢間舖頭食嘢，都有啲擔心會唔會中伏….食完之後只會用兩個字形容， ‘滿意’套餐包括和牛沙律， 魚生盤，手握壽司，燒魷魚，明太子雞翼，喜知次一夜干等等。整體嚟講魚生好新鮮，海膽非常新鮮餐廳環境乾淨舒服。除咗食物質素之外，值得一讚嘅係職員服務好好，如果餐廳再諗推出套餐嘅話，建議可以諗吓容許客人選擇唔食三文魚，用另一啲魚生替代。已經book咗枱之後再嚟。…Read More

星期日去開中環，諗住試吓啲唔同嘅嘢，所以特登行到過嚟呢度食台灣嘢。到達嘅時候餐廳只係得幾台人，一位女侍應示意我哋坐旁邊嘅二人枱，過到去嘅時候發覺對風口位，所以我哋就自己坐咗後邊嗰張。見到枱面有個乾淨類似托盤嘅嘢，拎起放咗喺另一張冇人嘅枱。呢個時候旁邊有位高高大大嘅女侍應，好大聲，用啲好難聽嘅語氣咁話 ‘枱面有嘢都照坐落去…’聽到呢句已經知道侍應根本唔想招呼我哋，即刻走人。如此服務態度，令人咋舌。…Read More

想搵一間餐廳同爸爸慶祝生日，見一間網上評語唔錯，決定過嚟試吓。嚟嘅時候諗住唔會有set叫，因為係公眾假期，估唔到會有brunch set。我哋去嘅時候比較早，餐廳只係得我哋一台。睇咗一陣就點咗garlic shrimp 意粉，龍蝦意大利飯，青口，egg benefit, 同sausage & mash。意粉調味得好好軟硬適中，egg benefit 同sausage 中規中矩。但係龍蝦同埋意粉嘅蝦都Overcooked。（食得出係新鮮，但真係煮得太耐）青口其實調味都唔錯，但係一碟入邊有五隻都係未開嘅另外仲叫咗兩個甜品，法式蘋果批同埋Waffle。蘋果批唔錯。但waffle 上枱嘅時候已經淋晒…soggy and mushy 值得一讚嘅係職員態度好好。…Read More

喺呢區返工已經一段時間，其實選擇都算多，大多數係茶餐廳，三文治/pizza 類型嘅就特別少。幾日前咁啱經過呢度，原來有間新開嘅舖頭，即刻點咗個煙三文魚芝士牛油果卷。即叫即做，熱辣辣，加埋啲醬汁，好好味。份量唔大，女仔都OK嘅。舖頭有套餐加配，可以加肉丸，沙律等等。我就加咗個餐湯。今日心思思再嚟，都想試吓其他嘢嘅，但係上次嘅三文魚卷實在太出色，所以又到叫返同一樣嘢。味道仍然好好可能喺新開嘅緣故，外賣食物放喺一個好大嘅紙袋入，所以有少少‘論盡’。今日發覺舖頭多咗人，唔知係咪附近返工嘅人都發現咗呢度呢？…Read More

前幾個星期家姐已經話想試吓，今個星期六有時間上去試吓食lunch。上到去未係好多人，大概兩枱客。我哋喺門口望住一段時間先至有職員過嚟安排我哋入座。餐廳入邊總共有四個職員，兩個喺樓面，兩個應該喺廚房 /水bar 位置。我哋每人叫咗個set, 其實食物質素係OK嘅，但職員嘅服務暫時令人咋舌，估唔到咁樣嘅工作表現都有人請。1. 樓面兩位職員-男嘅長時間企喺角落頭玩電話，女嘅好難得先見到會出現，有嘢想問都好耐先見到有人。2. 樓面嘅職員基本上唔會開口講嘢。我哋入座嘅時候，笑容對白（一般都會叫客人自己用QR code落單）欠奉，連眼神交流都冇。4 我哋兩個人並排坐，點嘅餐唔一樣。食物上枱嘅時候，侍應完全冇問過邊一個食邊一份，直接放低行開，零交流，更加冇介紹過點樣用過蒸氣爐。4. 食嘢過程入邊，有兩次家姐唔小心整熄咗個爐。由於比較難搵到侍應，唯有大聲叫後面玩緊電話嘅侍應幫手。佢只係走過來，撳着返個爐就行開。又係零交流。5. 食完海鮮之後，我哋點嘅粥就送上嚟…. 侍應又係完全冇講嘢。6 我起身去洗手間，出咗門口以為洗手間喺出邊，點知搵唔到。再行返入門口，問女侍應洗手間喺邊，佢全程冇望過我 （雖然正面係對住我），keep住低頭，再用隻手指指後邊。其實一開始我以為自己要求太多….點知去到上粥嘅時候，一向好隨和嘅家姐問我 ‘點解呢度啲侍應完全唔講嘢？’其實幾百蚊嘅餐，我冇期望過五星級服務，只希望正正常常，入座俾少少笑容/眼神，提醒顧客二維碼落單，埋單嘅時候講聲多謝或者俾個笑容，就係咁簡單。服務質素咁樣，幾好食都冇用….香港人仲有好多選擇。…Read More

我一向好少買團購，今日上網見到呢間餐廳一個商務午餐，覺得可以5月1號放假嘅時候試吓……見網上邊對呢間餐廳評價都唔錯，所以就買來試吓。已經有心理準備套餐，唔夠食嘅話再額外叫點心。我係4月27日買，訂單上寫到明需要早一日打電話去餐廳預留座位，但連續打咗幾日，不論任何時段，大部份時間都係長響，跟住會有人拎起電話再收線。由於時間緊迫，我向團購平台反映之外，亦經由酒家網站再訂位，終於喺5月1號有人會覆我確認訂座。餐廳位於銅鑼灣假日酒店，都容易搵嘅。一上到去門口燈光比較暗，入到去地方細細，見到每個職員都好忙碌，一位相信係比較高級嘅男職員是以我哋坐喺一張近窗邊嘅枱。枱同枱之間，其實都唔算太密，但係唔知點解我哋枱旁邊地下有個神位，亦有好多供品，但完全冇嘢圍住。由於當日與年紀較大嘅父母同行，怕佢哋會唔小心踢到，所以我同蝦子餅坐接近神位嘅位置。先講吓環境，燈光暗淡啲其實都問題不大，但係枱布同埋地氈都有明顯污跡，感覺唔係好衛生。雖然樓面都有大概三至四個職員，但佢哋都好忙碌，我哋等咗一陣終於有人問我哋要乜嘢茶。呢個時候我再睇吓枱面上面嘅餐牌，原來都有睇到我哋買嘅商務午餐，但係唔知點解提供嘅點心有啲唔同咗，例如蝦餃，鮮蝦菜苗餃，仲有幾樣食物都不在包括喺呢個商務午餐入邊。細問之下，職員話網上面買到嘅已經係好舊嘅Menu….但係我早幾日先買嘅咋喎職員仲建議我可以加錢轉食點心放題，但我真係冇興趣食放題囉⋯⋯同職員反映過之後，可以安排蝦餃同埋其中一樣點心我哋，其他嘅就只能夠根據佢哋而家嘅餐單點菜。好快點心陸陸續續送上。其中一個女職員上‘茄子蓉’ 嘅時候，將食物放喺枱邊。由於枱邊不平，向外傾斜（相信係正方形枱變身做圓形枱），我哋同職員講食物就嚟跌，佢只係求其用手做樣推一推，跟住就行開咗。個碟根本完全冇郁過，最後係我哋自己將食物而返去枱嘅中央位置。餐廳非常唔夠人手，全程並冇人收碟。最後去到一個點枱面太擠迫，我舉手叫職員幫手，都要等咗一陣先有人過嚟幫忙。講返食物質素，成個餐最正常嘅係炒飯，炒得好乾身，其他嘅我覺得係唔合格，蝦餃味道奇怪，同平時出邊食嘅好唔同，唔知佢哋用咗啲乜嘢調味。昆布蛋花湯……感覺好求其。其他點心亦不值一提。難得約兩老出嚟飲茶，點知揀咗一間咁樣嘅嘢我只能夠話佢自己蠢咗。呢間嘢一定唔會有下次。…Read More

一早預咗今日過嚟試吓。大概12點到達，店裏面只係有另外兩名顧客…..坐低咗先發現得一款鮪魚魚生飯，有齊大中細拖羅，價錢只係$158，咁嘅價錢真係足料有餘，重點係鮪魚好新鮮！套餐配埋沙律，茶碗蒸同埋麵豉湯。估唔到茶碗蒸有驚喜，除咗滑滑嘅蛋之外，上面仲有啲蟹膏，超級好味！我哋問店員可唔可以加錢要多一個茶碗蒸，可能餐廳仲係新嘅緣故，menu 冇呢樣嘢，店員就容許我哋加多$10要多一個茶碗蒸。另外值得一題嘅係餐廳提供嘅凍茶，並唔係一般日本餐廳嘅抹茶，而係有淡淡荔枝味嘅涷茶，感覺清新。如果有熱茶選擇就會更加好銅鑼灣食魚生飯，我一向都去開某D 字頭連鎖店，但相信以後都會嚟呢度食la …Read More

蝦子餅一路話想去，見今日假期就特登過去食 lunch 。大埔墟站過嚟都好方便，的士幾十蚊就到。由於一早訂咗枱嘅緣故，一去到已經有位。我叫咗個牛肉漢堡，蝦子餅叫咗個龍蝦。龍蝦份量偏細，牛肉漢堡正常size。講返食物質素，牛肉漢堡嘅配菜薯角，唔知係咪翻熱，外面好乾，切嘅時候仲有啲難分開。外表雖然紅紅地色，但完全冇味道。其實薯角基本上係 no fail, 點解會可以煮到咁？建議廚房職員試味。至於塊漢堡扒，非常dry, 切嘅時候都要好用力，調味有啲重。至於龍蝦，擺碟都幾靚，味道都OK嘅。呢間餐廳完全係食環境，食物質素好普通….離開嘅時候發現隔籬枱都係點在牛肉漢堡，塊漢堡扒一切開左，入邊仲有少少粉紅，咁即係我嗰份係 overcooked 離開嘅時候先至發現原來有免費shuttle，不過食物質素咁樣，應該唔會再嚟啦…Read More

之前見到雜誌介紹，啲Panini好似好好食，咁特登走過來試吓，點知原來舖頭星期日係閂門嘅，唯有失望咁帶着空肚而回。今次特登上店舖嘅社交平台check咗開門時間，星期六一早過嚟。沿途發現呢區多咗好多小店，人流亦多咗好多。A bowl of 位置相對冇咁方便，但要食好嘢仲係要付出嘅！入到去嘅時候，見到雪櫃空空如也，店主解釋原來喺舖頭做緊盤點，所以只能夠提供一款湯 （大蒜薯仔），Panini只有烤豬同埋意式熟火腿。大蒜我不嬲麻麻哋。，所以同蝦子餅只係叫咗一份湯，每款三文治各一。湯飲得出係真材實料，不過個人口味原因我就唔多comment 。Panini 可以用驚喜來形容。用料新鮮之餘，火腿更加係店主即場切出嚟，味道分外香，至於麵包本身，focaccia 係店主親手自製，外脆內軟，加上恰到好處嘅意大利香草同埋橄欖油味道，我到而家仲回味緊。店主仲好Nice咁，每人俾咗一杯白牡丹茶我哋，估唔到中國茶同Panini可以咁夾！溫馨提示，準備嚟食嘢嘅朋友，呢度嘅食物係店主即叫即做，所以時間可能會耐少少，但睇住店主慢慢預備食物，都係一種享受。下次嚟之前會打電話問吓店主，嗰日嘅湯係乜嘢，聽聞呢度嘅蕃茄湯好好味，希望下次有機會試吓……睇返店舖嘅名稱，可能店主一開始希望主打湯，但係呢度嘅 focaccia 實在做得太出色！個人覺得，好味嘅西湯，或者用料靚嘅三文治唔少地方都有，但售賣 panini 而麵包做得咁好，真係第一次食到！下次見…Read More

世貿裝修完都已經一段日子，一路都諗住試吓呢間，今日早咗到，訂咗位又唔需要排隊，所以就去試吓。坐咗喺近門口嘅四人枱，舖頭都開始多人，侍應生都接應不暇。三個人叫咗一個軟殼蟹意粉，一個海鮮意粉，同埋一個紅酒燉牛肉蛋包飯。意粉OK ，中規中矩，反而牛肉蛋包飯，感覺油膩，食淨咗一半。服務方面，職員都好有禮貌，只係其中一位女嘅侍應生態度敷衍，埋單就算講多謝都好似機器咁…..單據同信用卡就咁放喺枱面 （但其實我已經伸出隻手諗住接）餐廳係坐得幾舒服嘅，不過呢個價錢銅鑼灣仲有好多選擇，應該冇下次。…Read More

星期日喺旺角搵地方食lunch 唔容易，呢間相對早開門，又坐得舒服，所以今日約咗幾個朋友過嚟食lunch。Book 咗頭11點，入去嘅時候舖頭仲未有其他客人。點左和牛咖喱麵，酸辣湯蝦麵，菠蘿海鮮飯（另外兩個已經唔記得係乜嘢）……除咗菠蘿海鮮飯之外，其他食物全部非常鹹，又或者超級重口味。例如我嘅和牛咖喱麵，啲咖喱汁非常極度濃，味道濃到一個點，就算再加一碗水都仲OK。牛肉非常之乾，賣相比較勉強，個樣同餐牌入邊嘅相都差好遠。朋友話佢嘅酸辣湯蝦麵，非常之鹹，我哋係餐廳逗留個幾鐘，佢飲咗四杯水有多。今次用膳嘅唯一positive feedback,就係職員服務都算OK。我哋離開餐廳嘅時候啱啱過咗一點，但餐廳只係坐左三成….唔知係咪同食物質素有關係。星期日旺角都坐唔滿嘅話，相信餐廳負責人應該好好諗吓點解。…Read More

星期六諗唔到食咩，平時又有喺度買外賣，決定試吓堂食。12點幾嚟到餐廳仲未有人，職員安排我哋坐低之後，現在一個吞拿魚牛油果飯，一個和牛炸蝦飯。疫情開始後，每次去餐廳食飯我都會用濕紙巾抹下張枱面……點知呢度一抹先發現咁污糟，即時胃口大減。到底平時職員清潔有幾認真？睇吓張濕紙巾就知道。過咗冇耐食物就嚟到，其實品質同平時外賣差唔多，但就有兩隻小昆蟲喺度飛來飛去，加上頭先濕紙巾抹出嚟枱面好污糟，成餐飯都食得唔係好舒服⋯⋯肯定唔會再嚟。…Read More

自疫情開始，一星期只出去一次，食晏加買餸。灣仔區餐廳選擇多，而且質素唔錯，但要坐得舒服嘅就唔多啦。今日同蝦子餅第一次嚟，上到去第一個感覺係舖頭乾淨清新，可能係因為餐廳裝修主要用白色嘅緣故。我叫咗一份all day breakfast, 蝦子餅叫咗一份 t-bone。 其實All day breakfast 間間餐廳都差唔多，呢度嘅就喺細節上突顯用心，例如係雞蛋仔，香脆內軟，炸雞又唔會乾爭爭，有肉汁。蝦子餅嘅T-bone 份量絕對足夠，而且每個set lunch餐湯同埋甜品，唔需要擔心食唔飽。值得一讚嘅係店員好有禮貌，地方乾淨。…Read More

見到雜誌介紹，特登走過來呢個 food court 試吓。其實一早諗住試某一間，點知嚟到就被呢間叉燒店嘅相吸引咗，所以就買來試吓。叫咗個柚子叉燒菜飯，份量非常足夠，味道同菜飯都做得好好，如果叉燒可以再淋啲就Perfect！我一向麻麻哋鍾意食燒味，因為覺得乾爭爭。呢度用咗菜飯，令到成件事感覺好咗。我巳經諗緊下次嚟會再幫襯佢哋，試吓第二隻味值得一讚嘅係店員服務態度好好👍🏻新張期內仲有嘢飲送下次應該會問吓可唔可以要瘦叉燒 …Read More