angel827's Profile

知道尖沙咀開左間新既火鍋店，有和牛食，又有我最鍾意既花膠湯底，當然即刻約埋老公嚟試試。叫左個招牌花膠響螺雞金鍋，侍應叫我地先試下個湯，點知一飲就上癮了，非常清甜既雞湯，最緊要係唔會太咸，又冇好重味精味，湯底仲好多花膠，飲完即刻又想飲！湯底配左一碟雞，俾我地自己落，呢個安排好貼心，唔會令到個湯太多油。啲雞肉肉質亦比一般既滑，簡單咁沾少少醬汁已經好好食。重頭戲當然係呢度既和牛。我叫左一碟A5熊本黑毛和牛西冷同一碟A5熊本黑毛和牛沙巴當，前者冇咁肥，比較有肉味；後者脂肪似雪花一樣，入口即化，食一塊係天堂既享受，食多一塊我就有啲膩了，所以更喜歡西冷既肥瘦適中。另外亦要左一碟佐賀名水豚梅花肉，入口帶少少爽勁，又唔錯喎！海鮮方面要左沙白大蜆同日本帆立貝，大力推介要試帆立貝，大大粒而且入口好鮮嫩！另外亦叫左手打孖寶丸，有海蝦丸同墨丸，水準正常，比起其他食物就冇太特別。食左咁多肉類，最後當然要食返啲蔬菜，估唔到$48既蔬菜拼盤既量係咁多，而且啲菜仲好新鮮，抵！最後一提呢度仲有小食同埋唔同種類既酒精飲品，鍾意飲返兩杯既人就啱哂啦！不過非酒精飲品類既選擇就比較少同普通。…Read More

深水埗原來有間新派餃子店，餃子款式非常多，除左一般既白菜餃、韮菜餃，仲有和牛餃、松露雞肉餃等，夠哂特別！而且湯底選擇頗多，有豆乳豚骨湯，雞湯同花膠雞湯。我叫左白菜餃配花膠雞湯。白菜餃皮非常薄而且口感好滑，咬落亦唔會太淋，做得唔錯，餡料方面白菜同豬肉既比例適中，入口仲會感覺到豬肉既存肉，有淡淡既肉香，整體我好鍾意！配埋菜莆或者蝦醬同食就更惹味。花膠雞湯第一樣要讚係好夠熱！呢點聽落好普通但唔係間間店都做到。而且感覺到膠質好重，雞味亦好濃，相當足料，如果可以少油啲就更好。我呢個餐有埋涼菜，我揀左麻醬蓮藕，爽爽脆脆都幾開胃。男朋友叫左和牛餃配豆乳豚骨湯，我試左少少，可能冇混合菜既關係，和牛餃比較膩，豚骨湯有淡淡香味，豆乳既感覺唔重。另外我地仲叫左個秘製醬脆手撕雞，青瓜絲、雞絲、藕片，撈埋少少既芝麻醬，簡單又好食。套餐仲有唔少飲品選擇，黑豆豆漿同竹蓆茅根都唔錯。新派餃子暫時係香港未係好流行，我相信如果餐廳focus 係個湯底，將佢做得更加好，應該可以殺出一條血路，始終香港人都鍾意飲啖靚湯！…Read More

當我唔想煩，想主菜甜品一take過，又唔想花費咁多既時候，呢度就會係我既選擇！牛津果蟹肉凱撤沙律份量非常多，3-4人食都夠。沙律醬、煙肉同芝士既份量非常慷慨，食落好香好惹味，啱哂我！單骨水牛城雞翼同樣大大份，單骨食落好爽，雞肉嫩滑，加埋bbq醬都唔錯，不過比想像中唔辣，鍾意辣既人可能會唔滿足。三重芝士大啡菇黑松露牛肉burger係我每次嚟都必點既菜式。芝士既濃郁、爽滑既大啡菇同juicy既patty，配合得天衣無縫，一個字，正！嚟Hesheeat一定要食甜品，今次叫左抹茶心太軟同厚焗鬆餅。抹茶心太軟火候控制得好，切落口抹茶醬湧出嚟夠哂震撼，配埋豆腐雪糕一齊食，唔錯。但我更愛厚焗鬆餅，熱辣辣既鬆餅香軟程度爆燈，果種軟綿軟綿既感覺絕對會一試愛上，淋上簡單既糖漿或者焦糖漿，完美。食到飽一飽，都係$400左右埋單，我相信無論係旺角定其他地方，呢個價錢、呢個質素，難揾了。…Read More

如果要我係旺角區推介一間西餐廳，我絕對會推介呢度，無論食物味道、環境同服務都好。今晚同男朋友再嚟，試下未試過既菜式。餐包烘得微暖，沾上少許油醋，簡單的美味。下一道係Octopus Terrine,賣相好似藝術品咁靚，八爪魚、木魚、三文魚籽既混合，好有fusion 既感覺。海膽多士次次嚟都會食，大塊既海膽睇顏色已經知靚，入口軟滑鮮味，配上脆脆既多士，令人欲罷不能。湯品方面有兩款-牛肝菌湯配黑松露泡沫同瑞士芝士焗法式洋蔥湯。前者菇味濃郁，入口好順滑，我最怕稠得過分既西湯，呢個非常有水準。洋蔥湯相對之下比較濃味，帶芝士既咸香，都幾特別。主菜係西班牙黑毛豬鞍，兩大塊既豬鞍厚度十足但食落一啲都唔乾唔韌，帶點爽彈之餘仲好juicy,可能想突顯豬既肉味所以調味比較淡，如果濃少少會更啱我口味。最後既甜品係車打芝士蛋糕，上面既粒粒車打芝士咸香十足，下面既芝士蛋糕部分好軟滑，整體芝味爆燈，連埋旁邊酸酸地既紅桑子粒同甜甜地既蛋白泡，係完美既作結！…Read More

之前嚟過呢度食燒肉，感覺唔錯，因為晚市禁堂食既關係，今次就嚟試試呢度既午市定食！呢度既座位多數係卡位，所以好闊落，坐得非常舒適！午市定食選擇都幾多，而且價錢合理。我揀左黑毛和牛壽喜燒配刺身三點，而男朋友就㨂左和牛粒石鍋飯。每個定食都配上茶碗蒸、沙律同麵鼓湯。茶碗蒸非常高水準，蛋蒸得好滑嫩，裏面有冬菇同蟹柳，我超鍾意食！沙律簡簡單單，作為前菜夠哂開胃。壽喜燒嚟到估唔到份量都幾大，有大大塊既和牛、娃娃菜、冬菇、金菇，仲有日本生雞蛋，撈埋甜甜地既壽喜燒汁，送飯一流！和牛質素亦唔馬虎，大塊之餘好嫩滑，未至於入口即融，但呢個價錢絕對收貨了！壽喜燒定食既刺身份量都唔欺場，三款之中我最愛甜蝦，新鮮又帶鮮味既味道。至於男朋友既和牛粒石鍋飯，佢有讚冇彈，我試左少少，果然和牛切成厚粒，口感豐富，更加香口，加上微焦既飯，有啲似一鍋高級既煲仔飯，唔錯！最後一提，定食仲包埋飲品，百幾蚊有咁多野食，CP值相當高，希望餐廳keep住水準，係疫情之下都一定做得住！…Read More

一入到店舖，覺得同一般火鍋店好唔同，粉紅色既裝潢，充滿少女風，女士嚟到打卡都可以打好耐，因為每個位置影落都好靚！餐前一邊食小食一邊用平板電腦點餐，想食咩可以自己點，方便快捷。先點左一個松茸野菌湯，裏面非常多蟲草花同雜菌，感覺好養生！美國安格斯牛小排顏色好粉嫩，小小一塊，灼幾秒就剛好。牛味都濃，脂肪唔多，雖然油脂香唔重，但同時冇咁油膩，又係適合女士！羊肉大大一片，食落夠過癮，可能偏瘦既關係，有少少韌，但羊味好濃，愛食羊肉既人應該會鍾意。海鮮方面要左花甲，小小一隻，不過不失，可幸都唔會有沙。鮮蝦水餃好大隻，豬肉同蝦既份量係4:6左右，食落都有肉汁。炸響鈴非常大個，食落又脆，唔錯。最後值得一提既係，呢度既醬料區選擇非常多，應有盡有，絕對可以滿足鍾意沾醬既人！…Read More

冇得去旅行，真係好掛住日本既野食，唯有系香港食下日本野止住癮先啦😭呢日嚟到銅鑼灣食燒肉放題，有A5黑毛和牛任食，認真好期待！首先有個刺身拼盤，甜蝦唔錯，其他就一般。跟住有個海鮮拼盤，有蠔、鮑魚、蝦、扇貝仲有甲羅燒。最鍾意系甲羅燒，滿滿既蟹膏蟹肉撈埋蛋漿，系幸福既感覺！跟住當然系重頭戲-A5黑毛和牛！和牛有一定既厚度，唔會太薄，A5級數既食落雖然未至於入口即融，但油脂香好重，咬幾口就化開。A4既油香冇咁重冇咁膩，肉味濃啲。我比較鍾意A5，男朋友就話鍾意A4。但系呢個質素可以任食，抵！除左燒肉之外，都有唔少其他種類既野食，例如壽司、沙律、炸物、蔬菜類等。試左幾件壽司，小小一件好可愛，而且味道又唔錯喎！冷烏冬都好煙韌！不過我地唔敢食太多，都系主攻返燒肉🤤最後甜品竟然系Movenpick雪糕，我既最愛呀！食完超滿足，不過都有啲膩，唔系食肉獸既我應該幾個月都唔想食燒肉啦😆…Read More

疫情底下來到The Grill Room，就希望在這寧靜的room裏，可以脫下口罩，稍為放鬆一下。柔和的燈光下看看餐牌，選擇沒有多得讓人眼花撩亂，各類別都有，足夠了。前菜方面，選了巴馬火腿配温泉蛋黑松露露筍沙律，沙律擺盤簡單卻帶心思，以火腿卷着温泉蛋，讓蛋液完整地保留在火腿之中。咸香油潤的火腿，沾上香滑的蛋液，還有爽脆的露筍，和黑松露香的點綴，美味得難以言喻。主菜方面，選了香草燒羊架配烤蔬菜。那微焦的外表、內裏粉嫩的顏色，不用多說也知道師傅的功力。吃下去有羊的鮮味，卻沒有過分的羶腥，鬆軟嫩滑，沒有多餘的脂肪，是我吃過最好吃的羊架之一。更難得的是，配菜的烤蔬菜一點也不馬虎。外脆內軟的薯角、香甜的南瓜，也不容錯過。另一道主菜是香草鮮蠔芥末忌廉汁扁意粉。我很少吃忌廉汁意粉，不是不愛忌廉，而是不少餐廳把忌廉汁煮得稠得過分，大量的忌廉包裹着意粉，吃一口便膩。這裏的意粉卻沒有如此，忌廉沒有過稠，順滑而份量恰到好處。還點了一客黑松露薯蓉，看似普通但吃下卻不平凡，既滑溜又有薯仔的黏稠感，加上少許黑松露的香氣，一點都不馬虎。飲品方面選了Nutella milkshake，賣相漂亮之餘喝下去也非常Nutella! 香濃甜滑，但多喝會膩，兩人一吃喝就最好。總的來說，這裏無論前菜、主菜還是飲品都很令人驚艷，價格雖不便宜，但試過就知道值得，畢竟現在貴價但味道不佳的餐廳也太多了。…Read More

系旺角想食泰國野，泰廚一向系我既首選。平日晚上嚟到估唔到都座無虛席，果然大家都好識食。嚟到點可以唔食串燒？燒雞串外脆內嫩，而且夠大件，沾埋香濃既沙嗲醬，好惹味！最近幾鍾意食海南雞，於是又叫左半隻試下，估唔到份量咁多，而且皮爽肉嫩，脂肪成啫喱狀，入口啖啖肉，配埋少許酸甜既醬汁，諗返都想食！炒金邊粉熱辣辣好夠鑊氣，食落甜甜地，金邊粉有啲煙韌唔會太濕，加返少許辣應該會更加惹味。最後飲返啖龍眼冰，爽！下次想食泰國菜，一定再嚟！…Read More

這大廈的食店我吃過幾家，質素都不錯，這晚重訪，便試試這家鐵板燒餐廳。餐廳是日式的裝潢，配上柔和的燈光，給人温暖的彷如置身家中的感覺。食物方面，餐廳設計了不同價格的套餐，似乎沒有單點，有選擇困難症的人如我，如此的安排更合意。鐵板燒就該如此！先來的是青蘋果野菜沙律，新鮮的沙律菜，配上爽口微酸的青蘋果、少許粟米脆片，再混合不多不少的醬汁，簡單又開胃。接下來是海膽黑松露溏心蛋，賣相非常精緻，嫩滑的蛋白和流心蛋液，伴上香軟的海膽，還有畫龍點睛的黑松露醬，實在太美味。香煎日本蠔看上去已經夠香口惹味，有大量的蝦米、煙肉和乾葱蒜，香氣四溢，吃下去簡直驚喜。蠔肉肥美，很creamy，一點腥味都沒有，加上極好的調味，我吃得欲罷不能。驚喜一浪接一浪！車海老配海膽醬上桌時把我嚇呆。沒有想到這蝦會那麼大隻，而且爽口彈牙，鮮味無比！再來另一道主菜-澳洲牛柳伴香煎野菜。牛柳鬆軟可口，南瓜和香菇既淋又甜，簡單好吃。汁物是白酒煮蜆。蜆的size不算很大，但湯鮮甜得很，不錯。然後是白飯魚苗薑粒炒飯。這個倒有點失望，感覺沒有鑊氣和油潤感，味道亦淡。甜品是簡單的抹茶雪糕，茶味濃點滑點就好。最後一提，這裏的上菜速度頗慢，適合和朋友來吃上幾個小時。…Read More

疫情底下出外吃飯格外小心，這晚來到慢煮工業，想不到客人不少，幸好不用搭枱，可以除下口罩，稍為放鬆一下。食物選擇頗多，單價不貴，選了幾道小吃、龍蝦，牛柳還有羊架及甜品，看似很多，但每道份量偏少，二人分吃其實剛好。先來的是mozzarella 芝士條，炸得香脆熱辣，一口咬下去，是咬不斷的芝士拉絲，讓人吃得過癮。下一道小吃是芝士流心蛋大啡菇，切下去蛋液澎湃地傾瀉而出，佈滿整個大啡菇，吃下去是濃濃的菇香，芝士味反而隱約。再來一道芝士菜式-芝士焗波士頓龍蝦！半邊的龍蝦其實份量很少，把蝦肉挑出來，是一口也能吃下。蝦肉亦沒有很彈牙很鮮，讓人有點失望。嚐嚐這裏的肉類如何？菲力牛扒是簡單的擺盤，亦簡單的以香草、蒜及牛油調味。切下去是七成的熟度，於我而言剛好，吃下去亦有牛味。最後一道的法式羊架上面醃料酥脆，沒有過重的羶味，頗香口，但沒有太大驚喜。慢煮，就要花時間慢慢等，慢慢吃。略帶一提，店裏的油煙頗重，吃久了眼有點刺痛，希望店舖會有改善，讓客人可以慢得舒適一點。…Read More

Moko的一田超市裏面，原來隱藏住一間吃石燒牛扒的餐廳！坐在bar枱的位置，看着師傅燒牛扒，別有一番風味。這裏的牛扒份量任君選擇，加$30便可轉為套餐，無限添加薯蓉、意粉、湯和沙律，可以吃個夠！我選了西冷和牛柳各200克，怎料份量也不少。熱烘烘的石板放上兩大塊牛扒，發出吱吱的燒烤的聲響。生熟隨你喜歡，喜歡吃熟一點的朋友可以任由牛扒放久一點。味道方面，西冷的牛味似乎濃一點，牛柳則入口更軟更滑，各有各好。值得一讚的是，兩款牛都沒有出現太多筋的情況，不會像吃橡皮筋。沙律是簡單的椰菜絲，配上芝麻醬，頗清新。薯蓉很軟滑，帶淡淡的黑椒香，我很喜歡。總的而言，這裏的石燒牛扒體驗很特別，沒有吃過的可以來試一下。…Read More

這晚天氣稍涼，最好便是吃火鍋。火鍋店的裝潢十分雅致，即現代花，又帶點古色古香的味道。然而，食物才是重點，急不及待點了鍋底及幾款火鍋料。有幾款台式鍋如蜂巢豆腐白湯鍋之類，可是我還是僱好中式湯底，最後選了媽媽滋補老火湯鍋。湯底來到時，我們都被嚇一跳，大量的粟米、豬肉、雞肉，太豐富了吧！除了湯底豐富，醬料的選擇也很多，絕對能滿足大部分人的需要。火鍋配料方面，極品安格斯肥牛肥瘦均勻，看上去油潤帶光澤，吃下去軟滑無筋，牛肉味濃，好吃得不得了。香菇貝鮑鮮滑爽口彈牙，帶有陣陣菇香。脆鯇魚腩非常厚身，吃下去很有質感，也沒有我很怕的腥味。吃了幾款肉類，皇帝菜正好清清味蕾。最後要讚一讚這裏的腐竹雞蛋糖水沙冰，香甜細滑，味道濃濃的，讓人一試難忘！當天還有芋圓糖水贈送，滿足！…Read More

在香港吃拉麵大多是豚骨湯底，這次來點新意思，嚐嚐雞湯拉麵。叫了特濃雞白湯拉麵和普通的雞白湯拉麵各一，看看特濃的分別！拉麵湯底看來，特濃的更白，入口是濃到不行的雞味，又帶點奶油的感覺。普通的雞白湯淺色一點，入口雞味亦相當濃郁，只是未到極濃。我怕膩，反而更愛普通的那個。至於麵底和配菜，兩個拉麵都沒甚差別。麵身頗粗，煮得剛好，帶點q。配菜中最突出的可算是炸牛蒡，鬆脆可口。雞肉軟嫩，雖未至入口即化，已經不錯。叉燒相對之下遜色，乾硬了少許。雞湯拉麵選擇不多，吃豚骨拉麵吃膩了，不妨試一下，或許會一試愛上呢。…Read More

很久以前在灣仔分店吃過Burger Joys，記憶猶新，這晚便來到新開不久的中環分店，找回那記憶中的美味。中環分店雖然不是在熱鬧的大街，但地鐵站走過去只花5分鐘左右，而且地點好找。店舖洋溢着一股美式風情，高桌高椅，給人休閑的感覺。我點了Chicken Burger ($89)，以小盒子盛載，既漂亮又方便。雞肉咬下口是清脆的聲音，可想而知有多香脆，內裏肉汁豐富，嫩滑而不乾，再配上清爽的生洋蔥、番茄...還有鬆軟無比的麵包，太好吃！男友點的是Cheese Burger ($109)，我嚐了一口，牛肉漢堡扒鮮味重，加上融化的芝士，同樣美味！吃了Burger我們還未滿足，便點了兩個小吃，分別是Melted Cheese Fries ($49) 和Crispy Garlic Wings ($59)。幼身薯條淋上芝士醬，口感變軟，芝士醬也沒有很濃，這個有點失望。蒜蓉雞翼便不錯，醬汁是甜甜辣辣的感覺，蒜蓉味重，而且雞翼仍能保持脆口。最後喝上一口汽水，心口意足！…Read More