carterkwong's Profile

雖然天氣真係好熱，但都無阻我食辣嘢嘅決心，今次黎到上環岩岩搬咗新舖嘅冒喜，一上到去地方超大，就咁粗略數過應該都有差唔多成一百個座位，枱與枱之間闊落，唔會話好似其他餐廳咁樣枱貼枱，有返啲私隱度，而佢地有低層專屬電梯，我相信星期一至五lunch呢啲繁忙時間就唔使再等幾轉𨋢先上到去啦。雖然喺上環，但啲價錢都好公道，4餸$58，6餸$66，8餸就$72，難得一齊嚟到，梗係食個8餸啦，我地分別嗌咗：1）8餸八寶套餐（潮汕手搥牛肉丸、潮汕蒜香墨魚丸、豬大腸、貴州丁家脆哨、牛黃喉、毛肚、鴨血、滑牛肉） ⭐️⭐️⭐️⭐️⭐️/⭐️⭐️⭐️⭐️⭐️2） 4餸銅錢套餐（潮汕蒜香墨魚丸、海帶、毛肚、豆皮） ⭐️⭐️⭐️⭐️⭐️/⭐️⭐️⭐️⭐️⭐️3） 藤椒魚皮 ⭐️⭐️⭐️⭐️⭐️/⭐️⭐️⭐️⭐️⭐️呢間嘢真係無論味道同環境都非常啱我哋口味，特別推介潮汕蒜香墨魚丸同潮汕手搥牛肉丸，真係完勝出面99%嘅丸，另外亦都有好多小眾嘅食物，例如貴州丁家脆哨、海帶同魚皮等等，真係食食下都要share俾啲fd知呢間嘢好好味🤤。最後賣單$248食到非常津津有味，又唔使加一，又坐得舒服，真係就黎講到呢間嘢無缺點🤣但確實係真係可以一去再去嘅餐廳，唯一一樣嘢就係如果有提供一次性嘅圍裙就更加好啦🫶🏻就唔使怕啲湯汁會彈到件衫😂…Read More

依家內地餐廳不斷攻港，今次就有湘菜嘅代表「佬麻雀」，今次佢地第一間攻港店選址喺灣仔，我地星期六夜晚7點黎到，雖然喺灣仔近商業地段，但都有唔少客人黎食。「佬麻雀」樓高兩層，我地去到就安排坐咗喺上一層，咁就拿拿聲落單先，我地就分別嗌咗：1） 豆漿一鍋鮮 ⭐️⭐️⭐️⭐️⭐️2） 琉璃脆皮雞 ⭐️⭐️⭐️⭐️⭐️3） 青椒炒茄子 ⭐️⭐️⭐️⭐️⭐️4）棉花饅頭 ⭐️⭐️⭐️⭐️唔係講笑，豆漿一鍋鮮個湯真係超級鮮甜，兩個人飲都嫌少；琉璃脆皮雞真係估唔到可以咁脆身，最可怕嘅係連攤凍咗都一樣脆口；而成餐飯最欣賞嘅係青椒炒茄子，真係炒出色香味，最後兩個人全部都食清晒，就知幾好味🤤最後埋單就$460，雖然係有少少略貴，但可以慳返程車錢同時間返深圳，最重要係食物質素高質，咁就咩都值啦。🙌🏻…Read More

香港真係一個美食天堂黎，不論中美法日俄嘅菜式都應有盡有，就好似火鍋咁都五花八門，今次去試食呢間喺香港都有一定人氣嘅牛摩。大家都知，香港人有幾鐘意日本都唔使多講，今次我地夜晚平日去食，雖然未去到爆場，但都見有唔少枱喺到打緊邊爐，都俾到好強嘅信心俾我地，呢到我個人認為最大特色係可以一人一鍋又或者一大班人一鍋又得，方便啲鐘意衞生嘅朋友仔。我地今次就嗌咗LV4牛小排嘅任食套餐，叫個鴛鴦鍋，分別係蕃茄酸辣湯同埋蟲草花雞白湯。特別推介蕃茄酸辣湯，零舍開胃。一埋位就緊係去佢個自助區睇下有咩拎有咩飲。基本上講得出嘅蔬菜都準備好晒俾你夾返去，另外最驚喜就係飲品區，真係由罐裝飲品到啤酒再到果汁再到沙冰，有糖無糖，諗到諗唔到都有得俾你飲，呢點抵讚。牛小排真心超好味，食完之後再另外叫多3碟，實行食返夠本✌🏻而就算其他肉類包括牛同豬，質素都唔錯，對得住個價位。而我地因為太肚餓，都叫啲啲熟食，好似芋泥波波、日本甜薯同牛摩飯。但個日本甜薯就真係食過最唔甜嘅一次😂😂而火鍋料除咗蝦滑有改善空間之外，其他都真係唔錯。最後我地埋單每人$278，呢個價錢可以食到靚嘅牛小排，都可以話日本火鍋性價比之選，當然牛摩仲有好多唔同Lv嘅放題套餐，好似最貴嘅Lv 6 A4霜降和牛，又或者最抵Lv 1 星級牛肌腹，迎合唔同食客，岩晒啲食牛族過黎食晒啲牛牛一家大細。🤩…Read More

今日落開芳，同另一半晏晝行經稻田食堂就坐入去食下個lunch，發現驚喜從來都係隱藏於小店內。我地嗌咗個1） 秋田便當 🍱🍱🍱🍱🍱/🍱🍱🍱🍱🍱2） 炙·三色丼 🎌🎌🎌🎌/🎌🎌🎌🎌🎌3） 日本甜番薯 🎌🎌🎌🎌🎌/🎌🎌🎌🎌🎌4） 糖心蛋 🎌🎌🎌🎌/🎌🎌🎌🎌🎌5） 柚子蜜 🎌🎌🎌🎌/🎌🎌🎌🎌🎌6） 咸檸七 🎌🎌🎌🎌🎌/🎌🎌🎌🎌🎌秋田便當絕對係性價比之選，有刺身、有炸雞、有螺肉、有豬軟骨，仲有個咖哩飯🍛食物質素仲要唔差，諗住個雞肉炸完會好鞋，點知出奇地嫩，刺身雖然唔係肥美個種，但絕對過到口癮。甜番薯真係甜到入心，真係炸到外脆腌內棉。三色丼反而我最欣賞係個飯，我喺唔記得落豉油嘅情況下食晒成碗飯，最後先醒起無落豉油🤣就證明有幾好味。大熱天配埋兩杯嘢飲簡直係一流。難怪呢間小店係我地用餐嘅短短時間入面，都已經有客人sit in同埋勁多外賣單，真係有麝自然香。👍🏻👍🏻…Read More

講到食下飯菜，又唔想走到咁遠返大陸食，當然係要去食喺香港已經有四間分店嘅農耕記，除咗香港次外，農耕記仲喺廣東、北京、上海、新加坡、馬來西亞有超過100間嘅直營店，簡直係龍頭大哥。今次我哋就去咗新開張嘅北角店渣華道嘉威大廈地下6-10鋪（北角匯商場對面），佢地同北角站都只係距離幾分鐘步程。有啲人會問，明明住新界，點解都要走到去北角食？因為佢地開業做活動，喺5月21日 - 5月22日就有5折優惠，5月23日 - 5月24日就6折，而5月25日 - 5月27日都有7折，真係食咗等於賺咗。其實之前都食過農耕記，但北角店比其他店嘅特色係佢地包房最多可以容納20人，環境裝飾又別緻。始終有麝自然香，岩岩開業就勁多人排隊，好彩都俾我地成功排到，我地一坐低太肚餓，即刻嗌咗：1） 青椒豆豉炒苦瓜 ⭐️⭐️⭐️⭐️⭐️ / ⭐️⭐️⭐️⭐️⭐️2） 蒜蓉粉絲蝦仁 ⭐️⭐️⭐️⭐️⭐️ / ⭐️⭐️⭐️⭐️⭐️3） 鮑魚辣椒炒肉 ⭐️⭐️⭐️⭐️⭐️ / ⭐️⭐️⭐️⭐️⭐️4） 滿杯維C橙 ⭐️⭐️⭐️⭐️ / ⭐️⭐️⭐️⭐️⭐️食呢啲下飯菜，最重要就係色香味俱全，呢到完完全全做到，即場炒勁有鑊氣，特別係啲蝦仁食到嘅質素真係唔差，證明係用靚食材。苦瓜帶有回甘，炒肉非常惹味，最後黎本維C橙，真係岩晒我地兩個岩岩感冒初瘉嘅病人🫶🏻重點黎啦，喺香港食餐晚飯普遍都要五六百蚊，但依家講緊兩個人食晚飯都只係3百幾蚊，性價比足，依家唔使下下山長水遠返大陸先食到湖南土菜。…Read More

今日去到太子呢間嘅餃掂手工餃子雲吞專門店食佢地撚手嘅松茸餃，一諗起都即刻流晒口水🤤今日夜晚6:30去到都已經接近full house，好彩都唔使等位，之後我地就嗌咗：1） 至尊松茸豬肉餃湯餃（跟狀元九鼎湯）🥟🥟🥟🥟🥟 / 🥟🥟🥟🥟🥟2） 香煎軟心芝士餃 🥟🥟🥟🥟🥟 / 🥟🥟🥟🥟🥟3） 蜜蜂檸檬薏米水 🥟🥟🥟🥟🥟 / 🥟🥟🥟🥟🥟4） 四川涼皮 🥟🥟🥟🥟 / 🥟🥟🥟🥟🥟松茸豬肉餃湯餃真係唔需要多講，絕對係世一餃子，一咬落去淡淡松茸嘅味道滲出嚟，配合埋豬肉嘅口感，真係好快不知不覺就食晒😋到香煎軟心芝士餃，真係煎得好香脆，就算講緊係已經放喺度攤咗一陣都依然可以食到個種爽脆口感。四川涼皮感覺似雞絲粉皮，不過就將花生醬轉成辣醬，愛好食辣嘅朋友不容錯過。最後嗌咗杯蜂蜜檸檬薏米水，好欣賞佢嗰種唔需要落冰但已經係凍冰冰，起碼唔會因為啲冰而令到杯嘢越飲越淡，最開心嘅係杯嘢唔甜又解渴，非常好飲。埋單最後$242，雖然已食餃子黎講，餃掂係會比其他餃子店貴多少少，但可以食到出邊冇得食嘅松茸餃同非常真材實料嘅狀元九鼎湯，仲有其他高質嘅食物，絕對係值回票價。…Read More

屹立於旺角最旺地段嘅長阪燒，今日有幸慶祝我另一半考車筆試pass咗，當然去吓呢啲人氣餐廳慶祝一下。我哋大概夜晚6點45左右到，估唔到個裝修都真係好抌本，真係第一眼就已經預知今餐一定會食到好滿足。職員安排咗我地坐bar 枱，亦都可以望到師傅嘅手藝，睇完menu我地決定食豪啲：1） 沖繩海葡萄蕃茄沙律 🇯🇵🇯🇵🇯🇵🇯🇵🇯🇵 / 🇯🇵🇯🇵🇯🇵🇯🇵🇯🇵2）北海道鮮帶子夾海膽 🇯🇵🇯🇵🇯🇵🇯🇵🇯🇵 / 🇯🇵🇯🇵🇯🇵🇯🇵🇯🇵3） 雜錦天婦羅 🇯🇵🇯🇵🇯🇵🇯🇵🇯🇵 / 🇯🇵🇯🇵🇯🇵🇯🇵🇯🇵4） 汁燒日本槍烏賊 🇯🇵🇯🇵🇯🇵🇯🇵🇯🇵 / 🇯🇵🇯🇵🇯🇵🇯🇵🇯🇵5） 醬燒海苔年糕 🇯🇵🇯🇵🇯🇵🇯🇵🇯🇵 / 🇯🇵🇯🇵🇯🇵🇯🇵🇯🇵🎌6） 燒牛柳 🇯🇵🇯🇵🇯🇵🇯🇵 / 🇯🇵🇯🇵🇯🇵🇯🇵🇯🇵7） 燒雞軟骨 🇯🇵🇯🇵🇯🇵🇯🇵🇯🇵 / 🇯🇵🇯🇵🇯🇵🇯🇵🇯🇵8） 清酒煮蜆 🇯🇵🇯🇵🇯🇵🇯🇵 / 🇯🇵🇯🇵🇯🇵🇯🇵🇯🇵9） 燒翠玉瓜 🇯🇵🇯🇵🇯🇵🇯🇵🇯🇵 / 🇯🇵🇯🇵🇯🇵🇯🇵🇯🇵10） 燒杏鮑菇 🇯🇵🇯🇵🇯🇵🇯🇵🇯🇵 / 🇯🇵🇯🇵🇯🇵🇯🇵🇯🇵11） 燒豆腐 🇯🇵🇯🇵🇯🇵🇯🇵🇯🇵 / 🇯🇵🇯🇵🇯🇵🇯🇵🇯🇵首先上黎嘅沖繩海葡萄蕃茄沙律清新開胃，之後就到雜錦天婦羅，真係唔能夠同坊間啲方題天婦羅比，佢地嘅天婦羅保留住食物嘅鮮味，而出面嘅粉亦好厚，重要係熱辣辣，勁好味。今晚就無叫到刺身黎食，但就嗌咗北海道鮮帶子夾海膽聽個名都知邪惡嘅菜式黎試，唔試又知可，一試真係返唔到轉頭，帶子嘅甜，中間夾住海膽嘅鮮，真係口內高潮。汁燒日本槍烏賊個份量對於我地兩個人黎講真係太多，好彩師傅燒物嘅手勢一啲都唔馬虎，烏賊唔韌仲要有彈牙。而最後上黎嘅燒物都係水準之上。今餐埋單最後連加一$798，我覺得食物質素已經對得住呢個價錢，但最令我滿意嘅其實唔係食物，而係佢地每個職員都好用心去服務每一個客，喺現今呢個香港地經常俾職員西面嘅我地，見到咁令客人舒服嘅服務，都真係幾窩心。真係非常之推介俾有興趣食高質素日本菜嘅大家。👍🏻👍🏻…Read More

相信如果喺google到search香港推介嘅茶餐廳，九龍城聯發茶餐廳絕對榜上有名，今次喺星期六下午茶時間過去，都驚會有好多旅客同食客排隊去食，但可能上個禮拜啱啱先除夕完，啲內地旅行未落返嚟，所以人流相對較少，可惜嘅係我哋啱啱遇著換枱，所以都等咗20分鐘。埋到枱之後本身諗住嗌佢常餐同加塊西多士，但見佢哋個炭燒叉燒蛋飯咁出色又多人嗌，所以最後都係改變策略嗌咗：1）港式熱奶茶 ⭐️⭐️⭐️⭐️/⭐️⭐️⭐️⭐️⭐️2）炭火叉燒蛋飯 ⭐️⭐️⭐️⭐️/⭐️⭐️⭐️⭐️⭐️3）法蘭西多士 ⭐️⭐️⭐️/⭐️⭐️⭐️⭐️⭐️杯熱奶茶飲完好舒服，茶同奶嘅比例啱啱好，而個茶亦無苦澀味，出色。如果炭火叉燒蛋飯整體嚟講都唔錯，佢地仲會俾枝類似鰻魚醬汁你去撈飯黎食，配搭埋啲炒嫩蛋，口感確實唔差，只係佢標榜嘅炭火叉燒就真係冇乜炭火嘅味道。而最後嘅法蘭西多士亦無咩太大驚喜。而其中一個最大驚喜就係佢哋嘅價錢，佢哋嘅常餐獨特餐都講緊差唔多$70，被起坊間嘅茶餐廳貴咗超過3分1，而炭火叉燒蛋飯都講緊接近成百蚊，都係有啲誇張，或者因為有名氣嘅原因，所以定價都比較高。但確實呢個價錢以我印象比起澳牛更加貴，所以除非係順路經過，唔係特登過去又遇著多人排隊，盞令到自己食得唔開心。…Read More

十二味相信大家都一定聽過，特別係喜歡食川菜嘅朋友，點都會試過，仲要依家開到成行成市，咁岩佢地喺荔枝角D2 Place開咗一間，就同我好食得辣嘅另一半去準備爆菊之旅🌼。一入店大大隻字就已經寫住「民以食為天」，就可以道出佢地唔需要咩花巧手藝，只用味道去征服我地市民。我地就分別嗌咗：1）清鮮藤椒魚 🌶️🌶️🌶️🌶️🌶️/🌶️🌶️🌶️🌶️🌶️2）酸辣土豆絲 🌶️🌶️🌶️🌶️🌶️/🌶️🌶️🌶️🌶️🌶️3）燒椒皮蛋 🌶️🌶️🌶️🌶️/🌶️🌶️🌶️🌶️🌶️藤椒魚真係無得輸，就算依家通返關都好，十二味嘅麻、辣、鮮都係首屈一指，麻嘅味道加上辣，係會令到你對魚片係慾罷不能🤤🤤之後個土豆絲又係誇張，雖然唔係啲咩值錢嘢，但講緊$68大碟到我同另一半都「嘩」一聲，仲要係個味道唔差，而最後一個小吃就嗌咗燒椒皮蛋，皮蛋味非常之出，如果可以再流心多少少就更加理想。最後埋單$4xx，真係唔好睇淨係嗌咁少嘢食，已經令到我地兩個捧住個肚走，其實之前我都食過十二味嘅午餐，我個人黎講係覺得性價比超級高，仲要勁好食。打打下字都已經想再去十二味再食佢地啲魚啦。🥹🥹…Read More

去嘅人唔係我，係我另一半，但我從佢嘅WhatsApp對話都可以體會到佢有幾咁耐。當日我另一半自己去咗青衣城呢間The Story到諗住飲杯咖啡坐下，佢就好簡單嗌咗個栗子蛋糕同埋杯咖啡，點知最後等咗超過大半個鐘都無黎到，好老實講，個蛋糕其實一早整定，喺雪櫃攞出嚟就可以，而杯咖啡仲好笑，另一半話未飲過咁難飲嘅咖啡，我就咁睇相都見到啲顏色唔對路。而其實係等緊嘅期間，我另一半都問過侍應啲嘢食仲未上嚟，點知個員工聽完就當無咗回事，繼續忽視我另一半。前後總共搵咗侍應三次，到最後嘅問返我嗌咗啲乜嘢，係咪黐線㗎？連當期時坐我另一半隔籬枱嘅食客都覺得好差。已經唔想再打字去浪費自己啲時間，總之呢間嘢食物差質素差態度差環境差，全差！…Read More

中菜食咁多，今次就同另一半走試下新嘢，適逢今日係平安夜唔使返工，就搵咗呢一間位於SOHO區嘅旁遮普餐廳。其實旁遮普係屬於印度嘅一個地區，詳情可以自己google一下，我就唔係到多講啦。入到去餐廳，店面位置唔算話大，但枱與枱之間都有十分多嘅空間去俾返食客一定嘅私隱。店內裝修風格摩登得黎帶有當地色彩，例如喺印度好熱門嘅摔跤，都會係佢地嘅decoration到展現到出黎。我地坐低咗之後就嗌咗：1）Keema Pau ⭐️⭐️⭐️⭐️⭐️/⭐️⭐️⭐️⭐️⭐️2）Mughal Room Makhani ⭐️⭐️⭐️⭐️⭐️/⭐️⭐️⭐️⭐️⭐️3）Butter Naan ⭐️⭐️⭐️⭐️⭐️/⭐️⭐️⭐️⭐️⭐️首先要多謝我另一半佢唔食羊都陪我黎，因為佢地其中一個招牌菜Keema Pau嘅配料就係用羊去整成，再用一個炸到酥脆嘅麵包去夾住黎食，外面嘅酥脆，更加突顯入邊內裏嘅鬆化，配搭埋喺入面嘅羊肉，難怪呢個會成為佢哋長年嘅招牌菜，今年都係我食過最好味之一，我推！另外Mughal Room Makhani嘅咖喱同香料味，真係一試難忘，果個味好獨特，會令你一食再食，配搭埋Butter Naan去食，真係令到成件事1+1>2。喺香港絕對唔少印度菜，但好多都會因為要遷就返香港而特地喺菜式去調節，仲要講緊係攞埋米芝蓮嘅就更加少上加少，而可以喺香港呢個國際大都會試到正宗嘅印度旁遮普菜，絕對係身在香港嘅福氣。呢間絕對值得你哋去一探究竟，黎一場旁遮普的盛宴。…Read More

天氣開始轉凍，當然就係去返啲人氣旺嘅餐廳到暖下身，俾我搵到呢一間喺香港應該絕無僅有嘅烤魚餐廳，點解咁講？試問香港邊一間餐廳係會有酒飲、有嘢食、有歌聽、仲要有波睇？真係講得出都有，勁誇張。我同另一半夜晚8點鐘就到咗，因為坐高枱嘅關係所以就唔使等位，一入到去就已經有駐場band隊喺到搞暖個場成場一齊「愛我啤酒」，氣氛超好🤣。唱完就開始點菜，我地就嗌咗：1） 皇牌藤椒烤江團魚 🤩🤩🤩🤩🤩/🤩🤩🤩🤩🤩2） 鮮磨山葵牛肉（5串） 🤩🤩🤩🤩🤩/🤩🤩🤩🤩🤩3） 魷魚須（5串） 🤩🤩🤩🤩/🤩🤩🤩🤩🤩4） 燒大大茄子 🤩🤩🤩🤩🤩/🤩🤩🤩🤩🤩5） 差點失傳的豆腐串（2串） 🤩🤩🤩🤩🤩/🤩🤩🤩🤩🤩6） 爆檸西西茶 🤩🤩🤩🤩🤩/🤩🤩🤩🤩🤩7） Hoegaarden 🤩🤩🤩🤩🤩/🤩🤩🤩🤩🤩呢到主菜係食烤魚，我地就嗌咗招牌菜烤魚，真係好重麻香味，配埋佢地呢杯爆檸西西茶同Hoegaarden真係愈食愈惹味，杯爆檸西西茶比內地所有嘅茶飲店都出色，仲要有滿滿嘅西柚肉，我地兩個人輕鬆將成條魚K.O.。之後就到串燒環節，我地嗌咗魷魚須、鮮磨山葵牛肉、茄子同豆腐串，特別係山葵牛肉配上山葵嘅攻鼻感，反而食到另一種好似奶香嘅味道，好食😋。茄子同豆腐串都非常之適合用嚟送酒。最後埋單650蚊，試問香港地有邊一間餐廳係可以做到有live band唱歌俾你聽，仲要有得點歌，鐘意嘅話直頭自己上台唱都得，主音唱歌又鬼死咁好聽，又識帶動氣氛，仲要有得飲住酒食住烤魚，嫌唱歌太文靜都可以轉去電視到睇下波，老闆絕對係怕大家悶親😂我真心覺得連好多內地嘅餐廳都比下去。漁樂場同佢地個名一樣，適合任何男女老幼嘅娛樂場所開心下。…Read More

難得平日收工同另一半去西九文化區有活動，參加完都接近成8點，九龍站圓方入面食嘢又出名貴，所以我地就選擇行遠少少去返尖沙咀食呢一間舖面睇落好似日本餐廳嘅「六両三」。我地雖然都成8點半先去到，但依舊座無虛席，好彩岩岩有一pair人出黎有枱俾我地，唔係都唔知要等幾耐🥹足見佢地係幾咁受歡迎。入到去坐低睇個menu，確實係俾人感覺上似日本式，而佢地嘅佈置亦都係精心思考過，雖然位置唔算多，但都盡可能枱與枱之間保持返距離，令每枱都有返少少隱私。我地睇menu佢地主打台式牛肉麵，我同另一半分別嗌咗：1） 牛筋牛肋條麵 ⭐️⭐️⭐️⭐️/⭐️⭐️⭐️⭐️⭐️2） 滷肉拌麵+糖心蛋 ⭐️⭐️⭐️⭐️⭐️/⭐️⭐️⭐️⭐️⭐️3） 百頁豆腐 ⭐️⭐️⭐️⭐️/⭐️⭐️⭐️⭐️⭐️4） 皮蛋豆腐 ⭐️⭐️⭐️⭐️⭐️/⭐️⭐️⭐️⭐️⭐️5） 桂花蜜仙草紅豆芋圓香草冰淇淋 ⭐️⭐️⭐️⭐️/⭐️⭐️⭐️⭐️⭐️確實咁多人排隊係有原因，牛筋牛肋條麵個湯頭出色，滷肉拌麵食得出老闆每日用心機去滷，再配埋隻糖心蛋簡直係絕配。而小食方面我地就嗌咗另一半最愛嘅豆腐 - 百頁豆腐同皮蛋豆腐。最後我唔夠喉再食埋佢地新出嘅桂花蜜仙草紅豆芋圓香草冰淇淋先滿足。如果對於台灣菜好有興趣嘅大家，非常推介你地去試下，價錢唔貴，但食物與環境都會令你覺得物超所值。✌🏻…Read More

呢排唔知點解仲係離唔開韓國嘢，之前食完韓國炸雞，今日就嚟到大美督呢間新開極高人氣嘅韓式cafe shop。確實喺香港暐系或者外國風格嘅coffee shop好多，但韓系都係比較少聽到。呢間樓高3層連天台嘅coffee shop，唔會因為店舖面積比較大而用晒啲地方放枱枱凳凳，反而留返啲位置俾人影下相同打卡，好似佢門前有一大笪地，但都唔會放任何嘅decoration，貫徹佢水泥風嘅特色。但可能因為網媒嘅報道再加上新開張，所以好多人慕名而來，不論係local定係遊客都黎影返張相，老實講佢哋每層嘅座位唔多，但幸好因為佢有三層，所以耐心等候都會有位坐，而order食物都係要排一排隊，我建議佢呢個可以用手機落單會比較方便，at least客人唔需要行上行落。而佢哋嘅菜單款式算特別多。飲品類分別有coffee同non coffee，另外仲有茶飲。而食物方面剩係得蛋糕同埋Croffle。食物質素方面我同另一半都覺得一般般：1） americano ⭐️⭐️⭐️/⭐️⭐️⭐️⭐️⭐️2） Cheese Cake (Original) ⭐️⭐️⭐️/⭐️⭐️⭐️⭐️⭐️3） Croffle (Chocolate) ⭐️⭐️/⭐️⭐️⭐️⭐️⭐️cheese cake本身個流心口感都唔錯，但食到最後去到個邊位個口感就好硬身唔順滑，可能係啲粉撈唔勻或者係焗過頭嘅關係。杯Americano味道偏淡，而個Croffle就係好一般，特別係凍咗之後成個感覺更加差。作為一間同大眾咖啡店與眾不同，佢係做到好多唔同嘅位置比顧客打卡，但食物質素確實有待提高，而另外一個敗筆點就係偏貴，一杯Americano講緊要成$60，食物就係$75同$80，唯一慶幸嘅係唔需要加一，唔係就真係同飲杯威士忌冇分別🥃。…Read More

今朝帶我隻🐱權仔去佐敦嗰邊睇醫生，俾我同另一半發現咗一間隱藏於八文樓嘅西關老祖。我地就嗌咗佢嘅招牌菜外賣返屋企食：1） 炸糭x2件 ⭐️⭐️⭐️⭐️⭐️/⭐️⭐️⭐️⭐️⭐️2） 古法賴粉 ⭐️⭐️⭐️⭐️/⭐️⭐️⭐️⭐️⭐️3） XO醬爆炒腸粉 ⭐️⭐️⭐️⭐️/⭐️⭐️⭐️⭐️⭐️4） 紅豆沙及綠豆沙 ⭐️⭐️⭐️⭐️/⭐️⭐️⭐️⭐️⭐️炸糭確實係佢呢間小店嘅撚手小菜，食落似薯餅口感，但係有糭嘅味道，中間仲要有塊肥豬肉增加個油膩感，我同另一半一人一塊就岩岩好，唔係食唔到其他嘢😬之後就到佢哋另外一個招牌菜，古法賴粉，睇上去有啲似狗仔粉，加上我相信係自家製嘅辣菜脯，真係令到成個味道昇華。另外我地叫咗個XO醬爆炒腸粉，我另一半食到有陣豬嘅味道，我懷疑佢哋應該用咗豬油嚟炒，所以特別香，但係因為攞到返屋企食嘅時候已經涼咗一大半，所以感覺上係差緊少少，我都係覺得呢啲熱辣辣食係最好味😋最後我哋嗌咗每人一人一杯紅豆沙同綠豆沙，與其話佢係沙，倒不如話係湯，本身覺得用個杯好似台式飲料飲綠豆/紅豆沙會好奇怪，但佢哋係比較水狀，所以就令到成件事合理晒。我去買嘅時候係岩岩撞正佢地開門，而喺我前面，就已經有一group嘅日本遊客慕名而來，所以我相信小店只要用心去製作佢哋嘅食物，食客係會食得出，是金子終會發光。✨✨…Read More