蜜食's Profile

Office附近已經食到唔知食乜早餐好，突然諗起同事話最近去吉野家見到有西式早餐賣$23，就去試一試。個set有：一兜粟米火腿豬骨湯桂格通粉，D通粉比平常大粒好多，不過比平常通粉個質感薄D，口感唔差幾得意，個湯的確有D豬骨湯嘅味，唔會淡茂茂。一舊炒蛋，size有手掌心咁大，炒得濕濕地唔會乾爭爭唔錯。半塊方包嘅薄多士，有D＂林＂，唔多好食。一杯熱飲，我叫咗奶茶，普通，唔好追求茶餐廳茶濃奶滑嗰D質素。外賣+$1，total$24食個早餐ok接受嘅。…Read More

今日要去土瓜灣嗰邊，見仲有時間就去食個早餐先，望下條街又係堆M字頭、吉字頭、老茶嗰D食肆，突然發現有間A-1 Bakery & Cafe，門口睇睇個menu好似唔差，店入面又唔係多人，可以揀位坐，所以就決定試下。叫咗個2號餐，經典炒蛋早餐配熱奶茶。成碟嘢基本上都唔熱，有麵包、炒蛋、炸魚柳、菜、蕃茄，麵包無乜味，炒蛋正常但唔熱唔好食，炸魚柳超細塊而且外皮硬嘅，菜唔新鮮似住梅菜，菜底有D沙律汁？？但好酸！蕃茄可能係最願意放入口嘅食物⋯⋯杯奶茶都預咗唔會好飲，都係奶水還奶水、茶還茶嗰D⋯⋯可能係我期望太多，失望比較大⋯⋯又可能只係哩個餐比較難食⋯⋯…Read More

剛食完火鍋晚餐，全部都鹹嘢，梗係要食返D甜嘢中和一下啦，記得之前行過K11見到有間賣京都抹茶甜品，未試過梗係要去試下啦！行到去已經21:49，但都有堆人響門口等緊，個服務生話堂食last order係22:30，但仲要等10張枱，等得黎都唔洗order啦，所以我地改變主意決定外賣。叫咗個抹茶雪糕新地 $48，個雪糕的確係幾抹茶味，好味😋 而杯飲品初初都幾抹茶味，但因為D冰慢慢融而令到杯飲品愈飲愈淡，如果D冰都係抹茶整成嘅就perfect啦😆…Read More

我地一行18人，預先book好枱，雖然已經係安排咗一個房俾我地，可能無咁大張枱坐曬咁多人，所以就變咗一張大圓枱+一張4人枱，我地唔介意分開咁坐，只係2枱人要傾計就辛苦D姐😓湯底我地揀咗麻辣鍋、美人鍋、養生鍋，D湯好正好入味。食物叫咗好多嘢，有手切安格斯牛小排、手切牛肩肉、極品黑毛豬梅肉、嘉美農場雞肉、新鮮脆鯇片、墨丸、蝦丸、芝士牛肉丸、餃類拼盤、滑豆腐、凍豆腐、鮮炸響鈴、雜錦蔬菜盤、有機玉米、厚切日本山药、冰菜、羽衣甘蘭、鴨血、松葉蟹棒，全部都好好食好新鮮。飲品叫咗冲繩黑糖烏梅汁、杞子杭菊露，烏梅汁太甜，杭菊露甜度適中比較推薦。服務都唔錯，不時主動幫我地加湯、收碟。最後埋單6千幾，仲可以join member，下次再去食只要俾電話號碼就可以85折，正呀！…Read More

今日同同事一行10人又出去食lunch，事先book咗枱，所以唔洗等直入，店家亦已經幫我地併好咗可以10人一齊坐嘅枱，真係好👍🏻各人各自一set，大家叫咗鐵板帶子拼黑豚、築地直送壽司八貫配烏冬、Amoi特選便當，每set都有主食、味噌湯、沙拉、前菜、甜品。鐵板帶子拼黑豚份量偏少，帶子2粒、黑豚4粒、白飯一碗，適合細食女士。築地直送壽司八貫配烏冬，壽司size比一般嘅細粒小小，可能係8舊飯+烏冬，連男士都話夠飽。Amoi特選便當每次都有D唔同，因為唔知今次有乜所以會有驚喜。整體而言，味道係好食嘅，只係個湯比較鹹姐。…Read More

星期六落雨天，剛剛行完淘大，行到去德福就突然落大雨，正好食飯時間就決定響德福食晚飯，見下層食肆一堆又一堆嘅等位人群，馬上走去上層搏一搏睇下有無位，竟然抹茶館有位唔洗等，非常好。個定食套餐有主食、配菜、2粒壽司、2粒炸雞、2粒仔甜品、飲品，份量對一般女士黎講已經夠曬飽，大食嘅男士可能就差DD，拉麵同烏冬軟硬度適中，湯底唔算濃，可能我地食開淡就覺得唔錯，如果鍾意濃味嘅人可能會覚得淡。整體味道唔差、係正常味道，可能隻炸蝦剛剛整起，熱騰騰幾好食。…Read More

朋友上次食過覺得唔錯，所以再黎一次試唔同款式。我地book咗12:30，準時黎到見到我地張枱有＂留座＂嘅牌仔，係角落靜靜地嘅4人枱，唔錯。嘢食我地叫咗鮮芒粒粒班㦸、招牌班戟、招牌法式吐司，飲品叫咗奶蓋紅茶、奶蓋綠茶、鮮奶抹茶、雲呢拿玫瑰花茶。飲品真係一般，綠茶抹茶都無乜綠/抹茶味，花茶算係比較好而且香。食物反而有驚喜，3樣都好食，好味次序係招牌法式吐司〉招牌班戟〉鮮芒粒粒班㦸。招牌法式吐司浸滿蛋汁，真係好似食緊蛋捲咁，極度推薦👍🏻2款班戟都好鬆軟，又夠空氣感，真係唔錯。…Read More

同朋友2個人行開旺角，諗住咁多食肆事但搵間食晚餐應該無難度，原來選擇太多都係一種難度😅最後諗起以前食過哩間mono cafe嘅蛋包飯都唔錯，所以就決定咗哩間啦🎉可能舖面細，所以坐得都有少少迫，但尚可接受，不過要留意返個冷氣出風位，好彩只係吹住我手臂，吹個頭就死梗啦🤧我地叫咗和風海鮮炒意粉、同和風鰻魚芝士蛋包飯，份量好足料甚至係多。個炒意粉味道好好，只係食到最後覚得有少少鹹，個蛋包飯相比起黎味道就無咁濃，我地反而比較鍾意，個蛋雖然唔係流心，不過都好食，食曬真係飽到一個點😂…Read More

今日同朋友2個人響九龍灣行完街，5點幾又未到晩餐時段，剛好行過淘大間麻酸樂仲有下午茶餐，就入咗去食。三十幾蚊個set，有碗麵（可選湯底、麵種類）、1個小食、1杯茶，下午茶餐當然麵量唔多，但作為下午茶餐就絕對係足份量！我地一個叫拉麵一個叫米線，麵質口感正常無話偏硬或軟，雖然叫清湯但都唔會淡如水。小食比麵食出色，鹵水雞翼入味得黎唔會鹹，吉列魚剛炸起熱騰騰又脆卜卜，好味😋2個人埋單只係$75，唔洗加一。連晩餐都唔洗食，剛好可以去食甜品，perfect👍🏻…Read More

今日同事一行10人book位食lunch，早一日book定位，餐廳仲fax咗個lunch set定食menu俾我地添，服務唔錯😊都幾多款選擇架，雖然價錢有返咁上下，但相對份量亦足料，味道真係唔錯，我地一行10人嘅feedback都係好味😋＆好飽😆我試咗個鍋燒海鮮烏冬定食，有salad、前菜茄子、味噌湯、鍋物、餐飲（奶茶、咖啡嗰D），成鍋拎黎熱辣辣出緊煙，烏冬有咬口，鍋物湯底清甜，海鮮唔似係急凍海鮮。總結係我會想再去食😍…Read More

廉記冰室響灣仔哩間已經開咗業一段時間，平時返工行過見到成日都好多人響門外等外賣。今朝突然好興起想食個麵包+嘆杯奶茶，所以特登兜路行去廉記買早餐。可能今朝有少少雨粉，所以無咗平時嘅等待人群，排隊俾＄非常快＆順利，外賣都只係等咗一陣，就已經有得拎，個麵包拎到返office都仲暖暖地，正👍🏻👍🏻👍🏻之前試過買綠茶波蘿包，綠茶味比較淡，今次買綠茶墨西哥包，入面有綠茶吉士，好味😋，包+熱奶茶=$16，灣仔區早餐算係抵食👍🏻…Read More

尋晚行太古城，行到攰攰地又肚餓嘅時候，睇水牌見有唔少食肆架，但行黎行去一間搵唔到響邊，突然見到school food就馬上衝咗入去！我哋2個人被安排到溜冰場旁邊嘅4人枱，所以坐得好鬆動👍🏻睇menu見有新菜式馬上叫咗個桜海卡邦尼試下，賣相幾靚有兩粒櫻花仔做裝飾，因為有芝士，雖然睇落細細碟但其實已經夠飽。因為etude house x school food，送咗支保濕精華，兩星期後可以帶去旅行用👍🏻…Read More