超肥小姐's Profile

買左一隻燒鴨，返到屋企打開夾番落自己嘅碟加熱，至發現冇左一隻髀。打番去舖頭話俾佢地知（其實心知唔會有實際作用，只係唔講唔舒服），接電話小姐一如預期態度差劣，話冇可能偷一隻髀，叫我影相做證據send番俾佢地睇，又話口同鼻拗，話我屈佢，仲問我當場做咩唔check清楚。其實呢個世界真係有人會買燒味，人地包好晒俾你，你再打番開個外賣盒數下check下d件數齊唔齊？！咁，其實我都知係口同鼻拗，影相都冇用㗎，影完你都可以話我係自己夾走一隻髀至影張相屈你都得。打電話之前已經預左佢會無賴、預左佢會唔認、預左佢會態度差。唯有以後自己唔幫襯，咁你多我一個客又唔多，少我一個客又唔少。我買得少少嘢又唔係大客，咁算囉。…Read More

搬舖之後第2次嚟。第一次係平日12點午飯時間，服務呀食物質素呀完全唔覺有問題。第2次去（即係依家寫食評嘅呢一次），禮拜日下午5點8食early dinner。一入去，上次lunch見到嗰d好醒目好勤快嘅侍應完全冇晒，變晒做d中年侍應。QR code 落單入到去見冇晒煎餃，但係又有湯餃㗎喎。咁我問個中年侍應1號：冇晒煎餃係真㗎？佢：我唔知。我：即係依家呢個時段淨係賣湯餃唔賣煎餃？佢：我唔知。我：會唔會晏d有番？佢：我唔知。咁我轉陣，搵中年侍應2號：請問係米真係冇晒煎餃？佢：係啊！我：但係你煎餃同湯餃係同一隻餃子嚟㗎喎，咁你又有湯餃？佢：總之冇！我：咁會唔會等多一陣晚市至落單會有番煎餃？例如等到6點咁？佢：總之依家冇！我：即係你今晚全晚都唔會有？佢：答你唔到！要等師傅返！總之冇囉依家！我：咁師傅幾點返？我可以等佢喎。佢：冇人知㗎喎。我地一家人於是好衰咁😛坐住佢張檯openrice下附近有冇其他嘢食，諗住搵到就轉場嘅時候，幾個妹妹仔侍應返嚟開工喇。咁我即刻再問多一次冇煎餃嘅事，而呢個時候其實四方八面檯檯都係問緊點解冇煎餃，個小妹妹話：下冇咩？我去睇下。一分鐘之後小妹妹出嚟通知各位食客已經開通番，大家可以QR code order煎餃。我唔知d嬸嬸發生咩事，但係睇到四周圍嘅反應，都唔係淨係我一個對煎餃有執念，根本人人都想叫煎餃。小妹妹有同我講番話「繁忙時間」做唔切就會鎖左個煎餃唔俾人order，我哦哦哦咁應左佢就算，又唔係佢嘅錯仲要辛苦佢過嚟焗住要解釋。你當我傻咩，星期一至五lunch咁繁忙你都唔會因為所謂做唔切而鎖menu啦，星期日下午5點幾6點你樓面冇咩客咋喎！「繁忙」？都唔知廚房搞咩，更唔明白樓面d嬸嬸搞咩。…Read More

街坊成日話呢間嘢態度差，有時我覺得都算，快d買完快d走，又唔係同佢做朋友，冇力氣同佢計較咁多。但今日真係嬲豬左。首先佢不嬲都好hard sell，買腸粉問你要唔要魚蛋燒賣、買魚蛋燒賣又問要唔要腸粉、買米粉問要唔要粥，買粥又問要唔要雞髀。如果只係服務體貼問一句就算我都算，次次去到都要問幾次，仲要問暈晒一round佢有賣嘅嘢。今日買三份腸粉，佢能本事唔落醬唔包腸粉hold住一樣一樣問我呢樣要唔要嗰樣要唔要，而我一開始就表達清楚我淨係要腸粉。佢都仲係要- 燒賣要唔要？（唔需要）- 魚蛋要唔要？（淨係腸粉就得）- 今日有炒米粉。（我淨係要腸粉）- 粥呢？有冇興趣？（唔洗）- 香腸呢？（我唔要嗰d喇，你幫我包d腸粉啦）- 我地d雞髀新鮮炸出嚟你要唔要一隻？（真係唔洗）😒😒😒😒😒😒買腸粉，鍾意食醬所以叫佢多醬，講左3次都依然係求其落少少。我講第4次唔該我想要多醬，佢竟然話：聽到。跟住隻手依然唔肯落，食幾十年腸粉冇見過咁白雪雪豉油又冇醬又唔夠嘅腸粉。好貴咩d醬？就算真係貴，都已經係咁加價㗎喇喎！唔好又賴covid，covid唔係加價同時偷工減料嚟做生意再態度差嘅合理解釋。同埋不嬲都係做開外賣㗎啦，co唔covid關你咩事啫。…Read More

去食午餐，叫左1. 羅宋湯午餐肉通粉拼菠蘿油（早餐餐牌，供應到12點）2. 咖哩吉列豬扒飯兩個都冇影相，因為本身冇咁得閒所以冇諗住食茶餐廳都寫食評。上面嘅嘢都好食。而且兩個人坐四人卡位都唔會被逼搭檯，就算大圓檯需要搭，都會有膠板响中間。茶餐廳嚟講算係坐得非常舒服。就係因為用餐經驗太好，於是決定買燒味外賣返屋企夜晚食。見到隔離檯點燒鵝四寶飯都係70幾蚊，碟飯成個樣都好靚。咁一個燒鵝拼乳豬例牌理論上應該唔差，收$260都應該容許我有d期待呱。結果返到屋企得咁多多，我驚大家意會唔到個份量我擺隻手板出嚟做對照，得9件燒鵝，8件乳豬。我咁計啦：我個例牌乳豬拼燒鵝$260，我當裡面$130係燒鵝，$130係乳豬。咁$520一隻燒鵝，$820一隻乳豬。咁照比例計你係米都應該唔好呃得我咁緊要，俾番4分1隻燒鵝同6分1只乳豬俾我，我大方d俾你扣起幾舊喇，但係都不至於$260得9件仔燒鵝同8件仔乳豬呱。可能依家d嘢貴我唔知價啦，可能自己蠢走去叫例牌而「例牌」係咁啦下，又可能係自己蠢走去茶餐廳買燒味啦。去茶餐廳，食飯茶餐廳d嘢米算囉，自己多事。…Read More

揀左呢間中菜同兩位10月之星嘅家人慶祝生日，環境唔錯，免費泊車，訂位時俾埋車牌，不過落車就要上兩層行番去博覽館站出閘嗰邊至係餐廳嘅位置，如果搭機場快線會覺得行少好多，出閘再上個扶手電梯就係。.全場檯唔多，坐得舒服唔逼。我諗大家都明依家坐得唔逼又冇分兩輪甚至三輪嘅餐廳係幾咁難搵，去d一級戰區酒店食個過千嘅buffet都夠膽死分上下兩輪啦，唉。.訂左6:30pm，但奇怪嘅係準時入到去發現全場都已經坐好晒仲有d客已經食緊，貌似我6點25分到卻係全晚最遲嚟嘅客。於是乎：.鳳肝蜜汁金錢雞➡️賣晒化皮乳豬件➡️賣晒唯有叫支酒定下驚先我求其叫嘅，我唔識酒嘅，即場開個wine dictionary 出嚟睇到好似唔錯咁就嗌。但係我覺得呢度d酒好抵飲，個mark up比市區餐廳平三分一左右。.前菜叫左鮑魚，一人一舊。嫩，唔un，冇「銀」胃。我唔食蒜頭所以倒晒d蒜頭俾屋企人，不過屋企人話蒜頭好正，鮑魚仲正。再嚟係蟹蓋，啖啖蟹肉，一梳一梳咁好分明，唔會有醬呀cream呀嗰d嘮到一pat一pat咁，從肉質同紋路中蟹肉貌似、我希望、我覺得、我願意相信應該係自己拆嘅唔係罐頭嘅蟹肉。不過有dd洋蔥而我又唯一一個唔食洋蔥咁要自己撩走，所以冇人理我全檯人都好enjoy。好食不過都係/米就係咕嚕肉嗰d囉，咁舊肉又真係炸得好脆好好味嘅，肉質lum滑，冇肥肉需要咬番出嚟。侍應都會溫馨提示襯熱食，我諗佢都係見到檯客有老人家影相要影10分鐘都唔俾人食所以非常好心咁暗示下襯熱食至好食咁。下面個碟係舊冰，受歡迎嘅竟然係肉下面d蕎頭同酸薑。琵琶豆腐，豆腐係清，不過都好惹味。最難得冇蔥冇蒜冇洋蔥冇我唔食嘅嘢，雖然係豆腐但係唔會lum bat bat。我地全家都唔鍾意清淡亦都唔鍾意出街食飯叫一碟清嘅青菜😂，呢個豆腐全晚最清㗎喇。牛肋肉好好食，lum得嚟入味有嚼勁但係唔係un咬唔開個隻，係炆到入晒味但係唔會梅梅嗰種口感。前面d雜菌襯埋個汁好惹味，個汁有d紅黃椒同埋sun dried tomato。（我唔係扮嘢但係我真心唔知究竟係點叫，太陽底下曬乾嘅番茄？番茄乾？咁上下）呢個蟹肉伊麵老人家好喜歡，我覺得冇餸。雖然都係好食嘅，但係我會寧願點海鮮泡飯或者炒牛河。甜品點左兩客「紫澐夢境」同一個焗西米布甸，壽包係餐廳送嘅，甜品上面嘅生日朱古力牌係之前同佢講好嘅。個夢境裡面係有一個栗子creme brulee同埋一舊紫薯薑雪糕，雪糕特別，creme brulee我覺得太淡，無論甜味同埋個brulee嘅濃郁度都好麻麻，不過人人都話要健康健康我諗呢個唔好食嘅甜品應該係大眾口味呱，我就唔得喇。西米布甸就非常好食，壽包就咁細個都居然有一粒仔蛋黃，驚喜左。download awe app 有優惠，去到先問下經理侍應。全場侍應好多好殷勤又好幫手，提我地襯熱食，又會提我地影全家福順便幫手揸機；冇嘢做嘅侍應行過會自己睇你有咩需要。服務俾個讚佢。.瑕疵梗有，例如我去之前响官網好仔細咁睇過一次個餐牌，發現自己想食嘅嘢冇嘢需要預訂所以就冇訂，咁我冇心理準備6點幾去到有兩三樣嘢會賣晒。限量發售嘅嘢其實都可以之前俾個客知道嘅。不過真心無咩所謂啦，去多次囉唯有，咁下次識得留定d嘢。.同埋有興趣真係book張窗口檯早d去睇埋日落，應該好正。我就係傻仔左諗到book窗口檯但係忘記左日落呢回事，搞到去到天都7成黑坐多10分鐘個窗馬上倒影番餐廳內部。…Read More

4個人，用openrice訂座優惠八五折。叫左兩個前菜share1。蟹餅2。帶子（唔記得影相）兩個都幾好食。蟹餅d醬有dd辣，dd啫。帶子係新鮮，同脆煙肉好夾。主菜叫左一隻煙燻雞同埋一個porterhouse share嚟食。Porterhouse 叫左medium，我覺得做得好好。Side 揀左薯條同埋粟米，牛扒個汁揀左紅酒同bearnaise。紅酒汁做得好好，bearnaise做得好差，不過其實唔需要點汁已經好好食所以試左味之後都係冇再點汁。另外叫左一杯Tropical Punch、一杯Jasmine &Rose Iced Tea同埋開左支酒。Punch好飲，Iced Tea 超普通，就好似你响屋企整個香片茶包雪凍d茶再嬸d玫瑰花瓣响個面再飲咁囉。酒呢，呢度個wine list係好嘅，只係你千奇唔好懷疑自己揀酒嘅能力，唔好太相信佢嘅提議，如果真係唔識，都唔緊要，依家人人都用智能電話你download是但個app自己參詳下就得，我唔係幾滿意侍應介紹嘅酒。問題係我其實冇叫佢介紹，我話左要邊支，侍應話不如要第二支，咁都係我自己衰耳仔軟嘅，所以呢度no complaint。環境方面，好幾張枱都係window seat，早d去可以睇日落，不過會好曬，要自行取捨。餐廳裡面9成嘅枱都會被陽光照到，唔係好適合我呢d古墓派嘅人，所以lunch我就唔會選擇去試喇。…Read More

通常一、兩個禮拜總會黎一次食晚飯。得出以下結論：飲品：紅桑子蜜糖茉莉花茶--- 好好味玫瑰石榴梳打--- 都好味，不過完全飲唔出有玫瑰味，如果係玩遊戲蒙住眼估食/飲緊乜，實輸。好味既野食：- 菜蓉鮮蝦羹- 釀蟹蓋(無數個「得」)- 鍋巴銀鱈魚- 鹹魚雞粒炆豆腐- 皇室牛柳- 豉油皇煎中蝦- 朝鮮醬蝦球脆麵(個麵唔脆的，但整體都好味)- 碧綠星斑球唔好味既野食：- 炸子雞- 籠仔穌薑蒸魚柳- 所有炒蛋白的菜式(叫得炒蛋白梗係想清清地，佢地就走去搵d味精湯開d蛋白黎炒，搞到完全冇蛋白，好濃，好味精，勁難食)- 甘橘脆蝦球(味道的配搭有d怪怪)- 金瑤蟹肉脆茄子- 南瓜汁蘆筍甜品：creme brulee --- 勁得的warm chocolate cake --- 得，但很膩，有人share至好叫飯後的八月花茶，我好欣賞！…Read More

一向對標榜自己日式乜日式物既餐廳非常反感(唔知點解)。同事聽完個電話發晒脾氣話需要食甜野，本來打算陪佢去買自己唔買。點知去到個蛋糕櫃望望下，見到幾靚又忍唔住買。同事買了豆腐cheese cake，佢話甜左少少，但都好好味。我買左白朱古力桂花cheese cake，我好鐘意桂花野，同埋覺得佢個combination 好唔襯，所以心c c 買黎試試。點知~~ 好好味。餅底薄薄但好脆，cheese當然唔濃但都幼滑，中間層桂花mousse好清甜又香。各$20 / 件。如果要評服務的話，咁，我唔知點解我外賣蛋糕，佢只要拎件蛋糕出黎入袋or盒俾我就得，但能本事我等左成個字都唔見自己件餅lor，但當時4個人做野，得3個客咋喎。…Read More

同同事兩個人黎呢度食lunch，冇得book 位，自己排隊等位。專登早10分鐘偷走離開公司，到達後等左約3個字先有位。可能新開，地方企理，裝修都ok。叫了：1. 燒牛肉撈蒙2. 香茅牛肉撈蒙3. 軟殼蟹卷4. 青檸薄荷梳打x 2兩碗牛肉都幾「un」，但燒牛肉個味好小小，撈蒙d汁淡得滯，落極都唔夠味。其他野完全冇特別，話佢難食又唔係，好食就更加唔算。全場搭檯搭到唔清唔楚，檯細細，咁搭法真係唔多舒服。食完第一時間有人衝埋黎清檯，仲要自己走去櫃台埋單，加一收足。今次每人九十幾接近100蚊。講真，我可以揀其他野食lor。越棧就經濟好多，人地又係要排隊等位又係要搭檯又係坐到迫迫咁，但係30幾蚊就搞掂。我唔介意食貴野，但俾得錢，除左最基本野要好食之外，仲想食得自在舒適他條d。…Read More