khakiii19's Profile

食阿元係享受，望住別緻的台式裝修，聽住充滿回憶的台灣國語歌曲，間中忍唔住朋友哼幾句，真係有種回到過去嘅感覺。午時堂食要等一段時間，所幸上菜速度快，食完再小抖一陣都唔會遲到。阿元魯飯只需$42，唔似坊間mark up得非常過份。味道唔錯，魯肉入味，份量唔少，但幾條菜同漬物好似唔太夾（？），魯蛋冇咩味，當填下肚。店內夾雜香港及台灣員工，但溝通上基本都冇咩問題，服務態度親切有禮，日日排長龍，的確不無道理。…Read More

突如其來打風放假一日，於是決定近近地食王牌食下午茶，同早餐一樣抵食。今次叫咗瑞士雞脾餐，加埋奄列、薯餅、熱飲，只係$46，飽肚又抵食。雞脾味道唔錯，瑞士汁香甜入味，肉質尚算嫰滑；奄列煎得有啲老，略嫌油膩，相比之下炒蛋出色唔少：薯餅都算香口，但同樣油味重，需要改善。王牌奶茶一向順滑香濃，茶奶比例佳，係每次食早餐必點，今次當然亦冇失準，算係同區排名較前嘅一員。食住下午茶，望住出面風雨飄搖，別有一番風味。Instagram: @_kikhk…Read More

coffee slave的咖啡及意粉食得多，all day breakfast就第一次食，整體都唔錯。一般cafe的西式炒蛋雖然嫰滑，但味道偏淡，難得coffee slave炒蛋炒得幾有蛋香，冇期望下幾有驚喜。煙三文魚沙律夠新鮮，塊sourdough多士同普通麵包冇咩分別，但又烘得幾有牛油香，好味。至於其他都係normal all day breakfast質素，$110呢個價錢似乎偏貴，仲要唔包野飲（但有包餐湯，加野飲有跟餐價），同區有更高性價比嘅選擇。雖然就唔算太抵，但Coffee Slave啲食物飲品都係有心做，服務亦唔錯，加上係好黃嘅黃店，打工仔偶爾勒緊褲頭幫襯一次也算應該。…Read More

一兩年前曾經幫襯過舊舖（當時仲係叫慶麵），想不到竟然搬去大舖，仲要係新商場嘅地舖，有點難以置信的感覺。今次重遊舊地，老實說都唔記得味道係點，只係記得唔錯，今日一幫襯，都印證到我當年嘅想法。慶麵質地好彈牙，係以日式拉麵配以上海中式湯頭，令人耳目一新，相當不錯。 茶燻雞正正常常，唔太鐘意醃料味，但煎得幾香嫰；醉雞卷酒味唔濃，頗易入口，凍食開胃爽口，清清淡淡作為前菜最適合。慶麵以QR Code落單，我都幾唔鐘意呢種方式，非常不便， 同埋同樣有出錯（店員拎錯飲品畀我）。建議若果唔係壽司店呢類需要瘋狂落單的店舖，都係採用人手方式比較好。instagram @_kikhk…Read More

甚少食semi lunch buffet，本身都冇咩大期望，結果都係合乎預期。Main dish肉眼扒唔錯，尚算嫰滑多汁，冇過火，但肥肉比例唔少，食哂有點肥膩，另外，新鮮蔬菜＝兩條細紅蘿蔔＋一顆西蘭花，都係白烚，好似有啲求其。最有驚喜竟然係個薯蓉，牛油味濃厚，非常creamy，同行朋友都大讚。至於buffet section，實在乏善可陳，只有普通的餸菜，包括炒粉麵、雞翼、咖喱魚蛋豬皮，個卡邦尼係毫無芝士味，只係普通白汁。唯一想encore係沙律，選擇唔少，蔬菜算新鮮，但南瓜好似浸咗糖水咁，甜得發膩。甜品方面亦普普通通，選擇少，偏甜，大部分忌廉都落咗古怪的檸檬人工flavour，係桂花啫喱清清淡淡最討好。總括而言，個buffet section係冇咩意義，純粹為塞飽個肚，倒不如正正經經食個steak set，還來得划算。…Read More

推薦過坐忘畀唔少人，個個食完都大讚，價錢仲要非常親民，係我幾年間一直有keep住幫襯嘅餐廳。嚟坐忘食豬軟骨是常識吧？基本上冇食過比坐忘更軟淋嘅豬軟骨，煮足七個鐘，入口即溶，骨膠原滿滿，個膠質勁過牛筋，而且亦相當入味。另外，咖喱也夠出色，略帶甜味，香濃微辣，再配以健康的雜菜，營養滿點。一餐飯，味道、質素、健康全部兼顧到，確實無可挑剔。要注意平日lunch time基本上係一定要等位（太受打工仔歡迎），反而星期六日就好好多，想食又唔想排隊可以留意。…Read More

一直以嚟，灣仔bakehouse門口都會有條長龍排隊等堂食，pastry部分都多人買，但基本唔洗排隊。前排某報導大讚咗Bakehouse麵包後，就每次經過都有兩條長長人龍⋯⋯好彩pastry員工手腳快，基本上五分鐘內就輪到你。Bakehouse Egg Tart一如既往好味，甜度適中，酸種酥皮少少淋但都鬆脆嘅，蛋漿軟滑輕盈，冇一般蛋撻厚重甜膩嘅感覺，食哂成個都冇罪惡感（仲想食多個添），非常推薦。…Read More

係尖沙咀諗唔到食咩，咪去厚福街囉～今日發現街頭開咗間新台式餐廳，細細地又幾骨子，加上落狗屎，就決定揀你啦臺坊！舖頭的確較細，大概十零個位，不過裝修都唔差㗎，牆上掛咗好多風景相，想念台灣T_T鹽酥雞肉燥拌麵肉燥份量唔少，但就唔夠味，連我平時食開清淡野都覺得幾淡口下。鹽酥雞普通，少少淋，唔夠香口。朋友嘅麻辣雞絲冷麵佢話唔錯，賣相都幾好，應該相當清新。芝士肉鬆蛋餅呢個反而幾驚喜，好好味，蛋餅煎得好香，芝士同肉鬆餡都好多。…Read More

香港唔係好多地方有得食豬雜，冇食一排突然有啲掛住，特登搵咗呢間灣仔嘅元朗合隆食！粉麵店嚟講，店內裝修幾靚，光線偏暗偏藍，有種回到八十年代嘅感覺。合隆少有可以配搭銀針粉，亦有牛柏葉、黑豚肉餃、醉雞等配料，不過今次就試返招牌豬雜配銀針粉！胡椒湯底可以辟走一般人唔太鐘意嘅內臟味，雖然幾惹味，但略嫌有少少搶，食唔到豬雜本身嘅味道。豬雜種類多，特別鐘意食豬心，夠爽口～ 價錢抵玩，坐得舒服，食物又夠特色，值得再去。…Read More

JOMOS係將軍澳南少有提供精品咖啡嘅cafe，位處海濱，行過去已經幾有feel，隔離仲有個gym room（不過偏細），所以都吸引好多人幫襯，星期六日基本上係一定要等位。戚風蛋糕Earl Grey味好出色，茶香濃郁清新，特別鐘意面頭嘅無味忌廉！芝麻味就有啲遜色，普普通通，感覺突出唔到芝麻香。Flat White 咖啡唔錯，無驚喜亦無失望，將軍澳質素嚟講算係頭幾位。室內環境幾好，純白簡約裝修，亦夠空間感，不過室外衛生環境就欠佳，碗碗碟碟冇人收，枱面亦好多食物碎屑，令人胃口大減，就算出面有位，都寧願等多陣食室內算數。…Read More

呢間金鐘小店其實好唔就腳，但就好多人慕名而至，就連平日下午茶時段都要排長龍，非常誇張。娘惹濃厚喇沙湯底的確濃厚稠身，非常香口，椰香十足又惹味，蝦肉同雞絲肉質都唔錯，整體未到好驚喜，但都值得一試。咖央多士多士香脆，咖央好creamy，好似食緊雪糕咁，冇一般咖央多的甜膩，忍唔住一啖接一啖！可能因為質地厚身，所以都會比一般咖央多飽。有一點的確要改善，就係員工態度好似好想趕人走，雖然語氣友善，但食完一碟野、筷子都未放低已經想收走，見我加單（後加咗個咖央多）感覺有少少不情願。最過份係，我食哂野得返杯水係枱面，佢連杯水都要收走埋，講緊我食哂所有野只係不足3分鐘。後尾我唔記得咗要食藥，所以友善地要求侍應畀返杯水我送藥，個態度又係好不情不願咁～ 我認為論一間餐廳嘅服務質素，唔單只係講緊態度有禮或者殷勤與否，可唔可以畀到客人一個舒適嘅用餐體驗都非常重要。Rempah Noodles呢方面好明顯不足，我由坐底到食完30分鐘到冇，已經咁趕客，唔講以為我坐咗兩粒鐘～就算出面有幾多人都唔應該係咁嘅態度，始終我都係排咗一粒鐘隊先入到嚟食野。…Read More

Cupping Room分店遍佈港島，講就腳程度，呢間分店一定包尾，但我就貪佢人少少，氣氛悠閒，可以係到hea返一整個下晝，唔會有人龍及員工暗自逼你離開～Single Original - Ethiopia $50嗌咗杯手沖Ethiopia，幾鐘意呢個setting，可以保留返咖啡溫度及香氣，適合慢慢嘆～ 另外仲會附上呢隻豆及莊園background，多角度咁理解呢杯咖啡風味及背後的故事，present得好好。Egg Benedict w/ Slow- Roasted Pulled Pork美中不足嘅係，呢間分店冇pasta，得麵包類Brunch（我記憶中cupping room嘅pasta係十．分．好．味），於是叫咗個Egg Benedict。Egg Benedict煮得恰到好處，無論係流心蛋黃定係荷蘭汁都非常唔錯，底下的baby spinach嫰滑多汁，而手撕豬肉就香辣惹味，個汁非常驚喜，完美點綴偏清淡的Egg Benedict！相信叫Salmon呢個大路組合絕對唔會令我咁鐘意，好多謝店員推介～…Read More

九龍城近年開咗唔少cafe，不過暫時都只係去過Rings，仲要咁啱每次都只係飲咖啡，冇食過佢地嘅食物（但睇相個質素都幾唔錯）星期日下晝要等一陣枱，我幾鐘意坐吧枱，望住Barista手勢優美咁沖咖啡（然後自己慢慢嘆啡），好治癒，簡直係放空最佳活動，坐足幾個鐘都唔厭！今次試咗Costa Rica嘅Single Origin，唔錯，仲試飲咗啖同行朋友杯Espresso Tonic，好消暑又好飲～另外好欣賞佢地注重環保，飲筒係用蒲草製成，可以分解，又冇蔗飲筒咁易斷。之後Barista仲私人醒咗杯Colombia畀我地飲，話最後一杯畀我地試下，仲同我地傾咗陣咖啡，下次幾時換批新豆等等，非常親切～呢間店嘅用餐體驗好好，食物質素高之餘，店員畀我地嘅感覺係非常enjoy，亦唔會限制用餐時間，好適合同朋友嚟放鬆放鬆！…Read More

一直都幾鐘意食馬拉野，貪佢夠香口，香料獨特，一排冇食就會有啲掛住～食過深水埗蘇媽蘇媽幾次，今次嚟到旺角分店，砂窩老鼠粉係必點，好似煲仔飯咁，撈埋隻生蛋即刻加咗唔少texture，食到尾啲飯焦絕對係精華所在。馬來西亞拉茶好香，因為係遠距離倒茶，所以面頭有好多泡泡，好得意～甜度適中，茶底個香料味都幾重，入口順滑，幾鐘意。肉骨茶方面，其實我係第一次食，所以冇得比較。藥材味幾香，但又唔會重到令人難以入口，一字骨煲到好軟熟，唔會痴骨～另外仲食咗蝦麵，都唔錯，但冇咩記憶點。深水埗分店好似好味啲，不過旺角呢間就坐得舒服，冇咁逼，地點都方便好多。…Read More

平時食糖水，甚少淨係叫湯圓，不過既然嚟到做湯圓咁出色嘅福元湯圓，決定食個湯圓下午茶～一碗五粒湯圓，三粒芝麻，兩粒花生，全部大大粒，逼爆成隻碗！因為皮夠薄，而且餡料足，一舀起時，湯圓軟糯得震下震下，好治癒。一咬，餡料多得流出嚟，味道香濃唔會好甜，不過因為太飽滿關係，食完五粒有啲滯⋯⋯好彩糖水底超薑，辛辣暖胃，襯湯圓最perfect。店舖小小得只能放得落兩張枱，裝修簡單，不過出品佳，實而不華，仲可以買生湯圓返去煲，老字號確實名不虚傳。…Read More