胖鯨's Profile

係「家嫂」好壞參半嘅情況下決定一試，真心明白點解當晚只有半數客人。先講下有咩選擇，分享有A餐 同B餐)，A餐有多款海鮮（一次性）、刺身（一次性）、靚牛，任飲紅白酒啤酒🍻，紅白酒質素差都預左，啤酒得一款但係日本貨。未齊人可以食下小食頂肚，不得不讚小食質素都幾高質，蝦多士、麻辣螺、魚皮都唔錯，小籠包就一夾就穿，人齊上刺身船，係大隻用黎打卡夠壯觀，質素都算合格。雞煲味道都唔錯，仲有雞腎片。見到火鍋料真係令人非常失望，有啲特別嘅食物，例如蘋果粟米、牛肝菌，但選擇極少，最離譜係啲牛肉嘅質素，同佳x差唔多，叫生菜、油麥菜，漏單，無叫芥菜但就黎左，油麥菜無影。飲品方面比集團式嘅好同環保，有5-6款健康飲品，款款都唔錯（少甜的），仲有少量汽水、咖啡，甜品得番薯糖水同三款雪條，服務員有禮，換碟倒骨都快，不過有時叫落單就係咁叫你等等。咁嘅價錢有更多更好嘅選擇。唯一可取係「無限時」，係一個食住傾計嘅好地方。提一提呢間訂枱要俾訂金。食到一半已經忍唔住要公開呢次經歷 ，等想食嘅朋友認真考慮值唔值得。我諗食B餐還好的。…Read More

朋友被IG$128一人火鍋廣告吸引，所以約埋一齊去試，上去就有點伏，個餐得四片肉左右，兩片薄粟米，兩款丸（各兩粒），豬紅（細粒仲要切片），兩粒冬菇少量娃娃菜，跟一細碗金邊粉或麵，包一杯青檸水/茶，泰式奶茶要加$8，湯底有三款選擇（冬蔭、椰子雞、船麵），整體黎講就真係唔抵，出去食碗粉都好過食佢。既然去到就睇下仲有咩可以叫散叫，好多嘢都標明售罄，想叫海南雞飯但揾均都無，但就可以單點海南雞同白/油飯，唔知係咩經營之道，泰式和牛炒飯、蝦醬通菜、泰式木瓜沙律（鹹）食物正常唔叫出色，但略嫌少貴。諗住環境靜，當晚都坐唔滿。本來對食物都一般。點知食出火黎，坐坐下突然一股涼風突襲，原來係啲員工出入無順手關好露台門，啲風就係咁吹入黎我地個位，食到應，提過啲員工，開頭都有留意下，每當感受到涼意就知有人無關門，已起身自己去閂，點知轉頭啲員工又閂淨一半，即時要求員工可唔可以留意返，我地係黎食飯，唔係黎食風，後尾啲員工先醒目。坐左成晚無人會主動加主加湯執枱，等緊甜品時終於有位男職員話執枱，點知執左少部分就走左，原來佢清其他枱，坦白講全都唔係多客，既然有心揾人出鱔稿就唔該攪返好啲服務啦，呢間餐廳真係可一不可再，無試過食完飯即刻寫食評。…Read More

係舊式屋邨裡面竟然潛藏住一間食物性價比高，環境好既餐廳。呢日同朋友一齊黎呢度食lunch兼慶生，可能係正屋邨樓下又較偏，所以午市時段唔多人。一行十幾人就去左呢度開餐。午餐價錢合理，白汁海鮮意粉都係收$78，有焗飯、All day breakfast、麵，選擇都唔少包飲品，有啲仲會包埋湯/沙律，餐飲轉特飲如Mocha之類都只係$8就飲到，加$22仲有埋甜品，食物份量好食足飲品又大杯，唯一唔好就係不收現金，只收電子支付。呢間餐廳有幾個貼心位，朋友同餐廳講我生日，佢地就係碟上寫埋字、點埋蠟燭仲主動幫手影相，當日實在太多人，所以職員都好好咁幫手調動啲座位，提出射燈晒住對眼，又主動即時幫手調整，服務真係好好。呢度除左係一個食飯既好地方，原來仲有得唱K，朋友預先訂左，雖然地方唔大，但房間設計不俗，早一日仲update啲新歌俾我地唱，真係好貼心。一小時$300，但只要book K房之餘又同時用餐，可以即時在餐費扣減$100，幾個人除返開，計落都唔算貴。呢度仲無限時任你坐，好適合傾計食飯。目測假日中午都唔多人，希望呢啲咁高質既餐廳仍然有生存空間。下次再去要試All day breakfast，真心好大份。…Read More

見網上推介好似幾好加上見Openrice唔少好評，決定同朋友一試午市。一去到見到無人心諗唔通係伏，訂左枱就照入去試下啦，揀左個$328餐有78折。首先送盤少少地嘅肉你地食先，等你可以慢慢點，點知一夾，「頂」隻碟同d肉係黐住，好明顯係成隻碟放入雪櫃一齊雪而有嘅效果啦（都唔知係咪前一晚淨落隨手放返雪櫃）。第一盤咁之後都唔敢有任何期望。跟住上黎嘅肉睇落有d雪花應該唔錯啦，但點知又係一般貨色，最厲害係全部肉都好似未解凍咁，d豬腸硬到好似冰，任何味噌味嘅食物都其實將一pat醬放肉上面就係，前菜正常（因為係來貨），其他肉色似漢xx嗰類，生菜都係街市貨色，小食反而還好，整體黎講咁嘅價錢中午有更多好選擇囉。唯一要讚嘅係原本限時120分鐘，但我地坐到16:00都無趕客，可能係因為全個晏畫只得三枱客。總括黎講無下次，埋單之後朋友就要求我一定要寫食評，將個最真實嘅情況話俾人知，完。…Read More

朋友上網見到呢間好似幾唔錯，成日賣廣告，見都有好多like所以一試。被安排坐門口，冷氣吹到應一應，同d職員講佢地都好友善咁調高左，點左芝士吞拿魚天使麵凍mocha，5分鐘左右就送到😲，心諗咁快應該都唔好咁高期望，果然味道真係好一般，料都算多，但份量普通男生唔夠飽，杯mocha十分一般，唔full都會任人坐，最差就係走左之後發現成身油煙味，應該係坐門口近廚房關係，抽氣差，間中廚房煮嘢d味會飄出黎，奉勸大家訂座要小心，可能係咁所以嗰個位勁大冷氣😒，總括黎講唔會回頭…Read More

想食西餐，係OP搜尋下發現呢間食店評語不錯，又坐落旺角很方便，於是就同朋友一探虛實係咪如食評所言咁有質素。由訂枱到用餐店員服務很好，有禮。食物質素很好，朋友的鵝肝漢堡及Rib份量很足，可惜餐廳的刀比較鈍，要花點時間才可將羊扒切開，配菜很少，味道一般，若然是男生應該不夠食。飲品方面，沙冰很差以糖漿製作，以$52一杯來說著實不值，當冰開始溶化會看到一大舊冰，可想而知沙冰沒有做到碎冰的效果。反而朋友很欣賞那壺玫瑰蜂蜜茶。可惜用餐限時90分鐘，根本難以使用餐廳的boardgame。總括來說是值得再去的，亦是一間不錯的餐廳，下雨天仍然有人冒雨等候，可想而知質素真的不俗。提一提這裡只收現金。…Read More

朋友生日想食韓燒，上網見呢間食評不俗就一於試下。用openrice訂位真係好方便，當日6:45到達，全場半滿，好快安排入座。餐廳侍應服務很好，添生菜同接單好快，又會見你塊鐵板燶左就會自動換，一晚就換左幾次。任食兩小時，食物上得快，種類其實唔算多，但質素都唔錯，海鮮餅好食。呢度好環保，落單係用一張張可以抹重用嘅卡，減少浪費紙張，值得一讚。餐廳可能要留意，當日地面有一點黏黏的感覺，可能倒瀉了沒有處理。…Read More

約埋朋友一齊慶生，揀咗呢間日式店舖。由於有朋友生日所以想俾個驚喜佢地。預先拎個蛋糕去舖頭，點知撞啱佢地落場，唯有即刻打電話睇下有無人，過咗一陣有個人黎開門，問係咪我打緊電話，我話唔好意思阻住你地休息，佢好好咁話唔緊要仲叫我入去話知我今間晚會黎食飯。夜晚去到，可能知我地會慶祝生日，就俾咗間房我地坐，仲好熱情招呼同添水，服務真係好好。當大家唔知點揀魚生飯，佢好樂意咁講邊款最受歡迎，入面有咩食材，最後大部分人就揀咗佢介紹嘅特上魚生飯，有九種食材，真係好豐富。食完飯咁上下諗住叫佢幫忙攞個蛋糕，點知佢話等佢上咗個甜品之後就上，真係好貼心，個柚子雪葩真係幾好食。又主動問我地要唔要影相，成餐飯食得好開心。呢間小店嘅食物質素都唔錯，價錢合理，應該係同區內最經濟嘅。呢度仲免切餅費，會提供餐具及刀，真係一條龍服務，咁好服務梗係要俾人知。共用洗手間衞生唔太好，有部分水龍頭壞咗仲未維修。…Read More

見到新開張同食評幾好，就同一班朋友黎試下先。朋友早幾日訂位，後尾臨時加人，個人就話俾卡位我地唔駛改。咁大家高高興興諗住一齊試新嘢，訂咗6:30，有朋友遲少少到，諗住遲少少攞枱，因為入座後計兩小時。點知只係過咗3分鐘，就有位男士(疑似經理)走黎話夠鐘要入座，唔入都要照計時，咁唯有食住等。聽到門口位姐姐話俾兩個爐，點知帶位嘅大姐(短髮略肥)帶我地去一張長枱，有6個位，諗住坐底佢就話呢邊4個位，中間係2人位，我話6位喎佢話加櫈俾我地，我話一張四人枱座6個人點坐，佢就走去同嗰位男士講，返黎話好啦俾埋你地坐，咁都諗住算。點知佢話都係一個爐同加櫈，呢個時候好在朋友講話訂枱時話俾卡位我地，我就直接同個男人講訂位話坐卡位點解依家位。當時個場得兩成入座，眼見大把卡位，唔知想留俾邊個坐。最後佢好悔氣話俾X號枱佢地。其實撇除服務，食物大致上係正常，雪糕、飲品種類都幾多，海鮮新鮮、肉類無漏單。已經係半自助形式，收加一服務費但無服務可言，咁只係變相調高收費。順帶一提，呢度真係好準時，見你地夠鐘仲未走會有人黑住面(男士)黎同你地夠鐘架嘞。作為飲食業咁嘅態度及服務只會係趕客，公司真係要好好考慮再培訓一下員工服務。樓下派傳單吸客，樓上就黑面趕客。…Read More

昔日仙跡岩既飲品類是非常好飲，所以早前購買團購優惠，誰不知中伏了。之前已換咗一杯雙層朱古力，味道跟以前差太遠。今日再換一杯芝麻珍珠，更加令人失望，無奶味，茶味，得芝麻味，小甜變走甜，好似飲水咁，葵涌廣場嗰D俾佢好好多。加上舖入面有個中年肥佬，每次去換都態度差，好似我係無俾錢咁，雖然有優惠，但我都係消費者，唔該佢檢討下，服務差，飲品差，若不改善品質，恐怕遲早結業。若要自持高檔，就唔好學人做團購。奉勸大家唔好幫襯，附近有更好既選擇。…Read More

尋日唸住好耐無買呢度既奶茶唸住買返杯珍珠奶茶黎飲，同個四眼男職員(成日負責收銀o個個)講少甜走冰，點知杯野到手後竟然係少冰，都已經唔係第一次，上次同佢講俾錯，自己聽錯仲好惡咁話你講錯，佢就黑晒口面咁整過杯，唔該呢位員工檢討吓啦。少冰都有成兩吋高，咁唔知佢地唔少冰會係點？加價唔在講，但唔該你質素都要保持先得架，以前只係會係呢度買奶茶，睇怕我以後都好難再幫襯，除非佢地改善佢地既沖調方法呢，杯野淡到好似飲緊奶溝水，一D茶味都無，飲飲下仲發現有舊幾硬既野疑似係未融既奶精，佢地咁做野法，唉....歇腳亭請埋D 咁廢既員工幫公司趕客，唔知係唔係想聽執。…Read More

一心諗住同家人慶祝生日，食厭咗金滿庭滿以為泉章居應該都唔錯，決定去試一試，點知決定錯誤~六個人叫了一個六人餐 $498一隻霸王雞：d葱鹹到飛起，d雞又肥又鹹，真係唔明點做招牌菜梅菜扣肉：非常普通，不過梅菜唔鹹，都ok西檸芝麻蝦：d粉好似唔熟，仲衰過西檸雞，d蝦又細又小，唔值得食油浸筍壳魚：即係炸魚，之後淋上蒸魚豉油，都ok好食，但略嫌細條蟹肉西蘭花：普通，西蘭花有d苦添叫了一枝喜力$20(特價) + 5個白飯(@$8)，茶介(@$10)連+1，總共$649，呢個價有更多更好既選擇，以後都唔會幫襯，服務都算唔錯，換碟同加水都ok，不過d碗竟然有漬。早知就食翻金滿庭仲好過。…Read More