天野海月's Profile

香港人除咗生活急促，生態仲好獨特，例如鐘意冬天食雪榚、夏天打邊爐，突然挑起條筋想試下「如何大熱天時打邊爐」。不過人大咗，相對起「任食」，「質素」更形重要，記起大角咀有間「靚煲皇」，搬鋪後一次都未去過，於是就約埋男公關再次出征。成年無嚟過，由樓上鋪搬去對面街樓的地鋪，雖然Size好似差唔多，不過裝修同座位都大有進步，由平民化升級感覺更高檔。檯凳新束束之剩，亦有椅背，坐都坐得舒服啲。冷氣通風都唔錯，雖然夏天，有冷氣打邊爐無難度，而且食完唔會個身一陣「邊爐味」。仲有細檯仔同籃用嚟放袋用，相當貼心。特別要讚嘅係除咗有電視，仲有Wifi同USB差電口，慢慢一邊打爐，一邊打手機Game長期作戰無難度！一埋位阿姐就送上前菜，花生瞬間掃清，但酸瓜對好多人嚟講就真係太酸，幾乎無乜食過。除咗前菜，阿姐亦會遞上醬料Box，方便客人依個人口味「混醬」。邊爐湯底有好多種，除咗平時嗰啲「沙嗲」、「皮蛋芫荽」等，仲有「冬陰功」、「豬骨煲」、「花膠海參雞」等多種特色湯底。亦有少量鑊氣小炒，不過打得邊爐就唔叫Lu。靚煲皇 $238雖然想叫「花膠海參雞湯」，不過因為有朋友唔食花膠，最後都係要「靚煲皇」。本身就係胡椒豬骨煲做底，上面鋪上多隻大扇貝、魚乾、魷魚乾，光睇到都興奮！打邊爐前梗係要試下頭啖湯，豬骨入味香淋，而且肉同軟骨勁多，真係啖啖骨膠原！湯頭絕對要讚，入口除咗濃濃嘅豬骨味，仲有淡淡嘅海鮮鮮味，加上微微嘅胡椒香辣，真係一飲就停唔到口！嗰一刻我曾經諗過「不如剩係飲湯飽算」。順帶一提店員姐姐好好人，因為唔知湯底入面有栗米同蘿蔔，原本有落到，姐姐見到後特登走過嚟同我哋講入面有，問要唔要取消，好貼心。桂花蚌 $108每次打邊爐必叫，幾新鮮，淥幾秒爽口微甜。雪花肥牛 $68開頭我以為會嚟啲酒樓未融雪一大舊勁薄嗰啲，所以好驚喜，好有肉香，雖然油脂多，肉質都較韌，不過好有咬口，意外地正！手切肥牛 $178特登叫多款較貴嘅牛肉感受一下分別，因為手切所以每塊都好薄，而且油脂明顯上面個款少得多，牛味亦較重。等級，係食得出嘅。手打墨魚滑 $98黏性幾高，淥完後都好彈牙，不過唔知係師傅調味重口咗，定湯底濃，食落略咸同重胡椒味。手打墨魚丸 $78意外叫錯（明明應該叫四寶，到底班FD有幾鐘意墨魚？），雖然同樣係墨魚，但同「滑」又唔同滋味。質感實淨非常，彈性十足，唔鬆散，而且吃到墨魚粒，單係呢點經已加咗唔少分。包心芝士丸 $48皮雖然厚，但好彈有咬口，亦因為厚皮，內涵嘅芝士剛好受熱融化而唔會漏出。成粒放入口唔覺熱，但一咬芝心立即激射而出。無錯，我呢下就灼親喉嚨。蟹籽包心丸 $48整體同芝士丸差唔多，都比出面食嘅好味。豆卜 $38無乜特別值得彈，不過質素的確係比一般食肆好，吸收埋湯嘅精華真係不得鳥！白鱔片 $78家下物價咁貴，$78蚊食到大條白鱔片，而且新鮮得嚟份量都幾足，我心足鳥。不過如果切厚少少口感會更正，始終食鱔都係鐘意種煙韌咬口。黃沙豬潤 $32雖然睇落好新鮮（事實的確都係好新鮮），不過可惜味道無想像中咁鮮甜。不過要讚每塊豬潤都吉咗些少針洞，方便淥個時睇到有無血水出，唔會咁易Overcook。娃娃菜 $28新鮮，不過相對就咁食，佢嘅煲湯作用更大。唐生菜 $28一睇就知有幾新鮮，而且本身味濃，相對娃娃菜我更鐘意呢種。炸鮮魚皮同出面一包包即開即食嗰啲好唔同，用鮮鯇魚腩皮即炸，外面金黃香脆，但脆卜卜下嘅魚皮仍然保持煙韌。而且咸咸地，就算唔淥齋送酒都好一流！烏東 $10Meun無寫係手打烏東，開頭以為會係cheapcheap酸味烏東，突然感覺到「果然唔係靚料唔上檯」。成個男公關部出戰點可以少得Asashi，價錢都係咁上下喇。最後店員姐姐仲送多份人頭綠茶小甜品，雖然係唔使錢，但味道又真係幾好食，結果係受同行全體一致讚同。…Read More

「添好運」算係香港點心界近年相當知名嘅一間，更獲「米芝蓮」評為一星級食肆，可惜咁多年都未曾去過，今次襯得閒終於約埋朋友一齊去較新嘅奧海城分店試下到底乜料子！雖然之前日日經過旺角分店，不過因為鋪頭太細每次都放棄去食，今次細鋪搬大鋪去咗奧海城終於的起心肝去試。奧海城裝修又新又靚，相比之前舊鋪真係華麗十倍，除咗檯凳新束束，而且檯同檯之間都有一定距離，坐得幾舒服。睇起嚟嘅冠冕堂皇下，仍舊保持著平民風格，就係一眾待應都Keep著大眾食堂時期嘅服務心──「唔會點理你」，你有你舉手，我有我同同事繼續嬉笑怒罵。基本上舉手10次，大概有人理嘅次數只有4次。酥皮焗叉燒包 $19先嚟個鋪頭推介嘅「酥皮焗叉燒包」，同平時食嘅麵包皮包嘅叉燒包口感好唔同，因為用麵包皮雖然會令包皮吸收到叉燒香味，但蒸太耐亦會令叉燒味道流失。反而用酥皮焗就可以保持叉燒肉汁鮮嫩。而且鬆化酥皮配上肉感叉燒，一啖兩種口感Mix埋真係正！鳳爪排骨飯 $27飲茶必食之一嘅鳳爪排骨飯，只用不鏽鋼而非瓦盅屬意料中事，因為即叫即蒸關係，所以飯身相對較硬，而且米香一般，排骨肉汁仲未可以流落飯到，只感受到些少油香。不過要讚下隻鳳爪，因為唔係長時間蒸著，除個個樣「靚仔」之外，骨肉分明唔似出面檔會一Pat屎咁，味道仲幾好！古法糯米雞 $28另一鋪頭推介之一，份量幾大隻，而且入面餡料幾多，就算係一個大男人食都絕對會滿足。加上雞件、花生等等都算幾新鮮，唔似其他鋪頭咁會覺得「霉」。韭王鮮蝦腸 $26今餐最失望嘅一樣點心，首先，說好的韭王呢？我一啲都見唔到，亦食唔到。其次腸粉皮滑度只屬一般，而且都一啲都唔算薄。米香？Sorry, I can't taste it. 最後蝦份量偏少，一條只有3隻，而且雖然唔「霉」，但絕對唔係最佳鮮度。香滑馬拉糕 $15雖然我平時唔太鐘意蒸包、糕點，但都覺得意外好食，幾有蛋香但又唔會太過，仲香滑唔嚡口，撳落去仲有回彈力！鮮蝦燒賣皇 $26幾好食但同腸粉一樣，蝦嘅鮮量未令我滿足。不過蝦量方面遠勝腸粉，至少我啖啖蝦。值得一讚嘅係面頭上嘅杞子，雖然蒸完一定唔「靚仔」，但少許清新感令成隻燒賣平衡感唔錯！賽螃蟹春卷 $24連我平時唔食春卷嘅都要大讚一下，外面炸到金黃香脆，仲要唔油膩，入面嘅賽螃蟹仲係保持香軟白滑，真心推薦！煎臘味蘿蔔榚 $15用上塊狀嘅蘿蔔，唔會太粉、太油，而且食得到蘿蔔嘅香甜味，算係中上水準。陳皮牛肉球 $17大粒、鮮嫩，最可惜嘅係「陳皮」，用咗唔靚嘅陳皮搞到有苦味，而且幾重，牛味幾乎完全被蓋過。鮮蝦菜苖餃 $25用上菜心苖味道鮮嫩，其實本身幾住家Feel，不過相對蝦肉，其實口感味道更似豬肉......另外食食下有幾強烈嘅胡椒辣味，奇怪感超絕UP！！！雖然好多人都話待應服務差乜乜乜，的確親身感受係「無乜服務」，但相對大酒樓$1x茶介，添好運收$3的確係好平。而且食物水準亦算高，又幾好坐（P.S.呢餐我坐咗4個鐘係到玩手機），整體嚟講算係無得輸。…Read More

閒來無事又上綢搵食，首先吸引到眼球嘅就係「比利常餐」呢個名，用「常餐」做鋪名嘅餐廳經已少見，再配上一個咁常見嘅西人名「比利」，就決定去一探你虛實。正值新年，街外自然少人，所以等位都唔使，不過餐廳檯與檯設計比較貼，舒適度只係一般。之前經已上網睇過餐廳最推薦嘅就係「焗豬扒飯」，雖然有$30下午茶版嘅「迷你焗豬扒飯」，不過為試下真正實力，梗係試翻$50原版。配餐附上餐飽及餐湯，餐飽無乜特別，至少一定唔係隔夜，而且有翻至微熱，算係咁㗎啦。反而雜菜湯有小驚喜，用料幾足，而且無乜味精感，湯料亦都幾好食。因為焗豬扒飯係即叫即整，所以食完前菜就差唔多出爐，算係值得一讚，至少我唔洗放個飯攤凍等我飲完個湯。講翻個焗飯，賣樣算係幾好，用咗炒飯底，雖然蛋份量較少，亦做唔到「金包銀」效果，不過都食得出蛋香味，可惜未夠乾身。鋪面嘅茄汁調味唔錯，唔會太酸、唔會太甜、亦唔會太咸，配上鮮茄同西芹、洋蔥幾好，混合無乜落鹽嘅炒飯恰到好處。另外加上芝士焗到微燶拉絲，而且份量幾多，令成個焗飯昇華。以$50嚟講，我會期望會有一塊較大較厚身嘅豬扒，可惜現實同我心目中仲有一段距離。雖然豬扒較薄身，做唔到原身嘅Juice感，不過調味方味唔錯，而且無Over cook，保持到鮮嫩唔韌，而且仲幫你切好一小塊，方便易食，算係一個小貼心。整體以$50食到一個有份量（食唒成份都幾飽下），好味又唔錯嘅焗豬，應該都無乜嘢好投訴啦。…Read More

因為冬天嘅關係，所以就好想食煲仔飯，自然就約埋三五朋友一齊去，不過朋友都唔知邊到好食，所以好自然就諗起廟街，二擇其一下就決定挑戰「興記」。因為鋪位多，一去到就可以入座，不過其實座位都幾逼。腐乳通菜炒鮮魷 ，通菜算嫩口無起渣，不過鮮魷就唔係太新鮮，無咩魷魚味，而且都幾水汪汪下。炸蠔餅 ，粉厚蠔細，蠔味亦無乜，而且應該唔係用鴨蛋所以蛋香無咁勁，品質一般。白鱔煲仔飯 ，份量跟價錢真係差得太遠，豉油唔太覺有調味，飯焦唔多，感覺就係整得唔夠時間，白鱔亦只屬一般。滑雞牛肉煲仔飯 ，兩者都有啲Overcook，不過調味還好，算勉強合格。太多太濃味好難唔叫嘢飲…Read More

難得紅日放假，梗係要約朋友見面，因為唔想行太遠所以就決定去從未試過嘅「caffè HABITŪ」。去到時值Lunch Time過後，所以唔係好多人（不過食完近下午餐時段走嗰時就好多人等），雖然得2個人，不過店員亦好好咁俾4人座位我哋。環境整潔而且自然光好足，所以令人覺得好光猛舒服。經典凱撒沙律 $68 ，沙律菜好新鮮，咬落去「爽爽」聲，而且醬汁份量同酸度好適中，食人好開胃。另外糖心蛋意外地好食，驚喜！可惜沙律面嘅煙肉就比較硬，略為失色。素菜千層麵 $98 ，賣相一流，雖然只係用素菜整成，不過因為有菇類，所以食落去依然好有咬口。加上醬汁調味唔錯，唔會過酸，而且麵皮嘅層次感做得好好，絕對要推薦！意國風味薄餅 $98 ，雖然只以三種素材（蕃茄、芝士、羅勒葉）整成，但有種令人意外嘅風味。蕃茄切得好薄，但唔會好乾身，而且蕃茄味算幾香濃。芝士味唔會太濃過搶，而羅勒葉令成個薄餅更Flash，加上薄批即叫即整脆bobo！玫瑰錫蘭奶茶 $39 ，味道香滑，帶點玫瑰香但唔會太搶，令人感受一下寫意人生。野莓喜冰樂 $42 ，即製嘅野莓沙冰，莓味幾濃，不過我本身唔太慣呢種莓味，所以初飲時有啲覺似藥水。…Read More

時值2月14情人節，雖然仲係孤家寡人，不過現充梗係唔會俾自己一個人過，咁就約朋友去食情人節大餐，因為好遲先搵地方，所以好多地方都Full Booking，偶然見到Baby Mushroom仲有位，而且套餐價錢唔算太貴，就快快手去落訂Book位。$388 情人套餐酥皮焗黑松露野菌忌廉湯 ，酥皮焗得幾脆，而且唔會厚身得好過份，湯非常足料杰身，味道濃鬱，預想以外地好。情人節特飲 ，另外加錢試嘅，因為餐前想飲啲嘢又唔想飲酒，就試吓呢款由唔同果汁混成嘅特飲，味道係幾特別，一開頭有少少唔慣，不過飲飲吓覺得都唔錯。意大利特式雜盤 ，由蕃茄多士、風乾火腿、沙樂美腸三樣小食組成。多士入口香脆，配上意式蕃茄沙津唔錯，不過沙律入面生洋蔥較多，一下咬中會覺得好辣口。沙樂美腸有少少梅，而風乾火腿亦比較咸，不過以咁嘅價錢我絕對會接受。香草牛油扒海鮮配意大利飯 ，海鮮配料雖然每種只一一、兩件，不過款色算多，而且剛剛好唔Overcook，意大利飯幾入味，水準OK。肝醬野菌焗牛柳 ，相比起意大利飯我比較欣賞呢個肉食，牛柳半生熟鮮味猶存，肝醬味道獨特，野菌味融入其中，配上牛柳幾夾，比較可惜牛柳份量唔多，食完仲想食啊！心心雙印 ，朱古力心太軟水準唔錯，不過另外個樣我真係食完仲未知係咩嚟sosad......…Read More

夜晚打完邊爐仲想有下場，一大班就決定去食糖水，懶得行太遠就決定試下未食過嘅海記。店鋪環境只係好一般，座位都比較殘舊，不過Menu睇落就唔錯，睇落有幾多特色少見嘅甜品。冰花燉蛋 $22 ，睇落好滑好正咁，係就係好滑，不過就完全唔正，成係燉蛋唔甜不特止，蛋味亦無乜，基本上就係無味。蕃薯糖水+湯丸 $27 ，原本以為蕃薯糖水會落薑，點知原來無，蕃薯味亦唔太夠，整體甜度不足。湯丸係芝麻餡，都係一般貨色。芝麻糊+湯丸 $27，原本以為會係花生湯丸，點知都係芝麻湯丸，喊出嚟變咗雙重芝麻糊，味道都係好一般。開心果糊 $26 ，味道最足嘅一款，淡淡係濃濃唒開心果香，感覺好足料，而且真係未見過呢味甜品，感覺好新鮮。…Read More

朋友很喜歡抹茶，所以就陪佢嚟呢間以「抹茶」做賣點嘅餐廳。咖喱吉列魚柳石鍋丼 ，朋友叫嘅主食，不過味道一般，而且完全感受唔到有咖喱味。地獄泡菜豚肉湯烏冬 ，我叫嘅主食，原本以為係石鍋上，完全有負地獄之名，完全唔覺得辣，而且只係放少少碎泡菜入湯，同韓式料理有別。豚肉唔算太老，不過無調味過，還好烏冬都係急凍手打系列。溫泉蛋豚肉石鍋丼 ，另一位朋友點嘅主食，我諗應該係成餐飯最好食嘅一樣嘢，溫泉蛋味道唔錯，撈飯後滿滿嘅蛋甜香，不過相比其他餐廳都係稱唔上好好食。宇治紅豆抹茶卷蛋 ，抹茶好一般，甚至大型連鎖西餅店都比呢件好食......北海道抹茶牛乳雪糕 ，無咩抹茶味，完！抹茶芭菲 ，抹茶雪榚味道唔濃鬱，而且下面嘅配料都唔太好食，特別係粟子，FAIL。咖啡 ，意外地好味，有「中產咖啡」嘅水準。…Read More

難得兄妹聚，雖然只係大埔，但梗係要搵下好嘢食，所以就去大埔中嘅名店「蕃滿門」。嚟得蕃滿門，緊係要食下特式蕃茄滑蛋濃湯餐，有唔同主菜可揀，要蕃茄滑蛋濃湯可麵可粉，選擇眾多，而且可以揀辣唔辣。香酥雞扒 $42 ，味道好夠，除咗腌料外都有幾香雞味，炸得香酥可口，唔會有太多炸粉，正！脆皮咸豬手 $42 ，好多朋友推薦嘅主菜，豬手焗得皮脆金黃色，皮脂肪大部份已經被焗走咗，剩低既外皮口感香脆煙韌，而入面反而啖啖肉，意外好食！蕃茄湯長意粉嘛，炒蛋滑嫩，湯底有濃鬱蕃茄香，而且無味精感覺，保持一貫高水準。…Read More

呢幾日咁凍，最適合就係食煲仔飯，不過往咗係大埔十幾年，始終一次陳漢記都未食過，無理由出去廟街食過屎都唔翻自已地頭嘗正嘢，所以就約朋友來一戰！一去到大排長龍，朋友大約等咗15分鐘就入得，不過我遲到未去到，平時係要齊人先入得。入到去我就拿拿聲先點個煲仔飯先，因為係即叫就排隊整，好彩我哋早點，因為食食下旁邊有新客想點要成9-10個字先上得。朋友經已點好咗一份，好彩啊姐幾好招呼，煲仔飯款色花多眼亂。陳漢記另一招牌就係腸粉，咁就緊係要試下，款色數量還好，最少見應該係豬潤腸。牛肉腸粉 $17 ，朋友見我未到先點嘅，剛好我到就上台。皮的確幾薄，不過滑度一般，無咩米味。而且牛肉無乜牛肉味，食落有啲免治牛肉感，食完好似無食過咁無咩感覺。滑雞肉片煲仔飯 $45 ，朋友叫嘅飯，雞件、肉片數量意外地多，而且好鮮嫩，米飯夠乾身，有燒飯嘅香味，飯焦最都幾多，正！落豉油時仲會鐵板咁滋滋聲，唔會太咸唔會太甜，味道剛好。排骨臘味煲仔飯 $50 ，我點嘅，相比之前滑雞飯嘅「煲仔飯」，呢個倒有少少似「盅頭飯」，因為米飯唔夠乾身，甚至最中心部份有啲爛飯嘅感覺。初期以為係整得唔夠時間，不過發現應該係臘味出嘅大量油份，令佢收唔到水。雖然無咗煲仔飯嘅乾身感同燒飯香味，不過換嚟嘅係好重嘅油香味，飯都吸收哂臘味嘅香味，比較可惜嘅係件臘肉真係好硬身同咸，臘腸唔錯，而潤腸就較遜色。排骨都係鮮嫩，無嘢好挑剔。豬潤腸粉 $21 ，後加嘅食物，因為話哂都係招牌之一，點都要試下，一試的確比牛肉腸好味得多，但好突出我又覺得講唔上。因為塊臘肉，最後都係忍唔著要支可樂，爽！…Read More

雖則「放題」、「任食」對現代人嚟講係非常吸引，不過人越大，胃就越嚟越細，所以對食物要求就越嚟越高。冬、春天氣凍凍哋點少得一班朋友打邊爐，而靚煲皇絕對係打邊爐平靚正不二之選。地下有露天位，樓上有室內冷氣位，就算打風落雨都可以食得舒舒服服。一坐低啊姐就會先送上 1 set 調味品，客人可自行挑選所需。靚煲皇其中一大特式就係極多湯底選擇，單單係豬骨煲就經已有好幾種，例如澳門豬骨煲、胡椒豬骨煲、日式麻辣豬骨煲、花膠海蔘豬骨煲、海鮮豬骨煲等等，亦都有花膠藥善煲、花膠海參雞煲一啲比較少見嘅湯底。澳門豬骨煲 例牌 $128 ，湯底非常足料，未落嘢食經已好多嘢食，包括豬筒骨、豬軟骨、紅蘿白、白蘿白、粟米同大蔥，本身想叫碟白蘿白，不過啊姐提醒我哋個煲入面經已有，好貼心！豬筒骨有勁多骨膠原，幾受女士歡迎。靚煲皇另一特式就係「料靚」，基本上每樣都好新鮮，同任食邊爐無得比，而且計落都只係貴任食邊爐少少，真係一試就翻唔到轉頭！手打魚滑 $38 ，味道鮮甜，不過略嫌打得唔夠起膠。手切肥牛 $138 ，第3貴嘅牛肉，雖然係貴啲，不過絕對物有所值，又係一食翻唔到轉頭。脆鯇片 $38 ，新鮮不過唔算太特出。魚雲 $38 ，識食魚一定會食，不過食嗰時就比較麻煩。珊瑚蚌 $58 ，每次嚟靚煲皇都要叫，非常鮮甜爽口！白鱔片 $58 ，幾款魚入面就呢款最好食，叫完再叫！白菜仔 $20 ，細細棵，鮮甜唔起渣，打邊爐一流。黃沙豬潤 $28 ，感覺幾新鮮，爽口，就算唔食內藏嘅朋友都讚。什菜 $28 ，咩菜都有啲，人人唔使爭。…Read More

因為替家人慶祝，決定近近哋喺大埔食日本菜，雖然首選一定係「八鯨料理」，不過位少又比較逼，所以最後都係決定去「富山」。好耐無嚟過，食物質素仍舊中上，不過上菜次序全無，雖然我唔知點先係正宗，但點都唔會個炒飯最先上，刺身、壽司遲嚟。鰻魚炒飯 ，飯嘅份量還好，但鰻魚份量就少得可怜，心諗有無搞錯，成5x-6x蚊都可以少成咁，如果唔係兩老鐘意食鰻魚炒飯真心無下次。味道尚算唔錯，飯炒很粒粒均勻，唔算太油。八式刺身 ，太遲上，食過熟食有損刺身口感，不過份量算多，而且無樣都幾新鮮，CP值幾高。不過一班師傅真係要練快啲手腳。壽司方面魚生同飯比例唔錯，不過飯醋香味略嫌不足，用料尚算新鮮。另外，火炙壽司殘留煤氣味好勁，食落好怪。 …Read More

嚟到Oliver's Super Sandwiches，識食一定係食三文治，可惜我就係第一次嚟唔識食，所以今次就揀錯哂嘢食。因為比較餓，所以今次我試嘅係Super Combo，即係餐跟飲品再加湯。泰式蝦餅+肉醬扁意粉+沙律菜 $70肉醬扁意粉 ，蕃茄同肉醬比例嘅剛好，不過略為濃味，肉醬意粉算係餐廳安定度高嘅食物，唔會突然爆好食，都唔會特別難食，新意就無乜㗎啦。泰式蝦餅 ，一上臺時經已好快手咁食，點知一食經已係非一般嘅凍冰冰，連一啲暖意都無，睇怕真係放咗好耐。味道其實唔太食得出，因為經已又乾又硬，配西餐又唔係咁夾。沙律菜都係一般貨仔，不過沙律真係勁酸，要完全迴避先入得口。雜菜湯 ，幾多料，有通粉、西芹、蕃茄、洋蔥等，不過就係比較油。檸檬茶 ，檸檬唔係切片放入茶到，而係成件檸檬掛杯邊，完全令人摸不著頭腦，一係就篤唔到，一係用手加又唔夠檸檬味，玩死人咩？蘇格蘭煙三文魚蜆肉扁意粉配刁草忌廉汁 ，醬汁味道淡而無味，而且三文魚、蜆肉極少，有眼睇。咖啡 ，一般貨色。…Read More

因為有事要去佐敦，又突然想食壽司，就約朋友去試呢間日式小店。鋪面其實幾細，大約容納到20-30個客人左右，不過總算乾淨企理，用嘅餐具都幾新淨幾和風，比人嘅印象唔錯。餐牌以Set為主，齋係Lunch Set就差唔多有成30個唔同嘅選擇，幾多變化。而且仲免收加一，剩係呢樣都經已平過其他日式食店。壽司定食 $68 ，有6款唔同嘅壽司，再加一碗細烏東，睇價錢算幾平。6款壽司用料幾新鮮，咁嘅價錢有咩嘅貨仔，性價比絕對贏哂，帶子都算大隻、鮮甜，無咩雪味。甜蝦雖然無刺身級咁大，但都唔係平時細細隻啲cheap cheap貨，甜蛋味道亦唔錯。加洲反卷意外地係用炸蝦做餡，無因為價錢平而用蟹柳，認真抵讚。不過壽司飯係比平時店鋪細舊，而且醋味略嫌唔夠，如果係大食嘅男士就可能會唔夠喉。跟餐嘅細稻庭湯烏東，雖然話「細」，不過size絕對唔係會呃人咁真係得一細碗，而且用嘅係木魚湯底，甜得嚟唔會口乾，真心幾好食！…Read More

行街行到攰就想搵地方坐下，見就近有間「滿記甜品」，好自然咁就入咗去，好幾年前讀書時有幸去西貢本店食過一次算唔錯，可惜多年後一出名，越開越多分店再試反而覺得比其他細鋪更不外如是，不過水準還算是合格以上。Menu入面都係啲好基本嘅甜品，無咩特別嘢or新花款，不過勝在環境乾淨。西瓜冰 $23 ，雖然經已過咗夏天嘅西瓜期，不過滿記入嘅貨仍然唔差，有好香甜嘅西瓜味，而且唔會全部打成汁，有啲果肉增加咬口，唔錯！楊枝甘露+綠茶雪榚 $39 ，滿記嘅楊枝甘露自然唔會差得去邊，不過雪榚就比較一般。…Read More