kcbanana的個人專頁

Book 咗298任食澳洲和牛，去前都諗下會唔會量少出單慢，控制客人食量。但轉頭又諗佢講得出週年優惠，市道又咁差，應該唔會做埋啲旁門左道嘢卦？咁諗就天真無邪了，坐低落單後不但出菜要三催四請，上碟嘅牛肉絕對圖文不符。啲牛肉唔係如佢宣傳嘅圖片咁一字排開，精神飽滿，而係每人一小片，一小片死氣沈沈咁上，下圖已經係三人份量，點會食得飽？食唔飽唯有再叫，於是又要等，等好耐先上，食完梗係又唔飽，於是又叫，今次出殺手鐧，直頭漏單，一小片都冇，到你催迫佢，佢就話過咗last order lu 。至於味道⋯⋯你對呢間嘢嘅食物仲有期待咩？自毀長城，又一例證！…查看更多

呢間嘢話米芝連喎，裝修好嘢咁喎，見入面冇乜人就中入去啦，坐低用qrcode 點餐，ok，新常態冇乜所謂，點知點點下傳嚟講笑聲，原來係班侍開心些牙，可能唔使中幫啲客落單好得閒卦！作為打公仔，本人非常羨慕🥹呢個自由嘅工作環境！點咗個青咖喱，船麵。咖喱好一般，收成一百蚊，頂多值60。船麵先經典，筷子🥢一夾起，係一大舊金邊粉，攬到實一實，永不分離！搞咗好耐都仲咁黐纏，惟有叫部長換過，仲加咗句，碗麵係小辣。換過之後，金邊粉終於分開哂，但就辣到飛起，完全係地獄級辣🌶️🌶️🌶️大佬你玩嘢咩，明明張單寫小辣，你一係就唔辣，一係就超級辣，再向部長表明碗麵辣到食唔落，不過唔使換勒，你點估所謂嘅米芝蓮嘅廚師下次點煮法？😳結果成碗嘢放返響度，發呆之際，遠處又傳來笑聲，原來又係啲員工三五知己，理鬼得你。但係其他做嘢嘅伙計就不苟言笑（千祈唔好話黑口黑面呀），碟嘢啪一聲放低就走，做嘢認真專業到呢，仲要全程企響你後面監察你食嘢，真係有心！臨走問企咗5分鐘冇郁過軍訓都冇咁專業嘅果位女侍應，響位畀錢定出去畀，佢木冇表情隨手一指，答咗你啦，態度冇得頂呀🙏🏻🙏🏻🙏🏻攞張單望望，茶位收10蚊，連加一報務費，果然係米芝蓮級享受😎既然話到裝修似泰國🇹🇭食物又米芝蓮，建議去多啲，留港消費啦，仲使乜去泰國返深圳呢！…查看更多

牧羊少年都開咗好耐，分店又開咗好多，但真心冇乜特色，除咗個名。下晝見唔使等位，中咗入去，聽到個侍應話用餐時間105分鐘真係笑咗，兩個鐘畀多你，個半鐘又畀客話小家，於是較定一個鐘零四十五分鐘，呢個少年識計數呀！叫咗兩款嘢，一個咖喱乜乜紅燒茄子加菠蘿🍍紅米飯🍚，味道真係好一般，食完之後仲有啲唔對路⋯⋯好似唔覺有食到條燒茄子🍆，究竟響邊？於是問侍應哥哥，佢話響碗咖喱裏面喎？犀利，條嘢煮到融入咗響啲咖喱入面，食咗都唔多覺呀！另一款就係行貨嘅雞蛋夾麵包加塊牛油果同三文魚，味道大路嘢，收你連加一成舊水，伴碟沙律菜都冇條，賣相都欠奉🙄牧羊少年呀，你都開咗成十年有多，大個仔啦，搞好啲嘢食先啦！…查看更多

雖然冇食過一百碗唔同嘅拉麵，但脷尖上嘅味蕾都仲分得開乜嘢叫好食同唔好食，Maki 拉麵耐唔耐都會幫襯下，佢地款式唔多但用料同味道一流。佢地嘅麵比較幼同白，唔似一般日本拉麵，反而畀到新鮮感，叉燒肉質有口感，流心蛋同大大塊紫菜都一啲唔馬虎，個湯底做得好好，淺嚐一兩口後都唔覺口渴。另外啲小食都有水準，推薦煎餃，饀料加入軟骨，增加咬口，唔錯。價錢在同區稍貴，但小店用心烹調，亦算值回票價。…查看更多

叫咗個雜錦鍋烏冬，買相真係有極大「驚喜」，食落仲好震驚，所有材料都非常薄，連蟹柳都可以得半條，廚師嘅刀工真係出色，配埋啲唔湯唔水嘅湯水，真係食多兩碗都唔會口渴，如果仲敢叫多兩碗嘅話，決定用咗放低筷子唔食呢碗嘢嘅時間，寫咗上面呢段食後感，多謝呢間店提供話題呀！…查看更多

新開張韓國炸雞店話響高麗好出名，於是慕名而至，點知中伏。叫咗兩款雞，上枱其中一款竟然唔熱，咬落去乾爭爭一啲汁都冇，另一款稍好，都係拜粟米粉所賜，最伏係杯梳打，賣相差味道仲差，似飲咳水！可能怕我熱氣卦！埋單三舊幾水唔知食咗乜，比較上嚟，反而同係韓國，G字頭炸雞好食好多！…查看更多

星期五晚搵到位冇睇食評就中入去，結果中伏。兩個人叫咗個原價6百幾嘅套餐，聲稱八折499，落單果時話飲嘢後上，竟然話要落埋，咁我企硬唔落住係咪冇得飲？主菜海南雞真係好一般，肉唔滑，份量少，冇雞味，賣相仲一般，扒咗兩啖飯，黃油飯唔香，應該分唔到兩碗。總之，呢個價香港大把海南雞飯店好食過佢地，最頂唔順係佢地為咗翻枱快，竟然只得一個鐘食飯，想邊食邊講可能已經夠鐘，話口未完伙記已遞張單畀你，咁嘅服務仲要收每位10蚊茶錢，埋單勉強三餸一湯連飲品差唔多收成六舊水，坦白講，咁嘅價錢新城市大把選擇，使乜幫襯你？離開時望見門口個車呔人，米芝連加特又如何？食一次都嫌多。…查看更多

中午商場川流不息，間間食肆都擠滿人，唯獨呢間唔使等，此情此境，經驗話我知好易中伏，結果又證明多一次！叫碟青咖喱雞飯，鹹而不香，雪藏雞柳冇骨落地唔在講，連配料都欠奉。冬蔭公湯底就得個鹹字；豬扒則霉霉地，最離譜杯每日特飲，唔寫明係乜，任佢酙乜要飲乜，只分冷熱飲，結果杯嘢有啲似酸梅湯，又似八香果，或者係兩溝卦，咁點解唔寫明送乜？有啲取巧，成70蚊仲要加一畀啲咁嘅嘢人食？再望望隔離枱一家人叫咗成枱食物，仲有伙記殷勤招呼，原來係熟人！明白哂！見微知著，從佢地親疏有別嘅「另類」服務模式，就知佢地點樣經營了。…查看更多

下午茶2:30叫咗個雞扒漢堡加杯咖啡，見到上枱個賣相已涼了半截，個包又扁又乾，最弊一咬落去塊雞扒係凍嘅！！！點可能？就算一早煎好備用，都麻煩你放入微波爐叮一叮吧？杯咖啡都係凍的！88蚊仲要加一，埋單成舊水，質素竟不如茶餐廳！至於點解有咁多白衣人着到侍應咁但又唔係招呼僱客、背景歌曲大過人聲，呢啲都唔去深究了。…查看更多

間歇幫襯佳佳已有數年，以往一直以薑汁湯圓稱道，惟近日再臨光顧，味道已今非昔比，那薑湯既渾濁且肻甜，並夾雜蕃薯碎，須知薑湯要清澈及帶微辣，伴着湯圓才好吃，乃一碗湯圓之精華，與又㘣又香的湯圓相得益彰。可是，今之佳佳竟以蕃薯湯水取代清甜帶辣的薑湯，相當失望。更甚者，如此配合，竟令一貫受眾人青睞的湯圓，變得平平無奇，可惜啊！…查看更多

呢間好似係文青經常去嘅cafe喎，我唔係姓魏，又唔識字，當然唔文又唔青，咁啱經過咪同朋友見識下囉。響出面等位時，店員文青妹妹已遞上餐牌，全部係手沖咖啡雞腸文。等咗一陣有位lu，文青姐姐又係遞果張餐牌，我地以為得呢啲好嘢，叫咗幾杯，有熱有凍，只見果位作藝術家打扮嘅咖啡師，響疫情下仲好投入好專注咁搞緊杯咖啡，勁呀，佢眼神之虔誠，態度之專注，直達忘我境界，仲忘我到唔記得戴口罩添😷等咗唔係好耐，15分鐘左右啦，用隻手沖嘅咖啡端上嚟。嘩，正喎！杯手調咖啡嘅味道拍得住廿四味呀😎，苦中帶酸，酸中帶澀，簡直指甲都留香呀，可能朋友唔慣呢種高級味覺享受，想要啲糖中和下，比師父一口拒絕，我地唔提供的！朋友唔知訂，呢杯直頭係藝術品，千祈唔好搞wo佢！我地仲叫咗兩件cake，賣相真係好盞鬼播，抹茶嘅綠出奇咁綠，上面pat 紅豆又紅過口紅，成件藝術品咁供奉畀客人，我地唔可以大啖食，要小小地放入口㗎，唔尊重藝術好大罪㗎。至於好唔好味？梗係好味，唔好味畀人話冇taste 呀！🥱後來睇反呢度評論先知，原來仲有其他飲品，但果位文青妹妹提都冇提。最後，呢度傾偈千祈唔好大聲過佢地播緊果首孤星淚呀，唔係阻住藝術家唔可以專心做嘢就唔好啦！💤咁做生意，真係有性格，抵佢發，我鍾意！🙄…查看更多

生日飯聚，有雞有羊又有豬，當然唔可以唔試下呢度嘅名菜「威靈頓牛扒」。端上來賣相不錯，一試感亦佳，牛肉軟身，肉汁滲入酥皮，別是一番滋味。如再造訪，必點！還有，這裏的份量非常足夠，下單前要計計數，眼濶肚窄者千期咪衝動！…查看更多

下午入去叫咗豬軟骨湯麵，軟骨唔軟，冇鹵水香味得個鹹字，蕃茄麵好似落咗地捫茄汁有甜味。杯珍珠奶茶啲珍珠差啲咬唔開，同普通台灣鋪水準都差條街，但佢一碗麵收你50幾60蚊，配酸茶要加8蚊，乜唔係免費放碗麵上面咩？選擇少，價錢貴，服務十問九唔應，係裝修較新，不過應該都唔會變舊的了。…查看更多

七月的中午，陽光熾熱，走上街頭人彷彿一下子溶化了。到了九龍城，找到這間點心專門店，甫坐下，給枱上的小型雞碗吸引，明顯地，店鋪花了點心思。點了招牌點心「春風得意腸」，原來是類似炸兩，中間加入蘿蔔絲餡料，味道不錯。此外，焗叉燒餐包富色澤，賣相不俗。柴魚花生粥則粥底綿密，雞絲粉皮則皮太厚，煎藕餅則油膩了一點，可再改善。值得一提是服務。店員服務勤快，不斷給顧客沖水，中午繁忙時間，亦沒有刻意要求客人坐滿每個座位，令人吃得舒服。儘管門外有大人小孩數人，店員都能考慮平衡需要，才請求其中兩位女士坐過一旁 騰出一枱四個位子予等候的人客，服務不可謂不周到。店鋪服務，是靠細緻周詳的考慮，與客人真情互動的接觸，日積月累地提升及改善，絕非連鎖經營的機械式「七日鮮」式訓練可媲美。…查看更多

星期日下午在尖沙咀逛街，途中抬頭發現此店，決定一試。被安排坐在店中最入一張枱，不以為然。可是，舉手落單竟無人回應逾兩分鐘。好了，惟有把握機會，趁侍應招呼隔鄰，大叫一聲「唔該」，她才曉得我的存在。落單不久，一看那張單，侍應竟漏了豬軟骨拉麵，於是，又把握機會，召侍應過來補叫。結果，五分鐘後，有個侍應捧著碗麵過來，停在我枱前面，小聲問側邊抹枱的同事：「呢碗牛肉麵係64號定65號枱？」我聽不見他的同事怎回應他，他已把那碗麵端到我面前，然後說了聲：「是不是叫了牛肉麵！」我低頭一看，唉，這碗明明是貨真價實的豬軟骨麵，怎麼他會分不出來呢？我有點氣，答他：這碗上的是豬軟骨吧？他走後，我想舉箸大口吃掉眼前這碗「牛肉麵」，竟發現沒有筷子....於是，又舉了手，等了一會，侍應才奉上食具。麵的水準還可以，湯肥膩了點。那多士買相則還不錯，不過只噱頭行先，iphone吃比自己吃一次較重要！吃飽了，看看枱上，還欠了杯洛神花呀！唉，原來這間裝潢悠閒的台灣麵館又漏了單了......。…查看更多