C加賤肉橫生's Profile

身邊有好多朋友都話呢間磯燒放題正，等左咁耐終於book 到啦，去到都幾誇張，多人到落左3層樓梯，不過一到9:00就好快入得去。每人都有個預訂既set，有鮑魚仔、蟶子、生蠔等既海鮮，一路燒一路彈彈下，好過癮啊！仲可以睇住部pad，不停咁叫你想食既野，話曬都叫做放題啵。海鮮食落去都好新鮮，鮮甜既感覺出到黎，加埋小小醋調下味，簡直係一流。我最喜歡食個個蟶子，真係好鮮甜，大大隻放入口，感覺好滿足。值得一提既係店員們都好細心，不時走過黎同我地講邊樣可以食得，真係好貼心。係燒既同時，我地都叫左d刺生，估唔到佢既刺生都算生鮮啵，不過種類始終無咁多。食到好口渴，就出去攞支野飲，好誇張啊 ，個飲品櫃好大。基本上，你想飲咩都會出現係大雪櫃，仲有甜品雪糕雪條都有好多款，好似張7仔既雪條櫃搬左過黎咁。雪櫃旁有個自助枱，裏面有好多熟食。有炒粉面飯等等，所以說，唔怪得之呢間餐廳可以keep住咁多人黎食，因為佢既磯燒、刺生、小食同服務都同時滿足到你。…Read More

Lunch time時間又到,一個人自己簡簡單單去左吉野家試新出既黑松露芝士牛肉飯少少黑松露食落已經多一份味道,加埋好多溶晒濃郁既芝士,撈埋牛肉一齊食味道都幾特別鹹鹹地得黎又有一份好香既黑松露味慢慢散發出黎,牛肉份量都幾多,夠晒撈飯食,薄薄一片片肥牛好嫩滑,我最鍾意食吉野家就係佢地用既係珍珠米,食落特別有口感店員亦好好,我叫佢汁另上,完全冇say no仲非常願意,仲問我夠唔夠! 另外跟餐有清清地既一杯綠茶,一碗麵豉湯,仲有一兜辣辣地既細泡菜,一個餐咁多野真係足夠晒飽!…Read More

雖然最近天氣轉熱，但家姐話好耐無打邊爐，一講起，全家人既興致就黎拉。呢間餐廳有蒸氣火鍋，4款粥底睇落仲好養生添，有野生鮮淮生排骨粥、虫草花、同花膠瑤柱粥。由於我上星期先食過黎，所以今次都係食算普通既邊爐。爸爸見到有刺身食，即刻表現興奮，仲無問過我地意見，就自己係到寫紙仔。當然拉，我地一行三人又點會表示反對呢刺身賣相都幾好睇架，有帶子、鮮蝦、三文魚、北寄貝。帶子都幾大粒，不過就較為薄切，好在都幾甜。蝦一向係我最愛，特別既口感，令佢係一眾刺身當中特圍而出。三文魚色澤光亮，食落又有油脂香。北寄貝爽口，咬落唔會好難斷咁，都幾新鮮。火鍋既配料仲有豆卜同魚片。最後為左食飽飽，我地仲叫左烏冬。烏冬應該就唔係平價野，因為食落彈牙，與此同時，佢仲係家姐愛人，我只可以成功爭奪到幾條，還真是哭出來。有鑒於今餐既滿意程度，同佢距離我家既遠近，睇黎我都會幫襯佢，試埋個蒸氣火鍋，有興趣既大家就留名等我食評拉~…Read More

同個舊朋友久別重逢, 我地決定去食d特別d既野..就係德國菜我地去左試下呢間位於大角咀既Das Bier”。環境舒適,令人好relax。我地叫左個咸豬手配沙律。咸豬手既皮香脆好味,香料醃既豬手吾會好似出面既餐廳過份咸。我覺得佢地既味道拿揑得好好,入面既肉都好juicy。吾會覺得乾而且吾好食,中意食肉既你不妨試一試呢隻”咸豬手”食完個咸豬手,我地先食個沙律。因為覺得可以fresh返d。菜好多而且夠新鮮,我最中意有少少煙肉既香味同脆脆既麵包粒。不得不提,我叫左杯”奇異果汁”。我本人幾中意飲,酸酸甜甜而且又健康。今晚餐飯,我地兩個都好滿意而且好開心…Read More

同朋友兩個今日 又唔係好肚餓 ，諗住都係食啲嘢傾下計坐下， 見到佢哋提供嘅二人餐實在太多嘢食了諗諗下應該食唔曬 。於是 冇點到佢哋嘅2人餐決定散打， 輕量食下便算泰式菠蘿炒飯 賣相不錯，飯粒滿瀉， 睇落都幾足料， 咖哩飯炒底，上面再鋪滿我最愛嘅腰果和肉鬆， 還飄散著陣陣嘅菠蘿果香味 ，感覺真係色香味俱全呀。泰式飛天通菜比較一般而且太多水 濕咗啲， 不過就勝在幾大碟我夠為 喜歡這一碟， 比較泰式風味一點 ， 味道也很惹味，雞件夠嫩，而且 好似乜都有啲咁， 食落都幾豐富。…Read More

新年梗係要約下朋友見下面打下牌，但當然要大家一齊食餐飽先去攻打四方城。食放題其實第一下感覺最緊要就係盤刺身！吉壽刺身唔錯，夠凍上！而且都見到師傅有心機鋪到靚靚先會出菜。刺身我就認為三文魚同北寄貝都唔錯。三文魚厚度剛剛好，點小小醬油就更帶出鮮味，食落口都充份體驗到三文魚油脂的香味。北寄貝就食落有口感，幾爽口，夠凍身，食下食下又唔覺又不其然食多2件。再叫左d壽司食，其中花之戀最吸引，可能我本身太鍾意食三文魚，加埋個醬再點上黑松露，食落口又唔會太油膩，確係一個perfect match.食完凍野要食番熱野暖下個胃，叫左個雞翼，加埋芝麻鋪面，食落份外香夾脆身。唔好比佢住，再食多個羊架就好飽足啦，燒得幾jucicy,唔太乾身，但略嫌有羊騷味，希望下次更好。總言之其實性價比都唔錯，食物種類多，前菜到甜品都一應俱存！好難會食唔飽！…Read More

又到lunch，今日同同事去左Pepper lunch到食，鋪頭環境幾好，以木既裝修為主暗暗既黃燈，比人感覺都好舒適，座位又舒服，都唔錯!我地3個人叫埋同一樣野，都係叫呢到出名既鐵板黑椒牛肉飯，好like鐵板上既食物，keep保度時間長d，可以熱辣辣咁食，岩晒冬天食鋪頭都好細心驚鐵板上d汁彈到周圍係，鐵板邊都套左張紙圈圍住，咁冇容易整污糟 d衫，個飯未撈之前牛肉都係生生地，一撈之下，全部都熟晒，熟既程度岩岩好，牛肉幾嫩滑一d都唔會韌，好好味，配埋粟米，蔥花，黑椒更加惹味，牛肉同飯份量都好多，一個人真係食唔晒! 飲品就冇特別，係咁上下架啦!…Read More

朋友係土瓜灣返工，佢收工過去順便撐下檯腳雖然土瓜灣大部份地方都係工業區，但暗藏好多美食店.路邊鍋就係推介嘅其中一間位置係美景街，我地左穿右插，好快就到門口可能係平日，唔算多人，好快就可以坐底，冷氣好足，淡住冷氣烚下烚下真係一大享受眼見用一次性筷子，都幾衛生而調味品就係自助嘅，鐘意加咩就加咩，都幾方便快捷由落單到上菜速度都幾快下，大概十五分鐘左右由於點左雞煲底，所以食完雞食加湯打邊爐.2人的雞煲底唔會太多，大概占成隻雞的1/4，食完都係少飽到打邊爐時間，首先試墨釀油炸鬼，之前對呢樣食物印象麻麻，因朋友鐘意食，就點左，聽朋友講烚5秒就好上碗，抱住一試心態食左一件，比之前我係某些火鍋店好食，但不足以吸引我，味道係OK嘅相對我鐘意韭菜餃多D，餡好扎實，有種韭菜嘅甜味，而且烚好耐D皮都唔會散開，食落都好煙韌好滑，一口氣食左4，5隻食飽賣單先3百幾，算抵食味道又OK嘅邊爐好地方…Read More

到星期五，當然要朋友聚下，去食好野！今次揀左間環境舒適，侍應有禮，食物質素唔錯既韓式餐廳！我地點左香辣烤雞，醬汁好惹味少少辣，醬汁搽得好均勻，雞件烤得好香口，雞肉幾滑一d都唔’鞋’口，雞件份量都幾多，雞件上面有少少果仁片加蒜粒，食落更加好味！另外辣汁烤小豬手，鐵板上香噴噴熱辣辣，望到已經流緊口水，食落韓式味道同屋企既真係非常唔同，味道非常濃郁因為有好多醬汁，一d都唔乾身，豬手仔事前功夫處理好乾淨，一條豬毛都冇，豬手膠質好重好有骨膠原，豬手仔d肉嫩，好夠淋，食落一d都唔漏，非常惹味！飲品我地點左Sangria-Alcohol(large)，賣相已經吸引，飲落都相當唔錯，水果既清甜味道好夾，紅酒配水果，更加香淳好飲！…Read More

盡所周知旺角有好多日式放題，今次介紹呢間就出乎我意料之外的好。同朋友聚會，唔想煩諗食咩既話，放題就梗係必然既首選，今次就膽粗粗揀左呢間從未試過既大瀛喜日本放題，因為貪佢地方方便到我同朋友。我地揀左9:30個段時間食，因為比較平有85折，因為book左位所以好快入得去。店內環境同氣氛都唔錯，而且坐得都舒服。除左有點餐紙之外，出面自助區都有相當多既前菜飲品同甜品可以俾客人選擇。去食放題就梗係要食魚生啦！呢到魚生都切到好厚，肉質肥美。珍寶赤蝦好鮮甜，有海水個陣新鮮既味道，食落好爽口彈牙，我食完一隻接一隻！其他刺身都好唔錯，冇個種雪藏既味道。辣酒煮螺係我另外一個推介！有微微既辣，但一般不太吃辣既人應該都可以接受呢種辣度。螺煮得好入味而且本身都好爽甜，一碟仔不知不覺會好快食曬，所以我encore左幾次哈哈炸物就不過不失，炸粉漿就唔係太厚。流心一口芝士就有驚喜，熱辣辣上枱，一咬粒波波就流曬濃濃既芝士，味道唔錯。除此之外，仲有榴槤炸彈同紫心香芋丸，鐘意試新野既朋友可以試一下。芝麻雞翼燒得好香脆，而雞翼好飽滿，外皮好脆、肉好嫩滑，食完我地都encore左一次。整體黎講，呢間放題都有好多既選擇，而且每款野食味道都相當不錯，下次同其他朋友聚會既時候，都會再考慮食呢間!…Read More

去九龍灣Megabox shopping, 都好多野食店可揀，見到間好特別嘅食店係食新加坡菜式, 叫 "喇沙大少", 要入去試下先, 因為少食呢D 菜式叫個新加坡最出名一定要試秘製肉骨茶用一個瓦煲仔上枱, 好有風味, 熱辣辣, 好多料, 湯好濃郁, 湯料有排骨、豆卜及杞子，排骨大小適中, 有骨有肉, 排骨有軟骨, 好有咬口, 好淋, 豆卜入晒味索晒D湯, 又少少腐竹, 不太重藥材味, 但好有杞子味, 湯好飲因有肉味, 真係肉骨茶冇錯 春卷入面是包了粉絲同雜菜絲，好脆口, 而且炸得唔油, 用粉絲同雜菜絲感覺好好, 健康得來又香口, 雜菜絲內有有紅羅白好甜, 包住來吃香脆又可口. 叫了一杯黑糖薑母茶, 一杯凍拉茶, 拉茶夠滑有茶味, 夠凍，因為食完香噴噴肉骨茶真係要黎番個凍冰冰既另一黑糖, 真材實料, 有粒粒薑, 香嘅薑味, 黑糖不甜, 好配合, 好暖胃, 唔係人人都得架, 身子要補補，熱完再暖這喇沙大少不錯, 來行街又多個選擇啦 !…Read More

一星期裡的最後一天，同朋友去左Spaghetti House食下dinner聚下，因為放工先去太多人等位，我地都要等左一陣時間先有位，西式餐廳既裝修，暗暗既燈光，令人覺得舒服寫意既感覺!醬燒珍寶豬肋骨配美國瘋薯條，薯條係我最愛既粗薯條所以覺得真係好好味，炸得條條色澤均衡一d都唔會燶，外脆內軟，點埋茄汁一齊食一樣咁好食，豬肋骨好大份，一共8條骨，豬肋骨焗得岩岩好，特製醬汁好惹味甜甜地，肉質好淋，切開一份份都好易就咬到黎食!白汁磨菇天使麵，濃郁既醬汁好香，配料又多磨茹，蝦，野菌都有，蝦鮮味彈牙，因為夠晒多汁，食起上黎幼幼既天使麵，啖啖都充滿醬汁，好惹味!香蒜田螺配薯蓉，賣相非常吸引，食落既田螺都好爽口又易咬，口感非常好，粒粒都大大粒添呀，白蒜醬汁又好味，兩邊薯蓉夠晒淋夠晒滑，好正!…Read More

話說今日天氣凍凍地, 我同班好友就諗住打邊爐, 我地就去左位於元朗太和殿海鮮火鍋小菜館試下。先講一講環境, 呢間火鍋餐廳有落地大玻璃既門口, 裏面環境寬敞, 裝修簇新, 天花既燈飾簡約中帶點華麗既感覺, 另外有幾間VIP 房間。今晚我地叫左由經理推介既金抱什菌花膠豆乳鍋, 呢個鍋既特色係中間用左腐皮造外層, 整成好似褔袋咁包住花膠同什菌。呢個鍋湯底雖然唔濃, 但勝在什菌口感爽滑, 另外亦帶出菌類既鮮味。另外經理推介極品雪花手切肥牛同手打鮮牛丸比我地打邊爐, 食落下牛肉味好濃郁, 肉質亦相當嫩滑, 其他朋友都覺得呢間火鍋既牛肉水準相當不俗。令我地喜出望外既有潮州魚片頭同即炸響鈴, 可能係即炸既關係, 魚片頭炸同炸響鈴爽脆可口。最後咁多位朋友都覺得呢間火鍋餐廳既火鍋配料都幾新鮮。今餐人頭消費都300蚊左右, 絕對係物有所值。如果大家想同一班朋友打邊爐相信係唔錯既選擇。…Read More

年尾雖然食到飽飽滯滯，但都不能沒有超級喜歡的雞煲！朋友告知尖沙咀有間雞煲不錯，於是便約埋收工齊齊去打煲啦~間店離尖沙咀站都有點距離，對於路盲的我找了好一陣子。好不容易找到了，門口大大塊海報寫著全港首創任選雞件部位，的確有點特別，平時打開嘅雞煲都系半隻或一隻，呢個可以揀自己鐘意/想食嘅部位，也不錯。但我們還是選了一隻雞，分開兩邊，一邊系辣，一邊系唔辣的。雞煲一上已聞到花椒八角嘅香味，雞肉肉質嫩滑，大小適中，味道非常濃郁，尤其是食到後面，D汁越來越濃的時候，辣味也很足夠，即使另一邊是沒有辣味的，也感覺被辣的那一邊傳染了。雞煲食完后當然要加湯，我地揀嘅系鴛鴦鍋，可以揀兩個湯底，一邊辣一邊唔辣，辣的選了四川麻辣湯，不辣的選了瑤柱群翅雞湯。四川麻辣的剛開始不覺得辣，滾下滾下開始來料了，好過癮！另一邊嘅雞湯有大大一塊的花膠，真的很足料。火鍋料要咗豬皮、手打花枝丸、蓮藕、蟹子墨魚油炸鬼、豚肉、黑牛百葉、脆魭，還有蔬菜盤（內函茼蒿、生菜、娃娃菜、玉米）。不得不讚的是蟹子墨魚油炸鬼，算特別的一種火鍋料，一放落去，墨魚滑的那一面立刻向下，咁樣就可以保持油炸鬼嘅脆口，大概滾兩分鐘就食得啦~真的好味！脆魭也幾新鮮，切到薄薄一片，過下水就食得了，不錯！手打花枝丸也很不錯，非常爽滑。但是黑牛百葉就有點過硬，感覺點嚼都嚼不碎，蓮藕很爽口，打邊爐真係一流！食過既雞煲來講，呢間算不錯，多湯底揀，又可以自己揀雞件部位，人少少的話都可以食到，味道也很不錯！正！…Read More

今日同阿妹lunch突然好想食上海野，就去左成日經過又少入去上海姥姥到食！ 鋪頭裝修以新式格調既裝修為主，已經唔同晒以前d舊既上海食店，店內座位有bar枱，有2人，4人座位枱，牆上掛有上海風味既人像畫，令人舒適自在！上海菜味道一向比較濃味，我地叫左回鍋肉配白飯，配料以辣椒，椰菜，蔥一齊炒，回鍋肉味道少少辣，肉質都幾淋一d都唔韌，份量都幾多，不過油左D，而且味道上不夠重口味，加上唔夠辣，如果唔配飯食的話可能會覺得有d漏！ 蔥油餅，炸得頗鬆脆，1個分切開3小件，唔係咁大個都唔知點食好，一定會食到周圍dirty晒餡料唔夠多，韭菜味好濃郁惹味，略為嫌外皮粉太多！ 姥姥生煎包，熱辣辣煮得金黃香脆，生煎包真係好有外脆內軟感覺，包面好脆，內面包好軟熟好味餡料都以豬肉同少少韭菜為主，如果可以多返d韭菜應該會更加好味！…Read More