Magus Chu's Profile

喺附近Playhouse玩完，順利6點到達餐廳。3大4細，打邊爐嗌咗Set A，食90分鐘。其實都好多嘢食拎，另外QR code落單。一上鴛鴦鍋就嚟卡樂Beef、豚肉片同酒嫩雞件。其餘見以下各圖：仲有港式檸茶檸水奶茶咖啡華田好立克，由於只能upload 12張相，所以不放在這裡。堂食自助有咩拎可見其他評論，不贅。串燒、薄餅(naan) 係我嘅推介。盲盒飲品係正嘅，嗌三次分別出現咗珍多冰、涼粉冰、紅豆冰。我之前最擔心無得揀嘅carbo，原來現場有得拎王子麵同辛辣麵，QR code落單有烏冬、金邊粉、白飯，總有一款啱食！卡樂beef真心唔錯，對得住價錢。唯一美中不足係甜品唔吸引⋯真係飲多兩杯特飲 / 盲盒好過XD帶住小朋友有少少超時，侍應姐姐們都係溫馨提醒，都算唔話得㗎喇。如果唔係距離屋企太遠，一定會多去。…Read More

今日送太太去朋友聚會，人家Ladies Night，我就化身做孤獨的美食家。之前喺Openrice已經留意到呢度，不過啲餐牌就好似成年無更新過。所以都抱住試吓運氣，睇吓價錢有咩改動。點知⋯咁平嘅喂！？係真唔係呀！？即刻會一會佢先！入到去，侍應：manager就畀咗個QR code我落單。當然都仲有普通餐牌給我參考：我二話不說，點咗$79超抵食嘅澳洲穀飼牛扒300g，即係有10安士咁多㗎喇。見到追加其他肉食有半價，不過做人都係唔好咁貪心。店內環境四四正正，有湯飲有沙律食，仲有白飯任裝、紫菜任加。我就當然樣樣都拎啲啦侍應哥哥送牛扒上枱嘅時候，張紙係蓋面，防止滾油彈到周圍都係，係有花心思嘅：聆聽着充滿懷舊感的日文歌，慢慢將牛扒切成細塊，都舖滿成塊石板呢。牛扒充滿肉味，香氣撲鼻。沙律清新，拌胡麻醬一流。湯內有滿滿的蘿蔔同肉，十分清甜！紫菜蓋飯，拌牛扒，食到停唔到口最後，我食咗一碗沙律、兩碗湯、三碗紫菜蓋飯。埋單了，連加一都係$87，$100有找。性價比高，又飽肚。開開心心回家去！…Read More

佢開張食到依家，雖然唔係日日去，但起碼一星期食到一次。我順口嗌B4熱咖啡都俾樓面姐姐叫我睇睇餐牌先。三個月前加咗一次價，尋日又加價。早餐沙嗲牛肉麵價格由$38飆升到$42。唔緊要，我就慳返$2，試吓你鮮滑牛肉係點啦。我想嗌火腿奄列，樓面姐姐個反應好猶豫，原來個餐牌無咗。佢嘅反應似係今次有，之後唔知仲有無。好，最後食咗嘅早餐就係咁。啲牛肉都算係咁，係唔錯嘅。但老實講，呢碗麵無咗沙嗲醬，掩蓋唔到啲麵唔好食嘅本質。如果第時連奄列都無埋，就更加無啖好食了。…Read More

近日開始在灣仔返工，附近實在有太多好嘢食。星期一剛巧經過屋台，見到透過Openrice外賣自取有些款式有六、七折優惠，今日可以試吓啦。照燒雞扒半熟玉子飯$35、麵豉湯$5用Openrice優惠碼Rice$5，變相個湯唔使錢，哈哈！附近兩餸飯$25、$30有交易，要平同飽肚可能未到屋台份。但醃蘿白、流心蛋呢啲比較精緻嘅餸菜，兩餸飯就俾唔到你了。有紫菜、蔥同照燒汁調味，個飯都幾好味。至於雞扒、不過不失啦。麵豉湯有好多海帶，好好𡁻！…Read More

今早嗌了早餐A，包括：沙嗲牛肉麵- 沙嗲醬偏鹹，唔香，我唔敢食咁多。- 大光麵一般火腿奄列 + 方包- 奄列份量偏少，唔肚餓嘅情況下可以接受。- 方包無皮，還好鴦走- 食晒成個麵都未嚟，問返樓面姐姐先知漏單（因為佢哋係嗌入廚房、無手寫飛）- 最後嚟咗杯鴛鴦俾我、無煉奶底⋯樓面姐姐係有禮貌嘅，寫錯價錢都客氣幫我改返。可能做慣街坊生意，所以和善啲。呢間餐廳純粹係平，$30比附近$36-37平兩成，不過食物質素一般，趕時間都可以考慮下。…Read More

近日到尖沙咀返工，和同事在附近閒逛時，看到泰濃麵，睇個名就覺得吸引。先看餐牌：其實定價是有點高，附近吃個午餐也未必去到六字頭。不要緊，即管試試。很注目的圖片：我同事看到300g的芫茜山覺得很有趣，就點了這個。小弟沒有勇氣，還是叫其他好了。最後看到我同事那碗芫荽山是這樣的：一整碗就像綠巨人，很震撼！船麵會有魚蛋，和湯底非常濃郁！小弟點了冬陰功煙鴨胸金邊粉。原來冬陰功湯會有蝦、蟹柳和秋葵，有點意外呢。原來份量亦不小：湯底很濃郁，甜酸適中，如果帶點辣就更好了。金邊粉很好吃，會索湯。雖說$68不便宜，但比預期大碗，好味之餘對得起價錢。另外，天氣炎熱，店員姨姨服務不錯，在店內飲杯大冰水真的透心涼。可惜店內人手不足，看到有食客等得太耐憤而離去，實屬可惜。…Read More

近排到長沙灣返工，午飯時間時看見這間新店舖常常落半閘。就很好奇這店舖有甚麼吃。直到剛剛星期四（11月12號），終於看到它開舖了。我和同事們一行四人在看餐牌時，店舖老闆熱誠邀請我們進內，我們就包場了。（可惜舖面很細，變成兩個二人分枱向牆壁坐）先看看餐牌：今天不太肚餓，吃個日式叉燒蕎麥麵就好。稍等數分鐘，就有得吃了。日式叉燒蕎麥麵($48)麵身軟硬適中，帶少少嚼勁，不錯。叉燒很香，令我吃過不停。鳴門卷和蟹柳一般，不贅。整碗麵的份量對男士是偏少的，女士應該就剛剛好。另外，我同事說安格斯和風牛肉丼也很好吃（可惜影唔切相），有機會我下次要試試。…Read More

上堂前先去觀塘醫肚，在工業中心閒逛了一陣，在店外看到大大個雞蛋標誌，見咁得意就入內用膳。平日早上大家都返工吧？差不多十一點半都沒有客人，如店員話齋，隨便坐。由於時間上介乎早餐與午餐之間，店員就問我食早餐還是午餐，仲細心講解有沙茶牛肉麵餐呢個神秘menu，作為牛肉嘅愛好者，當然二話不說就揀牛肉麵啦。稍等一下，咖啡就被端來了。正當我疑惑點解咁大杯之際，店員仲懷疑係咪寫錯飲品。咖啡偏向多奶，幸好仍有咖啡嘅香味。之後沙茶牛肉麵、炒蛋、多士都分別送上。以蛋做主打嘅餐廳，當然要好好品嚐一下其炒蛋啦。炒蛋滑溜又有蛋味，配多士認真好。可惜多士好像過烤了，有點硬。之後到吃牛肉麵了，店員提提我，撈勻醬料和公仔麵會無咁濃味及好食啲。牛肉都算腍身，可以一試嘅。環境寧靜，用膳後再坐一會吧。呢度俾我嘅感覺好舒服，可以好好放鬆一下。唔知到午飯時間嘅時候多唔多人呢？…Read More

在銅鑼灣煩惱食咩好，到京都廣場時看到有蜆吃，很吸引，就上去了。在餐廳門口看餐牌，職員介紹有頭甜蝦$1/隻，很吸引呀！就座後，點了胡椒雞湯卜卜蜆煲、以及是日特價的大元貝2隻，看看份量如何。看到煲時，就覺得份量很多，超抵食。蜆肉有鮮味，湯底很濃。不用豉油也覺得很夠味。職員定時過來收集蜆殻，加湯及加茶，都幾細心。吃了一些蜆之後，就點了20隻有頭甜蝦。初初以為是加進火鍋裡，到看到實物時，才知道是刺身，喜出望外！甜蝦很滑、很鮮甜。吃罷再追加多20隻。我覺得再追加多幾次都得！現場尚算坐得舒服，唯獨與鄰座距離較近。鄰座對話大聲的話，就聽不到朋友說甚麼了。最後埋單，調味料$12/人，茶芥$6/人，胡椒雞湯卜卜蜆煲$188，大元貝2隻共$50，有頭甜蝦40隻共$40，連加一共$345。平均$172.5一位，有咁多海鮮食，真係好抵！今天是星期日，夜晚客人也不算多，有點擔心這餐廳做唔做得住呢⋯⋯…Read More

今晚在荃灣出沒，在南豐中心閒逛一陣，食晚餐睇睇OpenRice 有咩好推介。附近餐廳嚟計，呢度有80個讚，所以就揀咗呢度。20:45就座，見炸物拼盤賣相幾吸引，點了之後，還有點了牛肉粉絲湯，以及韓風芝士飯（雞肉）。呢間餐廳嘅特色之處係枱面上有一大盅泡菜，可以任食，仲幾好味添！然後到韓風芝士飯登場，賣相唔錯。食落味道幾好，芝士做到拉絲效果，讚。雞肉份量唔少，送飯一流。到炸物拼盤。看起來很大盤呢，畢竟價錢$98。點知，食落去就唔太對路⋯薯條只有表面薄薄地脆少少，可能係我唔識欣賞韓式薯條吧。但係，其餘的炸蝦、餃子同埋紫菜卷都同「好食」呢兩個字無緣，有點失望。然後，時間大約2130，職員開始想趕客走。泡菜，收！水壼，收！其實係咪真係要咁早就趕客先？唔緊要，我食埋個牛肉粉絲湯就走。當我食嘅時候，除咗喊之外，我無嘢補充。真係好後悔俾佢收咗我壼水⋯仲有，個粉絲好碎，唔好食。衰啲講句，吉野家打邊爐啲韓式粉絲都好食過佢。最唔愉快係，喺我仲食緊個粉絲湯時，個職員走埋嚟，無乜禮貌咁問我係咪唔要（個鍋）。我一直都無停過咁食，食埋都走啦。都唔係差幾分鐘姐，又未到十點，使唔使咁呀？呢間嘢（包括其他分店），無下次！…Read More

是日剛巧在灣仔出沒，早餐時間唔知食啲咩。本身諗住去麥當勞，但太多人。睇吓附近有咩食嘅時候，呢度就吸引我注意。見佢選擇都幾多，咁就入去試吓。坐低睇完有咩食之後就落單，個侍應就叫我直接講。事後先知原來落單係蠟筆劃落過膠嘅餐牌就得。咁個侍應都幾方便我，哈哈。早餐有煎雙蛋麵包、一碗麵 (我揀咗 油麵、豬頸肉、沙爹汁)、熱檸檬水。煎雙蛋係太陽蛋，幾好食。車仔麵呢，我鍾意食油麵。呢度啲油麵都唔錯，唔會太腍，起碼用筷子夾得起先。豬頸肉就普普通通啦，不過個沙爹汁幾惹味。食完的確唔太口乾，應該就如店舖標榜嘅無味精。早餐食車仔麵，都幾滿足。…Read More

是日在北角出沒，想吃個早飯。在Openrice這裡看到祥發茶餐小廚有不少正評。再看看餐牌，價錢實惠之餘又多選擇，值得一試。在地鐵站步行1分鐘就到，門面樸實無華，但座無虛席。點了A: 瑞士雞脾B: 沙爹牛肉包H: 特濃芝士汁鰻魚餐肉炒蛋飯(迷你)熱飲： 熱檸水(A+B+H+熱飲=$46)瑞士雞脾，果然係人氣之選。嫩滑嘅雞脾，搭配瑞士汁，好味！用刀叉就輕易解決，非常好。沙爹牛肉包，沙爹汁比想象中少，不過餡料十足，可算是誠意之作。特濃芝士汁鰻魚餐肉炒蛋飯，睇個名就知好味道。雖然迷你份量，但非常飽肚。離開餐廳時，已有不少食客等位，不愧為人氣之選！…Read More

星期五諗唔到食咩好，女朋友話諗起我之前雞翼放題想試，咁就打電話去訂位。可能係仲未過晒新年，今日都唔算太多人。上到去，先嗌金盞花菊花茶，好香好好飲。然後每款雞翼嗌半份(4隻)，耐心等候片刻就有得食。煎雞翼一定要趁熱食。四款雞翼其實都唔錯嘅。本身最期待嘅蜜糖雞翼又無想象中咁好食，不過不失。女朋友鍾意蒜味，但蒜香雞翼又未至於想突然翻嗌。我覺得椒鹽雞翼好惹味，好夾熱辣辣嘅煎雞翼。女朋友就鍾意香草雞翼多啲。嗌咗兩次四款雞翼各半份，之後再嗌香草+椒鹽雞翼各4隻。仲有花茶好抵飲，加水兩次都仲有味。食咗咁多都係$249, 真係好抵。…Read More

今日11點做完gym, 想食肉。見附近好多店舖年三十晚無開，就唯有去麥當勞。嗌咗煎蛋肉醬安格斯漢堡餐。呢個時間要等，我就預咗嘅。但係櫃台職員好早就㩒咗我個號碼拎餐，個職員又無理我，咩都無問就由得我企喺佢面前等。與此同時，其他顧客係我身邊拎嘢，搞到我有啲尷尬。希望啲職員下次拎得餐先㩒號碼，唔好令到本身已經地方淺窄嘅候餐區擠滿無奈等候嘅顧客。到用膳嘅時候，個盒同包住漢堡張紙好油，搞到我成手都係，有點失望。個包係好食嘅，安格斯比一般嘅漢堡扒有肉味。不過肉醬汁沿住包住漢堡張紙嘅邊位流到我成手都係，有點無奈。…Read More

晚市蔬食自助餐，價錢相宜、又多選擇。同媽媽慶祝生日、又可以滿足她每樣都吃的心情。地點方便，地鐵站步行只需數分鐘。到餐廳時已經有好多人就坐了，場面爆滿。幸好早兩星期前訂位，可以安心。食物方面有很多選擇。清新的有沙律、生果吧。熱食有較清淡嘅薑汁芥蘭、炒青菜等等，亦有不似蔬食的合桃咕嚕肉、素嚕茄子等等。每款食物都很不錯，看得出花過心思。個人喜歡脆皮蘿蔔條、青蘋果紫薯球、黑椒薯仔、牛油果蒜蓉多士，還有香蕉糕。因太多款式，90分鐘用膳時間其實不太夠，哈哈。有機會再光顧。…Read More