stefanieyung's Profile

入黎到BookB Kitchen Meal Meal，呢度裝修係行和式簡約風，比人一種溫暖舒服嘅感覺，呢度係喺吧枱點餐再坐低嘅，我點咗一份腐乳炸雞定食（$108），再加一杯熱美式咖啡（+$12），腐乳炸雞定食冷盤有南瓜蓉，入面加咗椰棗蓉，甜度啱啱好！另外，冷盤仲有櫻花蝦玉子燒，鮮味十足。腐乳炸雞有少少咸啦，不過雞件好滑又多汁，送飯就一流喇，十分鐘就食曬啲飯嚕。然後仲有條秋葵天㷌羅，熱辣辣，正啊！飲埋碗麵豉湯就真係飽飽喇，總結，食物都好用心做，每樣都有少少驚喜。店員好細心，會係你食定食完先上咖啡，呢杯咖啡帶果酸，溫度夠熱，今次真係飲飽食醉，滿意度100。…Read More

之前夜晚黎過一次，食青口飲白酒，覺得味道同環境都唔錯，食物個調味好，份量多，餐廳環境好文青風，暗暗地好有情調，就諗住係星期日晏就帶爸爸媽媽去試下。一坐低見到menu，一個set大概$65到$90左右（未加一），包一個主菜一杯野飲，嗰一刻都即刻明白到，係會同夜晚嘅質素有出入嫁喇，不過都坐低咗，一於就試吓佢啦！蕃茄辣肉腸大蝦意粉（承惠$65）蝦就兩隻，辣肉腸咸咸地辣辣地，襯個甜甜酸酸嘅蕃茄汁，意粉冇話煮得太淋，65蚊貨仔，算做好好嫁喇！肉眼扒配沙律菜（承惠$88）牛扒嗌咗四成熟，個賣相幾好嫁，不過一切就知有筋，唯有自己切走佢啦好彩肉質搭救啦，都淋嘅，淋到好似有「拿」過咁，嗯⋯⋯都係嗰句啦，八十蚊，唔好要求禁多啦，算正常嫁喇！食完野就叫餐飲，可惜餐飲都未飲完，侍應哥哥就好似趕你走咁，叫你埋單嚕。對比上一次嘅用餐體驗，今次真係失望嘅，不過如果唔對比，我會覺得又可以喎，平價西餐咁囉。一句到尾：我會揀夜晚去！…Read More

臨時臨急決定食餐好嘅晏就飯慶祝母親節，我同爸爸個腦就諗起呢間，嗱嗱聲打個電話卜枱，即刻食啦，又估唔到真係卜到喎，然後一家人就即刻衝過去喇。去到等咗一陣就有枱嚕。西班牙海鮮飯Lunch Set（承惠$138）嗌咗一個湯一個沙律，湯係番茄濃湯，帶有蕃茄嘅甜同酸，最後有少少paprika嘅煙燻辣味，温度又夠，好味！沙律竟然有火箭菜，有心思喎，而沙律係黑醋汁，正正常常啦。之後上咗鮮蕃茄蓉焗法包，個法包特登切到好薄，焗得香脆，配埋個蕃茄salsa，咬落去首先咔嚓好脆，然後啲茄蓉嘅汁係口腔入面爆發，胃口大開啊。西班牙炒飯係主角，上面有蝦、青口、魷魚，份量十足！加啲檸檬汁之後，啲酸味更加凸顯到海鮮嘅鮮味，飯吸曬啲精華，好夠味，又有飯焦，四個字！香辣野味！然後飯入面收埋咗啲脆皮豬肉，個咸香加上油脂香味，好送飯啊，一啖接一啖食啦。甜品就係香脆肉桂條配Nutella，叫做正正常常啦。每樣餸菜味道上都好複雜，會起碼有三種味道，但係又協調嫁喎，要比四隻手指公！White Sangria (承惠$65）呢杯酒我見佢有橙、青蘋果同紅蘋果，飲落口反而係有種濃濃嘅白桃香甜味，然後就係橙嘅柑橘味道，最後先有少少白酒嘅感覺，就咁飲都滿足啦。呢間餐廳好似都有做Happy Hour嫁，已經打算再黎試埋杯Red Sangria！其實仲嗌咗黑毛豬火腿（60個月），炭烤豬扒配焦糖蘋果，些利酒炒鮮魷魚，煮青口，生啤。雖然食材重複，但係每一樣食材都唔同味道唔同口感，食得出係唔同處理手法，不過食咗太多野，我懶得寫喇，總括而言，每樣餸都有驚喜啦。…Read More

黎得呢啲舊式大飯店，總會有啲期待，覺得會有驚喜咁，話曬都屹立不倒禁多年喎，不過呢今晚就叫不過不失啦。入到去就係舊式大飯店嘅裝修，有七八十年代嘅感覺，同時間天花滴緊水。一坐低就黎咗兩碟小碟（$16），有花生同蕎頭，真係舊式飯店先仲會有呢啲，身為蕎頭愛好者嘅媽媽仲感嘆咁講：「宜家邊度興呢啲啊！」鹽焗雞（承惠$13X）呢碟係東江嘅招牌菜，係好入味喎，雞夠大隻夠肥美，上菜温度都適中，隻雞好送飯，所以一黎咗隻雞就清咗大半碗飯嚕，其實送啤酒都搭喎，正啊。蒜蓉白菜仔（$5X）白菜仔炒得偏淋身，啱曬我呢啲箍牙人士，啲菜夠甜，又夠鑊氣，蒜味十足，五十幾蚊，比得過啦。梅菜蒸鯇魚（$8X）蒸魚真係有啲失望，鱗片未摑清，梅菜冇味，條魚就係正常鯇魚一條啦。食到尾段，侍應叔叔開始係我面前攛鼻屎，媽啊！衛生呢⋯⋯總括而言，今晚都食得愉快嘅，未來應該都會耐唔耐再戰。…Read More