食神美思的個人專頁

全場得20個座位，環境光猛寬敞，吧枱有12個座位 + 有兩張四人枱。我哋四個人食團年飯，所以坐四人枱，枱面都足夠放食物，唔錯。當然如果想近距離對住日本師傅，就要坐吧枱。入正題講返食物，一般你諗得到嘅關東煮食物都有，湯頭超級鮮甜！我哋會連碟上面嘅湯都倒返落碗嗰度飲咗佢😋 另外佢每晚通常都會有五六種喺黑板上面嘅特別食材。我哋就試咗煮蠔、炸鮑魚。炸鮑魚尤其好味！又唔係天婦羅嗰種，唔識形容。總之好好味！人均消費係貴啲不過食物有水準。佢之前喺舊舖已經幫襯過一次但係當時好逼夾。但係因為食物好味，所以佢搬咗嚟呢個位再次幫襯。服務方便本身佢係有一個日本嬸嬸 + 一位姐姐；兩位嘅服務態度都好好。但係今次 too bad 日本嬸嬸放假返咗日本，換咗一個男士嘅替工掛。服務就認真麻麻 🤨 不過食物好味所以我哋都冇理佢嘅服務了。…查看更多

住近黃埔，都已經交叉❌咗呢間餐廳好耐。嘢食冇特色都唔係致命傷，最差係啲服務! 茶餐廳都好過佢！Anyway, 因為約咗設計師大家要攤開啲圖嚟睇，所以唯有選擇呢間餐廳因為六人卡位枱面比較大。入到去又係貫徹冇笑容冇打招呼冇服務。其實連鎖店來自日本，為何冇基本 training?! 嘢食就越嚟越細碟，$68一碟意粉兒童餐咁嘅size伴碟都冇 + 鮮奶咖啡例牌開水咁。都冇辦法啦因為需要佢張枱面。講返佢個嚴重致命傷，服務態度💢 問攞熱水冇熱水！叫我哋自己埋去個櫃嗰度攞個熱水壺自己斟。但係個熱水壺裏面啲水係凍的！食完嘢叫佢收碟，收咗兩隻其他全部唔收，真心唔明！撳鐘叫佢唔嚟，行過問佢嘢唔想答你！全間餐廳得五份一嘅枱有客，亦都唔忙，就係唔招呼你！但係員工自己三五知己就企埋喺度傾偈。完‼️…查看更多

知道佢嗰度啲早餐唔係咁多人，特登帶個老友邀請佢今朝去食早餐。11點去到，全間餐廳得兩張枱坐咗人。喺門口等咗2分鐘鬆啲，都冇人出嚟接待，終於行入去搵到個着西裝嘅職員話俾佢知兩位。咁佢問我哋喜歡坐邊度，咁我哋就選擇咗一張喺玻璃邊嘅枱；但係好搞笑！我哋都未坐低，佢就話12:15要還枱因為有人訂咗枱。我心諗，全個餐廳都冇人；連埋我哋得三台客，為什麼呢張枱必須要12:15還枱？不過唔想打擾自己嘅brunch 心情，唔同佢計較，照坐低諗住自己鍾意坐到幾點就幾點囉。你都冇客！食物方面 = 老友叫咗個港式早餐，有沙嗲牛肉出前一丁加菠蘿包。沙嗲牛肉唔識形容，唔好食總之。出前一丁就仲衰！唔明個五星級廚師識唔識煮公仔麵？超級多水全碗面冇一丁味！另外唔知佢哋個廚房係咪好遠？啲嘢嚟到全部都凍凍地。我叫咗火腿蛋冇乜驚喜，跟嘅多士亦都是凍的。加咗個Butter milk pancake，呢個都麻麻哋唔識評分。食到12:10咁上下發覺好大油煙味，原來basement開自助餐，唔知喺度煮乜嘢超級大油煙！終於12:20埋單走人，早前坐喺度食早餐嗰兩張枱都走咗。亦都唔見有乜嘢人係訂咗位我哋張枱必須要還！全個場亦都係空的。所以香港人唔留港消費都係有原因的。…查看更多

早前2:00經過與同事吃了一個下午茶，感覺良好，食物美味，價錢公道。因為2:00去食沒有任何排隊，或者要逼你埋單的情況。七月份諗住Team lunch，即時想起這間餐廳。立馬打去訂枱 / 我們10位食lunch。聽電話的人士居然說我們只可以用餐60分鐘！最後選擇唔幫襯！其實係有啲無奈，不過10個人食60分鐘真係有啲離譜！又唔係免費！…查看更多

非常有心的法式小店 crossover local ingredients. 每一道菜都會附上 Ingredients mixture 小卡一張, 等你知道自己食緊乜嘢之外; 可以好有趣地喺口腔裏面搵返嗰樣食材嘅味道。午餐晚餐 menu均會定時換上新菜，可以保存新意。Server姐姐超級friendly，喺香港近期少有的好服務！我哋食咗好多唔同嘅嘢，得意嘅有八寶乳鴿、竹笙乳鴿+雞consomme、海鮮龍蝦冬陰功湯ravioli、腐皮拿破崙餅 etc. Plating 超級靚, 食得好開心! 研究佢D食材又好有趣, 一班朋友就歡度一個星期日晚上.…查看更多

三人聚餐，去了吃午飯。先講環境，有好高嘅落地玻璃還有一個小露台，光感十足。服務都好有誠意，是近期在香港少見。每人叫了一個set lunch：sushi set / sashimi set / 和牛生薑燒。Sushi有水準唔在講，sashimi擺盤超級精緻！就算我成日去開嗰啲高級日本餐廳例如 Nadaman 都冇咁靚。和牛生薑燒超級有驚喜！和牛就一定好食㗎啦，但係佢個生薑燒汁薑味濃郁非一般外面日本餐廳用嗰啲即食生薑燒汁可以相比。遲啲再去試吓Omakase😋…查看更多

耐不耐都會去下NOC，佢啲咖啡係幾好飲。但係令我地成日卻步有兩點 —> 第一係時常要排隊，第二係服務超級差。咁今日就揀咗11點去到一定唔使排隊啦。果然如我預期，不用排隊直接入座。門口接待員依然秉持佢哋一貫嘅強差人意服務，黑面迎接，晨早流流冇笑容，跟住就帶咗我哋入座。咁我嘅屋企人經過 cashier，見到個餐牌就攞起睇吓。咁沖咖啡嗰位哥哥居然阻止佢！幾冇禮貌地講話叫佢坐埋位嘟QR code就會睇到！咁得意？唔俾人睇餐牌？唔鍾意嘟QR code喺電話睇得唔得？其實間咖啡店裝修得咁靚咁開陽，為何要請這些員工？咖啡店唔係 suppose 應該令人relax嘅咩？我哋喺度食晏，坐咗一個鐘頭鬆啲，坐喺沖咖啡嘅位置側邊。咁見到佢幾個員工男男女女喺度傾偈又識得笑個喎？ ！但係對住客人就絕對唔可以哭㗎！唔知乜嘢服務態度？真係要請教吓劉德華。P.s. 其實價錢一啲都唔平咁嘅服務態度真係要檢討吓囉佢哋嘅management。…查看更多

喺附近剪頭髮，成日行過見到佢裝修幾日系幾靚，今日見佢冇乜人就入去試吓。入到去有超過一半嘅座位係空，但係男waiter 仍然安排我哋坐喺廁所門口。諗住淨係食個pancake飲杯咖啡好快，是但，都費事同佢講。跟住未坐低就少少冇禮貌咁講話$100最低消費一個人。令人感覺唔welcoming。坐低睇餐牌，每個pancake都差唔多都要140幾蚊一份，飲品大致上$48一杯或以上。咁一人叫一個pancake一杯嘢飲絕對唔會唔過$100啦！覺得唔使咁緊張同埋講嘢唔使咁冇禮貌。兩個人最後食咗$431⋯⋯ 嘢食飲品正常唔特別出色。兩位男server，繼續對一眾客人都係冇禮貌。聽到隔籬枱點餐問多兩個問題已經不耐煩。喺第二張枱放低隻碟直頭澎一聲，好似掉落張枱咁。我哋都嚇一跳！其實做甜品店最緊要開開心心甜甜蜜蜜。請着啲咁嘅員工真係一大敗筆。另外最後察覺舖頭裝修真係好有心機。但係嗰幾位員工整到個鋪面周圍都係垃圾、紙箱、背囊、隨地放垃圾鏟，好混亂同埋唔整潔。真係嘥咗老闆嘅心機…查看更多

幫襯過就時常心思思想繼續幫襯。首先講佢最出色嘅蟹肉蝦湯檬粉，湯底濃郁聽個名都知好食！跟住佢個慢煮蕃茄牛肋肉非常軟琳10分入味 😋 平時我仲好鍾意叫飯食因為我係飯桶 😅 最鍾意食嘅係香茅牛肉或者雞肉 (睇心情而定)，加扎肉多蔥油。識食一定係咁食！越式滴漏咖啡好正宗好香、iced latte 都唔錯。另外一定要推介佢個牛油雞翼 ☝🏻 好多越南餐廳都有但係呢間特別好食！外邊牛油皮非常入味、裏面嘅雞翼食到酒香。仲有普通到不得了嘅越南春卷，一定要叫嚟試吓、因為真正越南入口細細條非常好味！最後，如果鍾意食咖喱嘅人都要試吓佢嘅咖喱牛肉法包🥖⋯⋯ 佢啲咖喱超級野味不過都幾辣🔥 食得辣嘅朋友先好叫。…查看更多

作為街坊，時常去幫襯, 早午晚餐都有享用過。唔知點解今次7月22號去食咗個早餐，就賴嘢中咗腸胃炎辛苦咗幾日。本人叫咗早餐B - 都係煙肉腸仔蛋多士嗰啲啦。我個屋企人同我去食，佢食A餐就冇事。腸胃炎屙嘔肚痛由22號五點發作搞到27號先好返！真係好辛苦！都有電郵比佢哋CS complain嘅。都係冇人提供到原因，我都明嘅。有人打嚟道歉咁囉⋯⋯ 天氣炎熱，大家小心食嘢啦。嗰度啲職員服務態度唔錯，今次係食物出事唔知出去邊度。…查看更多

喺12期搬走咗之後就冇再幫襯因為唔係好就腳。今日星期日特登行過去一期試吓。食物方面都係大家樂出品，正正常常冇乜特別出色。去得一粥麵，比呢個價錢，咁當然唔會係諗住食半島出品。要提一提 D 阿姐啲服務態度，同12期嘅時候一模一樣 - 劣！keep到水準喎！都係咁差成日寸啲客！例如我叫冰鎮奶茶要加冰，見到張單打住走冰，咪問吓佢係咪真係會加冰，咁佢就好惡咁話走冰即係加冰囉你唔明咩！咁囉。咁我又真係唔明喎。跟住去攞嘢食，隔離位男士問佢點解一set海南雞飯要分開兩個tray。咁食物櫃檯嗰位阿姐又係冇禮貌地講話 = 因為一個tray放唔落。咁一來我又覺得唔使咁冇禮貌嘅，你解釋比個客聽咪得囉話晒都係客人。咁之後男食客就無奈地先攞一tray，轉頭再攞另一盤啦。咁我就喺度等緊嘅，就聽到食物櫃檯阿姐話你咁叻咪一次過攞晒囉。位男士就聽唔到嘅不過我聽到囉！係咪真係要用咁嘅態度對食客呢？…查看更多

第二次去幫襯，因為喺附近剪頭髮。之前時常幫襯尖沙咀店。第一次去銅鑼灣呢間都OK嘅正常服務囉。今次再去，男服務員態度就認真麻麻。講咗食物先啦 - 叫咗螃蟹拉麵同埋豬骨湯拉麵例牌相當好味，餃子就麻麻哋豬肉好騷。佢有杯飲品 - 凍白桃味焙茶呢個就兩次都有飲都幾好飲值得推介。講返服務，第一次係正常不過都唔覺係米芝蓮服務。6月19號呢次去就直頭要摘星。男服務員亦都係其中唯一一位，冇態度冇服務冇笑容。其實真係唔係好明做服務性行業為何冇服務嘅態度？冇聽劉德華講嘢嗎? …查看更多

見到黃埔有新餐廳第一時間去試。今日冇訂座，去到順利有位，仲坐咗個好舒服嘅卡位添。先講服務，全店都是較為年輕嘅店員，服務OK，有部份比較生手，不過也不錯。唯一係全店員工包括鐵板燒師傅都冇戴口罩，目前社會環境嚟講有少少唔係好習慣。嘢食方面鐵板牛舌同埋美國安格斯牛肉薄燒唔錯。另外叫咗$98嘅聖子都相當大隻、煮得好惹味。另外兩款就麻麻哋 - 大阪燒唔係好似大阪燒。可以喺裏面加炒麵，但係唔係大阪嗰隻炒麵有啲怪怪地，同埋有隻煎蛋喺裏面。另外一個較為唔抵嘅就係關東煮 - $22一個項目咁佢就寫咗啲項目名，例如魚蛋蘿蔔蒟蒻嗰啲。咁我哋叫咗五樣嘢諗住$22都有兩片掛⋯⋯ 點知嚟到係$22一款，即係一片魚蛋一舊細嘅蘿蔔 etc。嗰碟嘢就$110⋯⋯ 得五舊仔嘢、又細碟、關東煮湯又冇味。呢樣大家食客要留意啦。整體經驗都唔錯嘅，可以試吓。…查看更多

住咗喺黃埔超過10年，最初都會去吓和民嘅。後來發覺環境有少少污糟就冇再去啦⋯⋯ 呢幾年疫情。咁最近見市面回復正常，就再去試吓囉。嘢食都唔特別出色㗎啦，不過真係日日出街食飯無飯家庭嗰種就乜都試吓囉。嘢食瘟瘟沌沌不特止，服務態度又差！咁其實點解要做餐廳呢又冇服務嘢食又難食。叫咗一碗叉燒拉麵，拉麵最忌冇湯，咁佢又真係中咗喎！唔明點解要用隻咁細嘅碗放拉麵，因為個碗太細所以又冇乜湯！咁食物質素就梗係差啦， 10分滿分呢碗拉麵係3分都比多佢。叫咗一碟餃子咁餃子就正常。屋企人叫咗一個牛肉石鍋飯嚟到都幾夠熱嘅，但係就有啲乾冇汁的。都食咗咁多年知道佢哋會有鰻魚汁所以就問夥計攞少少鰻魚汁。咁呀嬸嬸服務員就拒絕給予鰻魚汁，因為我哋冇叫鰻魚。環境依舊不乾淨，因為佢喺地牢又不見天日，另外裝修十年如一日沒有翻新過。咁樣？等佢換咗個廚師先再去啦…查看更多

前身係左麟右李，跟住改咗名叫做滋味小廚。幾個月前執咗而家又開返，變成另一批成員同埋廚師。翻新咗少少裝修，裝修就唔太特別。嘢食就相當有驚喜！本身住喺黃埔當然有乜嘢新嘢一開，就即刻去試食。先講個招牌炒米粉，我諗係我喺香港食過最好味嘅炒米粉！好香好有心機，食到底都冇油，蛋香四溢，米粉爽口，屬於必叫。跟住有一個好特別嘅舊式屋企餸，我諗而家啲媽咪或者工人姐姐都好少煮；就係爆漿窿邊蔥油荷包蛋。聽落平平無奇，但係好有懷舊感；食返童年回憶都抵啦。再加上面頭嗰啲蔥油超級香。另外試咗香妃雞，真係雞有雞味；大家不妨試一試。另外佢啲湯都好好飲，試過胡椒豬肚雞湯相當濃郁；另外亦都試咗佢個例湯⋯⋯係蓮藕湯好有水準90分以上。仲試埋佢個濃湯勾翅、$198幾抵亦好濃郁，勾翅就OK啦咁嘅價錢。都推介你一試的。…查看更多