Eva_2834的個人專頁

肚餓經過又未到食飯時間，就入去寶記食返個套餐A,B。腸粉，燒賣都好食，魚蛋無腥味豆漿要少甜，味道正正常常。食完覺得唔夠喉，再加多咗個粉果同咸豆花，咸豆花有蝦皮、榨菜、紫菜、芫荽（走）豆花好滑呀，可以一試嫁。食咗兩啖先記得影相見之前啲食評都好差，依家舖頭有改善，有3個姐姐都好有禮貌，有抹枱無烏蠅！我哋入舖叫嘢食已經坐咗8成客人，街坊小店，經過花墟覺得餓可以去試吓呀，起碼我覺得呢間啲燒賣唔係實的的咁嘅，腸粉係幼身嗰款。…查看更多

深水埗一間新開嘅米線舖頭，唔知係咪新開嘅關係，舖面非常乾淨衛生見到米線關注組介紹，就過嚟試吓。叫咗兩碗金湯酸辣湯底BB辣，我個碗要咗3餸，豬紅、萵筍同腩肉（餐牌上邊寫住招牌必點），又真係幾好食，不過偏肥。另一碗都係腩肉、蟹子丸（唔好食。。。）同通菜。金湯酸辣湯BB辣原來都幾辣，或者我哋兩個唔係好食得辣掛，食到滿頭大汗下次要嚟試下招牌小窩米線同蟲草花雞湯米線先！希望餐廳可以保持水準，唔洗食3哥譚仔啦…查看更多

落咗巴士，諗住去個廁所，準備好一切就開始出發。但有少少開始肚餓。。心諗茶水亭會唔會有辣味海鮮杯麵食呢行埋去睇吓個餐牌，原來有餐蛋麵，魚蛋燒賣。。今日天陰陰涼涼哋又有啲餓，係郊野公園竟然有麵食，實在太大誘惑，就叫咗碗腸蛋麵同魚蛋燒賣。比完錢叔叔叫我哋搵位坐，佢會攞碗麵埋嚟比我哋，唔洗5分鐘碗麵已經煮好，雖然係普通嘅福字麵但係叔叔煮得好彈牙，隻蛋仲煎到條邊好香脆，腸就係一般嘅腸仔。魚蛋比較淋，但係唔腥嘅，燒賣就普普通通，喺荒山野嶺有碗熱麵食同有魚蛋燒賣食已經係清泉多謝叔叔煮左碗好食嘅麵比我醫肚，好彩食咗碗麵先上山，如果餓着睇怕都好難完成今日嘅旅程…查看更多

今晚隔離嗰位收工無收得咁夜，去咗尖咀搵食，本來想食韓國菜，誤打誤撞無睇到OpenRice，係對面街見到個招牌簡單主意，我哋就話有幾簡單呢，過去睇吓先。見到原來係食定食為主，見啱心水我哋就入咗去食啦。我哋揀咗一陣，叫咗一個黑椒蒜汁牛舌定食。定食包括有前菜、沙津、麵鼓湯、白飯同甜品。牛舌真係有驚喜，係牛舌芯，是牛舌中最軟腍最軟滑的位置伴碟係洋蔥，但係偏生食落有啲辣，如果煮熟少少好再好食啲，前菜係少少辣嘅蓮藕，麵鼓湯夠熱唔會太咸，甜品係蕨餅。隔離嗰個叫咗安格斯牛小排定食，有啲肥同有根，如果生小小會好食啲，個汁係豬扒汁，好似唔係好夾加咗碟和風炒野菜，主要係以椰菜，紅蘿蔔絲，鮮冬菇片為主，唔會食落好油好味精，其實都幾大碟。加咗兩杯台式飲品名$15，熱芝士紅茶同熱抹茶珍珠奶綠。芝士奶蓋同紅茶底好夾，抹茶珍奶味好出珍珠又好食難得係夜晚禁堂食嘅前夕食到餐滿意滿足嘅晚飯無浪費到我哋個quota ，回頭率極高！我哋仲同老闆講你哋啲嘢好食喎嘢飲又好飲，老闆謙虛咁話，係師傅整得好食。btw嘢飲係老闆整嘅簡單主意Simple一啲都唔Simple，而且好味坐得又舒服，靜靜哋播嘅歌係日本pop song，而且仲要係YOASOBI，大きな愛…查看更多

之前經過同睇到食評因為佢嘅燒牛肉而排隊嘅，上次嘗試過排不過唔成功，不過今次6點幾就到店外排隊，雖然係短短嘅隊等咗30分鐘總算入到去食啦。我哋叫咗一馬拉盞炒通菜少辣，唔知係咪我唔係好食得辣，都覺得好很辣生蝦，我本身唔食生嘅蝦所以比唔到評分，但我身邊個位感得個炸蝦頭好食過啲生蝦泰式咖喱炒青口，青口食得出係雪藏青口，好大陣雪味，完全唔入味。咖喱還咖喱青口還青口，咖喱又唔辣上面有一大層油，完全唔好食！最期待嘅燒牛肉最尾出場，所謂期望越大失望越大，有比較就有傷害。燒牛肉熟過龍，牛肉多筋無咩肉汁而且都幾韌吓。大家可以參考吓我另一個食評，個份燒牛肉就真係叫好食啦！呢間餐廳嘅唯一好處係比較大同光猛，食物質素就。。。最後我身邊個位講咗句，排唔到隊食唔會有損失…查看更多

一直有bookmark到呢間西餐廳，之前walk-in 無位食唔到，今日team lunch提早一日訂位，終於食到啦。我哋一行8人坐係C區，安排咗我哋坐入房，靜靜哋又唔怕我哋大聲講嘢嘈親人前菜沙律比坊間一般西餐廳大碟，本人唔食得菠菜，餐廳特別幫我整咗一份無菠菜嘅，由於今日無三文魚，餐廳安排咗炸蝦比我哋。北海道粟米忌廉濃湯，熱辣辣而且味道好香甜，唔知係咪日本粟米嘅關係，特別好飲，仲有粟米已經打爛融入湯中。如果麵包同湯同一時間上就好啦，我哋食完個包先上餐湯，侍應特別推介蕃茄麵包，又幾香咸咸哋有淡淡嘅蕃茄香，幾好味嫁！主菜我叫咗炭燒美國特選黑毛安格斯肉眼扒配牛肉濃汁，我叫咗走薯條。塊扒好多肉汁，五成熟唔會overcooked，炭燒好香，但我就覺得有少少奀嘅，牛扒我就覺得無咩驚喜，中規中矩啦，伴塊啲豆好好食。我哋加咗兩份甜品，法式芒果拿破侖加$38，酥皮好脆，吉士醬一啲都唔甜再夾上香甜芒果粒，唔會食完有好漏嘅感覺，淺嘗試吓感覺都幾良好，我哋4個女仔分一份，但如果一個人食晒一份就會好頂胃午餐前菜、餐湯、主菜加場餐飲$168加一，銅鑼灣以呢個價錢呢個份量，侍應服務好好，餐廳又坐得好舒適，音樂又唔太嘈吵，係一個享受午餐嘅好地方…查看更多

之前買宵夜食買過呢間泰國小店嘅串燒，味道都唔錯，而且上次宵夜時段都好多客人幫襯！尋晚早落街食晚飯，見得一枱堂食客就坐低咗堂食，雖然係露天，但天氣涼涼哋都無所謂，而且泰姐姐好好人即刻開枱比我哋坐:)我哋叫咗一碗海南雞金邊粉，雞同粉嘅份量好足夠，而且又夠熱唔肥膩，仲有棷菜係粉下面，好夠食！冬陰功海鮮湯飯，味道幾好唔會太辣，唯獨係海鮮少咗少少咁，得少量嘅蜆同魷魚，係普通嘅雪藏貨再叫多咗燒金菇牛肉卷、燒雞腎沙嗲醬同泰式奶茶。泰式奶茶少甜必推介下次再試吓燒牛肉同燒雞先，好食唔洗過九龍城食，排晒隊嗰間都唔好食嘅。。。呢間兩個泰姐姐都好有禮貌，會問你好唔好味，同味道啱唔啱食咁。好食嘅小店真係要幫襯多啲…查看更多

今日係foodpanda 見到呢間外賣有印度捲餅，又未食過，就諗住一試啦！叫咗兩款捲餅，印度香辣羊肉卷同印度烤雞卷。我就揀咗印度烤雞卷，好大條，大過隻男仔手。醬汁啱啱好，唔會滴到濕晒而且味道好好，同埋好多菜初時以為啲肉會係一片片，但原來係一粒粒。。。遴迍嘅我初時係食得有啲呢he。。。我5點半食咗返學，到夜晚9:30放學都未餓，可想而知幾咁飽肚，我本身唔食羊就無食到印度香辣羊肉卷啦，但身邊個位話烤雞嗰款入味啲好食啲如果唔想食飯麵，揀呢個捲餅真係唔錯嘅選擇！…查看更多

星期六難得出街食餐飯，隔離嗰位話帶我去九龍城搵好嘢食依家有屯馬線真方便，出地鐵站好快就可以搵到好嘢食。本身唔係諗住食呢間嘅，基於時間嘅關係，條人龍又太長，就轉戰咗去試泰式燒烤！本身係為咗食泰式燒牛肉，呢間都有得食，就叫咗呢樣。牛肉燒到半生熟，肉汁豐富又有牛味，鍾意食牛同食肉嘅朋友一定要試吓！咖喱炒蜆配泰式薄餅（可配蒜蓉包）大蜆好新鮮無沙，個咖喱汁一啲都唔辣，如果有啲辣味會更好，配上呢個泰式薄餅真係一流，脆卜卜同出面食開嗰啲薄餅唔同好有驚喜，加埋個咖喱汁一齊食真係不得了（唔係好影到啲蜆添）有牛肉有蜆點都要叫返個菜，泰式炒雜菜，少少辣，正正常常，有椰菜、芥蘭、椰菜花、西蘭花、秀珍菇、芽菜等等。飲品叫咗椰青同青檸梳打美中不足係甜品得芒果糯米飯，無其他選擇。糯米飯太飽了所以無揀到，下次有機會再試吓。埋單$382，價錢合理，飽飽又滿足！雖然舖頭細細，坐得好舒服就一定唔係嫁啦，但係啲泰姐姐都好有禮貌又跟單問我哋有咩嘢未嚟，食物質素又好，想食好嘢可以嚟試吓！如果多兩個朋友嚟食就可以試多幾樣嘢食啦下次試吓鐵板蠔仔，見到隔離枱食好吸引。…查看更多

返學前食碗拉麵，係某個apps有半價優惠就一試！初時以為6點早食飯會少人啲啦，點知都位滿曬客人。店員都好有禮貌，有客人啱啱走，抹好張枱就安排入座。叫咗一碗冠軍黑醬油拉麵，十分鐘內就送到上枱。個碗好有驚喜，係多啦A夢！湯底夠熱，麵質彈牙，叉燒肥瘦均勻，唔乾喎，可惜今日無半熟蛋供應，轉咗多塊叉燒。個湯真心講其實無咩特別同驚喜，勝在夠熱同唔膩，唔會食完有好溜嘅感覺。但係話係冠軍黑醬油我又唔係好食得出下次試吓沙律同餃子先，希望下次食拉麵有返半熟蛋啦！走嗰時影一影個餐牌…查看更多

8點幾太肚餓，到咗12樓聞到好香，又唔想諗食咩，男朋友話不如就試吓呢間鰻魚飯啦。不嬲係香港食鰻魚都無咩期望，但呢間真係不可一不可再叫咗一碗雙層鰻魚丼$108（無影到相），一份鰻魚飯三食$88，單點任何飯類配赤味噌湯及漬物。雙層鰻魚丼5分鐘就上枱，雖然好快有得食。。。鰻魚燒得一啲都唔乾身，爆多骨同埋好腥，說好的備長炭燒呢鰻魚飯三食等咗20分鐘，一打開個蓋啲鰻魚係一粒粒，得六粒。。。笑咗出嚟，可唔可以搵人解釋一下點解要等20分鐘呢奉勸各位，要求其食一餐飯都唔好揀呢間，我寧願揀food court。日本過江龍備長炭燒鰻魚飯專門店喎，做衰曬個名！…查看更多

星期五難得準時放工諗住去食好嘢，落差好大！7點前到，入座都唔洗排隊。即刻入座，座位好逼狹，無咩冷氣，餐牌油淋淋，真係唔係好想去揭個餐牌，張枱又有油跡，連杯水都係有油嘅。嘢食5分鐘就上枱，唔洗等好耐。叫咗一份板燒吉列牛$108+$38配定食一份秘燒黑松露吉燒牛$148+$38配定食定食（配飯素+湯+糖心蛋）個湯原來係昆布湯，都唔知飲咗啲咩，唔比好過比睇返啲食評先知自己食咗係黑松露同飲緊個碗係昆布湯囉。。。叫咗兩枝嘢飲，柚子汽水同蘋果碳酸各$26，同埋一碟手羽先(4只)$48。食食吓冷氣機滴水。。。成場坐滿人，一人一個板燒，成場都係油煙味，由頭臭到落腳，只係想快啲燒晒食晒啲牛，嗱嗱聲離開呢個地方！唔好意思，嘢食份量好夠嘅，但係以呢個環境，呢個價錢唔值囉，成身臭，今日三十幾度，條街仲涼過間鋪，無下次囉，bye!…查看更多

前兩日搭巴士經過見到新開咗新食店，諗住身邊嗰位唔洗加班去試吓新嘢啦，太子附近都無咩台灣食店嘅。一開門入去樓面得一個高嘅男侍應，佢無安排我哋入座，叫我哋自己搵位座。餐廳入面嘅佈置行文青路線，樓底好高，坐位都好闊落好舒適。落咗單上菜時間會慢啲，都等咗一陣，如果加單係要等超過15分鐘嘅，建議叫嘢食落單就一次過啦！我哋叫咗4樣嘢食，跟餐兩杯飲品。土匪肥牛飯(辣），洋蔥好惹味，身邊嗰位話洋蔥好食過牛肉，合格嘅，但佢話食完好滯。。麻醬乾拌麵，其實呢我本身叫蔥油乾拌麵嘅，但都整咗，廢事浪費食物叫人再整過呢，麵好大碗，唔會太乾哽嘅。超司肉鬆蛋餅，入口有淡淡嘅肉鬆香，蛋餅入面有起司生菜上面有沙律醬，可惜無咩肉鬆，如果女仔鍾意清清哋可以一試，重口味人士會覺得有啲寡。因為食得有啲滯，後加咗一碟涼拌茄子。諗住涼拌會係冷盤點知係熱嘅，仲要好好好油麗，好似食咗好多啖油入口咁，食咗半碟唯有放棄。。。飲品就正正常常無咩特別，凍冬瓜茶跟餐加$5，玫瑰珍珠奶茶加$10試咗4款嘢食，但只屬於平平，啱啱新開希望有待改進啦，但地方係好坐嘅！…查看更多

難得母親節可以一家人外出晚飯，揀咗呢間西餐比屋企人試吓，唔洗成日節日慶祝都食中餐。我哋揀咗4人餐開心食，睇咗大餐牌覺得呢個餐幾抵食，選擇困難嘅我嘅又唔洗點揀食咩，十分好餐湯中規中矩，沙律好大碟好好味，牛扒五成熟啱啱好，保持到肉汁唔鞋口，豬扒同意大利海鮮飯都幾好味，黑松露雜菌意大利粉就有啲漏，食淨咗少少，唯獨是甜品差啲，係現成嘅布甸，無咩驚喜啦。之前未曾食過呢間，難得味道又幾好，媽媽都好滿意，而且安排我哋坐嘅位置為都好舒適，店員又好有禮貌會再嚟幫襯！…查看更多

今日行完山，係荃灣諗緊食咩好，不如就過葵廣掃吓街啦。自從疫情都好耐無過嚟食吓嘢，又除罩又戴罩食嘢真係幾麻煩，好彩我哋搵食嘅時間又唔係好多人，唔知係咪假期嘅關係都有1/3嘅舖頭都無開。食完手撕雞之後轉過嘢飲舖見到有間泰國人開嘅舖頭，有賣海南雞飯、船河、喇沙等等。見到芒果糯米飯突然之間又好想食，有兩個size細嘅$20,大嘅$30就買咗個細嘅試吓。泰姐姐好有禮貌即刻整俾我哋，熱辣辣芒果又甜又好味😋，真係值得一食。跟住再叫咗兩串串燒食，一串燒雞軟骨，一串泰蘆筍煙肉卷，串燒有少少沙嗲汁幾好味，雞軟骨可以再燒多一陣香口啲會好食啲，蘆筍煙肉卷就好好味啦下次再有幾會幫襯，再試埋其他嘢食先！…查看更多