dorothysheung's Profile

食物質素差，服務零分。蕃茄豬骨湯，係純白色湯加兩舊蕃茄，只飲到味精味，湯面一層厚油，以為自己黎飲油唔係飲湯。芝士忌廉海鮮焗意大利粉，叫小忌廉，出嚟都係被忌廉怒浸。蟹肉意大利飯，好野，蟹肉保持腥味。一早已落order 兩杯咖啡，食完收哂碟都未上，叫左兩次先肯拎出嚟，伙記仲要打喊路🥱即磨咖啡，幫你加埋奶入去，即磨唔係應該要問客要唔要奶架咩？不能再去了！…Read More

之前食過晚飯唔錯，諗住未食午飯就行入去試下下午茶。無乜人，任坐。個下午茶餐牌，同早餐基本上一樣，一款點心/配一碗粥，或者配個蒸飯。再唔係就兩款燒味配粉面。好啦，得一個大叔侍應，好快手就黎落單。 望住隔離枱叫粥既都五分鐘內有野食， 心諗可能我叫點心配蒸飯耐啲呢！點知坐左十五分鐘，隔離枱都食完抹咀，我就仲吹緊冷氣。咁啱有幾個人入黎食下午茶，叫點心配粥，殊不知點心阿姐已經好快回應，大叫無糯米雞，無春卷，腸粉未熱，無蒸餃，要其他點心或者蘿蔔糕好無！嘩，呢啲仲唔係勁過廚師發板，使乜睇餐牌呀！－聽到，心知不妙，應該漏左我張單，仲可能已經乜都無， 我要幾經大聲叫阿姐大叔先有人應我點解廿分鐘都無野到。大叔就話阿姐無睇單！😑好喇， 大叔就捧左一份粉果同蒸雞飯黎。循例我就緊係發下脾氣話等左咁耐其他枱都走哂啦，阿叔道行高呀，一句唔好意思都無就行左去。食物質素其實真係麻麻， 唔好食又唔太難食，油多。 粉果內花生多，三個粉果，21粒花生（可能因為我唔鐘意食花生）🙄其實呢個價錢食呢個貨色都算唔貴（$40）不過啲服務認真唔得。個個都時運高唔關我事咁款。…Read More

最近電視節目介紹呢間，話有特價餐益街坊，好，又去試下。午市，得一個侍應，已經見到佢𢲡手唔成勢，顧得外賣又做唔切堂食。等左廿分鐘先入到去，好快睇完餐牌就叫野食，點知個侍應幫遲過我地入黎既一枱寫野先都唔幫我地落。好喇，落左order等左好耐，隔離枱食哂我地啲野都未出現，問呀侍應點解，佢答：「特價餐係咁耐架啦」好，忍你。終於餐黎啦，嘩，豬梅扒配薯仔，塊豬梅扒好似柴皮咁，咬唔開架！根本食唔落肚，最後唯有放棄。個午餐成$88，一啲唔值！…Read More

想飲靚咖啡，筲箕灣想搵一間有咖啡cafe唔易，難得今日依間有開門，一於入去食個全日早餐同歎咖啡。早餐牛角包鬆脆有包味，炒蛋夠滑，雙腸同火腿煎得夠香，睇得出俾左心機做。到杯咖啡啦。Americano 夠香濃，苦味剛好, 份量有返咁上下，啱哂我呢啲咖啡怪。仲有杯cappuccino ，個拉花真心要讚。❤️形配合情人節。唔講都識做，抵讚！…Read More

之前試過食下午茶$38碗麵已經覺得大件夾抵食。今次黎試吓晚飯又做成點。懶得諗，三個人叫二人套餐，粉絲湯，金邊粉，恰到好處。炸蝦餅外脆內軟，馬拉盞炒通菜，竟然唔太鹹。見到隔離枱叫炸鱸魚，脆卜卜。鹵水豬手色靚味香，仲有泰式煎蛋蠔餅，大過塊面！正！…Read More

聞說厚切豬扒唔錯，所以叫咗個豬扒麵。果然，塊豬扒不單只厚，仲塊面咁多，肉厚多汁，正到不得了。再叫碗小雲吞麵，一樣高水準！價錢又唔貴，埋單都只係$75，可以再返撻…Read More

見話gimmick 七色餃子，咪走入去試吓，人唔多，得一枱，兩個伙記好得閒㩒電話。$39，五隻餃子加面底，一包紙包飲品餃子自選，幾乎全部豬肉餡。顏色餃子皮，D顏色好假好怪，咬落去，皮又厚又硬，豬肉有D酶，唯一可接受係個麵。可一不可再！…Read More

環境衛生，等位又唔太耐。食物，估唔到碗麵底咁大，真心喜出望外。叫咗菜肉餛飩，用料十足無馬虎。高力豆沙，真心高質，紅豆好正！入單同上菜都快，你問侍應意見又有心答，唔錯！…Read More

新開，見多人買就試下。三隻味，原味， 綠茶， 芝士有得試食原味， 其實試完已經覺得平平無奇，同普通牛油蛋糕無咩分別。 不過一場黎到， 就買半個綠茶味返屋企。同一時間， 都有位女士走入去， 佢問現場兩位阿姐個蛋糕用咩牛油， 兩個呆左唔識答。再問佢買左返去食唔哂點儲存，收銀阿姐就好笑啦， 答：「點會食唔哂，幾分鐘食完啦！」如是者重覆左兩次，位女士0左姐。另外切蛋糕阿姐又係可愛，堅持自己將D蛋糕切成正方形，半個平行切只可切三件不可四件，話個蛋糕好鬆會散喎。好，返到屋企開黎食，完全唔覺得佢講既鬆，實的的就真！…Read More

平日去，唔使點等。點左食物，上得好快呀，因為係一次過將你點既上哂擺滿張枱（除左冇上甜品），幾乎D野跌落地，郁都冇得郁。講真，自己煮，好難會好難食，係炒菜個醬汁有D怪。 好啦，食到中途，叫餐飲啦，佢又幫你落埋雪糕，仲要即上，嘩，望下我張枱D生野先好無，用下腦都知點做啦，叫我煎埋D雪糕呀！好啦，D女想食pancake,一早落order都有講，中間再問D侍應小姐都話有。侍應小姐要我早埋單，好，冇問題，埋左。繼續食啦，差不多食哂D熟食都好飽啦，跟著咪問下個pancake 囉，點知遇著個「特別」侍應，問佢有冇，整左咪，有冇入單，全部答唔到，又唔check單，只係儍更更問你係咪要，喂有入order咪要囉，冇咪唔要囉。「特別」來回行左三次先話原來一早係冇入order。嘩，咁你早出聲呀，冇咪唔要走囉，點知「特別」話佢第二次問我地要唔要時佢入左order,話係我地話要，喂，你條問題問我「係咪要」，咁我以為一早有入order就梗係要啦，我點知原來冇架呢，我冇睇清楚張單係唔啱，但如果你第一野就幫我print張單睇，咁咪無事囉！醒少少啦！…Read More

食大家樂從來唔需要有期望，但點都諗唔到喺收銀處已經遇到失望。點左餐，攞左八爪魚同wechat出黎準備儲分同俾錢，殊不知收銀大嬸唔知係咪唔識儲分機制，叫我拎開張八爪魚拍wechat俾💰，我已經再三講儲分，大嬸好似時運高聴唔到咁，重複「拍wechat」，好啦，拍完啦，再問D分點儲，呀，佢突然瞓醒喎！同我講儲唔到啦，因為無先拍八爪魚！ 跟著佢好「有禮」大聲咁話，「咁咪我錯囉，對唔住囉！」（又重複啦）嘩！對唔住講🉐️有禮貌D唔🉐️架咩？真係你錯呀嘛！拎你去再培訓都哂時間哂💰！…Read More