lukahchoi's Profile

尋日喺聯和墟行左一陣搵嘢食，後尾見到冰冰一叮有呢個餐，先至42蚊，平過呢區一般嘅午餐幾蚊，即刻入去幫襯。味道ok，最緊要係抵食！環境就一般啦，唔好期望好乾淨。佢亦有炸髀揀，不過我上牙肉仲有啲腫痛，都係食鹵水髀算了。…Read More

星期一晚與女友到上水中心食delifrance，順便用埋張50蚊優惠卷。原本無咩期待，因為上次去荔枝角嗰間唔好食，但估唔到上水呢間好香口。尤其是個焗薯，好多芝士😋。其他嘢都好好味😋。但個蘋果茶有啲失望，聞落好香，飲落好淡。成個餐好似170定180蚊左右，減左50蚊優惠卷，每人六七十蚊，ok啦。佢仲送張50蚊優惠卷，十月底到期，幾正呀~ 下次又可以來食過 而家經濟環境咁困難，有時又要逼住出去食，有優惠嘅地方一定要去。…Read More

今晚順豐斷更，8至10有時間，女友話過來陪我食飯。睇左一輪球場側邊嘅餐廳，最後揀左呢間，貪佢夠靜夠光猛。而且價錢唔算貴。我地點左豬肉賓海同牛肉炒檬粉。點餐後，我地飲水等餐，點知我杯水入面有粒飯粒，即時胃口無左一半，不過叫職員換過杯水俾我，又好爽手嘅，態度ok。我地都唔知賓海係咩來，食左先知係啲蒸米漿嘅嘢，上面有葱有油有花生有薄脆，再加豬肉，用生菜自己包住點酸醬食，都幾好食。女友話只食過湯檬，未食過炒檬，所以點來試下。食落都香嘅，係唔多夠鑊氣。其間同女友一齊回想中大有得食檬粉，都真係有啲掛住。開頭仲驚緊夠唔夠飽，食落又幾肥喎，夠飽。埋單女友話請我總數好似122蚊，平均每人61蚊，差唔多啦。一兩個鐘後，女友話佢個口仲好大陣味，我又唔多覺太大口氣。食唔慣重口味嘅朋友，要注意點啲清少少，同飲多啲水。…Read More

星期三送左日頭8至3共7個鐘熊貓，先得嗰10張單，嬲嬲地試下新餐廳。台豐喺聯和墟唔係開左好耐，但都唔少客同單。佢下午茶有三種嘢可以揀：麵款、小食同多士醬款。我揀左肉燥麵、炸雞同朱古力醬多士。朱古力醬搽多士好少有，我未食過，食左之後覺得好正。佢另有我最愛嘅花生醬嘅，但朱古力醬未試過，果然無令我失望。嘢飲我叫左杯薑母茶，暖下胃，驅下胃寒。杯茶夠薑嘅辣味，正！成個餐38蚊，價錢ok。食完後，居然去到十一點幾先肚餓，下午餐夠頂一個正餐，抵！…Read More

今日返熊貓8點到3點，得嗰9張單，有啲鬱悶，於是想試新嘢。平時成日中韓家嘅單，又勁多人幫襯堂食，應該味道唔錯，於是落更就過去食。今次點左芝士雜錦海鮮撈麪。芝士味好濃，佢搭左隻青口，嗰種腥味混埋芝士味老實講係有啲臭臭地，但尚可以接受，入到口，食落就唔係太覺臭，啲麪都好食嘅，兩隻蝦同兩條蟹柳亦唔錯。呢個下午茶餐仲送一杯麥茶，成日飲來飲去都係檸茶檸水菜蜜熱朱都真係好悶，飲下麥茶感覺新鮮啲。有啲驚喜嘅反而係個免費泡菜。我一向頂唔順辣嘢，雖然而家練緊食辣。佢啲泡菜我居然只係覺得少少辣，ok喎。42蚊一個下午茶，又飽肚，味道又唔差，仲有麥茶飲，唔錯唔錯。接住我夜晚6至12順豐更，呢個下午茶我3點半食完，居然可以頂到10點幾先開始餓，對於我呢類貧苦勞動階層，真係好好嘅選擇。…Read More

今晚喺上水上完堂，去左洪祖師食紅燒豬軟骨麵，女友叫麻醬手撕雞手工麵。手工麵似烏冬，幾煙靱。但女友嫌啲醬太肥。佢中意飲我碗麵啲湯多啲。我覺得碗麵幾香嘅，港式口味囉，我仲以為係台式。老實講，佢係香，但唔特別，佢啲湯係甜甜地，但我之後覺得好口渴。套餐飲品我叫左柑桔檸檬，女友叫薑母茶，我飲我嗰杯時居然覺得辣辣地，可能酸得滯。我無諗到一杯嘢飲都令我有辣嘅感覺，因為我比較怕辣，一向避食辣嘢，但有乜理由柑桔檸檬會令我有辣嘅感覺？真係唔明。…Read More

尋日中午完更後又去tiffany食。呢個午餐係我至愛。雞皮煎得好脆，加埋個瑞士汁，真係好正。加兩蚊有條香腸，咁就滿50蚊，可以蓋個印仔儲分，儲夠九個印仔，tiffany就喺第十次嗰餐減50蚊，一個月內要儲到先有呢個優惠，我都儲緊。…Read More

今晚做順豐外賣，尾單送靈山村，同個客傾邊度等時大家有誤會而俾佢小。嬲嬲地去甜cc食甜品。見到menu幅相好吸引就叫左佢，真係好好食，夠清爽清涼，下火一流，而且唔貴，38蚊，抵食。…Read More

今晚九點幾鐘落熊貓更，就去瓏門小廚食晚餐。呢間啲職員好好。上次食我食晒啲菜飯，喺度食餸，就畢多一大碟飯俾我，對我呢啲體力消耗大嘅人，真係好感動。喺聯和墟送餐嘅人都知瓏門小廚好食兼抵食。今晚呢個涼瓜牛肉飯，啲牛肉就好嫩，46蚊，價錢ok。我今晚又係最後一個客，阻住佢地打烊，佢地都明白我係啱啱落更，仲傾左兩句最近啲生意。喺呢度，食嘅唔只係涼瓜牛肉菜飯，仲有係人情。…Read More

喺聯和墟送外賣，成日會送到tiffany嘅餐，上個月開始試一次就愛上，真係幾香幾抵食，尤其是佢個下午茶，我次次都叫焗豬扒飯，40蚊，又大又香又唔貴。我試過出深水埗食下午茶嘅焗豬，貴6蚊，豬扒仲要細塊啲，即刻想返聯和墟幫襯tiffany。另外，職員幾nice，幾親切。…Read More

今日同女友一齊去深水埗。女友一早就話來為食公司來食特價飯，15蚊。今日係做緊炒蛋豚肉飯。我地兩個食完後都覺得一般。女友覺得唔夠汁，我都覺，我仲覺得豚肉太肥同埋份量細。跟住我再點多個小食，香草檸檬汁炸雞翼。佢檸檬汁加左少少蜜糖，雞翼外皮又夠香脆，裏面又夠嫩同多汁，好好食，感覺好過個特價飯好多。果然係一分錢一分貨。…Read More

送完熊貓串串香，已經夜晚十點，聯和墟好多食肆都打烊，又唔想食麥當勞同媽子美點呢兩間成日食嘅，見到盈翠仲有開，即刻入去試下。我好耐都無食燒味了，原本打定輸數，咁夜食，一定無咁好食。於是求其叫左個雙餸飯，燒肉加薰蹄。意想不到，燒肉層皮仲好脆喎，點埋佢個黃芥醬就一流。碟飯好食到所有汁都俾我食埋。而且，因為太夜，無咩人，我可以肆無忌憚咁坐張六人枱，好舒服。今晚真係驚喜。…Read More

今晚做熊貓外賣，尾單係甜cc。見到啲食客食啲冰山嘅物體，覺得好新奇，自己又好耐無幫襯，又想食啲生果，於是送完就去叫呢兜朱古力香蕉冰。佢啲冰嘅質感有啲似雪糕，上面有啲七彩朱古力條，好好食。下面仲有啲青色珠仔，一咬爆超甜，好似食緊提子咁。甜cc一向無令我失望。我仲推介俾家人朋友。真係唔錯。我一向中意食雪糕，但腸胃差，一直忍住唔食，今晚忍唔到了，正呀…Read More