colianlouis's Profile

$38買一杯No.6（好似叫「橙柚青蘆薈蜜」），蘆薈粒一陣酸臭味，員工（大約18-20歲嘅後生男仔）態度超差！掛住睇片完全冇望過客人，全程好晦氣講嘢，命令式語氣話俾客人知幾多錢，聽唔清楚佢講嘢，問一問，佢就唔耐煩，一副「X！阻住我睇片」咁嘅樣…到攞飲品嘅時候，冇eye contact+命令客人將單據同飲管袋揼落個桶度，然後繼續玩電話…如果杯嘢好飲，員工態度正常，咁$38照俾冇問題…依家係，杯飲品收咁嘅價錢但係食材有問題（變壞咗都唔知，估計係冇放落雪櫃），恐怕會引起肚瀉，再加上員工態度差劣，完全係倒米！差到係連去換/話下佢，都廢事嘥氣，呢d人冇自省冇自覺，提醒唔到㗎喇，唯有話俾大家知，有心理準備，可作參考。…Read More

大家唔洗試，我已試伏！本身網上見到報道寫住新式涼茶，諗住好有趣，朗豪坊見到有舖頭，就幫襯咗一杯主打：火麻仁拿鐵…點知完全係一個伏！先睇睇佢嘅poster:所以$52都照買…點知我一睇住佢沖竟然係沖粉…加D燕麥奶打熱佢，就話係火麻仁拿鐵…$52，一D火麻仁味都冇…梗係啦！沖粉㗎嘛！問佢：「咦，唔係有拉花㗎咩？」職員：「er…要加咖啡底先有」我：「但你呢張圖有拉花」（指住張相）佢：「er係啊，你冇加咖啡底吖嘛」我：「咁你唔早講？張相又冇寫…」算，廢事拗…照飲囉咁…杯嘢完全唔熱！連一般咖啡溫度嘅要求都冇，只係暖暖地…咁樣嘅嘢，收我$52，我買一支火麻仁都係$30咋，好飲10倍！量多過佢5倍！好少寫食評，但今次伏到我唔寫差評都唔得！…Read More

見你哋一個二個話個茶底好香，我睇openrice其他分店都有人咁講，咁我路過就買一杯試下啦，點知杯黑糖大紅袍珍珠奶茶令我超級失望！！！完全冇茶味不但止，D珍珠仲要係硬嘅，亦都飲唔到黑糖味，唔好講話黑糖嘅香味啦…細細杯仲要賣$29， 換算起平時大杯裝嘅話，呢杯已經要$39喇！唔會再番轉頭！ 如果各位要飲珍奶嘅話唔好考慮呢間，否則你絕對會後悔！如果唔係今日打風我冇得喺街舖買(遮都反埋，唔好講等嘢飲)，我真係唔會試……Read More

小妹乃係第一次使用openrice填寫食評，因為覺得食品好值得稱讚，所以開個account寫下佢有幾好食…呢個舖位前身係蛇王弟，同埋台式飲品+串燒， 依家老闆主打海南雞飯同埋砂鍋翅…我係第二次嚟食呢個砂鍋魚唇翅，自從試咗第一次之後就念念不忘， 一來佢唔貴 二來有質素，我地去相~入面有雞絲、迷你帶子、魚唇同埋仿翅。真係比得上酒樓嗰d另外佢有個海南雞飯，我亦都好讚👍🏽已去骨，肉質嫩滑，脂肪比例較低，好值得我呢個「海南雞飯迷」去開餐!!因為太好賣，所以我8:30左右去到嘅時候，已經得返一個飯，我就叫咗佢嚟食，係我第一次食呢度嘅海南雞飯，真心推薦😋( 我太肚餓所以冇幫雞飯影相，而上面嗰張砂鍋翅嘅相，係我上次影嘅)我係兩個人去，但淨返一個飯，老闆特登「畢」大碗d飯俾我，仲問我夠唔夠食，然後額外送咗兩碗雞湯俾我哋飲，非常好人😃一個飯加碗翅都只係70蚊(有找)咋!請注意：裏面位置唔多，座位亦唔稱得上好好坐，但佢一個餐又好食又咁抵，都好正啦～(我唔係打手，老闆亦都唔識我，我係真心覺得好食而推薦)…Read More