honam1984's Profile

屋企人生日，見到唔少元朗人都話呢間好食，所以就試下，book枱既時候問我地要唔要留隻豬手，問得應該都好食，咁就留左一隻。去到佢有個推介，$99.9有12oz牛扒，咁抵梗係試試啦，再叫左個蟹肉沙律，黑毛豬鞍，3個主茶加錢包湯，蒜蓉包同飲品。個湯幾好飲，大家都話好特別，蒜蓉包黎到仲出煙既，唔係好多間餐廳做到。飲完湯等左一陣，豬手黎啦，好脆，好好食，留一隻既決定係岩既。之後幾樣野都到啦，最後係沙律，呢樣有小小美中不足，估唔到沙律竟然最後到，但好食既。牛扒: 有小小似港式扒房用粉醃林既牛扒，叫8成係做到8成既，味道一般，但咁既價錢算係咁。Pizza: $68所以好細塊，見到打左個突，但咁平都冇理由俾番pizza hut個size你啦。豬鞍: 好食，值得一試。4個大人埋單$800，食物又有質素，難怪一致好評。…Read More

之前去稻香打邊爐，見隔離枱食隻帝皇蟹好似好吸引，望望張海報，$136斤，比起之前喺另一間酒樓食既價錢仲平，就諗住遲下去試，今日終於有機會啦。6點零去食頭圍，一坐底阿姐都提我地去揀左蟹先，因為要蒸成半個鐘，過度去見到有好多蟹，揀左隻4斤4，我地4個大2小差唔多啦，之後再叫個晚餐三寶，有半隻雞、炒班片同海鮮雜菜煲。一路等見到都有幾枱食帝皇蟹，我諗應該都唔差先咁多人叫。隻蟹係完隻上，有d酒樓會喺隔離幫你剪埋，我就鐘意自己黎，酒樓有提供較剪同膠手套，算係貼心。，但其實膠手套作用唔大。隻蟹好好食，小小海水既咸味，又有蟹膏，剪完一隻腳，d蟹肉多到飯碗都裝唔哂咁劑。熟既程度我覺得岩岩好，其餘三寶質素都唔差，加多2個白飯埋單$1100左右，隻蟹未計加一就$576，個個睇到張單都話抵，絕對可以encore。…Read More

星期日行完街，喺旺角等巴士打黎訂6:30枱都仲訂到，好彩有訂定，黎到已經有人等枱。叫左個最平既牛胸腩餐，因為其實我地食佢既牛、豬同雞都係一碟起兩碟止。星期日始終人多，次次出去拎野食都有野食係fill緊，全場都坐爆，又唔係太感受到人地話餐飲生意差左喎，可耐任食場又唔同啦。野食都係正正常常，冇咩特別，但食完正餐食甜品，未夠8點已經冇哂雪糕筒，好似又太快喎。到埋單先知原來星期六，日冇左9折，而且佢本身比平日貴$10，我地一家4口差唔多等於1個小童價錢，下次都係平日食啦，哈哈哈~…Read More

一排冇黎食，又係星期六既early dinner，一坐底個侍應就upsell是日special - 拖羅。$188包赤身，中拖，大拖，雪花拖羅各一件，再加3件拖羅卷，老婆話佢應該夠飽，所以叫一客，我就叫壽司加烏冬既定食。另外見到有北海道激甜粟米刺身，$32一客，又試試佢。拖羅黎到侍應仲提醒師傅已經喺上面搽左自家製醬油，老婆逐件食，佢話食得出越黎越肥同埋好好食，絕對值回票價。個粟米係好甜，但得4小件，份量略嫌太少。點都好，天水圍食日本野，佢暫時都係最佳選擇。…Read More

中秋前同兩個好朋友食飯，見一排冇黎過就食放題。訂左8:30，黎到見到都多人等位，又有個牌寫住full哂，心諗都冇新聞講到市道咁差啫。入到去見到啤酒得番d平野，有小小失望，到點野食個時，見到有幾樣新款食物，但諗番好似都係用d平食材去代替貴既食材咁，睇黎真係有影響喎。野食保持到一貫水準，黎得快，冇點漏單，成晚係漏左一個牛油粟米，算好好啦。但一過左9點，我出去拎野飲就望到成個場有一半係吉枱黎，唔知係因為臨近中秋定真係因為市道唔好啦。點都好，元朗天水圍黎講，放題係呢間最抵食。…Read More

老婆生日，城景閣有4送1優惠，又有紅白酒同啤酒任飲，決定黎試試，因為我本身唔太鍾意食自助餐得一杯餐茶，好似食得唔夠盡興。Openrice訂枱可以揀6點呢個時間，上到去話6:30先可以開始食，感覺有小小奇怪，但唔緊要啦，同小朋友去完廁所settle down都差唔多。野食水準中上，海鮮方面，生蠔因為唔係即開，所以唔使點等，每次兩隻，我試過拎隻大碟過去佢會俾4隻，大大隻，味道唔錯。蟹腳都係，唔太咸又多肉，淨食呢兩樣都夠回本。其他熱食同刺身不過不失，甜品方面佢有小量榴槤野，鍾意食既就岩哂。啤酒係獅威，有小小失望，白酒飲得落，唔太差。總括黎講，$500左右一個有咁既質素，值得encore。…Read More

因為小朋友有表演所以一早出左尖沙咀，諗緊食咩之際有人提議呢間餐廳就係附近，行到見冇咩人就入去試試啦。原本想試下撈麵、湯飯咁，但見到有個午市套餐，$65包三餸麵、小食同野飲，我地就叫左3個餐啦。車仔麵既餸選擇唔算多，我地叫左:1) 牛腩牛筋冬菇2) 豬腸魷魚蘿蔔3) 牛腩雞翼時菜大部份野食都正正常常，冇咩驚喜，份量都係可以接受既水平，但就唔係講得上係好食既。牛腩係一粒粒咁上，唔太食得出腍唔腍，牛筋同雞翼唔算入味，蘿蔔有小小酸。食完接近1點，間餐廳9成坐滿，下次可以試其他野食。…Read More

朋友新屋入伙，幾個朋友上左佢度坐陣就去左呢間食飯，貪佢任食任飲，8:30後仲有折。一行10個等左陣就入得，先黎每位一隻鮑魚同冬菇，幾大隻，味道一般。過左一陣就一大盤魚生，質素都係可以接受既，差唔多時間黎左雞煲，經理主動話會幫我地炒，又講要用咩火，同埋講番雞係無限添加，中間又撩我地傾計，睇得出佢係有心做服務既。之後就黎左張相既海鮮盤，有蝦、蟶子、象拔蚌、龍蝦、龍躉同帶子，其實食完都飽左7、8成。全程個經理都有check我地使唔使幫手，又會主動換碟，今時今日喺屋村酒樓好難搵到架啦。埋單290一個，抵食到爛。…Read More

呢家餐廳慢慢變左我地一家人既飯堂，天水圍黎講呢間日本餐廳算高質素，價錢唔算貴，野食好味，性價比好高。今日又係6點過黎，阿仔如常叫佢個兒童餐，又有壽司、飯同烏冬，點會唔飽呀！老婆叫左個炸蠔定食，得4粒，有小小失望，我就食拉麵，佢個流心蛋一向都keep到水準，而且係有一隻，好多鋪頭都係得半隻架ja，仲有其他配料都好多，最重要食完唔會太口渴，即係唔重味精，之前食過黑蒜油都唔口渴，真係好難得。我地仲有一樣必食既就係枝豆，$30唔使大大碟，出面起碼要$50~$60都冇咁既份量啦。食到7點左右走，餐廳外面已經勁多人等位，証明餐廳係有質素既。…Read More

老婆屋企人鍾意黎飲茶，因為好食，佢舅父有車又好人，次次都做柴可夫，如果唔係都冇咩機會黎飲茶。叫左好多點心，影左幾款特別出色同好食，燒賣唔使講，加塊鮑片，味道唔會好左好多，但你都覺得貴得有價值。叉燒酥係另外一款必叫既點心，皮簿好食。腸粉冇影到，但超多料，勁飽滿，唔知係咪太多料，腸粉皮略嫌太厚。最大驚喜係竟然仲有炒銀針粉食，講真，今時今日要買銀針粉都唔係咁易，仲要有酒樓廚房肯炒，點可以唔叫黎試試呢?賣相正常冇驚喜，睇個色諗住可能唔夠味，食落又唔係喎，好好食喎，可以encore。食完過隔離沙灘行下玩下，一個寫意既週末下午~…Read More

星期六又係early dinner時間，天氣熱原本想食碗麵，但附近冇咩好選擇，諗住西餐都好啦，呢間人少少就入去試。見個撈烏冬係夏日推介，叫左個咖哩既，另外見張相個蛋包飯賣相唔錯，雖然知道呢d通常都係圖片只供參考，都博一博啦。因為唔多人，上菜極快，個蛋包飯出奇地同張相好吻合，仲見到炒蛋裏面真係有d菇同黑松露，加個蕃茄汁，呢d天氣食係岩哂既。另外個咖哩撈烏冬都有驚喜，出奇地辣，要一邊食一邊飲野先得。至於兩杯野飲，因為都有啫喱，所以食完都得番半杯唔夠，下次都係唔叫啦……Read More

雖然限時個半鐘，但次次食完都好飽既，而且唔算趕，加$22仲可以任飲生啤，最重要係成間餐廳都乾淨企理，同埋小朋友去食呢樣好重要。今次又黎食，可以叫2個鍋，試左黑蒜油、昆布湯同豚肉雞白湯，個個都唔錯，但黑蒜油食下食下就會冇哂。天水圍呢間星期一四有個優惠，$200零就有幾款牛食，次次都會逐樣叫黎食下有咩分別，食個時記得既，但下次黎又搞唔清邊款打邊款。最鐘諗意佢出面自助既食物久唔久就有一兩樣新野，唔會食黎食去個幾樣，都叫有d新意，同埋今次見到啤酒轉左大杯，500ml一杯，其實真係好，侍應又唔使成人幫人加酒，食客又唔使等咁耐。…Read More

知道佢7月3號就close，所以約埋舊同事黎食最後一次。隔左幾個月冇食，menu又有新item。真好，唔使煩揀咩，一於試新野。先黎沙律，紅色既係西瓜，大熱天時呢個沙律岩哂，唔可以話醒胃，但起碼叫舒服。到個芒果蟹肉薄脆，呢個配搭係幾好，可惜個薄脆已經軟林林，如果唔係就咁perfect。到pizza，因為得3個人，所以叫half half，可以1次試2款，1邊係新既burger味，幾好食，但唔似食緊burger，如果成個pizza係呢款味會有小小膩。仲有個豬肉長通粉唔記得影，小辣正常冇驚喜。美中不足係有其中一個captain不斷問我地係咪食完，明明隻碟仲有野，好似想趕我地走，但附近都有吉枱，而我地埋單個時都未到last order time。…Read More

紀念日，上網訂枱有88折，5歲以下小童唔收錢，話哂係Hyatt group，就黎試試啦。座位都唔迫，野食算多，而家做緊龍蝦同海膽既主題。龍蝦就得一款，係即灼既，每次半隻，佢一轉灼10隻左右，冇哂就要等7分鐘左右。而海膽有軍艦，蒸蛋同雪糕3款。冷盤冇生蠔同龍蝦，所以今次我地主攻熱食，佢有另外一度係即燒肉食，有西冷，羊，魚同魷魚等等，唔使等好耐，水準都唔錯。特別既係有d野食佢地會打鼓去叫人即刻排隊，我地個晚有原條即開即切既油甘魚刺身同海膽雪糕，兩樣都唔錯。甜品選擇都唔少，老婆話有個蛋糕整得好靚，叫我影低。食飽飽埋單，連埋折都係$1270，絕對可以encore。…Read More

約左個舊同事，佢想食放題，但我早兩日先食完，見呢間有放題有火鍋，仲可以喺open rice訂枱，就試一試啦。本身$268加一，但臨近父親節加到$298，冇所謂啦。一坐底佢會有刺身同海鮮俾你，出面有熟食，火鍋料同飲品可以自取，某d食物同飲品如清酒梅酒就要scan佢QR code再落單。刺身質素ok，但火鍋料師傅好好刀工，全部都薄切，都算冇漏單既，但我地落單加sake好耐都冇到，同兩個職員講左都冇理，所以就再落單啦，跟住就係一次過黎3支sake，呢樣野要改善既。食物質素唔算出色，但可以坐成3個鐘，唔多任食場做到。…Read More