starbucksgirl's Profile

之前去陸羽飲茶，見到對面圍左板話會開呢間叫做新京熹既北京火鍋店，都有d期待。之前去北京個時，當地朋友帶過我去，試過之後真係幾難忘，覺得個度d羊既質素真係幾好，同埋d汁醬都幾好，而且唔太貴，仲有京劇睇，呢個experience都幾得意。早幾日同朋友終於book到位黎香港店試下，大廳唔算好大，d檯都幾貼，但都係坐得舒服既。呢度主打係一人一鍋，真係好，唔洗用人一齊用一個鍋，我覺得咁樣衛生好多，同埋都可以揀自己鍾意既湯底。湯底有清湯、麻辣同埋黃番茄，我揀左黃番茄，酸酸地幾開胃。汁醬方面，芝麻醬梗係唔少得，我加左d芫莤同埋中芹，仲有紅腐乳同埋韮菜醬，溝埋一齊都幾惹味，個人黎講就幾鍾意。另外仲有三款店家自家製既醬，有沙蔥醬、昆布醬油同埋香辣醬，我自己最鍾意香辣醬，唔算好辣，但好香，同埋鍾意有d蝦米響入面，帶少少鮮味，蘸肉蘸菜或煮菇菌都唔錯，如果可以買走呢個醬就好喇！羊肉方面，因為有d朋友唔太食羊，我地淨係叫左羔羊肉、多鈣羊肉同埋羊上腦，三款羊肉都幾唔錯，好鮮，我最鍾意多鈣羊肉，塊肉切得好薄同埋有少少軟骨響度，幾有咬口幾得意，響香港其他地方無見過有呢款羊，所以我覺得係必試。牛肉我地叫左牛上腦，即係beef chuck位置，澳洲牛肉，都幾唔錯。我好鍾意食毛肚，叫左一份脆毛肚，好優質，好爽脆！佢地既菇籃真係推介，好多款既菌，聽侍應講全部都係雲南黎貨，食得出都幾鮮同埋爽口。另外，我地要左豌豆尖，即係有d似豆苗，幾嫩有菜味。仲有值得一提係，同北京一樣，佢地夜晚有7點幾同8點幾都有京劇睇，大約十幾分鐘咁，都幾有趣，同埋個大戲姐姐真係現場真唱，唔係播音，有誠意。個晚都真係食到好飽，但都叫左一個叫做老北京糖油餅，係一個京式點心，炸麵糰咁，中間夾左d紅糖，外脆內煙韌，幾唔錯！ 最後埋單人均都係4百幾蚊，中環呢個位置，食到咁好既肉同埋火鍋，都真係幾抵，下次會再黎。…Read More

第一次嚟呢度，餐廳響間fitness centre裡面，有啲難搵。餐廳環境光猛，幾舒服，揀咗廚師發板套餐，一人四百幾蚊，都幾多野食。由前菜到主食都幾好，鍾意涼拌涼瓜好開胃。煎涼瓜肉餅都好好食，燉湯好鮮甜。蒸嗰個山藥估唔到咁好食，開頭一聽到仲想唔要。甜品個芝麻糊就爭少少，甜得制，芝麻味都算香。仲有件蛋糕仔，啲椰子油味太太太重，呢樣食左一啖就掉低咗，好浪費但真係陣味有啲難頂咁。不過有個男侍應好多口，好多野講，呢樣野改善下會好啲。…Read More

第一次嚟musea 呢間分店，裝修好靚，啲嘢食賣相一流，叫咗台式麻辣鍋好香唔太辣，拼左白貝湯，呢個白湯超鮮甜，個鍋一嚟就飲左兩碗湯，充滿骨膠原。牛肉同毛肚都係一般，墨魚滑幾彈牙好食。油麥菜同埋大白菜好優質，嫌午餐肉有啲單薄，厚切會開心啲。嚟呢度最鍾意啲茶飲，好多選擇又夠大杯，陳年普洱少甜，啱晒一邊食辣，一邊飲去平衡返個辣同埋重口味嘅湯底。白湯食到最後，用嚟煮個粉絲，索晒啲湯汁，真係無得頂。可惜呢度只可以食2小時，次次都趕住食咁。…Read More

終於試到呢間麻辣火鍋，之前訂親都滿座，今次終於訂到，不過只限120分鐘。一坐低因為電話無電，即刻問下侍應有無叉電，佢話拎個「尿袋」比我慢慢叉。讚！雖然人未齊，又驚要還檯，所以拿拿聲點定菜先。第一次黎唔敢挑戰九宮格，揀左豬骨鴛鴦鍋，同埋揀普通辣。其實滾滾下，係越食越辣，而且辣得好有層次。配料最喜歡都係啲內臟，例始鵝腸、黃喉同埋毛肚，全部都好新鮮，而且用冰鎮住保鮮。黃喉好爽脆，但略嫌切得太大塊，進食時有啲狼貝。當中要讚侍應服務幾細心，放內臟啲冰溶左變水，佢地見我地未食完，都主動幫我地將啲水先倒走，讚！肥牛有啲普通，但啲萵筍片同土豆片都好好食，灼兩秒就食得。甜品既糍粑超正，軟糯得黎又有米香。飲品方面，叫左洛神花茶，酸mei mei有啲飲飲開既酸梅湯。最後要讚有位侍應好親切，上菜會詳細介紹同埋提醒啲野要灼幾耐口感最佳，而且食完都有問意見。埋單每位400蚊，食到捧住個肚走，仲有coupon送，下次會再黎。…Read More

食完晚飯諗住秋風起無乜人會想食冰，特登行黎希雲街食冰。點知黎到都要等幾張檯，企下傾下計，十五分鐘就有檯。今次叫左萬聖節special，即係南瓜紫薯味配oreo餅碎同埋南瓜籽！朋友仲話驚好伏，但出奇地味道好夾，甜度適中，又唔會覺得好heavy... 呢度啲冰用日本水做，食得放心，同埋刨得真係好錦，食到中間都仲有糖漿同果蓉！另外加點左份蕨餅，質感ok，但略嫌太甜！襯埋刨冰食就剛剛好。店員話佢地開左中環分店，仲有限定口味，搵日又去試下！…Read More

見海港城開左幾間新餐廳，有靚景之餘，睇見雜誌報導介紹好似幾唔錯，襯星期六約人食晏，一於黎睇下。揀左呢間日本餐廳，午餐定食百幾二百蚊一個餐，都抵食，有刺身有天婦羅有雞扒豬扒定食揀。我比朋友早到，坐低十分鐘仲未見有人比茶水，只掉低餐牌。於是找了個著黑西裝疑似經理的人問佢會唔會可以有杯茶或水，得到佢碌大隻眼，離遠指住個伙計話：佢針緊架喇。我心諗，拎杯茶啫，唔洗咁惡呀嘛！朋友來到點餐，佢叫左天婦羅蓋飯，我叫左吉列豬扒定食。叫完野無幾耐，侍者上左個沙律同小食來，份量雖小但味道唔錯，接住再上左個麵豉湯同蒸蛋。蒸蛋足料、味道ok，但麵豉湯味道似即沖。主食豬扒來到，望落賣相ok，夾上來先知中伏！豬扒好薄，好乾，而且有一截肥膏，食到一口油，脆漿炸到離開晒豬扒，唯一好彩係炸得唔油。白飯過腍，一pat pat咁。食完主食，店員主動送上甜品，是綠茶蕨餅，口感煙韌，唔會太甜。埋單人均200蚊，食個靚景，食物又唔得，服務又麻麻，所有野有待改進！…Read More

這家街坊小店，食足八年，由細舖食到大舖。曾幾何時，家住北角，工作地點又在北角，一日有兩餐都響呢度搞掂。最近在家時間多了，突然想起這裡的香濃腩汁，不如就落街吃碗河粉做午餐。避開繁忙午餐時間，2點半才到，完全不用等位。牛肚切腩河，河粉依舊滑溜，腩汁湯底依然香濃，牛肚爽嫩無渣，可惜的是牛腩肉粗難咬，有點失望。見到很多食客都叫咖哩牛腩飯，吃得津津有味，下次再試！…Read More

近幾次來澳門，大多數都是入住君悅酒店。每次離開前，總會在大堂買葡撻及canelé 回港慢慢嘆。這裡的葡撻，撻皮酥油香，又鬆化，蛋漿部分盡是蛋香兼帶焦糖香，質感又滑溜。canelé 外脆內香軟，外層的焦糖脆到不得了，切開後，內裡呈蜂巢狀。整體不會太甜，是相當合格的可露麗。…Read More

來澳門工作，住在金沙城，晚飯臨時被朋友爽約，一個人走過來在七月開業的「蘇濠」搵食。見到鼎泰豐，又不用等位，決定簡單吃小籠包作晚餐好了。侍者的服務熱情有禮，可能是只得幾檯客的緣故吧。一個人吃得不多，只點了蟹粉小籠包、酸辣湯及蒜蓉炒油麥菜。最先來到的是油麥菜，炒得優雅清爽，蒜味有點淡薄，卻嫌太油。蟹粉小籠包小巧精緻，貫徹是皮薄餡靚，湯包盛著濃鮮的大閘蟹湯，時令蟹粉甜美味佳，蘸點醋來提味更好。唯一缺點是，小籠包溫度不太夠熱。酸辣湯份量大，用大湯碗盛著，就算是二人共享也有點過多，難怪收取五十幾元一碗。湯品濃稠對辦，辣度適中，但完全不酸，要另加香醋調味，味道才變得像樣。整體來說，食物是滿意的，只是價錢有點貴，比在香港吃還要貴呢。…Read More

昨晚同朋友食飯，見秋風起想打邊爐，家住港島東既我，來到出名多好野食既筲箕灣，試下呢間煲皇。見到個名，諗起以前在西環既煲皇，唔知有無關係。一行三人，叫左個花甲什菌鍋，花甲是另上的，不過細隻到暈，湯底無乜味，越滾越淡，加左水直頭似「有味水」，非常唔掂。$178 一碟手切牛脊，肉味淡薄，好彩夠腍，但以呢個價錢，份量真係少得好離譜。反而$58既花雕滑牛幾好同抵食，滑牛如其名，花雕味幾香。蝦滑、墨魚滑平平無奇。九肚魚尚可，但一d都唔肥美。越食越無癮，無叫海鮮，三個人埋單竟然要$1000，以呢區加食物質素，真係超唔抵，無下次。…Read More

之前聽朋友話過呢間餐廳既叉燒好好食，仲係前西苑大廚主理，前幾日就同朋友黎試一試。我地四個人，叫左叉燒皇，蝦餃，鴨舌同埋蒜蓉海中蝦蒸飯～叉燒皇肉質鬆軟、燶邊位燒得好香，蜜味又夠甜美，而且肥瘦適中。蒜蓉海中蝦蒸飯真係好讚，好像食蒜蓉開邊蝦，再用蒜蓉撈飯咁美味，每啖飯都有蒜味！蝦餃皮薄，餡料又足料，蝦肉新鮮及筍絲爽口。鴨舌鹵得不錯，夠入味，我個人真係好鍾意食鴨舌～呢日中午12點幾來到，等左15分鐘位就有位坐，開放式設計，夠causal，最適合家庭及朋友聚會。…Read More

自從在日本吃過雞白湯底的拉麵之後, 一直都念念不忘。上星期朋友跟我說鳥華在香港開了第一間分店, 昨天就算獨自一人也要去試試這個雞白湯會否做得好得像在日本吃的。餐牌上有四款拉麵選擇, 因為是第一次來, 所以選了最簡單的原味雞白湯拉麵, 加了一隻熟蛋。之前看過網上的食評, 有些人說熟蛋真的是熟蛋, 而不是溏心蛋。這碗雞白湯拉麵, 甫送到我面前, 即時聞到好香的雞湯味。先喝第一啖湯, 是超濃的雞味, 越喝越覺得好補身。自問我這個人吃得不算清淡, 但也覺得這碗湯, 有少少咸, 而且有點油膩, 但那有雞湯不油呢?! 也許有油才看得出而足料之作吧!至於配菜, 有京蔥和貢菜, 京蔥也是常見的拉麵配菜, 但貢菜是很少見的。貢菜本身好爽脆, 我最喜歡吃爽口東西, 不過用貢菜來做拉麵的配菜, 好像怪怪的, 還是用來做涼菜好像比較好呢。至於另加的熟蛋, 之前看過網上的食評, 有些人說熟蛋真的是熟蛋, 而不是溏心蛋。這天來吃的時候, 是超正的溏心喔, 還吃得出淡淡的醬油香。麵條口感有點硬, 不夠煙韌, 但一邊吃麵, 不知是否因為麵條吸了雞湯, 所以越吃越不覺得硬。另外, 這碗麵的叉燒有別於一般拉麵的豚肉, 這裡的是雞肉。不過薄薄的雞肉, 沒有什麼特別。當然, 店裡的menu是可以另外豚肉叉燒的, 這天我沒有試, 唯有下次再來再試試他們的豚肉叉燒吧。$65/碗 (另加$9/隻熟蛋)…Read More

這天跟朋友來一個sudden的午餐約會, 突然想吃sushi, 所以訂了很久沒去的天膳。以前來過天膳幾次, 對他們的食物也很滿意。今次來吃午餐, 卻有點失望。為什麼? 我們一如以往來到點的是自選Sushi set, 魚生的質素, 以午市來說, 也算合格。不過手握飯糰卻退步了, 原因是飯比以前不夠煙韌, 吃不出米香, 手握的力度太勁, 令到飯糰咬起來好實, 有點硬。 我想這點是sushi最敗筆的。一直都覺得天膳不錯, 希望他們遲一點會有改進吧!…Read More

很久沒到安利吃我最愛的片頭切腩撈粗, 明知安利在周末很難等到位, 所以特別在閒日的下午茶時間再到訪, 果然完全不需要等位。一如以往, 只點片頭切腩撈粗, 質素依舊, 沒有退步。粗麵沒有柬水味, 好彈牙~ 撈麵的豉油, 甜度適中, 又不會太咸。不過魚片好像比以前吃時薄... 但魚味依然好足夠。切腩切成細細件, 容易夾又容易食, 牛腩肉質夠晒牛味, 而且夠腍! 正~ …Read More

星期天的中午, 突然跟朋友興起去飲中茶, 想到朋友推介過的欣圖軒的點心, 想也不想, 就決定要去吃。下午2時15分來到, 不用等位。order好點心, 特意要了一碟XO醬, 欣圖軒的XO醬實在不能不吃, 太足料, 太惹味了!冷盤要了個雞絲海哲頭... 這裡的海哲頭不會好像其他食店般, 只是一味爽脆, 這裡的口感爽脆得來有質感... 讚!招牌點心 - 原隻鮑魚海鮮芋盒... 好精緻, 原隻鮑魚賣相極之討好, 鮑魚夠腍, 芋盒炸得剛剛好, 食落不會覺得油膩, 吃完整個也不覺得"漏"。去飲茶吃點心, 不可缺的蝦餃。餃皮厚度適中, 帶點煙韌... 蝦肉很爽又夠蝦味... 炒腸粉, 不錯... 炒得幾香口, 跟XO醬一起吃, 最佳。這是一人份的荷葉飯... 炒飯炒得夠乾身, 好香荷葉味~ 最後來一碟上湯莧菜... 甜點order了黑糖鮮奶布甸... 非常surprise的甜品! 沒想過在中餐廳吃panna cotta可以咁好味~ panna cotta好滑, 夠奶味~ 黑糖調較得很好, 不會太甜, 跟panna cotta一起吃, 最配。這個即興的點心lunch讓我們太滿足... 飽到晚上9時才吃得下晚餐呢~~…Read More