安兒安兒's Profile

8月底，坐完鴨靈號維港遊，在尖東落船，就在附近一帶覓食。結果在新開的翠湖金閣試吓，點了幾款餸，普遍水準不錯，味道幾好：1. 自選孖寶：魚米之鄉龍躉班 + 燒鵝2. 蒜蓉蒸蟶子皇3. 日式燒汁牛柳粒4. XO醬天下第一炒特別要提他們的招牌菜“魚米之鄉”，除了那條鮮美嘅魚，還有香脆炸米，上枱時再淋上濃香魚湯，吃那脆米湯飯，驚喜好味道，都不用再叫白飯了。吃畢，送了杞子雪耳糖水給我們。4人共吃了~$1200，人均~$300又多個食飯好去處，日後可以再來，試試其他菜色。…Read More

見食評不錯，6月中訂枱與兩友人相約去啡酒館晚餐。等了一會，被安排坐下一張4人枱，蒲坐下，有位侍應拿著長掃過來，把頭顶上的冷氣機滴水抹走，問他們滴水形成有多快，一個說十幾分鐘，一個說大概30分鐘。😱😱隨時有水滴落食物的危險喎，但他們沒有其他4人枱，我們便要求搬去店內較後方的兩張二人枱。終於坐定下來，看了餐牌，點了晚餐。不久，侍應端上菠菜忌廉湯，喝了一口，完全不熱，是室溫的，立即告訴侍應，其中一位走去看看吧枱後的湯煲，然後尷尬傻笑。但他們沒有過來交代，幾位侍應返而行去店的前方(不知是否商量怎樣處理)，良久，女侍應過來，不是打算取走那幾碗凍湯，而是推說湯只是上枱後被冷氣吹凍的，🙄😡當我們是傻的嗎？湯一到我們就喝一口了，如果冷氣能在那幾秒內把湯吹凍得這樣，我們也應該變雪條了。這是忌廉湯，沒煲熱就上枱，我們不想拿自己腸胃冒險，還是速速cancel，起身走人。…Read More

哥登堡重新開業那天，剛巧經過，所以就向朋友提議試試。店內裝修像是舊的，之前暫停時的內部裝修可能是修整廚房吧。無論是我們這些生客，又或是熟客，侍應們都熱心招呼，加友善嘅笑容，氣氛溫馨。點了兩份套餐 - 鐵板什扒餐($130)及咖哩牛脷飯($75)，餐湯有白湯(忌廉湯)或紅湯(羅宋湯)，餐包是烘熱的，好吸引。什扒餐有牛扒、豬扒、雞扒、煙肉、腸仔，很豐富(切開才記得影相)，選了黑椒汁，唔辣，可放心吃。咖哩牛脷飯的咖哩汁好香，牛脷有一兩件少許靱(只是少許)，但大部份都ok，且份量不少。什扒餐的甜品是啫喱，這頓晚餐很滿意，很有港式西餐的味道。…Read More

朋友介紹，帶我哋嚟食好嘢，話抵食又好味，果然無介紹錯。😋😋坐低先點了啤酒及幾碟小食.....鯪魚球、爽脆魚皮、單骨雞翼、炸雲吞、麻辣皮蛋等等，樣樣都野味😋，送啤酒一流。然後，主打鍋點了火焰海鮮雞鍋，很足料，每人有兩隻鮑魚，又有帶子、大蝦、蟶子......，配支白酒 - perfect👍🏻，跟手再加了十幾廿碟任食火鍋配料，靚牛肉、羊肉、牛白肉、脆鯇、魚標、鴨血、餃子、豆腐卜、蔬菜..........，更不斷任飲無酒精飲品，又食埋四川甜品 - 冰粉。老闆招呼很友善，同我哋有傾有講，適逢我哋前個月去成都旅行，老闆又同我哋傾吓成都美食，後來仲講埋重慶添。😄幾個朋友，飲吓食吓傾吓，就這樣食足3個幾鐘，任食套餐(不包酒精類飲品)唔使$300/位(其實仲可以有免費KTV玩)，超值！😬😬…Read More

去潮家宴食過幾次午餐，都好好味，所以諗住22Dec要做冬兼娘親生日，想訂位同家人去食。話說上個月底打去訂位22Dec晚飯，佢仲話有最低消費&節日套餐會whatsapp我，隔咗兩星期都未收到，我就打去問，佢竟然話我個booking on waiting list，所以未send資料畀我😡🤬。佢話當時講咗係waiting，但其實當時佢無講，仲問我訂幾點到。而且，如果係waiting，就唔會話whatapp套餐菜單畀我先啦。貴店要畀枱d熟客，都通知番我呢d只吃過幾次嘅“生客”吖！！！如果唔係再打電話去問，大時大節臨急搵地方食飯，都幾大鑊。…Read More

轉咗去大角咀道返工巳超過半年，大角咀奥海城嗰邊會多d有規模的食店，但大角咀道這邊主要小店食肆好多，而decent 啲嘅餐廳就要explore吓。噚日朋友過來大角咀同我食晏，我哋去咗試利得街嘅Cobalt，餐廳開了大約半年，暫時唔太多人，亦幾好食😋，想lunch time 舒服&悠閒坐吓，可以考慮Cobalt. 佢嘅set lunch價錢合理，如果set lunch唔啱食，散叫a la carte暫時都唔算太貴，因為見門口有牌寫住a la carte 8折😬。意粉嘅蜆大隻厚肉（唔想食辣，同餐廳講咗走辣椒），risotto中規中矩，魚柳漢堡嘅擺碟，見到已經好想食。杯咖啡有點淡，濃番少少就好喇。…Read More

週末與朋友在尖沙咀出沒，7點幾來到K11 Art Mall，可能因為是星期六，商場地庫又開咗Ikea，且商場2/F & 3/F亦加了一些pop up counters，商場人頭湧湧，多間食肆都要排隊。來到Agnes b cafe，不需等位，咁我們就入去醫肚。食物餐牌只有一頁，食品分3類，第一類是ADB/漢堡，第二類是意粉Pasta，第三類是主菜如豬、雞、魚等等。每類有3-4個選擇。我們點了linguine crabmeat in avocado cream sauce ($168) 和 panfried snapper with lemon butter sauce ($208). 加$40可以有餐湯及一杯飲品，就加了兩份。餐湯是南瓜忌廉湯，夠熱夠香滑，不錯。然後侍應醒目地幫我哋擺碟，方便share食物。魚和意粉上枱時，賣相不錯。我們先吃魚，好失望，snapper“鞋”過砂紙，好彩有那檸檬牛油醬，酸酸地，才能把魚吃掉.......... 真係超級“鞋”。然後到牛油果蟹肉意粉，淡而無味，竟然可以做得咁無味道，且幾經努力才找到那些蟹肉！飲品方面，我要熱咖啡，朋友要伯爵茶。杯咖啡非常熱，是過熱了，亦太苦（我已是習慣飲black coffee/espresso的人），沒有咖啡香味，如果瞌埋眼飲，會以為自己在飲苦茶。朋友的伯爵茶，見佢飲一啖就扁晒咀，我就試咗一啖；其實，聞到杯茶係幾香的，但飲入口佢卻無乜味道，個茶香只可以聞到，飲唔到。結果，整個晚餐，最好的是南瓜湯；其他的都唔掂。在週末只有幾枱客，不用等位係有原因的。可幸，侍應的招呼還好，地方闊落又無乜客，在疫情期間，這樣好似安全d。是次晚餐，二人共$502.…Read More

之前响“永華日常”剛開張時食過一次唔好食，好耐無去，見個menu改咗，價錢無咁離地，亦無咗加一（茶餐廳要加一真係有d趕客），幫襯嘅人多咗，前幾日試吓食晏，今次幾好味，改善咗喎。似乎大部份侍應都換咗，招呼都好過之前。午餐大概五十幾至六十幾蚊，我哋叫咗兩個午餐：雞扒滑蛋飯 $58 - 雞扒燒得剛好，醬汁美味，蛋真係幾滑，份量對女仔食就剛好，男士可能唔太夠海南雞飯 $68 - 雞香滑好味，油飯唔太油（算係健康d）但就唔夠香兩份午餐連飲品$126…Read More

今日去深水埗，路過南昌街見到一間傳統餅店“八仙餅家”，有賣林林總總多款餅食，包括蛋王酥、皮蛋酥、核桃酥、唐餅（紅綾、黃綾等）、老婆餅、雞仔餅、水泡餅、脆花生 ..........我買咗媽媽喜愛嘅皮蛋酥（$20）&核桃酥（$15），撘車返到屋企，皮蛋酥還是暖的，切開見原隻皮蛋，好濃嘅皮蛋味。核桃酥非常香脆，好大塊，直徑超過5吋。下次去深水埗要再買其他款式試吓。😋😋之後問自細在深水埗住的朋友，佢話細細過已經响八仙餅家買餅食，即係已經有幾十年歷史了。😬…Read More

嘗試了一間新開不久的素食館，在佐敦德興街的維亞軒素食，據聞此位置前身是維亞軒餐廳。餐廳內空間尚算寬敞，中間打橫放了一矮攔把餐廳前後分成兩個主廳。餐牌上有兩頁是西式的選擇，例如：卡邦尼意粉、素肉醬意粉、薄餅、焗法包、沙律等等。另外，還有很多中式的。一頁是點心，一頁炒粉麵飯，還有幾頁中式餸菜。今次午飯時間來醫肚，朋友和我點了涼瓜排骨炒河及三個點心：蝦仔餃、燒賣、腐皮卷。落單後，先送上兩碗免費例湯，是老黃瓜眉豆粟米湯，雖然是免費，但沒有欺場，真材實料，好好味。 排骨炒河先來，味道適中，如可少點油就更好。幾款點心陸續上枱，腐皮卷煎得好好，外皮脆香；燒賣有很多姬松茸，整粒都係菇的香味；蝦仔餃不像蝦餃，並沒有仿蝦嘅餡料，其實似吃粉菓，內有粉葛粒。吃完還有糖水送，是西米露，雖然免費但並不馬虎，不太甜，幾好味。好飽，食唔晒，打包半碟炒河拎走。這次午餐，兩人合共$230。整體都滿意，見其他枱點了蘿蔔糕，亦有湯麵，頗吸引，想下次試吓。還想試紫薯春卷、法包、薄餅 ..........😬…Read More

月初試吓响淘大MCL戲院新開的那間餐廳From Seed to Wish，今次嘅體驗不錯。雖然係半self-service形式營運，但仍感受到員工幾好的服務，無論係門口招呼嘅姐姐、收銀櫃檯、上菜的哥哥都好有笑容、友善、有禮，希望佢哋能保持這份令客人食得開心嘅態度。餐廳裝修以白色為主，設計簡約清新，放置不少盆栽，還有一個關種植嘅書架，帶出green嘅主題。食品都唔錯，幾好味。今日揀咗set lunch menu內嘅卡邦尼意粉&煎帶子松子仁燴飯，唔係正宗嗰種al dente，而係港式嘅嗰種口感，但以幾十蚊呢個價錢，都已經不錯了，唔太咸，唔油膩，帶子煎得剛剛好，兩款都清咗碟😋👍。餐飲選了茶&咖啡☕。是日精選茶係茉莉，茶包品質不錯，茶包內茶葉不碎，茶味幾香。我杯咖啡也不錯，order時可以揀fruity定nutty，在櫃枱點餐時，還有個小牌簡單介紹這兩款咖啡，唔太喜愛酸味嘅咖啡，所以揀咗nutty。原來餐當日才開始有午市&晚市set menu，只比茶餐廳貴少少，偶然一次都可以喔。見佢哋還有下午茶menu(下午3點開始)和早餐menu(0900-1130)，可以揾機會再試。…Read More

今日去中環街市睇吓，行完一圈之後，腳仔攰，揀咗响ION Cafe坐低飲杯嘢。大約4點入座，好彩還有一張窗邊位可以坐😅。朋友和我點了Cappuccino ($48) & Americano($45)☕，以及揀咗cake combo ($78)，即係一件cake及兩塊蝴蝶餅。落order時，侍應問，咖啡想nutty啲定fruity啲，有得揀，good呀；唔太喜愛酸味嘅咖啡，所以揀咗nutty.杯Americano來到時還有一張小咭介紹番口味，我哋兩個都好滿意杯咖啡，香濃而果真無乜酸味，好飲，我都唔需要加奶落杯Americano嗰度。😋見到蛋糕櫃有好多款cake，後來揀咗Matcha Yuzu Opera 抹茶柚子歌劇院，上枱時見到蛋糕上嘅朱古力牌寫著“Nina Patisserie”，原來啲糕點係如心酒店嘅cake shop的，件蛋糕好香柚子味，再加上抹茶味，好食。😋蝴蝶餅香脆，建議先吃蝴蝶餅，然後才吃比較濃味嘅蛋糕。下次要再嚟試其他蛋糕款式。見到coffee bar那邊有bar枱位，有些bar枱位還有電掣位，前面亦有咖啡豆&茶葉賣。…Read More

朋友清假，所以星期一食晏都唔駛趕住返公司，我們想揾間不太嘈雜，又唔駛趕住交枱嘅地方食lunch，後來book了Amica，果真選擇正確。平時經過餐廳門口，見到的原來只是部份座位，當侍應帶我們入去坐，才知內裡轉角還有一間有十幾廿個座位嘅大房。餐廳嘅set lunch餐牌都好多選擇，共有11款，有沙律、有包、有pasta、有飯、有扒等等，雞牛豬魚素食都有。Set lunch包括餐湯或沙律及餐飲。我們選了安格斯牛肉漢堡包&香煎盲曹蟹肉意大利飯。個牛肉漢堡肉質不錯，亦有牛味，如果個黑炭包再軟一點點就好喇。個意大利飯亦不錯，魚煎得表面香脆。見到其他枱有客人叫了雞胸雜菌意粉和澳洲穀飼肉眼扒，賣相都吸引（隔離飯香🤭），尤其個肉眼扒，好大塊，估計我們兩個女仔，可能要一份都夠食。餐廳都陸續有客人嚟食晏，好彩亦陸續有人食完埋單，我們才可以無壓力要交枱。亦可能環境清靜，客人大多不會高談闊論，就算餐廳在8、9成坐滿時都唔覺得嘈。見到餐牌嘅飲品選擇好多，除有多款咖啡外，還有超過10款嘅養生茶／冷泡茶，再加上餐牌有一版是精緻嘅甜品，下次可以約姊妹嚟tea吓喇。…Read More

最近與友人齊帶著兩位長老到尖東好時中心的馥苑酒家飲茶。對上一次到這間馥苑飲茶已經大約是三十年前嘅事，即係酒家都已經超過三十年歷史了。最開心係，酒家水準依舊好味，兩位老人家都好滿意，仲話以後要再嚟。 可能因為位處尖東，主要做寫字樓客戶，而宜家又少了遊客，我們11點到達時未有其他客人，到12點後才陸續有客人入座。侍應開茶及奉上嘅前菜是琥珀核桃，核桃脆口又唔太甜，大家都喜愛，掛住食，唔記得影相。我們點了7個點心，包括煎蘿蔔糕、叉燒腸粉、咸水角、雞包仔、鮮蝦菜苗餃、上湯鮮竹卷、山竹牛肉球，另外點了小吃“鮑汁鳳爪”，再加一個豉蒜龍躉片籠仔蒸飯。雖然唔會係貴價飯店那些講究精緻或創新嘅造型，但各款食物水準不錯，新鮮熱辣，用料品質幾好，好味道，不似那些連鎖酒樓用中央廚房流水式做出來嘅工廠點心。當大家食得飽飽時，侍應還送了紅豆沙糖水，就連送嘅糖水都沒有欺場，我們四人雖然已食飽，都把整碗糖水渴光。 埋單共$660，每人百幾，價錢合理。#香港 #香港美食 #點心 #飲茶 #尖沙咀美食 #馥苑 #hongkong #HK #Foodie #dimsum #tsimshatsuifood #FookYuen…Read More

上星期幫朋友慶生，我們一行5人（4大1小）。 那晚餐廳都幾多人，我們7點幾去到，已大約8、9成滿。現場有外籍歌手自彈自唱，氣氛都幾熱鬧。在Openrice訂了枱，本有7折offer（正價a la carte menu），用餐時間1.5小時，但到埋單時卻是另一回事。見生蠔有特價優惠，且叫一打送支酒，我們點了一打生蠔（選了3款法國嘅，每款4隻，每隻@$28-38），凱撒沙律，Beef Wellington，海鮮長通粉，薯條。我們大人飲送嘅嗰支酒，另外叫杯凍檸檬茶畀小朋友。生蠔都算新鮮，蠔肉有啲薄，其中一款有蠔味，另外兩款較淡，以標榜是生蠔專門店嚟講，質素一般，可能係要將貨就價。沙律&薯條中規中矩，海鮮長通粉個汁幾好味，海鮮就包括有帶子、青口、蜆&蝦。主角Beef Wellington，肉質夠腍，都有啲牛肉味，但我們四個都略嫌佢咸。食完呢d，見餐廳開始唔多人，餐廳又無催我哋交枱，我們就諗住繼續，所以叫甜品，點咗心太軟&Tiramisu，兩樣都中規中矩。後來，我們叫埋單，侍應給嘅帳單係full price - $1,6xx，我哋話應該有折，侍應問係幾多折，我哋答7折，佢返埋去cashier改單，然後攞咗張計8折嘅單嚟 - $1,4xx（生蠔已是特價無折，其他items都係正價有折），但無出聲解釋，我哋當然問點解唔係7折，侍應又返去cashier問，之後就有位話事人走埋嚟，話用餐1.5小時才有7折，我們超過咗1.5小時，所以無折🙄😠，佢仲話佢已經畀咗個8折我哋（我哋係咪應該要多謝晒？！）餐廳又無叫我哋交枱，無提顧客夠鐘，我哋以為經Openrice訂就係有7折，只係餐廳繁忙就會限人客1.5小時交枱，唔知個折扣係同用餐時間掛勾。一般食肆如要認真限時的話都會夠鐘就同客人講。總括嚟講，食物係港式西餐嘅水平，有折還可以，原價就唔值。服務就唔好太有期望，食完生蠔，上其他熱盤時，我哋要提才有換碟，上甜品又無畀碟，又係要問畀兩隻我哋5個！其實，有啲侍應都盡心招呼，但有啲就“時運高，睇唔到”，又或是比較“生手”／無記性，講完轉頭就無咗件事，所以有無服務就要睇彩數。…Read More