雅達利's Profile

悉尼食去都係覺得七喜嘅牛腩係好正嘅，煮得夠腍，而且又夠入味，而且份量都算係多， $42又有牛腩又有牛筋，幅相睇落去就知都有好多件。油菜就揀咗芥蘭全走，好似健康咁樣啦。…Read More

印象之中每次嚟到西灣河太安樓掃街，最尾嗰round一定要幫襯呢一間台式飲料店，呢間舖頭好受歡迎，長期排長龍，不過係值得嘅，咁多年來個質素都保持到據聞老闆係台灣人，所以真係整到台灣味道飲品同埋甜品。你今晚就嗌咗熱嘅仙草芋圓同埋仙草甘茶加仙草，仙草甘茶就即場K.O.，至於仙草芋圓就拎返屋企慢慢嘆。好鍾意佢啲芋圓，有彈性得來亦都真係有芋頭同番薯嘅味，唔係純粉圓得夠粉乜味都冇，另外佢啲紅豆其實都好正，煮得好面好腍，一咬落去就爆沙，堅正。…Read More

呢間火鍋放題食物質素高款式又多，侍應服務快靚正，價錢合理，值得encore。湯底基本上都可以雙拼，我哋揀咗胡椒豬肚同埋皮蛋芫荽。火鍋配料基本上分三個方式去攞，第一就係出去外面攞，出去攞嗰啲屬於一般嘅火鍋配料，例如腐竹、魚蛋、魚皮餃、炸魚皮、午餐肉、鵝腸、豬大腸、芋絲等等。至於肉類就可以掃QR code點，而以上嘅三款就自己畫紙仔。食物質素真係唔錯㗎，有相你睇。另外佢飲品嘅選擇都多，例如竟然有百事生可樂，同埋呢款從未見過嘅不知名冬瓜茶。…Read More

小籠包一坐低就即刻落單先，因為要蒸20分鐘左右，所以叫咗之後先至慢慢睇吓其他嘢有乜嘢好食，佢嘅小籠包一籠有五隻，屬於大size嘅小籠包，塊皮做得好薄，夾嘅時候真係要小心唔好整穿，如果唔係啲湯就會漏晒出嚟嘥晒。上海排骨擔擔麵其實就即係炸豬扒擔擔麵，塊豬扒同埋碗麵分開上，擔擔麵個花生醬好香濃，面底係用上海幼麵，都幾好食。…Read More

呢一鍋杏汁白肺湯真係不得了，訂位嗰陣時候如果你有返咁上下人數真係要叫嚟試吓，五百幾蚊一鍋，睇吓啲湯渣就知道佢真係真材實料，我哋嗰晚七個人每人都飲到三碗幾，和味又滋潤。呢度嘅燒鵝都幾好食，我哋嗰晚因為冇訂，但係咁啱有半隻喺度，所以即刻要咗佢嚟試吓，隻燒鵝唔算好肥，塊燒鵝皮又脆又薄，熱辣辣係好食嘅。雞蛋焗魚腸都唔錯，魚腸嘅份量都比想像之中多，冇乜腥味冇乜苦味，連胡椒粉都唔使落。呢個金魚形狀嘅桂花糕係送嘅。…Read More

老遠來到西灣河，就係為咗食佢，呢一間小cafe最精彩嘅burger就係脆脆支竹羊肉漢堡，真係同粵菜嘅羊腩煲有得輝，最搞野係入面嗰塊炸脆咗嘅支竹，真係卜卜脆，再加埋個腐乳醬，真心佩服老闆嘅無限創意，而且仲要咁好食。呢度另一樣我鍾意食嘅就係呢個鮮魚湯烏冬，當中最正就係個個魚湯，真材實料，用新鮮魚慢慢煲嘅味道真係飲得出嚟。個烏冬仲跟一小碟話梅蕃茄仔，都幾好食。最後就係呢個可遇不可求嘅白鱔炸魚薯條，聽講因工序多，所以要老闆有雅興先至會整，啲魚油超香，真係好食。…Read More

呢隻德國麥啤好掂好好飲，超級市場同埋其他食肆好似冇乜見過呢個牌子，佢小麥味好香，但係又好順喉，一啲都唔苦，好易入口，德國啤酒果然唔同啲。嘢食就揀咗Butter Chicken印度牛油咖喱雞，揀佢嘅主要原因係因為佢唔辣，佢個汁做得好好，以蕃茄做個底汁，食得出入面仲加入咗好多香料，食嘅時候好有層次感，用嚟點印度薄餅Naan Bread真係好正。另外想讚吓佢個印度薄餅，熱辣辣，真係即叫即整，新鮮嘅就係最好食。…Read More

Dinner Time幫襯就梗係叫返Set Dinner最抵啦，叫了泰式豬脾飯同埋香葉辣椒肉碎煎蛋飯，有埋餐飲，合共$147。呢度嘅泰式豬脾飯同出面最唔同嘅地方就係呢一間的泰式豬脾比較瘦，無乜肥膏，就係因為無乜肥膏，所以就可以好大膽咁樣食個豬脾嘅皮，非常有彈性，感覺好像有豐富嘅骨膠原，個底墊咗梅菜，配豬脾真係一絕，另外仲有滷水蛋。香葉辣椒肉碎煎蛋飯好香口好惹味，雖然叫做辣椒不過其實唔係好辣，撈白飯同煎蛋就真係唔錯。…Read More

呢間上海小吃店據了解是新蒲崗名物，今日食完，果然係正野。佢個粢飯真係好好食，最正係即叫即包，所以佢入面條油炸鬼先至可以keep到個脆度，唔會比D糯米嘅水氣整到淋晒。另外佢入面嘅肉鬆同炸菜絲嘅比例都做得好好，令成件事好平衡。煎釀豆腐都好食，D豆腐比想像之中要滑，豆腐本身都夠香，煎咗出黎唔算好油。叫咗電上海菜肉雲吞，味道都唔錯，就係嗰種舊式上海舖嘅味道，實而不華，不過味道卻很出眾。最後亦都係最正嘅，就係佢杯豆漿，豆味香濃，真係好好味。…Read More

人地又係吐司，呢度又係吐司，不過呢間餐廳的吐司無論係賣相同味道都真係好講究，係食得出嘅誠意料理。呢一份就係呢度No 1銷量嘅吐司︰封門柳黑牛吐司。睇得見D封門柳個芯仲係pink pink地就知好野，D封門柳牛味香濃，夠晒咬口，唔係好多脂肪嗰D部位一咬落去軟淋淋嗰種，如果唔鍾意𡁻野嘅朋友就建議佢地唔好食呢款，都係叫返和牛算數。我自己就比較鍾意封門柳，因為無咁肥，唔會成口油。呢個雞鎚嘅味道都唔錯，叫吐司時加$25轉做餐，就有埋雞鎚同飲品，飲品我在雪櫃揀了紙包裝麥精，正呀喂﹗…Read More

芋角真係好少地方有得食，難得有所以叫嚟試下，口感味道屬於一般，始終互國係比較難處理嘅。山竹牛肉好食，冇梳打粉味，真係有牛肉味，而且唔係打到爛曬，仲食得到肉粒嘅口感。魚翅餃又係好少地方食得到，呢間點心店做得唔錯，入面啲木耳絲蔬菜絲新鮮爽脆，而且個攪皮唔會太厚。貪得意叫咗呢個芋頭流沙包，除咗偏甜之外，其實佢都幾好食。蝦米腸爽滑，點辣椒醬甜醬麻醬就係好味道。梅菜肉餅飯嘅肉餅冇乜肥肉，加少少豉油啱啱好，唔會好咸。…Read More

呢間小食檔認真犀利，記得十幾年前喺呢頭返工就已經覺得佢價錢超平，煎釀三寶一蚊一粒，就連燒賣都係一蚊一粒，今日再去幫襯竟然冇加過價，明物煎釀三寶仍然係一蚊一粒，味道依舊，有啲人可能會嫌佢細粒少少，啲煎釀三寶上面嘅魚肉又係少咗少少，不過以一蚊一粒呢個價錢嚟講，佢嘅質素真係非常高，性價比超高。今日食咗三粒紅腸三粒魚蛋三粒豆腐三粒茄子三粒青椒再加三粒燒賣，樣樣味道都唔錯，唯一少少挑剔就係青椒真係細粒咗少少。…Read More

德國脆皮豬手配德國麥啤似乎都真係冇得輸。呢一間德國餐廳嘅豬手做得唔錯，外皮真係脆而唔會韌，咬落去short short聲，另外豬手嘅肉會唔會好鹹又唔會好韌，豬手嘅size都算大隻，份量足。雖然多肉，不過飲住啤酒黎食就唔會覺得好滯，而且亦有配德國酸椰菜絲，有助幫助腸胃消一消滯，佢用嘅芥辣只係普通芥辣，如果有埋德國嗰隻甜芥辣應該會更加正。至於杯啤酒係幾正嘅，夠冰凍，連隻杯都凍，好香小麥味，又無若苦澀味，正。…Read More

呢一間茶餐廳晚市時間長期排長龍，原因除咗佢哋啲侍應服務好好之外，最重要亦都最實際就係佢啲嘢抵食夾大件，就好似今晚叫咗個四人餐，五個大人都食唔曬，嚴格嚟講個餐係有五個餸，豉汁蒸倉魚再加一個燒味就係緊腳，燒味你可以揀貴妃雞、豉油雞、燒腩仔或者燒鴨，跟住就可以揀多兩個餸，然後佢會送一碟菜，跟餐仲有四個湯同埋四個餐飲仲有四碗白飯。今晚條倉魚我哋揀咗豉汁蒸，燒味就揀咗貴妃雞，另外兩個餸就揀咗野菌紅燒豆腐煲同埋粉絲雜菜海鮮煲，三個中湯一個羅宋湯，三杯熱飲一杯凍飲，合共$345。個個餸都大碟而且味道唔錯，鹹甜適中而且又冇乜味精，抵食好食。…Read More

呢間齋舖的晚市素食放題星期一至四每位$128，星期五六日公眾假期及公眾假期前夕就加十蚊，$138一位。而呢度嘅素菜選擇多而且個味道整體都唔錯，基本上大部分都好食。我特別鍾意佢嘅炸物，除咗傳統嘅芋頭魚之外，仲有好多做到好似日式天婦羅咁樣，不過當然佢外層嗰個脆漿唔係用天婦羅脆漿啦，但係佢啲炸南瓜齋又有炸冬菇都好好食，去呢啲傳統齋舖梗係要食酸齋啦，不過幾款酸真係入面齋叉燒就比較硬少少，其他嗰幾款都好食。…Read More