REDJC's Profile

今晚同母親撐枱腳，好耐無嚟傳統海鮮館，估唔到美味依舊！主要薑蔥炒蟹，蟹肉滑嫩新鮮，仲配埋陳村米粉，吸哂醬汁，唔好錯過。椒鹽瀨尿蝦，一人一隻大嘅，椒鹽香脆恰到好處，可獨享美味！豉椒炒蜆，肉質肥美無沙，豉汁又唔會死咸！最後加上我至愛菠蘿咕嚕肉，完美！值得讚嘅不單單是厨藝美食，還有服務員的貼心！主動提供乾濕紙巾，隨時留添茶水，更細心詢問是否須把後來的菜遲上，怕享用海鮮須時，後上的菜會凍咗！哩啲細心同人情味，係經典傳統菜館先會有。…Read More

食物質素，實在款式有限，只點了三款食物。1。 湯包，有湯有肉，皮算薄又未去到一夾就難。但味道一般，未到好食嘅地步，顏值亦配不上$88/6件哩個價位，就當係機場，樣樣都貴。2. 乾燒四季豆，只能說點餐時相片跟其他店的乾煸四季豆差不多，但上台時就是一碟清清的清炒四季豆。味道不差，但只不惹味，$148比起其他$88，只能說機場係貴啲㗎啦！不過係咪準備食材時，可以將四季豆頭尾去掉呢？清炒都算啦，但點解上枱時會有舊飯係四季豆旁邊呢？雖然飯都似係新鮮嘅，但餐廳咁樣上枱，係咪好影響客人胃口呢？餐廳嘅衛生情況值得懷疑。3. 凍檸茶，佢提供果杯糖水，我倒哂落去都唔覺有甜味。檸檬味更加算了吧，唔知係佢入貨嘅檸檬質素比茶記差，定係佢俾果枝篤篤捧差，我只飲咗一茶$38的凍茶。米芝蓮係試咗咩先估佢為一星？餐廳可以考慮公佈，等客人可以試到值得嘅美食。服務：哩個係最差嘅一環，係機場咁嘅服務水平真係趕客。首先佢可能留意外國客人，所以睇唔到我一名香港女性在排隊等位，佢招呼完一名機組人員入座，就自動忘記咗我，去招呼另一名排係度睇餐牌嘅外國男士，確實佢對我先到，但係外國人只係企係旁邊睇餐牌，並無企係等位位置排隊。OK，外國訪客，我作為香港人一份子，禮讓一下無妨。但係佢招呼完果位外國男士，又想跳過我去招呼排係我後面剛到的外國人，咁又啲過份吧？我瞪住果個侍應，佢先勉強轉返嚟問我幾位。跟住中途收碟，啲侍應係一聲不响，突然係你身後哄埋，伸手在你肩上而過收碟。如果細膽真係俾佢嚇死，問一句唔會太難吧？（如果該位侍應是聽障或有語言困難的人士，我收回這個投訴。但見佢衣著唔係一般傳菜侍應，似係較高級，我估應該唔似係有困難）。之前有食評，客人要求加茶，侍應愛理不理，所以餐廳依家全部取消了茶。如此決絕的避免再被投訴，管理層實屬「智」者。改善免了，直接「解決」掉問題吧！最後值得讚是收銀侍應，笑容滿面，非常有禮，也算是餐廳最後一點溫暖吧！…Read More

服務一般都算，香港食肆預咗無招呼，但係唔駛突然開大冷氣風扇去吹啲客人嘅。咁都算啦，每個人冷熱感不一樣。但最恐怖係你對手套滴住水咁攞碟飯上嚟，碟上圍住飯都係水漬，仲要隻手夾住個匙羹，都係滴住水，即係你剛洗完就順便上埋碟飯，咁啲洗碗水係滴埋落飯，定係咁啱只係圍住啲飯灑一圈？星期六中午，一半客都無，真係有原因。係我錯，中咗入嚟食！…Read More

星期六做到三點幾先有時間食 lunch，諗住下午茶有優惠，有so。點知入咗一間無下午茶，都算啦！以前食過臻味，覺得唔錯，無下午茶都照食啦！估唔到餐牌換咗，連味道都轉埋。無咗我最愛嘅濃湯食雜，咁我叫其他啦！我唔食辣，叫咗雞絲腎片米線+凍檸茶。飲品全部正價，盛惠$70，貴就貴啦。香港好味嘅餐廳真係越來越少，當做支持下。點知碗米線嚟到，賣相已大失所望，而且份量真係寥寥可數。可能我叫嘅係雞絲腎片，賣相無咁大堆頭，但我“了”咗兩下，確實雞絲唔多，腎片數量就可以接受，不過真係誤以為係下午茶餐咁。份量都算啦，當我大食啦！最估唔到係佢個清湯，真係好清，只係得塩+水，真係未食過咁差嘅清湯。而杯檸茶，佢都的而且確俾咗4片檸檬，不過係超薄，篤到爛都無乜檸檬味。收得$18一杯，咁高利潤係咪至少俾多少良心呢？哩餐係真正farewell，臻味不再，係時間說再見了。…Read More

估唔到，新開小店有驚喜，叫咗個豬扒竹昇麵走葱，真係估唔到佢塊豬扒咁新鮮，真正新鮮炸起，熱辣辣！好耐都無食過咁新鮮鬆化嘅豬扒，唔似其他店死實實！可配麵、米線、河粉、公仔麵，轉薯粉仲唔駛加錢。一時落單太心急，無加雲吞，原來餐牌後面仲有好似車仔麵嘅自選粉麵。除咗湯粉麵，仲有自家製無味精燉湯飯套餐、鴨腿湯飯，可惜今日食咗下午茶，實在無空間試佢個燉湯，見隔離枱食好正咁，下次一定要試下！值得一提，冷熱飲品同價，$46真係好抵。最難得凍檸茶係用匙，好多店轉咗木棒，真係好難篤呀！…Read More

個名叫藤椒，但係果碗藤椒魚片米線就同清湯一樣嘅，零椒味，同清湯無分別！魚仲要係雪藏嘅，魚丸得一粒！重點哩碗嘢，我哋等咗個幾鐘6點幾同埋朋友一齊嚟，有一半吉枱但電話就講到要特登留座咁。坐低就有個亞姐掉張QR code 講咗句“自己落單，如果你上到嘅話”就人影都唔見啦！想問咩上到？攞手機出嚟就知咩事，原來張舖係零訊號，兩部手機真係一格都無，但舖頭又無 wifi 喎，咁點落單呀？唯有手寫啦！寫咗一碗藤椒米線，一碗清湯米線，兩杯石榴凍飲，一份雞翼，一份粟米。為咗唔嘥紙，我哋係填埋係一張紙上。大約20分鐘後上咗一份清湯米線，跟住一份粟米，10幾分鐘後再上一杯凍飲，我哋即時提醒係兩杯，亞姐哦完話好追。結果等了又等，我哋追咗三次，直到7:45聽到收銀話8點收舖......what?!我哋等咗個幾鐘，仲有一碗藤椒米線，一份雞翼，一杯凍飲仲未上喎！無獨有偶，現場多枱人（其實坐咗十枱都唔夠）都急忙舉手，我嘅隔離枱又係兩個人，又係好似我哋咁只嚟咗一人份嘢食。追問之下，個收銀先話無哂啲單，先嚟逐枱問返我哋仲有咩未嚟？我哋追咗3次，依家先講無單？ 仲要咁奇怪，二人枱嘅剛好嚟一人份？我兩杯一樣嘅凍飲，入單唔好入2咩？就算分兩個餐入，小食係另叫嘅，點解又只係嚟一份呢？仲要催咗個鐘先出聲話無單，話部機斷咗線，啲單無咗？人手未 ready，食物未 ready, 連落單部機都未 ready，樣樣未 ready，咁開舖為咩？打下藤椒旗號，得一款藤椒米線，仲要係完全無藤椒味，咁藤椒同清湯究竟有咩分別？以後都唔會再幫襯！…Read More

星期日下午2點幾，全個商場食肆都排哂隊，係得哩間有位，睇住可能佢貴貴地無咁多人，咁可以食得舒服啲啦！點知一入座就見個個員工黑口黑面，戴住口罩都可以從佢哋雙眼透露出“唔歡迎”嘅趕客樣，坐低就即刻講“限時90分鐘”，what? 個餐$200起，都限時？我明明見有人留言話係 hea 傾好地方喎～咁點解我嚟到又會話限時呢？90分鐘好難hea傾喎？！咁都算啦，我都無諗住坐一粒鐘……但問題你無服務又限時，係咪應該食物水準要高啲呢？扒細都算啦～我真係未試$200以上嘅扒，係未淋醬汁前已過咸，我自問好食得咸，都覺得佢太咸。啲配菜係老柴，唯獨配菜果兩糕（其實係一粒開半）係好味。餐只配咖啡或酒，我兩樣唔好，只得另外散叫，一杯$38西瓜汁，餐廳內唔算貴，唔大杯都預咗，但可唔可以清甜啲？埋單時，隔離枱都埋單，佢張信用咭出現咗問題，員工係咪應該為免尷尬行埋去細聲同客人講呢？一路行一路大大聲，語氣粗魯講“你張咭要密碼㗎？信唔到喎！” 雖然人哋係食咗嘢未俾錢，但真係唔係欠你嘅，唔知以為自己去咗大排檔。…Read More

見佢新開無耐，我又想食龍蝦伊麵，就入去試下。見佢無咩食評，以為好新無乜人添，點知6點幾去到已高朋滿座，只能坐近門口果張枱。上湯龍蝦伊麵嘅龍蝦份量係喜出望外，一份唔算少，而且好新鮮。伊麵就冧咗少，但唔會係一 pat 嘢。最驚喜係菠蘿咕嚕肉，外表好普通，但肉汁豐滿，好有咬口，唔似坊間一係死實實，一係一嚿粉咁。仲有新鮮菠蘿配搭，完全係我所愛！最後加多個豉汁蒸鱔，份量比想像中少，但味道唔錯，新鮮又唔會蒸過籠。工作人員個個都好 nice，值得 encore 嘅酒樓！…Read More

哩度嘅員工專職係嚇死你，想叫人落單，我又無催你，突然一個背脊出事發你面前就係喝你“要咩？講啦！你講啦！”大佬，你又唔係向住我，我點知你同邊個講？唔住上檸水嘅，上通粉嘅，全部嘭嘭聲突然掉低枱面，大佬我有俾錢，唔係乞㗎！最大鑊你杯凍檸水，飲一啖就成口清潔劑味，你洗碗唔過水㗎？真係一肚氣嘅早餐…Read More

真係無諗今日嘅潮樓會差到哩個地步，想好好地同亞媽嘆個早茶啫～等位時唔講限時，帶你入去先講只得1小時20分，好彩今日唔係一家大小，否則搞得細嚟，大嘅點食得切？跟住一路帶緊你入位就一路塞一包茶葉俾你，自己沖茶，但我又真係少見識，都唔知點搞佢個茶煲，想叫侍應問下，但唔會有人理你，你係要親自去捉個侍應……真係全自助。話要自助點餐，但果個 QR code 又細又隱蔽，係個茶壼後面細細個……係咪印大少少會好花錢？點餐系統，佢都真係“勁”，我都未用過一個點餐，想睇返自己叫咗咩要出返去重新掃 QR code 嘅。再嚟講食物，真係慘不忍睹。先嚟變肥咗嘅玉兔，相中可愛嘅玉兔，嚟到係一個肥大嘅奶蛋包？做唔到人哋咁可愛，就去偷圖呀？咁不如唔好放相啦！叉燒包又係一 pat 嘢塌哂……仲要皮帶酸味蝦餃係背酸味嘅煎堆仔好似未熟咁，饀料唔知咩嚟，成隻只係勁黐牙。鳳爪又係帶酸味嘅唯一，蝦米煎腸粉係正常嘅，但係豉油勁少……成餐茶，個茶包係超淡味，我覺得自己係食劣質食物，俾一個鐘頭真係有多。…Read More

不如大小平貴，間間都話限時，想坐低慢慢嘆下傾下計都難，幸好有樂湯雞。上次試咗湯麵，湯濃雞滑，仲有多種配搭，刀削麵極力推介。今次 encore 再試火鍋，食火鍋除咗食物質素及湯底，座位寬落都好重，否則叫多兩碟已無位擺。樂湯雞位同位之間有足夠空間，唔會郁啲就係同隔離枱互撞。卡位張枱夠哂大，可以碟碟上哂枱，想食咩就食咩，唔駛迫住食完一碟先換另碟。職員有禮，自動自覺幫你加湯。叫咗果花膠雞湯，職員仲提我哋先飲碗湯再開始打邊爐，湯底半隻雞仲會𢳂起幫我哋切好再上碟，唔駛我哋係鍋度手撕咁輪盡。打邊爐，牛就係必須，我哋揀咗隱陣嘅牛小排，有些少嚼口；雲吞夠大粒，餡料夠豐富；蝦滑墨魚滑夠鮮味。不得不試嘅新鮮炸起響鈴，真係好脆。其他都係火鍋常叫食物，唯獨無海鮮，當晚連魚類都無貨，有啲可惜。我哋由7點坐度10點幾，職員都無表現過不滿或者想催你走（上次食麵都一樣）。相比得坊間，有啲明明都無客，都堅持90分鐘趕你走，或者一食完就即刻收枱叫你埋單，想飲多啖水都阻住佢收工。…Read More

都有好幾年無幫襯過，可惜掛住傾同食，完全無影過相。避風塘炒蟹、椒鹽瀨尿蝦基本係必食，仲加蜆、鮮魷，牛河，真係好滿足。估唔到食完兩個小朋友仲要追加多隻蟹。新舖裝修靚咗舖服，食物水準依舊，難得價錢變化都唔大。可惜時代變化，以前人山人海，依家小貓三兩枱，唔知同搬咗舖有無關係。希望佢可以一直捱得住，疫情後生意會好返，否則真係担心又少咗一樣美食。…Read More

發現附近有半 buffet，當然要去試下……不過估唔到全個場好似得兩個人做嘢咁，其他人係行行企企嘅。我食 dinner 果日唔 full，但係我企係入口等咗10分鐘都無人應過我，咁算啦！坐低揀好餐，我足足叫咗15分鐘，期間行行企企嘅職員唔少，每個都係悠閒經過我身邊講句“落單等等”。直到我忍唔住出去食住 buffet 先，諗住一路食一路等叫 main course 落單。結果我食到第三碟，期間我仲有 keep 住四圍望及揮手示意，先終於有人落問我要咩。最最最厲害係，我個 main course 係45分鐘後先到，我連 buffet 甜品都食埋啦！真心質素一般，絕對唔高質，但價錢都可以接受，一分錢一分貨啦！但最令我驚嘆佢哋嘅工作態度係，有個類似高級少又或者係老闆之一嘅人，著住便服嘅嚟幫我幫單，用個單夾攝住我張信用咭就一路揮下揮下同人吹水，吹咗一大輪先再施施然行埋櫃枱碌卡埋單，全程我係一直追蹤住佢，我真係驚佢飛咗我張咭唔知去邊。食物值得一提係翡翠螺，老闆真係要研究下，攞咗幾次，3隻中必定至少有1隻係食唔到嘅，根本無法撩到出嚟。青口又係唔少係閉口開唔到嘅。而全場最好味嘅係咖哩魚旦及凍蝦，沙律菜都 ok，其他嘅當係試下無壞。…Read More

見有啲留言讚，咁就嚟試下，真係唔試唔知伏。多人要同陌生人坐，無隔板都算，食飯時將就下。但係食物質素真係輸粥舖幾條街，炒麵係凍嘅，味道一般，仲有嘢梗口，唔知係咩嚟，分別唔到，絕對唔係一啖半啖出事。油炸鬼，唔知佢同傳統整法有咩唔同，但根本唔係果回事，又乾又硬又油。我係非常之鍾意食油炸鬼嘅，今次半條都食唔哂，咬落一口油益味。最後係人稱多料嘅艇仔粥，料係多，但似雜烚，廚房有咁撈咩，仲要咁多料個粥都無鮮味，而且超杰。總括哩講只得一句，無下次！…Read More

約咗 lunch 又早到咗，路過見到新開嘅雪糕店，咁順便試下啦！叫咗三球：Passion fruit 堅好味，酸酸甜甜，食完想再食！Lemon 唔係香精味，fresh 中帶少少 lemon skin 味，正！Wild Berries 莓味濃郁，須要有粒籽，但不影響口感。三款都比較近雪葩，款式真係唔少，下次再試下creamy 嘅款式。另外，服務員係一位外藉姐姐，非常 nice，知道街唔俾除口罩又熱，俾我係店內慢慢食。可惜跟住要 lunch，唔可以放任自己食太多。…Read More