爽蜜蜜's Profile

香港嘅海南雞大多都係泰式海南雞，係泰國餐廳必備嘅招牌菜式；而新加坡嘅感覺唔太多，我數得出名嘅只有三數間，而排第一嘅一定係多年人氣爆棚嘅「天天海南雞飯」，想當年登陸香港亦轟動一時，現時間唔中我都會去食一次招牌嘅海南雞飯。最近發現一個折合達67折嘅白色情人節套餐 (原價$779，現價$520)，真係幾划算，而且套餐菜品都係一般會食嘅招牌菜式，唔洗諗即刻衝!杏汁木瓜花膠燉雞湯: 睇落幾足料，木瓜味比較突出，雞味一般唔太濃，但餐前簡單飲完碗黎講，算係唔錯。水果沙律: 主為係無花果及蕃石榴加上梅子蓉，梅子味甜中帶酸，幾濃味，與生果都幾搭配。黑松露酥炸生蠔: 炸粉酥脆香口，加上黑松露增鮮，蠔肉肥美飽滿，大大隻勁厚肉，其鮮嫩多汁，蠔味仲幾濃郁!天天海南雞拼燒雞: 常溫雞件淋上熱香雞油，雞肉微暖，其肉質極為細嫩，係我食過最滑嘅海南雞，再三強調，雞油真係好香好濃郁；燒雞都係比較滑身，都係好食嘅，但就無海南雞咁獨特。雞油飯: 飯粒顆顆分明，質感唔錯，滿帶雞油香，香而不膩，係必食之選!鴛鴦菜花: 鴛鴦菜花配酥炸白飯魚，整體咸香感較重。新加坡美祿豆腐花: 雖然質感唔算太滑，但豆花味重，且美祿朱古力粉超多，正!…Read More

大瀛喜最近又更新左餐牌，比起我上次黎多左唔少食物選擇，例如上湯牛油焗肉蟹伴脆麵底、吉品鮑汁鮑魚花菇翅撈飯、極尚金湯翅花膠、蟹黃蟹肉粥、壽喜燒牛肉鍋，除左原來嘅Haagen-Dazs雪糕任食，仲加入左Movenpick雪糕，晚市$288+10%，好易食回本。冷盤前菜有十多款，比較吸睛嘅係翡翠螺同黑松露煙三文煙，翡翠螺爽滑，味道鮮甜；煙三文魚連同黑松露醬有一大盤任你拎，配黎食都幾香。中式點心都有三款，包括蝦餃及山竹牛肉。雖然放題食飯好唔抵，但呢個「吉品鮑汁鮑魚花菇翅撈飯」個汁又真係好香濃，不比鮑魚遜色！醉鮑魚夠軟腍，肉質爽彈，酒味濃郁。川燒珍寶鮮蠔燒: 蠔肉非常飽滿肥美，唔係一般放題店細細隻果種，蠔味適中，炸蒜香甜，又幾好食。金蒜蓉粉絲蒸扇貝: 扇貝肉都算大粒，質感幼嫩富肉汁，粉絲吸曬肉汁，撈埋炸蒜食好惹味。香港仔避風塘軟殼蟹: 一客有兩件，大大份，軟殻蟹炸至非常香酥，蒜味濃郁，咬落去爆曬汁，好香口。鵝肝有兩款，一款為冷盤「法式紅酒藍莓鵝肝」，另一款為熱食「鐵樣鵝肝多士」：前者係將冷凍後嘅鵝肝切成粒狀，約莫一粒骰嘅大小，搭配蘋果片，質感奶滑Creamy，紅酒味香濃，與藍莓醬及蘋果都幾搭配；後者為傳統法式鵝肝，外皮焦脆，內裡十分滑嫩，入口即溶，且帶豐富肉汁。刺身約莫有十多款，另外再靚啲嘅就要食壽司先得，例如海膽、藍鰭吞拿魚等等，刺身比較高級嘅選擇有蟹腳、厚切池魚、赤貝、象拔蚌及帆立貝刺身，肉質普遍幾結實，望落同食落都覺得夠新鮮，味道係Okay嘅，但任食就唔好期望用Omakase把尺黎衡量啦……甜品及雪糕都係另一賣點，燒金枕頭榴槤都係任食，味道正常唔係特別突出，但過下口癮都okay，Haagen-Dazs及Movenpick都係任食，仲有人氣薄荷朱古力味！…Read More

「鳥海山鐵板燒」位於深水埗華盛大廈，雖離地鐵站不足5分鐘路程，但由於附近無商場，所以人流唔多，一般都唔會經過，唔預先Search定餐廳我都未必有機會食到……裝潢就如普通日式鐵板燒餐廳嘅格局，感覺較平民，食物選擇豐儉由人，二人套餐$948起（唔排除餐廳有時有其他優惠)，但我今次選擇左$1198嘅鐵板燒餐，另加$80升級大龍蝦🦞是日精選刺身四款：真鯛、伊良、油甘魚、三文魚腩，真鯛肉質細嫩，微微甘甜；伊良同為白身魚，肉質較滑而軟腍，魚味較清淡；油甘魚及三文魚就不用多說了。活龍蝦：鮮活龍蝦肉質嫩滑，且爽實具彈性，非常新鮮，以蝦膏味噌調味炒煮，醬汁濃郁鮮甜，與龍蝦肉十分搭配，巨香！活鮑魚：肉質爽滑，無需過多調味，已能表現出鮮嫩多汁。鵝肝多士：鵝肝肥美厚肉，肉質幼嫩多汁，有種入口即化嘅Texture，配返多士食無咁膩。牛肉薄燒：薄切牛肉包裹著香蔥及炸蒜，牛肉充滿肉汁，加埋鐵板炒製過嘅惹蒜，非常香口惹味。炒飯：飯夠乾身，粒粒分明，含大量櫻花蝦，咸香味突出，都幾好食。最後有鐵板野菜及味噌湯作結尾………Read More

「叄不館」位於天后樹林銀座七樓，距離天后地鐵站約兩三分鐘步行時間，位置都算就腳。其以香港舊式茶檔及電影作主題，裝潢別樹一格，但還原茶檔之餘，櫈無椅背，坐得耐都有啲攰，除此之外都唔錯。[號外] 限時優惠 - Follow 社交平台享$10元購買10支啤酒！竹蔗茅根海底椰 ($48): 打邊爐一般都會嗌返札涼茶，竹蔗茅根海底椰清熱降火，潤燥生津，味道清甜，唔會過甜，$48大大札，都幾抵飲。眾人皆醒醉雞湯 ($148): 藥膳醉雞湯鍋仲包左半隻雞份量嘅醉雞件，價錢可謂相當划算，雞肉滑嫩，份量多，酒味唔太濃，中規中矩。痛風餐 ($188): 呢個海鮮拼盤都幾抵食，一共有蟶子x2、帆立貝x2，海蝦x6、花甲x12，蟶子及帆立具已預先起肉，灼兩三分鐘就食得，整體黎講幾新鮮：蟶子爽脆鮮甜；帆立貝幼嫩可口；花甲亦洗得乾淨無沙。頂級安格斯牛頸脊 ($308/例): 牛肉色澤鮮紅，油花分布平均，質感幼滑而富油香。牛肉厚切，肉感豐富，牛味亦非常濃郁。鮮蝦丸拼鮮牛丸 ($98): 自家製手打肉丸，口感非常爽滑，鮮蝦丸非常足料，鮮味之餘，仲食得到啖啖鮮蝦肉；而牛丸彈牙之餘，仲爆曬汁，牛汁非常香。豬粉腸 ($68): 粉腸新鮮無腥味，爽口得黎又幾粉糯。…Read More

貌似酒吧，實則係泰國菜嘅「狗毛」係尖沙咀寶勒巷開左間泰式火鍋店，除左繼續提供超惹味嘅泰式串燒，除有泰式生蝦及泰式冬蔭功湯底等等。座位闊落舒服，感覺大氣，人多仲可包VIP房打住邊爐唱K，低消好似$500/位左右，價錢合理。Sapporo Draught 500ml ($88/買一送一): 晚上十點前Sapporo生啤買一送一，非常划算 （須店員協助人手落單)。鴛鴦鍋 (免費 - 麻辣鴨血鍋大辣拼泰式冬蔭功鍋): Like & Share 狗毛ig Post仲有送免費湯底，雙拼揀個鴛鴦鍋都仲得，大癲！冬蔭功鍋湯頭超濃，鮮辣酸甜，椰汁及香茅味突出，與狗毛酒吧午餐時段嘅冬蔭功湯麵味道如出一轍，好好味；麻辣鴨血鍋都幾濃，但大辣級別只達譚仔中辣左右……已經額外加辣加到好油，再加辣就太油膩了，但普通人食應該足夠，底料都幾香辣惹味。麻辣鴨血及蜂巢豆腐 (免費無限追加): 三大優惠最後仲可以免費任食麻辣鴨血及蜂巢豆腐，抵到唔識講！鴨血香滑，質感爽實唔會一夾就散，而且幾香麻辣味（唔會太辣）；蜂巢豆腐口感綿密細膩，吸曬湯汁超Juicy惹味，膩唔膩就視乎你揀咩湯底啦。手切本地牛 ($268/小份): 塊塊幾厚切大片，肉色鮮紅幼嫩，油花適中唔會太肥，肉質香滑富彈性，牛味濃郁。牛胸爽 ($48/小份): 牛爽肉質感爽脆，咬下即溢出大量油脂，好似食緊牛油咁香，但油而不膩，巨香！豬腦 ($48): 豬腦新鮮，口感軟糯細膩，非常絲滑，吸盡麻辣湯底嘅精華，十分美味！燒白鱔 ($38) & 燒牛脷 ($20): 串燒非常好食，尤其係白鱔串，一串四件，既新鮮，又厚切，肉質爽脆多汁！…Read More

今晚在旺角朗豪坊Happy Hour完，係隔離砵蘭街搵到間質素唔錯嘅日式居酒屋 — 長阪燒。價錢唔貴，裝潢唔錯，幾乾淨舒適。季節限定Oyster Set ($138): 生蠔Set為西班牙Castillo生蠔，蠔肉飽滿，非常新鮮，海水味及蠔味均適中。套餐搭配一杯Moscato白酒，甜美不帶酸，易入口雲丹拖羅蓉山盛 ($188): 海膽、拖羅蓉、三文魚籽配六件紫菜卷飯，刺身比飯還多，海膽鮮甜，拖羅蓉香滑，加埋三文魚籽嘅咸香，味道層次幾豐富。燒特大虎蝦 （$88/2隻): 虎蝦真係幾大隻，有手掌般長，肉質結實爽彈，味夠鮮甜，夠新鮮。燒鱈雪干 ($38): 普通燒魚干，但口感爽脆，帶微微咸香，為餐前小食。燒手羽先 ($28), 黑豚 ($38), 活海鰻 ($48), 青椒仔 ($28), 菠蘿片 ($28): 燒手羽（即雞全翼）外皮香脆，肉質嫩滑，帶不少肉汁；活海鰻夠鮮甜，肉質亦夠爽滑，厚度適中。…Read More

今晚相約一位住新界區的朋友catch up，揀左間位於大埔嘅串燒名店「芝加哥串燒酒場」，主打各式串燒及酒精類飲品，串燒價錢相對便宜，比居酒屋划算得多。另外，每款串燒均可自選辣度，由BB辣至大辣，辣粉幾香。San Miguel Dark ($66/Happy Hour): 與我最愛嘅Irish Beer Guinness的香滑醇香唔一樣，San Miguel嘅黑啤與普通黃啤差唔多，麥味突出，但比黃啤稍淡，換來係微微麥芽甜。Kirin Frozen ($86/ Regular Hour): Base係普通麒麟生啤，只係加左層沙冰係面，好處係令生啤可長時間保持冰爽，唔好嘅地方係沙冰太厚，一開始要食部份沙冰先飲到啤酒。純粹個人喜好，飲得快嘅Kirin Original較合適，相反飲得慢/一杯飲到尾嘅朋友嗌Frozen比較適合......招牌茄子燒 ($39): 原條茄子以大量金蒜及調料燒制，加上辣粉及蔥花，非常香口惹味，茄子肉滑嫩，食肉唔食皮的話唔會太油膩。鹽燒牛舌芯 ($33): 居酒屋食動軋要$68/串，呢度一半價錢，一客共有三件，厚度適中，其以鹽、黑椒及辣粉燒製，夠Juicy多汁，肉質保持爽滑幼嫩，牛味幾香。招牌燒牛骨髓 ($29): 質感綿滑，調料非常惹味，加上少許辣粉，好香口。蜂蜜芥末鴨肉串 ($28): 鴨肉中帶點軟骨，爽脆美味，都幾好食。…Read More

餐廳就在家附近，其實都食過幾次了，見呢幾日比較濕凍就心思思想去打邊爐，食啲辣野。收工去完旺中整甲，去到餐廳岩岩好9點半，埋單有68折！ 另外收每位$25醬料費水果費，水果有兩款：柑桔&蜜瓜，蜜瓜食落好甜！ 仲有酥炸黃豆免費提供。重點係一定要用佢地既油碟，可以減低辣度同熱度之餘，亦令食物更加香口！餐廳裝潢行古色古香，而且在馬路上當眼處，離遠就可以了見到，餐廳兩層高，很闊落！成都原味紅油麻辣湯加$48 純天然椰子湯其實兩個人食叫一個湯底就足夠了，除非其中一個食唔到辣，我地無乜用過個椰子湯，只要食到最後飲咗碗湯，由於本身無肉煮過個湯，個湯真係兩個字清甜。而我地非常鐘意呢個紅油湯底，牛油味非常濃，辣味十足，食得好爽。日本A4和牛牛頸脊肉質嫩滑，而且佈滿油花，顏色好粉嫩，牛味都幾濃，好好食。手切極品prime牛小排半份既數量都唔少，但切得正正方方，好靚，顏色相對比較深紅，牛味亦較濃，肉質彈牙，必食！蛋餃唔係火鍋店有蛋餃供應，我一見到有就會叫一份，呢到蛋餃加得比較多馬蹄，食落較爽口，比較有口感。冰豆腐點可能唔叫一份呢！索曬湯汁，非常美味！青檸沙冰好大杯！ 非常貼心！而且唔會太酸，呢杯大到我由頭飲落尾都唔洗叫多一杯，而且d沙冰唔會融得好快，食到尾都仲飲到沙冰！ 紅糖糍粑呢個要趁熱食，唔係既話，凍咗就無咁煙韌，亦無咁香脆，沐上紅糖漿食及黃豆粉，樸實無華，係一份簡單既美味。…Read More

天天海南雞最近推出左個$499嘅二人套餐，除左有主打嘅無骨海南雞外，仲有兩碗花膠蛇羮、雞油飯、雜菜煲、兩枝養生飲品。與四季芬芳crossover合作推出嘅花膠太史蛇羮有滿滿嘅蛇肉，仲有雞絲、花膠、木耳、蔥絲等料，飽滿滋味，絕對係冬日暖笠笠之選。質感較稠，味道鮮味，仲可加入香草及脆片，味道更為豐富。招牌菜天天無骨海南雞係必點之選，幼滑嘅雞肉配上香濃雞油，上菜時溫度微暖，口感一流，搭配三色醬汁，完美呈現新加坡風味。雞油飯絕對係驚喜之作，飯比雞更香，飯粒顆顆分明，香而不膩，戒澱粉都忍唔住食兩碗。雜菜煲含多款時蔬，上湯清甜，唔會太淡口。豆腐花非常奶滑，豆香濃郁，味道甜美，幾好食。跟餐價值$26嘅桃膠桂花雪梨茶都幾好飲，內含大量桃膠，口味微甜不膩，戒糖都唔怕飲！…Read More

餐廳有兩層，環境唔錯，樓下果層幾有打卡feel。價錢唔貴，Main都係幾十蚊，Pizza亦唔洗$100四川麻辣水煮魚片配日式珍珠飯 ($68): 份量頗多，魚肉有十多件，幾厚肉，夠滑。辣度不及BB辣，所以唔食辣嘅人都食到，配菜雲耳及芽菜份量都唔少。七味香烤魚柳伴雞油雜菌配日式珍珠飯 ($72): 雞肉用左七味粉調味，微辛，湯式亦放左雞油，味道okay，但肉質就唔係滑果種，但整體感覺健康，唔油膩。泰式奶茶 ($48): 茶味幾濃，加左煉奶同忌廉，非常香甜，就算啲冰溶左都無乜變淡。…Read More

難得放一個悠長假期，一早已經Plan好曬大部份活動，其中一站預訂左位於尖沙咀棉登徑嘅焱丸水產，呢間居酒屋都幾具人氣，閒日夜晚都Full曬，但預早少少訂座應該問題不大。木系裝修風格，內裡有唔少插畫，都幾Colourful，有日系居酒屋感覺之餘，又幾一種幾warm幾熱鬧嘅feeling刺身五盛： 五款刺身分別為帆立貝、油甘魚、三文魚、吞拿魚，及海膽。整體新鮮，帆立貝尤其美味，三文魚水準向來比較穩定，為香港人最愛，油甘魚都幾有油香。蟹味噌甲羅燒：有原味甲羅燒，亦有加上黑松露嘅甲羅燒，主要係以味噌醬、蟹肉蟹膏、蟹籽加鵪鶉蛋拌勻燒製，口味非常濃郁惹味，亦有種幾奢華嘅感覺。鮑魚殼燒：活鮑魚非常新鮮，即場燒製，鮑魚肉質爽彈，鮮味。花魚半條：又名花魚一夜干，其脂肪比例較高，分布均勻，煎煮後魚油香更為突出，所以居酒屋好多時都有燒花魚食。北海道海鮮炒飯：炒飯非常足料，內含大量魷魚、蝦肉、蟹籽及蔥花等料，盡顯鮮味。…Read More

午市可享原價七折優惠，超級超級抵食，嗌到成檯都係野食野飲加甜品，埋單都只係$500零蚊，而且整體味道唔錯，又夠大份，飽到夜晚。環境光鮮新淨，位置又夠闊落，老實講，真係非常推介呢間餐廳。半半炸雞 ($178): 六款口味任君選擇，我地揀左蜜味芝士粉及黃金蒜香炸雞。首先，炸雞外皮酥脆，雞肉嫩滑多汁，本質不錯。蜜味芝士粉夠香甜，芝士十足，但又唔會覺得太甜太膩；然而蒜香炸雞亦充滿金黃色嘅香蒜，蒜香撲鼻，雞件亦非常入味，較為濃郁重口味。另外，盤底仲有大量炸薯條，採用薯味較重嘅粗薯條，好好食。桃味啤酒 ($68): 炸雞配啤酒乃是必然，呢款啤酒加入左桃味，更香甜，更易入口。脆炸辣雞腎 ($88):  將青椒及雞腎沾上炸粉後炸至金黃色，另配有辣醬，口味屬於中辣至大辣級別。青椒辣度各有不同，整體而言，唔會辣得好過份，味道方面又真係幾香口惹味，飲下啤酒傾下計，兩個人都竟然食得曬。醬油魚介湯鍋 ($208): 食完咁多煎炸野都要揀返款清淡少少嘅，友人鍾意食韓式魚介湯鍋，魚介高湯加入多款魚糕，看似簡單，但味道確實唔錯，湯底清甜，魚糕用竹籤串起曬，食起上黎非常方便，肉質爽滑彈牙，幾有肉香，一串串大口大口咁食都咪話唔過癮。芒果雪冰 ($78): 雪冰非常好食，冰凍之餘，超級幼滑，唔會凍親個口之餘，又能有入口即溶嘅貿感。甜度岩岩好，隻芒果味幾香，亦唔會覺得假，幾impressive…Read More

「鵜舞」一 位於荔枝角D2 PLACE地下嘅日式居酒屋，店面唔細，閒日夜晚居然全場滿座，質素方面，應該唔多唔少都幾有保證。Coedo Shiro – Hefe Weizen: 放工輕鬆下飲返支手工啤，幾有特色，口感幾醇厚，富果香，甜甜地，配啲串燒/揚物都幾chill......燒七味魚翅乾（$68）：呢款魚亁配啤酒/清酒都幾合適，燒得脆香，但又唔乾，香口惹味，佐酒一流。辣吞拿魚腩卷（$98）：餡係吞拿魚腩蓉，面頭又有一堆吞拿魚腩蓉，絕對可以食到好滿足，辣就唔辣，但吞拿魚腩富油香，美味，呢款都幾好食！博多明太子玉子燒（$72）：玉子香甜，明太子富鹹香，鹹甜相間，兩者都幾搭配，玉子又夠滑，Texture都唔錯。福岡特色凍蕎麥麵（$78）：一款無肉但就非常滋味嘅麵食，以鏗魚湯底，加入鏗魚碎、香蔥，及溫泉蛋等，湯底鮮甜美味，一啲都唔覺得單調，仲出奇地濃味添，以半熟蛋汁拌麵更為惹味。佐賀金星黑豚（$238）：黃金酥香嘅高質吉列豚肉，炸粉夠薄脆，有種入口即化嘅感覺，另外豚肉肥瘦比例適中，Juicy得黎又幾有肉味，幾好食！除左價錢稍貴外，無野挑剔。…Read More

Burgeroom一直係我幾鍾意嘅一間漢堡店，比起連鎖「Shaxe Shaxk」及「Five Guxx」等等真係過之而無不及，人均$100-$150，貴少少，但好食好多。閒日晚上都唔少人，美麗華店裝修幾靚，環境舒適，枱凳又夠闊落，坐得非常舒適。Double Decker 雙層牛肉芝士漢堡 （$145）：漢堡非常大堆頭，適合二人分享，餐廳會預先切開，方便享用。牛肉極厚，鬆軟且Juicy多汁，味道方面，牛味濃郁突出，非常高質，漢堡包又夠香脆。另外，加左唔少芝士及千島醬，仲有蕃茄同生菜，層次相當豐富，非常好味！牛油果醬芝士焗薯條（$68）：採用我最喜愛嘅粗薯條，薯味更為突出。薯條焗得香脆，芝士份量十足，非常惹味，牛油果醬creamy得黎又夠香，兩者非常融合，幾好食。Americano 美式咖啡（$38）：採用意大利illy咖啡豆，質素絕對有保證，喜歡濃啲嘅，可以好似我咁要求加少啲水，Intensity更高，Aroma濃郁，Aftertaste更為強烈。以下係餐牌資料：…Read More

呢間烤魚唔錯，雖然粉嶺有少少遠，但如果去開呢一區，都可以考慮試下。香辣泡椒烤魚（中辣）加薯粉：烤魚一定要食夠辣嘅，所以我地嗌左香辣泡椒口味嘅烤魚，江團魚大大條，再加埋份好大份嘅薯粉，都幾夠飽。一開始覺得中辣都冇咩feel，點知d湯約煮越濃，d魚越煮越入味之後，都幾夠辣下，江團魚外皮酥脆，再吸埋湯汁之後真係一流，而且魚肉嫩滑爽口，非常厚肉，係十分高質，下次想再試埋個麻辣湯底，應該都會好過癮。凍檸檬百香果：食完辣野要飲一啖凍野，好爽，但平時餐廳既野飲都係細細杯，但呢到一杯成800ml，可以唔洗慳住飲，實在太爽了！杯野酸酸甜甜，我本身都好鐘意百香果，呢杯岩曬我心水，抵飲指數十粒星！泰式酸辣鳳爪：鳳爪都幾入味，而且唔會太辣，每隻鳳爪都大大隻，肉質飽滿，好有口感蒜蓉燒茄子燒到非常香口惹味，價錢又唔貴，屬推介之選！水牛城雞中翼：雞翼燒至外皮香脆，味道唔似水牛城雞翼咁又酸又辣。味道微辣辣，食落惹味。蒜蓉/芝士燒日本廣島蠔：蠔既size都幾大，價錢好實惠，食落好creamy, 蒜蓉會比較惹味啲，而芝士份量都好夠，增加咗幾分香口！…Read More