Captain America的個人專頁

今日喺中環同個客開完個會搞搞埋埋都三點鐘先開始食飯... 雖然間中都會過開嚟，但都見到好多吉舖，特別係好多老字號嘅相繼執笠，所以想喺中環搵食都唔容易。中環食肆非常多，但啱口味嘅種類唔算多，行逛途中見到電車路旁有間應該新開嘅燒味店，門面環境裝修都光猛舒適， 而且見入面都有好多食客，既然經過即管試下，睇下中環燒味質素可以去到幾高。職員安排座位後見到大部份食客燒味飯都有燒鵝，而且就咁睇餐牌燒鵝都係招牌之一，避免花多眼亂下最後叫咗個三拼飯，包括：燒鵝、油雞、叉燒，當然唔少得一隻太陽蛋。另外見到佢嘅郊外油菜係配燒鵝汁，咁當然都要試一試。飲品方面都有啲特色飲品，而我鍾情檸檬茶咁就試埋杯陳皮檸檬茶，呢的天氣可以潤下喉。落單後等咗大約五分鐘食物陸續上枱啦~ 見到成碟飯熱辣辣出晒煙，幾肯定係剛剛出爐，呢啲質素係最正。二話不說影完相即刻開餐! 首先燒味飯份量及賣相上相當滿足，每款燒味都有四至五件而且斬得大大件，真係無得輸。味道方面燒鵝質素好高，鵝皮香脆肉質鮮嫩，鵝肉肉味香濃，加上新鮮出爐香噴噴；油雞驟眼睇唔係雞髀但都啖啖肉，肉質好鮮嫩豉油汁好入味，令雞皮及肉都有甜甜地豉油香味；半肥瘦叉燒，除左食到佢個肥叉嘅甘香外，估唔到瘦肉部位都做得好嫩滑，一啲筋位都無，一咬就已經分開，部份更有燶邊非常惹味；燒味飯加頂帽（太陽蛋）會令成碟飯更加完美，蛋黃甘香熱辣辣，撈埋啲飯一齊食成件事可以話係絕配。鵝汁油菜，平時油菜多數都係加蠔油或腐乳，但呢度簡簡單單嘅油菜加上燒鵝汁，味道居然咁鮮甜，食到菜嘅新鮮同埋燒鵝嘅甘香，配合得好好。食到咁上下點可以少得靈魂伴侶凍檸茶，今次呢杯特色飲品加咗陳皮入口好潤喉，凍凍地配合檸檬鹹鹹酸酸味道好唔錯。喺中環食到呢個質素嘅燒味飯都算係意外收穫，性價比又好合理埋單$126蚊，可以喺中環區食到色香味俱全嘅餐廳都真係可遇不可求，下次豪多少少食埋個乳豬飯就真係好滿足啦~   …查看更多

今日約咗朋友夜晚去睇場戲，不過由於睇完都要成十點，所以我哋相約好早少少食嘢先，睇戲就無咁肚餓。因為朋友係呢頭返工，所以當問到要食咩嘅時候，佢都二話不說提議食個火鍋放題，可以消耗時間之餘，呢間亦都出名食材新鮮質素高，亦可以避免要等好耐，所以最後就約定五點半左右開餐，避開晒啲輪候人龍。去到餐廳門口環境衛生、乾淨整齊，職員好快就安排入座，雖然唔使等位，但係都已經坐滿九成顧客，我朋友果然有備而來~ 望一望個餐牌，佢有兩個時段供客人選擇分別90同120分鐘。 因為驚遲入戲院，最後兩個揀咗90分鐘$148嘅火鍋套餐，佢係定量牛、豬肉各一碟而配料任食。 揀選套餐後就要揀埋湯底，佢呢度都有12款湯底選擇，由於我哋兩個唔食辣，所以選擇困難後叫咗藥膳椰子清雞湯及藥膳台灣沙茶湯。等咗大約五分鐘湯底上枱啦~~~ 我揀咗個椰子雞煲雞湯所以都即時飲啖湯，發現佢個湯好清甜好有香濃椰子味，質素極高。等多一陣牛同豬肉都陸續送到，起初以為每人一碟牛、豬擔心未必夠食，但後來見到佢自助吧有大量嘅配料任食，就完全唔駛擔心。除咗飲品櫃之外，掃QR Code亦都有好多款手工飲品可供選擇，我哋前後都嗌咗兩、三杯，質素都相當高。我哋第一時間都輪住出去攞醬料有九款可供選擇。當中見到自助吧有相當多蔬菜同丸類，賣相相當新鮮，而且見到職員Refill得相當快，所以完全唔怕短缺。攞完一大堆丸類同埋蔬菜後，我哋都掃埋個QR Code，發現有幾款肉類及餃子可以任點任食，有沙嗲嫩牛肉、雞髀肉、白菜豬肉餃同埋魚柳等。喺等緊呢段時間我哋梗係口不停蹄食佢嘅牛肉同豬肉，肉類質素鮮嫩而且有肉味，質素絕不馬虎。不過最令我驚喜嘅就係佢嘅沙爹牛肉同埋雞髀肉，質素好高。再試埋佢嘅白菜豬肉餃同埋魚柳，質素正常，入口都新鮮嫩滑。但對於我哋男人嚟講，點都唔可以缺少碳水化合物烏冬同埋公仔麵，佢呢度有台灣嘅王子麵食，而且仲有手打烏冬，配合埋個湯底烹調好入味。食到差不多一個鐘職員都有窩心提示顧客Last Order，如果有需要都可以食埋個甜品。咁我哋當然要食啦，佢個雪糕櫃除咗基本嘅雪糕之外，估唔到仲有名牌雪糕，例如：Movenpick。為咗要回本，所以起碼最少食兩杯先夠... 食到完場埋單每人消費$150蚊加一，性價比相當高飽住肚走人。離開時見到門口已經人山人海等緊入場，好彩我哋一早到，如果唔係真係起碼等一個鐘以上，所以如果大家想舒舒服服就要好似我哋咁早啲到，或者等到最後一輪咁就比較理想。呢間放題絕對適合唔想淨食牛同豬嘅食客，而且鐘意台式口味既人仕多一個選擇。…查看更多

今朝一早去咗朋友住係何文田區既會所打咗兩個鐘頭網球，今日天氣炎熱打完波成個人散晒，真係要經常走動先可以保持心肺功能。本身同朋友打完波食飯，點知佢有緊要事做最後唯有食自己，因為唔太肚餓，所以去左土瓜灣區黎個深度遊。由於啟德體育園區落成從而帶動到呢區發展，加上土瓜灣交通配套及食肆都一應俱全，所以好多野都好完善。經過馬頭圍道見到間手搖店，因為口渴而買杯野飲。喺等緊過程中發現旁邊有間小店不停有人幫襯，門面雖平凡但原來係連續四年米芝蓮推介，對我嚟講都係個大發現。既然買左手搖又唔想食咁多嘢，咁不如試下米芝蓮推介啦。見佢餐牌都好多選擇，不過觀察到好多人買既野，最後揀左五款：招牌白魚蛋、椒鹽炸燒賣、鬼馬豬柳 / 墨魚條、咖央西多士、香茅豬扒撈麵。等候途中老闆同職員都好快手處理食品，而且老闆態度好好又有禮，都建議我有咩好食。等咗大約十分鐘所有食物都已經上枱啦~~~ 由於今日無揸車咁就食埋先起行。第一時間試咗佢個招牌白魚蛋，因為即叫即炸所以入口非常熱，而且白魚蛋彈牙又爽口，再配合泰式辣醬好惹味，值得推介! 到試佢個鬼馬豬柳同墨魚條，豬柳條肉質鮮嫩多汁好有口感，而墨魚條每一口都有豐富墨魚肉，肉質彈牙爽口，如果喺屋企嘆住啤酒就更加爽。之後到椒鹽炸燒賣，平時多數係食蒸嘅，但佢個椒鹽炸燒賣由於都係即炸，所以個燒賣皮好脆卜卜，亦因為係魚肉燒賣關係做到外脆內軟，口感煙煙韌韌好好味。跟住份咖央西多士好有驚喜，係老闆嘅新菜式，餐牌都仲未出現。西多士份量同賣相好吸引，坊間食到嘅西多士大部分餡都係花生醬，而呢間係用咖央醬，因為落單後即炸，所以做到外脆內軟，加上咖央醬甜甜地，比起傳統花生醬味蕾衝擊相當大。最後食埋個香茅豬扒撈麵，麵底係印尼撈麵，麵質口感大同小異，反而好欣賞佢塊香茅豬扒，豬扒醃得好入味，肉質鮮嫩豐富多汁，加埋豉油撈埋一齊食質素相當高。估唔到土瓜灣都會搵到一間隱世米芝蓮推介嘅小店，果然深藏不露質素高，左一間手搖、右一間小食，兩者相得益彰，下次同朋友打完網球一齊再嚟試。     …查看更多

呢排天氣比較差，特別係夜晚大風雨又熱又濕，而且今晚喺西區呢邊做通宵，真係好難頂~ 不過嚟得呢度對我嚟講都有個期望，就係呢度有間好多人慕名而來嘅小店，就係《真滋味美食》。呢間舖頭開咗喺堅尼地城，以前大學讀書時，夜晚玩完、溫完書都會去呢度幾條友一齊傾下計食好西，隔咗咁多年仍然念念不忘。今日好彩落完雨，而且凌晨時間人流都比較少，平時要排成半個鐘以上... 廢話唔講，去到第一時間落Order，佢呢度嘅名物一定係馳名烤雞髀，記住係烤雞髀!!!  除此之外，仲有好多小食都好大份而且好食，  係等候時間同老闆都有講有笑非常Nice。最後，就叫咗兩隻烤雞髀同埋一份大魚蛋，見到老闆整每份嘅食物都好用心，證明咁多年屹立不倒係有道理。等咗大約十分鐘所有食物都上枱啦~及後第一時間揸車返去舒舒服服開住冷氣慢慢嘆雞髀。影完相就開餐，味道質素依舊。雞髀外皮香口之餘，由於有醃料關係燒出黎效果真係比起炸雞髀高兩班，最緊要係肉嫩多汁，而且雞髀都有用心剪開，所以入面充滿醃料嘅味道，童叟無欺~ 有機會經開西環一定要試。 另外食埋係長洲成名大魚蛋，呢度嘅大魚蛋落完單之後會幫你翻熱，入口又係彈牙爽口，配合甜醬質素相當高。嚟得呢頭除咗去海傍打卡影下日落之外，食埋呢間烤雞髀後真心無悔。 …查看更多

又到每星期放假日子都要盡下孝道陪下屋企人打牌、食飯、傾下計，珍惜擁有嘅時光。由細到大讀書都係觀塘區，所以對於觀塘區都有好獨特嘅情意結，所以趁今日搵兩老之餘就順路回味下。講返正題，由於屋企人都鍾意食雞亦鍾意食辣，今日經過觀塘嘅時候見到間海南雞嘅外賣店，感覺上都好似幾符合以上需要。見到舖頭門面都幾光鮮整潔，睇到佢嘅招牌食品都唔會好花巧，實而不華。見到除左主打海南雞外仲有啲冷盤，  款式都比較傳統。考量咗一陣，最後幫兩老選擇咗無骨海南雞飯同無骨口水雞飯，而我都好耐無食過燻蹄，所以最後自己就要個無骨烤豬手飯，三款就剛剛好可以試晒，等左五分鐘後食品都上晒枱~~~ 由於今日天氣相當熱，返到屋企後都已經開定冷氣同雪定支凍水，始終娘家係最舒服，親情永遠俾所有都重要~ 休息完就當然準備開餐啦，每盒飯份量都好大盒都只係$40蚊，性價比相當高。由於皇上鍾意食海南雞而皇后鍾意食辣，所以大家都唔駛爭。首先講下個無骨海南雞飯，賣相顏色上外皮好黃油，就咁睇都知道唔會差，以去埋骨嘅肉量計佢嘅份量好夠多，黃油飯亦好足夠，配合埋佢個豉油同配菜，賣相一流。味道方面雞肉好鮮嫩多汁，而且雞油好甘香，但一的都唔油膩，好好味~~~口水雞由於辣嘅關係，避免辣油浸到落啲飯度，所以店舖都好細心分上份量亦相對多，而且另一盒黃油飯可以當兩餐食，價錢都只係$45蚊。味道上同無骨海南雞飯一樣外，好多辣椒碎鋪面好足料，而個辣椒油都做得好出色，每啖都變得鮮嫩又惹味。皇后話肉質鮮嫩唔需要用力去咬，對於老友記嚟講真係加分位。最後到我嘅無骨烤豬手飯，顧名思義香港叫「燻蹄」，呢啲冷盤真係多年無食過，所以都好大吸引力。豬手份量大約都有十片數量非常足夠，豬手嘅肉質嫩滑入口好夠凍，豬皮就好爽脆完全唔韌，好適合小朋友同老友記。呢間海南雞外賣店除咗味道好、質素高外，由於觀塘區都比較多長者，所以佢既出品都好切合老友記嘅需要，係間好體貼嘅小店。呢餐三大盒嘅飯都係$120蚊左右。題外話見到佢除咗以上嘅食品外，仲有啲米線同埋豬扒好似幾吸引，下次再陪兩老嘅時候試埋其他款式~   …查看更多

眾所周知一講起九龍城最出名嘅就係泰國菜，基本上所有餐廳都好出色，不過今次講嘅就係開業廿年老字號嘅泰式燒烤串燒「金泰燒烤」，顧名思義佢嘅串燒遠近馳名，連「旅發局」都點名推介。不過，好消息係分店終於開到太子啦!!!我咁雀躍係以前經常幫襯，但係九龍城以前未有地鐵比較隔涉，依家雖然有車，但新店始終近居住地再加上市道低迷，絕對要撐小店。由於早前見到出名嘅Youtube頻道介紹，所以今日下午放工就同另一半幫襯。店鋪坐落旺角火車站橋底，一落橋就見到門外已經有好多人等緊外賣，舖面乾淨整齊， 職員就忙於燒烤，咁我當然二話不說落單~ 餐牌大致上同老店相若， 除咗串燒外仲有沙冰都好出名，亦有豬手同海南雞飯嘅主食，串燒由於太多選擇，最後樣樣都要一串...而另一半因為未食晏，所以就要左一個泰式海南雞及兩杯芒果沙冰。因為顧客都比較多，所以大約等咗15分鐘左右食品終於上枱啦~ 上枱啦~攞完外賣後迅速開車返屋企，返到去食物都仲係熱辣辣，屋企隻牧羊仔流晒口水望住，另一半就準備餐具，而我就當然同啲食物打卡先，打開包裝發現職員好細心將啲沙嗲汁、辣汁分開袋好，咁就唔會影響食物本身鮮味同避免淋晒。到食物介紹，海南雞飯性價比相當高，雞肉份量好大份而且全部去晒骨，肉質好鮮嫩油份甘香；油飯香而不膩，入口時唔油膩，減肥人士必愛。到串燒，呢間因為係即叫即燒，肉類新鮮而且有調味，所以必食之選。首先雞肉類，燒雞翼質素好高，肉質鮮嫩入味，外皮燒得脆身，肉質鮮嫩多汁燒得香口。燒雞串，雞肉嫩滑外份量亦夠多。燒雞肝由於非常新鮮，口感粉粉地入口沒有內臟腥味，鐘意食內臟極度推介。到豬肉系列，燒五花腩好出色，五層肉燒出嚟好甘香又唔乾，肉汁非常多而且嫩滑，一定要試。燒豬頸肉口感爽脆唔會好肥，有油花但唔會一口油，質感不錯。燒豬肉味道鮮嫩多汁，肉質偏瘦唔騷，適合女士之選。燒牛肉肉質新鮮嫩滑，質感唔嚡口唔煙韌，當然除咗肉類質素外，師傅手藝都好緊要。跟住就到回憶嘅食物：燒墨魚丸，大粒粒每一口都有墨魚肉爽口彈牙。燒珍寶腸，即係司華力腸，燒出嚟肉質唔乾身，最緊要個外皮好香脆。燒蝦餅，師傅好用心燒，外皮燒得好脆肉嫩而且沒有雪味。燒泰國腸係我第一次食，估唔到個味道同口感都好有新鮮感，泰國腸好香濃嘅香草同埋肉碎，口感豐富有層次。最後，食串燒缺一不可嘅就係沙爹醬，佢個沙爹醬配合串燒配合得非常完美，沙嗲汁有好香濃嘅花生味，醬汁濃稠之外仲可以食到花生碎，質素相當高。點可以漏咗兩杯芒果沙冰，價錢上相對其他貴少許，但係當你喺現場見到職員用新鮮芒果肉同埋碎冰之外，完全無添加任何糖漿及椰奶，就知道出嚟嘅效果必定係新鮮。果然，入口時非常夠凍，芒果肉好新鮮香甜，質素相當滿意。呢餐消費每人約$140蚊，所有食品質素同份量完全係超晒班又超值，坊間普通食店一串都要$20蚊而且質素無咁好，呢間不論由九龍城到太子都仲可以屹立不倒就知道貨真價實，夏天熱辣辣，食住串燒飲沙冰完全係最佳享受。 …查看更多

北角新光戲院係大家集體回憶，好不幸地經營困難已經由三月起結業，連帶旁邊由細食到大嘅陳記魚蛋都面臨結業。起初知道呢個消息都好失落，不過見到有其他媒體介紹原來已經搬遷到旺角道，日後就真係好就腳。今日經過旺角確實想懷緬一番，所以趁收工時間打算買黎當晚餐。見到新店門面乾淨整齊，舖頭比較細但餐牌上既食品種類依舊，當中亦見到熟悉嘅面孔，舊店員工亦有坐鎮，記憶返晒嚟~ 除咗招牌魚蛋外，最出色嘅亦係秘製辣汁。最後點選左魚肉碗仔翅、魚蛋、魷魚、牛柏葉、齋、腸仔、蘿蔔、牛丸、螺肉、燒賣!!!  店員一路同我傾計一路整理食物，等咗大約十分鐘所有食物已經處理完成上枱啦~ 道別後就攞返屋企慢慢嘆，影完相就準備開餐。首先講個魚肉碗仔翅：魚肉份量夠多，魚肉有香濃魚味而且口感彈牙。碗仔翅入面真係絲絲入扣，有粉絲、木耳絲、肉絲、冬菇絲，再加上胡椒粉，完全係傳統嘅味道。其後到陳皮魚蛋：口感偏實身，陳皮味幾重外魚味都好香濃，香港以外嘅地區真係好少搵到呢的質感。牛柏葉：質地夠爽，每塊都比較大令掛汁嘅範圍相對多，口感一流。水魷魚：非常新鮮爽口，特別係魷魚鬚位置掛汁一流，每啖刺激又惹味。齋：即係麵筋，入口完全無油益味，口感煙韌再加上吸晒所有辣汁，食落夠辣又刺激。腸仔：十蚊有兩條性價比都相當高，選用嘅廚師腸味道傳統，同其他內地合成肉完全唔同層次。蘿蔔：大大嚿非常清甜，入口完全無渣，配合辣汁非常惹味。牛丸：有四大粒性價比都相當高，因為加快烹煮過程所以都有鎅花，掛汁情況更加理想，入口彈牙爽口，係必點之選。螺肉：之前未食過，不過見到好多食客食，所以都嗌返串。肉質比較爽口而且一粒粒都方便食用，質感鮮甜。燒賣：喺蒸爐蒸熟，食嗰陣時好燙口，口感彈牙，不過加豉油或辣油會比較建議。最後不得不提秘製辣汁，由於有三款唔同嘅辣度，而我同另一半都食唔到咁辣，所以最後都叫咗個小小辣。秘製辣汁味道非常濃郁，而小小辣亦帶少少甜好惹味。每次食到個頭都晒出汗，真係好爽食到舔舔脷。大辣我就真係唔敢試啦~ 所有食物加上個辣汁好香濃會令你好想繼續食，的確係值得一試。陳記魚蛋喺全港有幾間分店都做咗好多年，質素都依舊咁高，依家好多集體回憶慢慢消失，希望大家可以珍惜香港仲有嘅嘢......    …查看更多

近期見到好多社交平台都開始提及西九龍中心Food Court食肆有好多隱世平民特色小店，今日同另一半收工後專登去朝聖。首先今日介紹既小店係6樓C21-23店，佢開係意大利手工意粉店斜對面，係一間賣日韓食物嘅特色小店。呢間小店門面正常唔太花巧做作，我哋安頓好座位後睇下個餐牌，  餐牌款式唔算多，但老闆介紹比較好食嘅係關東煮同埋咖哩系列，而且所有嘢都係即叫即做。最後，我哋每人一個餐加埋啲小食。係老闆專心烹調嘅時候我哋就舒舒服服喺吧檯傾下偈。成個Food Court環境好開揚有好多唔同款式多國菜，有需要亦可以係旁邊小店購買手搖飲品，所以Food Court嘅性價比真係相當高。等咗十分鐘左右所有食品都陸續上枱啦~~~ 首先介紹個關東煮烏冬，入邊配料有大根蘿蔔、竹輪、蒟蒻同溫泉蛋，食材都好鮮甜入味。大根蘿蔔一啲渣都無好入味；竹輪有幾條，味道都係坊間嘅味道；蒟蒻大大件，口感煙煙韌韌好飽肚；溫泉蛋賣相吸引大大隻；加上手打讚岐烏冬相當掛汁，所以撈埋溫泉蛋一齊食質感煙韌口感豐富，亦有香濃蛋香味。到日式咖哩烏冬配汁燒肥牛，首先肥牛好嫩滑而且份量好多；日式咖哩汁係自己調配，唔似坊間日式咁死甜，佢有少少辛辣既惹味；配合手打讚岐烏冬掛汁強，攪拌好食成件事好刺激好惹味。配合埋分湯上既油揚豆腐真係好有驚喜，入口多汁甜甜地好有日式嘅味道。另外不得不提兩款小食照燒雞扒及吉列豬扒，因為係即叫即做所以上枱時好夠熱，份量正常。汁燒雞扒燒到外皮香脆，肉質鮮嫩多汁惹味；吉列豬扒即炸非常燙口外皮酥脆，豬扒嫩滑多汁，兩個主食加埋小食質素都好滿意，埋單每人都係$60蚊左右，價錢好抵。最後幫襯埋隔離小店兩杯手搖飲品，整餐飯平靚正，下次經過西九龍中心可以光顧下支持用心經營嘅小店。…查看更多

今日中午要去港島東工作，經過太古坊附近位置見到呢一間舖頭門口好鬼多人排隊，起初心諗：「都係日式店有無咁好食啊。」當我完成工作都差不多午市結束，走個時見到呢間鋪無咩人流，而且又見佢個門面都幾日系，就即管入去試試......   佢哋款式未算相當多，但都有好多重點推介。由於我唔識得魚生，所以最後點咗一份天婦羅丼，等咗大約十分鐘所有食品都已經上晒枱啦~~~ 杉玉豪華天丼：天婦羅炸粉相當薄入口酥脆可口，非常夠熱。餸茶有五款：天婦羅蝦新鮮彈牙，三隻都好夠大，口感相當好；沙鮻魚肉質新鮮嫩滑沒有碎骨，成條食真心嫩口；魷魚新鮮彈牙做到好軟身，一啲都唔韌；番薯及茄子都很新鮮清甜，每口都多汁不會太乾身，再配合珍珠米及天婦羅汁，整體配合得相當好，非常滿意。 荔枝梳打：份量普通得八成滿，感覺比較少。但味道方面清甜荔枝味再配合梳打水，整體上都好解渴。 杉玉堅強布甸配雲呢拿雪糕：布甸口感未算Q彈，配合焦糖醬入口都算清甜，雲呢拿雪糕非常夠凍，入口甜度適中，質素正常。整體性價比合理，但天婦羅我覺得係必點之選。 …查看更多

味千之霸：拉麵麵條煙韌，可以自選麵既質感軟硬度，而且餸菜都有五款：叉燒都算大塊但比較瘦且乾身，肉本身無肉味，質感普通；豬軟骨都好大件，肉質嫩滑味道豐富，必點推薦；溏心蛋有流心效果；配合大量木耳絲及蔥花，整體賣相都好滿意，但我覺得日式拉麵無理由無竹筍，咁就比較欠妥當。味千餃子：餃子有五隻擺盤唔算太整齊有掛邊情況，賣相就一般。味道上外皮脆身，但咬開時有豐富肉汁，肉質都好鮮甜，味道上都滿意。蜂蜜百香果茉莉綠茶：份量都有九成滿賣相都吸引既，味道上甜度適中，入口非常夠凍，啖啖都有百香果籽，口感豐富。燉煮豬軟骨：因為都幾好食，所以另外加配，豬軟骨都好大件，肉質嫩滑味道豐富，必點推薦。竹筍：要另外加配咁個份量都好夠，入口爽脆沒有筍腥味，口感好好。 …查看更多

天氣真係好反常，立春後依然咁凍，出街仲要著外套，大家都要小心身體。今日喺九龍區見客，雖然呢期新盤唔多，但好多業主都襯呢個市況裝修下間屋同鋪頭，公司生意都算唔錯。中午時份完成手頭上工作後就搵個朋友食飯，剛好大家得閒佢就介紹咗間放題，地點係莊士倫敦廣場一間叫「鍋霸吃到飽台式養生火鍋」，門口海報標明可以坐四個半鐘... 嘩，估唔到香港彈丸之地都有咁奢侈嘅地方同時間食飯，咁真係好吸引喎，如果無特別野做又想慢慢食慢慢坐，呢個地方絕對係不二之選。 餐牌套餐有五個等級，我哋要個LV2美國Prime Grade牛肩胛肉，中午時間四個半鐘都係$188/位，真係抵到爛。入店後職員都幾窩心，趁揀緊湯底嘅時候送上麻辣雲耳同青瓜作開胃菜，而每枱上都有幾包Shake Shake粉，主力用於晚市既煎炸食物，不過午市有需要都可以用。職員介紹飲品櫃有好多款式飲料：各種罐裝果汁、汽水，仲有適合女士又健康嘅冷泡茶。呢間台式火鍋湯底足足有廿款任揀，只需要加$48蚊就可以轉個鴛鴦鍋，最後分別要左藥膳沙茶雞涮涮鍋及台灣古早牛肉涮涮鍋。等咗幾分鐘湯底上枱啦~ 湯底好香濃好重藥材味，啲材料好新鮮份量夠大，沙茶雞肉質嫩滑，而古早味牛肋肉炆煮得好淋好入味，建議大家飲完湯食埋的肉後先放火鍋配料。 牛、豬肉方面雖然係LV2但質素絕對唔差，牛有香濃肉味、而豬肉入口好嫩滑完全無騷味。由於我哋早餐都無食過，所以牛、豬前後都食左三輪。入店嘅時候見到其他食客都有食海鮮，我地當然唔執輸，因為海鮮喺打邊爐係不可或缺嘅存在，套餐只需要加$40蚊就可以任食。海鮮要左幾份海蝦、蜆、帆立貝、白鱔片、鯇魚片等，講真淨係食呢幾款都已經值回票價，佢哋嘅海鮮好新鮮又爽甜彈牙，係出面都未必次次食到。 由於其他配料款式眾多，所以我只有簡單介紹：炸魚皮拖一拖個湯底即放入口，魚皮香脆掛上濃香湯底，非常惹味。雞件味道正常沒有特別醃製，但肉質鮮嫩。沙茶牛肉有驚喜，嫩滑有牛味再配合沙茶醬，味道有坊間沙爹牛肉質素。鴨血係台灣及港人至愛，吸收湯汁後入口非常稔滑。特色長蟹柳係我由細到大既美食，份量係正常既三倍。墨魚滑入口彈牙，內有豐富墨魚肉，高質必點。另有兩款餃子，自家製白菜豬肉餃及韭菜餃，由於是人手新鮮製造菜蔬清甜爽脆，豬肉新鮮無騷味。稻庭烏冬都係火鍋必點食材之一，麵條煙韌彈牙，食到中後段吸收所有湯汁，質素相當高。另外再推薦嘅三寶丸、墨魚丸、豬肉丸、牛丸，黑松露墨魚丸、潮汕豬肉丸、梅菜豬肉丸等等幾款手打丸，每份細細粒絕對唔會食滯，每款都好新鮮彈牙，食材貨真價實，童叟無欺。此外仲有啲現成嘅配料都非常多，最後要咗碟腐皮墨魚卷及菜蔬，食到真係大滿足啦。呢度最大優勢係唔需要睇住個時間，慢慢食享受食物，傾下偈慢慢享受歡聚時光，比較其他要個半小時簡直大壓力。差不多食飲完，職員為每人送上一杯嘅雪糕作結尾，款式多之餘仲要係Movenpick及Haagen Dazs品牌，質素當然有保證。不經不覺食左都三個鐘都好足夠，可以喺恬靜嘅環境同無壓力嘅時間下用膳，完全係享受生活。呢餐飯埋單每人$270/位，經濟之選下約多幾個朋友或家庭小聚，呢間係誠意推介。 …查看更多

踏入農曆新年天氣驟降，終於都感受到冬季氣息。由於要趁年頭去同啲客打招呼，所以同秘書經過深水埗睇下樓盤啲裝修情況，搞掂晒都已經下晝，又係收工嘆茶嘅時候。經過汝州街就諗起幾個月前食過嘅「傑星冰廳」，門面依然好有傳統味道而且亦都有蛇年嘅佈置，終於開始感到新年嘅氣氛。雖然已經過咗午飯時間，但下午茶呢個時間依然人流不絕，好彩剛好有卡位咁就可以舒舒服服食餐飯。見到場內食客主要都係叫茶餐、下午茶等等，不過最多人食都係豬仔骨同埋咖哩飯，所以我都唔需要考慮就揀咖哩豬扒蛋飯，而秘書就揀咗個椒鹽豬仔骨配薯條，咁樣就可以兩樣都試晒。飲品方面就梗係我最愛嘅凍檸茶少甜，而佢就要一杯茶走（意思係加煉奶）。等咗大約十分鐘食物先後上枱啦~~~ 首先椒鹽豬仔骨份量好多有四件，再配合一堆薯條，一個女仔都未必食得晒。趁我個飯未上枱時，我都偷食咗少少，呢度嘅豬仔骨即叫即炸入口好夠熱，而且豬仔骨鬆脆有口感，肉質鮮嫩無騷味，加上椒鹽配合得好夾味道一流。波浪薯條外脆內嫩，口感非常好。轉個頭咖哩豬扒蛋飯都上枱啦~ 主角豬扒有兩塊加上兩隻蛋，再配合香濃嘅咖哩汁及半個薯仔，就咁睇已經流晒口水。賣相上厚切丹麥豬扒大塊之餘而且有肥膏邊，完全係貨真價實。味道上豬扒入口鮮嫩多汁，配角咖哩汁香濃惹味唔算好辣，兩隻荷包蛋煎至香脆有溏心效果，撈飯真係一流，成碟飯配合得天衣無縫。食完嘢坐咗陣飲埋杯嘢，兩杯飲品都係預期中高水平，秘書都覺得呢度嘅奶茶茶香奶濃，質素比較同級嘅都較高。凍檸茶少甜入口非常夠凍，而且檸檬有四片甜酸度適中，份量又夠大杯。不過最驚喜係見到其他食客係餐廳後排攞生果，呢啲有免費水果提供俾食客，我哋都唔執輸食返少許，去過咁多間餐廳都未見過咁無私分享，呢區既同理心真係好到不得了。食完生果坐咗陣埋單走人，餐飯都係$100蚊唔駛完全係抵食好食，最重要係好用心經營，下次會再試下其他食物。深水埗真係令人驚喜嘅地方，感覺上雖然係舊區但其實有好多嘢慢慢變化緊，好似呢間餐廳咁食物款式選擇多，但價錢依然好親民，性價比極高，所以真係唔好標籤同定義呢一區嘅生活質素。       …查看更多

踏入12月終於入冬，呢啲時間最好就係打邊爐或者燒嘢食，今個星期就約左屋企人幾個去燒嘢食。由於老人家比較少遠行，所以今日專登揸車出去元朗區行下順便燒嘢食，早前朋友介紹元朗有個地方叫「富來休閒農莊」好適合男女老幼，所以今日要一試究竟。上網見到燒烤場位置比較近水尾村，入邊去見到都仲有一、兩間燒烤場，但我要去個間有紅色嘅路牌指示，所以根據地圖都好快到。入面有幅大笪地，私家車位非常多而且當然係免費。泊好架車之後行到去燒烤場，門口有隻紅色嘅大蝦歡迎我哋。入到去望下個餐牌，星期六價錢每位$178，除左每人包1支水同1罐汽水外，入座時間係無上限，即係可以由朝燒到夜晚，性價比超高。職員安排座位後，每枱都可以選擇用網燒又或者係用叉燒，對我哋呢啲 懶人而言一定係網燒，及後職員好快幫我哋起爐，我就趁機四圍遊走下啦~等候既呢段時間欣賞下四周環境，呢度除左地方夠大仲有好多設施，例如適合大人既麻雀、唱K外，仲有適合小朋友嘅夾公仔機、籃球機、撈金魚、沙池、大型飛行棋、足球場、充氣迷宮、跳彈床，    仲有小童版電動車，完全係可以消耗一整日嘅精力，當然最值得介紹嘅就係呢度有得釣蝦，即釣即食玩完又可以食，完全係合家歡遊戲。 說時遲那時快個爐都開到火紅火熱，咁當然要睇下有啲咩嘢啱食先啦。個場有幾個凍櫃食品選擇好多，有基本豬、牛、雞肉類外，有蔬菜及種類多既丸類，包括我最愛既腸仔，仲有燒賣等等，海鮮就有多春魚同魷魚，所有食物都有辣同唔辣，任君選擇。呢度仲有麵包同埋自費飲品同雪糕大量供應，醬料方面蜜糖、蒜蓉、牛油、豉油、辣油一應俱全。基本上有現場供應食品外，如果有其他喜好例如海鮮都可以自攜進場燒仲係免費。食到咁上下都要伸展下，跟手我哋幾個去一齊釣蝦，蝦既數量好多而且比想像中大隻，每人最少有兩隻但如果唔夠都可以斷斤去購買，價錢合理。釣完上黎可以即刻處理，如果唔識都有職員協助後就攞去燒啦，燒出黎蝦肉好彈牙且爽口，有幾隻仲有爆膏情況，真係勁好味。在場都見到有好多小朋友亦有小動物，完全係一個共融嘅環境。由於就快聖誕節，所以場內既高樓會定時有噴雪，不論小朋友或大人都好樂在其中，喺呢啲天氣燒嘢食享受下日光環境帶嚟嘅氛圍，果然係好滿意嘅家庭樂。玩到大約七、八點又食得飽飽，就揸返架車出去元朗市中心行多一陣商場後就返屋企，今日既活動好充實，間中出下市區完全係一個好選擇。 …查看更多

生意無分地區性，而且遠近必達。由於公司接咗單比較大嘅生意喺大埔區，所以今日就算千里迢迢都要揸車入去，雖然地點位於市區，但對於九龍人嚟講都算係一個旅程，不過新界果然好地方，環境同空氣都清新啲。喺大埔超級城同個客傾完工程後就各散東西，呢個時候又係化身孤獨的美食家，上網睇下附近有啲咩嘢好介紹，就咁打「大埔區美食」就已經出咗幾樣我鍾意嘅食品，其中一款當然係雞髀，而第二款亦都係我好喜愛嘅港式車仔麵，因為中午時間相信雞髀滿足唔到我嘅胃口，而且地方亦比較遠，所以最後決定就選擇咗喺昌運中心嘅郭仔記車仔麵。鋪頭位處商場外面，就咁睇門面比較簡約，但入到去發現已經有好多顧客，真係搵個位都唔係咁易，最後等咗一陣都好快安排到座位。入座後第一時間望下個餐牌，  見到除咗招牌車仔麵之外亦都有快餐選擇，但對我而言一定要試下個招牌啦，除咗車仔麵之外仲有比較特別嘅叫掺掺麵，起初唔係好明白係咩嘢，但係見到其他食客都食緊類似嘅嘢，原來掺掺麵即係撈麵!!! 車仔麵嘅餸菜款式都比較多，而且都幾有特色，例如：秘製豬軟骨、鹹菜豬肚絲、豬潤、豬手等，基本上喺普通嘅車仔麵舖未必有，所以吸引好多食客選擇。最後，睇咗一陣間決定好啦，餸菜上選擇咗秘製豬軟骨、瑞士雞中翼同陳皮魚蛋，另外加杯凍檸茶。由於係手機落單，所以都好方便，麵底揀選咗要爽口啲嘅油麵，另外配個沙嗲汁（多汁），所有嘢都可以按照自己意願選擇，未上枱都已經流晒口水。等咗大約幾分鐘已經上枱啦~ 由於呢個餐包咗一碗紫菜湯，所以上枱時候已經令我好意外，因為真係好多年無飲過紫菜湯，我都急不及待飲返幾啖，呢度嘅紫菜份量一啲都唔吝嗇，份量非常多而湯底好清甜，每啖紫菜湯都好新鮮而且洗得好乾淨，完全沒有任何沉澱物質素相當高。飲品方面凍檸茶少甜，份量好足夠而且入口非常冰凍又消暑。飲到一半嘅時候，主菜終於都上埋枱啦~ 見到佢碗麵份量相當大，餸菜擺盤精美有層次，完全為打卡而設。打完卡後就用迅雷不及嘅速度撈好個麵就開餐啦。首先，佢呢個油麵底好爽口，完全唔淋身入口煙煙靭靭，配合沙嗲汁味道相當好。及後餸菜上陳皮魚蛋，陳皮魚蛋喺香港已經有好多年歷史，同坊間唔同嘅係入口有陳皮味，而且每粒煙韌彈牙，細細粒容易食，非常吸引。到秘製豬軟骨，佢嘅豬軟骨都係一件一口，女士們都可以食得好有儀態。佢嘅豬軟骨好入味而且非常淋，除咗有豬香之外亦有醬汁嘅加持，味道有層次。最後到瑞士雞翼，就咁睇賣相已經非常入味，每一隻雞翼好飽滿，所有餸菜好足料。正當我享受緊嘅時候，見到枱面上有樽辣菜脯而且真係唔係間間舖有，我都唔執輸加埋落油麵食，辣菜脯好爽脆而且同油麵好夾，真係一絕。食到尾聲飲埋個紫菜湯，成件事好完滿。由於愈來愈多學生加入，所以我都快手埋單走人，呢餐飯$70蚊唔駛，有完整嘅撈麵及飲品，再配合一大碗紫菜湯，性價比相當高，又一次證明大埔環境好、大埔人質素高之外，食物亦都有返咁上下，下次再過嚟開會都會介紹俾同事一齊試下。…查看更多

終於都到九月份過多兩個星期就係中秋節，一到呢啲日子就要買定月餅同屋企人做節，雖然天氣不似預期仲係咁熱，但係入夜後都有涼風送爽。今日一朝早就約咗兩個老朋友去香港仔打網球，南區真係好少去而且近排仲有一個新商場開幕，所以打完波都行咗一陣。由於大家都唔係住南區，所以差唔多傍晚時間我哋都一齊出返去灣仔食飯傾下偈，由於三個麻甩佬都鍾意去坐得舒服又夠地道既地方，所以異口同聲都話茶餐廳就最適合。喺灣仔雖然選擇好多，但平時去開嘅都係一兩間，一間係食燒春雞，而另一間就係平時中午約埋食Lunch嘅茶餐廳。餐廳位置正正喺燒春雞鋪下面，之前食過呢間鋪既炒粉麵，鑊氣相當夠而且燒味亦好新鮮，所以我哋入到去都坐返平時個位。因為有三個人所以今次可以食多少少嘢，餐牌上有套餐、有例牌而且亦有散叫，足足有成百幾款選擇，不過由於我呢排要Keep Fit比賽，所以今日淨係食少少算，最後我哋三個人點咗乾炒牛河同埋黑椒牛柳絲炒烏冬、叉燒同油雞例牌、兩杯凍飲同埋一碟油菜。同夥記傾咗幾句，星期日可能多數人去旅行或者返大陸，人流少左的，所以真係要繼續留港消費帶旺經濟。三個人一聚埋就好多野傾，食物大約十分鐘就已經陸續上枱啦~~~ 首先跟餐都有兩個湯送，中式湯係我最愛由於無落味精所以入口都好鮮甜而且都見到湯料好足，完全係健康嘅味道。其餘所有食物賣相同份量好吸引，特別係兩碟炒粉上枱時仲好香，始終食為先最後都忍唔住口食返少少。首先兩個例牌，由於大家都上咗年紀所以叉燒都唔可以食得太肥，雖然係咁但係佢個叉燒肉質好嫩滑，一啲鞋口感覺都無而且燒得好香好有蜜糖味，好值得食。到油雞例牌，淨係睇佢個色澤已經知豉油浸得好入味雞肉好鮮嫩，食件雞髀肉啲雞油已經喺個口度滲出嚟，比起其他燒味檔質素都要高。到乾炒牛河啦，雖然話係一人份量但上枱時都好大碟，而且好有鑊氣好足料上枱時仲出緊煙，份量上牛肉同其他配料一啲都唔少，味道方面牛肉質感相當好，完全沒有用鬆肉粉，好有牛香味入口相當嫩滑；河粉好爽口每條好分明炒得好均勻，最緊要一啲都唔油膩。到黑椒牛柳絲炒烏冬個份量、賣相同埋鑊氣都係大同小二，不過佢呢度牛柳絲份量好似仲再多的，烏冬麵條煙煙韌韌，炒出嚟口感都相當好，小炒真係極力推薦。油菜一碟份量正常不過好新鮮，入口爽脆清甜，間中食碟菜清下腸胃都係個唔錯嘅選擇。兩位朋友就要咗凍奶茶同埋凍檸蜜，賣相份量好正常，不過特飲就要加$12蚊，我都好想飲不過都係留返下次先。我地坐下、食下、傾下偈，不知不覺都食咗兩個幾鐘頭，果然幾個麻甩佬永遠都係最多嘢講最細路仔，今日好盡興由朝玩到晚，埋單每人都係$100蚊左右，呢間餐廳完全有香港嘅風味鑊氣又夠，性價比高之餘仲有同夥記嘅人情味，呢間喺灣仔嚟講算唔錯嘅選擇。         …查看更多