為食細細粒's Profile

其實一開頭睇個店名，以為係一啲注重噱頭嘅餐廳，但朋友推薦過，所以揾左個星期六中午光顧。去到見到餐牌上嘅食物唔算多，Burger同意粉為主，但我想食一啲比較濕潤嘅食物，就叫咗蕃茄湯烏冬配慢煮雞肉。慢煮雞肉，其實係慢煮雞胸，但係一啲都唔乾唔柴，處理得好好，仲有兩片。我估廚師應該有將雞胸用鹽水浸過，然後慢煮過再煎香。雞胸熟透唔腥，但係食落質感同雞扒差唔多，當然食雞扒會好食啲啦，但係雞胸健康，蛋白質高，煮到同雞扒一樣係唔簡單，係健身人士嘅福音。然後蕃茄湯好濃郁，同甘味烏冬專門店係差唔多，清新開胃。$58個餐，仲有粟米湯同一碟仔麻醬青瓜，食到我勁飽。由於猛男老闆太忙，同埋個樣好嚴肅，唔係好敢同佢講話啲嘢食好食，不過呢間舖頭值得比更加多人知。(食晒先記得影相) …Read More

平日下午去，叫咗一個假日拼盤，超失望，每一樣都係超燶，燶到苦。當中肉眼係最差，又燶又冇肉味又韌。雞就雖然話係慢煮，但係雞胸都係鞋同埋乾。Ribs係肉質比較好，但係都燒燶左，破壞晒。I visited Dan Ryan at a weekday afternoon and felt disappointed. As you can see, all the BBQ food were over cooked. They tasted so bitter.…Read More

非惡意，不過真係唔好食。醬汁無味，青豆仲好生，雞髀冇味，蜂蜜檸檬比較淡。之前堂食食過all day breakfast 係好食既，所以係個別item 既問題，希望可以改善。…Read More

第一次食船皇，我叫左兩碗雞絲雞翼湯米同金邊粉，加凍檸茶同奶茶，好快就有得拎外賣。首先，要讚佢用紙兜做外賣，亦有分湯，比較環保亦保持到味道。但建議個炸豬皮不用分袋，反正本身比較硬，浸過湯更好食。第一時間試左個湯底，甜甜地，夠味但唔油膩，而且又唔覺得好味精。另外，啲雞絲係有肉味，不是乾柴或者霉，而雞翼同金邊粉亦都幾好。提外話，我電話落單係要蛋麵的，唔知點解foodpapa(老豆)拎到返嚟係金邊粉。而飲品我係飲泰式奶茶，只係加六蚊就飲到泰國味道，即係橙啡色果隻奶茶，仲要唔係勁甜，幾好飲。或者你會話冇圖冇真相，但我唔記得影。完。…Read More

經e字頭訂枱網站取得半價優惠，試咗餐牌上皇牌嘅芒果芝士奶蓋珍珠，一飲就覺得好難飲，第一冇芒果味第二冇芝士味。味道就似稀釋左嘅融咗嘅芒果布甸。本來想喺訂枱網站留評價，但佢冇登出嚟。…Read More

建議大家嚟新都會既simplylife, 都係係食意粉 pizza 好了，因為叫burger會有機會中伏。點解係伏呢，睇落其實都幾靚仔，但一咬，舊burger好苦好燶，個牛油果醬好淡，但好膩，整得唔好食。最好食係啲薯條，脆口得嚟帶點煙韌。同埋有杯果茶都叫做安慰啲。所以，聽姐姐話，叫意粉同pizza 穩陣啲，不過唔知個炸魚burger點呢？有人食過嗎？…Read More

話說細細編最近要決心減肥，真係好驚由索版細細粒變肥版細細粒，浩南會唔認得我，所以就開始稍為節食，再加健身啦。 但細細編有時lun廚都好苦惱，因為出街食真係好難食得好食又健康，直至遇到佢！不過如果你係唔食魚會長，請你禁上一頁出返去。哈！細細編覺得板長既午餐都幾高質，由其係燒鯖魚配飯同麵屎湯。條鯖魚唔單止好大條，仲燒得好好，外脆內juicy，腩位由於多油會有少少腥，但食開魚會覺得冇問題，同埋佢調味做得幾好，咸咸地，加埋汁或者檸檬都好好食，食到魚既鮮甜。 而餐配既飯同湯都幾高質。細細編覺得呢個餐真係葵芳區堂食午餐既cp皇，健康之選(掌聲)。…Read More

唔知大家有冇睇過一個連登post話，瀨粉一定係最古惑既食物，因為夾到埋口都會溜走。(痴女小編：其實感情咪一樣，以為會開花結果咩，最後又為何結果不是我想像的，嗚嗚嗚)講番正題，原來米苔目都係古惑仔既一份子，比佢既兄弟銀針款淋啲軟啲，都係滑嘟嘟夾唔到，只可用匙羹。當日小編同友人各自叫左碗米苔目，一個乜Q軟豆腐，一個拍青瓜。米苔目可以配兩個餸，我地分別揀左鴨肉，豬潤同豬脾肉，而湯底default係豬骨，不過我地加三蚊轉方魚湯。食得出食材都新鮮，湯底都冇乜味精，但就不算好特出，係清淡、飽肚之選。另外Q彈軟豆腐係我鐘意既口感，好彈牙，似食緊魚片，但調味只有五味粉，有點兒單調。最後就係拍青瓜，呢個可以唔叫，因為冇乜蒜味，唔夠香。平日夜晚六點九左右到店，食左一個鐘，發覺店內都冇乜食客，希望老闆可以改良下煮法調味，例如提供辣菜脯，然後有更多人會幫襯。總括嚟講，感覺上呢間小店都係真材實料，值得支持的。…Read More

由於小編未揾到南南南南哥養，仲要係葵芳打份牛工，所以成日都會去葵廣買外賣食。今次係第一次食芝士輪意粉，估唔到係咁高質。咁我就揀咗巴拿馬火腿意粉加蘑菇，即係35+$5。（可以喺落單嘅時候同店員講想落黑椒）估唔到佢都俾咗幾多火腿，而且見到佢落咗好多忌廉，都幾真材實料。食嘅時候最好就撈左個意粉先食，因為好多忌廉都會係個底度。意粉煮得啱啱好，唔會太硬或太淋，仲幾入味。而芝士味唔算好濃烈，但同啲忌廉幾夾，火腿幾好食，唔會有臭味，啲紅洋蔥煮得夠熟，好甜。總括來講，性價比極高，讚(唔係怕肥我都會成日食)。…Read More

三月十四都同兩個麻甩仔去打冷，就知小編仲未揾到我既浩南。不過唔緊要，因為中西意日韓入面，小編偏愛中菜，例如係酒樓、打冷、上海菜等，食好嘢仲實際啦。今次三人行去左太子陵發打冷，但適逢小編岩岩病完冇乜胃口，我地只係叫左幾樣嘢。如果小編戰鬥力回復100%，一定可以試多幾樣嘢。首先就係必食的蠔仔粥，啲蠔仔真係好飽滿，有半隻我既食指咁大粒，好鮮甜。但成窩粥既湯水就估左一半，粥料就比較少，大概每人兩個碗仔既份量，但蠔仔都有三十粒左右。記得menu上有幾個size, 個樓面叔叔就話三個人叫第二大既就ok，我建議可以叫大一個size，因我覺得呢樣係最好食，同埋量真係唔多。仲有最重要係，如果你同小編一樣唔鐘意食莞茜葱，一定要走青青青，重要既嘢講三次。另外就叫左炸蠔餅，好食，好鬆脆，啲蠔係一樣咁大粒，係食過既蠔餅中最好食既(利申: 小編好少食蠔餅)。仲有叫左鹵水拼盤，揀左鵝腸，墨魚同腎，鵝腸係最好食，但一百蚊嚟講，就份量少左啲。最後仲有碟油菜，好油。因為唔記得每樣幾錢，所以唔特別提啦，總之埋單就330，冇加一的，總括來講質素不錯。…Read More

大家好，今次係我第一次寫食評，希望以後都可以同大家分享下有咩美食劣食。第一次寫既餐廳係euro go go，因為我覺得佢出品質素幾高，對得住佢價錢，值得成為我第一篇既主角(掌聲)。今次一行三人叫左兩個意粉，一個pizza，一個小食。其中蒜香蜆肉意粉係我指定要食，因之前食過好好食，辣辣地，好香蒜味，雖然冇醬但唔會好乾，蜆肉都好鮮甜，雖然蜆肉份量有啲少。另外友人想食茄醬，就叫左鮮茄煙肉香腸意粉，個茄醬感覺幾fresh,有少少茄肉同青椒味，調味有少少太甜，如果唔係煙肉係肉粒會好點，有點太齋。另外我地叫左個經典的超級pizza，都幾好食，好脆，好夠味，但個size都幾細，如果肚餓都係叫返意粉啦，咁細個薄批好似食左兩塊餅乾咁。最後個忌廉焗西蘭花就差少少，好少料唔夠味，個底好多菜水，有待改進。…Read More