Keytalk's Profile

睇住IShowSpeed嚟到香港，個導遊托哥特登帶咗佢去食呢間茶記，人哋第一次嚟香港，直播住比幾十萬人睇，心諗乜呢間嘢會比澳牛更有特色？直播完第二日即刻去咗朝聖。去到見有位同侍應講一位，佢好串咁話冇位，我指住入面冇人坐嗰啲位問係咩嚟，佢冇答就走咗，心諗jm9。咁等咗陣之後有得入去，冇耐有另一班人入嚟坐咗我之前指住問嗰啲位，有人book咗就講啦，駛乜黑我面啫？咁我叫咗個忌廉炒意粉，wow上菜之係碟意粉係冇汁㗎，問返侍應係咪廚師唔記得咗落汁，佢話問問但係冇返過嚟，我都冇晒期望費事等就咁食個冇味嘅意粉算。平時啲食評就算係負評我都會影幾張相，禽次食完心情差到唔想影，零分，都唔知點解托哥要帶speed嚟呢間食，嘢食又難食態度又差，順便喺度剷埋托哥，好耐冇見過咁廢嘅導遊，大好promo機會就咁比佢浪費晒。…Read More

相信有食拉麵沾麵嘅人都會喺社交平台見過元祖沾麵嘅廣告，最近仲攞晒獎，又有X假期必吃食店大獎又X Magazine我最喜歡日本拉麵店，嘩真係咩冇乜信用嘅雜誌嘅獎都攞晒，淨係見到呢樣都已經覺得伏味濃。講到咁，點解我仲去食？我係抱住好奇嘅心態去睇吓啲雜誌同Foodie可以吹到幾大。既然攞咁多獎，佢啲午市套餐都應該有番咁上下水準，咁餐廳有午市特價套餐，49蚊個拉麵，老實講平到有啲驚人，於是就要咗個叉燒拉麵試試佢。我哋四個人都要咗同一款拉麵，碗麵嚟到嗰陣你望我我望你，大家都喺喥諗同一樣嘢，點解咁似食緊味千拉麵嘅，我明明嗌咗「黑蒜豚骨叉燒拉麵」，可唔可以唔好求其滴兩滴麻油落去就算，再講吓塊叉燒，薄到成張紙咁，隻蛋木耳同筍冇乜嘢可以特別講，正常發揮，最伏係個湯，你有冇食過出前一丁嘅「九州濃湯豬骨湯味」？冇錯完全係嗰隻味，同我屋企煮嘅味基本上一樣。冇諗過得獎食店嘅午餐同出前一丁係同一個水平。另外啲職員唔知喺喥趕乜，嘢都未食晒就不停提我哋要盡快還枱，話出面有客排緊隊等，唉咁咪食快少少埋單走，出到去根本冇人，餐廳又仲有唔少位，又唔係7月，你哋邊喥見到有人排隊。趕客之餘仲要好嘈，講嘢超大聲，大聲過食客，感覺相當差。總結，唔好食，要食拉麵去對面間「麺処一家」，優秀好多，成餐最正係送咗包紙巾。…Read More

拉麵沾麵都食唔少，但係真係未試過食呢個日式撈麵，我對撈麵嘅印象仲係以前五蚊七仔撈麵，營多撈麵真係稱得上世界十大發明，應該頒發個諾貝爾獎俾發明營多嘅人。講返間餐廳，喺修頓附近，大快活隔離，一間橙色一間白色好明顯，一眼就應該揾得到餐廳。第一次食就試返啲正路嘢，所以好冇冒險精神咁要咗個正宗全料撈麵算，另外因爲肚餓就順便叫晒佢兩款小食試埋。正宗撈麵嘅材料我懶得介紹，自己識字睇圖啦。個麵到咗之後職員會同你講店舖嘅建議食法，分開四part，先撈勻就咁食三份一，加點椒食多三份一，然後落佢哋嘅自制香醋食埋嗰三份一，留一啖可以加飯撈埋剩低嘅醬汁。個麵辣辣哋不過好惹味，而且同其他嘅材料相當夾。咁一個專業嘅食評係咪應該有碗麵撈完同埋加咗飯之後嘅相？我喺喥答你我唔係一個專業嘅打手，你要睇靚相你睇錯食評，睇返嗰啲收咗錢嘅食評啦。小食方面有炸雞同餃子，炸雞不過不失，餃子比較特別啲，係蒸餃而唔係煎餃，呢樣比較少見。埋單冇加一，第一次食日式撈麵，整體感覺幾好，餐廳亦都好光猛同乾淨，唯一係個肉碎有少少辣味，唔食得辣嘅人未必頂得到，如果可以選擇辣嘅程度會好啲。…Read More

講起肉蒲團，第一樣嘢諗起一定係杜汶澤朗讀嘅<3D肉蒲團投訴潮文>。「點解好地地一套咸片，會血仲多過汗/精？慘叫、哀號仲多過呻吟、叫床？」「點解好地地一套3D咸片，3D嘅竟然係子彈、飛刀、石頭、血、內臟，而完全唔關性愛事？我寧願3D嘅係精，寧願俾葉山豪顏射我，都唔想睇子彈飛刀呀，要睇子彈飛，我睇讓子彈飛唔好？」成篇潮文簡直係經典，見到餐廳名淨係識笑，入去嗰陣完全見唔到有Anson Lo企咗喺門口。餐廳有四款任食套餐，分別係肉、浦、團、同埋唔記得咗第四款係咩，咁呢餐飯係慶祝大佬升職加人工佢請，我哋就要咗「團」嗰個套餐，第四款仲貴啲不過我哋幾個都認為好唔低食，冇必要打個邊爐用超過四舊水。醬料同配菜都充足，佢有隻醬比較少見，係日本黑蒜豉油，幾香，啱我鍾意食重口味嘅人。湯底有成六七款選擇，我打過咁多次邊爐未見過用清酒麵豉蜆湯做火鍋湯底，老實講食唔到有清酒或者麵鼓味，不過有好多蜆食。職員會喺你食之前放低個牛肉拼盤，個盤放咗乾冰，做到有種煙霧瀰漫嘅感覺，放上ig應該幾靚不過我唔識影靚相亦冇興趣去學。肉主要都係牛同豬，有幾款唔同類型嘅肉，係幾好食肉質都唔錯，只不過唔係好分得岀邊款打邊款。總結而言，肉嘅水準唔差嘅，個性價比都ok嘅，鍾意食牛嘅人可以試一試。…Read More

七月尾時去過呢間「牛駅」，當時掛住食冇影相，而家八月尾再一次同以前啲中學同學嚟食多次，今次記得要影相，唔使用人哋啲相，上次唔係用自己啲相搞到周身唔自在。湯底一樣係嗰九款，上次要咗麻辣加豬筒骨，今次要咗麻辣加牛骨。我份人呢唔鍾意打邊爐食貴嘢，我覺得冇必要加錢升級，不過今次同同學慶祝佢哋升到職，佢哋想食貴啲就跟佢哋食貴啲啦。配菜醬料飲品應有嘅都有，可惜係XO醬好快俾人攞晒，問咗職員添不過都走嗰陣都冇添到。麻辣湯好辣，上次嗌咗中辣今次吸取教訓要咗小辣，都依然係好Q辣，雖然辣不過冇之前食得咁辛苦，同埋辣得嚟好香幾好味。牛骨湯ok嘅，只不過藥膳鍋好似比較適合冬天食多啲。升級咗個餐多咗幾款肉、魚滑蝦滑同內臟，我哋有人唔食得內臟所以冇叫到，豬牛肉同魚滑都唔錯，豬肉有豬味牛肉有牛味，不骨老實講我完全分唔到啲肉同最平嘅有咩分別，下次叫返平啲嗰隻算。整體而言係唔錯嘅，不過唔好升級個餐，叫最平嗰隻任食已經足夠。另外雖然餐廳可以喺社交平台訂座，但係個系統相當麻煩，用到個人都有啲燥，希望可以改善。…Read More

九龍城最岀名應該係佢嘅泰國菜同潮州菜，兩樣我都好鍾意食，不過九龍城將會大規模重建，咁就趁佢重建之前試多幾間餐廳，今日呢一站就係呢間叫Pavia嘅意大利餐廳。唔知食咩好問咗職員有咩推薦，佢介紹我哋每人叫個Set Lunch，套餐包餐湯或沙律同埋一份主菜，咁我哋叫咗一人一份套餐，另外再加多份意大利雲呑。餐湯同沙律我哋一人要咗一樣，沙律係蜜桃鴨胸沙律，沙律同醬汁分開上，個醋汁酸酸哋食落相當開胃。餐湯係薑汁甘荀湯，我咁大個人未飲過薑汁湯，味道又岀奇地夾。另外前菜會跟埋四片蒜蓉包，冇乜咩特別不過勝在夠熱。成餐最貴嘅就係呢碟雲呑，仲貴過主菜，個雲呑比較特別之處係佢隻餡，一般意大利雲呑都會用肉類或者蔬菜加芝士做餡，餐廳用咗帶子同菇做餡，而且都相當足料，醬汁亦都非常香濃，唯一缺點就係真係有啲貴。主菜叫咗西冷扒同豬扒，兩款嘅配菜一樣，牛肉跟黑椒汁豬扒跟醋汁，兩款肉都唔會好硬，雖然我平時鍾意食牛扒多啲不過今次我會投豬扒一票，佢隻醋汁唔係成日見到，我覺得同豬扒非常夾。可以加錢要埋個甜品不過太飽冇叫到，總結而言水準都幾好，如果經過九龍城又唔想食泰國潮州菜可以考慮一下呢間。…Read More

Fennel位置喺山林道，不過係山林道街尾，近嗰間大陸味好重嘅酒店嗰邊，而唔係近張彌敦道嗰邊，如果冇Openrice根本唔會知道有餐廳，咁既然揾到就約咗同事一齊去試一試。餐廳喺17樓，入到去見到有露台有靚境，可惜已經有人坐低咗，不過都仲有窗口位坐，好似有個沙律吧但係問咗職員佢哋話今日冇。我同同事一人嗌咗個意粉，餐牌上面除咗意粉仲有其他例如咖哩、海南雞飯、牛扒等等，午市嘅選擇都唔少有超過十款唔同嘅菜式。第一碟意粉係「牛油果忌廉汁燒雞肉寬條麵」，成個意粉味道好濃郁，忌廉味幾重不過因爲有牛油果嘅關係令到佢唔會好膩，配搭幾均衡，不足之處應該係份量比較細。另一碟就係「泰國蟹頭油大蝦帶子意粉」，一上到嚟好香，一陣好香嘅蝦味同蒜香味，蝦肉都好爽口彈牙，不過同上面碟意粉一樣比較細份，同埋意粉個汁稀咗少少。跟餐有餐飲，我好悶咁要咗杯凍檸茶就算。總結而言係ok嘅，我諗最大賣點應該係個景，想有靚景位記得早啲嚟。…Read More

工業大廈有好多隱蔽嘅餐廳，雖然media嗰啲好鍾意用「隱世」呢兩隻字，用到濫，不過公道講唔熟觀塘真係未必知邊啲地方有間餐廳。我自己都唔係觀塘人，好彩有朋友喺附近返工同推薦先會過觀塘試呢個漢堡包。放工岀發去觀塘差唔多八點先去到，上到11樓行到走廊盡頭就見到間餐廳，門口貼咗餐牌，有分午市價同晚市價，但係望真啲漢堡包個價係冇分別嘅，如果食金邊粉就有十幾蚊差別。Mac’n cheese 可以稱得上係美國國民級食物，細個會喺屋企個整Kraft嘅即食芝士通粉當下午茶食，中學之後都好似冇乜點再食過，見餐牌上嘅有個Mac’n cheese漢堡即刻勾起童年回憶，唔諗其他嘢就叫咗呢個。其實漢堡包點樣先影得靚，我成日覺得我影唔岀啲嘢食有幾好幾差。講吓個包，啲餡好豐富，多到個包差啲合唔埋，個口細啲都應該冇可能一啖過咬到，芝工通粉嘅味冇我印象中咁濃，反而我幾鍾意佢隻焦糖洋蔥同自家BBQ醬，咸甜嘅配搭平衡得幾好，係食到最後有少少膩咁啫。總結，食到一半見到隔離枱個黑松虂薯條好似幾正，有啲後悔冇加錢轉到，下次記得升級。呢間餐廳可以返食。…Read More

我呢就幾鍾意食拉麵沾麵嘅，自問都食唔少，喺旺角嘅一生懸麵最近好多人講，次次去到都排晒隊，餐廳推出咗款雪糕拉麵，可能有人會咁嘅組合係糟蹋緊拉麵，不過其實日本都曾經推出過呢個組合。咁今日呢就唔係講呢個雪糕拉麵，因為我唔鍾意食雪糕，所以我係冇興趣食㗎，我今次幫襯係想試佢嘅海老沾麵。當日要OT，成九點先岀到旺角，非常好彩冇人排隊，餐廳入面又有位就入咗去，由於實在太肚餓，除咗碗沾麵仲叫多咗份炸雞。先講吓個主角碗沾麵，我記得我叫嘅係沾麵，沾麵係麵同濃湯分開上，重點係濃湯兩隻字，我眼前碗湯絕對唔係濃湯，碗湯淡而無味而且稀到水咁，我敢直接飲晒佢都唔會怕腎虧，我個腎去柬埔寨活摘都仲可以賣到個好價錢。個炸雞為餐廳加返少少分，味道同份量都ok嘅，係啲炸粉厚咗啲咁。另外想反映嘅有兩件事，一係職員二係PR，我上面都有提及過我九點先坐低食，當時除咗我仲有三枱食客，兩個職員好似嫌我哋阻住佢收工咁，見我食完個炸雞就即刻收起隻碟，放低筷子嗰刻就走過嚟收咗隻碗同問我幾時埋單，我食到好飽同佢講想坐多陣先，同埋食完九點半都未到，其他食客都仲食緊，點知個職員連個水壼都收起埋想抹枱，大佬我仲坐咗喺喥㗎，我問佢可唔可以加多杯水先，見到佢好唔耐煩咁拎返個水壺出嚟。唉走囉咁，你咁想趕我走咪走囉，我埋單走嗰陣見兩個職員企喺另一對食客張枱側面唔知做乜，可能想比啲壓力食客等佢哋都快啲走。PR，有上ig或者喺社交平台嘅拉麵群組都會見到一生懸麵嘅食評，睇得多你會好易睇得出邊啲係打手，好多都寫得好hea，我知你收咗錢或者食咗餐免費飯，不過都專業少少好嗎，臨時演員都係演員，唔好寫得咁假啦。拉麵群組都係咁，我唔知你合約係咪要求你要喺群組登篇食評，唔好一加入群組就即刻登篇假到笑嘅食評然後退出群組啦，係人都知咩事啦咁。我並冇針對任何打手或者Foodie，我睇唔過眼嘅係佢哋完全唔專業，0專業態度，真係純粹呃飯食。一生懸麵，冇改錯名，一生只食一次懸麵，完。…Read More

夏熱天時最啱做咩？打邊爐。喺公司附近有叫牛駅嘅任食火鍋，其實個駅字點讀，係咪讀「譯」？是但啦總之同事介紹話牛駅有午市套餐價就去咗食。餐牌上面三款任食，其實食最平嗰隻都足夠，我哋有牛肉食就ok，另外其實任食嘅特級牛肉高級極有限，根本冇必要加多六十幾蚊，不如攞嗰啲錢轉個鴛鴦湯底算，咁我哋就要咗秘製麻辣同豬骨湯。等等，相呢？冇圖學人開post？坦白講我掛住食完全唔記得咗影相，冇計真係太耐冇打過邊爐冇咗件事，好彩同事係個鍾意打卡影相嘅人，所以呢篇食評除咗餐廳門口張相冇一張係我影嘅。就算冇相我都可以簡單講吓食物質素，事實上我月尾約咗舊同學會再嚟呢道食，詳細就留返下次再寫。麻辣湯嗌咗中辣不過真係好Q辣，係好香好好味不過我條脷食到一半開始冇感覺，豬骨湯冇咩特別，食食吓啲湯溝埋晒變咗辣豬骨湯又好似唔錯咁。牛有牛味，唔會咬唔開。醬料配菜都好齊，應該有嘅都有，鍾意送飯嘅朋友可以裝碗飯食，電飯㷛側邊有紫菜飯素，不過認真講句，任食火鍋燒烤嘅飯應該冇一間好食得過牛角。總結而言，係唔錯嘅，而且好容易會有折扣，所以我都已經約咗人月尾再嚟食，下次應該會記得影相。…Read More

大山日本料理，喺兆萬中心對面嘅樓上鋪，有去過旺角嘅人都知道兆萬有名叫劣食塔，食十次屙八次，不過兆萬放題嘅食評下次先寫，今次要寫嘅係同事介紹嘅居酒屋。餐廳用彷木裝修，掛咗好多燈籠同埋日本畫，環境幾舒適不過個人覺得over咗啲，有種過分強調自己係日本餐廳嘅感覺。我哋入到去好好彩，職員安排咗我哋坐窗口位，望到街景，感覺幾舒服。我哋兩個人一共叫咗六款食物，四個小食、一個刺身拼盤同埋個炒飯。小食分別有牛舌串燒、炸雞、燒鯖魚同煎餃子。牛舌好夠味，肉質如果可以再彈牙啲會仲正。煎餃子有啲失色，味道係ok嘅，只不過啲冰花一啲都唔脆，有少少失望。燒鯖魚燒得幾香，肉質都滑而且冇腥味。最低食一定係碟炸雞，本來諗住得四塊，上碟竟然有七塊咁多，仲要炸得好香脆，味道偏咸不過就好啱我呢啲食重口味嘅人。刺身拼盤我哋冇叫最貴嗰隻，要咗$248嘅(松)拼盤，海膽唔腥，三款魚嘅刺身都切得好厚身，而且味道鮮甜。主菜鰻魚炒飯，鰻魚冇腥味，醬汁都幾重手，個炒飯幾咸不要我就係鍾意咁重口味嘅嘢。總括而言，六碟餸有五碟我會encore，價錢亦唔算貴，可以返食。…Read More

老老實實「隱世」呢個形容俾新假期用到爛晒，間餐廳明明喺大街佢都可以話係隱世小店，不過呢「彩」除咗用隱世都唔知點形容佢個位置，餐廳門口喺後巷嘅橫街入面，門口又冇搶眼嘅裝修，我會知道有呢間沾麵店都係住附近嘅朋友介紹先知。餐廳主打三款湯底，分別係「原味豬骨湯」、「黑蒜油湯」同埋「蝦味噌湯」。麵條係自家制嘅，制造工場喺收銀櫃後面，可以睇到師父做嘢，麵底方面每日有三款提供，小麥麵、黑胡椒麵同今日Special麵。我最後決定咗試個「黑蒜油湯沾麵」跟黑胡椒麵，碗湯嘅黑蒜味好香，但又唔會太過濃，食完唔會超口渴，蛋同叉燒都整得好好，至於麵嘅黑胡椒味就冇想像中咁重，要細心品嚐先食到少少黑椒味。朋友就要咗個「蝦味噌湯沾麵」跟佢當日嘅Special紫菜麵，佢就話蝦味噌幾濃郁，味覺上、嗅覺上同視覺上都好滿是，紫菜麵就咁食會食到少少紫菜嘅香味不過沾湯後會俾湯嘅味道蓋過。平均價八十蚊尾九十蚊頭，性價比算幾高，可惜嘅係西環同元朗兩間鋪嘅位置對我嚟講唔多方面，冇得隨時想嚟就嚟。…Read More

同同事行The One，經過三樓呢間”Fifth Element”，見餐廳幾有feel，價錢又唔算太貴，餐牌上面嘅日式料理又幾吸引，於是就入咗去。我同同事一人叫咗一個丼，我要咗「熟成厚切牛舌丼」加隻温泉蛋，同事就要咗個「美國黑毛和牛丼」，而每個餐會跟碗湯同個沙律。牛舌切得比較厚，見到其他食評話嫌佢太厚，不過我覺得係要切到咁厚先至啱啱好，味道濃郁，再加埋個飯嘅醬汁、紙菜同温泉蛋，食落好滿足。小食叫咗碟「海苔水牛城雞翼」，碟雞翼有隻藍芝士醬點，藍芝士隻味好重，我覺得ok不過就未必人人都接受到，雞翼辣辣哋不過不失。餐廳除咗日式丼飯，仲有手打意粉同薄餅，呢啲就等下次嚟再試。…Read More

旺角桔梗，相信經過砵蘭街嘅人都應該有見過呢間餐廳，望落好大間，而且佢嘅落地大玻璃門面好吸引，只不過好full，好難walk-in。有見及此，我哋就約埋四個同事一齊book咗嚟食晏。餐廳環境好舒適，樓底非常高，座位之間都相格幾遠，好適合一班朋友一齊聚會。本來想嗌佢個日本A4黑毛和牛三文治食，睇相好吸引，可惜當日去到已經賣晒，結果我哋四個都要咗同一款菜式「明太子鍋燒烏冬配吉列和牛」。個餐賣相幾好，除咗明太子同和牛仲有其他配菜，有隻蛋、冬菇、鳴門卷同埋腐皮，明太子略為咸，好在有個湯中和返。可能睇相都睇到，個和牛同塊脆皮貼唔實，有一兩塊牛咬開之後散晒，有少少可惜。總結，環境靚，可惜暫時冇咗晚市，同埋希望下可以食到個三文治。…Read More

尖沙咀其實有好多隱蔽餐廳，好多間好嘢都要上樓，如果唔係有人介紹都唔知有咁多間餐廳。今次呢間Amitie Kitchen就係朋友之前食過，經佢介紹之下就一齊嚟試試。跟午市套餐有碗是日例湯，今次係忌廉蘑菇湯，個湯非常creamy，但係又唔會好肥膩，蘑菇味亦都好濃郁。因為肚餓，嗌咗三款前菜，分別係「黑松露炸薯條」、「法式香草牛油焗田螺」同埋「炎焰加海膽焗松蟹膏大啡菇」。薯條比想像中大好多，熱辣辣點埋隻醬好正。田螺相對比較失色，如果香草味可以濃郁啲會更加好味。大啡菇雖然賣相麻麻地，但係材料好豐富，個海膽好鮮甜，整體口感幾好。主菜有兩款，「蒜片辣椒大蝦意大利麵配巴馬火腿」同「牛肝菌意大利飯」，意粉蒜味好香，辣辣地好幾開胃，一共有四隻蝦每隻都彈牙，意大利飯味道好濃郁，撈埋上面啲芝士簡直一流。整體而言餐廳食物水準幾好，而且環境幾適合一班朋友一齊，唯一扣分係等食物嘅時間比較長，除此之外都幾好。…Read More