闊總's Profile

圍方商場新開幕，我拉咗個朋友去去湊下熱鬧。逛商場之前食左個午飯先，去咗呢間泰國餐廳。餐廳燈光設計都營造咗少少氣氛，座位都算坐得舒適。叫咗幾樣野share食。牛肉串燒青木瓜沙律：青木瓜絲爽脆可口，加上一股辣勁，非常醒胃。牛肉串燒肉質軟腍，沙嗲醬微甜加埋花生粒，口感幾好。香葉包雞：雞肉嫩滑有肉汁，包住係香葉中，經過燒烤而成，入口散發住淡淡香氣和燒烤味，食完一件想再食。青咖喱豬頸肉配黃薑飯：豬頸肉十分爽口，沾上濃郁的青咖喱醬，辣味和香料味令豬頸肉昇華左。黃薑飯不過不失啦。另外仲叫咗泰式奶茶，茶香幾夠，幾好飲。整體來說都滿意嘅，下次試下其他野。…Read More

網上見到呢間石燒牛評價幾高，於是找了個週末專程到元朗一試。先在門口自助販賣機落單，揀咗180g牛柳。除咗石燒牛呢個主菜，仲有自助區任食沙律、白飯、羅宋湯、凍水/檸檬水。上餐都好快，180g牛柳份量都唔少。牛柳肉質唔會話乾，有肉汁，有牛尾，咬落唔會話韌。白飯任裝之餘，仲有飯素俾你自己加。沙律有沙律菜、粟米、蕃茄仔，仲有幾款沙律執仗自己揀，沙律材料食落都新鮮。檸檬水酸酸甜甜都幾好飲。最令人驚喜係個羅宋湯，材料好足好多牛肉，味道超濃超好飲，絕對要encore！整餐飯性價比超高，值得下次再試其他牛。…Read More

一早訂咗位星期日晚，同朋友打完波就去咗呢度食晚餐。點咗佢個無限時火鍋放題5部曲。第一：帶子茶碗蒸第二：惹味雞煲第三：養生花膠雞湯第四：蒸海鮮第五：任食火鍋第一部曲茶碗蒸，餡料有帶子、蟹柳、菇，上枱已經唔熱，只係微暖，蛋味欠奉，整體稍遜。第二部曲雞煲，材料有雞、豆卜、菇，煮6分鐘食得，雞煲醬幾香濃，鹹中帶微甜，雞肉算滑，豆卜同菇撈埋個醬之後幾好味，份量都算多，唔夠仲可以再加。第三部曲花膠雞湯，湯入面有4件花膠，但湯頭偏鹹。呢個湯之後會用嚟蒸海鮮同打邊爐。第四部曲蒸海鮮，海鮮包括蟶子、魚塊、鮑魚、蜆、青口、蝦、扇貝。整體海鮮一般，不夠鮮味，主要靠蒜蓉味。第五部曲任食火鍋，用QR code落單，包括牛肉、豚肉、雞腿肉、海鮮、日式炸物、日式燒物、單骨雞翼，另外自助區蔬菜、雪糕、雪條、罐裝飲品。肉類質素OK，海鮮夠鮮甜，炸物/燒物普通，雪糕自己𢳂、雪糕就有Melona同馬來西亞雪條、飲品係汽水同道地茶飲。一個價錢過幾種口癮幾特別嘅，無限時可以慢慢食，呢餐食到好飽！…Read More

今日同女朋友去開銅鑼灣，就順道去試一試呢間牛大人副線，據講開咗個幾月。同牛大人唔同，呢度唔係全部嘢任食嘅，而係揀定量set。先揀肉，再揀火鍋湯底，最後揀主食，可以追加其他嘢食或者飲品，而自助區就有調味料同埋10款蔬菜，呢10款蔬菜就可以任食。我哋揀咗榖飼豬梅花肉&石紋精選牛肩肉，湯底就揀咗剝皮辣椒烏雞鍋&夜市養生排骨湯，仲揀咗寬粉同新竹米粉。另外加咗真心橙意翡翠&虎紋黑糖鮮奶，每杯加$14，不過Like佢哋社交平台可以每杯減返$7。食物上枱喇，肉每set有兩盒，每盒4片，另外湯鍋啦、主食啦，仲有一份火鍋料。火鍋料有番茄、冬菇、豆腐、芋頭、蟹棒、蛋餃、響鈴、炸墨魚滑、芋頭豬肉丸同幾片生菜。一嚟就當然試飲下個湯底啦，夜市養生排骨湯飲落似肉骨茶，陣陣藥材味，都幾好飲。剝皮辣椒烏雞鍋都幾好飲，飲落感受到少少辣嘅嗆喉。兩款肉每片都算大片，肉味同肉質都唔錯。寬粉同新竹米粉浸落湯鍋淥完幾好食，吸咗啲湯汁味。其他火鍋料同自助區蔬菜都OK。飲品方面，我飲咗虎紋黑糖鮮奶，飲前記得搖勻(店員都有提醒)，飲落都幾順口，唔會過甜，唯一係珍珠未夠q彈。女朋友飲咗真心橙意翡翠，飲落都幾夠橙味，幾清新。食完嘅時候，店員仲會問你要唔要雪條，有杏仁、咖啡、雲呢拿揀，食咗杏仁味，原來係杏仁味脆皮，入面都係雲呢拿雪糕。最後食完都好飽，人均$160算合理。…Read More

同幾個friend响屯門行完山，返到屯門市廣場食晚飯。行完山攰攰地，所以想搵個地方坐得舒服d，慢慢食，最後揀咗稻成。叫咗幾道菜，個人最鍾意食就係水煮牛肉，同埋稻成牛肉炒飯。水煮牛肉辣得嚟又d芝麻香，牛肉算幾嫩，有牛味又唔會韌，蓮藕片食落嗦嗦聲，夠晒爽脆。至於稻成牛肉炒飯，飯粒夠分明，粒粒都沾滿咗醬油，入口鹹香有口感，牛肉粒份量亦合理，有嚼勁得嚟唔會韌，幾好味，yummy。消耗完又食返咁多野，白做運動了…Read More

星期六朝，約咗班朋友踢波做運動。臨去踢波之前，梗係要食返個早餐，咁先至有力踢啦。餐廳座位闊落，坐得舒服嘅。餐廳用QR code自助手機落單，叫咗一份早餐$38，有沙嗲牛肉通粉、炒滑蛋、多士，同埋一杯熱飲。沙嗲牛肉通粉一上枱就有陣好香嘅沙嗲味，沙嗲湯底味道OK，有少少花生香，唔會好鹹。牛肉就韌咗少少，通粉彈口。多士烘底烘得夠，食落軟熟。炒滑蛋就略嫌炒過龍，唔夠滑，味道OK。熱飲叫咗荷蘭谷古，唔係間間餐廳有得叫，叫咗嚟試下。入口有陣陣可可香味，但又唔會話好苦，啱飲。…Read More

約咗朋友喺旺角食飯，經過山東街見到佐賀燒肉谷門口嘅餐牌，見到好似幾豐富，咁就決定上樓試吓。喺門口揀咗Lv4，之後就入座。坐低無耐就上咗頭盤嘅肉：壺漬煙燻封門柳同埋九宮格嘅牛肉。個九宮格係9款唔同嘅牛肉，每款肉都有張紙牌註明係邊款牛肉，方便鍾意食邊款肉之後再加單。職員會先幫我地燒咗條壺漬煙燻封門柳，根據佢地枱面個座枱牌資料講，封門柳係牛嘅橫隔膜肌肉，一隻牛得一條咋。當職員燒好咗條封門柳，咁就梗係趁熱食啦。件封門柳好濃嘅牛味，仲好juicy，又有啲𡁻口，好好食，之後都encore咗！至於個九宮格，各種嘅肉都有唔同嘅味道同口感，其中牛舌夠爽口，骨付牛肋肉油脂夠香，牛頸脊牛味夠晒濃等等。另外仲有好多好多款其他肉，花多眼亂。除咗牛肉，佢地嘅海鮮都好好味！原條魷魚筒夠晒爽口彈牙，照燒帆立貝夠大隻夠鮮甜，最驚喜係法國黃金螺，鮮甜又彈牙，又係encore咗！食飽當然要食埋個甜品，佢自助bar有豆腐花同埋軟雪糕，雪櫃仲有D其他甜品，最後揀咗食抹茶軟雪糕，都唔錯。100分鐘都夠食到飽嘅，不過如果有120分鐘就會鬆動D啦！…Read More

星期日响龍琛路體育館打完羽毛波，打完波就晚飯時間，但又唔係話好肚餓，咁就去咗對面馬路少少地食碗麵啦。叫咗碗姬松茸雞湯麵，一上枱就即刻試啖湯底先啦，入口鮮甜，濃郁有雞味，忍唔住口會飲多兩啖。雞件份量都唔少，雞肉唔會鞋口，都食到有D雞味，跟配果碟豉油都無點過。姬松茸入口都脆嫩，吸咗雞湯嘅味，多咗一份層次。食晒碗麵，最後D湯都飲咗8成，真係幾好飲。價錢唔算貴，有返一定質素，呢間麵店下次會再幫襯，試埋其他麵。…Read More

朋友即將過加拿大，所以同佢去佢最鍾意嘅餐廳食餞行飯，皆因佢鍾意呢度嘅嘢食同埋180度維港海景，咁就book咗呢度食lunch。Lunch Menu依家有2-4 course選擇：2 course就1 starter + 1 main course，3 course就1 starter + 1 main course + 1 dessert，4 course就2 starter + 1 main course + 1 dessert，價錢就由$398-$538。今次用餐有D驚喜，因為嘢食嘅份量比之前大咗D！食物整體都係維持高質，主菜嘅Skirt Steak入囗好軟腍，牛味好濃，而Tilefish外層超香脆，味道鮮甜，肉質嫩滑。約定咗下次佢返嚟香港時再嚟食過。…Read More

去開荃灣逛街，順便去試下著名荃灣嘅嘉樂冰廳。去到門口有一家人等緊位，我就排佢地後面，等咗一陣就有位。呢度週末無套餐，全部只可以散叫，點咗兩樣嘢同一杯嘢飲，食到好飽！火腿奄列，超大份，見到都嚇一跳！食落蛋香唔錯，但係啲火腿就太鹹。炸雲吞上枱熱辣辣，雲吞皮炸到好脆，餡料有蝦有豬肉，食落都鮮甜，味道適中。爆脆奶茶，茶味同奶味均勻，阿華田脆脆係一個點綴。見到隔離枱份鹹牛肉蛋三文治超大件，下次要試下呢個先！…Read More

放半晝出左旺角諗住去買game，路過呢間餐廳見到個裝修幾靚幾特別，又見佢用輸送帶送餐，類似某壽司店嘅高速線，反正午餐時就入去試下。餐廳用電子餐牌落單，想食乜就自己按。午市套餐有8款，叫左個韓國餃子湯麵餐。湯底方面亦有8款揀，聽店員講話有30款湯輪換，可惜當日無泡菜湯，無得夾返晒個韓風味道，最後揀左胡椒豬肚湯底。食完個餐都堅係飽，食物質素唔錯，份量又足夠，加湯係俾原湯唔係俾清水，所以唔怕越食越淡味。…Read More

見到御苑皇宴片皮鴨推廣價$88，所以相約朋友一起試下。上到去見到個場地，LED wall出嚟個效果好靚呀！講返食先，我地叫咗片皮鴨，再加咗個二食，另外再叫咗個長腳蟹孖寶。片皮鴨望落幾大隻，仲即場片架，無花無假皮完都幾大碟，配有十幾片麼麼，加埋青瓜、京蔥，連埋個片皮鴨醬，好好味，鴨皮有點脆口！片皮鴨二食，本來有兩款加$48嘅，不過我地冇揀，另外揀咗加$80嘅炒鴨絲。個七彩炒鴨絲幾好味，連平時唔係好食椒絲嘅我都食咗唔少！黑椒牛仔骨都幾入味，不過如過啲牛肉可以林啲啲就仲好！蜑家魚湯海鮮煲正呀，個魚湯好好飲，海鮮又豐富又足料！…Read More

之前買咗團購$68「味美獅吼 2 人叻沙套餐」︰獅城叻沙 + 金香雞槌 + 炸東昇班卷 + 魚湯浸娃娃菜 + 獅城特飲 (原價 $152)，所以就搵咗日去食，不過失望而回。碗叻沙得個辣字，似食緊辣椒油湯底多啲。金香雞槌同炸東昇班卷一般啦，無驚喜。魚湯浸娃娃菜啲菜好似唔太靚。奶茶奶味過重，無晒茶味。原價嘅話一定唔嚟呢度食………Read More

想食星洲菜，見呢度新開，就同女朋友嚟咗呢度食晚飯。食物整體味道不錯，以下逐一講下先。馬拉盞炒通菜富馬拉盞的味道，不過食落唔係好覺食到蝦碎，可能真係磨得好幼滑。墨魚三寶叻沙 (中辣)整體味道不錯，特別係墨魚丸好好食，豆卜吸咗湯底好好味，如果椰香味濃啲平衡返會更好，因為辣味搶咗個味。皇牌招牌餐 (迷你叻沙 (小辣) + 迷你肉骨茶 + 迷你海南雞飯)小辣叻沙個椰香味同辣味比較平衡，不過都係椰香味濃啲會更佳；肉骨茶味道佳，飲落像肉骨湯之後散發出陣陣藥材味及胡椒味；海南雞飯的海南雞有雞味，肉質雖未算嫩滑，但不「鞋」口，油飯夠香又夠味，只是稍為硬身啲啲。手榴彈雞翼炸得香口好脆，雞肉味道亦不錯。菠蘿梳打新鮮菠蘿肉，但梳打水不夠汽。青檸梳打檸味足夠，梳打水亦夠汽。…Read More

同女朋友去食下午茶，經過呢間食店就入去試下。呢度冇下午茶set，四點幾都係做午餐set。價錢普通，賣相OK，但啲味道就一般了。紅燒牛肉麵：不過不失啦，啲牛肉味道都OK嘅。肉燥飯：味道OK啦，不過佢啲肉燥應該係撈咗啲蝦米，但食落好多蝦殼，影響晒口感。鹵水豆腐及小黃瓜：小黃瓜都OK，食落都脆；鹵水豆腐就唔入味。…Read More