mansonbbb's Profile

晏晝去完砌女，肚仔餓搵野食，一出高登就見到呢間野新開無耐乾乾淨淨，就入去會一會佢。係粉麵鋪黎講，呢間鋪既裝修唔錯，幾有心思揼本，感覺都算係有心去經營。鋪頭以瀨粉做賣點，計過數嗌set同散叫都差唔多，試新野當然係要乜都試下，最後叫左佢個大大碗鮮製瀨粉，會一會佢到底有幾咁大碗！黎到真係無違反商品說明條例，唔單止大碗，配菜都好足料。湯底方面，都唔算重口味，起碼我唔係好覺得頸渇先。 瀨粉方面， 條條都爽滑彈牙，雖然佢粗幼長短不一， 但係就係咁先反映到， 同傳統機啤出嚟有分別。我特登加咗鵝腸同炸雞翼， 鵝腸好乾淨冇異味， 呢個價錢呢個份量都算係咁， 炸雞翼就真係不得了， 極高質， 外脆內嫩， 不過食咗時要小心， 可能唔係繁忙時間啦， 即叫即炸， 差啲辣親， 真係好有罪惡感！…Read More

如果你問我，香港有邊間日本野，係平民得黎傳統，傳統得黎又好食？我一定會答你香港仔鮨政！因為住南區既關係，其實已經幫襯左呢間日本壽司店好多年，睇住佢開業到依家，都仲keep到個水準，真係好感動！聽聞舖頭真係日本人開，雖然師傅有換過幾個，但點都有個膽係到教新人，呢d算唔算叫做師徒制？我最鐘意weekend 一個人黎食個set lunch，貪佢夠抵食！今日食呢個北海道魚生飯定食，連加一都唔洗150，呢個年頭連food court都做唔到啦！魚生海膽新鮮已經係必需，仲有誠意十足既餐前沙律，一個熱辣辣既烏冬同餐後蒸蛋，實在係十分滿足！不過雞蛋裡挑骨頭，如果個烏冬可以叫先上，就perfect池，依家食完個魚生飯，個烏冬會凍左，未免有d可惜！…Read More

住左南區咁多年，個小同同我講香港仔開左間新餐廳不錯，可以一戰，咁岩又遇上一家之煮休息一天，咁就去會一會佢探一探究竟！新開餐廳係唔同d，淨係睇門面都已經比我一種新派既感覺，入到舖，非一般茶記既裝修，感覺就係一間有情調既太興！如果唔係peak hour黎坐底飲杯茶食個tea應該都不錯！冰室除左set dinner之外，仲有其他套餐，今日西人上身想食西餐！試左個海鮮意大利飯同芝士煙肉焗薯皮！先講個飯，睇得出個廚師係有擺到個心落去砌個飯出黎，茶記黎講認真唔話得，雖然比我想像中既海鮮有少少出入，但炸魚柳呢個諗法確實有新意，值得一讚！外脆內嫩加少少海鹽味既魚柳，拎出黎仲出緊煙！如果配埋沙津醬就100分！跟餐配一個紅湯，湯料十足，有圖有真相！抵玩！至於個薯皮，我叫完有d後悔，主要係因爲個份量太大太足料，我實在低估左冰室既份量，以為食緊西餐廳！雖然係做左大嘥鬼，但間中一次半次無所謂啦！最後真係要多謝小同介紹，香港仔又多一個飯堂啦！…Read More

日本築地就去得多，銅鑼灣築地都係等一次去。今日黎呢間樓上鋪試一試佢築地法！其實都係咁岩有朋友介紹，話抵食ichiban喎！上到去，裝修好新淨光猛，感覺好舒服！個場都幾爆，好彩有張二人枱對坐。但相對上都闊落，襯埋日文歌係background，感覺好日系好舒服！Menu好多選擇，小弟比較懶，唔想諗淨係叫左個精選二人前，要左個牛肉野菜壽喜燒同泡菜雞腿肉石鍋飯。另有芝士年糕，特飲同甜品，其實都幾抵玩。先講壽喜燒，配料同汁料充足，牛肉嫩滑無雪味，最正係野菜款式多元化，仲有秋葵呢d特別少少既菜式，認真有誠意。我另一半淨係用汁都撈左半碗飯，唔肥先奇！當然啦，比起壽喜燒專門店係差d，畢竟佢唔夠人地專，但小鋪黎講我十分滿意，亦相當多元化。石碢飯方面，係韓流侵襲下，係日本店食泡菜野已經好common，石鍋飯最重要係夠熱！雞扒方面十分嫩滑，雖然配料唔係話好靚，但簡簡單單唔太漏已經足夠！而特飲同甜品都十分有誠意，檸檬藍柑梳打同北海島牛乳奶凍，連埋前菜同小食，埋單都唔洗300，係銅鑼灣黎講真心抵玩呀！…Read More

呢排天氣咁凍，緊係要去圍爐取下暖啦。今次黎旺角試呢間韓燒放題！其實之前已試同同事食過，佢同普通既韓燒有少少唔同，佢舖面相對較細，所以人無咁多的，無咁大壓迫感，舒服d！呢個場既裝修同氣氛相當年輕，一入門口已經係好強既泡菜音樂，睇住兩個大電視不斷播住泡菜mv，胃口都好d！不過傾計就要大聲d啦！我認為一間韓燒好定壞，係有3樣野需要考慮既，首先係"架餐"。呢間running燒爐具新淨，夾呀，油樽呀無油淋淋既感覺，佢既吸油煙機亦相當強勁，最正係臨走前可以用佢地提供既消臭噴霧噴一噴，即刻咩味都無哂其次就係佢既"醃料"，食韓燒，我就係個廚師！好唔好食就係睇佢既肉醃得夠唔夠，入唔入味，係呢個全部冰鮮急凍既年代，d肉都無話新唔新鮮。我幾鐘意佢既辣味醃料，少少辣零舍開胃，加上自由斟既蒜油豉油，夠哂滿足！另外仲有大量飲品選擇，唔驚口渴！第三就係服務，可能鋪仔細細既關係，人手好足夠，除左落單上菜快之外，職員都好貼心，換鐵板故之然唔會托手踭，甚至見到我地燒唔掂，主動問我地換過個好唔好，值得一讚！另外，佢地都有提供蘿蔔比我地做簡單既清潔，當堂襟玩好多。綜合呢3點，我絕對推薦大家食呢間韓燒，另外佢既小食都好豐富，泡菜，水冷麵，炸雞等一應俱全，我絕對會一戰再戰！…Read More

天氣凍到咁，口痕想打返個邊爐，係openrice睇黎睇去，最後決定試呢間頭啖湯。鋪頭位於天后呢個靜中帶旺既地方，附近橫街入夜後泊車相當方便，門口仲有門士站，交通唔洗擔心。入到去，一睇就知佢定位係一間火鍋專門店，鋪仔細細，但所有枱都每4個人有一站尚明堂電陶爐，都幾揼本！我地兩個人，叫左一個相當有特色既椰子雞湯底，見在場都有唔少人叫佢！椰香傳遍整個場！正呀！基本上淨係個湯底已經好多野食，加上排到咁樣靚一靚，真係加好多分！火鍋配料方面都有唔少選擇，都新鮮同大路，如果要我推薦，首先一定要試呢個美國安格斯雪花牛肉，老豆教落，人一世物一世，食既唔好哂，雖然價錢真心唔平，但呢幾塊牛入口即溶，完全無渣，牛味勁香，配上椰子雞湯既清香，真係回味無窮！另外一個要推介既係呢個雙拼手打墨魚丸，本身諗住早d叫丸掉落去烚住先，點知叫左勁耐都未黎，差d想追佢單時，就見waiter遞上呢8粒咁精緻既墨丸，睇得出係岩岩打起，粒粒大小形狀不一，絕對對得住"手打"呢個朵！無芝士既墨丸已經鮮味十足，除左彈牙之餘，入面應該加左墨魚軟骨，勁爽口！至於有芝士既就重口味同漏d，女友鐘意多d！最後我地2個人飲埋野都係600蚊左右落樓，其實唔貴，我女友仲大讚話呢個椰子雞煲，清得黎好似食左餐飯咁，唔會通口通鼻都係火鍋味，好正喎！…Read More

今次介紹既餐廳又係位於柴灣，呢間牛腩粉勝在夠便宜大碗，呢個年頭食咩都貴，但佢仲可以keep到29蚊碗，仲要咁足料，實屬難得！牛腩粉牛雜粉最重要係咩？就係個腩汁！其中一個推薦呢間鋪既原因係食完碗粉唔會覺得勁口乾，反映佢所落既味精唔多！睇圖可以睇到，呢碗粉既牛雜相當足料，金錢肚，牛橫舌，牛筋都比足，碗粉份量都唔細，即使我呢個大食積都夠飽！唔似出面d牛雜，係咁比d牛肺牛腸個d下價野你，無良心！如果想再飽d，可以試下佢既飯，牛筋肚飯，牛雜飯，牛腩飯等，飯餸另上，仲要有菜係底，都係45至50蚊到，可以多飯仲包埋野飲，冷熱同價，性價比之選！不過飲品就唔好太大期待，一般啦，普普通通不過不失咁。呢份係我朋友叫既，真係好大份架！…Read More

係東區打躉既我，問我邊間茶記係必食，我一定首推威利華！淨係睇佢門口都知佢夠哂傳統，但唔代表佢唔識與時並進，佢都有泡茶大碗飯，日式拉麵食架，十分過癮！呢間餐廳長期爆場，淨係做早午同下午茶，無晚市，所以大家要留意！今次介紹下佢既午餐，叫左呢個豬頸肉菜飯，套餐本身跟杯茶啡，雖然佢個特製豉油汁已經相當不錯，但絕對比唔上佢個咖哩汁，港式咖哩既香辣加上椰奶香味配上燒到恰到好處既豬頸肉，絕配！記信！呢個係餐牌上無列明，正常係會跟豉油汁要客人request先會upgrade！豬頸肉用既係靚豬，無乜肥膏！燒到表面稍香但又能鎖住肉汁，師傅夠哂功力！菜飯方面，無渣流攤，用既係菜軟，飯底又夠乾身，正，推薦呀如果唔想食豬頸肉，同一個價錢可以改為吉豬或者雞扒個類，都好抵食架！至於杯熱檸茶都無令我失望，茶底香濃，檸檬新鮮精神又爽利！隨post附上最近兩次食過既午餐…Read More

今次係同女友拍拖822日既紀念，其實都係大家想食生勾勾既野，巧立名目去食啫。香港有好多間大喜屋，今次我地試呢間貪佢就腳，可能我地早到關係，唔洗點等位就坐底。同其他放題唔同，呢到無自助吧，亦都無任攞飲品既雪櫃。有好有唔好啦，我就好享受奉旨比人serve既感覺啦，職員態度同反應都好快，岩哂我地呢d懶人！食物種類都唔少，生勾勾既野方面，新鮮呢樣野就一定啦，身為大喜屋粉絲，絕對唔擔心。另外我地叫幾多，佢比足幾多，呢個都抵讚！我係一個怪人，除左熱食之外，我去親放題都要嘆下佢d熱食，今次叫左個炒蜆，估佢唔到又幾夠惹味幾好鍋氣，最正係熱辣辣咁拎出黎！大排檔風味，唔食生野既朋友都唔洗怕！另一個喜歡大喜屋既原因係，臨尾會跟個雪糕，呢個真心抵讚，用黎做一餐既終結就真係完美不過，今次呢個節日限定係芝士忌廉麻薯，超值！…Read More

行過見到呢間餐龐主打意式加日式食品，裝修又新淨企理，所以就走左入去會一會到底佢胡蘆裡面賣咩藥。等位唔算太耐，等左兩張就入得。入到去見到每枱都叫左隻燒春雞，再睇下餐牌，原隻燒雞都係賣68蚊，差d忍唔住叫左隻，但無飯無麵始終到喉唔到肺。由於呢間餐廳西餐又有，日式野又有，揀左好耐，最後叫左個鐵板雞扒餐，盛惠78蚊。講返個鐵板，送到黎都感覺有d水準，首先係個鐵板夠哂熱，但可惜佢就凍黑椒汁另上，呢到扣少少分。鐵板餐跟珍珠飯、薯條、煎蛋、雜菜同舊蕃茄，咁多配菜的確係幾有誠意，希望佢可以繼續keep住！我幾欣賞舊雞扒燒完（或者煎完）再用芝士焗既做法，令到成塊扒既味道豐富好多，同時佢既雜菜都唔係齋烚，而係用雲腿絲炒過，雖然略為多水，從小處見大處，整體上我都比佢正評。如果喝餐有埋飲品或者湯既話就真心無得彈！…Read More

正如標題一樣，今次呢個下午茶真係不得不寫，你可能話大快活間間都一樣，倒模出黎有乜好寫但真心，係南區黎講，食過咁多間大快活，華富邨呢間絕對係number one今日叫左個雞脾西多士紅豆冰餐，加左個雪菜肉絲米。盛惠50蚊，呢個價錢係一般茶記就已經絕對食唔到啦首先，佢個紅豆冰，紅豆既份量一d都唔孤寒，如圖所見，超過一半係紅豆其次，西多士半煎炸到金黃色，切落去係鬆軟，而唔係死實死實，配上煉奶同牛油，依家一路打都一路回味緊！雞脾方面，燒脾既Size唔算細，皮脆肉嫰，熟到岩岩好離骨。一路切，一路讚口不絕而個雪菜肉絲湯米雖然味道好標準，但佢上面個pat雪菜肉絲既份量絕對係其他舖既兩倍由於佢係專人送餐，所以可以排除因為我靚仔而益我既可能性，經過今次之後，我諗我會特登坐車入華富食個tea！絕對推薦比大家！…Read More

再次黎銅鑼灣搵野食，今日黎呢間好耐歷史既瑞士雞翼餐廳，太平館餐廳醫肚，話哂都係出名老店，平日都要等幾張枱。我地今次唔想諗，就咁嗌左個二人餐重溫一下昔日既感覺。二人餐先黎兩個湯，龍蝦湯味道一般無乜特別。接住就係一個炒青菜其後就係燒乳鴿。我好欣賞佢燒完熱辣辣出黎既感覺。放係口邊係會辣咀，乳鴿既火候掌握得不錯，燒到皮脆肉又唔鞋，配上瑞士汁同檸汁調味。不錯不錯！干炒牛河方面，牛肉十分高質，完全無醃肉粉既味道，河粉炒得夠乾身，都唔算太油，加上幾條菜心和下口，都值得推薦！最後上埋甜品同餐茶，但呢個西米布甸就認真麻麻，預先整定加上雪得太耐，有一半係起哂沙唔食得。餐茶就不過不失，無乜茶味。不過勝在呢間話哂都係西餐廳，即使出面排哂隊都唔敢催我地走，所以環境係認真不錯！…Read More

今日走左黎呢間炊豕店試下佢既出品，佢都開盅名義話到明比大家聽係食豬既，食炸豬扒。佢開係利苑隔離既加路連山路，其實唔難搵，呢頭附近都開左好多間定食類既小店，算係一個小型既搵食天堂！黎到係要排隊既！無得訂枱！好彩我地早到，排兩三個就入得，舖頭廚房係半開放式既設計，不過唔算嘈亦無乜油煙，反而有少少情調！今次我叫左個秘製豬扒飯，加厚餐肉同煎蛋，剩係賣相都已經嚇死me，因為我鐘意食餐肉，舊厚切餐肉絕對係呢碗野既精華，熱到辣咀，一啖咬落去，個種半稔又香既感覺真係好爽皮，窿邊既煎蛋亦相當不錯至於個主角，舊豬扒好大塊，平時食炸豬扒最驚就成口粉，好在佢炸粉既份量掌握得不錯，唔多唔少岩岩好，另外食得出塊扒都唔係一般既急凍豬，唔係太多醃料，肥瘦適中，成碗飯唯一美中不中既係飯量，咁多肉，加埋成篤肉燥，偏偏就係唔夠飯，有少少漏。但如果係女仔食我諗應該有剩，haha…Read More

可能細個食得麥當奴太多，一直都覺得美式食品無乜特別無乜技巧，比幾廿蚊食個burger好無謂。今日朋友叫到，就即管黎試下。鋪面唔大，半開放式廚房。第一個印象係見到門口有一袋袋等緊派外賣既外賣袋，心諗係咪咁好食咁好生意呀！？坐底好快就叫左個芝士牛肉漢堡，同一客洋蔥圈。幾欣賞佢既環境同氣氛，坐住傾住計感受佢個裝修同環境，係的確有少少英美風，影相就下角度都呃到下like。講反食物，burger用料勝在夠新鮮、酸瓜、生菜同蕃茄都好fresh。包面同包底都有輕輕煎香，粘上左少少煎漢堡時既牛汁，夠哂香！！而個主角，舊漢堡就極度鬆化，鬆得黎泌出一陣陣肉汁，香味四溢。正呀！雖然我用迅雷不及掩耳既速度就已經食完，但我諗如果一個人食都應該幾飽。至於個洋蔥圈就不過不失，我欣賞佢個炸粉份量岩岩好，圈內既洋蔥亦無搵笨，大大條夠哂肉地，但略嫌炸得較為深色，輸左少少賣相。…Read More

今次黎左呢間係中環既樓上舖，同女友慶祝我地既anniversary, book既時候睇open rice見佢D相同賣相都唔錯，所以一試，去到都無令人失望，首先係個裝修都頗有情調，淡黃色既燈光，cozy既環境，加上咁岩個日落雨，我地坐係窗邊，好似去左英倫咁既感覺。只係當日人比較多，嘈左少少但都仲可接受。食物方面，可能係因為樓上舖關係，價錢係中環黎講一D都唔算貴。因為時間早唔算肚餓，我地叫左唔多野，一個沙律、一個湯同一個risotto。沙律方面好有驚喜，我地叫左個燒帶子柚子沙律。帶子一開二燒到岩岩好，配上清新既新鮮柚子，同少少醋，好Refresh好開胃。湯方面我地叫左個黑松露雜菌忌廉湯，忌廉打到岩岩好，好Creamy得黎又不失黑松露既香味，差D想叫多個！因為我地兩個都好鍾意黑松露，所以risotto叫左個香煎鵝肝黑松露雜菌意大利飯，我欣賞佢既鵝肝煎得夠香，雖然我唔識分究竟佢係鴨定鵝，但果浸油香依家都仲記憶猶新，配上雜菌忌廉汁中和番，實在係岩岩好。總結黎講我好對呢間餐廳十分滿意，高度推薦!!!…Read More