snowmc's Profile

呢間餐廳位於愉景新城商場入面，同一位置同一裝修近期內都已經轉過手幾次，每一手我都有試過，每一手都一般嘅，唯獨今次有d驚喜，希望可以打破開親喺度都執笠嘅宿命啦！📍飛驒和牛漢堡伴炸洋蔥圈.甜番薯條.松露醬 $158 🍔價錢 8.5/10味道 9/10一上碟又係嚇親，望到個包咁高心諗唔知點樣放入口，所以偷偷地食咗兩塊洋蔥圈先哈哈！和牛漢堡扒好Juicy，雖然細細塊，但配落個包度都依然好有口感。值得一讚係炸甜番薯條，每一條都可以係外脆內軟，唔點將就咁食都好食得出番薯甜味，配埋少少鹹鹹地又好香松露味嘅松露沙律醬，一鹹一甜好好食。📍澳洲100日穀飼西冷牛扒伴炒野菜.香草烤新薯 $238 🥩價錢 8.5/10味道 9/10切落去肉汁滿滿，而且好粉嫩，咬落去同望落去一樣期望冇落差，調味適中，唔會話太鹹，肉質一d都唔老，唔知呢啲係咪就係榖飼100日嘅威力呢？📍牛乳雪糕味道 10/10甜品一啲都唔hea，係超濃牛乳雪糕，好濃牛奶味好creamy得來又唔會好甜，食到飽晒之後仲有呢個跟餐甜品，真係誠意滿滿。💌總結重點係，晚市套餐有85折之外，其他甜品仲半價升級添呀，咁抵得唔得架！希望佢個85折唔好咁快完啦。…Read More

Follow咗呢個ig好耐，知道係由一位中醫師開嘅，亦試過佢哋嘅紙包米水飲品，唔知係心理因素定點，飲完硬係覺得個人精神咗，相信健康飲料會係嚟緊嘅大趨勢！今次有機會見到間實體舖，緊係飲返杯支持下啦！成間舖嘅設計都充滿粉紅泡泡少女心，仲有其他產品買，例如茶包、湯包、暖水壺同其他souvenir，直頭拍得住大型連鎖咖啡店！每杯嘢飲都會寫埋有咩功效，好適合繁忙嘅都市人，一睇就揀到邊杯適合自己。📍 竹蔗粟米鬚米水（凍）$36 🍹價錢 10/10味道 10/10今次揀咗杯一定唔伏嘅試下水溫。我呢d膚淺嘅人就睇好唔好味架啫，好味仲要健康就當然係bonus！呢間嘅所有凍飲都係走冰嘅，而糖就選用蔗糖（冇記錯的話），基底係米水，飲落清清哋，冇叫少甜都唔會好甜，即使有竹蔗一齊煲都係咁話，絕對係健康之選。官方話呢杯係可以健脾祛濕同減輕疲憊感，適合春困、脾胃虛弱、容易疲倦、水腫、小便不暢順、一直沉睡且慵懶的人們。💌總結呢個價錢，喺市場上可以買到一杯黑糖珍珠奶茶，但就算叫到有幾少少少甜都好，大家都知其實都只係一杯唔健康嘅塑化劑，倒不如試下健康嘅米水飲料！呢間絕對係私心推介！…Read More

一向欣賞湯底多過麵嘅我，又搵到一間出色嘅湯底啦。依間主打雞白湯，係我最愛嘅雞白湯啊！📍極濃雞白湯拉麵（人氣NO.1）$138價錢 8.5/10味道 9.5/10餐廳有極濃雞白湯拉麵同普通雞白湯拉麵選擇，個人口味比較重，所以選擇咗極濃。湯底係好濃郁嘅雞湯味，好杰身，有啲似周打雞湯。拉麵配兩塊雞胸肉加一塊叉燒，雞胸一啲都唔鞋，非常嫩滑，係真係非常非常嫩滑。📍北海道極濃蟹湯拉麵 $138 🍜價錢 8.5/10味道 9/10蟹湯係期間限定嘅，都係極濃味，面頭有好多蟹肉，湯底都係好杰，係重蟹味嘅海鮮濃湯。拉麵軟硬度適中，啱啱好掛到啲湯。💌總結兩碗湯都極度推薦，啱晒我呢啲重口味嘅人，一定會再來。…Read More

餐廳分咗室外同室內兩部份，我哋今次book咗室外，暗暗地咁食，好有feel得嚟傾偈都唔會嘈到其他人！📍樂感晚市二人套餐 $548價錢 9.5/10味道 9.5/10🔻生干貝番茄塔塔酸酸甜甜嘅菜式，配上唔同酸性水果，例如西柚蕃茄等，表面再配上三文魚籽開胃之餘又食得出帶子（全熟）嘅鮮味。🔻芝士番茄香草餡義大利餃表面有少少黑醋醬中和咗芝士嘅漏，半碟嘅粟米係新鮮粟米，好甜。🔻松露忌廉醬汁燉飯一上菜撲鼻而來嘅松露香味，食落去冇聞落去咁重松露味，但都好creamy，餐廳都落咗好多松露片，唔錯。🔻馬頭魚柚子奶油汁蘆筍餐廳選用立鱗燒嘅方式去烹調馬頭魚，香脆得嚟亦保留咗魚肉嘅肉汁同嫩滑，更考驗到廚師嘅手勢。🔻柚子檸檬撻配藍莓乳酪雪糕酸酸地嘅柚子檸檬撻配上面甜甜嘅蛋白餅，一口氣食晒兩樣嘢啱啱好中和到酸甜，藍莓乳酪雪糕都唔會話好甜，好食過呢間餐廳嘅其他甜品。💌總結呢個二人餐絕對夠三個人食，五百幾蚊有咁高水準，再加上個環境，絕對超值。個人推介一定要坐出邊，入邊傾偈會有回音，有啲嘈啊。…Read More

Cafe界頭幾位嘅呢一間，直頭係必試啦！嚟之前建議先book枱，都幾full架！📍Tuna Risotto $158 🐟價錢08/10味道 8/10呑拿魚煎得好出色，岩岩好表面脆入面仲係pink，表面醃味好足，配一兩粒魚子更提鮮。Risotto好creamy，大讚。📍Sea Urchin & Foie gras Linguine $188 🍝價錢 7/10味道 8/10海膽一塊仔疊咗係鵝肝上面，鵝肝煎得好香脆，意粉望落乾身，但食落汁係夠嘅，配埋少少幾粒芒果粒好fresh。📍Grilled Sea Bass $178 🐟價錢 8/10味道 8.5/10魚皮煎得好香脆，fillet夠厚，煎完全鎖住肉汁，配埋下面嘅南瓜溶清清哋襯托一下，好鮮，如果可以大舊多少少就好了！📍US Prime Rib Eye $258 🥩價錢 8/10味道 9.5/10我哋叫咗7成熟，切落去微微粉紅色，咬落去仲有肉汁，食落有咬口得嚟係淋嘅，好好食。平時燒蒜頭我就唔食嘅，今次好奇試咗一粒，原來係冇乜蒜味，有少少salt and pepper喺面，軟糯糯鹹鹹地嘅幾好食。薯條厚切，每條都咁香脆，好食！💌總結Overall唔錯，好適合三五知己過嚟一齊嘆。…Read More

嗰日行大館見到呢間餐廳個窗台露出咗，d食客起勢咁影相打卡，引誘到我去give a try，於是上網揾揾呢間餐廳，原來都幾高評價，即刻就上去食個甜品先。📍Montanarina Fritta $88 🥠價錢 8/10味道 8/10呢個望落好似莎翁，食落都好似莎翁，但好食過莎翁。有兩隻味可以揀，士多啤梨同香蕉，我哋當日揀咗士多啤梨，甜品入面就係炸士多啤梨custard，炸過之後生果味特別出，配埋伴碟嘅Nutella，食落唔會覺得好膩，啱啱炸起就上菜，熱辣辣，好好食。💌總結呢個價錢望住大館咁嘆美食簡直超值，希望下次有機會可以試吓呢間餐廳最出名嘅Pizza！…Read More

食完對面街嘅爆漿阿華田西多士（聚來車仔麵），就過咗嚟呢度食”飯”後甜品。見到都有三四個人排緊隊，我哋就一齊排湊下熱鬧！📍嫩仙芋奶凍 $28 🍧價錢 9/10味道 9/10一上菜就見到8隻色圍住，好吸睛，分別係：芋圓、地瓜圓、薏仁、紅豆、西米、湯圓、珍珠、綠豆仁，而下面就係仙草同糖水，仲會配埋UCC嘅奶仔。雖然係廢話，但係芋圓真係好重芋頭味，而地瓜圓都好重番薯味，食落去煙韌，唔會一咬就斷嗰隻粉實實。仙草好讚，同平時飲珍珠奶茶嗰隻仙草完全唔同，呢隻偏向似豆腐花咁嫩滑。📍招牌迷你剉冰 $28 🍧價錢 9/10味道 9/10迷你剉冰同嫩仙芋奶凍材料差唔多，同樣都係有八款on top，但就仙草換成刨冰。呢隻冰唔係棉棉冰，食落有口感，要咬一兩下先溶得晒，好重煉奶味，夏天嚟食嘅話真係一流，但係當日食係秋天，有啲凍哈哈！💌總結甜品非常抵食， $28已經可以食飽個肚，下次有機會試埋熱食先！…Read More

見過好多其他人都有介紹過呢一間阿華田西多士，今次專登嚟食，冇諗過一個西多士竟然會喺一間車仔麵到突圍而出，仲變成一間車仔麵店嘅特色菜，究竟好唔好食呢？📍爆漿阿華田西多士 $33（+$2升級至朱古力榛子醬）🥪價錢 10/10味道 7/10咁多人報道過應該會好貴，但係30幾蚊，價錢覺得好合理。本身呢個阿華田西多士係跟花生醬嘅，但我哋加咗兩蚊轉咗做榛子醬，成件事會比較match。餐廳對於阿華田粉一啲都唔吝嗇，俾咗超級多，就嚟變咗阿華田恐龍。中間一切落去，暖暖嘅淡奶就流出嚟，好快就比成個西多士吸收晒。西多士唔係好甜，食第一啖都幾好食，但食食吓就變咗普通西多士，唔係好食得出阿華田味，打卡來講係幾好嘅~💌總結鍾意食西多士嘅朋友都可以嚟試一試呢一個阿華田西多士嘅。…Read More

十點幾都未食dinner，冇咩餐廳可以簡，諗住串燒店會開到好夜，於是就去咗附近嘅呢間串燒店。未入到去都已經見到好大油煙，但附近冇其他選擇，所以照食。入到去tick好哂要d咩就嗱嗱林比個侍應。點餐紙有個位比你簡大中小唔辣，唔食得辣嘅我就圈咗唔辣。交完張單咁就一路等啦，一路見到餐廳好多food panda deliveroo嘅單，然後侍應又係咁pack外賣單，堂食嗰d呢？？連一串都冇後食。如是者我等咗半個鐘忍唔住出聲，有冇d燒好嘅拎住出嚟食住先呢？佢又話燒緊燒緊，燒緊外賣嗰d？隔多陣佢拎咗幾串出嚟，一望，一堆辣粉喺面…咬一淡，辣到食唔到。同個侍應講，我哋係圈咗唔辣，點解上到嚟辣到飛起？侍應話蔬菜類可以換比我，但肉類就唔可以換了…只能說串燒係一般水準，冷氣大，抽風系統差，令到嘢食凍哂之餘，衣服頭髮好大陣油益味，十分差的體驗。溫馨提示，想快啲食到一定要催個侍應，煮好幾多上幾多俾你。…Read More

邊個話深井淨係得燒鵝？深井仲有間打邊爐，而且唔拍得住城市嘅水準架！📍滾得棧招牌蕃茄蟹湯底 $368 🥘價錢 7/10味道 8.5/10餐廳選用肉蟹，size都有一隻男人手咁大，蟹蓋仲有少量膏痴住，其他滾哂落鍋，肉質鮮甜，但個湯底就唔係好食得出蟹味，可能下次會叫返蕃茄薯仔湯底（平成三舊水呀）。📍招牌手切牛頸脊（大）🥩價錢 7.5/10味道 10/10一上菜，個碟仲大過個煲，牛肉舖到滿哂，個個都爭住影相打卡。一向都話靚嘅牛肉係唔洗6咁耐，呢塊當然都係烚一烚就得啦！食落牛味好濃，好淋得嚟有嚼口，肥瘦分佈齊中，入口嚼兩啖感受下牛肉嘅鮮味就即溶，正。💌總結當日仲有叫好多其他嘢食，例如墨膠釀油條、牛脷托、西班牙黑豚肉等，都好好食好新鮮，但最值得推介嘅都係牛頸脊。…Read More

一直聽過呢間餐廳名，今日終於經過其中一間分店，就即管試吓。📍白湯豚骨拉麵 $68 🍜價錢 8/10味道 5/10$68嚟講嘅拉面算幾平嘅。但湯好濃，唔係味道濃，而只係好”結”，可以話係豬骨熬咗好耐所以先咁結，但湯頭味淡，變成係好濃稠嘅普通豬骨湯。由於湯好結，變成湯同面嘅比例失衡，食到最尾冇乜湯剩但仲有好多面剩。叉燒正常發揮，鹹鹹地，瘦肉比例多過肥肉。💌總結餐廳好似出名沾面多d，可能沾面會發揮得好d，但我就唔試了。…Read More

超多人逼喺門口排隊等入座嘅一間餐廳，即使門口好窄都無阻大家等嘅意欲，等候時間亦反映咗間餐廳嘅吸引力有幾強勁！📍榛子朱古力焦糖香蕉梳乎厘pancake $95🥞價錢 8/10味道 9/10榛子foam好輕盈，同時亦好重榛子味，配落原味嘅soufflé pancake好夾，個個爭住不d foam，有少少唔夠喉！焦糖香蕉就好似健康版嘅cream brûlée，又香又脆但唔會太甜。📍海鹽焦糖爆谷梳乎厘pancake $99 🥞價錢 8/10味道 9/10本身想叫tiramisu嗰個但賣哂，見隔離枱叫呢個似幾正，於是轉肽！爆谷好香脆，海鹽中和咗焦糖嘅膩，呢個梳乎厘pancake食落仲fluffy過上面嗰個，連埋爆谷一齊咬又脆又fluff，口感一流！…Read More

喺蘭桂芳嘅高級brunch！五百幾蚊可以任食刺身、 壽司、炸物、燒物等等，仲有個主菜6選1，個人覺得都幾抵啊！可惜嘅係當日唔係咁舒服，所以有好多款都冇試到。📍Crab Feast Weekend Brunch $568 (Adult) 🍣價錢 8/10味道 9/10呢個餐主推任食松葉蟹腳同雪場蟹腳，我哋當然有食，但係唔記得咗影相，激氣！蟹腳好肥美，亦好鮮甜，每舊肉都好紮實，唔會好水了了。刺身有d大路款簡，油甘魚、三文魚、吞拿魚、甜蝦、帶子。餐廳標榜係日本直送，食落好新鮮，紋路都靚，尤其推介油甘魚，唔係咁多間有油甘魚任食！卷物有北海道鱈場蟹肉牛油果卷、鰻魚牛油果卷、FUMI素菜卷、雜錦辛香刺身太卷，餡料俾得一啲都唔少！個人推介雜錦辛香刺身太卷，食落辣辣哋，更加突顯到魚生嘅鮮味。炸物有海蝦天婦羅、野菜天婦羅、炸雞。當日冇叫到，但見隔離枱有叫，隻蝦都唔細隻，望落去都幾好食。燒物有鹽燒雞翼、鹽燒豚腩肉、牛油燒粟米、燒迷你甜青椒。雞翼係連埋雞翼尖，餐廳燒得好香脆，鍾意食雞翼尖嘅人就有福了。個人推介鹽燒豚腩肉，肥瘦層層相隔，食落仲好juicy。溫物有味增湯同鱈場蟹腳茶碗蒸。茶碗蒸面有少量蟹肉同埋用上湯熬嘅汁，每食一啖蒸蛋都會連到少少汁，更加提鮮。主菜我就揀咗迷你香蔥碎吞拿魚腩丼，吞拿魚腩說同飯嘅比例幾乎係一比一，碎魚腩唔會話好腥，反而會有吞拿魚脂香。雖然碗飯細細地，但係咁先更加食得出佢嘅矜貴，加埋之前嘅任食可以話好夠飽。💌總結$568食Semi-buffet個人覺得幾抵，餐廳提供嘅菜式不亞於高級酒店自助餐，但價錢係平過酒店，淨係食蟹腳都抵番晒啦！…Read More

朋友介紹呢間長沙灣嘅cafe，話裝修好靚，坐喺入面食再望出去會同附近嘅車房工廠有好強烈嘅對比，於是我哋就去試了。📍竹炭糯米窩夫 $98 🧇（包雜莓，乳酪忌廉，乾燥紅莓，自家製牛奶雪條）價錢 7/10 味道 7.5/10灰灰黑黑嘅竹炭窩夫外脆內軟，呢種軟唔係waffle嘅軟咼，而係糯米mochimochi嗰種軟糯糯。餐廳做咗低糖版嘅甜品，食落唔太甜，配埋紅莓醬同yoghurt cream食好好味。不得不提支自家製牛奶雪條，本身諗住寶物沉歸底，留返最後一次過食，但原來自家製真係會溶架…好後悔冇早d食，因為好香奶味，溶溶哋都依然咁好食！📍墨魚汁扁意粉伴蟹籽 $78 🍝價錢 9/10 味道 7/10呢個價錢嚟講都算抵食，墨魚啱啱好熟，唔會un，蟹籽落得一啲都唔吝嗇，蒜味重，墨魚汁正常發揮。💌總結黑白style嘅餐廳配黑白style嘅美食，再加上文青裝修，你值得擁有。…Read More

行過見到好多人喺入面食緊打緊卡，我哋都唔執輸，即刻入去食，點知意外地好食！📍Pulled Pork Benedict $120 🥖價錢 7/10味道 8/10見呢個好多枱客都有叫，我哋就叫呢個啦！酸種麵包上舖咗菠菜同青蘋果，再加用中東醃料醃嘅手撕豬肉，上面再加poached egg同hollandaise，成件事fusion得嚟冇違和感，仲唔膩添！ 💌總結好chill嘅cafe，打卡一流之外嘢食都唔錯，推。…Read More