平凡人一個's Profile

新開張日見排晒長龍花籃滿場，當然即刻嚟試下佢嘅夜市啦！只不過，首日營運內部管理難免要一段時間配合。今晚餐飯，點菜漏單，人手不足，吹完又冇，就難以避免。但勝在部長都好肯跟單有交帶，所以見到好多枱都等咗好耐但冇投訴，第一日開業明白嘅 ~講到食方面，好快到嘅就係「一蚊燒鵝」同「花膠四寶羹」。呢兩款論味道都算唔錯，食材分量亦過得去。再嚟嘅，就係到我最期待嘅「九里香大鱔球」。上到枱不禁嘩聲 ... 隻碟好大。不過咁，其實啲鱔肉質我幾滿意，入口非常香，唯獨諗唔通點解咁大 ... 隻碟，哈。之後嘅就係「鮑魚雞煲」有幾隻鮑魚㗎，夠香口仲幾入味添！而到最後，搞笑嘅就係餐前小食，終於喺我哋食曬啲嘢之後嚟啦 (當中叫部長跟過無數次)，好過漏咗嘅 ~總括嚟講，呢餐選味道真係幾好，雖然等位耐啲，嘢食嚟得慢啲，要部長跟單多啲。不過喺第一日營業，我諗叫佢紙上嘅「優惠三寶」上菜應該會快好多，話曬廚房會入定嚟貨數量或者整定某啲餸菜，總好過我哋就咁單嗌。不過都食過返尋味㗎，等我下次再嚟飲下茶，再試埋佢哋啲點心先 ...…Read More

難得喺 openrice，突然見到尖咀呢間舖頭做「$20 八吋薄餅」(兩日優惠)。呢頭打躉嘅我成日經過呢條街，梗係拿拿林外賣自取啦！方便在，撳幾粒掣就可以喺支付寶畀埋錢，攞外賣時間又可以自己定，簡直係 perfect 池喇！到講下個薄餅，今次優惠佢有兩款畀你揀，分別係「蕃茄」同「夏威夷」款式。菠蘿同薄餅呢個配搭，始終由細食到大太多次，所以我揀咗蕃茄。八吋薄底嘅，啱啲唔係大食嘅人。而且佢係即叫即焗嘅關係，外賣即刻食真係冇得頂。Toppings 方面有少少雞肉，配搭新鮮嘅番茄同埋青椒，再加鮮茄醬底，食落每啖都好鬼 fresh，廿蚊貨仔收貨喇！由於早咗去攞外賣，侍應都好有禮貌叫我坐等等。環境氣氛都幾唔錯，一於下次嚟試埋佢啲自助餐！…Read More

先講入到店舖嘅裝修我幾鍾意，一張張木櫈配搭著仿木牆紙，帶出古舊嘅味道。而每份杯碟都算係幾精緻，都叫有特色。雖然地址如果唔係地膽會較難搵，舖位唔算大，但坐喺上嚟起碼唔會覺得迫夾。至於講到食晚飯，見佢餐牌 A+B+C 配搭，即係一個湯，一個冷盤，再加一個小菜，二百幾鬆啲都算合理。不過我就唔太喜好濃味食物，所以單丁咁叫清清地三個人分別就試咗「魚腐竹笙，獅子頭，上海粗炒，回鍋肉」呢四味。「魚腐竹笙」簡單得嚟有魚湯味，竹笙又夠清爽，係我最當晚鍾意嘅一道菜。「獅子頭」芡汁唔會過鹹，獅子頭亦唔會鬆散，整體都算滿意。「上海粗炒」(忘記影相)正常上海粗炒，有蝦仁有肉片，碟頭都算大碟，而味道剛好。「回鍋肉」肉片肥瘦適中有趙頭，都係唔會整得太濃味，自己都喜愛。總括嚟講各款味道算幾好，食完起碼冇覺得口渴。之不過要立足喺大角咀，呢個夜市比較難做嘅小區，我覺得每間食店總需要宣傳幾道「撚手小菜」先可以吸引到人注意。我覺得不妨跳出一般上海菜嘅框架，試下融入某些「手功菜」作招來突圍而出，相信會畀食客有更多新鮮感。期待下次午市嗰陣再嚟試佢啲餐  …Read More

大家仲記得，之前嚟得快去得快嘅8號風球嗎？嗰日心血來潮，打電話嚟位於大角咀另一間抵食嘅酒店訂「自助午餐」。100蚊加一嘅價錢，亦都係正常嘅坐兩個半鐘，我就覺得地方闊落，非常企理。講到嘢食呢？近門口嘅就會見到一個大大嘅沙律區，菜之外嘅配料真係幾多。煎熟咗邊邊嘅吞拿魚係我配沙律菜首選，亦可以加煙肉碎， 或漢堡牛柳條都唔錯，連醬汁都有好幾款！青口亦都有，唯獨是我覺得較細粒。除咗沙律隔離仲有兩煲湯，中西各一款都係好掂檔！(另一個角有鮮橙汁自己斟)再過少少就係熟食，包括有：「西冷牛扒」我食嘅比較韌，筋比較多「燻魚」味道唔錯，啖啖肉「小籠包」熱食就一定正呀！跟住就要講下，最鍾意嘅炸嘢啦：「燒雞」嫩滑之外加埋個醬汁，食咗好多嚿呀！壺汁係有暖爐喺底，保持溫度更加正。當日我見佢盤燒雞起碼 refill 咗六次「炸魚塊，咖哩角，春捲」屬正常，最緊要熱，夠脆，滿分的。另外覺得幾特別嘅就係，「杏仁茶」整得幾出色，杏仁味恰當，可試「芒果布甸」甜品之中做得叫唔錯「西米露」仲可以自己加啲生果(另外櫃檯開玻璃會見到雪糕，有三款)最後啦，以前就受歡迎，不過依家未必個個香港人都鍾意。講緊既係「三文魚刺身」，細細碟質素都唔錯，都可以一試嘅。總括嚟講，呢餐自助餐都幾舒服。另外仲見到張大圓枱，約埋一班朋友嚟都唔錯㗎！至於點樣嚟大角咀，可以睇返我之前一個自助餐評論。希望大家繼續食盡大角咀！！(唔知點解每次用手機打食評，網頁上睇返都會一堆字黐埋冇格式， 手機app睇就冇事有分段，希望大家見諒)…Read More

大角咀多嘢食就係人都知，今次就嚟試咗個抵食嘅「中午自助餐」。好多人以為大角咀好遠，其實旺角站行入嚟只需十五分鐘，如果由奧海城過嚟就更加近。遠少少嘅旺角東站(火車站)仲有小巴直到酒店門口添，其實唔難搵。係時候講下環境，嚟到酒店門口大大個牌棟出嚟88蚊加一位真係幾吸引。唯獨餐廳地方唔算大，但特別在幾枱露天座位。冬天都會幾舒服，夏天就.... 哈哈哈。攞嘢食方面一般會覺得比較逼夾，始終餐廳地方有限，需要大家互相禮讓一些就可以。好喇，到講食嘢。餐廳分開兩邊放食物，近門口嘅擺咗麵包，沙律(無骨鳳爪)，同甜品 (紅豆和菓子，蛋糕仔，泡芙)。飲品分別供應蘋果汁，橙汁，茶。生果就比較怪，好多個蘋果，係一整個。放喺另一邊嘅熟食同湯，就都幾值得講下 (自己覺得幾滿意)！最近露台位嘅就有「特色湯粉」，而我覺得最正嘅就係隔離嗰一大煲「冬陰功」湯。大家一定要試，真係落足材料！飲完湯，就梗係跟住食熱嘢。煎炸食物選擇都算多，分別有： (每盤會不定時推出)炸蠔 - 有蠔味，最緊要係新鮮炸魷魚圈 - 容易咬得開，可以一試炸魚 - 份量夠大件，添加快炸蝦片 - 真係即刻炸㗎 再過啲就會見到：海南雞 - 肉質都算咁，都係加薑蓉食檸檬魚肉塊 - 賣相幾靚，細片青檸夾埋食更好炆牛肉 - 肉質軟淋，夠入味汁煮青口 - 幾大隻㗎，我自己非常鍾意綠豆沙 - 正常唔會太差粥 - 正常總括嚟講88蚊加一，都算係唔錯啦。依家出街食好少少嘅麵飯都五六十蚊，再加上兩個半鐘傾下偈都唔錯㗎！而且間餐廳係新開張，大家不妨一試！ 我去嗰日星期日滿座添！仲有嘅係佢地服務態度，好禮貌，值得一讚！…Read More

忙裡偷閑嘅星期六下午咁啱嚟到上水附近，就突然諗起呢間舖嘅名。點解？有睇過波嘅都應該識呢，你懂的。由港鐵站步行幾分鐘嚟到，第一眼就見到有幾位小朋友喺門口，襯托著側邊紫色貼牆嘅餐牌，感覺都幾和諧。之後就梗係同老闆娘落order，試下個一口牛啦！22蚊嚟講都算合理，份量滿意，而且食落有o趙頭，亦有肉味 。小食嚟講唔錯，如果叫埋飲嘢一齊仲比較抵啲，下次再試其他嘢啦 * 門面嘅餐牌設計，真係睇得出好有心思，好有心機，夠清晰 ~ 希望你哋越做越旺，加油！…Read More

講到食放題，自己就會特別興奮，特別係可以任食我最鍾意嘅焗扇貝同蒜蓉煎帶子。啖啖肉真係諗起都流晒口水。不過每次食日本嘢，食完個肚都會唔舒服 (可能受唔到太多生冷嘢)。但自從改咗由"熱食"開始先，就冇大問題嘞。所以一來到極尚大瀛喜日本料理，就即刻叫咗個鮑魚粥暖暖胃。雖然粥底唔可以講係叫綿，但係我就畀佢兩隻大鮑魚吸引住。唔係用一般嘅鮑片或細鮑魚， 將全隻鮑魚放入口時真係勁有滿足感！暖暖胃之後梗係要食多啲熱嘢啦，先來隻配以律醬焗成嘅"原隻帆立貝"，跟住來客有煎到香噴噴嘅"牛油蒜香帆立貝"，再有軟淋嘅"香草燒紐西蘭羊鞍"，同芝味無窮嘅"芝士炒蝦仔"，真係食到舔舔脷。(仲叫咗蠔味豐富嘅吉列蠔，脆口非常嘅炸魷魚圈，炸皮薄薄嘅虎蝦以及皇帝蟹棒等等嘅天婦羅。由於即叫即做嘅關係，所以趁熱食晒手快有手慢冇相都冇影，可想言之來到一定要叫呀！)嗱...來到食日本嘢，又點可以少咗壽司呢？而我最欣賞嘅就係牛油果軟殼蟹壽司嘞。脆脆嘅軟殼蟹，夾著微微油香嘅牛油果口感夠特別，味道較清新，真係食多幾件都唔覺會飽。另外亦叫咗嘅壽司分別有：三文魚腩，京蔥煙三文魚，池魚王，柚子皮左口魚，同埋一定要提嘅"松露"火炙三文魚。松露獨特嘅香味同三文魚好夾，跟平時食嘅三文魚壽司絕對係兩回事，唔怪得知朋友強烈推介。咪以為我講漏咗人人都鍾意食嘅刺生呀！不過想講嘅唔係食邊種刺生，而以係刺生嘅盆。因為每次出場嗰種吞雲吐霧嘅觀感，係令到每枱都會"哇"一聲，真係好靚。不過要順帶一提，每一款刺生都幾好，唯獨翡翠螺會有點沙，所以要留意。到最後其實都有啲遺憾，因為食得太飽嘅關係，有好多特色食品，甜品都未去試。但我都選擇咗碗牛肉味夠，熱辣辣嘅牛尾清湯做結尾，希望下次再來時可以更加圓滿！…Read More

一般要响食市做善事，都係自己放啲錢落個錢箱度，又或者選擇食少啲飯餸。但點都係要俾成個飯嘅錢 (即係一係要自己吟荷包捐，一係就揀食唔飽嚟捐)。但我覺得今次美心呢個宣傳慈善嘅手法確係幾有新意！唔駛打工仔專登吟荷包之餘，可以令佢哋一來自己又食得飽，二來又可以做善事，何樂而不為。(不過活動已經喺五月頭完結咗嚕)其實個活動係當顧客喺午市每買一個「皇牌焗豬柳飯」或 「自家製叉燒飯」嘅時候，美心MX 就會為每個飯捐出$10比惜食堂！而善款之後會用嚟為基層長者籌備生日會，真係幾有意思。講番個飯嘞，我今次叫咗嘅係焗豬柳飯 (始終燒味唔係我嘅至愛)。其實以快餐嘅焗飯嚟講，我真係覺得幾好！係炒飯加上一件件番茄，食落酸酸哋都幾開胃。雖然塊豬柳未算係好厚，但係起碼體積都算大。入口時夠晒鬆軟而且肉質又唔會乾，夾埋啲菠蘿粒一齊食就真係最正嘞！唯一嘅缺點係，飲嘢需要另外加錢。食完個飯，我心裡面突然諗起:♫ 焗豬真係由細食到大 ♫♫ 唔知係未港人既心態 ♫♫ 快餐食慣久唔久會嗌 ♫♫ 色香味美飯蕉都食埋 ♫♫ 從拾回憶食焗飯啱曬 ♫其實對我嚟講.....快餐店除咗紅豆冰同炸雞脾之外，焗豬飯喺我心目中係排第三正 …Read More

本身已經係熱狗粉絲嘅我，見到團購平平哋所以走咗嚟試吓！當然今次係冇失望啦。我試嘅係 Boston Dog ，係用咗長長哋嘅紐倫堡腸配上黑椒汁。雞肉腸嘅味道都幾惹味，醬汁就比較濃味所以唔需要太多，而且 Trigger Dog Family 仲係即刻整所以熱辣辣(讚！)。麵包方面我覺得都夠鬆軟，至少唔會一攞上手就爛，單手可以攞住麵包連腸連汁完完整整咁一齊食。加上薯角同汽水一罐對我嚟講係夠飽，不個突然有種感覺....個餐如果可以加多幾塊薯片做裝飾，咁整體上就會更有美感 Trigger Dog Family 每個餐都有特別嘅形容，係幾有心思 ~ …Read More

見佢哋做緊「和風．泰滋味」自助晚餐，所以想吓有幾和風。食嘅係「全時段」六點食到十一點(原價係 $555 未加一)，但因為之前玩遊戲贏咗餐券所以喱餐係免費的。最衰自己部手機入咗廠，得番部30萬像素後備機影咗幾張相就算，希望用文字搭夠搭。喱個係接近我食嘢嘅次序: (頭盤，主菜，生冷海鮮，甜品...)【巴馬火腿配哈密瓜】哈密瓜夠甜，巴馬火腿有佢獨有嘅鹹香，好好嘅自助餐前菜。【煙三文魚】正常嘅鹹香味，食得過。【泰式海鮮冬陰公湯】冬陰香料味夠，剩飲湯都可以，唔過辣，海鮮湯渣唔需要食，留肚食其他海鮮啦。【避風塘炒蟹】食蟹鉗最好，好多肉，肉質炒得比較乾，微辣。【芝士龍蝦】每次攞半邊(食咗6邊 )，肉質比較煙軔，但芝士嘅味道偏淡，反而我自己去麵包櫃加啲蒜茸牛油就變得好好食。係第二最多人排隊的........【燒牛肉/燒羊脾(架)】每次攞一薄片，肉質鬆軟嫩滑，但淡淡嘅肉味一定需要添加醬汁調味。【海南雞飯】(冇試,過錯咗)【印度烤餅/薄餅】小食，薄餅加醬可試，烤餅(冇試)【炸雞軟骨粒】食雞軟骨應有嘅爽口感。【鴨粥】(冇試)【其他雞/牛/魚柳等等】(其實唔需要點試,只係個醬汁唔同)【刺身】三文魚(新鮮,魚味濃)，針魚(新鮮,魚味較淡)，(好有鮑魚味..)，吞拿魚(新鮮)，八爪魚(冇試)。【壽司卷】(冇試,唔吸引)【生蠔】(冇試,自己只食熟/燒蠔)即開嘅應該唔錯㗎，size唔會太細，係最多人排隊的，見好多人番去再排！【凍長腳蟹】(冇試)【凍青口】(冇試,唔吸引)【凍蝦】(冇試,唔吸引)【沙律/菜/多種麵包】(冇試)見啲菜新鮮的*自己食得多生冷嘢會易肚痛，所以海鮮類冷盤冇乜點試 【熱檬茶】係我必飲嘅濃茶，唔加糖，食自助餐嘅消滯茶【葡達仔】手指頭咁大，唔會飽，有蛋香。【檸檬達仔】都係手指頭咁大，重檸檬香味，比較甜。【Häagen-Dazs®雪糕】試咗拖肥味(唔太甜,剛剛好)，綠茶味(覺得茶味唔夠濃)，雲呢拿/朱古力/士多啤梨味(冇試)，糖漿等配料(冇試)【豆腐花】(冇試)【綿花糖(機嗰隻)】(冇試) 好多小朋友食 ^^【綿花糖+朱古力噴泉】(冇試)【水果】菠蘿(冇試)，西瓜(冇試)，哈密瓜(清甜) 希望你哋鐘意喱個食評啦，少相多字，大家要幻想...嚕 ~ …Read More

如果要食「魚蛋，有魚味」，我一定會揀夏生响油麻地舖嘅魚蛋粉。之前睇雜誌嘅介紹，知道夏生係每朝都會打做新鮮嘅魚蛋。食魚蛋，我追求嘅係佢嘅味道多過彈唔彈牙，所以我好鐘意嚟夏生呢度食，用料新鮮，貨真價實！我食緊嘢時，仲時不時有街坊嚟買魚蛋添。支持老字號店舖夏銘記！(喺香港老字號已經越來越少喇...珍惜..珍惜) …Read More

傳統的麵包舖所賣的麵包大多是一樣的，不外乎雞尾包，豬仔包，菠蘿包，吞拿魚包，腸仔包，等等。今次途徑大角咀的「香麥屋」反而令我有了一些驚喜。並嘗試了這個:“朱古力流心包($4)”- 面層薄薄的脆皮和少量的朱古力粒為整個麵包帶出了特別和鬆化的感口- 朱古力餡裝到滿滿的，絕讚！- 朱古力味不會過甜，也不會太濃味，沒有影響脆皮，麵包，與朱古力餡之間的平衡- 要做到流心的效果，建議大家用微波爐加熱數十秒會更好*先前早上時段看不到有流心包賣的，大可能是下午時段才推出。這店舖是位處於大街大角咀道(大公樓或circle k便利店旁邊)，非常方便。而麵包的價錢也比鄰近的麵包舖較為便宜。…Read More

記得小儀同金剛在上年的某飲食節目介紹過這餃子店。而這次，是農曆新年過後的第一次到來。雖然自己最喜愛的韭菜餃仍舊能「保持水準」，但發覺已變了做五元“四隻”餃子。這可能是物價持續上漲的原因。而這次還試了這裡的薄餅，薄餅是有分鹹或甜的，我選擇了鹹薄餅。“鹹薄餅 ($5)”- 雖然並不是即叫即煎，但薄餅邊還有微脆的效果- 味道不會過鹹，偶爾會有部分比較"油"- 賣相十分整齊“韭菜餃 ($5)”- 內裡包含著很多的韭菜，滿滿的，味道很濃- 餃皮不會太厚，亦不會太過"腍"這店舖是位處於基全小學的斜對面(馬路對面)，由大角咀的食街(埃華街)步行，沿著大路走半分鐘就可以看到，非常方便。而舖內外的環境是整潔的。註:這店星期日是休息的和店舖內設有少量的座位供食客"堂食"。…Read More

每當談及到位於何文田的愛民村，相信會有很多人想起明利油器粥品這名字。原因是這裡的有心人“老板李生”，堅持多年來派發"免費粥"給與有需要的老人家。每一個早上都如是者，運用簡單的食材，烹調著一煲又一煲而充滿著善心的愛心粥。真的為鄰近的公公婆婆，帶上無限暖意。這次到來點選了:“艇仔粥 ($13)” - 包括有豬肚，魷魚，魚片和一些花生- 材料非常新鮮，非常足料！- 粥底夠綿*除了常見的艇仔粥，其實還可以嚐嚐這裡加有皮蛋或魚片的艇仔粥，味道比較濃的皮蛋或新鮮的魚片可以令這碗粥帶出別有一番的味道。“炸兩 ($8)”- 雖然未算是熱辣辣地上碟，但份量還多的，很好- 內裡的油炸鬼仍然有少許脆，所以及格周邊環境尚算舒適，不會接近馬路，因此很寧靜。所以自己也十分喜愛這裡的粥品和環境，經常都會特地到來品嚐這碗充滿著「情」的愛心粥。祝願明利繼續長做長有。…Read More