Miss dorizzz's Profile

一人一鍋日式火鍋，隨時隨地滿足到鍾意食火鍋放題嘅我。有三款不同牛肉及價錢嘅放題任君選擇，點了澳洲和牛小排放題$(368)，另外每人送一客頭盤： 鮑魚、廣島蠔各2隻及牛舌及牛胸腹。一人一火鍋，仲可以自選湯底，除咗多款免費湯底，有期間限定嘅特別湯底，加$就可以享用到，個人就比較喜歡昆布湯底，清甜得嚟，仲可以食到材料嘅原汁原味。除咗澳洲和牛小排可以任食之外，仲可以有其他肉類同海鮮，澳洲和牛小排肉質軟滑，油脂肥美，另外極推安格斯牛小排、牛胸爽，雖然肉質沒有澳洲和牛軟滑，但牛肉味超濃郁。另外，海鮮類都好多選擇，極推蝦滑、沙白及杭州黑魚片。蝦滑超級爽口彈牙，而且仲會食到蝦肉嘅顆粒，沙白好鮮甜，只係略嫌唔夠大隻，黑魚片無骨啖啖肉，好鮮嫩肥美。蔬菜、丸類、熟食區、飲品及甜品區都係任飲任食，最驚喜仲可以自製格仔餅，蛋漿已準備好，倒入格仔餅模按指示加熱即可，格仔餅最終成品口感豐富而且脆卜卜，加啲雪糕搞掂。…Read More

戲曲中心向海港城方向前行，港威商場門口上一層電梯，就有一間米芝蓮認證酸菜魚專門店✨姚姚酸菜魚 ✨。 除了主打「酸菜魚」外，自選配菜「麻辣香鍋」也同樣出色，五個配菜起叫，每款配菜只是幾十元起，與朋友每人叫一至兩個菜，亦好適合三五小聚，送飯佐飲品一流。手機下單仲可以選擇辣度，麻辣香鍋香味撲鼻，而且每份配菜十分足料，選擇了篙筍片 、田雞、牛肉、腩肉及花菜，大件又多肉。 宮爆蝦球($188)大大粒爽口的炸蝦球，配上酸酸甜甜的醬汁，開胃又解辣，而且配菜京蔥及茄子粒亦都充分吸收酸甜醬，十分入味，手機下單亦可以選擇辣度或者免辣。 飲品方面有好多選擇，新鮮水果烏龍茶，生果很豐富，多多桃膠椰奶，與其說是飲品，不如說是足料甜品吧，桃膠滿滿又不會太甜，解渴又解辣。…Read More

放工想食燒肉，記得上次係炑八食過魷魚遊戲套餐，好想再encore, 點知今次去到出左新品，所以決定試下，一坐低就有5個前菜、沙律及生菜盤，前菜仲可以任添韓牛貝身肉就係望到呢個貝身肉，見到都好想試。油花分布細密，見到都肥美，果然不負眾望，滿滿嘅油脂已經令到火爐火花四起。燒幾下就已經食得，筷子一夾，油脂隨即滴下，放入口簡直就好似會融化一樣，內質軟绵，咀嚼時滿口油香衝擊味蕾。一份有六塊，都幾大塊同有少少厚度，店員幫我地燒緊肉嘅時候，我問佢其實係牛肉嘅咩部位，原來喺背脊肉呀，一隻牛只係得好少，所以哩個部位都唔係成日食到。$158我覺得物超所值啊! 特級牛肋骨一大條連骨上，又長又重，好彩有專人幫忙燒肉，輕鬆好多。牛肋骨稍有調味，醬料比較鮮甜，燒完之後更加能夠突出牛肋骨嘅鮮甜味，比起貝身肉不同之處，牛肋骨肉質比較香甜，牛肉味也比較突出，而貝身肉係感受油脂獨特的風味，完全兩種唔同既享受。 炑八厚切五花腩又厚又肥美,五層嘅豬腩層次分明，特別頂層豬皮，充滿膠質又有彈性，燒到焦脆香氣彌漫，食落去口感無得彈，彈牙又脆卜卜，口感超豐富，五花腩肉味香濃，而且好juicy不過燒得好食都好緊要，豬腩肉有厚度需時間燒熟，要燒得靚燒到脆卜卜都唔容易，唔想燒到燶，建議唔好自己燒，搵職員幫手就會食到靚燒肉啦 芝士溶岩飯鐵板上，熱辣辣見到都開心，上台之後職員會立即倒入芝士攪拌，熱力慢慢將芝士融化，真係可以將芝士拉絲，但記得一定要趁要食，咁先可以同時享受到熱辣辣芝土拉絲及飯焦嘅雙重衝擊。夾心棉花糖配朱古力威化餅甜品都可以燒嚟食，串起一粒粒嘅棉花糖插住喺旁邊慢慢燒溶，放在朱古力威化餅當夾心咁食，好玩又好食。馬格利生米酒第一次人馬格利酒，其實都幾容易入口，而且帶有小小米香，食完燒肉飲一兩啖，一解口中嘅油膩。…Read More

Mega box 新開小清新cafe, 門口半露天開放座位，加上小熊得意坐鎮，喜歡打卡的一定要來。聖誕老人拯救雪地裏的小熊梳乎厘$152極具聖誕氣氛，光是打卡已很開心，三件厚厚的梳乎理，口感creamy而且很有蛋香，上面的熊仔聖誕老人及小鹿是朱古力做，可愛的捨不得吃。漆黑中的海鮮意大利飯$115主要有兩種海鮮包括蜆給墨魚，蜆肉比較厚身，墨魚汁意大利飯，充滿濃濃的海鮮鹹味，有多隻大蜆及墨魚仔。聖誕龍蝦扁意粉$172龍蝦肉好大粒，有濃郁的龍蝦味，扁意粉炒得爽口，醬汁比較惹味。 小熊的朱古力泡泡浴$58一見到呢杯聖誕特飲就已經好想叫，因為實在是太可愛，而且朱古力味十分濃郁，但又不會過甜，熊仔餅乾襯托朱古力飲品，增添口感。斑蘭椰子咖啡 $48有著分明的層次，顏色本身已經好吸引，而且斑斕及咖啡味協調得宜，不會過份喧賓奪主，有濃郁的斑斕椰子味亦有香濃的咖啡味，很順口，而且那塊菠蘿乾片，絕對是畫龍點睛，更加突出了椰子咖啡的甘甜。…Read More

中午12點30分吃燒肉又如何。同朋友二人去年葵湧廣場，行過地鐵站，上一條電梯就見到。 一番特盛拼盤(四層)$208一個拼盤有肉有海鮮：牛舌、牛小排、牛板腱、扇貝、廣島蠔、鯖魚。鯖魚大大塊好吸睛，一啲都唔腥，魚肉好香口，落少少醬汁送飯一流。牛舌是我的最愛，因為肉質爽脆，食多幾塊都唔油膩。牛板腱比較厚身，所以口感比較實在而且肉汁飽滿。一個拼盤有咁多樣牛肉海鮮絕對相宜。牛胸腹牛小排牛舌三食套餐$172套餐可加$15將白飯變成雞蛋紫菜珍珠飯，紫菜珍珠飯的確出色，因為入面仲有好多芝麻，口感好香口豐富。哩嗰三食套餐，三款肉夾埋300g, 確實抵食。而且午市剛好做激安優惠，叫套餐送50g燒肉，有幾款選擇最後選擇了豚五花。 香蔥薑漬美國牛五花$48與其他燒肉不同的，呢款係醃漬過的牛肉, 味道比較香甜，而且鋪滿了蔥粒，燒烤時卷著蔥粒來吃，味道是甜甜的，不點任何醬汁且味道濃濃的，用來伴飯很適合。隨後點了個年糕來做甜品收尾，看著年糕燒得漲卜卜，好治癒，而且燒到表面焦脆的，吃下去好似煲仔飯焦一樣香口，點煉奶或醬油，甜咸皆可。…Read More

餐廳新店開張不久，座位舒適，餐牌選擇種類算不少，除了有海南雞飯之外，更有我很喜歡的肉骨茶、特色滷水拼盤等等，而且價錢相宜。 新加坡海南雞配油飯$78午餐包括一碗湯及飲品，海南雞飯份量很多，海南雞肉質滑嫰，雞油會慢慢喺口入面滲出來，都幾香口。 肉骨茶 特選大排骨(套餐)$78呢度肉骨茶係可以無限添湯，肉骨茶湯底並非藥材湯底，係胡椒湯，但又唔會好辣，有少少似胡椒豬肚湯，但有蔬菜嘅鮮甜味，有三條大排骨，好多肉，好易咬開，而且都有油炸鬼俾你放落湯，油炸鬼炸到脆卜卜，好食。滷水三拼盤$68其實有多款嘅滷水拼盤可以選擇，但我見到哩個三拼盤，係我每樣都中意食嘅，有豬腸 、五花腩、雞旦，底下鋪滿了豆腐，其實可以話叫滷水四拼盤豬腸滷得好入味，最底下嘅豆腐吸收哂滷水汁，超級入味。…Read More

以濟州柑橘主題，想入去食好耐，每次經過那個令人垂涎欲滴的櫥窗，見到各種美食及窩夫，總想嘗試一下，但克服不了要排長隊的決心，今日終於得左。 蟹籽雞蛋薯仔蘋果沙律 $78蟹籽及雞蛋分別左右兩邊鋪滿了，撈勻後吃味道不錯，蘋果粒爽口不會酸，伴碟更有一件切件的橙件，多汁鲜甜，滿滿的維他命。韓國蜆肉紫蘇飯 $118好特別好韓風嘅一個飯，大量蜆肉混入韓式辣醬，炒飯亦混入好多紫蘇碎，咸咸地少少辣，如果食開一般韓國菜覺得悶悶地，不失為一個新穎嘅選擇。飯旁亦有切件橙做伴碟，隨意的把橙汁圍一圈淋上去，混合飯來吃，味覺清新了，不錯。初夏開心果窩夫 $122厚厚且蛋香鬆脆嘅窩夫，上面鋪滿士多啤梨及綿滑嘅cream，有超多開心果碎，窩夫並非普通蛋漿，入面綠色的有很香的斑斕味。 濟州柑橘乳酪 $68賣相好吸睛，用了整個柑橘混合乳酪，喝起來酸酸甜甜很清新。 熱洋甘菊桂花茶$48本來以為是普通洋甘菊桂花茶，入面放了柑橘乾片，除了有洋甘菊桂花的花香味，還充滿了柑橘的酸味，完全令我驚喜的一個組合，橙味把花茶的味覺提昇了。…Read More

川菜四圍都有得食，但係食埋環境、咁古色古香嘅川菜你又食過未？港島區朋友帶我去食好西，喺天后地鐵站出，美食雲集嘅金輪天地19樓，地鐵站直行幾分鐘就到，好方便。一出電梯就已經見到大大個牌匾寫住麗春園，門口横額對聯燈籠高高掛，古風味甚濃。入面環境更绮麗且整潔，不論是地磚、枱櫈、窗簾等都走中國古風裝飾，而且仲可以欣賞窗外無邊景色，直頭係美食+環境+風景三備俱全。除左可以點小菜，呢度都有3小時火鍋任食放題，$368/位包括：鍋底四選一(重慶烤魚 /酸菜魚鍋 /重慶鮑魚雞煲 /水煮魚鍋)、多款川味小食及火鍋配料任食，汽水任飲，絕對抵食！3小時，一於慢慢食。川味小食都有成八款咁多，因為見到有得揀口水雞，所以個鍋就唔選擇鮑魚雞煲啦，叫左個重慶烤魚。當然喺等緊個煲同打邊爐之前食住川菜小食做前菜醫肚先啦！川味小食推介-麻椒脆魚皮唔係好多地方都有得食脆魚皮，呢度有得叫梗係食啦，雖然望落去好似好多辣椒好辣，但其實佢係麻油香多過辣，食落去魚皮超級爽脆，多多脆少少辣，而且爽彈爽彈的，感覺食了多骨膠原，而且底下有好多一粒粒又香又脆的，咬下去很像炸花生或炸豆，都幾好食。川味小食推介-川味口水雞口水雞都係麻香多過辣，而且雞肉都幾滑嫩，幾有雞味，上面灑左好多芝麻，每一啖入口都食到啖啖嘅芝麻香味。川味小食推介-川味毛肚牛柏葉切到一口大小啱啱好，食落去好爽，而且唔難咬開，但比較辣一點。重慶烤魚有辣有唔辣，鱸魚炸得香脆，魚皮炸得變成薄片，而且上面灑滿了很多孜然粉，端上台時已聞到陣陣孜然粉香味，炸魚皮在窩中翻滾著，孜然粉已充分滲透在炸魚皮之中，令炸魚皮變得無比的滋味；鱸魚的魚肉很鮮甜，魚帶點肥美，有少量魚脂，口感更加嫰滑。鍋中有很多配料，有大量芽菜、薯粉、滑豆腐、萵笋片、蓮藕片等等，唔駛落單都已經有好多火鍋配料。火鍋配料都有三十幾款選擇，我同朋友本身都唔算好大食，食完幾個川味小食及烤魚之後，已經飽得七七八八，所以火鍋配料重點叫左幾樣想食嘅收尾，M5牛肉、肥牛、丸類、 鵝腸、蔬菜及芋絲等等。飲品任飲，真心覺得$368/位，好抵食，最吸引嘅原因係因為佢地川味小菜都可以俾你任食，的確高CP，值回票價。…Read More

餐廳環境木系文青風，燈光帶點昏黃柔和，令人很舒服柑橘炸雞(無骨半份)$128炸雞及年糕淋上了柑橘醬，好像塗上了光油，表面閃令令，熱辣辣吃果然是最好味炸雞即使被醬汁包裹著，外層依然脆脆的，入面雞肉一絲絲的，很香很爽滑，醬汁酸酸甜甜，令人開胃。年糕也是很Q彈，沾上了醬汁十分惹味，最底層鋪滿了粗薯條，柑橘醬慢慢流到最底下，令本身又咸有脆的薯條，添加一份清新的酸甜味。炸雞上亦有兩塊柑橘乾片，兩塊乾片絕對畫龍點睛，酸味及清新絕對為口腔帶來衝擊，重新洗滌你的每一顆味蕾，令到你食慾大開烤牛肉蛋包飯$118蛋香且蛋味濃，口感綿滑且濕潤，的確出色，而且蛋包飯入面的並不是白飯，是珍珠米炒飯，有少少配料，好有誠意嘅一個蛋包飯。旁邊是烤牛肉伴碟，烤牛肉汁比較香甜濃味，與蛋包飯撈埋一齊食，用鹹甜味帶出蛋味嘅香濃，送飯一流。泡菜豬肉煎餅$98好像pizza咁大，煎餅煎得焦脆，每一啖都會食到豐富嘅泡菜，跟碟的醬油帶點微辣，為煎餅起了提鮮嘅作用。 Tiramisu$88餐廳將tiramisu放入一個大杯內，跟其他tiramisu不一同，食落咖啡味濃，忌廉口感好軟滑，入面夾著鬆軟的海綿蛋糕，整體不會甜膩。 青檸梳打$42絕對喺打卡之最梳打用左碟豆花的紫藍色做漸層調色，用了新鮮的青檸及香葉，是天然清新的味道。 焦糖脆脆鮮奶咖啡$48頂層的奶泡很深厚，當奶泡與咖啡融合在口中時，先淡而後濃味嘅層次令人印象很深刻。焦糖味很濃郁，焦糖脆脆慢慢在咖啡中融化，飲下去會飲到焦糖脆粒。…Read More

每一次經過都好想入去試下，但好多時都滿座，今日終於試到因為佢下午茶2點至6點做緊cake set優惠，任何蛋糕加咖啡，只係$55唔怪得平時咁多人幫襯。我都叫左兩個cake set, 除左甜食之外，cafe 仲有其他咸嘅輕食，主要以包類為主，我都叫咗個墨西哥卷。雞肉牛油果墨西哥卷$42/全份除咗可以單點，哩度任何食物都可以跟套餐，而墨西哥卷仲可以選擇要半份$27。肉眼見呢份墨西哥卷好大條，好似想迫出嚟咁，落完單之後職員會幫你加熱及切開，切開左之後就會見到裡邊真係材料滿滿，雞肉、牛油果、芝士、番茄、羽衣甘藍。睇到都覺得好飽滿，咬落去，溶透嘅芝士已經滲入雞肉與其他材料之間，除咗雞肉及羽衣甘藍稍作簡單烹調外，羽衣甘藍煮得透熟，好似菠菜咁，而且一啲草青味都無牛油果及蕃茄都係新鮮即食，基本上整份墨西哥卷口味好清新，雞肉及雨衣甘難沒有太多調味，吃的原汁原味，低卡路里低鹽低油，清爽清新零負擔，好適合做完運動或者減肥人士嚟一邊食一邊飲咖啡。香橙朱古力蛋糕蛋糕layer層次分明, 外面被軟朱古力包圍，中間就是香橙蛋糕及柚子醬交替，香橙蛋糕口感比較實在、質地綿密，不是乾蛋糕的鬆軟口感，因為柚子醬大大為蛋糕增加了濕潤及黏口感，酸酸甜甜為蛋糕中和了甜道，喜歡香橙朱古力的，不妨一試這個甜酸組合。蘋果金寶散發著超級香的肉桂蘋果味，頂層凹凸的帶著酥餅或軟曲奇餅般的口感，與下層玉桂蘋果泥，有著強烈的軟硬對比。肉桂蘋果泥超級香甜，一面有蘋果粒，真係會食到蘋果，而且蘋果粒已經烘培得軟淋，不需費勁就已經很容易咀嚼，甜得來散發著果酸。這個蘋果金寶，先以嗅覺肉桂香味刺激鼻腔，再以濃郁的肉桂蘋果甜酸味刺激你味蕾，那種香味相信如果新鮮出爐熱辣辣，會更香噴噴更加衝擊。蛋糕套餐的兩杯咖啡，分別點了凍鮮奶咖啡(左)及凍朱古力咖啡(右 )。見到咖啡鮮奶比例層次分明，鮮奶咖啡的奶啡比例恰到好處，唔會出現有鮮奶味無咖啡味嘅情況；凍朱古力咖啡，由於加朱古力漿，3層層次更加分明，朱古力的甜味與咖啡比例勢均力敵，不會喧賓奪主，飲到朱古力味嘅同時都飲到咖啡嘅香濃。冇諗過社企出品都咁有水準，喺有啲驚喜而且望住出便熙來人往嘅人群及車輛，慢慢嘆住杯咖啡，其實都幾治癒。…Read More

晚上到大角咀搵朋友食飯，朋友推介一間蠔吧餐廳, 因為可以食到唔同地方生蠔，宜家仲要做緊半價優惠，最平都喺$18起叫夠一打生蠔仲送一枝餐酒可惜當日下午肚痛，避免食咁多生冷野，今餐就同生蠔無緣啦唯有下次再來啦。同朋友點了一個法國鵝肝牛柳套餐及巴馬火腿薄餅，慢慢傾計慢慢食。法國鵝肝牛柳套餐$338前菜三文魚他他法國龍蝦湯主菜當然係法國鵝肝，可以三選一，除左牛柳之外更可以選豬鞍扒或三文魚扒。首先，餐廳會為客人提供甜餐包，一上台就已經聞到熱辣辣香噴噴撕開個包時就已經感覺到餐包外層好脆，食落去口感綿密濕潤，絕對並非空氣包，味道有點似提子包，連埋牛油一齊食好香好好味。 三文魚他他以脆薄嘅法包盛載著，另外仲有蛋沙律法包及沙律伴碟。一口小吃好開胃。 法國龍蝦湯超級濃郁嘅一個龍蝦湯而且仲會飲到好濃郁嘅蝦膏味，仿佛成隻龍蝦連蝦膏打碎放入去煲湯一樣，而且濃郁到喺個口腔入面持久都揮之不去。食完餐包同三文魚他他，先令你口水分泌，再飲哩個濃郁嘅龍蝦湯，簡直係味覺嘅昇華 法國鵝肝拼牛柳牛柳點了五成熟，一刀切開後會見到中間還是粉紅色的，肉質很軟，會吃到一絲絲的肉質，而且沒有筋，絕對係一塊又厚又好味的靚牛柳法國鵝肝上面淋了黑醋，中和了鵝肝的肥膩感，鵝肝口感不會太油膩，而且有點爽彈，很容易入口，我把鵝肝放在pizza上一起吃，果然鵝肝最佳的拍擋還是烘培類。巴馬火腿薄餅到底薄餅多啲定巴馬火腿多啲？薄餅一分為六，每一塊薄餅上都有同直徑一樣長的巴馬火腿，真係心心眼。餅底喺薄身，芝士焗得焦脆可口，連埋巴馬火腿一齊食鹹鹹香香的，零負擔吃薄餅。套餐仲可以額外加配甜品，加$20有一個homemade tiramisu, 以甜品收尾，好圓滿!…Read More

同屋人去樂天，唔食胡椒蟹，唔食喇沙，試下家常小菜及老火湯，兩餸一湯，另有一番風味。乾貝冬瓜排骨湯$155靚湯特質色水清澈而濃味，哩嗰湯入面有大量排骨，冬瓜及乾瑤柱，每啖湯盡是濃郁及精華，整個湯連材料都可以食，3-4個人飲都足夠。 星馬金磚豆腐$60十分推介這個金磚豆腐，外邊炸得酥脆，而且表層脆薄，外面灑上了七味粉及椒鹽等調味料，咬下去，裡面嫰滑而濕潤的豆腐充滿豆香，令人食完一件接一件，停不了口。手剁馬蹄鹹魚蒸肉餅$85想知一間餐廳烹調及材料是否馬虎，叫一個肉餅就呼之欲出。肉餅係我其中一個最愛嘅小菜，基本上如果餐廳有提供，我都會落單。呢個蒸肉餅都食得出有誠意，食得出喺用人手剁嘅肉餅，因為真係剁到有起膠，所以食落去口感帶點彈牙，半肥瘦嘅豬肉，有少少肥脂，食落去好香唔會太乾，而且烹調時間剛剛好，粉嫰色上台，單是哩個肉餅已經好好送飯。蝦味魚子蝦球炒飯 (例)$78有大或細份(例)選擇，呢個炒飯絕對能突出到星馬菜嘅味道，炒飯炒得乾身且粒粒分明之餘仲好惹味，幾粒大嘅蝦球爽彈飽滿，魚子穿梭喺炒飯之間，喺口腔咀嚼時逐粒爆開，口感層次好刺激，亦都食得出個炒飯好夠鑊氣。酸柑香茅凍餐廳好好，飯後送左個甜品俾我地，食落質地好似啫喱好清甜，將青檸汁加入去之後，成個果凍起左味覺嘅變化，變得酸甜之餘仲更加清新，哩嗰飯後甜品好消濟！…Read More

叫得高質，當然係環境、食物、價錢等各方面有質素，我同朋友去過呢間位於鰂魚涌英皇道《幸圓》，就覺得非常唔錯了。 木系小清新路線 座位寬敞今次入座卡座，落地玻璃看到室外環境，卡座空間感十足，四人入座依然綽綽有餘。即使店內其他位置，也有不同藝術裝潢，感覺好像不同位置會讓人豁然一新的感覺。 西日fusion菜 價錢相宜又精緻餐牌食物以日本菜及西式為主，日式西式都各點了一款主食：幸圓海鮮丼及慢煮紅酒油鴨腿配自家製雜莓汁。幸圓海鮮丼($238)成12款刺身，仲有無人能抗拒的海膽，海膽鲜甜，款款刺身都新鮮，絕對有誠意。丼飯份量不少，我同朋友二人share 都夠飽。慢煮紅酒油封鴨腿配自家製雜莓汁($238)以蔬菜放成精緻嘅擺盤，絕對適合打卡。旁邊油封鴨超大隻，大過出邊食到的炸雞脾，表皮是焦脆，切開鴨腿肉質鮮嫰，食出一絲絲的鴨肉，肉質惹味既不油膩，鴨腿下鋪滿了自家製雜莓汁，鴨腿肉沾上雜莓汁一齊食，立即出現意想不到嘅味道，將味道完全提升左去另一個層次，咁樣嘅配搭好新穎。 肉桂蘋果牛角包窩夫($68)絕對喺小清新甜品系列，窩夫上舖滿3大塊青蘋果片及蘋果蓉，蘋果蓉酸酸的，估計係青蘋果蓉，淋上糖漿中和甜酸度更好味，旁邊有一球雲呢拿雪糕，一啖雪糕一啖窩夫又係另一種食法，絕對可以一個窩夫兩種味道。 特飲Capital Heaven($58)見到杯飲品個名都知真係靚到上天堂成杯特飲好eye catching 以芒果菠蘿等熱帶果汁做基底，酸酸甜甜，1天然的果汁味道不會太死甜，特別喜愛裝飾的乾橙片及檸檬片，浸一浸再放入口食，清新衝擊口腔，味覺刺激彷如上咗天堂。 總括所有食物甜品及飲品，材料高質，味道一流，擺盤精美，價錢相宜，哩個價錢，哩個食物質素，哩個環境，絕對值得回頭。…Read More

天降滂沱大雨，去左The ONE避雨，剛剛到下午茶時間，屋企人想飲茶，提議去The ONE 18樓“星海”。我都係第一次去 The ONE 樓上飲茶,一打開lift門, 已經見到視野開揚，紙醉金迷嘅酒樓。門口知客很快就接待我們入座，我被天花板紫藍的吊燈吸引著遠處有一個大台，成個環境四方開揚，無柱無遮擋視線，如果喺夜晚，成個氣氛加上紫藍色燈光，確實係幾浪漫絕對係婚宴的好地方除咗酒樓燈光，旁邊有大玻璃，可以讓日光照射，實在令人舒服。唔少客人多出拍照，因為酒樓有露天平台，飽覽尖沙咀美景，如果喺呢度搞婚宴，有埋個尖沙咀美景打卡，簡直係無敵。我都唔執輸影左兩張相屋企人提議叫個午市推介，話好抵食喎!之後再單點左幾個點心及小食。 岩鹽爆化皮燒腩仔+魚香茄子炆鴛鴦米($188)呢個午市组合，絕對夠兩至三個人食，仲要真材實料，燒腩仔半肥瘦剛剛好，外皮真係脆卜卜，真係咸咸地多多脆，好味道! 魚香茄子炆鴛鴦米,除左米粉，另外就係粉絲，米粉應該係用左新竹米粉，第一啖咬落去就覺得好惹味，雖然係炆鴛鴦米，但應該都有大火炒過，夠鍋氣先煮到咁香咁入味。海蜇燻蹄屋企人好中意食燻蹄，仲話呢度個份量咁多只係$56, 比出面抵食，而且燻蹄肉質爽嫰，好入味，好想用來送啤酒咁話喎! 黑醋柚子蜜牛仔骨我就好喜歡食呢個牛仔骨，啲肉好淋好易咬，而且甜甜地，好開胃。松茸菌春蛋燒賣成粒燒賣好實在，有菌香之餘，仲有成粒鵪鶉蛋，食兩粒都好飽呀! 山竹牛肉球肉質彈牙，入面应該放了芫荽或蔥碎，所以好香。…Read More

紅館睇show前食個快飯,天橋直入置富都會個層，6點鐘到已經見到餐廳好多人食晚飯喇，第一次食呢間“意粉狂熱”，有驚喜。餐廳職員介紹剛剛出咗新菜式，叫我哋試下，就叫咗個鮭魚親子和風忌廉鮮製意粉。三文魚切粒有煎香過，表面焦脆可口，忌廉汁香甜绵，令扁意粉增添绵滑口感。餐廳除咗意粉選擇多，pizza選擇都多，仲有大小size可選擇，點了小size的明太子海鮮披薩，可分成三至四小塊，兩個人share都好足夠。明太子海鮮披薩有好大粒蝦肉、青口及八爪魚粒，餅皮薄身但口感堅韌，所以唔會好膩。小食都試咗蒜味芝士雞翼及忌廉汁煮青口，蒜味芝士雞翼本身已醃過，帶蒜香味，烤焗過後上面灑滿厚厚的芝士粉，旁邊有蒜味醬可以點。忌廉汁煮青口，用小烤盤上枱，食得出忌廉汁放了牛油去煮，加上有檸檬嘅酸味，令到成個忌廉汁帶點清新感。最有驚喜係餐廳有好多特飲及特色甜品除咗一般大眾口味咖啡、奶茶、檸檬茶、汽水之外，仲有其他酒精或非酒精嘅特飲，呢個non-alcohol Sangria($68), 可以選擇一杯或一大瓶，一大瓶夠2人share，而且入邊有新鮮什果粒，配上荔枝口味做基底嘅飲料，清新得來好解渴。甜品我特別推介朱古力荷蘭鬆餅配朱古力雪糕。望落去好似朱古力pancake, 咬落去口感就似茶樓食到嘅鬆糕咁，口感濕潤且軟綿綿，而且朱古力特濃，即叫即製熱辣辣好好味，旁邊有一大球朱古力雪糕球及切片香蕉，實在係一份好完滿嘅甜品。餐廳價錢方面十分親民，$58起已經有一個意粉或一個細pizza, 而且一份荷蘭鬆餅原價只需$58 , 有鬆餅、生果及雪糕球，可以喺邊度搵？CP值超高。…Read More