meowkat's Profile

南豐紗廠係文青新興既打卡熱點。住係荃灣，無理由唔黎行下。Lunch time 黎到，想搵野食。但呢d 既餐廳輕食為主，想搵d 飽肚正餐唔容易，見到3樓呢間burger 係灣仔既分店。灣仔果間未食過比較唔到，但都呢到既burger 真係唔錯，仲有有heart 既lemonade 飲tim!Burger 個軟得黎又有牛油香烤過，牛肉煎到外脆入面但仲係好juicy! 餐既side 我+$8轉左個薯條做炸雞塊，原本以為係急凍nugget,原來係真．雞肉塊。 熱辣辣好味，份量又多又抵！不過另外一個餐 本來想試下佢個手切薯條，但賣哂。好可惜。下次可以再encore! Lemonade 鮮制，仲飲到鮮青瓜片同薄荷葉既清新，好正👍🏻👍🏻👍🏻出面對住個平台，天氣好可以買完拎出去食都唔錯😆…Read More

食過佢 唔會想再食香港既kfc!星期日晏晝黎到，好似去左菲律賓咁。落單果陣諗緊係咪應該講英文？😂😂😂其實都係用廣東話order。叫左個2件雞 薯條汽水加個蜜桃批。薯條同汽水正路野唔多講。個蜜桃批幾好味唔會太甜又唔會太似藥水咁既味😜炸雞熱辣辣，外脆入面仲好juicy! 脆漿唔會太厚，岩岩好。雞既大細，都比kfc 既大少少。香港既kfc 越做越頹。真係唔係幾想去食。佢好似貴kfc 少少。但我以後食炸雞會寧願食佢多過kfc。…Read More

貪方便又唔使等位黎左越一，員工態度唔錯。叫左個2人餐，湯粉味道唔錯，我個人口味偏淡，如果牛既味道再清香d 就更好。越南牛骨湯真係唔易煲。成餐都冇乜問題，價錢都okay 抵，唔使$200 冇加一，有2個小食 2碗湯粉2杯野飲，野飲仲可以揀特飲。最出事就係個牛油雞翼同鹹檸水到，咸到腎虧。牛油雞翼我都預左係油，始終又牛油又炸。但冇理由一咬個皮d油係爆出黎，都算。上面d 蒜蓉好似d 鹽唔使錢咁。鹹到苦！要整走d 蒜蓉先食到🙈🙈🙈鹹檸水又係超級鹹。飲到一半，叫侍應加返d 熱水落去先飲到😂😂😂😂唔知係咪我果日係星期三。師父刨緊馬仔，咁鬼咸🤣🤣🤣…Read More

譚仔無位轉投過黎，平日夜晚2位唔使等位。價錢中規中矩，叫左一客咖哩牛腩飯（$78)飯就夠，餸既份量可以多返少少，好彩汁既味道夠香有層次，都可以送埋d 飯，汁入面都見到有d 香茅同唔同既香料。味道唔錯有驚喜，唯獨可能怕香港人唔食得辣，冇乜辣味。仲叫左個2餸牛骨清湯金邊粉。牛丸實淨有咬口，牛味濃而且juicy。生牛肉偏瘦有咬口，但牛味較淡。最正反而係湯底，唔會太咸，味道飲到唔同既香料夠層次，飲埋d 湯之後都唔口乾，香港既越南菜黎講 算係合格有越。係位置真係有d 逼，坐得麻麻地舒服。…Read More

一個人既晚餐唔代表頹食! 我通常都會黎買餃子屋外賣。堂食, 我呢個荃灣人, 一次都未試過。因為太誇張等太耐預先打左電話黎落order, 黎到就有得拎。叫左6隻淨白菜肉水餃 已經令我超級飽肚。因為佢呢到既餃唔單止調味好味, 仲好巨形。一般既外賣膠匙羹都裝唔哂佢, 隻匙羹好似就黎唔夠力咁😂😂小小建議, 如果可以比隻大d 既外賣匙羹配返佢地既巨形餃子, 客人會食得方便d。 幾十蚊一碗餃子個湯一d 都冇欺場, 係冇味精既老火湯。有時佢仲會倒埋d 湯料比你, 有瘦肉, 紅蘿蔔 仲有魚膠幾十蚊都咁足料, 真係唔怪得之咁多人留幫襯。 …Read More

睇戲前, 黎dan ryan 食個扒 拍下拖。因為今日係halloween night, 要客人準時交枱。我地之後要去睇戲, 都冇諗住坐成晚。得2個人, 呢到既份量 又跟足美式扒房咁足料。我地只係叫左個roast...乜都有d ...share 食算。食之前個bread basket 同平時果d 有d 唔同, 仲有個walnut muffin...好香口, 唔太甜。所有麵包同muffin 都暖暖地 食完, waiter 仲問我地需唔需要refill不過真係食唔落...講返個roast...本來叫佢都係因為費事選擇恐懼症, 對質素冇太大期望。點知又幾唔錯, 份量又夠, bbq ribs 肉夠淋, 夠入味...一咬就離骨。 連腸都幾有驚喜, 係帶有蘋果果香既豬肉腸, 加上佢炭火燒過, 好香口好match! 個steak 肉味超濃, 好香既牛味。2個人淨係食呢個roast 都有d 吃力, 如果一班人黎食, 一齊share 應該幾唔錯…Read More

行過希慎既天仁茗茶, 永遠都係長長既人龍。最多人幫襯佢既飲品, 但我最中意就係佢隻茶葉蛋同雪糕。 佢地用既茶葉真係好有淡淡既茶香, 食完個口會有餘韻。約左人之後食飯都係小食個茶葉蛋好喇。點知真係好失望, 隻蛋到手係極微微既暖, 近乎凍咁滯。雖然一隻茶葉蛋只係$6, 但無理由係凍嘛🙄🙄🙄味道今日都較平時淡, 茶香勉強都叫有既, 唯一較可取既係d 蛋白冇煮到好似鐵蛋咁硬。☹️☹️☹️☹️…Read More

自從米芝蓮既光環打落去某d 小店，出左名，有時人多左 水準反而下降，再唔係就比業主狂加租。有時有米芝蓮既眷顧都唔知係好事定壞事。荃灣祥興記就係後者，得到呢個光榮之後就比業主加租加到做唔到落去。令我地荃灣人少左間咁有水準既生煎包。果日見到有個小巴車身既廣告知道祥興記終於回歸荃灣, 我終於唔使出到尖沙咀先食到佢。果日收工拿拿聲去探下佢。去到佢招牌仲貼住紅字，仲未正左營業，貼左張紙，寫住試業。食生煎包我好簡單，原味就已經係最好食!買左飛，等左10分鐘左右先有得食。始終仲係試業，各個店員都仲未係好熟習d 流程。包外賣袋都有d 雞手鴨腳。我外賣返屋企食，路程唔遠。返到去仲暖，都冇焗到淋哂。生煎包一如既往咁多汁，我一早已經預備好紙巾都招架唔住🙈🙈 噴到成枱都係汁，如果堂食既朋友真係要小心。係街到食，仲要入面d 汁咁熱，真係會好輪盡。 入面多汁，出面都仲係咁脆，加埋少少黑白芝麻，正!睇個餐牌，好似選擇比以為多左。好感動!😭祥興記終於返黎喇🤣🤣🤣🤣…Read More

母親大人生日，梗係要搵間有d 水準既餐廳。西餐媽咪又麻麻地，燒肉火鍋又太熱氣，傳統酒樓又有d 老套。經朋友介紹呢間專食陳皮既fusion 中菜，應該夠哂“正氣“岩哂我媽。先黎叫左個脆皮豆腐，好薄皮好香脆，入面既豆腐仲好軟嫩。呢d 係屋企做唔到既，出街一定要叫黎食。黑豚肉蜜汁叉燒，食得出呢個醬汁比平時食開既冇咁濃味，偏甜，更加能夠帶出肉味，黑豚肉既肉質又嫩又爽，一d 筋都冇。班頭腩肉質就夠滑，但味道就唔係好入到魚肉入面。跟住就係呢到既名菜，陳。皮。骨！呢個真係值得推介，因為我諗其他地方一定食唔到。佢既擺碟已經好靚，睇到都好開胃。一黎就原汁原味試返舊先，唔點醬都已經食到淡淡既陳皮味，慢慢咁滲出黎。佢用既陳皮真係幾靚，一d 苦澀味都冇，而且越食越濃郁，引到d 肉味更有層次。佢旁邊仲有個陳皮醬，如果中意陳皮既甘香味既人，點埋黎食，陳皮既香味就更加濃。但我唔中意太濃，蓋過左d 肉味，我都係就咁食更岩好。雖然佢叫陳皮骨，但其實都冇乜骨，都係骨附近既肉，所以肉質特別嫩滑。食完旁邊仲有d 菠蘿比客人清下個口腔既陳皮味，呢d 菠蘿伴碟都好有heart，用左新鮮菠蘿，仲要去埋芯添！最後我朋友推介我一定要叫個冰糖陳皮燉原個雪梨，呢個秋天飲真係不得了。本來黎之前喉嚨近來有d 乾同痛。黎到聞到果陣陳皮味，已經覺得個鼻腔好舒服，食埋即刻覺得非常之潤，喉嚨舒服返哂。40年既陳皮真係唔係浪得虛名！話明生日飯點都要叫個壽桃既，見人地有個好靚既轉盤擺壽包，不過原來要叫8個先做到。我地得4個人，又食左咁多野，都係散叫算la …Read More

星期六晚突然好想食燒肉，但又唔想等位。搏一搏打去伊呂波睇下有冇位。點知星期六晚都竟然有位。去到個埸都係坐得一半，有d 擔心呢間餐廳今日黎食放題，佢有分＄298 52品同＄398 60 品。男友中意食既野多數都係＄298 52品到有齊哂。今日就食住＄298 先。宜家都幾自助既形式，自己將食物編號抄係張紙上面比侍應。出餐都快，個爐都夠熱。絕對夠哂時間食到回本。為左節省時間，我地通常都會叫d 熟食打下底，一路食一路燒。唔好諗住熟食，唔係佢地招牌野就會求求其其。我其實幾欣賞佢地好有日本料理一絲不苟既精神。海鮮煎餅係熱辣辣上枱，食得出係即叫即煎，仲要係慢火煎到外脆內軟。八爪魚丸 粒粒都有八爪魚係入面，而且個粉開得好幼細，同街邊果d “日式“八爪魚丸爭9條街。連炆牛肉呢個日本家庭料理，佢都有加入日本芋絲，真係跟足日本傳統做法。天婦羅個粉漿厚薄岩岩好，油溫都控制得好好，顏色好均勻。比好多日式放題做得好好多，不過宜家見呢間有以前咁有名既高級燒肉店要做埋放題，我宜家拎佢同d 放題餐廳，感覺有d 唏噓無奈。講返d 肉 ，非常靚仔，冇將貨就價，同正價食既肉水準依舊，油花分佈好平均，肉汁好豐富，大部分既肉都有鹽味或醬油味可以揀。就連牛舌都有得任食，不過＄298 只包薄切牛舌，要食厚切既就要叫＄398。最推介牛里脊同牛胸外膜，肉嫩多汁，超滿足！就算係薄切既牛排肉都唔會容易燒到乾爭爭，一樣咁juicy！燒到個網焦左，請侍應換網手腳都好快手純熟，而且換幾多個網都唔使另外收費，有d 燒肉店只包換一次網，再換要收費…真係有點兒…不過食燒肉唔包野飲，呢樣就有d 掃興。如果可以加錢包埋野飲就更加好喇。…Read More

好耐都冇去過main st. deli , 差d 遺忘左呢間餐廳。以前係加拿大讀書成日都會食buffalo wings，無論係去餐廳定係去外賣個pizza 返屋企都可以食到。唔知點解咁惹味香口既buffalo wings 係香港好似冇乜人識得欣賞。最近見到openrice 有75折優惠又有得網上訂位。我同男友決定再去探下我既buffalo wings。千祈唔好輕視呢到既食物份量。我地2個雖然食量唔細，但都要叫得好小心，因為上次食到飽到上心口咁滯。今次為左buffalo wings 而來，一定要食返夠本。我地2個人都order 左12pc，我見佢宜家有suicide hot wings challenge 都幾過癮，不過呢排個胃唔係太聽話都係，擇日先黎挑戰下。一份buffalo wings 有雞中翼都有雞搥，比平時食既雞翼大隻厚身。味道好香辣，好惹味。炸得岩岩好，好juicy。佢配既blue cheese 醬就有少少失色，有d 稀，如果再杰d 就更加正喇！ 其實2個人食左12pc 都幾飽肚。不過都要照顧下男友既口味，佢最中意burger 加milkshake 呢個最肥仔既邪惡組合。叫左vanilla sky milkshake ＋deluxe burger。因為deluxe burger 唔單止有塊爆汁漢堡扒加埋一塊煎香左既煙肉，有少少炭火燒焦香味。呢d 先係美式漢堡！我既肥妹美式口味點會淨係有buffalo wings，仲有new york cheesecake。唔好睇呢到一件cake 過百蚊咁貴，睇過佢既份量你就知點解，佢有人地出面d cake 2－3 倍咁大。成舊磚頭咁大，真係好〝美式〞既size 但一開始太貪心食左6隻wings，打爆左個缸，最後都係食唔落甜品，唯有擇日重賽。openrice 呢個75折優惠真係超抵，折左2個人連加一都唔使＄200 一個。趁優惠完之前，一定要黎食多次！…Read More

星期六，諗住睇戲前食個拉麵打個底。男友係一蘭fans，一心諗住6點左右應該能夠避開人潮。點知都係要排長龍，睇個樣最少排1個鐘。唯有轉陣去食附近既豚王。對於我黎講，我個人鍾情豚王多d，佢既湯頭豬骨味味道夠濃得黎又冇一蘭食完之後咁口乾。我叫左豚王加5份辣，通常係食之前我都會飲啖湯，試真d先。佢既叉燒都夠滑，厚薄剛好吸到湯。有d 拉麵店整d 厚厚既燒叉燒，感覺好似豐富，但食果陣舊肉就難d 掛湯或者吸收湯既味道。佢麵既份量都夠，冇好似隔離一蘭咁得2啖。我地仲加左隻味付蛋，佢隻蛋甜醬油味道岩岩好，係蛋黃中有少少過熟，但都仲係流心既。佢個辣大豆芽配菜都係我同男友爭食既目標，雖然佢只係配菜，但都好用心整。味道層次好豐富，大豆芽入味得黎，不失爽口。微辣口味好開胃，拉麵食到一半食一啖大豆芽有消膩既效果。其實尖沙咀豚王水準比初初開果陣越黎越穩定，但點解一蘭排到嚇死人，呢到得幾個排隊呢？可能自由行天書冇吹捧，等我仲可以唔使排成個鐘先食到碗麵。…Read More

因為受傷入左附近醫院，係醫院冇啖好食。一出院放監咁，一定要食返d 令自己開心既野。雖然係平日，但係始終銅鑼灣午飯時間1點半左右，諗住一定要排隊。點知去到都有數張吉枱。職員都好細心，見到我受傷，就算得我同我媽咪2個人都比張4人枱我，仲幫我拉凳。因為2個女人，都食唔到太多野。叫左一咸一甜既野食。叫左煙燻雞肉三文治。呢個三文治好似港式公司三文治咁，個雞肉幾juicy。而且有少少煙燻既微焦味，混和埋少少既蜜糖甜味，中和返雞肉既油膩感。我中意食雞肉，所以先叫呢個三文治，但對於我媽咪黎講個主菜反而係個配菜蛋沙律。佢個蛋沙律既沙律醬份量岩岩好，唔會好濕。蛋白切成細粒，但仍然有咬口，我諗令我媽咪最中意佢既原因應該係個蛋黃整到好夠幼細，令到個蛋黃香出哂黎。  我地仲叫左2杯咖啡，一杯普通既熱latte。味道冇咩特別，對於我呢d 一日最少一咖啡既咖啡精，呢d 咖啡濃度對於我黎講，只算得上係咖啡味特飲。不過賣相都唔錯，都有拉花，配返2塊紅莓乾既曲奇。 第2杯就我既最愛，海鹽焦糖latte。雖然佢冇我平時飲開既口味咁濃，但佢旁邊果d cream 先係精華。侍應哥哥好細心咁介紹點樣去享用呢杯咖啡。飲一啖 配一啖cream，但就唔建議撈d cream 落去。d cream 上面有dd 海鹽同焦糖醬，海鹽配焦糖呢個組合真係好無敵，好有層次。cream 下面仲有幾粒夏威夷果仁同杏仁。呢杯野我次次黎都會叫！不過今次個拉花就hea 左d。好彩味道搭夠。侍應姐姐都好細心，提醒我地可以鬆餅甜品後上。既然都唔趕時間，梗係慢慢食先上甜品。鬆餅因為後上既關係，果陣都2點後，開始人客少d。鬆餅真係即叫即整，上到黎我仲見到個鬆餅出緊煙。一如既往咁水準穩定，熱辣辣食邊有可能出事！加埋d 雪糕冰火2重奏，好正。唯一要彈既係士多啤梨偏細，味道都比較淡。比雪糕同吉士醬搶哂味。可能一排冇黎，宜家銅鑼灣店仲新加左乾咖喱，新加坡叻沙。搵日再黎試埋其他新野。…Read More