食琪's Profile

Amigo雅谷餐廳58週年嚐味六道菜晚市套餐，集法式經典、香港情懷及儀式感於一身，成為城中高級餐飲的代表。我們一行四位女性幸運候補入座，筆者首次到訪，體驗既新鮮又難忘。美饌設計：細緻入微，層次豐富六道菜式由冷頭盤慢煮鮮鮑魚打響序幕。鮑魚柔嫩富彈性，藜麥沙律配山椒粉，清新開胃。緊接的是經典Lady Curzon水魚咖哩湯，湯底辛香濃鮮，口感圓潤，極具層次感。另一招牌泡沫龍蝦湯經三日三夜熬煮，香氣馥郁而餘韻悠長，精巧地平衡海鮮濃郁與絲滑口感。鴨肝醬幼滑細緻，入口即化，以自家配菜提升味覺層次，突顯主廚功力。主菜可選松露牛柳千層薯或法國鴨胸車厘子紅酒汁。筆者傾心牛柳款，牛肉軟腍肉香，松露芬芳而不搶主角，千層薯香脆而富口感。鴨胸同樣油潤多汁，紅酒醬香甜酸微妙，與鴨肉完美融合。最後以自家製咖啡朱古力杏仁餅作結，甜度恰到好處，外脆內軟，將整晚味覺之旅畫下最完美句號。餐廳環境：歐式古堡與溫馨儀式感餐廳環繞著古典歐洲建築風格，昏黃燈光、名畫裝飾、古董銀器映襯，營造出尊貴又親切的氛圍。身處其中，彷彿走進歲月靜好的老香港，特色氛圍非常適合慶祝紀念日或閨蜜相聚。每桌座位均有手工燙印名字記事memo pad，尊貴和心意倍加。女賓到場更獲贈鮮紅玫瑰，無論首次造訪或習慣高級餐廳，皆能感受到來自餐廳的溫馨祝福。筆者平日不常到高級餐廳，這種貼心禮遇更讓人感動，由細節處流露出Amigo五十多年如一、待客至誠的精神.卓越服務：細說菜式，溫暖入心服務團隊恭敬有禮，其中一位名叫Eva的員工，每一道菜都細心講解食材配搭、味道和食法，讓食客能深入瞭解並享受每道佳餚，更添品味樂趣。不論舊客新客全程照顧周到，令整個晚宴體驗倍增溫暖和安心。即場音樂：現場樂隊互動，意外驚喜席間駐場樂隊逐桌獻唱，歌聲暖入心田，賓客可即場點歌，為重要日子錦上添花。儘管未有心理準備，隨便叫一首歌也能收穫驚喜與歡樂。現場氛圍溫馨，又不失高雅，讓平日不慣高級餐廳的賓客都能自在參與，共度美好夜晚，聽完歌要即時打賞的避免佢哋企喺度等你嘅尷尬。總結：全方位高級體驗，值得回味Amigo 58週年嚐味套餐以極高性價比，呈現法式精髓與香港深厚情懷。六道精緻菜式味道層次豐富，分量適中，連食量小的食客也能輕鬆享受。細膩環境配合細心禮遇，音樂互動與專業講解，讓整晚用餐體驗由味覺延伸至情感，溫馨貼心難忘。這是一次味道、心情、儀式感共融的Fine Dining經歷，大力推薦給追求美食與心意的人士。…Read More

前幾日睇報紙介紹呢間餐廰， 雖說68蚊一個餐蛋麵都幾貴， 但提到佢地的午餐肉呀， 通粉呀都係自家制， 加埋啲乜野音樂農莊蛋等， 講到超好味咁，所以 一等到週末， 已急不及待要去試 ， 去到已經有好多人排緊隊， （仲見到李永達都係度等緊位），等左半粒鐘度就有位， 因為間餐廰係商廈入面， 有冷氣， 有位坐， 等半粒鐘都唔辛苦， 入坐後， 當然點個招牌餐蛋麵， 豈料服務員話餐肉同通粉都賣哂了， 其時只係中午十二點半咋！失望之餘都要食野架， 唯有請服務員推介其他好野食， 佢就介紹左個雞肉蛋麵同埋勁胡椒豬扒麵， 我同朋友各自點左泡沬奶茶同埋泡沬鴛鴦， 胡椒豬扒真係勁重胡椒味， 豬扒都ok 稔， 但食味只係普通， 雞肉蛋麵啲雞肉都幾滑， 但又唔算特別， 至好嘅就真係算係隻蛋了， 蛋黃杰達達咁， 都有啲蛋香， 其他茶餐廰冇食咁嘅蛋， 至於嗰兩杯野飲就普通過普通， 雖不鞋口， 但都唔滑得去邊， 最慘係無喱茶味，只係兩杯泡沬奶水而已， 講真， 水準只係中規中距， 如果佢地只係賣三十零蚊一個餐都ok嘅， 但一個麵加一杯野飲， 埋單每人要七十六蚊， 只係食啲過得去的食物又真係貴貴地， 我同朋友都致認為只係一次過了。…Read More

睇報紙至知有呢間店舖, 初初仲以為只賣麵包, 同朋友去搵, 唔識路, 撐上條長命斜撑到氣來氣喘,只因天生為食, 雖辛苦但一啲都冇諗住要放棄, 撑到上去至知連cafe , 咁仲好, 即刻坐底試, 朋友叫左一客碎蛋三文治, 我就點左一客豬扒飯, 豬扒飯唔係難食, 但亦都唔係好好食, 普普通通咁, 咖啡又係普通貨色, 當我有啲失望的時候, 朋友慷慨咁分左一半三文治比我試, 一入口, 果陣酥香、軟綿真係無以輪比, 碎蛋伴沙律香香甜甜, 味道濃而不膩,埋單$230 ,講真, $80 一客三文治都幾貴, 但見佢寫住用料大多由日本進口, 而味道又係出面其他的麵包舖做唔到咁好食, 咁貴啲都有道理, 我肯定會再返去食! 依家諗諗都流口水了 …Read More

同朋友係天后漫無目的咁搵食,見到間叫串串貢的店子, 商量一陣就決定幫趁, 我地叫左桂花蜜糖番茄、羊架、生蠔、燒腎、蝴蝶蚌、脆脆雞皮、黑糖菠蘿串、燒年糕, 仲有好幾款, 再加三罐啤酒, 第一個送上來係桂花蜜糖番茄, 番茄加上蜜糖桂花, 酸酸甜甜, 作為前菜, 十分開胃醒神, 同朋友都好滿意, 心想冇入錯黎, 誰不知跟住上來各式肉串, 樣樣都乾爭爭, 號稱脆脆雞皮的雞皮,一啲雞皮油香都冇, 乾到似柴皮, 生蠔暧笠笠, 一啲都唔熱, 食食下都怕會肚痛, 蟹蓋係交返來的貨色, 係咁意烘烘佢就拎出來俾人食, 燒年糕又係一啲都唔熱, 硬掘掘咁, 講真真係樣樣都唔滿意, 埋單兩個人食左二百八十幾, 仲要只係得半飽, 呢間店應該都唔會有下次了, 出到門口至醒起, 近天后地鐡站有間好似士多的燒烤小店, 上次係華姐清湯腩食唔飽時誤打誤撞去食過, 記得味道不錯, 決定同朋友行去再去食過!!…Read More

同屋企人去食Brunch, 早係兩個星期前已經訂位, 一入到去就即刻四圍巡下, 見其他自助餐少見的食品, 呢度都有,如即煎鵝肝、魚子醬、風乾火腿咁呀、而其他如龍蝦仔、生蠔, 一般自助餐都有的, 佢地當然都有, 話哂係五星級酒店, 出品就算唔係好食到咚一聲, 都保持到一定水準, 當日我地準時十一點就到達, 初初仲諗, 都唔知食唔食到四粒鐘咁耐, 但坐落後,試下呢樣, 食下果樣, 紅白餐酒、香檳任飲, 坐在沙發上飲下食下, 四週環境舒適,陽光透過落地玻璃洒滿室內, 與家人談談笑笑, 一會兒, 服務員上前問要甚麽餐飲, 原來不經不覺已經兩點半, 點了飲品後, 再坐一會, 正正已是三點了, 這一刻覺得, 食物種類多少、好食程度都不是最重要的, 最重要的是, 在一個悠閒的上午, 在一個舒適的環境下與家人共渡一個愉快的週日才是這一頓飯令人最感愜意的地方。…Read More

早幾日睇報紙, 先知「賣咗咁大個廣告」, 都唔知要恭喜定點好。這家店幾乎是我的飯堂, 因為屋企就住在對面 (即係泉記樓上), 試過一個月日日食呢間, 每晚準時七時半出現, 老闆都應該認得我。有時更會一個人食成條豬腩骨, 再加一碟油菜同例湯, 老闆有時都會笑住咁問我食唔食得哂, 不過平日見佢哋咁多人, 都好少傾偈。日日去呢間, 除咗好味道, 當然也因為價錢平。其實我都唔知佢哋係咪真係呃秤, 但海關捉得, 應該都無錯, 但係我都寧願相信佢哋係無心之失, 而且前日去食晚飯, 見到佢哋都已經買咗個電子秤, 在店外也裝了個公秤, 都叫做與時並進, 也知道要改善。講真, 食燒臘的人都應該知道, 燒臘鋪的行規就真係買燒肉搭豬頭骨, 係有少少騎呢, 但係呢個確實係行規, 我去中環的其他燒臘店斬料, 都係咁樣, 佢哋啱啱無畀人捉啫, 算好彩。傳統老店咁做係有少少唔啱, 但如果話要「杯葛」, 好似誇咗少少, 亦都有少少唔公平啦。我買過好多間燒味, 呢間真係算最便宜同最好味 (唔係根據重量去計, 而係見到個飯盒大小, 塞到幾多, 畀咗幾多錢, 心裡有數, 唔駛秤。) 香港呢個地方好奇怪, 有時去食自助火鍋, 佢哋明明個標價話88蚊一個人, 最後加埋所有雜費, 茶水, 醬芥, 居然130蚊一個人, 感覺都係有少少唔鍾意, 我都唔食碟芥辣, 但係某程度嚟講, 都可以叫做行規。大家都公認會有呢種情況就得, 食之前也預咗要畀茶水錢。正如買燒肉, 其實都預咗有少少錢係用嚟買無乜用嘅骨, 唔知係咪我個人無所謂, 但係食咗燒肉廿幾年, 自已買又買咗十年左右, 感覺呢種都係一貫做法, 都唔能夠叫做呃人啦。最近再興所謂「加咗價」, 但係我過去幾個月有買燒腩骨, 一年之前又係八十蚊, 而家又係八十蚊, 根本就無分別。同埋, 唔知老闆有無睇到呢個網站, 如果老闆睇到呢一頁, 我都想講聲, 作為老顧客, 點都會支持你哋, 放心! 不過, 真係要與時並進, 唔好再用老一套去做生意, 清光緒年到而家咁多年, 但係新時代, 新作風, 你加番價, 寫清楚幾多錢, 我都唔覺得有問題, 呢個時代, 明碼實價。…Read More

同朋友一行幾人去呢間佐敦店食, 唔係朋友帶住, 都唔識點去,左轉右轉咁, 好似好難搵咁, 下次我自己都唔知識得行返去呢間店呀, 因為係睇雜誌介紹, 一坐低就二話不說, 叫左個泡椒味烤全魚食, 然後至睇下餐牌睇下仲有咩野其他野食咁啦, 發覺原來係冇既, 選擇唔多, 真係淨係食魚咁滯,咁就唯有專心食魚啦, 條魚上黎,賣相甚好, 鍾意食辣的朋友未食已經口水係咁流了, 佢啲配菜: 即係芽菜、金菇、唐芹等等俾啲辣湯煲煲下咁十分好味, 加碗白飯, 食到我額頭出煙, 口中噴火, 我啲朋友就伸哂脷咁, 我一路食就已經一路諗住下次一定要再食過, 但朋友就依牙鬆鋼咁話, 辣成咁, 點食呀? 但我好想再食啊, 要諗計仔說服朋友陪我去至得! …Read More

其實華姐清湯腩已食過很多次了, 只是真係有每況愈下的感覺, 記得多年前首次去天后食的時侯, 其時華姐仲未同大利清湯腩分家, 當時覺得直情好食過九記, 此後每想起要食清湯腩總會去天后食, 其後大利同華姐分家, 當時我兩家都試過, 認為華姐比較好食, 就每次都選呢間食, 但可惜, 隔左一段時間後, 可能已没有了分家的壓力吧, 水準下降, 已不復當年滋味, 變成一碗平凡的清湯腩了, 早前朋友話想食清湯腩, 問我除了九記外, 可有其 他介紹, 想來想去, 就帶朋友去天后,朋友叫了牛腩伊, 我就叫了碟牛腩撈面食, 味道尚可, 但牛腩粗鞋多渣, 肉都痴哂係啲牙度, 口感不好, 再加上碟撈面的梘水味太重, 十分難食, 我食剩大半碟都食唔落就埋單了, 至於會唔會再有返轉頭的機會呢? 我自己都覺得好難講, 因為今時的華姐清湯腩已成為一碗平平無奇的牛腩了, 經過或者會是旦食下, 但就不會專程過去食了。後記: 因為係華姐度都食唔飽, 於是走左過對面馬路一間似係士多改裝成的串燒小店, 無位坐, 要立食的, 當時買左串燒牛脷, 一串燒腎, 一邊行, 一邊食, 竟然十分好味, 但我連佢地的舖名都無留意, 下次去開天后就一定會再試!!…Read More

天時暑熱, 但朋友提議去打邊爐喎, 我都係幾經掙扎至應承去咋, 仲要山長水遠去到大角咀呢間叫靚煲皇的東東度食, 入到去見地方簡陋, 好擔心冷氣不足會焗死我, 叫到個煲黎都覺得幾有睇頭, 大家見個煲一滾就馬上開波, 個湯底好濃, 白胡椒粒啲味好香, 夾舊豬骨食下, 全部都係有肉果種, 食到好過癮, 粟米好甜, 蘿蔔好稔, 雪花牛肉勁好食, 脂肪分佈平均, 好有牛肉香味, 仲有就係佢地有一包包叫的魚皮, 魚皮放入湯內輕輕霎下, 熱熱地但不失脆口, 食味一流, 而我地啲汗亦不斷咁流,一面食, 一面抺汗, 大呼過癮好食, 正!!…Read More

今次以經唔係我第一次去了, 我第一次上去食時, 啱啱坐低, 個店員已經話冇雪菜、冇通粉, 我一聽到就即刻好失望咁話, 吓, 冇雪菜通粉咁我都唔知食乜好了, 個店員聽到就馬上推介, 叫我食一個叫魚片蛋多, 佢話好食架, 信我啦, 咁我就當然信佢啦, 因為我真係特登入跑馬地幫趁佢地架麻, 唔食昌記, 我霎時間都唔知去食乜好呀, 咁我就叫左個魚片蛋多, 咖啡,我朋友就叫左個沙爹牛多, 奶茶, 中式既魚片加埋蛋炒, 我以前從來都估唔到可以咁好食, 我同朋友 share 黎食, 佢果個沙爹牛多就麻麻地咋, 而咖啡同奶茶都冇乜特別, 唔差, 但又唔特別好....今次我第二次去到, 一坐低, 個店員就話, 冇雪菜、冇通粉...我話: 唔緊要, 整個魚片蛋多黎先!!…Read More