LawJam's Profile

因為疫情既關係, 真係無乜點出去食飯。最近天氣熱返，疫情都緩和返，就又忍唔住成日想出去開餐。天氣一熱，就會好想食越南野，對上一次黎呢間餐廳已經成年前，佢似乎裝修左。同埋menu都加左好多新既食物﹐上次黎都係得一頁menu。每一次黎都想叫撈檬，但一見到河粉就會轉軚。特色牛湯粉﹕生牛肉同埋越南牛丸都係我最愛，呢碗真係乜都有曬，可以食啲唔同野。無論平時食唔食辣都好，都要考慮下加兩粒生辣椒，唔會好辣，但辣椒真係可以釣到啲湯既鮮味出黎，會感覺清甜好多。呢碗真係好大，同朋友share岩岩好。特上小食拼盤﹕兩條友食，加個拼盤岩岩好，呢一款有三種醬料比你點，唔同既醬配唔同既小食，店員會詳細介紹。本人鍾意食甜酸醬，貪佢夠開胃，所以乜都用黎點佢....越式滴漏咖啡夏天飲呢個真係好消暑，咁岩因為疫情既關係，窗邊既座位用灰色布隔住，中午時間影相好正。雖然叫得好似唔多野，但兩個人食真係都幾飽。…Read More

好耐之前食過一次，已經係念念不忘，所以特登約朋友再返黎呢度食我地好快就點完菜，點完菜之後，佢地會上一個免費既小食比你，呢個脆餅同埋個三個醬真係好正，不過佢有一個真係好辣，如果食得辣既應該會幾鍾意呢個小食。Paani Poori:呢一個真係好特別，第一次食，想直接放入口，侍應姐姐衝過黎阻止我，話要將啲醬倒入去個波入面先食。睇黎食印度餐都要好認真。我好認真咁將啲醬倒曬入去，再放入口，都幾好食。其實佢係一層薄薄既脆餅(波？)皮，裝住啲肉、菜，兜住啲醬，口感非常豐富，值得一試。Chicken 65:呢個係啲濃郁既醬裹住炸雞，好有韓國炸雞既感覺，但印度既風味。老實說我會再返去食呢個。佢個口感唔會好濕，仲有脆脆既口感，但醬微甜，真係好開胃，忍唔住一粒接一粒咁食。 Bhindi Masala:其實係masala山葵，因為一定要食菜嫁嘛，山葵本身就唔係濃味既菜，同個醬好夾。Chicken Masala:呢個雞係點黎夾薄餅既，個醬好香濃，好好食。Kashmiri Naan:呢個中文應該係堅果薄餅，係果醬混合椰絲既薄餅，甜甜地既口味，用黎送masala或咖哩都好適合，自從食過一次，就無再叫過普通薄餅。Young Coconut：椰子都算新鮮，食親東南亞野食都會想叫佢。…Read More

好久都無去好好食一餐啦，早排去試左呢間感覺唔錯既餐廳，唔算係好平，但我覺得好值得一黎，特別係生日或者紀念日咁，因為真係好有feel，同埋service都好有高級餐廳既感覺。餐廳既環境比較幽暗，如果係飲酒既，好適合點一杯酒，再吹下水。呢支Chevalier De Beaurignac 2009我好推薦，如果你係鍾意法國酒既，我都唔係好識飲，但覺得佢好易入口，同埋好夾啲食物，聽人講2009年既法國提子豐收，品質好好，但唔係支支2009年都好飲，呢支值得一試。三文魚他他配脆法包：我地點左兩份套餐，一齊share，首先佢上左啲麵包比我地，我都未食過呢隻麵包，入口微脆，入面好香軟，點埋佢個黑醋加橄欖油，好fresh。個三文魚卷入面包住啲芝士，真係好好食，芝士好幼滑，點埋個醬，一流。仲要我朋友唔係好食生野，比曬我咁濟。磯煮南非鮑魚配煙燻魚子醬：鮑魚煮得都幾軟身，好易切開。個魚子醬都幾濃郁，配埋飽魚好夾。同埋上面既裝飾整得好靚。香煎法國鵝肝：呢個我好鍾意，個鵝肝好香口，鵝肝本身係好濃味既，配埋個麵包同埋醬中和左個濃味，入口岩岩好。法式龍蝦濃湯：佢地個湯真係好大碟XD，本身以為好濃會好飽，又點知唔會漏。個湯唔會稀，好香既龍蝦味，飲得出好足料。飲曬成碗都唔會覺得飽左。黑松露野菌湯：我比較鍾意個龍蝦湯，可能因為本身都鍾意食海鮮。但我朋友就話呢個湯好飲啲。個湯一樣係厚身少少既質地，但唔會漏。黑松露味好足。呢個甜品我唔係好記得個名，應該係雪葩。個侍應出黎話係比我地refresh個口，跟住落黎食正餐。都幾特別。法式鵪鶉釀黑松露意大利飯：呢一個主菜佢最特別係有啲飯係隻鵪鶉入面，鵪鶉雖然細細隻，但好多肉，兩樣一齊食口感豐富，好有滿足感。香煎智利鱸魚拌番紅花魚湯：呢個魚肉真係好嫩呀，魚既鮮咪配埋佢既醬好夾，推介呢一款。焦糖布甸：食到飽曬最後黎個甜品滿足，個布甸擺得好靚，好睇又好食。…Read More

火炙三文魚野菜沙律:﹕沙律好清新開胃，三魚文燒得岩岩好，魚味好濃郁新鮮。壽司盛盒﹕呢碟壽司比我想象中有驚喜，魚生都好新鮮，而且飯既份量岩岩好，居酒屋黎講二百幾蚊，真係可以叫。牛肉壽喜橈﹕我好鍾意個壽喜橈，個湯底甜得黎唔會膩，因為有個蛋係中間既源故，澇埋啲牛肉好滑，啲菜都好甜，呢個出色。黑松露溏心蛋﹕兩個人食一人半粒岩岩好，上面既黑松露都好香，溏心蛋就好滑，一啖放入口食曬佢係基本。明太子雞翼﹕個雞翼層皮燒得焦香脆口，粒雞翼脹卜卜，去埋骨，入面塞滿左明太子，啖啖肉，相信鍾意明太子既，都會鍾意呢個。芝士免治雞肉棒﹕芝士好濃味呀，雞肉好香口呀，好好味鐵板泡菜芝士雞﹕呢味我都好鍾意，泡菜味好夠，其實應該配白飯會仲正，咁就係一個set啦。食到去個餃子既時候，我地已經好飽，但餃子上面加層芝士真係比我想像中夾，好食。兩個人真係叫得太多，撐住走。…Read More

次次係大埔行完山，都會黎呢間雞煲刷下佢，補充返流失左既卡路里。今次同男朋友踩完單車，又再心血來潮想黎食。佢個裝修真係好有feel，行懷舊路線。我地都幾早黎，6點左右，呢個時候可能係鋪頭岩岩開，無咩人。我地叫左個雞煲，唔辣既(因為有人唔食得辣)，等左大約15分鐘左右，雞煲就上黎啦。我記得以前係唔使等咁耐既，可能係因為岩岩開門，即叫即煮。黎到店員幫我地攪均啲材料，就可以即刻開餐。啲雞肉好滑嫩，一如以往咁香濃，黎食雞煲就係食佢既重口味，如果食得辣，加辣會更正。食曬啲雞，就可以用佢一早提供定湯底加入去啦。加完煮一陣、就可以開始打邊爐~手切肥牛﹕啲油脂既分佈好均勻，食落口都幾香濃既肥牛味。羊肉﹕因為男朋友最愛係羊，所以打親邊爐羊肉係必點既。呢個羊肉好香羊味，唔錯既一樣。西班牙豚豬腩片﹕好肥既一碟xddd，但啲脂肪好香，唔怕，運動完好多quota。炸魚皮﹕魚皮好脆好香口，單食都好味。炸響鈴﹕呢個鈴似係鮮炸咁，好穌脆，點一點個雞煲汁再入口係享愛。菜呢啲基本，啲菜都好新鮮好甜。呢餐真係超滿足。…Read More

間coffee shop唔顯眼，仲要開係暗巷入面，要搵一搵先見到。間鋪頭有少少復古既感覺，佢地都有賣蛋糕，但未有機會試。買左杯大size既榛子咖啡，二十幾蚊既咖啡有拉花真係好有誠意。杯咖啡都唔錯，味道唔會苦澀，因為有加入榛子醬，如果係正常份量對我呢啲唔食甜野既唔太討好，所以特別要求少甜，佢地都可以做，很好。最後出黎甜味岩岩好，加入咖啡好夾，味道都幾濃郁，對於初飲咖既人，可以係入門選擇，因為咖啡味係同榛子味係各一半。下次有機會再試幾他。…Read More

係旺角球場隔離有條街好多野食，仲要唔少都好高質。呢個居酒屋既門口好靚，一入去係居酒屋個啲bar枱既設計，佢仲有二樓，位都算幾多下。漬牛蒡 ：點左個前菜，個牛蒡口感有少少似蓮藕咁爽口，但就唔會拉絲，個味道微甜，好開胃。花：精選刺身拼盤（四點盛）老細話唔係每次既魚都一樣，今日個四種魚係金目鯛，吞拿魚，池魚，油甘魚，全部都係好新鮮，入口啲甜味出曬黎，呢碟都唔平，不過如果對魚生有要求咁一定要試。間唔中都ok既。辛口野菜鍋：蠔呢個鍋係用左兩種麵豉既（店員介紹），雖然我唔係好清楚啲唔同麵豉既分別，但係個湯就好好飲，都幾鮮甜。佢有四粒蠔，啲蠔係微熟，因為唔係熟曬，有生蠔既口感，入口好滑。我條腸係比較敏感，係劣質生蠔檢測器。呢間既親證非常新鮮。但係完全食唔到生蠔既人可能就要揀其他菜式喇。甘鯛甲鱗燒：呢個魚好得意，係可以連魚鱗一齊食既。可能因為佢既鱗比較細，炸得好脆，個魚肉就非常鮮美同埋滑。店員會教你用個粒粉紅色既（蘿蔔？）蓉，撈勻啲甜豉油，再用魚鱗個邊去點黎食。未食過烤蒜粒，我地叫左串xd，個蒜粒一啲都唔辣，仲有少少甜，好意外。另外食左佢個燒銀杏，又係第一次食，個口感有少少似糯米粟。免治雞肉棒、雞頸：個雞肉棒包住既應該係明太子，我係第二度食過呢個，好咸，呢間既濃淡適中，好味。個雞頸一開始我地無打算叫，但老細話好滑既，個時仲心諗，雞頸無肉食嫁喎lol，但黎到估唔到好多肉，佢話呢度有三四隻雞喎，不過唔使自己起肉既感覺，估唔到係咁爽既，呢串推介。雞腎：粒粒都好大粒好爽口。秋葵：都係好脆口。Sake呢個sake係用黎送串燒既，我飲完第一啖，同朋友個comment係講「好易入口」，老細行過黎，話支野唔錯嫁，辛甜酸個比例岩岩好，即刻昇華左成件事。佢仲介紹埋個酒杯，入左酒再搖下佢既話，個空氣對流會有鳥鳴聲。個酒杯飲既時候都會有聲。我個人認為似口哨聲多啲。不過個清酒送小食真係一流。水信玄餅：係透明既jelly球，再加沖繩黑糖，好可愛既甜品，黑糖唔會好甜，食到飽飽再食呢個甜品好清爽。最後唔可以唔提鋪頭裝飾既三隻可愛蟹仔，老細話係裝飾，同時鮮炸都好食，我囧。又發掘到一間高質既居酒屋，下次再黎試下齋飲酒同叫小食。…Read More

上次黎已經係半年前，突然好想食，所以又再黎過。今次叫左支白酒，用黎chill chill佢，比想像中質素要好好多，如果鍾意白酒可以試下呢支。係唔好甜，微甜偏澀。鐵板豬頸肉通菜（馬拉盞）：個通菜既味濃得岩岩好，但完全唔覺得咸，所以整體係好香，啲通菜好新鮮，呢道菜很可以。燒安格斯西冷牛扒：西冷牛扒有成兩塊，半成熱，份量好多，而且牛肉好嫩，最重要佢個汁係泰式個種酸酸地，同個牛扒好夾。原隻鮮魷筒釀糯米飯：呢個糯米飯真係好長，其實兩個人食真係幾多，我仲地叫左個粉，但佢個魷魚煮得唔會硬，係嫩嫩地個種，又係有汁配，覺得泰式汁同好多既菜式都好夾，因為我地用佢去點牛扒既汁，都一樣好好食。泰式鮮蝦炒金邊粉：金邊粉既份量好多，對比上面咁多樣，因為金邊粉食親泰國菜都會點，所以失色左少少，但其實都係好好食既，不過兩個人食咁多份量都真係好飽。真係食咁多次都無失望。…Read More

呢間餐廳就咁睇相都只係覺得有個主題，好似幾得意咁。但黎到之後先發現成間野好似樂園，因為啲公仔真係整到好大隻，而且係包圍住你，無處不在。我地一入到去就已經哇哇聲，因為真係太可愛。同埋佢地個點餐係可以用電話點既，都真係幾方便。芥末脆芋手撕雞：呢個真係好特別，佢加左芥辣，但唔會太攻鼻，同埋有啲脆脆地既脆條係仕面，口感好豐富，食到芥辣既要試下呢個。叉燒布拉腸粉：個腸粉係我見過裝飾得最靚既xd。有賣相，味道都好食，雖然係精緻點心，佢個價錢比起普通點心都只係貴少少，我覺得呢個質素值得。火焰叉燒包：個叉燒包都好食，佢個樣真係好可愛，有啲唔舍得食佢。蛋撻：個蛋撻上面個張我地以為係紙黎，但原來係食得既，蛋撻唔會好甜，個皮焗得好蘇脆，呢個都好食。秘汁和牛粒竹筒飯：呢個既汁撈飯真係好正啊，同埋啲牛都好好味，我地忍唔住食曬啲牛先，得返啲飯，只能撈汁xd。呢個布甸唔係中式個種，佢比較實，一個人就咁食佢會飽左一半，佢好在唔會好甜，好味。成晚都食得好開心。…Read More

好耐之前已經食過一次，因為念念不忘（個任食薯條同沙律），所以又一次返黎。今次黎到發現個menu唔同左，好似易睇左啲。我地叫左個兩個set share。西班牙黑毛豬拼盤：呢個拼盤之前食過，已經好鍾意，最主要佢個肉唔會覺得咸，感覺得出係好新鮮整出黎既，配埋個蒜蓉包真係好match。虎蝦濃湯：呢個之前未試過，朋友揀既係是日餐湯，咁係羅宋湯，我就想試佢個虎蝦濃湯，要加錢。個蝦啲肉好結實，同埋真係好大粒，店員教我地飲之前要用個粒蝦搞一搞個湯先，個湯堅係好濃蝦味，好飲。任食薯條同沙律：呢個係要refill嫁，任食既都好食呀。加拿大豬鞍排：個豬排好大塊，肉質都幾嫩。呢個唔錯。Crab Cake：會覺得個豬排只係唔錯，係因為比個crab cake完全迷住左。佢地落足左蟹肉，係啖啖都係肉呀，如果好鍾意食蟹既人(例如本人)，會好鍾意呢個cake。芝士蛋糕：呢個芝士蛋糕又係好好食，佢係跟餐既，細細件，唔會覺得罪惡。overall最鍾意係個crab cake同埋個虎蝦湯。…Read More

韓式既烤雞真係好好食，呢間係香港其中一間貼近韓國口味既烤雞店，隔一段時間就會想返黎返兜。招牌凱撒沙律：呢個沙律真係好大碗，以呢個價錢黎講好抵，同埋佢啲菜好新鮮，麵包都烤得唔錯，因為係食好多肉既關係，所以叫返個沙律中和下係必需的。果味蒜香烤雞加甜辣烤雞：因為朋友鍾意蒜，而我鍾意甜辣味，所以就叫左個兩溝。佢蒜味個個係無咁多醬的，甜辣就成塊都係醬。兩樣放埋一齊一樣咁好味，蒜味其實都夠濃，完全無比甜辣蓋過個味。兩個都滿分。…Read More

原本係打算去食其他餐廳既，點知太多人，離開既時候路過呢餐廳，唔算多人，同埋環境感覺唔錯，就入黎試下。牙買加辣雞漢堡：個雞肉幾唔錯，辣都係岩岩好，啲菜咁都好新鮮，整體都好食，不過啲菜咁放，食得有啲論盡。佢地個餐，可以配沙律，或者薯條個啲，我叫左個薯條，烤得好脆，個茄汁係茶餐廳個種多糖茄汁，我都幾鍾意haha。佢仲有野飲送，配左杯洛奇甜梅茶，個味係幾得意既。有啲酸有少少甜。Overall係間唔錯既餐廳。…Read More

又係跟同事黎食午餐，中午黎其實真係好多人排隊，我地地都好神心，因為一場黎到食佢，所以等成45分鐘都等。然後我地入去坐底點完餐，侍應竟然上左個薯條比我地，話要我地等咁耐唔好意思，所以送個小食比我地，我地即刻哇一聲，真係未受過咁好待遇。中午去食午餐，會有湯同埋餐包比埋你。個餐包得微脆，入面好軟，點餐湯好正。個薯條比想像中好食，仲要係送既，真係好窩心。我地大家都食得好開心。其實因為想食tabasco, 所以點左呢個蕃茄意粉。佢同個醬好夾，個意粉都幾好食，如果個份量可以多返少少就好喇xdd。見佢地出面都有好多蛋糕，每一樣都好吸引，下次有機會再黎試下。…Read More

本身好鍾意食東南亞野，通常食開都係出去九龍城或者港島個啲地方，但係估唔到係將軍澳都有一間咁既餐廳，仲要好多人排隊，咁我跟大隊試下。地道串燒（牛，雞）：間鋪頭既裝修好似普通連鎖餐廳咁，但係第一道餸送上黎，估唔到個樣可以咁地道。個串燒串得好香口，肉質都幾嫩，真係有驚喜。軟殻蟹米紙卷：呢個我自己好鍾意，啲菜同啲三色椒放得岩岩好，仲可以balance返軟殻蟹既油炸感，成件事食落好清新，同埋第一次食紙米卷係軟殻蟹既，我自己覺得比傳統既更好食haha。馬拉𦾟炒秋葵：其實呢間餐廳既菜式都幾新下，又係未見過既馬拉𦾟秋葵，個味道都幾濃下，係幾好食既。炒金邊粉：佢個隔離放左好多辣椒係度，我本身都好食得辣既（我自認為），所以諗都唔諗就撈曬落去，好辣。但個粉係好食既，不過真係要小心落。手作班蘭椰絲卷：呢個又係未試過，佢入面有啲椰絲係度，整體感覺都幾得意。…Read More

呢間餐廳既位置比較偏，但其實呢頭有唔少bar。呢間比較隱閉，但見到環境好似唔錯，所以黎一試。可以因為我同朋友係星期一夜晚黎，比較少人，成間餐廳bar都比較幽暗。佢分左2邊，一邊裝修得有啲舊時代酒館既feel，應該係主要bar既位置，另一邊就比較有情調，我諗係餐廳位。iPad係用黎睇酒類menu, 食物就另有紙menu, 都幾得意。我地2個人，叫左一份set meal share, 另外叫左個牛排同埋雞翼做小食。份量黎講食完好飽。Set dinner 有四樣野，包括左前菜，小食，主食同埋甜品餐湯同沙律係放埋一碟，個湯似係南瓜湯xd, 口感好順滑，入口微甜，好飲。朋友特登指名點set就係為左呢個蟹肉脆燒賣，賣相好精緻，我無睇清楚個名，成粒放左入口，然後同朋友講：我平時好憎食吞拿魚，但呢粒勁好食喎。然後我朋友答：其實佢係蟹肉，你無改變過你對吞拿魚既討厭。其實佢蟹肉好多，係個口感同吞拿魚有啲似，咬咬下食到蟹肉既鮮味，同埋有魚籽既微咸，所以整體鮮味更出。鮮蝦海膽三文魚籽扁意粉：份量唔算好多，但都非常鮮，特別係個兩粒蝦，肉質好扎實，呢個意粉好唔錯。個蛋糕好精緻，有啲朱古力味，同埋好creamy，我唔係好知佢個名，但好好食xd。自家製水牛城雞翼：另外我地都叫左個雞翼share，呢個雞翼既味道好濃郁同juicy，另外佢唔會好濕，雞肉好嫰，重口必點。燒美國頂級安格斯牛柳：個牛排好大塊，我地叫既係5成熟，個牛好嫩好嫩，個碟邊有啲酸菜做裝飾，食得既，都幾特別。Vampire Didy:呢杯酒特別在中間有一間圓形既冰，所以係幽暗既燈光下會有少少反射光，好靚，杯酒幾唔錯。間餐廳bar仲有遊戲區，可以係度食飯，飲酒，玩game直落。同埋可能因為餐廳位環境好幽暗，好適合吹水，我地吹左成4粒鐘先走xd。…Read More