plee的個人專頁

講真，唔係因為鍾意周圍試，一定唔揀呢度。朋友想食台灣嘢同Waffle, 所以我揀咗呢度，佢啲set lunch 真係唔敢當，揀無可揀試下佢個鹽酥雞糖心蛋肉操飯，但真係麻麻地，唔好食，唔知係因為唔酥唔香唔脆，定係只係唔係我鍾意嘅類型。而肉操飯完全唔係我諗咁樣，佢啲肉操就只係一pet汁，其實冇乜肉碎喺入面。可能係我唔識嘢，原來肉操係咁嘅至真？！我叫嘅嗰杯玫瑰薄荷甘菊茶先難飲到暈。以後唔會再叫呢個，或跟本唔會再黎。再者係佢哋啲waiter/waitress好唔專業，叫極都唔過黎，又漏單，我明嘅，而家啲後生最好係乜都唔駛做就有錢收。唉！…查看更多

7 October 2017與友人相約喺度食Tea, 我就由於晏都未食，所以叫咗個Bistro set, 就可以有一杯drink + small salad/French fries + Quiche/croque/hot dish + soup/dessert. 我揀咗 green tea + caprese + provencale quiche + soup of the day (pumpkin soup). 友人就完全唔肚餓，所以揀咗個 small Greek salad 就算。Pumpkin soup 好好味，不濃不淡剛剛好，沒有渣，好滑。quiche 入面係有zucchini, 所以比平常嘅冇咁漏。平時食呢種quiche好容易好快飽，呢個有zucchini 清新一點。但老實說，沙律就強差人意。我叫嘅沙律係以火箭菜為主，我朋友叫嘅係以青瓜為主，明明佢個Greek salad寫咗係應該有 red onion, olive, tomato; 而我嗰個 caprese, 就係cherry tomato, basil pesto. 最後個greek同caprese 係幾乎一樣，只係greek用青瓜，caprese 用rocket. 裡面大家都係cherry tomato, 同 mozzarella. 好失望。其實greek都好少用青瓜，都夠晒怪，仲要連樣都唔美觀。下次真係唔敢喺度食salad.服務亦屬一般，成日忘記我哋要嘅嘢，不過勝在笑容可掬！…查看更多

放工喺公司附近搵食, 見有放題任食又突然好想狂食嘢, 決定黎呢度一試~~放題款式都算多, 但嘢食就不敢恭維, 尤其熟食! 魚生及火炙系列壽司反而都叫食得過, 唔係霉嗰種~~但熟食, 就所有熟食都係同一個汁同一個味道, 無論係牛肉卷, 燒肉定係牛扒, 都係一模一樣嗰個汁, 係類似燒汁又咸咸地咁, 食到唔想食!蟹粥同酒煮蜆完全無味, 食咗2啖就冇再食~~甜品種類都算非常多, 但味道全部一般~~ 最有趣都算係可以自己整紅豆魚仔餅; 本來好想食雪糕, 但佢個雪糕係自己吱出黎嗰隻, 我見到隔離枱攞完返黎, 杯嘢係完全水狀, 即係唔係雪糕咁樣, 我見到都唔想食~~~一句講晒, 真係唔好食, 雖然魚生壽司還可以, 但如果只係食呢2樣嘢, 就唔黎呢度啦~~~…查看更多

我同朋友2日完全唔知自己排緊乜, 只係想搵個地方食飯, 只係想食日本嘢, 所以埋到去就拑飛仔等位, 好彩都唔算等得耐, 只係有啲驚訝, 已經成8:30pm, 都要等位! 香港人食飯真係好晏呢!坐低先知係牛涮鍋放題, 叫咗最平嘅日牛涮涮鍋 ($148) 90分鐘放題, 一個蕃茄湯底, 一個雞湯湯底! 我從來沒有食過一人一爐嘅牛涮鍋, 感覺好新奇, 而且一人一個鍋真係好方便又衛生!我哋2日只係食咗4底牛肉, 就夠飽了, 但畢竟, 仲有出面任攞嘅菜, 菇, 丸類, 豆腐等, 都足以可以填飽個肚!牛肉真係一般, 好薄, 而且唔嫰口, 有點靭, 口感同豬肉居然一樣, 較鞋! 雞肉見到都唔想食! 豬肉都係好薄, 但以豬黎講, 都算係咁!  其它嘅菜菇丸類, 可以話係一般, 冇驚喜!  連最後食嘅乳酪雪糕都真係味道好淡!唔係貴, 但亦唔見得好抵食!…查看更多

呢日farewell一個公司同事, 所以去食好啲! 喺附近試咗呢間午市70分鐘燒肉放題! 好奇怪, 上黎OR見到啲人啲相, 呢間嘅燒板係圓形嘅, 但我哋去嘅當日, 佢已經係長方形打斜鐵板, 感覺新穎咗, 因為我之前去食過另一間都係用斜板! 而且見好多食評好似麻麻, 但我又覺得OK!  可能因為食晏嘅關係, 要求唔太高, 但$88燒肉放題, 其實都算唔錯了, 雖然確實有啲肉係唔太好食! 去到只有一張枱2個學生喺度食, 我哋5個就坐卡位! 我今次冇影到相, 只有一張單據嘅相! 薄切五花肉應該係最好食嘅, 五花腩都唔錯, 夠爽口! 鐵板旁嘅粟米芝士蛋我哋都encore咗一次, 只係略嫌芝士唔夠多, 所以味道唔重。千祈唔好叫厚切牛, 因為真心麻麻! 服務都唔錯, 係可能比較少waiters, 要等到見到人先可以叫嘢, 但一叫都好快有反應!…查看更多

行街經過聞到呢度充斥住我最愛嘅芝士味, 忍唔住走咗入去, 見到啲芝士撻超好味咁, 決定要買一個原味試下, 咁有嘢食, 自然要配返個嘢飲, 見又有我鍾意嘅巨蜂梳打, 不過係配茶, 幾特別咁, 點都要一試!原味半熟芝士撻 - 有濃濃嘅芝士味, 好香好味; 唔太漏唔太甜, 啱香港人口味!巨蜂梳打茶 - 好好飲, 亦唔太甜, 巨蜂味道好出, 唔覺係溝糖水, 仲有用乾冰喺底, 一路飲一路有煙出, 好得意呢!…查看更多

最近真係勁興食韓國式燒肉店, 我呢排都食咗幾間, 今次同朋友明知呢啲燒肉店係會好長龍, 所以一放工即過黎食, 好彩未有長龍出現!  見到佢有個勁抵嘅二人餐, 忍唔住就叫咗黎食, 加埋佢啲前菜, 同叫咗一支韓國啤酒同一支Soju, 原來非常夠食不達止仲好鬼飽肚!!潮食二人餐 ($268)Korean Beer ($18)Peach Soju ($68)潮食二人餐 - 二人餐好抵食, 有頂級安格斯肉眼扒一大花, 豬肋肉, 海鮮拼盤 (內有2隻原粒帶子, 4條多春魚, 同八爪魚)。肉眼扒係靚肉, 有雪花, 口感好好, 唔靭, 係靚扒黎, 份量都十分大，兩個人食都可以每人食到好幾舊大大舊，十分抵食。豬肋肉比較爽口, 但肥肉較多; 原粒帶子非常大粒, 非常新鮮, 真係好喜愛; 多春魚就較遜色, 冇乜春, 係咪表示佢只係公, 而非乸呢? 八爪魚都唔錯, 夠新鮮。Peach Soju - 原來想叫柚子味嘅燒酒, 點知賣晒, 唯有要peach, 不過呢支都有好香嘅桃味, 燒酒味唔搶, 值得一試呀!! 除咗小食, 仲有個爐邊嘅蛋, 入面係有啲蕃茄, 但大多數店嘅芝士, 有少少失望, 但都非常好味!!  總知呢餐真係又抵又好食又飽肚!!  爭啲唔記得一提, 服務真係好好, 佢如果見啲客唔多識燒, 都會幫手燒下, 但我估大前題係店員唔太繁忙底下!…查看更多

從來冇食過咁難食嘅烤魚!  朋友住附近, 大家諗住試一試, 店舖門面比較鬼鼠, 因為要落幾級樓梯, 但門面睇落都幾古式古鄉feel, 但入到去, 就同普通火鍋店無太大分別。叫咗：尖椒重慶皮蛋 ($38)麻辣烤魚 - 沙巴龍躉 ($268）天下第一骨 - 五枝 ($88)綠茶芋泥餅 ($42)尖椒重慶皮蛋 - 賣相不錯, 黃皮蛋非常清新好味，唔太漏，配上薄薄嘅麻辣汁，係好香，皮蛋外層似啫喱咁，有啲彈牙。尖椒出奇地唔太辣，可能比麻辣汁蓋過。麻辣烤魚 - 沙巴龍躉 - 沙巴龍躉絕對唔適合用作烤魚。此餸上時，魚肉完全痴骨，冇肉食，煮耐咗後，魚肉可以夾到啲出黎，但已經非常老。賣相雖然好靚，但味道強差人意。失敗之作。天下第一骨 - 五枝 - 香料好香，但肉質稍為有啲過火，有點硬，另一失敗!綠茶芋泥餅 - 呢個唔太甜嘅甜品非常出色。綠茶皮好熱好脆，裡面唔太厚嘅芋泥唔甜，令人想一食再食。原以為會似老婆餅入面嘅料咁厚同甜，點知咁有驚喜。雖然個小食同甜品係唔錯, 但一心係想黎呢度食烤魚, 真係超失望, 因為真係勁難食!!! …查看更多

今日男朋友早收工同我食晏，好開心，所以同佢黎咗呢度食，諗住早啲食lunch可以唔駛迫人又可以坐得舒服啲。所以入到去就有靚卡位坐。我哋叫咗櫻花丼、火炙三文魚壽司、帆立貝壽司、三文魚腩壽司、大吞拿魚腩壽司、火炙鰻魚壽司、鹽燒三文魚鮫。除咗個午餐櫻花丼係無咁好食之外，其它都算唔錯。係食壽司嘅好地方。個丼始終係碎魚生咁上，令人覺得有欠新鮮。值得一提係佢個火炙鰻魚壽司，冇諗到咁大塊，冇魚骨，咁香，咁入口即溶，絕對推介。至於我嘅另一至愛燒三文魚鮫都好唔錯，2件都好大舊好抵食呢，燒到皮脆肉香，讚！不過說實話，我對個大toro係有少少失望嘅，因為唔太大舊，而且唔夠口感，失咗嗰種大toro應有嘅風範。總括，呢度其實都好唔錯嘅，希望佢嘅水準可以keep住，否則就會似元氣元祿咁被淘汰㗎啦。…查看更多

呢間嘅北角店就食過2-3次，尖沙咀就第一次黎，感覺寬敞好多。一向都覺得佢唔錯，料靚又新鮮。湯底揀咗金屋藏嬌, 個名咁特別, 大家都好好奇到底係點嘅, 見佢係皇牌湯底, 原來佢嘅金屋係指金黃色嘅湯底, 而嬌就係指鍋中嘅半隻新鮮嫩雞。鍋料入面有花膠、竹笙等, 雞味濃郁, 配料又足。但可能我哋人多, 好似每日只係食到一舊大嘅雞肉, 或者仲有一舊小嘅雞肉嘅。極品本地手切肥牛 - 呢個肥牛, 真係非常不得之了, 大家都對佢讚不絕口, 太太太太太好味。點能夠估到佢可以肉質咁嫰, 口感咁好, 手切得剛剛好絕對唔係薄, 但亦唔太厚!西班牙豬肉 - 平時打邊爐都未必會揀豬, 因為通常都好鞋口, 但呢個認真唔同, 一啲都唔鞋, 仲要非常淋肉, 係可惜多啲肥肉, 但正因為佢肉質夠肥, 先至可以咁好味道!白蟮片 - 又係另一個出色嘅餸, 一定要叫, 白蟮好爽口, 冇乜骨, 食完仲想再食!招牌三拼餃 - 可能本人對餃類一向麻麻, 我覺得呢個比較普通, 而且大家都覺得唔太抵食。新鮮炸腐皮(炸響鈴) - 三秒響鈴, 記得大家食時, 只可以浸湯三秒即起, 其實我都唔知係咪三秒, 我通常數三下, 一, 二, 三就起, 唔係快數都唔係慢數, 係中慢數! 響鈴新鮮, 我試過有啲店舖真係比啲好似用千年油炸過嘅響鈴比人。呢個顏色係淺淺地色, 所以係好食嘅嗰隻!鮮淮山  - 好少地方有鮮淮山食, 但我哋女仕們真係好鍾意食鮮淮山! 呢碟鮮淮山水準有啲參差, 因為碟中有啲淮山好爽口, 有啲就較熟較淋, 明明落鍋時間一樣! 爽口嘅真心好食呢!! 其實我哋仲叫咗手打四寶丸, 我忘記咗影, 我覺得個四寶丸稍為硬/實咗啲, 唔夠煙靭! 有啲over, 但應該唔係我哋落水太耐, 我試過早啲攞起都係咁!  可能足料用手鏈到實一實掛, 哈哈~~總括而言, 呢間嘢都食物非常新鮮呢! 唯一係我哋個位冷氣唔太夠, 食到我哋流晒汗咁, 有啲辛苦呢!!…查看更多

同Best Friend有好多密偈傾, 行完街夜夜地又唔想搵啲會早閂門嘅食肆, 所以大家決定黎呢間喺聯合附近嘅茶記食個快嘅晚餐, 然後主力傾偈!雖然呢度係茶記, 但個裝修同嘢食都有少少似翠華, 食物款式都唔錯, 有中, 有西, 但唔算多。我點咗豬軟骨鮮蝦菠菜水餃麵, 我哋再叫一個菜芯同木耳share 食!豬軟骨鮮蝦菠菜水餃麵 & 菜芯 - 普普通通, 不過不失木耳係有啲驚喜, 因為佢個蒜溶辣椒做得好好味, 酸酸地又蒜蒜地咁, 真係食唔停口!價錢就唔係最平, 但亦唔係太貴嘅, 坐到卡位我哋不知幾開心, 如果大家都會黎附近又想坐耐啲, 呢度都唔錯, 又遠離咗最旺嘅旺角, ok咁啦!…查看更多

明知呢度係要等齊人先可以入座, 又明知呢度極多人等位, 今日同好朋友約咗6點鐘就上黎呢度等食晚飯, 好彩大家都唔係遲到人, 所以真係一上到去就可以有位坐! 開心到暈!呢度嘅魚生尤其是Toro真係出名新鮮好味道, 我可以每個月黎一次都唔會厭! 今次我叫咗自選三色魚生飯, 有大Toro, 三文魚同埋帆立貝, 我哋仲叫咗個牛舌share食, 真係唔駛多講, 呢度嘅魚生好味程度應該唔可以用言語或文字能夠形容! 自選三色魚生飯 (大Toro, 三文魚, 帆立貝) - 大Toro係太過多根咗少少, 但都不能掩飾到佢入口即溶嘅口感, 真的好肥美, 如果想要少根啲, 可能叫中Toro已經可以滿足到!  三文魚超新鮮, 雖然其實好多地方嘅三文魚都唔會差得去邊, 因為流量真的好大, 但佢嘅鮮甜我真係可以講係數一數二!  帆立貝非常之大隻, 好厚身, 真係好值回票價!   牛舌 - 其實我一向都唔鍾意食牛舌, 但日式燒嘅我就無所謂; 而呢間嘅牛舌直頭係 very good, 佢係厚身得黎又唔會覺得佢似牛舌, 燒得爽口唔會林, 咁樣整法就非常易入口及可口!! 總括, 呢度係100分, 永遠都會係, 唔知點解可以咁新鮮咁好食, 好有生意道德, 收得唔算貴, I love it!!!  …查看更多

呢度連星期六、日都有早市優惠。呢日星期日早咗起身有嘢做，做完就黎嘆個1+1早餐套餐($25.8)，係一個粥或飯配指定嘅一個點心。我哋叫咗2個1+1再加多個點心就飽晒！柴魚花生粥 - 柴魚好香口, 粥底好滑, 料好多, 正 鳳爪排骨飯 - 份量剛好一人, 如果一個人黎食呢個1+1套餐, 簡直係Wonderful, 唔駛講, 呢個一定唔會難食!潮州蒸粉果 - 呢個皮略為厚咗啲, 不過我食過好多間啲粉果都係咁上下, 我估潮州粉果係一定要咁掛~~瑤柱珍珠雞 - 呢個好好味, 因為好足料, 係飽肚之選魚肉釀青椒仔 - 魚肉同青椒煎得好好, 冇分開到, 辣就唔太辣, 平時好辣好正, 呢間呢個就唔太辣, 但都好好味道!呢度啲阿姐好好人, 又好快手, 一叫即刻過黎, 完全冇渣流灘, 係我最鍾意嘅原因! 服務一流呀! …查看更多

其我真係好少行街，自新世紀裝修好後一直都冇黎過。今日終於路經黎呢度食個晚飯，突然好想食日本嘢，所以諗住一係千両一係試呢間未試過的。上到黎見到又唔駛排隊，所以就扑鎚試呢間。說實話都有少少後悔。叫咗一人一杯特飲，一杯巨峰梳打，一杯peach 梳打，2杯都好好飲，可能我一向都鍾意呢2種味嘅梳打，同埋呢啲都算係簡單嘢，所以好難會難飲。再黎就係雜錦刺身併盤，賣相好好但味道真心一般，好似冇味道咁。三文魚當然可以，因為流量快，水準一定唔差。但其他刺身真係唔好食。但呢個刺身係抵㗎，因為刺身個數量係好多下。再黎就係関西雜錦海鮮燒餅 - 呢個好好味呢，個燒汁剛剛好唔會太酸，燒餅亦做得適中唔會太淋太一pat咁，係有驚喜嘅！最後就係燒豬頸肉 - 呢個係失望透啦。佢嘅味道就好似搵水白烚完之後，搵火壇一壇個面，然後直接上枱。簡單啲講，係完全冇味。如果唔係有個沙律醬點，就等於白烚豬頸肉，求祈非常。仲要個肉唔爽口，係淋身，有點over嘅淋身。我敢講呢個叫難食。食物雖然一般，但我確實喜歡佢嘅裝潢，有啲熱鬧嘅感覺，有日本風同居酒屋嘅味道！總括係可以再比機會，有一半嘅餸唔好食，希望有其他嘢食ok啦。…查看更多

朋友鍾意食啲特別啲嘅嘢食，今次佢揀咗西班牙嘢。呢度顧名思義係西班牙小食，但我哋都好白痴咁黎諗住食晚飯，但實質啲嘢食係細細份咁，最啱傾偈飲嘢咁食。由於時間都叫做早，酒精類飲品係buy 1 get 1, 但係一定要同款。我同朋友就叫咗一人一杯rose, rose 一向係我鍾意嘅酒，因為我覺得佢係介乎紅酒同白酒間，以前嘅我係鍾意紅酒多啲，而家我就偏白酒或rose. 全餐廳只有一款rose 揀，所以都好快就決定到而order. 我哋叫咗個House Burger - 賣相真係好好，食落味道都好好，餐廳好細心地幫我哋切開咗2份。佢嘅burger 唔係買返黎嗰種漢堡扒，而係自己用啲牛肉刴碎而成，所以食落比真正嘅漢堡扒更好口感，更juicy. 佢嘅薯條更加係我喜愛嘅嗰種，粗薯條是也，上枱時熱騰騰咁又香又脆，真係令人愛不惜手。再黎就係一個叫 Sword Fish Ceviche, 原先以為係啲煎魚扒嘅嘢，一上先發現其實佢係切成好大粒嘅劍魚刺身咁，極之新鮮，非常之驚喜！配上大量onion, 魚咁大舊咁上都唔覺腥! 原先我哋只叫咗以上2種，但係其實waiter 一早已溫馨提示我哋啲portion 好細，我哋2個女仔都應該唔會夠食。所以最後叫多一個西班牙菜中最為知名嘅 mini cold cuts, 諗住唔夠食就出去食街邊嘢。mini cold cuts 有3款：lomo, salchichon, 同chorizo, 仲配有幾片細片嘅多士。其實我唔知邊樣打邊樣，只可以話喺我張相中，長型碟裡有3種 cold cuts, 而我同朋友不約而同覺得最上面嗰隻係最好食，佢係帶有少少辣味，唔太咸味道適中；而中間嗰隻就係類似Parma ham 嘅口感，但佢冇咁咸，係稍為淡；下面嗰隻就比較咸，食2-3塊時就會好鍾意，但食得太多就會覺得過咸。其實都冇諗過食完晒3樣又真係有飽意。嗰度環境非常好，夠情調，燈光暗暗地，真係好適合飲嘢傾偈！讚！…查看更多