托爾頓's Profile

A La Bakery 喺淘大商場開業已一段時間，除咗售賣法式麵包、蛋糕、曲奇餅外，竟然還有咸蛋和皮蛋﹗據聞喺自家農場出品；店內設有堂食，最近還推出粥品，當然要試試。之前光顧過幾次，只是買麵包，而堂食倒是第一次，堂食半自助形式，先購票，然後搵位坐低等食，白色餐桌配透明坐椅，清新簡潔，給人一種舒適閑逸感覺。我點咗個皮蛋火腿粥加十八元配熱朱咕叻，一客all day breakfast 配黑咖啡，同囡囡share食，熱朱咕叻拉咗花，真係好有誠意，而且味道濃郁；皮蛋火腿粥好綿，好有home feel，還有大大件鹹火腿，好夠味，而佐粥嘅牛角包粒，經過再度烘焙，鬆脆了很多，放入粥內浸軟，質感有點像油炸鬼，但沒有油炸鬼般油膩，哈﹗原來牛角包係可以咁食。all day breakfast不過不失，炒蛋夠滑，而餐廳用嘅係自家品牌，金澄澄嘅喜馬拉雅鹽和胡椒，金胡椒味道並不單純，還有濃濃嘅香料味，加咗金鹽和金胡椒，味道提升咗好多，馬上有驚喜。即磨咖啡的香味，總是那麼吸引。…Read More

近呢半年得寶商場改變咗好多，除咗牛下新城外，還開咗好多新食肆，商場二樓最近開咗間泰國餐廳，以車站為主題，餐廳佈置很簡樸，白色瓷磚，有點似浴室瓷磚，色tone有點暗沉，火車外型的餐廳外牆設計，門外商場走廊位還擺放了幾張用餐座位。今晚餐廳客人比較多，Reception問我介唔介意入內搭檯或選擇門外座位，我當然選了後者。在門外座位望向餐廳，好有坐在路邊攤檔看火車嘅感覺，打開餐牌，價錢合理，唔算貴，最重要嘅當然要試試質量，我點了馬拉盞炒介蘭、冬陰公（大）同炒金邊粉。首先上嘅係馬拉盞炒介蘭、唔知係咪介蘭仲未逢時，有少少起骨，雖然時值深秋；金邊粉味道適中，唔太甜，炒得又唔油膩，屬上佳之作，可惜碟頭細咗尐，兩個人食唔多夠喉；食泰國菜當然唔少得冬陰公，喺我嚟講，冬陰公簡直係整餐飯嘅靈魂，雖然今餐只得兩個人，總是要鍋大的。冬陰公用明爐上，熱辣辣，散發陣陣香茅和南薑香味，而且好足料，鍋內還有幾隻煲到出晒味嘅開邊大蝦，相信鮮甜味已溶化在濃濃的酸酸辣辣甜甜的湯中。…Read More

景皆曾經有位日藉日本餐廳店東，很少聘用本地大廚，因本地廚師很難托擺脫地道烹調觀念，不自覺地滲透其日式料理中，因而失去原有風味；日本人對料理和食用材之執著，由此可見一班。星期日出尖沙咀購物完畢，已到吃晚飯的時候，女女興致勃勃的提議到 Doraya Japanese Restaurant Doraya吃晚餐，皆因兩星期前，朋友們請她到Doraya Japanese Restaurant Doraya 慶生，回來大讚Doraya的吞拿魚蓉腩蓉鮮甜味美，值得再度回味，因而極力推介，而她當時所拍的食物照片也相當吸引，這個當然不會錯過。今天客人很多，但二人檯就不用等。定食包括茶碗蒸、前菜、沙律、味噌湯還可以加十元轉蜆湯，看來很不錯，女女照舊褐但點了海膽配藍吞拿魚腩蓉丼定食，而我點了香蔥伴藍吞拿魚腩蓉丼定食；茶碗蒸迷你版，配料充足，味道正常，只是質感略為結實和熱度不夠；藍吞拿魚腩蓉顏色偏紅，不像一般吞拿魚腩蓉的粉紅色，吃了一口，竟然伴了生洋蔥，味道勁似港式快餐店的漢堡飽；原來餐牌所指的香蔥是生洋蔥，而不是傳統的青蔥，難怪味道是那麼奇特，把傳統的味道完全顛覆了，我真有點費解，日本人著重食才原有味道，一般只會加青蔥；當初我以為把生洋蔥揀走，問題就解決了，誰知撥開表面，內裏的更不堪，魚腩蓉色澤很暗啞更呈現啡褐色，好像加了醬油似的，還有陣陣魚腥味，而白飯表面亦相當油，看來魚腩蓉的脂肪已分解，滲入了白飯。一向不喜歡浪費的我，只好撇走表層白飯，加醬油青芥末和熱茶，改做茶漬飯，但仍掩蓋不住魚腥味，吃了幾口茶漬飯，放棄了，結果還是做了大嘥鬼。女女見狀，很委屈的向我連聲說對不起。我將這種狀況分別和兩位侍應反映，但他們的答覆是：「下次可以order走洋蔥。」，「加洋蔥是要味道豐富尐」。我明白今次是個別事件，但當餐廳要設計菜單，加入新煮意而有別於傳統做法的同時，亦應在餐牌上加以說明，給顧客作出正確的選擇。事後有朋友問我，何不退回﹖跟據我過往經驗，出了狀況通常都是餐廳主動提出回收，我甚少要求退回，原因，你懂的。回到家裏，仍感到氣味縈繞，留有餘腥。…Read More

上到淘大三期最近大執位，從以前嘅一店獨大，現分拆成三間特色餐廳，當我步入二樓商場，三間特色餐廳嘅receptionists各自的遞上餐牌，很親切地介紹餐廳特色，我選擇了XOXO Café Lab,係一間台韓料理，餐廳以湖水藍作為主色調，門口擺放一個小型百子櫃，櫃上面還放了枱燈和聖誕小飾物，好有文青之家的感覺。芝士忌廉菠菜雲吞年糕，忌廉汁好creamy，韓國年糕烟烟靱靱，即台灣人所說的好「Q彈」，菠菜雲吞較特別，意大利雲吞，菠菜餡料，雲吞皮竟然似廣東鹼水雲吞皮味道，集廣意韓三家大成，果然有創意；除此之外，還有個創意菜色 ~ 抱泡鍋飯，喜歡新嘗試嘅我，當然唔會錯過，我揀咗青介抱泡鮮魷魚麵醬飯（Wasabi Bubbles Fresh Squid Rice in Spicy Soy Bean Sauce），賣相很好，鮮魷魚麵醬鍋飯躲在泡泡之下，泡泡很輕，輕得像一口清風，清風過後，剩下青介餘韻，鮮魷魚麵醬鍋飯的份量相當迷你，只見鮮魷魚和泡菜，說好的辣麵醬味道似乎沒有。餐廳還有一項優惠，拍下食物照片上載到餐廳FB及現場即時到FB打咭，即可獲得$50現金券，可惜，這個優惠很難似乎送出，餐廳位置在FB是找不到的，因為該位置在FB仍然顯示上一手的餐廳。…Read More

幾個月沒到過旺角火車站一帶，今日行經黑布街，忽然眼前一亮，原本的海味店，已轉手成為一間特色餐廳，特色的意思是指店面設計，一間以木為主題的餐廳，門前落地玻璃，不過這位置的景觀真是麻麻喇。我好奇的走過去看看，知客好有禮貌請我入去試試，配合餐廳的木的主題，中間放了棵光禿禿的樹幹（哈﹗光棍，應節啊﹗），樹幹下的長餐枱配以一根根的木頭為櫈，每根木頭的年輪都不同，好原始，對於我這個城市人來說，可能會坐唔慣；由於午飯時間已過，餐廳沒有其他客人，我選擇了坐在靠牆的沙發角落位置，牆上還有一根根的樹幹作裝飾；感覺好舒服，好寧靜的獨自以木為伴地享用這頓午餐。香濃海鮮湯，有著濃濃的蝦湯底，湯內還有幾隻鮮蝦，有喝龍蝦湯的感覺；餐包質感與蛋糕有點相近，味道層次較豐厚，帶點蛋糕般的綿密和濕潤，配以味道清新鮮茄蓉伴食，味道跟海鮮湯相當匹配；至於主菜安格斯牛扒，五成熟，火喉控制得剛剛好，肉質鮮嫩粉紅無肉筋，醮牛扒的肉汁做得很出色，濃稠而無奪去牛扒鮮味，餐飲加廿元可轉特飲，我選了薄荷朱古力牛奶咖啡，但薄荷朱古力味道不夠特出，被咖啡蓋過了，無甚驚喜。最後，侍應遞上一盒牙簽，哈﹗牙簽盒也是木紋的，果然連細節也做到足。…Read More

自從上次試過夾饃涼皮，對陝西菜念念不忘，意猶未盡，再去走訪其他陝西菜菜館，喺openrice search到一間陝西菜小店~有緣小敍，地點有點吊腳，要食好嘢，行多幾步都值得，午市已過，全店只得一兩枱客，感覺好優閒，家庭式經營，貼心嘅個人化服務方式，客人可以隨心所欲地選擇自己可接受嘅辣度，任意要求剔走自己唔喜歡的調味配料。我點咗五香驢肉，老陝湯蕎麥餄烙，羊肉餃Biang biang麵，同老闆娘推介陝西汽水，有兩款味道選擇，我鼓起勇氣點咗罐酸梅湯試試。哈﹗酸酸甜甜，味道討好得令我有點喜出望外。羊肉餃Biang biang麵，我選擇微辣，一條過，一匹布咁長嘅宽條麵，伴醬汁同炸紫菜碎木耳絲一齊食，鹹鹹香香，濃郁惹味，滑溜同帶點煙韌；羊肉餃餡料韭菜多過羊肉，突出唔到羊肉嘅味道，被韭菜蓋過了；五香驢肉唔係咁多地方有，必食；味道隨和得令人易於接受，驢肉好焾，質感似午餐肉，特製醬汁少少辣，配五香驢肉嚟食，味道多了分層次；老陝湯蕎麥餄烙，外型同日本蕎麥麵差唔多但質感完全唔一樣，蕎麥餄烙比較滑，湯底好濃，好足料，有肉碎、土豆片，同香料味道，夏天吃略感油膩，配陝西冰峰酸梅湯，酸甜味道中和了一些油膩感，頓覺清爽了很多，話雖如此，始終都是冬天吃較佳。 …Read More

約咗朋友去紅館睇演唱會，早到咗成個鐘，無謂喺火車站尐食肆同人迫，上openrice睇吓紅磡有咩好嘢食，search到西香記，食陝西嘢，幾特別，又唔貴，值得一試，該店係快餐店形式，老闆女畀咗張點餐紙我，填完購票，不過老闆娘見我好似有選擇困難症咁，叫我入去坐底慢慢填，入去原來有夾饃涼皮套餐，包飲品，我點咗孜然牛肉夾饃，金牌擀麵皮，唔敢試陝西汽水，都係穏陣尐飲coke zero算喇，孜然牛肉夾饃，饀料有洋蔥青椒同牛肉絲，饃嘅質感好實在，唔黐牙，烘到熱辣辣，仲有濃香嘅孜然味，食落好暖胃，好舒服。金牌擀麵皮，係煙靭嗰隻，配青瓜絲同麵筋，青瓜絲切得好幼，一pat腐乳色嘅芝麻醬，味道好淡好淡，麻醬味似有還無，加咗老闆娘推介嘅涼皮特製醬汁同辣油，仍然覺得淡，最後都係要加鹽調味。…Read More

久聞妹記室內大牌檔盛名，尊程試試，呢度規矩要人齊才安排入坐，靚女老闆娘喺門口做知客把關，我哋人齊唔使等就入咗去。睇緊餐牌，已有個阿姐好有耐性standby等落單，而且態度好好，我點咗脆皮炸豬手，鬼馬油炸鬼，酥炸筒蠔，呢度效率好快，話咁快菜全部上齊。鬼馬油炸鬼幾特別，墨魚滑釀油炸鬼，不愧為招牌菜，可惜墨魚滑貎似落粉太多，食落實的的咁，唔夠爽口彈牙；脆皮炸豬手，皮炸得好脆，肉好滑，唔太鹹，好正﹗隻豬手好大碟，結果食唔晒，要打包；酥炸筒蠔一碟五隻，我食咗一隻，味道好鮮，好creamy；食食吓至發覺碟碟都係炸嘢，後加咗碟蝦干豬潤浸時蔬，蝦干好靚，豬潤好「鞋」，兼且帶有血水嘅腥味，no good。整體而言，呢餐總算不過不失，但冇驚喜，同埋冇我預期嘅大牌檔鑊氣。…Read More

星期日食完早餐去元創方睇展覽同打書釘，hea咗成個下晝，有尐肚餓，出到蘇豪區，已五點鐘，Sunday brunch同 all day breakfast都收晒，晚餐又未開始，行落去見有間門口貼住米之蓮食肆嘅餃子店，於是入去試試，可能未到晚市時間，冷清清得一枱客，但不斷有客人入嚟買外賣生餃子。我一向鍾意試新嘢，點咗海參三鮮餃同羊肉京蔥餃，香辣豬耳同豆漿，從外型嚟睇，兩款餃子睇落都係差唔多，首先試海參三鮮餃，餡漲卜卜，有海參、鮮蝦同豬肉，師傅切得好幼細，唔留意都睇唔到有海參，味道確實唔錯，唯一可惜就係食唔到海參嘅質感；羊肉京蔥餃做得相當出色，整個羊肉餡被肉汁包圍著，濃濃嘅羊肉味，京蔥同羊肉已完全混和在一起，連我這個不吃蔥的人也無從挑剔。香辣豬耳好脆，有青瓜絲墊底，醬汁比我想像中辣，不過又辣得幾過癮，除此之外就食唔到其他味道喇。至於豆漿係屬於大路嘢，本應冇乜好寫，但味道有尐似維他奶。…Read More

喺公司附近餐廳食到悶晒，趁星期六公司冇咁忙，同事揸車出去T2食lunch，一行三人，十二點零鐘到，呢個時間機場員工好多都未放飯，唔使等位，入到去快快趣各自order咗個午餐跟羅宋湯同餐茶，我揀咗吉列豬扒跟飯，而同事分別揀雞扒拼羊扒跟飯同鴨飯；嘩﹗我個餐竟然有兩大塊吉列豬扒，豬扒外層炸到好脆，內裡好滑唔韌，而且保留肉汁，好好味，白飯熱騰騰，配燒汁，我同事嘅雞扒拼羊扒都係配呢隻汁；個餐嘅份量對於我嚟講實在太大，結果食唔晒，又要做大嘥鬼喇。今餐唯一缺點係我杯餐熱檸茶有生水味。完揸車返去都唔使遲到，哈哈。…Read More

晚餐諗唔到食乜好，經過明輝，見到晚餐都抵食，有湯有茶有白飯，入去點咗兩個晚餐，漁香茄子火腩煲同西蘭花炒牛肉。首先上枱係漁香茄子火腩煲，侍應阿姐知我叫咗兩個晚餐，一次過上晒兩個白飯，真貼心；火腩同漁香茄子汁好鹹好鹹，茄子汁撈飯都覺得鹹，廚師似乎手重咗，好彩茄子冇事，軟硬適中，兩個人就咁搶食晒尐茄子食，火腩就要逐件放入杯茶度洗過至食得，平時我好少咁做；洗碗阿姐今次真係多得我唔少。西蘭花炒牛肉都唔掂，牛肉冇乜味就預咗喇，但西蘭花仲差，有少少似牛油味，有少少似。。。。，味道好複雜，唉﹗我都唔識得形容，總之係「奇」味無窮，可能尐西蘭花放入雪櫃度太耐，吸收咗雪櫃其他食材嘅味道啦﹗結果成碟喺番度，我自己都覺得好浪費。呢間餐廳我幇襯過幾次，一向都幾OK架，唔知點解今次咁失去手勢。…Read More

母親節食飯想Walk in 唔使等位，只可以選擇食 early dinner，我未夠六點到 King Ludwig，唔使等，即時有位，但七點九要交枱，推開門，侍應好大聲好高速同客人講 happy mother's day，氣氛真係好好，每枱都準備咗母親節禮物，女女拆開嚟睇過，係一條圍裙同相架，侍應仲逐枱埋去替媽咪影全家福，PR工夫做到足。我較喜歡飲尐甜甜地嘅嘢，我揀咗 Snow Ball； 1 litre Arcobräu Dunkel分兩杯上， 1客 Port knuckle 同 Small Sausage Teaser。出菜效率相當高，Port knuckle好快送到，豬手好大隻，上枱前 waiter 好尊業咁將隻豬手解體，起骨開六件，肉好滑好焾，又夠juice，最正就係塊豬皮，烤到卜卜脆，仲有薯仔酸菜伴碟；Small Sausage Teaser 份量都唔細，有紐倫堡腸、維也納腸同牛仔腸各兩條，最好味係有牛仔腸，有酸菜同煙肉墊低，酸菜吸收咗煙肉嘅鹹香，中和咗酸味，味道層次豐富咗好多。食完仲有成個鐘至交枱，有尐意猶未盡，加多個Baked Alaska，等咗十零分鐘，Baked Alaska好大份，上枱時點著火，白色外層，上面加上鮮生果，襯托藍色火焰，外觀好靚，被火焰燒焦部份，脆脆地，留有少少酒嘅餘香，整體味道唔係十分太甜，相當出色。最窩心嘅就係呢餐當然係由女女做東道啦。…Read More

喺尖沙咀食中午飯都幾難搵位，見麥奀記有位，入去試試，坐低即叫碗食雲吞麵，首先試湯底，好有地魚味，麵質彈牙，冇鹼水味，雲吞細細粒，鮮蝦夠爽口，豬肉同蝦比例適中，是上乘之作，但份量就奀咗尐喇，自問非大胃之人，食完感覺空空洞洞，完全唔飽，後加碗滑牛粥，滑牛粥粥底略嫌稀咗尐，牛肉夠焾夠滑，但冇乜牛肉味，整體都OK啦。午餐淨係食粥麵都要七八十元，似乎奢侈咗尐。…Read More

喺九龍城食完個early dinner，順道去Patisserie Tony Wong朝朝聖，過到去差唔多到咗傍晚時份，飾櫃內蛋糕已所剩無幾，選擇唔多，我揀咗Chocolate Lover同last一件嘅Raspberry chocolate cake，堂食碟上。Raspberry chocolate cake簡單red velvet外層，唧花裝飾加上金箔，酸酸Raspberry mousse剛好調和了朱古力mousse甜膩，中間的一層脆脆，加上brownie餅底，豐富了整體嘅質感。Chocolate Lover係一件華麗嘅朱古力拼盤，Metallic Pink Macaron夾著pink velvet 朱古力心心, 視覺上已很吸引，Oval型淡朱古力mousse，質滑細膩好似鵝肝醬，還隱約感覺到橙酒嘅餘韻，哈﹗可能係我諗多咗，mousse上面加上粒粒朱古力啫喱同點點金箔，brownie餅底被濃濃嘅朱古力溶和了，變得很稠很滑，每一部份都精雕細琢，但欠缺呼應。…Read More

行完青衣城，攰攰地，搵間餐廳醫醫肚，歇歇腳，見Pizza Stage環境幾relax，又唔使等位，waitress安排咗個靠牆位置畀我，呢度樓底高，環境好開揚，坐得好舒服，我order 兩個lunch，兩個主菜分別係煙三文魚凱撒沙律配墨西哥粟米片，同芝士龍蝦汁帶子扁意大利麵，可以兩個人share嚟食，加$13 upgrard 咗套餐加配甜品，我揀咗松露芝士餅；皇冠酥皮周打海鮮湯好鮮甜，好足料，周打海鮮湯有蜆肉、蝦、魷魚、仲有青口粒，麵撈打得好薄，但好creamy，加黑椒更令鮮味提升。煙三文魚凱撒沙律配墨西哥粟米片，煙三文魚好一般，片得好薄好薄霜一般嘅芝士，散落喺沙律菜上面，而沙律菜好新鮮，最出色係醃過嘅車厘茄，有濃濃嘅香草味；見到枱面有支油醋，個餐又冇餐包跟，結果忍唔到口，攞咗嚟點沙律。芝士龍蝦汁帶子扁意大利麵，睇落好油，龍蝦汁加芝士，連同青島貝一樣size嘅帶子，質感好重，但好好味。唔知係咪心理作用，松露芝士餅食到隱約嘅松露味，哈﹗諗多咗喇，試真尐，其實係雪櫃味，no good；最後，飲番杯紅茶消消滯。…Read More